Shan Missions

လိၵ်ႈဢေႃးဝႃႇတႃႉရူဝ်းမ

Chapter   ၁       ၂       ၃       ၄       ၅       ၆       ၇       ၈       ၉       ၁၀       ၁၁       ၁၂       ၁၃       ၁၄       ၁၅       ၁၆     

၁

တၢင်းၵႄႇၶျွတ်ႈ

၁ ၵဝ်၊ပေႃးလု၊ဢၼ်ပဵၼ်ၶႃႈၸဝ်ႈယေႇသုၶရိၸ်ႉဢၼ်မၼ်းၸဝ်ႈလိူၵ်ႈၵဵပ်းၶၢၼ်းဝႆႉၼႂ်းဢရႃႇတမၢၼ်ႇၸဝ်ႈ၊

၂ ႁႂ်ႈလႆႈႁေႃးလၢတ်ႈတြႃးသတၢင်းသိူဝ်းပျေႃႇၽြႃးပဵၼ်ၸဝ်ႈဢၼ်မၼ်းၸဝ်ႈဢဝ်တင်းပရေႃးၽႅတ်ႈတင်းလၢႆသေလႄႈ

၃ ပၼ်ဝႆႉၵတိၵႃႈၼႂ်းၵျၢမ်းလိၵ်ႈမူတ်းၸၢင်ႇၸဝ်ႈတင်းလၢႆလူၺ်ႈလွင်ႈလုၵ်ႈမၼ်းၸဝ်ႈဢၼ်ၸွမ်းၼင်ႇၸႃႇတိၵူၼ်းလႄႈပဵၼ်ၸိူဝ်ႉၶိူဝ်းတႃႇဝိတ်ႉ၊

၄ ဢၼ်ၸွမ်းၼင်ႇဝိၺိၺ်ႇမူတ်းၸၢင်ႇၸဝ်ႈလႄႈပဵၼ်လုၵ်ႈၽြႃးပဵၼ်ၸဝ်ႈဢၼ်လုၵ်ႉသေၵႃႈတၢင်းတၢႆၶိုၼ်းလိပ်းလႄႈတၼ်းၶူဝ်းထၢင်ႇသႃးပေႃႇမႃး

၅ ဢၼ်ပဵၼ်ၸဝ်ႈႁဝ်းၶႃႈၸဝ်ႈယေႇသုၶရိၸ်ႉဢၼ်ႁႂ်ႈႁဝ်းၶႃႈလႆႈၶၢမ်ႇဢဝ်ၵျေးၸူးၸဝ်ႈဢိၵ်ႇတင်းဢရႃႇတမၢၼ်ႇၸဝ်ႈ၊လွင်ႈၼင်ႇႁိုဝ်ၵူၼ်းမဵဝ်းတင်းသဵင်ႈတင်းလူင်

၆ သူၸိူဝ်းဢၼ်ပဵၼ်ၵေႃႉဢၼ်ၸဝ်ႈယေႇသုၶရိၸ်ႉႁွင်ႉဢဝ်ႁႂ်ႈလႆႈၶဝ်ႈပႃးၼၼ်ႉတၵ်းယုမ်ႇမၢတ်ႈလႄႈထွမ်ႇဢဝ်ၼၼ်ႉၸိုင်၊

၇ ၵဝ်ၸင်ႇလႆႈပၼ်ငိၼ်းၵႂႃႇၵႃႈတီႈၵူၼ်းဝဵင်းရူဝ်းမဢၼ်ၽြႃးပဵၼ်ၸဝ်ႈႁၵ်ႉလႄႈလိူၵ်ႈၵဵပ်းၶၢၼ်းဝႆႉၼႂ်းဢရႃႇၵူၼ်းမူတ်းၸၢင်ႇတင်းသဵင်ႈတင်းလူင်ၼၼ်ႉဢေႃႈ။ႁႂ်ႈၵျေးၸူးၸဝ်ႈဢိၵ်ႇတင်းတၢင်းၼိမ်ၸဝ်ႈဢၼ်ပဵၼ်မႃးၵႃႈတီႈၸဝ်ႈယေႇသုၶရိၸ်ႉတင်းပေႃႈႁဝ်းၶႃႈၽြႃးပဵၼ်ၸဝ်ႈၼၼ်ႉမီးတီႈသူသေၵမ်းလူၺ်ႈ။

တၢင်းဢၼ်တၢင်ႇၵျေးၸူး

၈ ဢွၼ်တၢင်းသုတ်းၵဝ်ဢိင်ႈၸဝ်ႈယေႇသုၶရိၸ်ႉသေယဝ်ႉယွင်ႈယေႃးၵျေးၸူးၽြႃးပဵၼ်ၸဝ်ႈၵွပ်ႈပိူဝ်ႈတၢင်းယုမ်ႇမၢတ်ႈသူဢၼ်ၸွတ်ႇတူဝ်ၵႂႃႇၼိူဝ်လိၼ်မိူင်းၵူႈတီႈၵူႈလႅၼ်ၼၼ်ႉဢေႃႈ။

၉ ၽြႃးပဵၼ်ၸဝ်ႈဢၼ်ၵဝ်ပႃးတင်းၸႂ်ဝိၺိၺ်ႇလႄႈႁဵတ်းဢမူႉမၼ်းၸဝ်ႈၼႂ်းတြႃးသတၢင်းသိူဝ်းပျေႃႇလုၵ်ႈၸဝ်ႈလႄႈၵူဝ်းၵႂၢႆႇၼၼ်ႉပဵၼ်ၸဝ်ႈဢၼ်ၶၢမ်ႇသၢၵ်ႈသေႇၵဝ်၊

၁၀ လွင်ႈဢၼ်ၵဝ်ၶုၵ်းၸႂ်လႆႈၶႆႈၸႂ်ထူပ်းသူတႃႇသေႇလႄႈႁဵတ်းသူးတွင်းပထၼႃႇပုၼ်ႈသူလႄႈဢမ်ႇႁိုင်ဢမ်ႇၼၢၼ်းပေႃးသၢင်ႇထုၵ်ႇလႄႈမႅၼ်ႈၵၼ်တင်းဢလူဝ်ႇၽြႃးပဵၼ်ၸဝ်ႈၸိုင်ၼင်ႇႁိုဝ်ၵဝ်တၵ်းလႆႈမႃးတီႈဢၼ်သူမီးၼၼ်ႉၵဝ်သူးတွင်းယူႇဢေႃႈ။

၁၁ 

ၼင်ႇႁိုဝ်တၵ်းလႆႈဢၢပ်ႈပၼ်တီႈသူသူႉၵျေးၸူးဝိၺိၺ်ႇမူတ်းၸၢင်ႇၸဝ်ႈသေၸိူဝ်ႉသေပိူင်လႄႈႁႂ်ႈသူလႆႈမၼ်ႈၶိူင်ႇၸိုင်ၵဝ်ၶႂ်ႈထူပ်းႁၼ်သူတႄႉတႄႉဢေႃႈ။

၁၂ လွင်ႈၼင်ႇႁိုဝ်ႁဝ်းၵေႃႉၼိုင်ႈလႄႈၵေႃႉၼိုင်ႈတၵ်းလႆႈပၼ်ဢဵၼ်ပၼ်ႁႅင်းၵၼ်ၼႂ်းတၢင်းယုမ်ႇမၢတ်ႈႁဝ်းၼၼ်ႉၸိုင်ၵဝ်ၸင်ႇဝႃႈၼႆဢေႃႈ။

ပီႈၼွင်ႉၶဝ်ဢိူၺ်း၊ၵဝ်ၶႂ်ႈႁႂ်ႈသူႁူႉလွင်ႈဢၼ်ဝႃႈၼင်ႇႁိုဝ်တၵ်းလႆႈၶၢမ်ႇဢၵျူဝ်းသေၸိူဝ်ႉသေပိူင်ၵႃႈၼႂ်းသူၸိူဝ်ႉၼင်ႇဢၼ်ၵဝ်လႆႈၶၢမ်ႇဢဝ်ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတၢင်ႇတီႈၼၼ်ႉ၊ၵဝ်ၵျၢမ်ႇပွင်ႁႂ်ႈလႆႈမႃးတီႈသူလၢႆၽဝ်ႇလၢႆပွၵ်ႈၼမ်ၼႃႇယဝ်ႉ။

၁၃ ပဵၵ်ႉသမ်ႉမီးတၢင်းၵျၢမ်ႇတၢင်းပွင်ၸိူဝ်ႉၼင်ႇၼႆသေၵေႃႈတေႃႇထိုင်ႁွတ်ႈဝၼ်းမိူဝ်ႈလဵဝ်ၼႆႉယင်းမီးလွင်ႈတၢင်းဢၼ်ႁႄႉၶႅၼ်ဝႆႉယူႇဢေႃႈ။

၁၄ ၵဝ်ထုၵ်ႇၼီႈဢၼ်တၵ်းလႆႈႁေႃးတြႃးသတၢင်းသိူဝ်းပျေႃႇၼၼ်ႉၵႃႈတီႈၵူၼ်းႁေႇလသၵႃႈတီႈၵူၼ်းလိူင်းၵႃႈတီႈၵူၼ်းဢၼ်မီးပိင်ႇၺႃႇၸိူဝ်းၼၼ်ႉဢေႃႈ။

၁၅ ၵႃႈၼင်ႇဢၼ်ၵဝ်တတ်ႈၼိုင်ႇလႆႈၼၼ်ႉၵဝ်မီးၸႂ်ၸေႇတၼႃႇႁႂ်ႈလႆႈႁေႃးလၢတ်ႈတြႃးသတၢင်းသိူဝ်းပျေႃႇၵႃႈတီႈသူတင်းၶဝ်ၸိူဝ်းဢၼ်မီးယူႇၼႂ်းဝဵင်းရူဝ်းမၼၼ်ႉဢေႃႈ။

ဢဵၼ်းဢၢၼ်း

၁၆ ၵွပ်ႈပိူဝ်ႈတြႃးသတၢင်းသိူဝ်းပျေႃႇၼၼ်ႉၵဝ်ဢမ်ႇမီးတၢင်းဢၼ်လီဢူၵ်းလီဢၢႆ။လွင်ႈမၼ်းၸမ်းတြႃးၼၼ်ႉပဵၼ်တၼ်းၶူဝ်းၽြႃးပဵၼ်ၸဝ်ႈဢၼ်တၵ်းလႆႈၵႄႇၶျွတ်ႈဢဝ်ၵူၼ်းဢၼ်ယုမ်ႇမၢတ်ႈတင်းသဵင်ႈတင်းလူင်ဢၼ်ပဵၼ်ၵူၼ်းယုတၼၼ်ႉဢွၼ်တၢင်းလႄႈၵမ်းလိုၼ်းၵူၼ်းႁေႇလသဢေႃႈ။

၁၇ ပဵၼ်ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်း၊ၵႃႈၼင်ႇဢၼ်မႃးၼႂ်းၵျၢမ်းလိၵ်ႈလႄႈဝႃႈ၊-ၵေႃႉဢၼ်သိုဝ်ႈတေႃႇၼၼ်ႉတၵ်းဢသၢၵ်ႈလိပ်းလူၺ်ႈတၢင်းယုမ်ႇမၢတ်ႈဢေႃႈ၊ဝႃႈၼင်ႇၼႆၼၼ်ႉတြႃးတၢင်းသိုဝ်ႈတေႃႇၽြႃးပဵၼ်ၸဝ်ႈထၢင်ႇသႃးမႃးၼႂ်းတၢင်းယုမ်ႇမၢတ်ႈဢေႃႈ။

ၵူၼ်းဢၼ်ဢမ်ႇၶဝ်ႈၼႂ်းသႃႇသၼႃႇမီးဢပျႅတ်ႈၽၢႆႇၼႃႈၽြႃးပဵၼ်ၸဝ်ႈ

၁၈ တၢင်းၸႂ်မႆႈၶႂ်ႈၸႃႉၽြႃးပဵၼ်ၸဝ်ႈထၢင်ႇသႃးမႃးၵႃႈၼိူဝ်ၵၢင်ႁၢဝ်တေႃႇၵၼ်တင်းၶဝ်ၸိူဝ်းဢၼ်ႁဵတ်းဢမူႉဢၼ်ဢမ်ႇၼပ်ႉဢမ်ႇၶၢၼ်းၽြႃးပဵၼ်ၸဝ်ႈ၊ဢမူႉဢၼ်ပူၼ်ႉလိူဝ်တြႃးၵူႈၸိူဝ်ႉၵူႈပိူင်၊ႁဵတ်းဢႃႉထမ်ႇမႃႉႁႄႉၶႅၼ်သမ်ႇမႃႇတြႃးၼၼ်ႉဢေႃႈ။

၁၉ ပဵၼ်ၵွပ်ႈပိူဝ်ႈၸိူဝ်ႉၼင်ႇႁိုဝ်ဝႃႈၼႆၸမ်း၊လွင်ႈတၢင်းဢၼ်ထုၵ်ႇလီႁူႉလွင်ႈၽြႃးပဵၼ်ၸဝ်ႈၼၼ်ႉထၢင်ႇသႃးယူႇၵႃႈၼႂ်းၶဝ်ဢေႃႈ။

၂၀ ၽြႃးပဵၼ်ၸဝ်ႈၼႄပျႃးယူႇၵႃႈတီႈၶဝ်ဢေႃႈ။ၵွပ်ႈၸိူဝ်ႉၼင်ႇႁိုဝ်ဝႃႈၼႆၸမ်း၊လႆႈတူၺ်းလႆႈႁၼ်ၶိူင်ႈပိူင်ဢၼ်မၼ်းၸဝ်ႈၽၢၼ်ႇသၢင်းႁဵတ်းပဵၼ်ဝႆႉ၊ၶိူင်ႈပိူင်ဢၼ်တႃတူၺ်းဢမ်ႇႁၼ်လႆႈၸိူဝ်းၼၼ်ႉလႄႈလႆႈႁူႉထႃႇဝရႃႉတၼ်းၶူဝ်းမၼ်းၸဝ်ႈလႄႈမၼ်းၸဝ်ႈမီးယူႇထႃႇဝရႃႉၼၼ်ႉလႆႈထၢင်ႇသႃးယူႇၸႃႉၸဵမ်မိူဝ်ႈၶိင်ႇၵႃႇလႃႉၵမ်ႇၽႃႇၸႃႉတႄႇၼၼ်ႉဢေႃႈ။ပိူဝ်ႈၼႆလႄႈၶဝ်ဢမ်ႇယုမ်ႇလႄႈဢမ်ႇလႆႈ။

၂၁ 

လွင်ႈမၼ်းၸမ်းၶဝ်ႁူႉၽြႃးပဵၼ်ၸဝ်ႈယူႇသေၵေႃႈၵႃႈၼင်ႇဢၼ်ထုၵ်ႇလီယွင်ႈယေႃးၽြႃးပဵၼ်ၸဝ်ႈၼၼ်ႉၶဝ်ဢမ်ႇယွင်ႈယေႃး။ၵျေးၸူးၸဝ်ႈၵေႃႈၶဝ်ဢမ်ႇမၢတ်ႈဢမ်ႇတွင်း။ၶဝ်ၶႆႈၸႂ်လူၺ်ႈလွင်ႈဢၼ်ဢမ်ႇပွင်ႇလွင်ႈၵႃႈသင်လႄႈၶဝ်မီးႁူဝ်ၸႂ်ဢၼ်ဢမ်ႇမီးသတိလႄႈမိူၵ်ႈလပ်းသိင်ႇၸိူဝ်းၼၼ်ႉဢေႃႈ။

၂၂ ၶဝ်ႁဵတ်းၼင်ႇႁၢင်ႊမီးပိင်ႇၺႃႇလႄႈပဵၼ်ၵူၼ်းမိူၵ်ႈဝႆႉယူႇဢေႃႈ။ၶဝ်ပႄႇပႅတ်ႈမူၼ်ၽုင်းၽြႃးပဵၼ်ၸဝ်ႈဢၼ်ဢမ်ႇၸၢင်ႊၽွၵ်ႈပျၢၼ်ႇလူႉလႅဝ်လႆႈၼၼ်ႉသေယဝ်ႉ

၂၃ သမ်ႉဢဝ်ရူၵ်ႉထူႉႁၢင်ႊၵူၼ်းဢၼ်ၸၢင်ႊၽွၵ်ႈပျၢၼ်ႇလူႉလႅဝ်၊ရူၵ်ႉထူႉႁၢင်ႊၼူၵ်ႉႁၢင်ႊသတ်းဢၼ်မီးတိၼ်သီႇၶွၼ်တရိၵ်ႈသၢၼ်ႇဢၼ်ၸၢင်ႊၵႂႃႇၸၢင်ႊၵၢၼ်းလႂ်ၸိူဝ်းၼၼ်ႉဢေႃႈ။

၂၄ ပိူဝ်ႈၼႆလႄႈၼင်ႇႁိုဝ်ၶဝ်ၼင်ႇၵၼ်ၵၼ်တၵ်းယႃႉတူဝ်ၵႃႇယႃႉၵၼ်လူႉလႅဝ်ၸိုင်၊ၽြႃးပဵၼ်ၸဝ်ႈဢဝ်ၶဝ်ဢၢပ်ႈပၼ်ၼႂ်းႁူဝ်ၸႂ်ၸပ်းၸွႆးၵီႉလေႇသႃႇဢၼ်ၵူဝ်ႈၵိူၵ်ႇၼၼ်ႉဢေႃႈ။

၂၅ ၶဝ်ဢဝ်ဢၼ်မၢၼ်ႇဢၼ်မႅၼ်ႈၽြႃးပဵၼ်ၸဝ်ႈလႄႈလႅၵ်ႈဢဝ်ဢၼ်ဢမ်ႇၸိုဝ်ႈဢမ်ႇၸႂ်ႈဢၼ်ပိူင်ႈဢၼ်လွႆးၼၼ်ႉလႄႈပႄႇပႅတ်ႈၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၼၼ်ႉသေယဝ်ႉႁဵတ်းဝၢတ်ႈၵူဝ်းၵႂၢႆႇၶိူင်ႈပိူင်ဢၼ်မၼ်းၸဝ်ႈၽၢၼ်ႇသၢင်းႁဵတ်းပဵၼ်ဝႆႉၸိူဝ်းၼၼ်ႉဢေႃႈ။မၼ်းၸဝ်ႈၼၼ်ႉၸမ်း၊မီးမင်ႇၵလႃႇထႃႇဝရႃႉဢေႃႈ။ဢႃႈမိၼ်ႈ။

၂၆ ၵွပ်ႈပိူဝ်ႈၶဝ်ႁဵတ်းၸိူဝ်ႉၼင်ႇၼႆလႄႈၽြႃးပဵၼ်ၸဝ်ႈဢဝ်ၶဝ်ဢၢပ်ႈၼႂ်းၵီႉလေႇသႃႇဢၼ်လီၵူဝ်လီဢၢႆၼႃႇလူင်လၢင်ၼၼ်ႉဢေႃႈ။ၵွပ်ႈၸိူဝ်ႉၼင်ႇႁိုဝ်ဝႃႈၼႆၸမ်း၊ၽူႈယိင်းၶဝ်ဢမ်ႇႁဵတ်းၸွမ်းသမ်ႇမထႃႇလႄႈႁဵတ်းၸွမ်းဢၼ်ၶတ်းၵၼ်တင်းသမ်ႇမထႃႇၼၼ်ႉသေယဝ်ႉၵႃႇမႃႉသိုၵ်ႈသမ်ႇၵၼ်ဢေႃႈ။

၂၇ မိူၼ်ၼင်ႇၼၼ်ၽူႈၸၢႆးၶဝ်ၵေႃႈၸုၼ်ႉပႅတ်ႈထုင်းၸၢမ်ႇသမ်ႇမထႃႇၼႂ်းတၢင်းဢၼ်သိူၵ်ႈသမ်ႇၵၼ်တင်းၽူႈယိင်းၼၼ်ႉသေယဝ်ႉၵေႃႉၼိုင်ႈလႄႈၵေႃႉၼိုင်ႈၽူႈၸၢႆးၼင်ႇၵၼ်ၵႃႇမႃႉသိူၵ်ႈသမ်ႇၵၼ်ၸွမ်းလူၺ်ႈၸႂ်ၵီႉလေႇသႃႇမႆႈႁွၼ်ႉၼႃႇလူင်လၢင်ၼၼ်ႉလႄႈၶဝ်လႆႈၶၢမ်ႇဢပျႅတ်ႈၸွမ်းၵႃႈၼင်ႇဢၼ်ၶဝ်ၽိတ်းပိူင်ႈၼၼ်ႉဢေႃႈ။

၂၈ ပိူဝ်ႈဢၼ်ၶဝ်ဢမ်ႇမၢတ်ႈၽြႃးပဵၼ်ၸဝ်ႈလႄႈၽြႃးပဵၼ်ၸဝ်ႈဢဝ်ၶဝ်ဢၢပ်ႈၼႂ်းၸႂ်မေႃးႁႃႉၸႂ်ဢၼ်မိူၵ်ႈၼၼ်ႉလႄႈပၼ်ၶဝ်ႁဵတ်းလွင်ႈတၢင်းဢၼ်ဢမ်ႇလီဢမ်ႇထုၵ်ႇၼၼ်ႉသေယဝ်ႉ၊

၂၉ ၶဝ်ၼၼ်ႉတဵမ်ဝႆႉတင်းတၢင်းဢၼ်ႁဵတ်းမေႇထုင်ႇဢၼ်ဢမ်ႇတြႃး၊တၢင်းဢၼ်ႁၢႆႉမိူၵ်ႈၵူဝ်ႈၵိူၵ်ႇ၊တၢင်းဢၼ်လေႃးၽႃႉပူၼ်ႉလိူဝ်၊တၢင်းဢၼ်သီႇၵေႉႁေႈတႃ၊တၢင်းဢၼ်ႁႃငိူၼ်ႈႁႃႁွႆး၊တၢင်းဢၼ်ဢဝ်ဢသၢၵ်ႈၵူၼ်းတၢႆ၊တၢင်းဢၼ်ၽိတ်းၵၼ်၊တၢင်းဢၼ်ပႅတ်ႉလႅၼ်၊တၢင်းဢၼ်ၶၢၼ်ႉႁၼ်ပိူၼ်ႈလႄႈပဵၼ်ၵေႃႉဢၼ်ၶႃႉၸိုဝ်ႈၶၢႆသဵင်ပိူၼ်ႈ၊

၃၀ ၵေႃႉဢၼ်ယႃႉသရေႇပိူၼ်ႈ၊ၵေႃႉဢၼ်ၽြႃးပဵၼ်ၸဝ်ႈၸင်း၊ၵေႃႉဢၼ်ႁၢႆႉၵျၢမ်းၼႃႇ၊ၵေႃႉဢၼ်မႃႇၼႃႉၸႂ်သုင်၊ၵေႃႉဢၼ်ဢုပ်ႇဢၢတ်ႇၵေႃႉဢၼ်ၵျၢမ်ႇႁဵတ်းဢတၢတ်ႈဢၼ်ႁၢႆႉမိူၵ်ႈ၊ၵေႃႉဢၼ်ဢမ်ႇထွမ်ႇၵႂၢမ်းပေႃႈမေႈ၊

၃၁ ၵေႃႉဢၼ်ဢမ်ႇမီးသတိ၊ၵေႃႈဢၼ်ယႃႉသႅတ်ႈၸႃႇ၊ၵေႃႉဢၼ်ဢမ်ႇႁၵ်ႉၸိူဝ်ႉၶိူဝ်းပီႈၼွင်ႉ၊ၵေႃႉဢၼ်ႁွမ်ဝႆႉတၢင်းၽိတ်း၊ၵေႃႉဢၼ်ဢမ်ႇမီးၵရူႉၼႃႇတၢင်းဢၼ်ဢိတ်းလူပိူၼ်ႈၸိူဝ်းၼၼ်ႉဢေႃႈ။

၃၂ ပဵၵ်ႉသမ်ႉၶဝ်ႁူႉၽြႃးပဵၼ်ၸဝ်ႈၸီႇယၢင်ႇဝႆႉဝႃႈ၊-ၶဝ်ၸိူဝ်းဢၼ်မီးၸႂ်သၽေႃးၸိူဝ်ႉၼင်ႇၼႆၼၼ်ႉတၵ်းလႆႈၶၢမ်ႇတၢင်းတၢႆဢေႃႈ၊ဝႃႈၼႆသေၵေႃႈတူဝ်ၶဝ်ႁဵတ်းယဝ်ႉၵူၺ်းဢမ်ႇၵႃးသမ်ႉယင်းယွင်ႈၶဝ်ၸိူဝ်းဢၼ်ႁဵတ်းၸိူဝ်ႉၼင်ႇၼၼ်ၼၼ်ႉဢေႃႈ။