Shan Missions

လိၵ်ႈဢေႃးဝႃႇတႃႉရူဝ်းမ

Chapter   ၁       ၂       ၃       ၄       ၅       ၆       ၇       ၈       ၉       ၁၀       ၁၁       ၁၂       ၁၃       ၁၄       ၁၅       ၁၆     

၁၄ 

ယႃႇပေၸီႇယၢင်ႇပိူၼ်ႈ

၁ ယင်းဢမ်ႇမီးတၢင်းဢၼ်ၸီႇယၢင်ႇၼိူဝ်လွင်ႈတၢင်းဢၼ်မီးတၢင်းတွပ်ႇၵၼ်ထဵင်ၵၼ်ၼၼ်ႉလႄႈႁပ်ႉၶၢမ်ႇဢဝ်ၵေႃႉဢၼ်တၢင်းယုမ်ႇမၢတ်ႈႁႅင်းလဵၵ်ႉႁႅင်းၵေႇၼၼ်ႉတႃႉ။

၂ ၵူၼ်းမၢင်ႈၵေႃႉယုမ်ႇဝႃႈတၢင်းၵိၼ်ၵူႈၸိူဝ်ႉၵူႈပိူင်ပဵၼ်ဢၼ်လီၵိၼ်ဢေႃႈ၊ဝႃႈၼႆသေၵေႃႈၵေႃႉဢၼ်တၢင်းယုမ်ႇမၢတ်ႈႁႅင်းလဵၵ်ႉႁႅင်းၵေႇၼၼ်ႉၸမ်းၵိၼ်ၽၵ်းယိူဝ်ႈၽၵ်းၶဵဝ်ၵူၺ်းဢေႃႈ။

၃ ယႃႇပေႁႂ်ႈၵေႃႉဢၼ်ၵိၼ်ၵူႈၸိူဝ်ႉၵူႈပိူင်ၼၼ်ႉႁဵတ်းဢမ်ႇပေႃးၼင်ႇႁိုဝ်ၵႃႈတီႈၵေႃႉဢၼ်ၵမ်တၢင်းၵိၼ်ၼၼ်ႉ။ၵေႃႉဢၼ်ၵမ်တၢင်းၵိၼ်ၼၼ်ႉၵေႃႈယႃႇပတေၢင်ႇဢပျႅတ်ႈၵႃႈၼိူဝ်ၵေႃႉဢၼ်ၵိၼ်ၼၼ်ႉ။လွင်ႈမၼ်းၸမ်းၽြႃးပဵၼ်ၸဝ်ႈႁပ်ႉဢဝ်ၵေႃႉၼၼ်ႉယူႇဢေႃႈ။

၄ မႂ်းပဵၼ်ၽူႈလႂ်လႄႈတၵ်းလႆႈၸႅတ်ႈထၢမ်ၸီႇယၢင်ႇၵူၼ်းဢၼ်ပိူၼ်ႈတၢင်ႇၵေႃႉဢုပ်ႉပိူင်ႇၼၼ်ႉ။မၼ်းၼၼ်ႉလႆႈႁွတ်ႈထိုင်တၢင်းဢၼ်တႄႇယူႇ၊ဢမ်ႇၼၼ်၊လူမ်ႉတူၵ်း၊ၸွမ်းၵႃႈၼင်ႇဢၼ်ၸဝ်ႈမၼ်းၸီႇယၢင်ႇၼၼ်ႉၵူၺ်းဢေႃႈ။မၼ်းတၵ်းလႆႈတႄႇယူႇဢေႃႈ။လွင်ႈမၼ်းၸမ်းၽြႃးပဵၼ်ၸဝ်ႈတတ်ႈၼိုင်ႇႁဵတ်းႁႂ်ႈမၼ်းတႄႇယူႇဢေႃႈ။

၅ ၵူၼ်းၵမ်ႈၽွင်ႈထၢင်ႇဝၼ်းၼိုင်ႈမျၢတ်ႈသေဝၼ်းၼိုင်ႈဝႃႈၼႆဢေႃႈ။ၵမ်ႈၽွင်ႈၸၢင်ႊထၢင်ႇဝၼ်းၵူႈဝၼ်းမိူၼ်ၵၼ်ဢေႃႈ၊ဝႃႈၼႆဢေႃႈ။ႁႂ်ႈၵူၼ်းၵူႈၵေႃႉတူၵ်းၵၢင်ၸႂ်သေၵမ်းလူၺ်ႈ။ၵေႃႉဢၼ်ပႂ်ႉဢၼ်ၵမ်ဝၼ်းၼၼ်ႉထွၵ်ႈလူၺ်ႈၸဝ်ႈၽြႃးသေလႄႈပႂ်ႉၵမ်ဢေႃႈ။

၆ ၵေႃႉဢၼ်ၵိၼ်ၼၼ်ႉၵေႃႈပႃးတင်းၸႂ်ဢၼ်ထွၵ်ႈလူၺ်ႈၸဝ်ႈၽြႃးသေယဝ်ႉတၢင်ႇၵျေးၸူးၸဝ်ႈလႄႈၵိၼ်ဢေႃႈ။ၵေႃႉဢၼ်ၵမ်တၢင်းၵိၼ်ၼၼ်ႉၵေႃႈတၢင်ႇၵျေးၸူးၽြႃးပဵၼ်ၸဝ်ႈသေလႄႈမီးၸႂ်ဢၼ်ထွၵ်ႈလူၺ်ႈၸဝ်ႈၽြႃးသေယဝ်ႉၵမ်တၢင်းၵိၼ်ဢေႃႈ။

၇ ၼႂ်းႁဝ်းၼႆႉၽူႈလႂ်သေၵေႃႉသေၵူၼ်းဢသၢၵ်ႈလိပ်းပုၼ်ႈတူဝ်ၸဝ်ႈၵဝ်ႇဢမ်ႇၸႂ်ႈ။ၽူႈလႂ်သေၵေႃႉသေၵူၼ်းတၢႆပုၼ်ႈတူဝ်ၸဝ်ႈၵဝ်ႇဢမ်ႇၸႂ်ႈ။

၈ ပေႃးႁဝ်းဢသၢၵ်ႈလိပ်းၸိုင်ႁဝ်းလိပ်းပုၼ်ႈၸဝ်ႈၽြႃးဢေႃႈ။ပေႃးႁဝ်းတၢႆၵေႃႈႁဝ်းတၢႆပုၼ်ႈၸဝ်ႈၽြႃးဢေႃႈ။ပိူဝ်ႈၼႆလႄႈႁဝ်းဢသၢၵ်ႈလိပ်းသေဢမ်ႇဝႃႈ၊ႁဝ်းတၢႆသေဢမ်ႇဝႃႈ၊ႁဝ်းၸၢပ်ႈသႅင်ႇၵၼ်တင်းၸဝ်ႈၽြႃးဢေႃႈ။

၉ လွင်ႈမၼ်းၸမ်း၊ၸဝ်ႈၶရိၸ်ႉၼၼ်ႉၶၢမ်ႇတၢင်းတၢႆလႄႈဢသၢၵ်ႈသမ်ႉၶိုၼ်းလိပ်းႁႂ်ႈလႆႈပဵၼ်ၸဝ်ႈဢၼ်ဢုပ်ႉပိူင်ႇၶဝ်ၸိူဝ်းဢၼ်တၢႆဢိၵ်ႇတင်းၶဝ်ၸိူဝ်းဢၼ်ဢသၢၵ်ႈလိပ်းၼၼ်ႉဢေႃႈ။

၁၀ ႁဵတ်းသင်လႄႈမႂ်းၸႅတ်ႈထၢမ်ၸီႇယၢင်ႇပီႈၼွင်ႉမႂ်း။ႁဵတ်းသင်လႄႈမႂ်းႁဵတ်းဢမ်ႇပေႃးၼင်ႇႁိုဝ်တီႈပီႈၼွင်ႉမႂ်း။ႁဝ်းၵႃႈမီးတင်းသဵင်ႈတင်းလူင်တၵ်းလႆႈႁွတ်ႈထိုင်ၵႃႈတီႈၽၢႆႇၼႃႈပလၢင်ႇဢၼ်ၸီႇယၢင်ႇတြႃးၽြႃးပဵၼ်ၸဝ်ႈၼၼ်ႉၵူႈၵေႃႉဢေႃႈ။

၁၁ ဢၼ်မႃးၼႂ်းၵျၢမ်းလိၵ်ႈလႄႈဝႃႈၸမ်း၊-ၵႃႈၼင်ႇဢၼ်ၵဝ်ဢသၢၵ်ႈလိပ်းယူႇၼၼ်ႉၵူႈၵေႃႉၵူႈၵူၼ်းတၵ်းလႆႈၶုပ်ႉၶဝ်ႇၵႃႈတီႈၽၢႆႇၼႃႈၵဝ်ဢေႃႈ။ၵူႈၵေႃႉၵူႈၵူၼ်းတၵ်းလႆႈဢဝ်တင်းသူပ်းၶၢမ်ႇသႅတ်ႈၸႃႇၵႃႈတီႈၽြႃးပဵၼ်ၸဝ်ႈဢေႃႈ၊ဝႃႈၼႆ၊ထႃႇဝရႃႉၽြႃးမီးဢမိင်ႉဢေႃႈ။

၁၂ ပိူဝ်ႈၼႆလႄႈႁဝ်းၵႃႈမီးတင်းသဵင်ႈတင်းလူင်တၵ်းလႆႈမွၵ်ႇလၢတ်ႈၽုၺ်ႇၼႄလွင်ႈတူဝ်ၸဝ်ႈၵဝ်ႇၵႃႈတီႈၽၢႆႇၼႃႈၽြႃးပဵၼ်ၸဝ်ႈႁင်းၽႂ်ႁင်းမၼ်းဢေႃႈ။

ယႃႇႁႂ်ႈပဵၼ်တၢင်းဢၼ်ပိူၼ်ႈၶီႈလိုတ်းလႄႈလူမ်ႉ

၁၃ ပိူဝ်ႈၼႆလႄႈၸႃႉၸဵမ်တေႃႈလဵဝ်ၼႆႉတႃႉႁဝ်းၵေႃႉၼိုင်ႈလႄႈၵေႃႉၼိုင်ႈယႃႇပေၸႅတ်ႈထၢမ်ၸီႇယၢင်ႇၵၼ်။လွင်ႈၼင်ႇႁိုဝ်တၵ်းဢမ်ႇႁႂ်ႈပဵၼ်တင်းဢၼ်ပီႈၼွင်ႉၵၼ်ၶီႈလိုတ်းလႄႈလူမ်ႉၼၼ်ႉၸိုင်တႃႉႁဝ်းယဵင်ႈၶႅၼ်းယႃႇပေၸႅတ်ႈထၢမ်ၸီႇယၢင်ႇၵၼ်။

၁၄ ၵဝ်ဢိင်ၸဝ်ႈယေႇသုသေလႄႈတူၵ်းၵၢင်ၸႂ်ႁူႉလွင်ႈဢၼ်ဝႃႈ၊တၢင်းၵိၼ်မဵဝ်းလႂ်သေဢမ်ႇဝႃႈ၊ၸွမ်းၼင်ႇပၵတိမၼ်းၼၼ်ႉဢမ်ႇၵူဝ်ႈဢမ်ႇၵိူၵ်ႇ။ၼႂ်းဝႃႈၼၼ်သေၵေႃႈ၊ပေႃးသေၵေႃႉသေၵူၼ်းထၢင်ႇဝႃႈ၊-ၵူဝ်ႈၵိူၵ်ႇဢေႃႈ၊ဝႃႈၼႆၸိုင်၊ပဵၼ်ဢၼ်ၵူဝ်ႈၵိူၵ်ႇၵႃႈတီႈၵေႃႉၼၼ်ႉဢေႃႈ။

၁၅ ပေႃးပီႈၼွင်ႉမႂ်းလႆႈၸဵပ်းၸႂ်ၵွပ်ႈပိူဝ်ႈတၢင်းၵိၼ်မႂ်းၸိုင်ပဵၼ်တၢင်းဢၼ်မႂ်းဢမ်ႇၵမ်ဢမ်ႇၵျၢင်ႉတြႃးမႅတ်ႈတႃႇယဝ်ႉ။ယႃႇပေႁႂ်ႈပီႈၼွင်ႉမႂ်းဢၼ်ၸဝ်ႈယေႇသုၶၢမ်ႇတၢႆၼၼ်ႉလႆႈလူႉသုမ်းၵွပ်ႈပိူဝ်ႈတၢင်းၵိၼ်မႂ်း။

၁၆ ယႃႇပေႁႂ်ႈတၢင်းဢၼ်မႂ်းမၢတ်ႈပဵၼ်ဢၼ်လီၼၼ်ႉလႆႈၶၢမ်ႇတၢင်းဢၼ်ပိူၼ်ႈဝႃႈပဵၼ်ဢၼ်ႁၢႆႉမိူၵ်ႈ။လွင်ႈမၼ်းၸမ်းမိူင်းၽြႃးပဵၼ်ၸဝ်ႈဢမ်ႇတႄႇၵႃႈၼႂ်းတၢင်းၵိၼ်တၢင်းၶူပ်း။

၁၇ တႄႇၵႃႈၼႂ်းတၢင်းဢၼ်သိုဝ်ႈတေႃႇ၊တၢင်းၼိမ်၊တၢင်းဢၼ်သိူဝ်းပျေႃႇဢၼ်လႆႈၶၢမ်ႇဢဝ်ၵွပ်ႈပိူဝ်ႈဝိၺိၺ်ႇမူတ်းၸၢင်ႇၸဝ်ႈၼၼ်ႉဢေႃႈ။

၁၈ ၵေႃႉဢၼ်ၵမ်ၵျၢင်ႉၸိူဝ်ႉၼင်ႇၼၼ်သေလႄႈႁဵတ်းၶႃႈၸဝ်ႈယေႇသုၶရိၸ်ႉၼၼ်ႉပဵၼ်တီႈဢၼ်ထုၵ်ႇၸႂ်ၽြႃးပဵၼ်ၸဝ်ႈလႄႈလႆႈၶၢမ်ႇတၢင်းဢၼ်ၵူၼ်းတင်းလၢႆႁပ်ႉတုင်းဢဝ်ဢေႃႈ။

၁၉ ပိူဝ်ႈၼႆလႄႈဢွၼ်ၵၼ်ၶတ်းၸႂ်ႁဵတ်းၼႂ်းလွင်ႈတၢင်းဢၼ်ၸၢပ်ႈသႅင်ႇၵၼ်တင်းတၢင်းၼိမ်လႄႈၵေႃႉၼိုင်ႈလႄႈၵေႃႉၼိုင်ႈၼင်ႇၵၼ်ၵၼ်တႄႇႁဵတ်းတီႈၵၼ်ၼၼ်ႉတႃႉႁဝ်း။ယႃႇပေႁႂ်ႈဢမူႉၽြႃးပဵၼ်ၸဝ်ႈလူႉၵွပ်ႈပိူဝ်ႈတၢင်းၵိၼ်မႂ်းၼၼ်ႉ။

၂၀ တၢင်းၵိၼ်ၵူႈၸိူဝ်ႉၵူႈပိူင်ပဵၼ်ဢၼ်မူတ်းသႂ်သေၵေႃႈယႃႇၵေႃႉဢၼ်ၵိၼ်လႄႈႁႂ်ႈပဵၼ်တၢင်းဢၼ်ပိူၼ်ႈတၢင်ႇၵေႃႉၶီႈလိုတ်းလႄႈလူမ်ႉၼၼ်ႉမီးဢပျႅတ်ႈဢေႃႈ။

၂၁ ပေႃးတၢင်းဢၼ်ၵိၼ်ၼိူဝ်ႉ၊တၢင်းဢၼ်ၵိၼ်ၼမ်ႉၸပိတ်ႉၼၼ်ႉတၵ်းပဵၼ်တၢင်းဢၼ်ႁဵတ်းႁႂ်ႈပီႈၼွင်ႉမႂ်းၶီႈလိုတ်းလႄႈလူမ်ႉၸိုင်၊ယႃႇပေၵိၼ်။

၂၂ မႂ်းမီးတၢင်းယုမ်ႇမၢတ်ႈၸိူဝ်ႉၼင်ႇႁိုဝ်ၵေႃႈႁႂ်ႈတႄႇယူႇၵႃႈၼႂ်းၵႄႈၵၢင်မႂ်းတင်းၽြႃးပဵၼ်ၸဝ်ႈၵူၺ်းတႃႉ။ၵေႃႉဢၼ်ဢမ်ႇမီးတၢင်းဢၼ်တၢင်ႇဢပျႅတ်ႈတီႈတူဝ်ၸဝ်ႈၵဝ်ႇၼႂ်းလွင်ႈတၢင်းဢၼ်မၼ်းၸဝ်ႈႁပ်ႉၶၢမ်ႇဢဝ်ၼၼ်ႉမီးမင်ႇၵလႃႇဢေႃႈ။

၂၃ ၵေႃႉဢၼ်ယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈလႄႈၵိၼ်ၼၼ်ႉလႆႈၶၢမ်ႇတၢင်းဢၼ်တၢင်ႇဢပျႅတ်ႈၵွပ်ႈပိူဝ်ႈမၼ်းဢမ်ႇမီးၸႂ်ဢၼ်ယုမ်ႇလႄႈၵိၼ်ၼၼ်ႉဢေႃႈ။မဵဝ်းလႂ်သေဢမ်ႇဝႃႈပေႃးဢမ်ႇမီးတၢင်းယုမ်ႇမၢတ်ႈၸိုင်ပဵၼ်ဢပျႅတ်ႈဢေႃႈ။