Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၄

ပေႇတရုတင်းယုဝ်းႁၢၼ်ႇၽၢႆႇၼႃႈယိတ်ႉပရေႃးႁိၵ်ႈ

၁ ၼႂ်းမိူဝ်ႈဢၼ်ၶဝ်ႁေႃးလၢတ်ႈတီႈၵူၼ်းတင်းလၢႆၸိူဝ်ႉၼင်ႇၼၼ်ယူႇၼၼ်ႉၸိုင်၊ၸႃႉၸဵမ်ၵႄႇပိၵ်ႉမၢၼ်ႇလႄႈယိတ်ႉပရေႃးႁိၵ်ႈဢိၵ်ႇတင်းၸတ်ႉတုၵေးတင်းလၢႆမႃးလႄႈ

၂ ယၢပ်ႇၸႂ်မႆႈၸႂ်ၵွပ်ႈပိူဝ်ႈၶဝ်သင်ႇသွၼ်သုင်းမႃႉပၼ်ၵႃႈတီႈၵူၼ်းတင်းလၢႆလွင်ႈၸဝ်ႈယေႇသုလႄႈႁေႃးလၢတ်ႈတြႃးတၢင်းဢၼ်လုၵ်ႉၵႃႈတၢင်းတၢႆၶိုၼ်းလိပ်းၼၼ်ႉလႄႈ၊

၃ ၶဝ်တီႉဢဝ်သွင်ၶႃသေယဝ်ႉ၊ပိူဝ်ႈဢၼ်ပဵၼ်ၶိင်ႇၵၢင်ၶိုၼ်းလႄႈဢဝ်ၶဝ်ၶင်ဝႆႉၵႃႈၼႂ်းထွင်ႇတေႃႇႁွတ်ႈထိုင်ဝၼ်းမိူဝ်ႈၽုၵ်ႈဢေႃႈ။

၄ ၶဝ်ၸိူဝ်းဢၼ်လႆႈထွမ်ႇလႆႈငိၼ်းတြႃးၼၼ်ႉၼမ်ၼႃႇႁွတ်ႈထိုင်တၢင်းဢၼ်ယုမ်ႇမၢတ်ႈလႄႈၼပ်ႉဢၢၼ်ႇတူၺ်းမီးၵူၼ်းႁႃႈႁဵင်ၸမ်ၸမ်ဢေႃႈ။

မိူဝ်ႈဢၼ်ႁွတ်ႈထိုင်ဝၼ်းမိူဝ်ႈၽုၵ်ႈၼၼ်ႉၸိုင်၊ၶုၼ်ဢရႃႇသိဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၵူၼ်းထုတ်ႇၵျၢမ်းတင်းလၢႆ

၆ ၸႃႉၸဵမ်ယိတ်ႉပရေႃးႁိၵ်ႈဢၼ်ႇၼတ်ႉ၊ၵႃႇယႃႇၽ၊ယုဝ်းႁၢၼ်ႇ၊ဢလေႇၸၼ်ႇတရုဢိၵ်ႇတင်းၸိူဝ်ႉၶိူဝ်းၶုၼ်ယိတ်ႉပရေႃးႁိၵ်ႈၵႃႈမီးၸိူဝ်းၼၼ်ႉၸူႉၵၼ်တုမ်ၵၼ်ၵႃႈတီႈဝဵင်းယေႇရုသလႅမ်ႇသေယဝ်ႉဢဝ်သွင်ၶႃဝႆႉၵႃႈတီႈၼႂ်းၵၢင်ၶဝ်သေလႄႈထၢမ်ဝႃႈ၊-

၇ သူဢဝ်တင်းတၼ်းၶူဝ်းၸိူဝ်ႉၼင်ႇႁိုဝ်၊ဢဝ်တင်းၼႃႇမႃႉၸိုဝ်သဵင်ၽူႈလႂ်သေလႄႈႁဵတ်းလွင်ႈတၢင်းၸိူဝ်းၼႆႉ၊ဝႃႈၼင်ႇၼႆဢေႃႈ။

၈ ပေႇတရုၼၼ်ႉတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈသေလႄႈလၢတ်ႈတီႈၶဝ်ၼၼ်ႉလႄႈဝႃႈ၊-ၶုၼ်ဢၼ်ဢုပ်ႉပိူင်ႇဢိၵ်ႇတင်း

၉ ၽူႈဢၼ်ပဵၼ်ၵႄႇပဵၼ်ႁူဝ်ၶဝ်ဢိူၺ်း၊ပေႃးႁဝ်းလႆႈၶၢမ်ႇတၢင်းဢၼ်ၸႅတ်ႈထၢမ်ၸႅတ်ႈတူၺ်းၵွပ်ႈပိူဝ်ႈႁဝ်းႁဵတ်းၵျေးၸူးတီႈၵေႃႉဢၼ်လၵ်ႈၶၼႃႇဢင်ႇၵႃႇလူႉလႄႈႁႂ်ႈမၼ်းလႆႈၵၢင်းလွတ်ႈတင်းတၢင်းၶႆႈတၢင်းပဵၼ်ဝၼ်းမိူဝ်ႈၼႆႉၼၼ်ႉၸိုင်

၁၀ ႁႂ်ႈၸႃႉၸဵမ်သူလႄႈၵူၼ်းဢိသရေႇလတင်းသဵင်ႈတင်းလူင်မၢတ်ႈတွင်းဝႆႉလွင်ႈဢၼ်ဝႃႈ၊ႁဝ်းဢိင်ၼႃႇမႃႉၸိုဝ်သဵင်ၸဝ်ႈယေႇသုၶရိၸ်ႉ၊ၵူၼ်းဝဵင်းၼႃႇၸရႅတ်ႉဢၼ်သူဢဝ်တွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်း၊ဢၼ်ၽြႃးပဵၼ်ၸဝ်ႈႁႂ်ႈလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉသေယဝ်ႉႁႂ်ႈၵူၼ်းၵေႃႉၼႆႉႁၢႆၶႅၼ်းမႃးသိုဝ်ႈၼႃႈတႂ်ႈတႃသူဢေႃႈ၊ဢၼ်ဝႃႈၼၼ်ႉသေၵမ်းတႃႉ။

၁၁ ၸဝ်ႈၼၼ်ႉပဵၼ်မၢၵ်ႇႁိၼ်ဢၼ်သူၸိူဝ်းဢၼ်ႁဵတ်းတိူၵ်ႈပႅတ်ႈဝႆႉၼၼ်ႉလႄႈၵမ်းလိုၼ်းသမ်ႉပဵၼ်ႁူဝ်ၸဵင်ႇတိူၵ်ႈၼၼ်ႉဢေႃႈ။လိူဝ်သေၸဝ်ႈၼၼ်ႉၽူႈလႂ်ဢမ်ႇတၢတ်ႈၼိုင်ႇတၢင်းဢၼ်ၵႄႇၶျွတ်ႈဢဝ်လႆႈ။

၁၂ လိူဝ်သေၼႃႇမႃႉၸိုဝ်သဵင်မၼ်းၸဝ်ႈၼၼ်ႉဢမ်ႇမီးၼႃႇမႃႉၸိုဝ်သဵင်သေၸိူဝ်ႉသေပိူင်ဢၼ်ပေႃႇမႃးၵႃႈၼႂ်းၵူၼ်းတင်းလၢႆတႂ်ႈလုမ်ႈၽႃႉၵၢင်ႁၢဝ်ဢၼ်ၵႄႇၶျွတ်ႈဢဝ်ႁဝ်းလႆႈၼၼ်ႉ၊ဝႃႈၼင်ႇၼႆဢေႃႈ။

၁၃ မိူဝ်ႈဢၼ်ၶဝ်ႁၼ်တၢင်းႁတ်းႁၢၼ်ပေႇတရုတင်းယုဝ်းႁၢၼ်ႇဢၼ်ပဵၼ်ၵူၼ်းဢမ်ႇပေႃးမေႃလိၵ်ႈတႄႉတႄႉဝႃႈဝႃႈ၊ဢၼ်ပဵၼ်ၵူၼ်းပၢၼ်ၵၢင်ၵူၺ်းၼၼ်ႉၸိုင်ၶဝ်ဢၢမ်းၼႃႇသေလႄႈၶဝ်ၶုၵ်းၸႂ်လႆႈလွင်ႈဢၼ်သွင်ၶႃၼၼ်ႉပဵၼ်ၶဝ်ၸိူဝ်းဢၼ်ယၢမ်ႈလႆႈမီးယူႇလူၺ်ႈၵၼ်တင်းၸဝ်ႈယေႇသုၼၼ်ႉဢေႃႈ။

၁၄ မိူဝ်ႈဢၼ်ၶဝ်ႁၼ်ၵေႃႉဢၼ်ၵၢင်းလွတ်ႈတင်းတၢင်းၶႆႈတၢင်းပဵၼ်ၼၼ်ႉၸုၵ်းယူႇလူၺ်ႈၵၼ်တင်းသွင်ၶႃယူႇၼၼ်ႉၸိုင်ဢမ်ႇမီးတီႈဢၼ်တၵ်းတွပ်ႇတၵ်းထဵင်။

၁၅ ၶဝ်ႁႂ်ႈသွင်ၶႃဢွၵ်ႇသေၵႃႈၼႂ်းလုမ်းလူင်ၵႂႃႇၵမ်းၼိုင်ႈသေယဝ်ႉၶဝ်ၵေႃႉၼိုင်ႈလႄႈၵေႃႉၼိုင်ႈတိူင်ႇပၢင်ႇလၢတ်ႈၸႃၵၼ်လႄႈဝႃႈ၊-

၁၆ ႁဝ်းတၵ်းလႆႈႁဵတ်းတီႈၶဝ်ၸိူဝ်းၼႆႉၸိူဝ်ႉၼင်ႇႁိုဝ်။လွင်ႈဢၼ်ႁူင်ႁၢင်းၼၼ်ႉၸိုင်ထၢင်ႇသႃးမႃးၵႃႈတီႈၵူၼ်းဢၼ်ယူႇၵႃႈၼႂ်းဝဵင်းယေႇရုသလႅမ်ႇတင်းသဵင်ႈတင်းလူင်ယဝ်ႉ။

၁၇ ႁဝ်းၵေႃႈဢမ်ႇတွပ်ႇဢမ်ႇထဵင်လႆႈ။ၼႂ်းဝႃႈၼၼ်သေၵေႃႈၼင်ႇႁိုဝ်လွင်ႈတၢင်းၼႆႉတၵ်းဢမ်ႇလႆႈယဵင်ႈၶႅၼ်းၸွတ်ႇတူဝ်ၵႂႃႇၵႃႈၼႂ်းၵူၼ်းတင်းလၢႆၸိုင်ႁဝ်းလွၵ်ႇၶဝ်ၼႃႇၼႃႇၵမ်းလိုၼ်းယႃႇပေႁႂ်ႈၶဝ်ႈလႆႈဢိင်ပိုင်ႈၼႃႇမႃႉၸိုဝ်သဵင်ၸဝ်ႈၼၼ်ႉသေယဝ်ႉႁေႃးလၢတ်ႈတီႈၽူႈလႂ်သေၵေႃႉသေၵူၼ်းထႅင်ႈသေပွၵ်ႈ၊ဝႃႈၼႆသေယဝ်ႉ၊ၶိုၼ်းႁွင်ႉသွင်ၶႃမႃးလႄႈမီးဢမိင်ႉဝႃႈ၊-

၁၈ သူဢမ်ႇလႆႈဢိင်ပိုင်ႈၼႃႇမႃႉၸိုဝ်သဵင်ၸဝ်ႈယေႇသုၼၼ်ႉသေလႄႈသင်ႇသွၼ်ႁေႃးလၢတ်ႈထႅင်ႈသေဢိတ်း၊ဝႃႈၼင်ႇၼႆဢေႃႈ။

၁၉ ပေႇတရုတင်းယုဝ်းႁၢၼ်ႇၵေႃႈၶိုၼ်းလၢတ်ႈတီႈၶဝ်လႄႈဝႃႈ၊-လွင်ႈဢၼ်တၵ်းလႆႈထွမ်ႇဢဝ်ၵႂၢမ်းသူၼႃႇသေၵႂၢမ်းၽြႃးပဵၼ်ၸဝ်ႈၼၼ်ႉတၵ်းလီဢမ်ႇလီၵႃႈတီႈၽၢႆႇၼႃႈၽြႃးပဵၼ်ၸဝ်ႈဢၼ်ဝႃႈၼၼ်ႉၶႆႈၸႂ်ဝူၼ်ႉၸႂ်လႄႈၸီႇယၢင်ႇသေၵမ်း။

၂၀ လွင်ႈတၢင်းဢၼ်ႁဝ်းလႆႈႁၼ်လႆႈငိၼ်းၸိူဝ်းၼၼ်ႉႁဝ်းဢမ်ႇႁေႃးဢမ်ႇလၢတ်ႈလႄႈဢမ်ႇယူႇလႆႈ၊ဝႃႈၼင်ႇၼႆဢေႃႈ။

၂၁ မိူဝ်ႈၼၼ်ႉၵွပ်ႈပိူဝ်ႈၶဝ်ဢမ်ႇႁၼ်လွင်ႈတၢင်းဢၼ်တၵ်းလႆႈပၼ်တၢမ်ႇတီႈသွင်ၶႃၵူၺ်းဢမ်ႇၵႃး၊ၵွပ်ႈပိူဝ်ႈၵူၼ်းတင်းလၢႆၵေႃႈယွင်ႈယေႃးၽြႃးပဵၼ်ၸဝ်ႈယူႇလႄႈၶဝ်သမ်ႉလွၵ်ႇသွင်ၶႃႈထႅင်ႈသေယဝ်ႉပွႆႇသွင်ၶႃလွတ်ႈသေဢေႃႈ။

၂၂ ၵေႃႉဢၼ်လႆႈၶၢမ်ႇဢဝ်ၼီႉမိၵ်ႈလၵ်ႈၶၼႃႇတၢင်းဢၼ်တၢင်းၶႆႈတၢင်းပဵၼ်မၼ်းႁၢႆၶႅၼ်းၼၼ်ႉဢသၢၵ်ႈမီးသီႇသိပ်းပီႊလိူဝ်ယဝ်ႉဢေႃႈ။

တၢင်းသူးတွင်းၵူၼ်းယုမ်ႇမၢတ်ႈ

၂၃ သွင်ၶႃၼၼ်ႉမိူဝ်ႈဢၼ်လွတ်ႈယဝ်ႉၼၼ်ႉၸိုင်၊ၶိုၼ်းၵႂႃႇၸူးၵႃႈတီႈၵေႃႉသေႈၶဝ်သေလႄႈမွၵ်ႇလၢတ်ႈၵႃႈဢၼ်ၶုၼ်ယိတ်ႉပရေႃးႁိၵ်ႈဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၸိူဝ်းၼၼ်ႉဝႃႈတီႈၶဝ်ၼၼ်ႉဢေႃႈ။

၂၄ ၶဝ်ၼၼ်ႉလႆႈငိၼ်းသေယဝ်ႉၽွမ်ႉၵၼ်ႁွင်ႉသႅၼ်ႇသဵင်လဵဝ်ၵၼ်ၵႃႈတီႈၽြႃးပဵၼ်ၸဝ်ႈလႄႈဝႃႈ၊-ၸဝ်ႈဢၼ်ဢုပ်ႉပိူင်ႇတီႈၶႃႈဢိူၺ်း၊ၸဝ်ႈႁဝ်းပဵၼ်ၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၸႃႉၸဵမ်ၵၢင်ႁၢဝ်လိၼ်မိူင်း၊ၼမ်ႉသမ်ႇမုၵ်ႉတြႃႇ၊ၵႃႈဢၼ်မီးၵႃႈၼႂ်းမၼ်းၸိူဝ်းၼၼ်ႉတင်းသဵင်ႈတင်းလူင်တီႈၶႃႈဢေႃႈ။

၂၅ ၸဝ်ႈႁဝ်းဢဝ်သူပ်းၶႃႈၸဝ်ႈႁဝ်းတႃႇဝိတ်ႉၼၼ်ႉဝႆႉပျႃႇတိၵ်ႈလႄႈဝႃႈ၊-ၵူၼ်းမဵဝ်းတင်းလၢႆတူင်ႉတိုၼ်ႇႁူၼ်ႈမေႃးၵွပ်ႈပိူဝ်ႈလွင်ႈတၢင်းၸိူဝ်ႉၼင်ႇႁိုဝ်။မုၵ်ႉၵူၼ်းၸိူဝ်းၵူၼ်းတင်းလၢႆၵျၢမ်ႇပွင်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ၵွပ်ႈပိူဝ်ႈလွင်ႈတၢင်းၸိူဝ်ႉၼင်ႇႁိုဝ်။

၂၆ ၶုၼ်ႁေႃၶမ်းလေႃးၵီႇတင်းလၢႆလုၵ်ႉၸုၵ်းသေလႄႈမူးမၢတ်ႈၽွင်းမိူင်းတင်းလၢႆၽွမ်ႉၵၼ်ႁဵတ်းၶတ်းၶဵင်ႇႁႅင်းတႃႉထႃႇဝရႃႉၽြႃးတင်းၸဝ်ႈၶရိၸ်ႉဢေႃႈ။

၂၇ ၸႃႉၸဵမ်ၶုၼ်ႁေႇရုတ်ႉတင်းၶုၼ်ပွၼ်ႇတိပိလၢတ်ႉၸူဝ်းဢဝ်ၵူၼ်းမဵဝ်းဢိသရေႇလဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉသေယဝ်ႉၸူႉၵၼ်တုမ်ၵၼ်ၵႃႈၼႂ်းဝဵင်းၼႆႉႁႂ်ႈလႆႈႁဵတ်းမိူၵ်ႈတေႃႇၶႃႈၸဝ်ႈႁဝ်းဢၼ်ပဵၼ်ၸဝ်ႈယေႇသုဢၼ်ၸဝ်ႈႁဝ်းပၼ်ပိၵ်ႉသိၵ်ႉဝႆႉၼၼ်ႉဢေႃႈ။

၂၈ ၶဝ်ႁဵတ်းၸွမ်းၼင်ႇၵႃႈဢၼ်ၸဝ်ႈႁဝ်းဢဝ်တင်းမူၼ်ၽုင်းမၵ်းၶၢၼ်းၽႄဝႆႉဢွၼ်တၢင်းဢၼ်တၵ်းလႆႈပဵၼ်မႃးတင်းသဵင်ႈတင်းလူင်ၸိူဝ်းၼၼ်ႉဢေႃႈ။ဢူဝ်းထႃႇဝရႃႉၽြႃးတီႈၶႃႈ။

၂၉ တေႃႈလဵဝ်ၼႆႉၶႅၼ်းတေႃႈလူတူၺ်းတၢင်းဢၼ်ၶဝ်လွၵ်ႇၶဝ်ငိုတ်ႈၸိူဝ်းၼၼ်ႉသေၵမ်းတီႈၶႃႈ။လွင်ႈၼင်ႇႁိုဝ်ၶႃႈၸဝ်ႈႁဝ်းၸိူဝ်းၼႆႉတၵ်းလႆႈႁေႃးလၢတ်ႈၼုၵ်ႉၵပၢတ်ႈတြႃးၸဝ်ႈႁဝ်းႁတ်းႁတ်းႁၢၼ်ႁၢၼ်ၼၼ်ႉၸိုင်ၶႅၼ်းတေႃႈပၼ်ဢဵၼ်ႁႅင်းသေၵမ်းၶႃႈ။

၃၀ ၶႅၼ်းတေႃႈယိုၼ်းမိုဝ်းၸဝ်ႈႁဝ်းလႄႈႁႂ်ႈတၢင်းၶႆႈတၢင်းပဵၼ်ႁၢႆၶႅၼ်းဢိၵ်ႇတင်းႁဵတ်းပဵၼ်ၼီႉမိၵ်ႈလၵ်ႈၶၼႃႇ၊လွင်ႈတၢင်းဢၼ်လီဢၢမ်းတင်းလၢႆပဵၼ်ၵွပ်ႈပိူဝ်ႈၼႃႇမႃႉၸိုဝ်သဵင်ၸဝ်ႈယေႇသု၊လုၵ်ႈၸဝ်ႈႁဝ်းဢၼ်မူတ်းၸၢင်ႇၼၼ်ႉသေၵမ်းတီႈၶႃႈ၊ဝႃႈၼင်ႇၼႆဢေႃႈ။

၃၁ ဝၢႆးသေၶဝ်သူးတွင်းၸိူဝ်ႉၼင်ႇၼၼ်ယဝ်ႉၼၼ်ႉ၊တီႈဢၼ်ၶဝ်ၸူႉၵၼ်တုမ်ၵၼ်ၼၼ်ႉသၼ်ႇၶွၼ်းဝႆလႄႈၶဝ်ၵႃႈမီးတင်းသဵင်ႈတင်းလူင်ၸိူဝ်းၼၼ်ႉတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈသေလႄႈႁေႃးလၢတ်ႈၼုၵ်ႉၵပၢတ်ႈတြႃးၸဝ်ႈႁတ်းႁတ်းႁၢၼ်ႁၢၼ်ၵမ်းလဵဝ်ဢေႃႈ။

ၵူၼ်းယုမ်ႇမၢတ်ႈၶဝ်ပဵၼ်ဢၼ်လဵဝ်ၵၼ်

၃၂ ၵူၼ်းဢၼ်ယုမ်ႇမၢတ်ႈတင်းသဵင်ႈတင်းလူင်ၸိူဝ်းၼၼ်ႉမီးၸႂ်မိူၼ်မိူၼ်ၵၼ်လႄႈၽူႈလႂ်သေဢမ်ႇဝႃႈႁႂ်ႈဢုၵ်ႉၸႃႇၶူဝ်းလဵင်းၸဝ်ႈၵဝ်ႇသေၸိူဝ်ႉသေပိူင်ၼၼ်ႉပဵၼ်ဢုၵ်ႉၸႃႇၶူဝ်းလဵင်းၶဝ်တင်းသဵင်ႈဢေႃႈ။

၃၃ တမၢၼ်ႇၸဝ်ႈၸိူဝ်းၼၼ်ႉဢဝ်တင်းတၼ်းၶူဝ်းဢၼ်ယႂ်ႇၼႃႇၶၢမ်ႇသၢၵ်ႈသေႇလွင်ႈဢၼ်ၸဝ်ႈယေႇသုလုၵ်ႉၶိုၼ်းၼၼ်ႉလႄႈၶဝ်တင်းသဵင်ႈတင်းလူင်ၸိူဝ်းၼၼ်ႉတဵမ်ဝႆႉတင်းၵျေးၸူးၸဝ်ႈယႂ်ႇၼမ်ၼႃႇလူင်လၢင်ဢေႃႈ။

၃၄ ၼႂ်းၶဝ်ၼၼ်ႉၵေႃႉဢၼ်ၸုတ်ႉဢၼ်လုတ်ႉဢမ်ႇမီးသေၵေႃႉသေၵူၼ်း။လွင်ႈမၼ်းၸမ်း၊ႁိူၼ်း၊လိၼ်၊ၵႃႈဢၼ်ၶဝ်ပိူင်ႇၸိူဝ်းၼၼ်ႉၶဝ်ၶၢႆသေယဝ်ႉ

၃၅ ဢဝ်ငိုၼ်းဢၼ်လႆႈမႃးၼၼ်ႉမႃးဝႆႉၵႃႈတီႈႁိမ်းတိၼ်တမၢၼ်ႇၸဝ်ႈတင်းလၢႆလႄႈမႅင်ႇပၼ်ၵၼ်ၵႃႈၼင်ႇဢၼ်ၶဝ်လူဝ်ႇႁင်းၽႂ်ႁင်းမၼ်းၼၼ်ႉဢေႃႈ။

၃၆ ယုဝ်းသႅပ်ႉ၊ၵေႃႉဢၼ်တမၢၼ်ႇၸဝ်ႈတင်းလၢႆပၼ်ၸိုဝ်မႂ်ႇဝႃႈပႃႇၼပ၊ဢၼ်ပွင်ႇဝႃႈ၊လုၵ်ႈၸၢႆးဢၼ်ႁႂ်ႈငႅမ်းၸႂ်၊ဢၼ်ဝႃႈၼၼ်ႉ၊မၼ်းပဵၼ်ၵူၼ်းမိူင်းၵုပရု၊မဵဝ်းလေႇဝိဢေႃႈ။

၃၇ မၼ်းၶၢႆလိၼ်ဢၼ်မၼ်းပိူင်ႇၼၼ်ႉသေယဝ်ႉဢဝ်ငိုၼ်းဢၼ်လႆႈမႃးၼၼ်ႉမႃးဝႆႉၵႃႈတီႈႁိမ်းတိၼ်တမၢၼ်ႇၸဝ်ႈၸိူဝ်းၼၼ်ႉဢေႃႈ။