Shan Missions

ၵျၢမ်းၶၢဝ်ႇငၢဝ်ႊသတၢင်းသိူဝ်းပျေႃႇယုဝ်းႁၢၼ်ႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂၀    ၂၁   

၁၂ 

ၸဝ်ႈယေႇသုၶၢမ်ႇဢဝ်ၽိၵ်ႉသိၵ်ႈ

၁ မိူဝ်ႈဢၼ်ၶိင်ႇဢၼ်တၵ်းၶၢမ်ႇပွႆးပႃသၶႃႇယင်းလူဝ်ႇထႅင်ႈႁူၵ်းဝၼ်းၸိုင်ၸဝ်ႈယေႇသုႁွတ်ႈထိုင်ၵႃႈတီႈဝၢၼ်ႈပေႇထၼိဢၼ်ပဵၼ်တီႈယူႇလႃႇၸရုဢၼ်မၼ်းၸဝ်ႈႁဵတ်းႁႂ်ႈလုၵ်ႉၵႃႈတၢင်းတၢႆႇၶိုၼ်းလိပ်းၼၼ်ႉဢေႃႈ။

၂ ၵႃႈတီႈၼၼ်ႉၶဝ်ႁဵတ်းပွႆးဢဝ်ၵုင်ႇဢဝ်မူၼ်ၸဝ်ႈယေႇသုဢေႃႈ။မႃႇထႁဵတ်းလဵင်ႉႁဵတ်းလူဢေႃႈ။လႃႇၸရုၸမ်းၶဝ်ႈပႃးၼႂ်းၶဝ်ၸိူဝ်းဢၼ်ၼင်ႈယူႇလူၺ်ႈၵၼ်တင်းမၼ်းၸဝ်ႈၸိူဝ်းၼၼ်ႉဢေႃႈ။

၃ မိူဝ်ႈၼၼ်ႉမႃႇရိဢဝ်ၼမ်ႉမၼ်းႁွမ်ၼႃႇတူႉၸႅတ်ႈၸႅတ်ႈသၢမ်ၶၼ်ဢၼ်ထိူၵ်ႈၵႃႊယႂ်ႇၼႃႇၼၼ်ႉတႃးတိၼ်ၸဝ်ႈယေႇသုသေယဝ်ႉဢဝ်ၶူၼ်ႁူဝ်မၼ်းၸဵတ်ႉလႄႈဢၢႆႁွမ်ၼမ်ႉမၼ်းႁွမ်ၼၼ်ႉၸွတ်ႇၵႂႃႇတင်းႁိူၼ်းဢေႃႈ။

၄ ယုတဢိသၵႃႇရေႇဢုတ်ႉဢၼ်ပဵၼ်လုၵ်ႈၸၢႆးသိမုၼ်ႇ၊ဢၼ်ၶဝ်ႈပႃးၼႂ်းတပႄးၸဝ်ႈသိပ်းသွင်ပႃး၊ၵေႃႉဢၼ်တၵ်းဢဝ်မၼ်းၸဝ်ႈဢၢပ်ႈၼႂ်းမိုဝ်းရၢၼ်ႇသူႇ၊ၼၼ်ႉလၢတ်ႈလႄႈဝႃႈ၊-

၅ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈဢမ်ႇဢဝ်ၼမ်ႉမၼ်းႁွမ်ၼႆႉၶၢႆပႅတ်ႈသေယဝ်ႉဢဝ်ၵႃႊမၼ်းၶၼ်မၼ်းဢၼ်တေလႆႈမႃးတေႇၼႃႇရီႇသၢမ်ပၢၵ်ႇၶႅပ်းၼၼ်ႉသေလႄႈပၼ်တီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၸိူဝ်းၼၼ်ႉ၊ဝႃႈၼင်ႇၼႆဢေႃႈ။

၆ မၼ်းထွၵ်ႈလူၺ်ႈဢၵျူဝ်းၶဝ်ၸိူဝ်းဢၼ်ယၢၵ်ႈၽၢၼ်ၼၼ်ႉလႄႈဝႃႈ၊-ဢမ်ႇၸႂ်ႈ။ပိူဝ်ႈဢၼ်မၼ်းပဵၼ်ၵေႃႉဢၼ်မေႃလၵ်ႉၵေႃႉဢၼ်ထိင်းထူင်ငိူၼ်းလႄႈၸၢင်ႊမေႃလၵ်ႉသုင်းတိုဝ်းပုၼ်ႈတူဝ်ၸဝ်ႈၵဝ်ႇၼၼ်ႉၵူၺ်းဢေႃႈ။

၇ ၸဝ်ႈယေႇသုၵေႃႈလၢတ်ႈလႄႈဝႃႈ၊-ယႃႇမၼ်းတႃႉ။မၼ်းဢဝ်ၼမ်ႉႁွမ်ၼႆႉသိမ်းဝႆႉတေႃႇထိုင်ႁွတ်ႈဝၼ်းဢၼ်တၵ်းမႄးႁႅၼ်းပုၼ်ႈဢၼ်တၵ်းသၢင်းၵျူဝ်ႇတူဝ်ၵဝ်ၼၼ်ႉယဝ်ႉ။

၈ ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉတၵ်းမီးယူႇတီႈသူတႃႇသေႇယူႇဢေႃႈ။ၵဝ်ၸမ်းမီးယူႇတီႈသူတႃႇသေႇဢမ်ႇၸႂ်ႈ၊ဝႃႈၼင်ႇၼႆဢေႃႈ။

၉ ၵူၼ်းယုတဢၼ်ၸူႉဢၼ်တုမ်ၼမ်ၼႃႇႁူႉလွင်ႈဢၼ်ၸဝ်ႈယေႇသုမီးယူႇၵႃႈတီႈၼၼ်ႉလႄႈမႃးၵူၺ်းဢမ်ႇၸႂ်ႈ။

၁၀ ၶဝ်မႃးႁႂ်ႈလႆႈႁၼ်လႃႇၸရုဢၼ်မၼ်းၸဝ်ႈႁႂ်ႈလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉဢေႃႈ။

၁၁ ပိူဝ်ႈဢၼ်ၵူၼ်းယုတၼမ်ၼႃႇယုမ်ႇမၢတ်ႈၸဝ်ႈယေႇသုၵွပ်ႈပိူဝ်ႈလွင်ႈလႃႇၸရုၼၼ်ႉလႄႈယိတ်ႉပရေႃးႁိၵ်ႈလူင်တင်းလၢႆတိူင်ႇပၢင်ႇလၢတ်ႈၸႃၵၼ်ႁႂ်ႈလႆႈဢဝ်ပႃးလႃႇၸရုတၢႆဢေႃႈ။

တၢင်းဢၼ်ၵျွႃးၶဝ်ႈဝဵင်းယေႇရုသလႅမ်ႇ

၁၂ ၼႂ်းဝၼ်းမိူဝ်ႈၽုၵ်ႈၵူၼ်းၸူႉၵူၼ်းတုမ်ၼမ်ၼႃႇဢၼ်မႃးၶဝ်ႈပွႆးၼၼ်ႉမိူဝ်ႈဢၼ်လႆႈငိၼ်းလွင်ႈဢၼ်ၸဝ်ႈယေႇသုမႃးၵႃႈတီႈဝဵင်းယေႇရုသလႅမ်ႇယူႇၼၼ်ႉၸိုင်ၶဝ်ယိပ်းၵမ်ၵၢၼ်ႈမႂ်ႊၸုၼ်ႇပလုၼ်ႇသေလႄႈဢွၵ်ႇၵႂႃႇႁႂ်ႈလႆႈႁပ်ႉႁူဝ်တၢင်းမၼ်းၸဝ်ႈဢေႃႈ။

၁၃ ၶဝ်ႁွင်ႉသႅၼ်ႇဝႃႈ၊-ႁႂ်ႈပဵၼ်ႁူဝ်းသၼ်ႇၼႃႉသေၵမ်းလူၺ်ႈ။ႁႂ်ႈၶုၼ်ႁေႃၶမ်းဢိသရေႇလဢၼ်ပႃးတင်းဢၶႂၢင်ႉၽြႃးပဵၼ်ၸဝ်ႈမႃးၼႆႉမီးမင်ႇၵလႃႇသေၵမ်းလူၺ်ႈ၊ဝႃႈၼင်ႇၼႆဢေႃႈ။

၁၄ လွင်ႈၼႆႉၸမ်းမႅၼ်ႈၸွမ်းၵႃႈၼင်ႇဢၼ်တႅမ်ႈဝႆႉၼႂ်းၵျၢမ်းလိၵ်ႈလႄႈဝႃႈ၊-

၁၅ လုၵ်ႈယိင်းသၢဝ်ၸိဢုၼ်ႇဢိူၺ်း။ယႃႇပေၵူဝ်ႁေ။တူၺ်းလူႊ။ၶုၼ်လူင်မႂ်းၼၼ်ႉၶီႇမႃႉလီႈဢွၼ်ႇလႄႈမႃးၵႃႈတီႈမႂ်းဢေႃႈ၊ဝႃႈၼင်ႇၼႆၼၼ်ႉ၊ၸဝ်ႈယေႇသုၶီႇမႃႉလီႈဢွၼ်ႇလႄႈမႃးဢေႃႈ။

၁၆ လွင်ႈတၢင်းၸိူဝ်းၼၼ်ႉၸိုင်မိူဝ်ႈၵေႃႇၸႃႉမၼ်းပဵၵ်ႉသမ်ႉတပႄးၸဝ်ႈတင်းလၢႆဢမ်ႇႁူႉသေၵေႃႈဝၢႆးသေမူၼ်ၽုင်းမၼ်းၸဝ်ႈၵီႈမႃးယဝ်ႉၼၼ်ႉၸိုင်ၶဝ်ၶုၵ်းၸႂ်လႆႈၶႆႈၸႂ်ထူပ်းလွင်ႈတၢင်းၸိူဝ်းဢၼ်တႅမ်ႈဝႆႉလွင်ႈမၼ်းၸဝ်ႈဢိၵ်ႇတင်းလွင်ႈတၢင်းဢၼ်ၶဝ်လႆႈႁဵတ်းတီႈမၼ်းၸဝ်ႈယဝ်ႉၸိူဝ်းၼၼ်ႉဢေႃႈ။

၁၇ ၵူၼ်းၸူႉၵူၼ်းတုမ်ဢၼ်ပႃးလူၺ်ႈၵၼ်တင်းမၼ်းၸဝ်ႈၼႂ်းမိူဝ်ႈဢၼ်မၼ်းၸဝ်ႈႁွင်ႉဢဝ်လႃႇၸရုဢွၵ်ႇသေၵႃႈၼႂ်းၶုမ်သၢင်းၶျႅင်းလႄႈလုၵ်ႉၵႃႈတၢင်းတၢႆၶိုၼ်းလိပ်းၸိူဝ်းၼၼ်ႉၶဝ်ဢွၼ်ၵၼ်ၶၢမ်ႇသၢၵ်ႈသေႇဢေႃႈ။

၁၈ ၵူၼ်းၸူႉၵူၼ်းတုမ်တင်းလၢႆၵွပ်ႈပိူဝ်ႈငိၼ်းသတၢင်းသဵင်ၶၢဝ်ႇလွင်ႈဢၼ်မၼ်းၸဝ်ႈၼႄပျႃးၼီႉမိၵ်ႈလၵ်ႈၶၼႃႇၼၼ်ႉလႄႈဢွၵ်ႇၵႂႃႇႁႂ်ႈလႆႈႁပ်ႉႁူဝ်တၢင်းမၼ်းၸဝ်ႈဢေႃႈ။

၁၉ ပိူဝ်ႈၼႆလႄႈၽႃႇရိသေးတင်းလၢႆၵေႃႈၵေႃႉၼိုင်ႈလႄႈၵေႃႉၼိုင်ႈလၢတ်ႈၵၼ်လႄႈဝႃႈ၊-သူဢမ်ႇၸၢင်ႊႁဵတ်းသင်လႆႈယဝ်ႉ။လေႃးၵႃႉၼႆႉၸွမ်းပႃႈလင်မၼ်းၵႂႃႇယဝ်ႉ၊ဝႃႈၼင်ႇၼႆဢေႃႈ။

ၸဝ်ႈယေႇသုပၼ်ၼီႉမိၵ်ႈတၢင်းဢၼ်တၵ်းလႆႈၶၢမ်ႇတၢႆ

၂၀ ၼႂ်းၶဝ်ၸိူဝ်းဢၼ်ႁွတ်ႈမႃးၵႃႈတီႈပွႆးႁႂ်ႈလႆႈၵူဝ်းၵႂၢႆႇၽြႃးၼၼ်ႉပႃးၵူၼ်းႁေႇလသၵမ်ႈၽွင်ႈဢေႃႈ။

၂၁ ၶဝ်ၸိူဝ်းၼၼ်ႉၵႂႃႇၸူးၵႃႈတီႈၽိလိပ်ႉပုဢၼ်ပဵၼ်ၵူၼ်းဝဵင်းပိတ်ႉၸေႇတ၊မိူင်းၵႃႇလိလႄးၼၼ်ႉလႄႈတွင်းပၢၼ်ႇဝႃႈ၊-ႁဝ်းၶႃႈၶႂ်ႈႁၼ်ၸဝ်ႈယေႇသုၶႃႈဢေႃႈ၊ဝႃႈၼင်ႇၼႆဢေႃႈ။

၂၂ ၽိလိပ်ႉပုၵေႃႈၵႂႃႇလၢတ်ႈတီႈဢၼ်ႇတရေႇသေယဝ်ႉသွင်ၶႃလဝ်ႈလၢတ်ႈတီႈၸဝ်ႈယေႇသုဢေႃႈ။ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-

၂၃ ၶိင်ႇၼႃႇရီႇဢၼ်မူၼ်ၽုင်းလုၵ်ႈၵူၼ်းတၵ်းၵီႈၼၼ်ႉႁွတ်ႈထိုင်ယဝ်ႉ။

၂၄ ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်းပေႃးမဵတ်ႉၶဝ်ႈပိူၵ်ႇဢၼ်တူၵ်းၵႃႈတီႈလိၼ်ၼၼ်ႉဢမ်ႇလူႉၸိုင်တၵ်းပဵၼ်မဵတ်ႉလဵဝ်ၵူၺ်းဢေႃႈ။ပေႃးလူႉၸင်ႇၸၢင်ႊမၢၵ်ႇမၢၵ်ႇမၼ်းၼမ်ၼႃႇဢေႃႈ။

၂၅ ၵေႃႉဢၼ်ႁၵ်ႉဢသၢၵ်ႈတူဝ်ၸဝ်ႈၵဝ်ႇၼၼ်ႉတၵ်းသုမ်းဢသၢၵ်ႈဢေႃႈ။ၵေႃႉဢၼ်ၸင်းဢသၢၵ်ႈလေႃးၵႃႉတူဝ်ၸဝ်ႈၵဝ်ႇၼၼ်ႉတၵ်းသိမ်းပုၼ်ႈထႃႇဝရႃႉဢသၢၵ်ႈဢေႃႈ။

၂၆ ၽူႈလႂ်သေဢမ်ႇဝႃႈပေႃးပဵၼ်ၵေႃႉဢၼ်ႁဵတ်းၵူၼ်းၸႂ်ႉၵူၼ်းသွႆၵဝ်ၸိုင်တၵ်းလႆႈၸွမ်းပႃႈလင်ၵဝ်ဢေႃႈ။ၵေႃႉဢၼ်ႁဵတ်းၵူၼ်းၸႂ်ႉၵူၼ်းသွႆၵဝ်ၼၼ်ႉၵေႃႈတၵ်းမီးၵႃႈတီႈဢၼ်ၵဝ်မီးၼၼ်ႉဢေႃႈ။ၽူႈလႂ်သေဢမ်ႇဝႃႈပေႃးပဵၼ်ၵေႃႉဢၼ်ႁဵတ်းၵူၼ်းၸႂ်ႉၵူၼ်းသွႆၵဝ်ၸိုင်ပေႃႈၸဝ်ႈတၵ်းယုၵ်ႉယွင်ႈၵေႃႉၼၼ်ႉဢေႃႈ။

၂၇ တေႃႈလဵဝ်ၼႆႉၵဝ်မီးတၢင်းဢၼ်သုၵ်ႉသၢၵ်ႉၸႂ်ယူႇဢေႃႈ။ၵဝ်တၵ်းလႆႈလဝ်ႈလၢတ်ႈၸိူဝ်ႉၼင်ႇႁိုဝ်။တၵ်းလႆႈလဝ်ႈလၢတ်ႈလႄႈဝႃႈ၊-ၵႃႈတီႈၶိင်ႇၼႃႇရီႇၼၼ်ႉၶႅၼ်းတေႃႈၵႄႇၶျွတ်ႈဢဝ်ၵဝ်ၶႃႈသေၵမ်းၶႃႈပေႃႈ၊ဝႃႈၼင်ႇၼႆႁိုဝ်း။ဢမ်ႇၸႂ်ႈ။ပုၼ်ႈလွင်ႈၼၼ်ႉၵူၺ်းလႄႈၸင်ႇႁွတ်ႈထိုင်ၶိင်ႇၼႃႇရီႇၼႆႉယဝ်ႉ။

၂၈ ဢူဝ်းပေႃႈ၊ၶႅၼ်းတေႃႈယွင်ႈယေႃးၼႃႇမႃႉၸိုဝ်သဵင်ၸဝ်ႈႁဝ်းသေၵမ်းတီႈၶႃႈ၊ဝႃႈၼင်ႇၼႆဢေႃႈ။မိူဝ်ႈၼၼ်ႉသဵင်ၵႂၢမ်းပဵၼ်မႃးၵႃႈတီႈၼိူဝ်ၵၢင်ႁၢဝ်လႄႈဝႃႈၸမ်း၊-ၵဝ်ယွင်ႈယေႃးယဝ်ႉ။တၵ်းယွင်ႈယေႃးထႅင်ႈလူးၵွၼ်ႇဢေႃႈ၊ဝႃႈၼင်ႇၼႆဢေႃႈ။

၂၉ ၵူၼ်းၸူႉၵူၼ်းတုမ်ဢၼ်လွမ်ႉႁွပ်ႈယူႇၸိူဝ်းၼၼ်ႉလႆႈငိၼ်းလႄႈဢွၼ်ၵၼ်ဝႃႈ၊-ၽႃႉလင်ႊဢေႃႈ၊ဝႃႈၼင်ႇၼႆဢေႃႈ။ၵမ်ႈၽွင်ႈသမ်ႉဝႃႈ၊-တမၢၼ်ႇၵၢင်ႁၢဝ်လၢတ်ႈတေႃႇမၼ်းၸဝ်ႈဢေႃႈ၊ဝႃႈၼင်ႇၼႆဢေႃႈ။

၃၀ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-သဵင်ၵႂၢမ်းၼၼ်ႉပဵၼ်မႃးပုၼ်ႈၵဝ်ဢမ်ႇၸႂ်ႈ။ပဵၼ်မႃးပုၼ်ႈသူဢေႃႈ။

၃၁ တေႃႈလဵဝ်ၼႆႉလေႃးၵႃႉၼႆႉလႆႈၶၢမ်ႇတၢင်းဢၼ်ၸီႇယၢင်ႇတြႃးဢေႃႈ။တေႃႈလဵဝ်ၼႆႉၶုၼ်ဢၼ်လႆႈဢုပ်ႉပိူင်ႇလေႃးၵႃႉၼႆႉတၵ်းလႆႈၶၢမ်ႇတၢင်းဢၼ်ႁေႃႈဢွၵ်ႇပႅတ်ႈဢေႃႈ။

၃၂ မိူဝ်ႈဢၼ်ၵဝ်ၽၢတ်ႇယၢၼ်ၵၼ်တင်းလိၼ်မိူင်းလႄႈၶၢမ်ႇတၢင်းဢၼ်ယုၵ်ႉဝႆႉၼၼ်ႉၵဝ်တၵ်းတိုတ်ႉၸၼ်ဢဝ်ၵူၼ်းတင်းသဵင်ႈတင်းလူင်မႃးၵႃႈတီႈၵဝ်ဢေႃႈ၊ဝႃႈၼင်ႇၼႆဢေႃႈ။

၃၃ လွင်ႈဢၼ်မၼ်းၸဝ်ႈဝႃႈၸိူဝ်ႉၼင်ႇၼၼ်ၸမ်းမၼ်းၸဝ်ႈၼႄပျႃးလွင်ႈဢၼ်မၼ်းၸဝ်ႈတၵ်းလႆႈၶၢမ်ႇတၢႆၸိူဝ်ႉၼင်ႇႁိုဝ်ၼၼ်ႉဢေႃႈ။ၵူၼ်းၸူႉၵူၼ်းတုမ်ၸိူဝ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊-

၃၄ လွင်ႈဢၼ်မႃးၼႂ်းၵျၢမ်းပိင်းၺၢပ်ႈတိလႄႈဝႃႈ၊-ၸဝ်ႈၶရိၸ်ႉမီးယူႇတႃႇသေႇဢေႃႈ၊ဝႃႈၼင်ႇၼႆၼၼ်ႉႁဝ်းၶႃႈလႆႈငိၼ်းယဝ်ႉၶႃႈယဝ်ႉ။ပေႃးပဵၼ်ၸိူဝ်ႉၼင်ႇၼၼ်ၸိုင်လုၵ်ႈၵူၼ်းတၵ်းလႆႈၶၢမ်ႇတၢင်းဢၼ်ယုၵ်ႉဝႆႉဢေႃႈ၊ဝႃႈၼႆႁဵတ်းႁိုဝ်လႄႈၸဝ်ႈႁဝ်းဝႃႈၸိူဝ်ႉၼႆၶႃႈ။လုၵ်ႈၵူၼ်းၼၼ်ႉပဵၼ်ၵေႃႉလႂ်၊ဝႃႈၼင်ႇၼႆဢေႃႈ။

၃၅ ၸဝ်ႈယေႇသုၵေႃႈလၢတ်ႈလႄႈဝႃႈ၊-ဢၼ်လႅင်းမီးယူႇၵႃႈတီႈသူၵမ်းဢွၼ်ႇၼိုင်ႈၵူၺ်းဢေႃႈ။မိူဝ်ႈဢၼ်လႅင်းယင်းတိုၵ်ႉမီးယူႇလႄႈဢၼ်လပ်းသိင်ႇဢမ်ႇပႆႇႁွတ်ႈပႆႇထိုင်ၼၼ်ႉၵႂႃႇမႃးယူႇတႃႉ။ၵေႃႉဢၼ်ၵႂႃႇမႃးၵႃႈၼႂ်းဢၼ်လပ်းသိင်ႇၼၼ်ႉဢမ်ႇႁူႉလွင်ႈဢၼ်တူဝ်ၸဝ်ၵဝ်ႇၵႂႃႇယူႇၵႃႈတီႈလႂ်ၼၼ်ႉ။

၃၆ ၼႂ်းမိူဝ်ႈဢၼ်ဢၼ်လႅင်းယင်းတိုၵ်ႉမီးယူႇၼၼ်ႉယုမ်ႇမၢတ်ႈဢၼ်လႅင်းလႄႈႁႂ်ႈလႆႈပဵၼ်လုၵ်ႈဢၼ်လႅင်းတႃႉ၊ဝႃႈၼင်ႇၼႆဢေႃႈ။ၸဝ်ႈယေႇသုဝႃႈၸိူဝ်ႉၼင်ႇၼၼ်ယဝ်ႉၸင်ႇဢွၵ်ႇၵႂႃႇလႄႈဢမ်ႇႁႂ်ႈၶဝ်ႁၼ်မၼ်းၸဝ်ႈဢေႃႈ။

ၵူၼ်းယုတလႂ်ႁုဝ်ၶႅင်ဢမ်ႇယုမ်ႇမၢတ်ႈ

၃၇ ပဵၵ်ႉသမ်ႉမၼ်းၸဝ်ႈၼႄပျႃးၼီႉမိၵ်ႈလၵ်ႈၶၼႃႇဢၼ်ယႂ်ႇၼႃႇထၢၼ်ႇၼၼ်ႉသိုဝ်ႈၼႃႈတႂ်ႈတႃၶဝ်သေၵေႃႈၶဝ်ဢမ်ႇယုမ်ႇမၢတ်ႈ။

၃၈ လွင်ႈမၼ်းၸမ်းၼင်ႇႁိုဝ်ၵႂၢမ်းဢၼ်ပရေႃးၽႅတ်ႈဢိသႃႇယႁေႃးဝႆႉဝႃႈ၊-ဢူဝ်းထႃႇဝရႃႉၽြႃးၵႂၢမ်းသတၢင်းသဵင်ၶၢဝ်ႇဢၼ်ႁဝ်းၶႃႈႁေႃးလၢတ်ႈၼႆႉၸိုင်ၽူႈလႂ်ယုမ်ႇတီႈၶႃႈ။ၶႅၼ်မိုဝ်းထႃႇဝရႃႉၽြႃးၼၼ်ႉၸိုင်ထၢင်ႇသႃးၵႃႈတီႈၽူႈလႂ်တီႈၶႃႈ၊ဝႃႈၼင်ႇၼႆၼၼ်ႉတၵ်းလႆႈႁွတ်ႈထိုင်တၢင်းဢၼ်တဵမ်ထူၼ်ႈၸိုင်ၸင်ႇပဵၼ်ဢေႃႈ။

၃၉ ၵႂပ်ႈႁွႆးၼႆႉလႄႈပိူဝ်ႈဢၼ်ပရေႃးၽႅတ်ႈဢိသႃႇယသမ်ႉႁေႃးလၢတ်ႈထႅင်ႈလႄႈဝႃႈ၊-ၼင်ႇႁိုဝ်တႃၶဝ်တၵ်းဢမ်ႇႁၼ်ႁူဝ်ၸႂ်ၶဝ်တၵ်းဢမ်ႇႁူႉဢမ်ႇၸႅင်ႈတၢင်းၵမ်တၢင်းၵျၢင်ႉၶဝ်တၵ်းဢမ်ႇၶၢႆႉဢမ်ႇပုတ်ႈၵဝ်တၵ်းဢမ်ႇႁႂ်ႈတၢင်းၶႆႈတၢင်းပဵၼ်ၶဝ်ႁၢႆၼၼ်ႉၸိုင်မၼ်းၸဝ်ႈႁႂ်ႈတႃၶဝ်လပ်းဢေႃႈ။

၄၀ ႁူဝ်ၸႂ်ၶဝ်ၵေႃႈမၼ်းၸဝ်ႈႁႂ်ႈၵႅၼ်ႇၶႅင်ဢေႃႈ၊ဝႃႈၼင်ႇၼႆၼၼ်ႉလႄႈၶဝ်ၼၼ်ႉဢမ်ႇႁွတ်ႈထိုင်တၢင်းဢၼ်ယုမ်ႇမၢတ်ႈလႆႈ။

၄၁ ဢိသႃႇယႁေႃးလၢတ်ႈၵႂၢမ်းၼၼ်ႉၵႂပ်ႈပိူဝ်ႈဢၼ်လႆႈႁၼ်မူၼ်ၽုင်းဢႃႇၼူႉၽေႃႇမၼ်းၸဝ်ႈလႄႈၶိုၼ်းလၢတ်ႈလွင်ႈမၼ်းၸဝ်ႈဢေႃႈ။

၄၂ ၼႂ်းဝႃႈၼၼ်သေၵေႃႈၶုၼ်တီႈလုမ်းလူင်ၼမ်ၼႃႇယုမ်ႇမၢတ်ႈမၼ်းၸဝ်ႈဢေႃႈ။ပိူဝ်ႈဢၼ်ၵူဝ်ၽႃႇရိသေးတင်းလၢႆတၵ်းႁေႃႈၶဝ်ဢွၵ်ႇသေၵႃႈၼႂ်းၸရွပ်ႈႁေႃးတြႃးလႄႈၶဝ်ဢမ်ႇႁတ်းႁပ်ႉတုင်းဢဝ်ထၢင်ႇထၢင်ႇသႃးသႃး။

၄၃ လွင်ႈမၼ်းၸမ်းၶဝ်ၵျိူၵ်ႈမူၼ်သရေႇဢၼ်ၵူၼ်းတင်းလၢႆပၼ်ၼၼ်ႉၼႃႇသမေူၼ်သရေႇဢၼ်ၽြႃးပဵၼ်ၸဝ်ႈပၼ်ၼၼ်ႉဢေႃႈ။

၄၄ ၸဝ်ႈယေႇသုဢဝ်တင်းသဵင်ဢၼ်ယႂ်ႇၼႃႇလႄႈဝႃႈ၊-ၵေႃႉဢၼ်ယုမ်ႇမၢတ်ႈၵဝ်ၼႆႉ၊ယုမ်ႇမၢတ်ႈၵဝ်ၵူၺ်းဢမ်ႇၸႂ်ႈ။ယုမ်ႇမၢတ်ႈၵေႃႉဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။

၄၅ ၵေႃႉဢၼ်ႁၼ်ၵဝ်ၼၼ်ႉႁၼ်ၵေႃႉဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။

၄၆ ၼင်ႇႁိုဝ်ၶဝ်ၸိူဝ်းဢၼ်ယုမ်ႇမၢတ်ႈၵဝ်ၵႃႈမီးတင်းသဵင်ႈတင်းလူင်တၵ်းဢမ်ႇလႆႈယူႇၵႃႈၼႂ်းဢၼ်လပ်းသိင်ႇၸိုင်ၵဝ်ပဵၼ်ဢၼ်လႅင်းသေလႄႈမႃးၼႂ်းလေႃးၵႃႉၼႆႉယဝ်ႉ။

၄၇ ၵေႃႉဢၼ်ငိၼ်းၵႂၢမ်းၵဝ်လႄႈဢမ်ႇထွမ်ႇဢဝ်ၼၼ်ႉၵဝ်ဢမ်ႇၸီႇယၢင်ႇမၼ်း။ၵဝ်မႃးႁႂ်ႈလႆႈၸီႇယၢင်ႇလေႃးၵႃႉၼႆႉဢမ်ႇၸႂ်ႈ။ၵဝ်မႃးႁႂ်ႈလႆႈၵႄႇၶျွတ်ႈဢဝ်လေႃးၵႃႉၼႆႉဢေႃႈ။

၄၈ ၵေႃႉဢၼ်ပႄႇပႅတ်ႈၵဝ်လႄႈဢမ်ႇထွမ်ႇဢမ်ႇဢဝ်ၵႂၢမ်းၵဝ်ၼၼ်ႉမီးၵေႃႉဢၼ်တၵ်းၸီႇယၢင်ႇမၼ်းယူႇဢေႃႈ။ၵႂၢမ်းဢၼ်ၵဝ်ႁေႃးလၢတ်ႈၼႆႉတၵ်းပဵၼ်တၢင်းဢၼ်ၸီႇယၢင်ႇၼႂ်းဝၼ်းဢၼ်သုတ်းဢၼ်ၵွႆၼၼ်ႉဢေႃႈ။

၄၉ လွင်ႈမၼ်းၸမ်းၵဝ်ႁေႃးလၢတ်ႈၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢမ်ႇၸႂ်ႈ။ၵဝ်တၵ်းလႆႈဝႃႈၸိူဝ်ႉၼင်ႇႁိုဝ်ၵဝ်တၵ်းလႆႈႁေႃးလၢတ်ႈၸိူဝ်ႉၼင်ႇႁိုဝ်ဝႃႈၼႆပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉပၼ်ပိင်းၺၢပ်ႈဝႆႉယဝ်ႉ။လွင်ႈဢၼ်ဝႃႈပိင်းၺၢပ်ႈပေႃႈၸဝ်ႈၼၼ်ႉပဵၼ်ထႃႇဝရႃႉဢသၢၵ်ႈဢၼ်ဝႃႈၼၼ်ႉၵဝ်ႁူႉဢေႃႈ။

၅၀ ပိူဝ်ႈၼႆလႄႈၵႃႈဢၼ်ၵဝ်ႁေႃးလၢတ်ႈၸိူဝ်းၼႆႉၵဝ်ႁေႃးလၢတ်ႈၸွမ်းၵႃႈၼင်ႇဢၼ်ပေႃႈၸဝ်ႈသင်ႇလၢတ်ႈဝႆႉၼၼ်ႉဢေႃႈ၊ဝႃႈၼင်ႇၼႆဢေႃႈ။