Shan Missions

ၵျၢမ်းၶၢဝ်ႇငၢဝ်ႊသတၢင်းသိူဝ်းပျေႃႇယုဝ်းႁၢၼ်ႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂၀    ၂၁   

၆

ၸဝ်ႈယေႇသုလဵင်ႉလူၵူၼ်းႁႃႈႁဵင်

၁ လိုၼ်းၼၼ်ႉၸဝ်ႈယေႇသုၶၢမ်ႈၵႂႃႇၵႃႈတီႈၽၢႆႇပုၼ်ႉၼွင်ၵႃႇလိလႄးဢၼ်ဝႃႈၼွင်တိပိရိၼၼ်ႉဢေႃႈ။

၂ ၵူၼ်းၸူႉၵူၼ်းတုမ်ၼမ်ၼႃႇၸွမ်းပႃႈလင်မၼ်းၸဝ်ႈၵႂႃႇၵွပ်ႈပိူဝ်ႈၶဝ်လႆႈႁၼ်ၼီႉမိၵ်ႈလၵ်ႈၶၼႃႇဢၼ်မၼ်းၸဝ်ႈၼႄပျႃးတီႈၶဝ်ၸိူဝ်းဢၼ်ၸပ်းတၢင်းၶႆႈတၢင်းပဵၼ်ၸိူဝ်းၼၼ်ႉဢေႃႈ။

၃ ၸဝ်ႈယေႇသုၶိုၼ်ႈၵႂႃႇၵႃႈၼိူဝ်လွႆလႄႈၼင်ႈယူႇလူၺ်ႈၵၼ်တင်းတပႄးၸဝ်ႈတင်းလၢႆဢေႃႈ။

၄ ၶိင်ႇၼၼ်ႉပဵၼ်ၶိင်ႇဢၼ်ၸမ်ႈတၵ်းၶၢမ်ႇပွႆးပႃသၶႃႇၵူၼ်းယုတၶဝ်ၼၼ်ႉဢေႃႈ။ၸဝ်ႈယေႇသုမုင်ႈတူၺ်းလႄႈႁၼ်ၵူၼ်းၸူႉၵူၼ်းတုမ်ၼမ်ၼႃႇမႃးတီႈမၼ်းၸဝ်ႈၼၼ်ႉၸိုင်မၼ်းၸဝ်ႈထၢမ်တီႈၽိလိပ်ႉပုလႄႈဝႃႈ၊-

၅ ၼင်ႇႁိုဝ်ၶဝ်တၵ်းလႆႈၵိၼ်လႆႈၶူပ်းၸိုင်တၵ်းသိုဝ်ႉဢဝ်ၶဝ်ႈမုၼ်းၵႃႈတီႈလႂ်ဝႃႈၼင်ႇၼႆဢေႃႈ။

၆ ပဵၵ်ႉသမ်ႉမၼ်းၸဝ်ႈႁူႉလွင်ႈဢၼ်တူဝ်ၸဝ်ႈၵဝ်ႇတၵ်းႁဵတ်းၸိူဝ်ႉၼင်ႇႁိုဝ်ၼၼ်ႉသေၵေႃႈၼင်ႇႁိုဝ်တၵ်းလႆႈၸၢမ်းတူၺ်းမၼ်းၸိုင်မၼ်းၸဝ်ႈၸင်ႇထၢမ်ၸိူဝ်ႉၼင်ႇၼႆဢေႃႈ။

၇ ၽိလိပ်ႉပုၵေႃႈလဝ်ႈလၢတ်ႈလႄႈဝႃႈ၊-ၼင်ႇႁိုဝ်ၶဝ်တၵ်းလႆႈၵိၼ်ၶဝ်ႈမုၼ်းယေႈၵေႃႉယေႈဢိတ်းၸိုင်ဢဝ်ငိုၼ်းတေႇၼႃႇရီႇသွင်ပၢၵ်ႇၶႅပ်းသိုဝ်ႉၵေႃႈဢမ်ႇပေႃးဢမ်ႇၵုမ်ႇလႆႈၶႃႈ၊ဝႃႈၼင်ႇၼႆဢေႃႈ။

၈ ၼႂ်းတပႄးၸဝ်ႈၸိူဝ်းၼၼ်ႉၵေႃႉၼိုင်ႈဢၼ်လႆႈၸိုဝ်ဢၼ်ႇတရေႇ၊ဢၼ်ပဵၼ်ၼွင်ႉၸၢႆးသိမုၼ်ႇပေႇတရု၊ၼၼ်ႉလဝ်ႈလၢတ်ႈလႄႈဝႃႈ၊-

၉ မီးလုၵ်ႈဢွၼ်ႇၵေႃႉၼိုင်ႈမၼ်းပႃးၶဝ်ႈမုၼ်းမူႉယေႃးႁႃႈလုၵ်ႉတင်းပႃဢွၼ်ႇသွင်တူဝ်ၶႃႈဢေႃႈ။ၼႂ်းဝႃႈၼၼ်သေၵေႃႈပုၼ်ႈၵူၼ်းၼမ်ၼႃႇထၢၼ်ႇၼႆႉတၵ်းၵိၼ်ၼၼ်ႉတၵ်းပွင်ႇလွင်ႈၵႃႈသင်ၶႃႈ၊ဝႃႈၼင်ႇၼႆဢေႃႈ။

၁၀ ၸဝ်ႈယေႇသုၵေႃႈလၢတ်ႈလႄႈဝႃႈ၊-ႁႂ်ႈၵူၼ်းၸိူဝ်းၼႆႉၼင်ႈယူႇတႃႉ၊ဝႃႈၼင်ႇၼႆဢေႃႈ။ၵႃႈတီႈၼၼ်ႉမီးတူၼ်ႈယိူဝ်တူၼ်ႈယႃႈၼမ်ၼႃႇဢေႃႈ။ၵႃႈၼင်ႇဢၼ်ၼပ်ႉဢၢၼ်ႇၼၼ်ႉမီးၵူၼ်းႁႃႈႁဵင်ၸမ်ၸမ်ၼင်ႈယူႇဢေႃႈ။

၁၁ ၸဝ်ႈယေႇသုၵေႃႈဢဝ်ၶဝ်ႈမုၼ်းလႄႈယွင်ႈယေႃးၵျေးၸူးၸဝ်ႈသေယဝ်ႉၽႄမႅင်ႇပၼ်ၶဝ်ၸိူဝ်းဢၼ်ၼင်ႈယူႇၸိူဝ်းၼၼ်ႉဢေႃႈ။မိူၼ်ၼင်ႇၼၼ်မၼ်းၸဝ်ႈဢဝ်ပႃၸိူဝ်းၼၼ်ႉၽႄမႅင်ႇပၼ်ၵႃႈၼင်ႇဢၼ်ၶဝ်ၶႂ်ႈၵိၼ်ၼၼ်ႉဢေႃႈ။

၁၂ ဝၢႆးသေၶဝ်ၵိၼ်ဢိမ်ႇယဝ်ႉမၼ်းၸဝ်ႈသမ်ႉလၢတ်ႈတီႈတပႄးၸဝ်ႈၸိူဝ်းၼၼ်ႉလႄႈဝႃႈ၊ၼင်ႇႁိုဝ်တၵ်းဢမ်ႇပဵၼ်လၢႆလၢႆၸိုင်ၵဵပ်းသိမ်းဢဝ်ဢၼ်ၵိုတ်းဢၼ်ၵျၢၼ်ႇဢၼ်ႁၵ်းဢၼ်ႁိၵ်းတင်းလၢႆၸိူဝ်းၼၼ်ႉဝႆႉတႃႉ၊မိူဝ်ႈဢၼ်ဝႃႈၼင်ႇၼႆၸိုင်၊

၁၃ ၶဝ်ၵေႃႈၵဵပ်းသိမ်းဢဝ်ဢၼ်ႁၵ်းဢၼ်ႁိၵ်းၶဝ်ႈမုၼ်းမူႉယေႃးဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉလႄႈလႆႈတဵမ်သိပ်းသွင်ပဵတ်ႈဢေႃႈ။

၁၄ မိူဝ်ႈဢၼ်ၵူၼ်းၸိူဝ်းၼၼ်ႉႁၼ်ၼီႉမိၵ်ႈလၵ်ႈၶၼႃႇဢၼ်မၼ်းၸဝ်ႈၼႄပျႃးၸိူဝ်ႉၼင်ႇၼၼ်ၼၼ်ႉၸိုင်ၶဝ်လၢတ်ႈၵၼ်လႄႈဝႃႈ၊-ၵေႃႉၼႆႉပဵၼ်ပရေႃးၽႅတ်ႈဢၼ်မႃးၼႂ်းလေႃးၵႃႉၼႆႉဢၼ်ဝႃႈၼၼ်ႉၸႂ်ႈတႄႉဢေႃႈ၊ဝႃႈၼင်ႇၼႆဢေႃႈ။

၁၅ ၸဝ်ႈယေႇသုႁူႉလွင်ႈဢၼ်ၶဝ်တၵ်းမႃးလႄႈႁဵတ်းဢႃႉထမ်ႇမႃႉႁႂ်ႈလႆႈဢဝ်မၼ်းၸဝ်ႈယုၵ်ႉယွင်ႈဝႆႉၵႃႈၼႂ်းဢရႃႇၶုၼ်ႁေႃၶမ်းၼၼ်ႉလႄႈမၼ်းၸဝ်ႈၶိုၼ်ႈၵႂႃႇၵႃႈၼိူဝ်လွႆပႃးလဵဝ်ၵူၺ်းဢေႃႈ။

ၸဝ်ႈယေႇသုပႆၼိူဝ်ၼမ်ႉၼွင်

၁၆ မိူဝ်ႈဢၼ်ႁွတ်ႈထိုင်ၶိင်ႇၵၢင်ၶမ်ႈၸိုင်တပႄးၸဝ်ႈၸိူဝ်းၼၼ်ႉလူင်းၵႂႃႇၸူးၵႃႈတီႈၼွင်လႄႈၶဝ်ႈၵႃႈၼႂ်းႁိူဝ်းယဝ်ႉၸင်ႇၶၢမ်ႈၼမ်ႉၵႂႃႇႁႂ်ႈလႆႈႁွတ်ႈထိုင်ၵႃႈတီႈဝဵင်းၵပိူဝ်ႇၼေႇဢုမ်ႇဢေႃႈ။

၁၇ မိူဝ်ႈၶိင်ႇၼၼ်ႉပဵၼ်ဢၼ်လပ်းသိင်ႇလႄႈၸဝ်ႈယေႇသုယင်းဢမ်ႇပႆႇႁွတ်ႈထိုင်ၵႃႈတီႈဢၼ်ၶဝ်မီးၼၼ်ႉ။

၁၈ ပိူဝ်ႈဢၼ်လူမ်းလႅင်ႉပဝ်ႇမႃးလႄႈလႅင်းၼမ်ႉပိူပ်ႇၼမ်ႉလုၵ်ႉၶိုၼ်ႈယႂ်ႇၼႃႇဢေႃႈ။

၁၉ မိူဝ်ႈဢၼ်ၶဝ်ၽၢႆးႁိူဝ်းႁွတ်ႈထိုင်လၵ်းပၢႆသွင်လၵ်းၸမ်ၸမ်ၼၼ်ႉၶဝ်ႁၼ်ၸဝ်ႈယေႇသုပႆမႃးယူႇၵႃႈၼိူဝ်ၼမ်ႉၼွင်လႄႈသုတ်ႉၸမ်မႃးၵႃႈတီႈႁိမ်းႁိူဝ်းၶဝ်ၼၼ်ႉၸိုင်ၶဝ်မီးတၢင်းဢၼ်တူၵ်းၸႂ်ၵူဝ်ႁႄၼႃႇဢေႃႈ။

၂၀ မၼ်းၸဝ်ႈၵေႃႈလၢတ်ႈလႄႈဝႃႈ၊-ပဵၼ်ၵဝ်ဢိူဝ်း။ယႃႇပေၵူဝ်ပေႁႄ၊မိူဝ်ႈဢၼ်ဝႃႈၼင်ႇၼႆၸိုင်ၶဝ်မီးတင်းၸႂ်ဢၼ်သိူဝ်းပျေႃႇၼႃႇလႄႈႁပ်ႉဢဝ်မၼ်းၸဝ်ႈႁႂ်ႈၶဝ်ႈၵႃႈၼႂ်းႁိူဝ်းၶဝ်ဢေႃႈ။

၂၁ ႁိူဝ်းၼၼ်ႉၵေႃႈသိူၵ်ႈၵႃႈတီႈဢၼ်ၶဝ်ၶႂ်ႈၵႂႃႇၼၼ်ႉၵမ်းလဵဝ်ဢေႃႈ။

၂၂ ဝၼ်းမိူဝ်ႈၽုၵ်ႈမိူဝ်ႈဢၼ်ၵူၼ်းၸူႉၵူၼ်းတုမ်ဢၼ်ၸုၵ်းယူႇၵႃႈတီႈၽင်ႇၼမ်ႉၽၢႆႇပုၼ်ႉၸိူဝ်းၼၼ်ႉလႆႈႁၼ်ႁိူဝ်းဢွၼ်ႇလမ်းၼိုင်ႈၵူၺ်းလႄႈၸဝ်ႈယေႇသုယင်းဢမ်ႇၶဝ်ႈၵႃႈၼႂ်းႁိူဝ်းလူၺ်ႈၵၼ်တင်းတပႄးၸဝ်ႈၸိူဝ်းၼၼ်ႉလႄႈ

၂၃ တပႄးၸဝ်ႈၸိူဝ်းၼၼ်ႉၵႂႃႇႁင်းၵူၺ်းၶဝ်ၼၼ်ႉၸိုင်ႁိူဝ်းဢွၼ်ႇတၢင်ႇတီႈတၢင်ႇလႅၼ်ၼမ်ၼႃႇၵေႃႈလုၵ်ႉသေၵႃႈတီႈဝဵင်းတပေႇရိမႃးၸမ်ၵႃႈတီႈႁိမ်းတီႈဢၼ်ၸဝ်ႈယေႇသုယွင်ႈယေႃးၵျေးၸူးၸဝ်ႈသေယဝ်ႉႁႂ်ႈၵူၼ်းတင်းလၢႆလႆႈၵိၼ်ၶဝ်ႈမုၼ်းၼၼ်ႉဢေႃႈ။

၂၄ မိူဝ်ႈဢၼ်ၵူၼ်းၸူႉၵူၼ်းတုမ်ၸိူဝ်းၼၼ်ႉလႆႈႁၼ်လွင်ႈဢၼ်ၸဝ်ႈယေႇသုတင်းတပႄးၸဝ်ႈၸိူဝ်းၼၼ်ႉဢမ်ႇမီးၵႃႈတီႈၼၼ်ႉၸိုင်ၶဝ်ဢွၼ်ၵၼ်ၶဝ်ႈၵႃႈၼႂ်းႁိူဝ်းသေလႄႈၵႂႃႇၸူးၵႃႈတီႈဝဵင်းၵပိူဝ်ႇၼေႇဢုမ်ႇႁႂ်ႈလႆႈႁႃၸဝ်ႈယေႇသုဢေႃႈ။

ၸဝ်ႈယေႇသုပဵၼ်ၶဝ်ႈမုၼ်းဢသၢၵ်ႈ

၂၅ မိူဝ်ႈဢၼ်ၶဝ်ထူပ်းႁၼ်မၼ်းၸဝ်ႈၵႃႈတီႈၽင်ႇၼမ်ႉၽၢႆႇပုၼ်ႉၼၼ်ႉၸိုင်ၶဝ်လဝ်ႈထၢမ်လႄႈဝႃႈ၊-ၸဝ်ႈႁဝ်း၊ၸဝ်ႈႁဝ်းမႃးၵႃႈတီႈၼႆႉၶိင်ႇမိူဝ်ႈလႂ်ၶႃႈ၊ဝႃႈၼင်ႇၼႆဢေႃႈ။

၂၆ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ၵဝ်ဝႃႈတီႈၸိုဝ်ႈတီႈၸႂ်ႈၸမ်းသူၸွမ်းႁႃၵဝ်ၵွပ်ႈပိူဝ်ႈဢၼ်သူလႆႈႁၼ်ၼီႉမိၵ်ႈလၵ်ႈၶၼႃႇတင်းလၢႆၼၼ်ႉဢမ်ႇၸႂ်ႈ။သူၸွမ်းႁႃၵဝ်ၵွပ်ႈပိူဝ်ႈဢၼ်သူလႆႈၵိၼ်ၶဝ်ႈမုၼ်းဢိမ်ႇတဵမ်ၼၼ်ႉၵူၺ်းဢေႃႈ။

၂၇ ယႃႇၶတ်းၸႂ်ႁႃတၢင်းၵိၼ်ဢၼ်ၸၢင်ႊလူႉၸၢင်ႊလႅဝ်ၼၼ်ႉ။ၶတ်းၸႂ်ႁႃႁႂ်ႈလႆႈတၢင်းၵိၼ်ဢၼ်တၵ်းပၼ်ထႃႇဝရႃႉဢသၢၵ်ႈဢၼ်လုၵ်ႈၵူၼ်းတၵ်ႈပၼ်တီႈသူၼၼ်ႉတႃႉ။လုၵ်ႈၵူၼ်းၼၼ်ႉပဵၼ်ၵေႃႉဢၼ်လႆႈၶၢမ်ႇတၢင်းဢၼ်ပေႃႈၸဝ်ႈတွၵ်ႇတၼ်းသိၵ်ႈဢေႃႈ၊ဝႃႈၼင်ႇၼႆဢေႃႈ။

၂၈ ၶဝ်ၼၼ်ႉၵေႃႈလဝ်ႈထၢမ်လႄႈဝႃႈ၊-ၼင်ႇႁိုဝ်ႁဝ်းၶႃႈတၵ်းလႆႈႁဵတ်းဢမူႉတေႃႇမျၢတ်ႈၽြႃးပဵၼ်ၸဝ်ႈၼၼ်ႉႁဝ်းၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ၊ဝႃႈၼင်ႇၼႆဢေႃႈ။

၂၉ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ဢမူႉတေႃႇမျၢတ်ႈၽြႃးပဵၼ်ၸဝ်ႈၸမ်းပဵၼ်တၢင်းဢၼ်ယုမ်ႇမၢတ်ႈၵေႃႉဢၼ်မၼ်းၸဝ်ႈပွႆႇၸႂ်ႉမႃးၼၼ်ႉဢေႃႈ၊ဝႃႈၼင်ႇၼႆဢေႃႈ။

၃၀ ၶဝ်ၼၼ်ႉၵေႃႈလၢတ်ႈလႄႈဝႃႈ၊-ၼင်ႇႁိုဝ်ႁဝ်းၶႃႈတၵ်းလႆႈႁၼ်သေလႄႈယုမ်ႇမၢတ်ႈၸဝ်ႈႁဝ်းၸိုင်ၸဝ်ႈႁဝ်းတၵ်းၼႄပျႃးၼီႉမိၵ်ႈလၵ်ႈၶၼႃႇဢၼ်လႂ်ၶႃႈ။ၸဝ်ႈႁဝ်းတၵ်းႁဵတ်းလွင်ႈတၢင်းဢၼ်လႂ်ၶႃႈ။

၃၁ ၵႃႈၼင်ႇဢၼ်မႃးၼႂ်းၵျၢမ်းလိၵ်ႈလႄႈဝႃႈ၊-ပုၼ်ႈဢၼ်ၶဝ်တၵ်းၵိၼ်ၸိုင်မၼ်းၸဝ်ႈဢဝ်ၶဝ်ႈမုၼ်းၵႃႈၼိူဝ်ၵၢင်ႁၢဝ်ပၼ်မႃးတီၶဝ်ဢေႃႈ၊ဝႃႈၼင်ႇၼႆၼၼ်ႉပူႇမွၼ်ႇႁဝ်းၸိူဝ်းၼၼ်ႉလႆႈၵိၼ်ၶဝ်ႈမုၼ်းမၼ်ႇၼႃႉၼၼ်ႉၶႃႈယဝ်ႉ၊ဝႃႈၼင်ႇၼႆဢေႃႈ။

၃၂ ၸဝ်ႈယေႇသုၵေႃႈလၢတ်ႈလႄႈဝႃႈ၊-ၵဝ်ဝႃႈတီႈၸိုဝ်ႈတီႈၸႂ်ႈၸမ်းၶဝ်ႈမုၼ်းၵႃႈၼိူဝ်ၵၢင်ႁၢဝ်ၼၼ်ႉဢမ်ႇၸႂ်မုဝ်းသေပၼ်တီႈသူ။ပေႃႈၸဝ်ႈၵူၺ်းဢဝ်ၶဝ်ႈမုၼ်းဢၼ်ၸိုဝ်ႈဢၼ်ၸႂ်ႈၵႃႈၼိူဝ်ၵၢင်ႁၢဝ်ၼၼ်ႉပၼ်မႃးတီႈသူဢေႃႈ။

၃၃ ၶဝ်ႈမုၼ်းၽြႃးပဵၼ်ၸဝ်ႈၸမ်းပဵၼ်ၶဝ်ႈမုၼ်းဢၼ်လုၵ်ႉသေၵႃႈၼိူဝ်ၵၢင်ႁၢဝ်လူင်းမႃးလႄႈပၼ်ဢသၢၵ်ႈတီႈၵူၼ်းလေႃးၵီႇတင်းလၢႆဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၼၼ်ႉၵေႃႈလဝ်ႈလၢတ်ႈလႄႈဝႃႈ၊-

၃၄ ၸဝ်ႈႁဝ်းၶႅၼ်းတေႃႈပၼ်ၶဝ်ႈမုၼ်းၼၼ်ႉတီႈႁဝ်းၶႃႈတႃႇသေႇသေၵမ်းၶႃႈ၊ဝႃႈၼင်ႇၼႆဢေႃႈ။

၃၅ ၸဝ်ႈယေႇသုၵေႃႈလၢတ်ႈလႄႈဝႃႈ၊-ၵဝ်ပဵၼ်ၶဝ်ႈမုၼ်းဢသၢၵ်ႈဢေႃႈ။ၵေႃႉဢၼ်မႃးၵႃႈတီႈၵဝ်ၼၼ်ႉၵမ်းလိုၼ်းတၵ်းဢမ်ႇလႆႈဢိုပ်းတၢင်းၵိၼ်။ၵေႃႉဢၼ်ယုမ်ႇမၢတ်ႈၵဝ်ၼၼ်ႉၵမ်းလိုၼ်းတၵ်းဢမ်ႇလႆႈယၢၵ်ႇၼမ်ႉ။

၃၆ ၵူၺ်းၵႃႈသူၼႆႉပဵၵ်ႉသမ်ႉႁၼ်ၵဝ်ယူႇသေၵေႃႈဢမ်ႇယုမ်ႇမၢတ်ႈ၊ဝႃႈၼႆၵဝ်ဝႃႈမႃးယဝ်ႉ။

၃၇ ၶဝ်ၸိူဝ်းဢၼ်ပေႃႈၸဝ်ႈပၼ်တီႈၵဝ်ၵႃႈမီးတင်းသဵင်ႈတင်းလူင်ၼၼ်ႉတၵ်းမႃးၵႃႈတီႈၵဝ်ဢေႃႈ။ၵေႃႉဢၼ်မႃးၵႃႈတီႈၵဝ်ၼၼ်ႉၵဝ်ဢမ်ႇပႄႇဢမ်ႇပႅတ်ႈလႃးလႃး။

၃၈ လွင်ႈမၼ်းၸမ်းၵဝ်လုၵ်ႉသေၵႃႈၼိူဝ်ၵၢင်ႁၢဝ်လူင်းမႃးႁႂ်ႈလႆႈၸွမ်းဢလူဝ်ႇတူဝ်ၸဝ်ႈၵဝ်ႇဢမ်ႇၸႂ်ႈ။လူင်းမႃးႁႂ်ႈလႆႈၸွမ်းဢလူဝ်ႇၵေႃႉဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။

၃၉ ဢလူဝ်ႇၵေႃႉဢၼ်ပွႆႇၸႂ်ႉၵဝ်မႃးၼၼ်ႉၸမ်းပဵၼ်တၢင်းဢၼ်ၵဝ်တၵ်းဢမ်ႇႁႂ်ႈၶဝ်ၸိူဝ်းဢၼ်မၼ်းၸဝ်ႈဢၢပ်ႈပၼ်ၵႃႈတီႈၵဝ်ၼၼ်ႉလႆႈႁၢႆၵႂႃႇသေၵေႃႉသေၵူၼ်းလႄႈတၵ်းႁႂ်ႈၶဝ်တင်းသဵင်ႈတင်းလူင်လႆႈလုၵ်ႉၶိုၼ်းၼႂ်းဝၼ်းဢၼ်သုတ်းပုၼ်ႉဢေႃႈ။

၄၀ လွင်ႈမၼ်းၸမ်းဢလူဝ်ႇၸဝ်ႈပေႃႈၵဝ်ၼၼ်ႉပဵၼ်တၢင်းဢၼ်ၶႂ်ႈႁႂ်ႈၶဝ်ၸိူဝ်းဢၼ်တူၺ်းႁၼ်လုၵ်ႈၸဝ်ႈလႄႈယုမ်ႇမၢတ်ႈၼၼ်ႉၵႃႈမီးတင်းသဵင်ႈတင်းလူင်တၵ်းလႆႈထႃႇဝရႃႉဢသၢၵ်ႈဢေႃႈ။ၵဝ်ၵေႃႈၼႂ်းဝၼ်းဢၼ်သုတ်းပုၼ်ႉၼၼ်ႉတၵ်းႁႂ်ႈၶဝ်လုၵ်ႉၶိုၼ်းဢေႃႈ၊ဝႃႈၼင်ႇၼႆဢေႃႈ။

၄၁ ၵွပ်ႈပိူဝ်ႈဢၼ်မၼ်းၸဝ်ႈလၢတ်ႈဝႃႈ၊-ၵဝ်ပဵၼ်ၶဝ်ႈမုၼ်းဢၼ်လုၵ်ႉသေၵႃႈၼိူဝ်ၵၢင်ႁၢဝ်ပုၼ်ႉလူင်းမႃးဢေႃႈ၊ဝႃႈၼင်ႇၼႆၼၼ်ႉလႄႈၵူၼ်းယုတၶဝ်သေႉသွမ်းတၢင်ႇဢပျႅတ်ႈလႄႈဝႃႈ၊-

၄၂ ၵေႃႉၼႆႉပဵၼ်ယေႇသု၊လုၵ်ႈၸၢႆးယုဝ်းသႅပ်ႉ၊ဢမ်ႇၸႂ်ႈႁိုဝ်။ပေႃႈမေႈမၼ်းၵေႃႈႁဝ်းႁူႉယူႇဢေႃႈ။ႁဵတ်ႈႁိုဝ်လႄႈမၼ်းသမ်ႉဝႃႈ၊-ၵဝ်လုၵ်ႉသေၵႃႈၼိူဝ်ၵၢင်ႁၢဝ်လူင်းမႃး၊ဝႃႈၸိူဝ်ႉၼႆ၊ဝႃႈၼင်ႇၼႆဢေႃႈ။

၄၃ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ၵေႃႉၼိုင်ႈလႄႈၵေႃႉၼိုင်ႈယႃႇပေသေႉသွမ်းတၢင်ႇဢပျႅတ်ႈတီႈၵၼ်။

၄၄ သင်ပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢမ်ႇတိုၵ်းယူင်းၸိုင်ၽူႈလႂ်ဢမ်ႇမႃးၵႃႈတီႈၵဝ်လႆႈသေၵေႃႉသေၵူၼ်း။ၵေႃႉဢၼ်မႃးၼၼ်ႉၵေႃႈၵဝ်တၵ်းႁႂ်ႈလုၵ်ႉၶိုၼ်းၼႂ်းဝၼ်းဢၼ်သုတ်းၼၼ်ႉဢေႃႈ။

၄၅ ၵႃႈၼင်ႇဢၼ်မီးမႃးၼႂ်းၵျၢမ်းလိၵ်ႈဢၼႃႇၵၢတ်ႈတိၼၼ်ႉလႄႈဝႃႈ၊-ၶဝ်တင်းသဵင်ႈတင်းလူင်တၵ်းပဵၼ်ၵေႃႉဢၼ်ၽြႃးပဵၼ်ၸဝ်ႈသင်ႇသွၼ်သုင်းမႃႉဢေႃႈ။ၵေႃႉဢၼ်ငိၼ်းတီႈပေႃႈၸဝ်ႈလႄႈၶၢမ်ႇဢဝ်ၼႄးၵႃႈမီးတင်းသဵင်ႈတင်းလူင်ၼၼ်ႉမႃးၵႃႈတီႈၵဝ်ဢေႃႈ။

၄၆ လိူဝ်သေၵေႃႉဢၼ်လုၵ်ႉသေၵႃႈတီႈၽြႃးပဵၼ်ၸဝ်ႈမႃးပႃးလဵဝ်ၵူၺ်းၼၼ်ႉၽူႈလႂ်ႈသေၵေႃႉသေၵူၼ်းဢမ်ႇလႆႈႁၼ်ပေႃႈၸဝ်ႈမႃး။ၵေႃႉၼၼ်ႉၵူၺ်းလႆႈႁၼ်ပေႃႈၸဝ်ႈမႃးယဝ်ႉ။

၄၇ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၵေႃႉဢၼ်ယုမ်ႇမၢတ်ႈၵဝ်ၼၼ်ႉလႆႈထႃႇဝရႃႉဢသၢၵ်ႈဢေႃႈ။

၄၈ ၵဝ်ပဵၼ်ၶဝ်ႈမုၼ်းဢသၢၵ်ႈဢေႃႈ။ပူႇမွၼ်ႇသူၸိူဝ်ႈၼၼ်ႉၵိၼ်ၶဝ်ႈမုၼ်းမၼ်ႇၼႃႉၵႃႈၼႂ်းထိူၼ်ႇၼၼ်ႉသေၵေႃႈလႆႈတၢႆဢေႃႈ။

၄၉ ၶဝ်ႈမုၼ်းၼႆႉၸမ်းပဵၼ်ၶဝ်ႈမုၼ်းဢၼ်လုၵ်ႉသေၵႃႈၼိူဝ်ၵၢင်ႁၢဝ်ပုၼ်ႉလူင်းမႃး

၅၀ ပုၼ်ႈလွင်ႈၼင်ႇႁိုဝ်ၵူၼ်းတၵ်းၵိၼ်လႄႈဢမ်ႇလႆႈတၢႆၼၼ်ႉဢေႃႈ။

၅၁ ၵဝ်ပဵၼ်ၶဝ်ႈမုၼ်းဢသၢၵ်ႈဢၼ်လုၵ်ႉသေၵႃႈၼိူဝ်ႈၵၢင်ႁၢဝ်လူင်းမႃးဢေႃႈ။ၵေႃႉဢၼ်ၵိၼ်ၶဝ်ႈမုၼ်းၼႆႉဢသၢၵ်ႈလိပ်းယူႇတႃႇသေႇဢေႃႈ။ၶဝ်ႈမုၼ်းဢၼ်ၵဝ်ပၼ်ၸမ်းပဵၼ်ၼိူဝ်ႉၵဝ်ဢၼ်ၵဝ်ၸုၼ်ႉပႅတ်ႈပုၼ်ႈဢသၢၵ်ႈၵူၼ်းလေႃးၵီႇတင်းလၢႆဢေႃႈ၊ဝႃႈၼင်ႇၼႆဢေႃႈ။

၅၂ မိူဝ်ႈၼၼ်ႉၵူၼ်းယုတၸိူဝ်းၼၼ်ႉၵေႃႈၵေႃႉၼိုင်ႈလႄႈၵေႃႉၼိုင်ႈထဵင်ၵၼ်လႄႈဝႃႈ၊-မၼ်းတၵ်းပၼ်ၼိူဝ်ႉမၼ်းႁႂ်ႈႁဝ်းတၵ်းလႆႈၵိၼ်ၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။ၸဝ်ႈယေႇသုၵေႃႈလၢတ်ႈလႄႈဝႃႈ၊-

၅၃ ၵဝ်ဝႃႈတီႈၸိုဝ်ႈတီႈၸႂ်ႈၸမ်းပေႃးသူဢမ်ႇၵိၼ်ၼိူဝ်ႉဢမ်ႇသူတ်ႉလိူတ်ႈလုၵ်ႈၵူၼ်းၸိုင်ဢသၢၵ်ႈဢမ်ႇမီးၼႂ်းသူ။

၅၄ ၵေႃႉဢၼ်ၵိၼ်ၼိူဝ်ႉသူတ်ႉလိူတ်ႈၵဝ်ၼႆႉၼၼ်ႉလႆႈထႃႇဝရႃႉဢသၢၵ်ႈဢေႃႈ။ၼႂ်းဝၼ်းဢၼ်သုတ်းပုၼ်ႉၼၼ်ႉၵဝ်တၵ်းႁႂ်ႈၵေႃႉၼၼ်ႉလုၵ်ႉၶိုၼ်းဢေႃႈ။

၅၅ ၼိူဝ်ႉၵဝ်ၼႆႉပဵၼ်ဢၼ်လီၵိၼ်ဢေႃႈ။လိူတ်ႈၵဝ်ၼႆႉၵေႃႈပဵၼ်ဢၼ်လီသူတ်ႉဢေႃႈ။

၅၆ ၵေႃႉဢၼ်ၵိၼ်ၼိူဝ်ႉၵဝ်သူတ်ႉလိူတ်ႈၵဝ်ၼၼ်ႉတႄႇယူႇၼႂ်းၵဝ်ဢေႃႈ။

၅၇ ၵႃႈၼႂ်းၵေႃႉၼၼ်ႉၵေႃႈၵဝ်တႄႇယူႇဢေႃႈ။ၸိူဝ်ႉၼင်ႇဢၼ်ပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢသၢၵ်ႈလိပ်းယူႇၼၼ်ႉၵဝ်ၵေႃႈဢသၢၵ်ႈလိပ်းယူႇၵွပ်ႈပိူဝ်ႈပေႃႈၸဝ်ႈၼၼ်ႉဢေႃႈ။ၵေႃႉဢၼ်ၵိၼ်ၵဝ်ၼၼ်ႉၵေႃႈဢသၢၵ်ႈတၵ်းလိပ်းၵွပ်ႈပိူဝ်ႈၵဝ်ဢေႃႈ။

၅၈ ၶဝ်ႈမုၼ်းၼႆႉၸမ်းပဵၼ်ၶဝ်ႈမုၼ်းဢၼ်လုၵ်ႉသေၵႃႈၼိူဝ်ႈၵၢင်ႁၢဝ်ပုၼ်ႉလူင်းမႃးဢေႃႈ။ၸိူဝ်ႉၼင်ႇဢၼ်ပူႇမွၼ်ႇသူၵိၼ်ၶဝ်ႈမုၼ်းမၼ်ႇၼႃႉယဝ်ႉလႄႈလႆႈတၢႆၼၼ်ႉဢမ်ႇၸႂ်ႈ။

၅၉ ၵေႃႉဢၼ်ၵိၼ်ၶဝ်ႈမုၼ်းၼႆႉၼၼ်ႉဢသၢၵ်ႈတၵ်းလိပ်းယူႇတႃႇသေႇဢေႃႈ၊ဝႃႈၼႆမၼ်းၸဝ်ႈလၢတ်ႈဝႃႈၼႂ်းမိူဝ်ႈဢၼ်မၼ်းၸဝ်ႈသင်ႇသွၼ်ပၼ်ယူႇၼႂ်းၸရွပ်ႈႁေႃးတြႃးၵႃႈတီႈဝဵင်းၵပိူဝ်ႇၼေႇဢုမ်ႇၼၼ်ႉဢေႃႈ။

တပႄးၸဝ်ႈလႂ်ၸုၼ်ႉပႅတ်ႈၸဝ်ႈယေႇသု

၆၀ တပႄးၸဝ်ႈၼမ်ၼႃႇငိၼ်းသေယဝ်ႉဢွၼ်ၵၼ်လၢတ်ႈလႄႈဝႃႈ၊-ၵႂၢမ်းၼႆႉယၢပ်ႇၼႃႇဢေႃႈ။ႁူၵေႃႉလႂ်တၵ်းၶၢမ်ႇလႆႈ၊ဝႃႈၼင်ႇၼႆဢေႃႈ။

၆၁ လွင်ႈဢၼ်တပႄးၸဝ်ႈၸိူဝ်းၼၼ်ႉသေႉသွမ်းတၢင်ႇဢပျႅတ်ႈၸိူဝ်ႉၼင်ႇၼႆၼၼ်ႉၸိုင်ၸဝ်ႈယေႇသုႁူႉလႄႈလၢတ်ႈဝႃႈ၊-ၵွပ်ႈပိူဝ်ႈၵႂၢမ်းၼႆႉလႄႈသူၸႂ်လူႉႁိုဝ်။

၆၂ ပေႃးသူလႆႈႁၼ်လုၵ်ႈၵူၼ်းၶိုၼ်ႈၵႂႃႇၵႃႈတီႈဢၼ်ယူႇဢွၼ်တၢင်းပုၼ်ႉၸိုင်သူတၵ်းထၢင်ႇၸိူဝ်ႉၼင်ႇႁိုဝ်။

၆၃ ဝိၺိၺ်ႇၵူၺ်းႁႂ်ႈဢသၢၵ်ႈလိပ်းဢေႃႈ။ၼိူဝ်ႉၸမ်းဢမ်ႇတတ်ႈၼိုင်ႇလႆႈလႃးလႃး။ၵႂၢမ်းဢၼ်ၵဝ်လၢတ်ႈၼႆႉပဵၼ်ဝိၺိၺ်ႇဢေႃႈ။

၆၄ ဢသၢၵ်ႈၵေႃႈပဵၼ်ဢေႃႈ။ၼႂ်းဝႃႈၼၼ်သေၵေႃႈၼႂ်းသူၼႆႉၶဝ်ၸိူဝ်းဢၼ်ဢမ်ႇယုမ်ႇမၢတ်ႈၼၼ်ႉမီးၵမ်ႈၽွင်ႈဢေႃႈ။

၆၅ လွင်ႈမၼ်းၸမ်းၸဝ်ႈယေႇသုႁူႉလွင်ႈဢၼ်ၽူႈလႂ်တၵ်းဢမ်ႇယုမ်ႇမၢတ်ႈၽူႈလႂ်တၵ်းဢဝ်မၼ်းၸဝ်ႈဢၢပ်ႈၼၼ်ႉၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉလႄႈမၼ်းၸဝ်ႈလၢတ်ႈလႄႈဝႃႈ၊-ၵွပ်ႈႁွႆးၼႆႉလႄႈပေႃးပေႃႈၸဝ်ႈဢမ်ႇပၼ်ဢၶႂၢင်ႉၸိုင်ၽူႈလႂ်သေၵေႃႉသေၵူၼ်းဢမ်ႇမႃးၵႃႈတီႈၵဝ်လႆႈဝႃႈၼင်ႇၼႆၼၼ်ႉဢေႃႈ။

၆၆ ၸႃႉၸဵမ်မိူဝ်ႈၼၼ်ႉလႄႈတပႄးၸဝ်ႈၼမ်ၼႃႇဢမ်ႇႁဵတ်းၵေႃႉႁဵတ်းသေႈလူၺ်ႈၵၼ်တင်းမၼ်းၸဝ်ႈလႄႈဢွၼ်ၵၼ်သုတ်ႈယိုတ်းၶိုၼ်းမိူဝ်းၵႂႃႇသေဢေႃႈ။

၆၇ ပိူဝ်ႈၼႆလႄႈၸဝ်ႈယေႇသုလၢတ်ႈတီႈတပႄးၸဝ်ႈသိပ်းသွင်ပႃးၼၼ်ႉလႄႈဝႃႈ၊-သူၵေႃႈၸွင်ႇၶႂ်ႈဢွၵ်ႇၵႂႃႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊သိမုၼ်ႇပေႇတရုၵေႃႈလဝ်ႈလၢတ်ႈလႄႈဝႃႈ၊-

၆၈ ၸဝ်ႈႁဝ်း၊ႁဝ်းၶႃႈတၵ်းလႆႈၵႂႃႇၵႃႈတီႈၽူႈလႂ်ၶႃႈ။ၵႂၢမ်းထႃႇဝရႃႉဢသၢၵ်ႈၼၼ်ႉတႄႇယူႇၼႂ်းၸဝ်ႈႁဝ်းၶႃႈဢေႃႈ။

၆၉ ႁဝ်းၶႃႈယုမ်ႇမၢတ်ႈလႄႈႁူႉလွင်ႈဢၼ်ၸဝ်ႈႁဝ်းပဵၼ်ၵေႃႉဢၼ်မူတ်းၸၢင်ႇၽြႃးပဵၼ်ၸဝ်ႈၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။

၇၀ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ၵဝ်လိူၵ်ႈၵဵပ်းဢဝ်သူသိပ်းသွင်ၵေႃႉၼႆႉဢမ်ႇၸႂ်ႈႁိုဝ်။ၼႂ်းဝႃႈၼၼ်သေၵေႃႈၼႂ်းသူၼႆႉပႃးၸႃႇတၢၼ်ႇမႃႇၼၢတ်ႈၵေႃႉၼိုင်ႈဢေႃႈ၊ဝႃႈၼင်ႇၼႆဢေႃႈ။

၇၁ မၼ်းၸဝ်ႈလၢတ်ႈလွင်ႈယုတဢိသၵႃႇရေႇဢုတ်ႉဢၼ်ပဵၼ်လုၵ်ႈၸၢႆးသိမုၼ်ႇၼၼ်ႉဢေႃႈ။လွင်ႈမၼ်းၸမ်းမၼ်းပဵၼ်ၵေႃႉဢၼ်ၶဝ်ႈပႃးၼႂ်းတပႄးၸဝ်ႈသိပ်းသွင်ပႃးၼၼ်ႉလႄႈပဵၼ်ၵေႃႉဢၼ်တၵ်းဢဝ်မၼ်းၸဝ်ႈဢၢပ်ႈၼႂ်းမိုဝ်းရၢၼ်ႇသူႇၼၼ်ႉဢေႃႈ။