Shan Missions

ၵျၢမ်းငဝ်ႈၵမ်ႇၽႃႇ

၁   ၂   ၃   ၄   ၅   ၆   ၇   ၈   ၉   ၁၀   ၁၁   ၁၂   ၁၃   ၁၄   ၁၅   ၁၆   ၁၇   ၁၈   ၁၉   ၂၀   ၂၁   ၂၂   ၂၃   ၂၄   ၂၅   ၂၆   ၂၇   ၂၈   ၂၉

၃၀   ၃၁   ၃၂   ၃၃   ၃၄   ၃၅   ၃၆   ၃၇   ၃၈   ၃၉   ၄၀   ၄၁   ၄၂   ၄၃   ၄၄   ၄၅   ၄၆   ၄၇   ၄၈   ၄၉   ၅၀   

၄၂

ပီႈဢၢႆႈယုဝ်းသႅပ်ႉတင်းလၢႆ ၵွႃႇမိူင်းဢေႇၵႅပ်ႉတု

၁ ယႃႇၵုပ်ႉ ႁူႉငိၼ်းလွင်ႈဢၼ် ၶဝ်ႈၵျုင်ႇမီးၵႃႈတီႈမိူင်းဢေႇၵႅပ်ႉတု ၼၼ်ႉလႄႈ လၢတ်ႈတီႈလုၵ်ႈၸၢႆးမၼ်းတင်းလၢႆလႄႈဝႃႈ၊-ႁဵတ်းသင်လႄႈသူၵေႃႉၼိုင်ႈလႄႈ ၵေႃႉၼိုင်ႈတူၺ်းၵၼ်ယူႇၸိူဝ်ႉၼႆ။

၂ ၵဝ်လႆႈငိၼ်းလွင်ႈဢၼ် ၶဝ်ႈၵျုင်ႇမီးၵႃႈတီႈမိူင်းဢေႇၵႅပ်ႉတု ပုၼ်ႉဢိူဝ်ႈ။လွင်ႈၼင်ႇႁိုဝ်ႁဝ်းတၵ်းဢမ်ႇဢိုပ်းတၢႆလႄႈ ဢသၢၵ်ႈလိပ်းယူႇၸိုင် ဢွၼ်ၵၼ်လူင်းၵွႃႇၸူးၵႃႈတီႈမိူင်းၼၼ်ႉသေလႄႈ သိုဝ်ႉဢဝ်ၶဝ်းၵျုင်ႇၵႃႈတီႈၼၼ်ႉမႃးပုၼ်ႈႁဝ်း တႃႉ၊ ဝႃႈၼင်ႇၼႆလႄႈ

၃ ပီႈဢၢႆႈယုဝ်းသႅပ်ႉ ၸိူဝ်းၼၼ်ႉသိပ်းၵေႃႉ ဢွၼ်ၵၼ်လူင်းၵွႃႇႁႂ်ႈလႆႈသိုဝ်ႉဢဝ်ၶဝ်ႈၵျုင်ႇ ၵႃႈတီႈမိူင်းဢေႇၵႅပ်ႉတုဢေႃႈ။

၄ ပိၼ်ႇယႃႇမိၼ်ႇ ဢၼ်ပဵၼ်ၼွင်ႉၸၢႆးယုဝ်းသႅပ်ႉ ၼၼ်ႉၸမ်း၊ ယႃႇၵုပ်ႉ ဢမ်ႇႁႂ်ႈၵွႃႇလူၺ်ႈၵၼ်တင်းပီႈဢၢႆႈမၼ်းၸိူဝ်းၼၼ်ႉ။လွင်ႈမၼ်းၸမ်း မၼ်းၵူဝ်ၽေးတၵ်းႁွတ်ႈထိုင်ၵႃႈၼိူဝ်မၼ်းၼၼ်ႉဢေႃႈ။

၅ မိူဝ်ႈၼၼ်ႉပိူဝ်ႈဢၼ်ၵႃႈတီႈမိူင်းၶႃႇၼၼ်ႇ ၼၼ်ႉၶဝ်ႈၵႃႈမၢၵ်ႇပႅင်းလႄႈ ၼႂ်းၶဝ်ၸိူဝ်းဢၼ်ႁွတ်ႈထိုင်မႃးၸိူဝ်းၼၼ်ႉလုၵ်ႈၸၢႆးဢိသရေႇလ ၸိူဝ်းၼၼ်ႉၵေႃႈႁွတ်ႈမႃးႁႂ်ႈလႆႈသိုဝ်ႉဢဝ်တၢင်းၵိၼ်တၢင်းၶူပ်းဢေႃႈ။

၆ ယုဝ်းသႅပ်ႉ ပဵၼ်ၵေႃႉဢၼ်ဢုပ်ႉယူႇၵႃႈၼိူဝ်မိူင်းၼၼ်ႉလႄႈ ၸီႇယၢင်ႇလွင်ႈတၢင်းဢၼ်ၶၢႆတေႃႇၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ဢေႃႈ။ပီႈဢၢႆႈယုဝ်းသႅပ်ႉၸိူဝ်းၼၼ်ႉဢွၼ်ၵၼ်မႃးလႄႈ ၶုပ်ႉမူပ်ႇၵူမ်ႈၵွမ်းႁူဝ်ၶဝ်ၵႃႈၼိူဝ်လိၼ်ၵႃႈတီႈၽၢႆႇၼႃႈမၼ်းဢေႃႈ။ယုဝ်းသႅပ်ႉႁၼ်ပီႈဢၢႆႈမၼ်းၸိူဝ်းၼၼ်ႉလႄႈ ႁူႉၸၵ်းၶဝ်ယူႇဢေႃႈ။ၵူၺ်းၵႃႈ မၼ်းႁဵတ်းၸိူဝ်ႉၼင်ႇႁၢင်ႊဢမ်ႇႁူႉၸၵ်းၶဝ်လႄႈႁဵတ်းတင်းသဵင်ဢၼ်ၵျၢမ်းၼႃႇလူင်လၢင်လႄႈလၢတ်ႈတေႃႇၶဝ်လႄႈဝႃႈ၊-သူလုၵ်ႉသေၵႃႈတီႈလႂ်မႃး၊ ဝႃႈၼင်ႇၼႆဢေႃႈ။

၇ ၶဝ်ၵေႃႈလဝ်ႈလၢတ်ႈလႄႈဝႃႈ၊-လုၵ်ႉသေၵႃႈတီႈမိူင်းၶႃႇၼၼ်ႇမႃးႁႂ်ႈလႆႈသိုဝ်ႉဢဝ် တၢင်းၵိၼ်တၢင်းၶူပ်းၶႃႈဢေႃႈ၊ဝႃႈၼင်ႇၼႆဢေႃႈ။

၈ ပိၵ်ႉသမ်ႉ ယုဝ်းသႅပ်ႉ ႁူႉၸၵ်းပီႈဢၢႆႈမၼ်းၸိူဝ်းၼၼ်ႉသေ ၵေႃႈၶဝ်ဢမ်ႇႁူႉၸၵ်းမၼ်း။

၉ ယုဝ်းသႅပ်ႉၶုၵ်းၸႂ်လႆႈၶႆႈၸႂ်ထူပ်းတၢင်းဢၼ်ၽၼ်ႁၼ်ဢၼ်မၼ်းၽၼ်ႁၼ်လွင်ႈၶဝ်ၸိူဝ်းၼၼ်ႉလႄႈဝႃႈ၊-သူပဵၼ်ၵူၼ်းၶဵဝ်လွတ်ႈၽႆးၼႂ်းဢိူဝ်ႈ။ သူမႃးႁႂ်ႈလႆႈလူႈတူၺ်းတီႈဢၼ်ဢမ်ႇလုင်ႇဢမ်ႇလွတ်ႈၵႃႈတီႈမိူင်းၸဝ်ႈၼႆႉယဝ်ႉ၊ ဝႃႈၼင်ႇၼႆလႄႈၶဝ်ၵေႃႈလဝ်ႈလၢတ်ႈလႄႈဝႃႈ၊-

၁၀ ဢမ်ႇၸႂ်ႈၶႃႈၸဝ်ႈ။ ၶႃႈၸဝ်ႈႁဝ်းမႃး ႁႂ်ႈလႆႈသိုဝ်ႉဢဝ်တၢင်းၵိၼ်တၢင်းၶူပ်းၵူၺ်းၶႃႈဢေႃႈ။

၁၁ ႁဝ်းၶႃႈပဵၼ်လုၵ်ႈပေႃႈလဵဝ်ၵူၺ်းၶႃႈဢေႃႈ။ပဵၼ်ၵေႃႉဢၼ်သိုဝ်ႈတေႃႇၶႃႈဢေႃႈ။ၶႃႈၸဝ်ႈႁဝ်းၶဝ်ၸိူဝ်းၼႆႉ ဢမ်ႇၸႂ်ႈၵူၼ်းၶဵဝ်လွတ်ႈၽႆး ၼႂ်းၶႃႈ၊ဝႃႈၼင်ႇၼႆဢေႃႈ။

၁၂ မၼ်းၵေႃႈၶိုၼ်းလၢတ်ႈတီႈၶဝ်လႄႈဝႃႈ၊-ဢမ်ႇၸႂ်ႈၵူၺ်း၊သူမႃးႁႂ်ႈလႆႈလူတူၺ်းတီႈဢၼ်ဢမ်ႇလုင်ႇဢမ်ႇလွတ်ႈ ၵႃႈတီႈမိူင်းၸဝ်ႈၼႆႉယဝ်ႉ၊ ဝႃႈၼင်ႇၼႆဢေႃႈ။

၁၃ ၶဝ်ၵေႃႈၶိုၼ်းလဝ်ႈလၢတ်ႈလႄႈဝႃႈ၊-ၶႃႈၸဝ်ႈႁဝ်းၶဝ်ၸိူဝ်းၼႆႉပဵၼ်ပီႈၼွင်ႉၵၼ်သိပ်းသွင်ၵေႃႉတီႈၶႃႈဢေႃႈ။ ပဵၼ်လုၵ်ႈၸၢႆးပေႃႈၵေႃႉလဵဝ်ၵူၺ်းတီႈၶႃႈဢေႃႈ။ၵေႃႉဢၼ်လဵၵ်ႉသေပိူၼ်ႈၼၼ်ႉၵိုတ်းသဝ်းယူႇလူၺ်ႈပေႃႈၵႃႈတီႈႁိူၼ်းၶႃႈဢေႃႈ။ၵေႃႉၼိုင်ႈၸမ်းဢမ်ႇမီးတီႈၶႃႈယဝ်ႉ၊ဝႃႈၼင်ႇၼႆဢေႃႈ။

၁၄ ယုဝ်းသႅပ်ႉ ၵေႃႈလၢတ်ႈတီႈၶဝ်လႄႈဝႃႈ၊- ၼႂ်းလွင်ႈဢၼ်ၵဝ်ဝႃႈသူပဵၼ်ၵူၼ်းၶဵဝ်လွတ်ႈၽႆးၼႂ်းဢၼ်ဝႃႈၼၼ်ႉပေႃးဢမ်ႇၸႂ်ၸိုင် သူတၵ်းလႆႈပၼ်သၢၵ်ႈသေႇ ၸိူဝ်ႉၼင်ႇႁိုဝ်ဝႃႈၼႆၸမ်း၊

၁၅ ပေႃးၼွင်ႉၸၢႆးသူၵေႃႉလဵၵ်ႉသေပိူၼ်ႈၼၼ်ႉဢမ်ႇမႃးၵႃႈတီႈၼႆႉၸိုင် ၵႃႈၼင်ႇဢၼ်ၶုၼ်ႁေႃၶမ်းၽႃႇရေႃးဢသၢၵ်ႈလိပ်းယူႇၼၼ်ႉသူ ဢမ်ႇလႆႈဢွၵ်ႇသေၵႃႈတီႈၼႆႉၵွႃႇသေၵေႃႉ။

၁၆ သူပွႆႇၸႂ်ႉၵေႃႉၼိုင်ႈၵွႃႇ ႁႂ်ႈမၼ်းၵွႃႇႁွင်ႉဢဝ် ၼွင်ႉၸၢႆးသူၼၼ်ႉမႃးတႃႉ။သူၸမ်းတၵ်းလႆႈၶၢမ်ႇတၢင်းဢၼ်ဢဝ်ၶဝ်ဝႆႉၵႃႈ ၼႂ်းထွင်ႇဢေႃႈ။

၁၇ ပေႃးဢမ်ႇၼၼ်ၵႃႈၼင်ႇဢၼ်ၶုၼ်ႁေႃၶမ်းၽႃႇရေႃး ဢသၢၵ်ႈလိပ်းယူႇၼၼ်ႉသူၼႆႉပဵၼ်ၵူၼ်းၶဵဝ်လွတ်ႈၽႆးၼႂ်းဢမၢၼ်ႇၶၼ်ပဵၼ်ယဝ်ႉ၊ ဝႃႈၼင်ႇၼႆသေယဝ်ႉ ၶျုၵ်ႈၶဝ်ၼၼ်ႉဝႆႉၵႃႈၼႂ်းထွင်သၢမ်ဝၼ်းဢေႃႈ။

၁၈ ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉ ယုဝ်းသႅပ်ႉလၢတ်ႈတီႈၶဝ်လႄႈဝႃႈ ၵဝ်ၼႆႉပဵၼ်ၵေႃႉဢၼ်ရူဝ်ႇသေႇၵူဝ်ယမ်ၽြႃးပဵၼ်ၸဝ်ႈဢေႃႈ။ပိူဝ်ႈၼႆလႄႈလွင်ႈၼင်ႇႁိုဝ်ဢသၢၵ်ႈသူတၵ်းလႆႈၵတ်းယဵၼ်ၶျၢမ်းသႃႇၸမ်း၊ ႁႂ်ႈသေၵေႃႉၵေႃႉၼႂ်းသူပီႈၼွင်ႉ ၶၢမ်ႇတူၵ်းၼႂ်းထွင်ႇဝႆႉတေႃႇႁွတ်ႈၼွင်ႉၸၢႆးဢွၼ်ႇသူ ပေႃးႁွတ်ႈထိုင်မႃးၼၼ်ႉတႃႉ။

၁၉ ပိူဝ်ႈဢၼ်ၵူၼ်းႁိူၼ်းၵူၼ်းယေးသူ ဢိုပ်းတၢင်းၵိၼ်တၢင်း ၶူပ်းလႄႈသူဢဝ်ၶဝ်ႈၵျုင်ႇလႄႈမိူဝ်းၵွႃႇတႃႉ။ပႃးဢဝ်ၼွင်ႉၸၢႆးသူၵေႃႉဢၼ်လဵၵ်ႉသေပိူၼ်ႈၼၼ်ႉလႄႈ ၶိုၼ်းမႃးတီႈၵဝ်တႃႉ။

၂၀ ပေႃးႁဵတ်းၸိူဝ်ႉၼင်ႇၼၼ်ၸိုင်ၵႂၢမ်းသူတၵ်းပဵၼ်ဢၼ်ၸိုဝ်ႈဢၼ်ၸႂ်ႈဢေႃႈ။ဢသၢၵ်ႈသူၵေႃႈတၵ်းၵတ်းယဵၼ်ၶျၢမ်းသႃႇဢေႃႈ၊ ဝႃႈၼင်ႇၼႆလႄႈ ၶဝ်ၵေႃႈဢွၼ်ၵၼ်ႁဵတ်းၸွမ်း ၵႃႈၼင်ႇၵၼ်ယုဝ်းသႅပ်ႉ ဝႃႈၼၼ်ႉဢေႃႈ။

၂၁ မိူဝ်ႈၼၼ်ႉၶဝ်ၼင်ႇၵၼ်ၵၼ်လၢတ်ႈၵၼ်လႄႈဝႃႈ၊-ႁဝ်းၼႆႉပဵၼ်ၵေႃႉဢၼ်ဢပျႅတ်ႈယႂ်ႇၼႃႇၵွပ်ႈပိူဝ်ႈဢမူႉဢၼ်ႁဝ်းႁဵတ်းတီႈၼွင်ႉၸၢႆးႁဝ်းၼၼ်ႉဢေႃႈ။မိူဝ်ႈဢၼ်မၼ်းတွင်းပၢၼ်ႇႁဝ်းၼၼ်ႉ၊ ပိၵ်ႉသမ်ႉႁဝ်းႁၼ်တၢင်းဢၼ်ႁူဝ်ၸႂ်မၼ်းမီးတၢင်းဢၼ်ယၢပ်ႇၸႂ်ယုင်ႈၸႂ်ၼၼ်ႉယူႇသေၵေႃႈႁဝ်းယင်းဢမ်ႇထွမ်ႇ။ပိူဝ်ႈၼႆလႄႈဢမူႉၼႆႉႁွတ်ႈထိုင်မႃးၵႃႈၼိူဝ်ႁဝ်းတေႃႈလဵဝ်ၼႆႉယဝ်ႉႉ ဝႃႈၼင်ႇၼႆဢေႃႈ။

၂၂ ရုပိၼ်ႇၵေႃႈၶိုၼ်းလၢတ်ႈတီႈၶဝ်လႄႈဝႃႈ၊-ၵဝ်လၢတ်ႈတီႈသူဝႃႈ၊-ယႃႇပေၽိတ်းပိူင်ႈၵေႃႉဢွၼ်ႇၼၼ်ႉ၊ဝႃႈၼင်ႇၼႆယဝ်ႉဢမ်ႇၸႂ်ႈႁိုဝ်။ပိူဝ်ႈဢၼ်သူဢမ်ႇထွမ်ႇလႄႈ လႆႈၶၢမ်ႇတၢင်းဢၼ်ၸဵတ်ႈထၢမ်ၵွပ်ႈပိူဝ်ႈလိူတ်ႈမၼ်းၼၼ်ႉယဝ်ႉ၊ ဝႃႈၼင်ႇၼႆဢေႃႈ။

၂၃ ၶဝ်ဢမ်ႇႁူႉလွင်ႈဢၼ်ဝႃႈယုဝ်းသႅပ်ႉ ႁူႉၵႂၢမ်းဢၼ်ၶဝ်လၢတ်ႈၼၼ်ႉ။လွင်ႈမၼ်းၸမ်း ယုဝ်းသႅပ်ႉ ဢဝ်ၵူၼ်းဢၼ်ပျၢၼ်ႇၵႂၢမ်းၼၼ်ႉလႄႈ လၢတ်ႈတေႃႇၶဝ်ဢေႃႈ။

၂၄ မိူဝ်ႈၼၼ်ႉမၼ်းၽၢတ်ႇၶဝ်ၵွႃႇသေလႄႈ ၼမ်ႉတႃတူၵ်းဢေႃႈ။ၵမ်းၼၼ်ႉမၼ်းသမ်ႉမႃးလႄႈလၢတ်ႈတေႃႇၶဝ်သေယဝ်ႉၼုၵ်ႈဢဝ်သိမုၼ်ႇ ဢွၵ်ႇသေၵႃႈၼႂ်းၶဝ်လႄႈ မတ်ႉၽုၵ်ႈမၼ်းသိုဝ်ႈၼႃႈတႂ်ႈတႃၶဝ်ဢေႃႈ။

၂၅ လိုၼ်းၼၼ်ႉ ယုဝ်းသႅပ်ႉ ႁႂ်ႈသႂ်ႇၶဝ်ႈၵျုင်ႇတဵမ်ထူင်ၶဝ်လႄႈငိုၼ်းၶဝ်ၵေႃႈႁႂ်ႈၶိုၼ်းသႂ်ႇပၼ်ၵႃႈၼႂ်းထူင်ၶဝ် ႁင်းၽႂ်ႁင်းမၼ်းလႄႈ ပၼ်ၸရိၵ်ႈတၢင်းၵိၼ်ပုၼ်ႈၵၢင်တၢင်းတီႈၶဝ်ႈၼၼ်ႉဢေႃႈ။

၂၆ ၶဝ်ၼၼ်ႉၵေႃႈ ဢွၼ်ၵၼ်ဢဝ်ၶဝ်ႈၵျုင်ႇတၢင်ႇသႂ်ႇၵႃႈၼိူဝ်မႃႉလီႈၶဝ်တင်းလၢႆသေလႄႈဢွၵ်ႇၵွႃႇဢေႃႈ။

၂၇ မိူဝ်ႈဢၼ်ႁွတ်ႈထိုင်ၵႃႈတီႈပၢင်လိုဝ်ႈၼၼ်ႉၸိုင်၊ ၵေႃႉၼိုင်ႈၽုၺ်ႇထူင်မၼ်း ႁႂ်ႈလႆႈဢဝ်တၢင်းၵိၼ်ဢွႆႇမႃႉလီႈမၼ်းၼၼ်ႉၸိုင်မၼ်းႁၼ် ငိုၼ်းမၼ်းၵႃႈၼႂ်းထူင်မီး ယူႇၵႃႈတီႈပၢၵ်ႇထူင်မၼ်းၼၼ်ႉဢေႃႈ။

၂၈ မၼ်းမွၵ်ႇလၢတ်ႈတီႈပီႈၼွင်ႉမၼ်းၸိူဝ်းၼၼ်ႉလႄႈဝႃႈ၊-တူၺ်းလူႊ၊ငိုၼ်းၵဝ်ၶႃႈၵေႃႈၶိုၼ်းသႂ်ႇဝႆႉၼႂ်းထူင်ယဝ်ႉ။မီးယူႇၵႃႈၼႂ်းထူင်ၵဝ်ၶႃႈၼႆႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ၶဝ်မီးၸႂ်ဢူၼ်ႈၼႃႇသေယဝ်ႉ ၵူဝ်ႁႄသၼ်ႇဝႆႉယူႇသေလႄႈၵေႃႉၼိုင်ႈလႄႈ ၵေႃႉၼိုင်ႈလၢတ်ႈၵၼ်လႄႈဝႃႈ၊-ဢမူႉဢၼ်ၽြႃးပဵၼ်ၸဝ်ႈႁဵတ်းတီႈႁဝ်းၼႆႉၸမ်း၊ပဵၼ်ဢမူႉၸိူဝ်ႉၼင်ႇႁိုဝ်ၼေႃး၊ဝႃႈၼင်ႇၼႆဢေႃႈ။

၂၉ ၶဝ်ၼၼ်ႉၶိုၼ်းမိူဝ်းၵွႃႇၸူးပေႃႈၶဝ်ယႃႇၵုပ်ႉ တီႈမိူင်းၶႃႇၼၼ်ႇၼၼ်ႉလႄႈ ဢွၼ်ၵၼ်မွၵ်ႇလၢတ်ႈၵႃႈဢၼ်ပဵၼ်မႃးၵႃႈတီႈၶဝ်တင်းသဵင်ႈတင်းလူင်ၼၼ်ႉ လႄႈ ဝႃႈ၊-

၃၀ ၵေႃႉဢၼ်ပဵၼ်ၸဝ်ႈဢၼ်ဢုပ်ႉၵႃႈၼိူဝ်မိူင်းၼၼ်ႉလၢတ်ႈၵႂၢမ်းဢၼ်ၵျၢမ်းၼႃႇတီႈႁဝ်းၶႃႈဝႃႈ ႁဝ်းၶႃႈပဵၼ်ၵူၼ်းႁဵတ်းၶဵဝ်လွတ်ႈၽႆး ၼႂ်းၵႃႈတီႈမိူင်းၼၼ်ႉ ၶႃႈဢေႃႈ။

၃၁ ႁဝ်းၶႃႈၵေႃႈလၢတ်ႈတီႈမၼ်းလႄႈဝႃႈ၊-ၶႃႈၸဝ်ႈႁဝ်းၶႃႈၸိူဝ်းၼႆႉပဵၼ်ၵေႃႉဢၼ်သိုဝ်ႈတေႃႇ ၶႃႈ ဢေႃႈ။

၃၂ ဢမ်ႇၸႂ်ႈၵူၼ်းၶဵဝ်လွတ်ႈၽႆးၼႂ်းၶႃႈ။ၶႃႈၸဝ်ႈႁဝ်းၶဝ်ၸိူဝ်းၼႆႉ ပဵၼ်ပီႈၼွင်ႉၵၼ်မီးသိပ်းသွင်ၵေႃႉၶႃႈဢေႃႈ။ပဵၼ်လုၵ်ႈၸၢႆးပေႃႈၵေႃႉလဵဝ်ၵူၺ်းၶႃႈဢေႃႈ။ၵေႃႉၼိုင်ႈၸမ်းဢမ်ႇမီးၶႃႈယဝ်ႉ။ၵေႃႉလဵၵ်ႉသေပိူၼ်ႈၸမ်းတေႃႈလဵဝ်ၼႆႉ မီးယူႇလူၺ်ႈၵၼ်တင်းပေႃႈၶႃႈၸဝ်ႈႁဝ်း ၶဝ်ၵႃႈတီႈမိူင်းၶႃႇၼၼ်ႇပုၼ်ႉတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၼၼ်ႉ၊

၃၃ ၵေႃႉဢၼ်ပဵၼ်ၸဝ်ႈဢၼ်ဢုပ်ႉၵႃႈၼိူဝ်မိူင်းၼၼ်ႉလၢတ်ႈတီႈႁဝ်းၶႃႈလႄႈဝႃႈ၊-ၼင်ႇႁိုဝ်ၵဝ်တၵ်းႁူႉလွင်ႈဢၼ် သူပဵၼ်ၵူၼ်းဢၼ်သိုဝ်ႈတေႃႇဢမၢၼ်ၶၢၼ်ပဵၼ်ၼၼ်ႉၸိုင် ၵႃႈၼႂ်းသူပီႈၼွင်ႉၸိူဝ်းၼႆႉဢဝ်သေၵေႃႉၵေႃႉဝႆႉၵိုတ်းၵႃႈတီႈၵဝ်ၼႆႉတႃႉ။ပိူဝ်ႈဢၼ်ၵူၼ်းႁိူၼ်းၵူၼ်းယေးသူ ဢိုပ်းတၢင်းၵိၼ်တၢင်းၶူပ်း လႄႈသူဢဝ်တၢင်းၵိၼ်တၢင်းၶူပ်းမိူဝ်းၵွႃႇတႃႉ။

၃၄ ပႃးဢဝ်ၼွင်ႉၸၢႆးသူၵေႃႉဢၼ်လဵၵ်ႉပိူၼ်ႈၼၼ်ႉလႄႈ ၶိုၼ်းမႃးၵႃႈတီႈၵဝ်တႃႉ။ပေႃးသူႁဵတ်းၸိူဝ်ႉၼင်ႇၼၼ်ၸိုင်ၵဝ်တၵ်းလႆႈႁူႉလွင်ႈဢၼ်ဝႃႈ သူဢမ်ႇၸႂ်ႈၵူၼ်းၶဵဝ်လွတ်ႈၽႆးၼႂ်းလႄႈ ပဵၼ်ၵူၼ်းဢၼ်သိုဝ်ႈတေႃႇၼၼ်ႉဢေႃႈ။ၼင်ႇၼၼ်လႄႈ ၵဝ်တၵ်းဢဝ်ပီႈၼွင်ႉသူၶိုၼ်းဢၢပ်ႈပၼ်တီႈသူလႄႈ သူတၵ်းလႆႈၵႃႉလႆႈၶၢႆၵႃႈတီႈမိူင်းၸဝ်ႈ ၼႆႉဢေႃႈ၊ဝႃႈၼင်ႇၼႆဢေႃႈ။

၃၅ မိူဝ်ႈဢၼ်ၶဝ်ဢဝ်ၶဝ်ႈၵျုင်ႇဢွၵ်ႇၵႃႈၼႂ်းထူင်ၶဝ်ၼၼ်ႉ ၶဝ်ႁၼ်ပူၵ်ႉငိုၼ်းၶဝ်မီးဝႆႉၵႃႈၼႂ်းထူင်ၶဝ်ႁင်းၽႂ်ႁင်းမၼ်းဢေႃႈ။ ၶဝ်ဢိၵ်ႇတင်းပေႃႈၶဝ်ႁၼ်ပူၵ်ႉငိုၼ်းၶဝ်ၼၼ်ႉသေယဝ်ႉ ဢွၼ်ၵၼ်ၵူဝ် ႁႄသၼ်ႇဝႆယူႇဢေႃႈ။

၃၆ ပေႃႈၶဝ်ယႃႇၵုပ်ႉ ၵေႃႈလၢတ်ႈတီႈၶဝ်လႄႈဝႃႈ၊-သူႁိမ်ဢဝ်လုၵ်ႈၸၢႆးၵဝ်တင်းလၢႆယဝ်ႉ။ယုဝ်းသႅပ်ႉ ၵေႃႈဢမ်ႇမီးယဝ်ႉ။သိမုၼ်ႇ ၵေႃႈဢမ်ႇမီးယဝ်ႉ။ပိၼ်ႇယႃႇမိၼ်ႇၵေႃႈသူတၵ်းဢဝ်ၵွႃႇလူင်ပေႇ။လွင်ႈတၢင်းၸိူဝ်းၼႆႉ တင်းသဵင်ႈတင်းလူင်ပဵၼ်ဢၼ် ၶတ်းၵၼ်တင်းၵဝ်လူင်ပေႇ၊ဝႃႈၼင်ႇၼႆဢေႃႈ။

၃၇ ရုပိၼ်ႇၵေႃႈလၢတ်ႈတီႈပေႃႈမၼ်းလႄႈဝႃႈ၊-ပေႃးၵဝ်ၶႃႈဢမ်ႇပႃးဢဝ်ပိၼ်ႇယႃႇမိၼ်ႇ ၶိုၼ်းမႃးၵႃႈတီႈပေႃႈႁဝ်းၸိုင်ဢဝ်လုၵ်ႈၸၢႆးၵဝ်ၶႃႈသွင်ၵေႃႉၼၼ်ႉ တၢႆပႅတ်ႈသေၵမ်း။ၶႅၼ်းတေႃႈဢဝ်မၼ်း ဢၢပ်ႈပၼ်ၵႃႈၼႂ်းမိုဝ်းၵဝ်ၶႃႈသေၵမ်း။ ၵဝ်ၶႃႈတၵ်းဢဝ်မၼ်းၶိုၼ်းမႃးၵႃႈတီႈပေႃႈႁဝ်းၶႃႈၶႃႈဢေႃႈ၊ဝႃႈၼင်ႇၼႆဢေႃႈ။

၃၈ ပေႃႈၶဝ်ၵေႃႈလၢတ်ႈလႄႈဝႃႈ၊-လုၵ်ႈၸၢႆးၵဝ်တၵ်းဢမ်ႇလႆႈလူင်းၵွႃႇလူၺ်ႈၵၼ်တင်းသူ။ပီႈဢၢႆႈမၼ်းတၢႆယဝ်ႉ။ၵိုတ်းၵျၢၼ်ႇဝႆႉမၼ်းၵေႃႉလဵဝ်ၵူၺ်းဢိူဝ်ႈ။ ပေႃးၽေးႁွတ်ႈထိုင်တီႈမၼ်းၼႂ်းသဵၼ်ႈတၢင်းဢၼ်သူၵွႃႇၼၼ်ႉၸိုင်၊ သူတၵ်းဢဝ်တင်းတၢင်းဢၼ်ငိၼ်းၽၢၼ်ထိုင်ၸႂ်ၼၼ်ႉ ႁႂ်ႈၶူၼ်ႁူဝ်ႁွၵ်ႇၵဝ် လူင်းႁွတ်ႈထိုင်ၵႃႈတီႈမိူင်းမရႃႇၼႃႉပုၼ်ႉယဝ်ႉ၊

ဝႃႈၼင်ႇၼႆဢေႃႈ။