Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂ ၀    ၂၁    ၂၂    ၂၃    ၂၄   

၈

ဢူႉပမႃႇၵူၼ်းဝၢၼ်ႇၸိူဝ်ႉဝၢၼ်ႇၽၼ်း

၁ လိုၼ်းၼၼ်ႉမၼ်းၸဝ်ႈတေႇသႃႉၸႃႇရီႇလႄႇလဵပ်ႈၵူႈဝၢၼ်ႈၵူႈဝဵင်းလႄႈႁေႃးလၢတ်ႈတြႃးသတၢင်းသိူဝ်းပျေႃႇဢၼ်ၸၢပ်ႈသႅင်ႇၵၼ်တင်းမိူင်းၽြႃးပဵၼ်ၸဝ်ႈၼၼ်ႉဢေႃႈ။

၂ ၸႃႉၸဵမ်တပႄးၸဝ်ႈသိပ်းသွင်ပႃးလႄႈမေႈယိင်းၸိူဝ်းဢၼ်မၼ်းၸဝ်ႈႁႂ်ႈၵၢင်းလွတ်ႈတင်းတၢင်းဢၼ်ၽီႁၢႆႉၶဝ်ႈႁႂ်ႈတၢင်းၶႆႈတၢင်းပဵၼ်ႁၢႆၶႅၼ်းၸိူဝ်းၼၼ်ႉၵမ်ႈၽွင်ႈဢၼ်ပဵၼ်မႃႇရိဢၼ်လႆႈႁွင်ႉႁိၵ်ႈမႃႇၵတလဢၼ်ၽီႁၢႆႉၸဵတ်းတုဝ်ဢွၵ်ႇဢိၵ်ႇတင်းယုဝ်းႁၼ်ၼမေးၶုၸဢၼ်ပဵၼ်ၽူႈပႂ်ႉငိုၼ်းၶွင်ႇၶူဝ်းၶုၼ်ႁေႇရုတ်ႉတင်းသုသၼ်ႇၼတင်းမေႈယိင်းတၢင်ႇၵေႃႉၼမ်ၼႃႇၸွမ်းမၼ်းၸဝ်ႈဢေႃႈ။

၃ မေႈယိင်းၸိူဝ်းၼၼ်ႉၶဝ်ဢဝ်ဢုၵ်ႉၸႃႇတုဝ်ၸဝ်ႈၵဝ်ႇလႄႈႁဵတ်းလဵင်ႉႁဵတ်းလူၶဝ်ဢေႃႈ။

၄ မိူဝ်ႈဢၼ်ၵူၼ်းၼမ်ၼႃႇလုၵ်ႉသေၵႃႈတီႈၵူႈဝၢၼ်ႈၵူႈဝဵင်းမႃးၵႃႈတီႈမၼ်းၸဝ်ႈလႄႈၸူႉၵၼ်တုမ်ၵၼ်ယူႇၼၼ်ႉၸိုင်မၼ်းၸဝ်ႈလၢတ်ႈၵႂၢမ်းဢူႉပမႃႇလႄႈဝႃႈ၊-

၅ ၵေႃႉဢၼ်ဝၢၼ်ႇၸိူဝ်ႉဝၢၼ်ႇၽၼ်းၼၼ်ႉဢွၵ်ႇၵႂႃႇႁႂ်ႈလႆႈဝၢၼ်ႇၸိူဝ်ႉဝၢၼ်ႇၽၼ်းဢေႃႈ။ၼႂ်းတၢင်းဢၼ်မၼ်းဝၢၼ်ႇၸိူဝ်ႉဝၢၼ်ႇၽၼ်းၼၼ်ႉမဵတ်ႉၽၼ်းၵမ်ႈၽွင်ႈတူၵ်းၵႃႈတီႈႁိမ်းတၢင်းလႄႈလႆႈၶၢမ်ႇပိူၼ်ႈယဵပ်ႇပိူၼ်ႈၶၢမ်ႈသေယဝ်ႉၼူၵ်ႉၵၢင်ႁၢဝ်တင်းလၢႆမႃးၵဵပ်းၵိၼ်ပႅတ်ႈဢေႃႈ။

၆ မဵတ်ႉၽၼ်းၵမ်ႈၽွင်ႈတူၵ်းၵႃႈၼိူဝ်မၢၵ်ႇႁိၼ်လႄႈမိူဝ်ႈဢၼ်ဢွၵ်ႇတူၼ်ႈမႃးၼၼ်ႉပိူဝ်ႈဢၼ်လိၼ်ဢမ်ႇယမ်းဢမ်ႇမိုၵ်းလႄႈႁဵဝ်ႇႁႅင်ႈၵႂႃႇသေဢေႃႈ။

၇ မဵတ်ႉၵမ်ႈၽွင်ႈတူၵ်းၵႃႈၼႂ်းတူၼ်ႈၼၢမ်လႄႈတူၼ်ႈၼၢမ်ၸိူဝ်းၼၼ်ႉဢွၵ်ႇလူၺ်ႈၵၼ်တင်းၶဝ်လႄႈႁူမ်ႇမုင်းငႅၼ်းသေးယူႇဢေႃႈ။

၈ မဵတ်ႉၵမ်ႈၽွင်ႈတူၵ်းၵႃႈၼႂ်းတီႈဢၼ်လိၼ်လီလႄႈမၢၵ်ႇမႃးမၢၵ်ႇမၼ်းပၢၵ်ႇပုၼ်ႊဢေႃႈ၊ဝႃႈၼင်ႇၼႆယဝ်ႉၸင်ႇႁဵတ်းသဵင်ဢၼ်ယႂ်ႇၼႃႇလႄႈဝႃႈ၊-ၵေႃႉဢၼ်မီးႁူဢၼ်လီငိၼ်းၼၼ်ႉႁႂ်ႈငိၼ်းသေၵမ်းလူၺ်ႈ၊ဝႃႈၼင်ႇၼႆဢေႃႈ။

၉ တပႄးၸဝ်ႈတင်းလၢႆၵေႃႈလဝ်ႈထၢမ်လႄႈဝႃႈ၊-ဢထိၵ်ႈပႄႇဢူႉပမႃႇၼႆႉပဵၼ်ၸိူဝ်ႉၼင်ႇႁိုဝ်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၸဝ်ႈၵေႃႈလၢတ်ႈလႄႈဝႃႈ၊-

၁၀ သူမီးဢၶႂၢင်ႉဢၼ်တၵ်းလႆႈႁူႉလွင်ႈတၢင်းဢၼ်လိုၵ်ႉဢၼ်လမ်ႇမိူင်းၽြႃးပဵၼ်ၸဝ်ႈယူႇဢေႃႈ။ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇၼၼ်ႉၸမ်းႁၼ်ယူႇသေၵေႃႈဢမ်ႇမၢတ်ႈဢမ်ႇတွင်း၊ငိၼ်းယူႇသေၵေႃႈဢမ်ႇႁူႉဢမ်ႇၸႅင်ႈလႄႈ၊ၸင်ႇလႆႈဢဝ်ဢူႉပမႃႇႁေႃးလၢတ်ႈတီႈၶဝ်ဢေႃႈ။

၁၁ ဢထိၵ်ႈပႄႇဢူႉပမႃႇၼၼ်ႉၸမ်းမဵတ်ႉၽၼ်းၼၼ်ႉပဵၼ်ၵႂၢမ်းတြႃးၽြႃးပဵၼ်ၸဝ်ႈဢေႃႈ။မဵတ်ႉဢၼ်မီးၵႃႈႁိမ်းတၢင်းၼၼ်ႉပဵၼ်ၶဝ်ၸိူဝ်းဢၼ်လႆႈငိၼ်းၵႂၢမ်းတြႃးယဝ်ႉၵေႃႈ

၁၂ ၼင်ႇႁိုဝ်ၶဝ်တၵ်းဢမ်ႇယုမ်ႇမၢတ်ႈဢမ်ႇႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉၸိုင်ၸႃႇတၢၼ်ႇမႃႇၼၢတ်ႈမႃးလႄႈထူၺ်ႈဢဝ်ၵႂၢမ်းတြႃးဢၼ်မီးၵႃႈၼႂ်းႁူဝ်ၸႂ်ၶဝ်ၼၼ်ႉဢွၵ်ႇပႅတ်ႈဢေႃႈ။

၁၃ မဵတ်ႉဢၼ်တူၵ်းၵႃႈၼိူဝ်မၢၵ်ႇႁိၼ်ၼၼ်ႉၸမ်းပဵၼ်ၶဝ်ၸိူဝ်းဢၼ်လႆႈငိၼ်းၵႂၢမ်းတြႃးလႄႈပဵၵ်ႉသမ်ႉမီးၸႂ်ၸူမ်းၸူမ်းသိူဝ်းသိူဝ်းႁပ်ႉတုင်းဢဝ်သေၵေႃႈဢမ်ႇမီးႁၢၵ်ႈမၼ်းၵႃႈၼႂ်းႁူဝ်ၸႂ်ၶဝ်လႄႈယုမ်ႇမၢတ်ႈၵမ်းဢွၼ်ႇၼိုင်ႈၵူၺ်းသေယဝ်ႉမိူဝ်ႈဢၼ်လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသေးၼၼ်ႉၶိုၼ်းၽွၵ်ႈပျၢၼ်ႇၵႂႃႇဢေႃႈ။

၁၄ မဵတ်ႉဢၼ်တူၵ်းၼႂ်းတူၼ်ႈၼၢမ်ၼၼ်ႉၸမ်းပဵၼ်ၶဝ်ၸိူဝ်းဢၼ်လႆႈငိၼ်းၵႂၢမ်းတြႃးယဝ်ႉၼႆၵေႃႈၸူဝ်ႈဢၼ်ၶဝ်ယင်းတိုၵ်ႉၵႂႃႇယူႇၼႂ်းသဵၼ်ႈတၢင်းၼၼ်ႉလႆႈၶၢမ်ႇတၢင်းဢၼ်မႆႈၸႂ်ၶီၸႂ်တၢင်းဢၼ်ၸေးၸိမ်ႇလေႃးၵႃႉတၢင်းဢၼ်ၸၢမ်ႇၸႃးၵႃႇမၵုင်ႇၸိူဝ်းဢၼ်ၸၢပ်ႈသႅင်ႇၵၼ်တင်းလေႃးၵႃႉၼႆႉတင်းလၢႆႁူမ်ႇမုင်းငႅၼ်းသေးယူႇလႄႈဢမ်ႇမၢၵ်ႇမၢၵ်ႇဢၼ်လီလႆႈ။

၁၅ မဵတ်ႉဢၼ်တူၵ်းၵႃႈတီႈလိၼ်ဢၼ်လီၼၼ်ႉၸမ်းပဵၼ်ၶဝ်ၸိူဝ်းဢၼ်မီးၸႂ်ဢၼ်မူတ်းသႂ်သိုဝ်ႈတေႃႇလႄႈလႆႈငိၼ်းၵႂၢမ်းတြႃးယဝ်ႉၸင်ႇၸႂ်ၸပ်းၸႂ်ၸွႆးသေယဝ်ႉမၢၵ်ႇမၢၵ်ႇမၼ်းမႃးမၼ်ႈမၼ်ႈၶိူင်ႇၶိူင်ႇၼၼ်ႉဢေႃႈ။

ၵွၵ်းၽႆးဢၼ်တၢင်ႇဝႆႉတီႈသုင်

၁၆ ၽူႈလႂ်သေဢမ်ႇဝႃႈမိူဝ်ႈဢၼ်တႆႈၵွၵ်းၽႆးၸိုင်ဢမ်ႇဢဝ်မေႃႈႁူမ်ႇဝႆႉ။ဢမ်ႇဢဝ်ဝႆႉၵႃႈတႂ်ႈၵူႇတီႈၼွၼ်း။ၸၢင်ႊဢဝ်တၢင်ႇဝႆႉၵႃႈၼိူဝ်ၽိူၼ်တီႈတႆႈၽႆးလႄႈႁႂ်ႈၶဝ်ၸိူဝ်းဢၼ်ၶဝ်ႈမႃးၼၼ်ႉလႆႈႁၼ်ဢၼ်လႅင်းမၼ်းဢေႃႈ။

၁၇ လွင်ႈတၢင်းဢၼ်မီးၼႂ်းတီႈဢၼ်လပ်းသိင်ႇဢၼ်တၵ်းဢမ်ႇထၢင်ႇဢမ်ႇသႃးၼၼ်ႉဢမ်ႇမီးသေၸိူဝ်ႉသေပိူင်။လွင်ႈတၢင်းဢၼ်သိုင်ႇဝႆႉမႅပ်းဝႆႉဢၼ်တၵ်းဢမ်ႇလႆႈၶၢမ်ႇတၢင်းဢၼ်ပိုတ်ႇၼႄလႄႈထၢင်ႇသႃးမႃးၼၼ်ႉဢမ်ႇမီးသေၸိူဝ်ႉသေပိူင်။

၁၈ ပိူဝ်ႈၼႆလႄႈလွင်ႈဢၼ်သူလႆႈထွမ်ႇလႆႈငိၼ်းၸိူဝ်ႉၼင်ႇႁိုဝ်ၼၼ်ႉႁဵတ်းသတိတႃႉ။လွင်ႈမၼ်းၸမ်းၽူႈလႂ်သေဢမ်ႇဝႃႈၵေႃႉဢၼ်ၸၢင်ႊမီးၼၼ်ႉတၵ်းလႆႈၶၢမ်ႇတၢင်းဢၼ်ပၼ်ထႅင်ႈဢေႃႈ။ၽူႈလႂ်သေဢမ်ႇဝႃႈၵေႃႉဢၼ်ဢမ်ႇၸၢင်ႊမီးၼၼ်ႉတၵ်းလႆႈၶၢမ်ႇတၢင်းဢၼ်ၼုၵ်ႈဢဝ်ၵႃႈဢၼ်မၼ်းထၢင်ႇမၼ်းမီးၼၼ်ႉဢေႃႈ၊ဝႃႈၼင်ႇၼႆဢေႃႈ။

မေႈၸဝ်ႈတင်းၼွင်ႉၸဝ်ႈ

၁၉ မိူဝ်ႈၼၼ်ႉမေႈၸဝ်ႈဢိၵ်ႇတင်းၼွင်ႉၸဝ်ႈတင်းလၢႆမႃးၵႃႈတီႈမၼ်းၸဝ်ႈလႄႈၵွပ်ႈပိူဝ်ႈၵူၼ်းၸူႉၵူၼ်းတုမ်ၼမ်ၼႃႇၼၼ်ႉၶဝ်ယင်းဢမ်ႇၸၢင်ႊၵႂႃႇၸမ်တီႈမၼ်းၸဝ်ႈလႆႈ။

၂၀ ၵူၼ်းၵမ်ႈၽွင်ႈၵေႃႈလဝ်ႈလၢတ်ႈလႄႈဝႃႈ၊-မေႈၸဝ်ႈဢိၵ်ႇတင်းၼွင်ႉၸဝ်ႈၸိူဝ်းၼၼ်ႉၶႂ်ႈထူပ်းၶႂ်ႈႁၼ်ၸဝ်ႈႁဝ်းလႄႈၸုၵ်းယူႇၵႃႈတီႈၼွၵ်ႈပုၼ်ႉၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊-

၂၁ ၶဝ်ၸိူဝ်းဢၼ်ထွမ်ႇဢဝ်ၼုၵ်ႉၵပၢတ်ႈတြႃးၽြႃးပဵၼ်ၸဝ်ႈလႄႈၵမ်ၵျၢင်ႉၼၼ်ႉပဵၼ်မေႈၵဝ်ၼွင်ႉၵဝ်ဢေႃႈ၊ဝႃႈၼင်ႇၼႆဢေႃႈ။

ၸဝ်ႈယေႇသုႁႂ်ႈလူမ်းလႅင်ႉထၢတ်ႇယဵၼ်

၂၂ ဝၼ်းၼၼ်ႉမၼ်းၸဝ်ႈၶဝ်ႈၵႃႈၼႂ်းႁိူဝ်းလူၺ်ႈၵၼ်တင်းတပႄးၸဝ်ႈတင်းလၢႆသေလႄႈလၢတ်ႈလႄႈဝႃႈ၊-ၶၢမ်ႈၵႂႃႇၵႃႈတီႈၽင်ႇၼမ်ႉၽၢႆႇပုၼ်ႉတႃႉႁဝ်း၊ဝႃႈၼင်ႇၼႆယဝ်ႉၸင်ႇဝၢႆႈႁိူဝ်းၼၼ်ႉၵႂႃႇဢေႃႈ။

၂၃ ၼႂ်းမိူဝ်ႈဢၼ်ၶဝ်ယင်းတိုၵ်ႉၶၢမ်ႈၼမ်ႉၼွင်ၵႂႃႇယူႇၼၼ်ႉၸိုင်မၼ်းၸဝ်ႈၵိင်းၼွၼ်းယူႇဢေႃႈ။ၼႂ်းၼွင်ၼၼ်ႉပဵၼ်ၽူၼ်လူင်လူမ်းလူင်လႄႈႁိူဝ်းၶဝ်ၼၼ်ႉၼမ်ႉလုပ်းတဵမ်ၶိုၼ်ႈမႃးယူႇလႄႈၸမ်တၵ်းႁွတ်ႈထိုင်တၢင်းလူႉတၢင်းလႅဝ်ဢေႃႈ။

၂၄ ၶဝ်ၼၼ်ႉသုတ်ႉၸပ်းသုတ်ႉၸူးတီႈမၼ်းၸဝ်ႈလႄႈပူၵ်းမၼ်းၸဝ်ႈယဝ်ႉၸင်ႇလဝ်ႈလၢတ်ႈလႄႈဝႃႈ၊-ၸဝ်ႈႁဝ်း၊ၸဝ်ႈႁဝ်း၊ႁဝ်းၶႃႈတေႁွတ်ႈထိုင်တၢင်းလူႉတၢင်းလႅဝ်ၶႃႈယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၸဝ်ႈၵေႃႈလုၵ်ႉသေယဝ်ႉသင်ႇသွၼ်လူမ်းဢိၵ်ႇတင်းလႅင်းၼမ်ႉပိူပ်ႇၼမ်ႉၸိူဝ်းၼၼ်ႉလႄႈလူမ်းလႅင်ႉထၢတ်ႇယဵၼ်ပၢင်ႇၸိုၼ်ႈၼိမ်လီမႃးၵမ်းလဵဝ်ဢေႃႈ။

၂၅ မၼ်းၸဝ်ႈၵေႃႈထၢမ်လႄႈဝႃႈ၊-တၢင်းယုမ်ႇမၢတ်ႈသူမီးၵႃႈလႂ်၊ဝႃႈၼင်ႇၼႆလႄႈၶဝ်ၼၼ်ႉၵူဝ်ၼႃႇဢၢမ်းၼႃႇလူင်လၢင်သေယဝ်ႉၵေႃႉၼိုင်ႈလႄႈၵေႃႉၼိုင်ႈလၢတ်ႈၵၼ်လႄႈဝႃႈ၊-ၵေႃႉၼႆႉပဵၼ်ၽူႈလႂ်။မၼ်းသင်ႇသွၼ်ၼမ်ႉတင်းလူမ်းလႄႈၶဝ်ၵေႃႈထွမ်ႇဢဝ်ၵႂမ်းမၼ်းလူင်ပေႇ၊ဝႃႈၼင်ႇၼႆဢေႃႈ။

ႁႂ်ႈၵူၼ်းၽီႁၢႆႉၶဝ်ႈႁၢႆၶႅၼ်း

၂၆ ၶဝ်ၼၼ်ႉၶၢမ်ႈၵႂႃႇႁွတ်ႈထိုင်ၵႃႈတီႈမိူင်းၵႃႇတရဢၼ်မီးတီႈၽင်ႇၼမ်ႉၽၢႆႇၼိုင်ႈတင်းမိူင်းၵႃႇလိလႄးၼၼ်ႉသေယဝ်ႉ၊မိူဝ်ႈဢၼ်မၼ်းၸဝ်ႈၶိုၼ်ႈၵႂႃႇၵႃႈၼိူဝ်ၵုင်းၸိုင်

၂၇ ၵူၼ်းမိူင်းၼၼ်ႉၵေႃႉၼိုင်ႈဢၼ်ၽီႁၢႆႉၶဝ်ႈႁိုင်ၼႃႇဢမ်ႇၼုင်ႈၶူဝ်းဢမ်ႇယူႇၼႂ်းႁိူၼ်းၸၢင်ႊယူႇၵႃႈၼႂ်းသၢင်းၶျႅင်းၼၼ်ႉဢွၵ်ႇမႃးႁပ်ႉႁူဝ်တၢင်းမၼ်းၸဝ်ႈဢေႃႈ။

၂၈ မိူဝ်ႈဢၼ်မၼ်းႁၼ်ၸဝ်ႈယေႇသုၼၼ်ႉၸိုင်မၼ်းၶုပ်ႉမူပ်ႇႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇလဝ်ႈလၢတ်ႈလႄႈဝႃႈ၊-ၸဝ်ႈယေႇသု၊လုၵ်ႈၽြႃးပဵၼ်ၸဝ်ႈဢၼ်သုင်ဢၼ်မျၢတ်ႈၼႃႇသေပိူၼ်ႈၼၼ်ႉတီႈၶႃႈ။ၸဝ်ႈႁဝ်းၸၢပ်ႈသႅင်ႇၵၼ်တင်းႁဝ်းၶႃႈၸိူဝ်ႉၼင်ႇႁိုဝ်ၶႃႈ။ၼင်ႇႁိုဝ်ၸဝ်ႈႁဝ်းတၵ်းဢမ်ႇၼိၵ်ႈၸၢၵ်ႈငႅၼ်းသေးႁဝ်းၶႃႈၸိုင်ႁဝ်းၶႃႈတွင်းပၢၼ်ႇတီႈၶႃႈဢေႃႈ၊ဝႃႈၼင်ႇၼႆဢေႃႈ။

၂၉ လွင်ႈဢၼ်လဝ်ႈလၢတ်ႈၼၼ်ႉၸမ်းမၼ်းၸဝ်ႈလႆႈမီးဢမိင်ႉႁႂ်ႈၽီဢၼ်ၵူဝ်ႈၵိူၵ်ႇၼၼ်ႉဢွၵ်ႇသေၵႃႈၼႂ်းၵေႃႉၼၼ်ႉၵႂႃႇဢေႃႈ။ၽီႁၢႆႉၼၼ်ႉလႆႈတီႉဢဝ်မၼ်းပွၵ်ႈၼမ်ၼႃႇယဝ်ႉ။ပဵၵ်ႉသမ်ႉဢဝ်ၸိူၵ်ႈလဵၵ်းတင်းၶူၺ်ႇတိၼ်မတ်ႉၽုၵ်ႇလႄႈႁႂ်ႈၶၢမ်ႇတူၵ်းၵႅၼ်းယူႇသေၵေႃႈမၼ်းတိုတ်ႉၸိူၵ်ႈလဵၵ်းၶၢတ်ႇလႄႈၽီႁၢႆႉၼၼ်ႉႁေႃႈမၼ်းၵႂႃႇယူႇၵႃႈၼႂ်းထိူၼ်ႇဢေႃႈ။

၃၀ ၸဝ်ႈယေႇသုၵေႃႈထၢမ်မၼ်းလႄႈဝႃႈ၊-မႂ်းမီးၸိုဝ်သဵင်ၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်ပိူဝ်ႈဢၼ်ၽီႁၢႆႉၼမ်ၼႃႇၶဝ်ႈၵႃႈၼႂ်းမၼ်းၼၼ်ႉလႄႈမၼ်းၵေႃႈလဝ်ႈလၢတ်ႈဝႃႈ၊-

၃၁ ၸိုဝ်သဵင်ၵဝ်ၶႃႈပဵၼ်လေႇၵျူင်ႇၶႃႈဢေႃႈ၊ဝႃႈၼင်ႇၼႆသေယဝ်ႉ၊ၼင်ႇႁိုဝ်မၼ်းၸဝ်ႈတၵ်းဢမ်ႇႁေႃႈၶဝ်ဢွၵ်ႇပႅတ်ႈၵႂႃႇၵႃႈတီႈဢၼ်လိုၵ်ႉဢၼ်လမ်ႇသေပိူၼ်ႈၼၼ်ႉၸိုင်ၶဝ်တွင်းပၢၼ်ႇမၼ်းၸဝ်ႈဢေႃႈ။

၃၂ ၵႃႈတီႈၼၼ်ႉမီးၽုင်မူၼမ်ၼႃႇၵိၼ်ယူႇၵႃႈၼိူဝ်လွႆဢေႃႈ။ၽီႁၢႆႉၸိူဝ်းၼၼ်ႉသမ်ႉၶိုၼ်းတွင်းပၢၼ်ႇလႄႈဝႃႈ၊-ပၼ်ဢၶႂၢင်ႉႁႂ်ႈႁဝ်းၶႃႈလႆႈၵႂႃႇၶဝ်ႈၵႃႈၼႂ်းၽုင်မူၸိူဝ်းၼၼ်ႉသေၵမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈပၼ်ဢၶႂၢင်ႉၶဝ်ဢေႃႈ။

၃၃ ၽီႁၢႆႉၸိူဝ်းၼၼ်ႉၵေႃႈဢွၵ်ႇသေၵႃႈၼႂ်းၵူၼ်းၵေႃႉၼၼ်ႉၵႂႃႇသေယဝ်ႉၵႂႃႇၶဝ်ႈၵႃႈၼႂ်းၽုင်မူၸိူဝ်းၼၼ်ႉလႄႈၽုင်မူၸိူဝ်းၼၼ်ႉၶုၼ်ႇလႅၼ်ႈလူင်းၵႂႃႇၽင်ႇၸၼ်းလႄႈၵႅၼ်ႉၼမ်ႉၵႃႈၼႂ်းၼွင်ၼၼ်ႉတၢႆတင်းမူတ်းဢေႃႈ။

၃၄ မိူဝ်ႈဢၼ်ၵူၼ်းလဵင်ႉမူတင်းလၢႆႁၼ်လွင်ႈတၢင်းဢၼ်ပဵၼ်မႃးၼၼ်ႉၸိုင်ၶဝ်လႅၼ်ႈၵႂႃႇလႄႈမွၵ်ႇလၢတ်ႈသတၢင်းသဵင်ၶၢဝ်ၵႃႈၼႂ်းဝၢၼ်ႈၼႂ်းဝဵင်းၸိူဝ်းၼၼ်ႉယဝ်ႉၸင်ႇၵူၼ်းၼမ်ၼႃႇၵေႃႈဢွၵ်ႇမႃးႁႂ်ႈလႆႈတူၺ်းလႆႈႁၼ်၃၅ လွင်ႈတၢင်းဢၼ်ပဵၼ်မႃးၼၼ်ႉဢေႃႈ။

၃၅ မိူဝ်ႈဢၼ်ၶဝ်ၽႅဝ်မႃးၵႃႈတီႈၸဝ်ႈယေႇသုလႄႈလႆႈႁၼ်ၵေႃႉဢၼ်ၽီႁၢႆႉဢွၵ်ႇၵႂႃႇယဝ်ႉၼၼ်ႉၼုင်ႈၶူဝ်းၼုင်ႈလဵင်းယူႇလႄႈမီးၸႂ်ဢၼ်လီဢၼ်ငၢမ်းၼင်ႈယူႇၵႃႈတီႈႁိမ်းတိၼ်ၸဝ်ႈယေႇသုၼၼ်ႉၸိုင်ၶဝ်ၵူဝ်ႁႄၼႃႇဢေႃႈ။

၃၆ ၶဝ်ၸိူဝ်းဢၼ်လႆႈႁူႉလႆႈႁၼ်ယဝ်ႉၼၼ်ႉသမ်ႉသိုပ်ႇမွၵ်ႇလၢတ်ႈလွင်ႈၵူၼ်းၽီႁၢႆႉၶဝ်ႈၼၼ်ႉပဵၼ်ၵူၼ်းလီၵူၼ်းငၢမ်းမႃးၸိူဝ်ႉၼင်ႇႁိုဝ်ၼၼ်ႉတီႈၶဝ်ၸိူဝ်းဢၼ်မႃးတူၵ်းလိုၼ်းၸိူဝ်းၼၼ်ႉဢေႃႈ။

၃၇ ၵူၼ်းမိူင်းၵႃႇတရတင်းလၢႆမီးၸႂ်ဢၼ်ၵူဝ်ႁႄၼႃႇလူင်လၢင်လႄႈၶဝ်တွင်းပၢၼ်ႇမၼ်းၸဝ်ႈႁႂ်ႈမၼ်းၸဝ်ႈဢွၵ်ႇသေၵႃႈၼႂ်းမိူင်းၶဝ်ၵႂႃႇဢေႃႈ။

၃၈ မၼ်းၸဝ်ႈၵေႃႈၶဝ်ႈၵႃႈၼႂ်းႁိူဝ်းသေယဝ်ႉၶိုၼ်းမိူဝ်းၵႂႃႇဢေႃႈ။ၵေႃႉဢၼ်ၽီႁၢႆႉဢွၵ်ႇၼၼ်ႉတွင်းပၢၼ်ႇယွၼ်းဢၶႂၢင်ႉႁႂ်ႈလႆႈၸွမ်းမၼ်းၸဝ်ႈလႄႈၸဝ်ႈယေႇသုၵေႃႈႁႂ်ႈမၼ်းၵႂႃႇလႄႈဝႃႈ၊-

၃၉ မႂ်းၶိုၼ်းမိူဝ်းၵႂႃႇၵႃႈတီႈႁိူၼ်းမႂ်းပုၼ်ႉတႃႉ။ၶႆႊပၼ်လၢတ်ႈၼႄပၼ်လွင်ႈဢၼ်ၽြႃးပဵၼ်ၸဝ်ႈႁဵတ်းၵျေးၸူးတီႈမႂ်းယႂ်ႇၼႃႇထၢၼ်ႇႁိုဝ်ဢၼ်ဝႃႈၼၼ်ႉတီႈၶဝ်တႃႉ၊မိူဝ်ႈဢၼ်ဝႃႈၼင်ႇၼႆၸိုင်ၵေႃႉၼၼ်ႉၵေႃႈဢွၵ်ႇသေၵႃႈတီႈၼၼ်ႉၵႂႃႇသေယဝ်ႉမွၵ်ႇလၢတ်ႈသတၢင်းသဵင်ၶၢဝ်ႇလွင်ႈဢၼ်ၸဝ်ႈယေႇသုႁဵတ်းၵျေးၸူးတီႈမၼ်းယႂ်ႇၼႃႇထၢၼ်ႇႁိုဝ်ၼၼ်ႉၵႃႈၼႂ်းဝဵင်းတင်းဝဵင်းဢေႃႈ။

ၵူၼ်းပဵၼ်တင်းၵူၼ်းတၢႆ

၄၀ ၸဝ်ႈယေႇသုၶိုၼ်းမိူဝ်းၵႂႃႇသေယဝ်ႉၵူၼ်းၸူႉၵူၼ်းတုမ်တင်းလၢႆမုင်ႈထႃႈမွင်းထႃႈမၼ်းၸဝ်ႈယူႇလႄႈမီးတင်းၸႂ်ဢၼ်သိူဝ်းၸူမ်းၼႃႇႁပ်ႉတုင်းဢဝ်မၼ်းၸဝ်ႈဢေႃႈ။

၄၁ မိူဝ်ႈၼၼ်ႉၵူၼ်းၵေႃႉၼိုင်ႈဢၼ်လႆႈၸိုဝ်ယႃႇဢိရု၊ဢၼ်ပဵၼ်ၵႄႇၸရွပ်ႈႁေႃးတြႃး၊ၼၼ်ႉမၼ်းမီးလုၵ်ႈယိင်းၵေႃႉလဵဝ်ဢၼ်ဢသၢၵ်ႈလႆႈသိပ်းသွင်ပီႊလႄႈပဵၼ်တၢင်းပဵၼ်ၸမ်တၵ်းတၢႆဢေႃႈ။မၼ်းမႃးၶုပ်ႉမူပ်ႇၵႃႈတီႈႁိမ်းတိၼ်ၸဝ်ႈယေႇသုသေယဝ်ႉတွင်းပၢၼ်ႇႁႂ်ႈမၼ်းၸဝ်ႈၵႂႃႇၵႃႈတီႈႁိူၼ်းမၼ်းဢေႃႈ။

၄၂ ၼႂ်းမိူဝ်ႈဢၼ်မၼ်းၸဝ်ႈၵႂႃႇယူႇၼၼ်ႉၸိုင်ၵူၼ်းၸူႉၵူၼ်းတုမ်တင်းလၢႆဢုမ်ႇၸွမ်းၽိုတ်ႉဢီးၸူးမၼ်းၸဝ်ႈယူႇဢေႃႈ။

၄၃ ၵမ်းၼၼ်ႉမေႈယိင်းဢၼ်ၸပ်းတၢင်းပဵၼ်လိူတ်ႈထွၵ်ႇလႆႈသိပ်းသွင်ပီႊတဵမ်တဵမ်ၼၼ်ႉၵေႃႉၼိုင်ႈမၼ်းပၼ်ဢုၵ်ႉၸႃႇမၼ်းတီႈမေႃယႃတေႃႇထိုင်ႁွတ်ႈထၼ်ႈပေႃးသဵင်ႈမူတ်းၵႂႃႇတင်းသဵင်ႈတင်းမူတ်းယဝ်ႉသေၵေႃႈယႃႇဢမ်ႇႁၢႆဢမ်ႇၶႅၼ်းလႆႈၼၼ်ႉ၊ မၼ်းမႃးၵႃႈတီႈၽၢႆႇလင်မၼ်းၸဝ်ႈသေယဝ်ႉတိူဝ်ႉယိပ်းပူးၶူဝ်းမၼ်းၸဝ်ႈဢေႃႈ။

၄၄ မိူဝ်ႈၼၼ်ႉၵမ်းလဵဝ်တၢင်းပဵၼ်လိူတ်ႈထွၵ်ႇမၼ်းၼၼ်ႉႁၢႆၵႂႃႇၵမ်းလဵဝ်ဢေႃႈ။

၄၅ ၸဝ်ႈယေႇသုၵေႃႈထၢမ်ဝႃႈ၊-ၽူႈလႂ်တိူဝ်ႉၵဝ်ယိပ်းၵဝ်၊ဝႃႈၼင်ႇၼႆလႄႈၵူၼ်းတင်းသဵင်ႈတင်းလူင်ၵေႃႈၶိုၼ်းတွပ်ႇလၢတ်ႈၵႂၢမ်းႁႄႉတူဝ်ႁင်းၽႂ်ႁင်းမၼ်းဢေႃႈ။ပေႇတရုဢိၵ်ႇတင်းၶဝ်ၸိူဝ်းဢၼ်မီးလူၺ်ႈၵၼ်တင်းမၼ်းၸဝ်ႈၸိူဝ်းၼၼ်ႉၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်း၊ၵူၼ်းၸူႉၵူၼ်းတုမ်ၼမ်ၼႃႇၽိုတ်ႉဢီးၸူးၸဝ်ႈႁဝ်းယူႇလႄႈၸဝ်ႈႁဝ်းသမ်ႉထၢမ်ၽူႈလႂ်တိူဝ်ႉၵဝ်ယိပ်းၵဝ်၊ဝႃႈၼင်ႇၼႆၶႃႈ၊မိူဝ်ႈဢၼ်ဝႃႈၼင်ႇၼႆၸိုင်

၄၆ ၸဝ်ႈယေႇသုၵေႃႈလၢတ်ႈလႄႈဝႃႈ၊-ၵေႃႉၼိုင်ႈတိူဝ်ႉယိပ်းၵဝ်ယဝ်ႉ။ၵဝ်ႁူႉလွင်ႈဢၼ်တၼ်းၶူဝ်းလႆႈဢွၵ်ႇသေၵႃႈၼႂ်းၵဝ်ၵႂႃႇယဝ်ႉ၊ဝႃႈၼင်ႇၼႆဢေႃႈ။

၄၇ မေႈယိင်းၼၼ်ႉၵေႃႈမိူဝ်ႈဢၼ်ႁူႉလွင်ႈဢၼ်မၼ်းဢမ်ႇယူႇတဵတ်ႇမႅပ်းလႆႈယဝ်ႉၼၼ်ႉၸိုင်မၼ်းသၼ်ႇဝႆယူႇသေလႄႈမႃးတီႈမၼ်းၸဝ်ႈယဝ်ႉၸင်ႇၶုပ်ႉမူပ်ႇလႄႈလဝ်ႈလၢတ်ႈလွင်ႈဢၼ်မၼ်းလႆႈတိူဝ်ႉယိပ်းပူးၶူဝ်းမၼ်းၸဝ်ႈၵွပ်ႈပိူဝ်ႈလွင်ႈသင်ဢိၵ်ႇတင်းလွင်ႈဢၼ်တၢင်းပဵၼ်မၼ်းႁၢႆၶႅၼ်းၵမ်းလဵဝ်ၼၼ်ႉၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်ဢေႃႈ။

၄၈ မၼ်းၸဝ်ႈၵေႃႈလၢတ်ႈတီႈမေႈယိင်းၼၼ်ႉလႄႈဝႃႈ၊-လုၵ်ႈယိင်းၵဝ်ဢိူၺ်း။ယႃႇပေမႆႈၸႂ်။တၢင်းယုမ်ႇမၢတ်ႈမႂ်းႁဵတ်းႁႂ်ႈမႂ်းႁၢႆၶႅၼ်းယဝ်ႉ။ၵႂႃႇၼိမ်ၼိမ်တႃႉ၊ဝႃႈၼင်ႇၼႆဢေႃႈ။

၄၉ ၼႂ်းမိူဝ်ႈဢၼ်မၼ်းၸဝ်ႈလၢတ်ႈၸိူဝ်ႉၼင်ႇၼၼ်ယူႇၼၼ်ႉၸိုင်ၵူၼ်းၵေႃႉၼိုင်ႈလုၵ်ႉသေၵႃႈတီႈႁိူၼ်းၵႄႇၸရွပ်ႈႁေႃးတြႃးႁွတ်ႈမႃးလႄႈလၢတ်ႈဝႃႈ၊-လုၵ်ႈယိင်းၸဝ်ႈႁဝ်းတၢႆၶႃႈယဝ်ႉ။ယႃႇပပေၼ်တုၵ်ႉၶႃႉတီႈသြႃႇၸဝ်ႈၶႃႈယဝ်ႉ၊ဝႃႈၼင်ႇၼႆဢေႃႈ။

၅၀ မိူဝ်ႈဢၼ်ၸဝ်ႈယေႇသုငိၼ်းၵႂၢမ်းၼၼ်ႉၸိုင်မၼ်းၸဝ်ႈလၢတ်ႈတီႈၵႄႇၸရွပ်ႈႁေႃးတြႃးၼၼ်ႉလႄႈဝႃႈ၊-ယႃႇပေမႆႈၸႂ်။ႁႂ်ႈမီးၸႂ်ဢၼ်ယုမ်ႇမၢတ်ႈၵူၺ်းတႃႉ။ပေႃးမီးၸိုင်မၼ်းတၵ်းၵၢင်းလွတ်ႈတင်းၽေးတၢင်းတၢႆယူႇဢေႃႈ၊ဝႃႈၼင်ႇၼႆဢေႃႈ။

၅၁ မိူဝ်ႈဢၼ်မၼ်းၸဝ်ႈႁွတ်ႈထိုင်ၵႃႈတီႈႁိူၼ်းၼၼ်ႉၸိုင်လိူဝ်သေပေႇတရုဢိၵ်ႇတင်းယုဝ်းႁၢၼ်ႇတင်းယႃႇၵုပ်ႉတင်းပေႃႈမေႈလုၵ်ႈဢွၼ်ႇၼၼ်ႉမၼ်းၸဝ်ႈဢမ်ႇပၼ်ႁႂ်ႈၽူႈလႂ်ၶဝ်ႈၵႃႈၼႂ်းလုၵ်းသေၵေႃႉသေၵူၼ်း။

၅၂ ၵူၼ်းတင်းသဵင်ႈတင်းလူင်ႁဵတ်းသဵင်ႁွင်ႉသဵင်ႁႆႈယူႇလႄႈမၼ်းၸဝ်ႈၵေႃႈလၢတ်ႈလႄႈဝႃႈ၊-ယႃႇပေႁွင်ႉပေႁႆႈ။လုၵ်ႈဢွၼ်ႇၼႆႉတၢႆယဝ်ႉဢမ်ႇၸႂ်ႈ။

၅၃ မၼ်းၼွၼ်းလပ်းယူႇၵူၺ်း၊ဝႃႈၼင်ႇၼႆလႄႈ၊ၶဝ်ဢွၼ်ၵၼ်ႁဵတ်းပျၢၵ်ႈႁဵတ်းၶူဝ်မၼ်းၸဝ်ႈပိူဝ်ႈဢၼ်ၶဝ်ႁူႉလွင်ႈဢၼ်လုၵ်ႈဢွၼ်ႇၼၼ်ႉပေႃးတၢႆယဝ်ႉၼၼ်ႉဢေႃႈ။

၅၄ မၼ်းၸဝ်ႈႁႂ်ႈၶဝ်တင်းသဵင်ႈတင်းလူင်ဢွၵ်ႇၵႂႃႇၵႃႈၼွၵ်ႈသေယဝ်ႉမၼ်းၸဝ်ႈယိပ်းမိုဝ်းလုၵ်ႈဢွၼ်ႇၼၼ်ႉသေလႄႈႁွင်ႉဝႃႈ၊-လုၵ်ႈယိင်းဢွၼ်ႇဢိူၺ်း။လုၵ်ႉတႃႉ၊မိူဝ်ႈဢၼ်ဝႃႈၼင်ႇၼႆၸိုင်၊ဝိၺိၺ်ႇမၼ်းၶိုၼ်းမႃးလႄႈလုၵ်ႈဢွၼ်ႇၼၼ်ႉလုၵ်ႉၵမ်းလဵဝ်ဢေႃႈ။

၅၅ မၼ်းၸဝ်ႈၵေႃႈမီးဢမိင်ႉလႄႈဝႃႈ၊-ပၼ်တၢင်းၵိၼ်တီႈမၼ်းတႃႉ၊ဝႃႈၼင်ႇၼႆဢေႃႈ။ပေႃႈမေႈမၼ်းၵႂင်ၸႂ်ယုင်ႈၸႂ်ယူႇဢေႃႈ။

၅၆ ၼင်ႇႁိုဝ်တၵ်းဢမ်ႇမွၵ်ႇလၢတ်ႈလွင်ႈတီႈႁႅင်းၼၼ်ႉတီႈၽူႈလႂ်သေၵေႃႉသေၵူၼ်းၸိုင်မၼ်းၸဝ်ႈပိင်းၺၢပ်ႈဝႆႉတီႈၶဝ်ဢေႃႈ။