Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂ ၀    ၂၁    ၂၂    ၂၃    ၂၄   

၂

တၢင်းဢၼ်ၸဝ်ႈယေႇသုၵိူတ်ႇလဵင်ႉ

၁ ၶိင်ႇမိူဝ်ႈၼၼ်ႉၶုၼ်ႁေႃၶမ်းၵေႇသႃႇဢေႃးၵုၵ်ႉတုမီးဢမိင်ႉႁႂ်ႈလႆႈဢဝ်ၸရၢင်းၵူၼ်းတင်းဝၢၼ်ႈတင်းမိူင်းဢေႃႈ။

၂ ၸူဝ်ႈပၢၼ်ၵုရေႇၼေႇပဵၼ်ၶုၼ်ၵႃႈၼႂ်းမိူင်းသုရိၼၼ်ႉပဵၼ်တၢင်းဢၼ်ဢဝ်ၸရၢင်းပွၵ်ႈပထမဢေႃႈ။

၃ ၵူၼ်းတင်းသဵင်ႈတင်းလူင်ၵႂႃႇၵႃႈတီႈဝၢၼ်ႈၵႃႈတီႈဝဵင်းတူဝ်ၸဝ်ႈၵဝ်ႇႁင်းၽႂ်ႁင်းမၼ်းႁႂ်ႈလႆႈၶဝ်ႈပႃးၼႂ်းၸရၢင်းၼၼ်ႉဢေႃႈ။

၄ ယုဝ်းသႅပ်ႉၵေႃႈလုၵ်ႉသေၵႃႈတီႈမိူင်းၵႃႇလိလႄးဝဵင်းၼႃႇၸရႅတ်ႉၵႂႃႇၵႃႈတီႈမိူင်းယုတဝဵင်းတႃႇဝိတ်ႉဢၼ်ႁွင်ႉႁိၵ်ႈၸိုဝ်ဝဵင်းပႅတ်ႉလိႁႅမ်ႇလူၺ်ႈၵၼ်တင်းမေးမၢႆမၼ်းမႃႇရိႁႂ်ႈလႆႈၶဝ်ႈပႃးၼႂ်းၸရၢင်းၼၼ်ႉဢေႃႈ။

၅ ၶိင်ႇမိူဝ်ႈၼၼ်ႉမႃႇရိပႃးပတိၵ်ႉသၼ်ႇထေႇဢၼ်ၵေႇထူၼ်ႈဝႆႉယဝ်ႉၼၼ်ႉဢေႃႈ။

၆ ၼႂ်းမိူဝ်ႈဢၼ်ၶဝ်မီးယူႇၵႃႈၼႂ်းဝဵင်းၼၼ်ႉၶိင်ႇဢၼ်မႃႇရိတၵ်းလႆႈၵိူတ်ႇလဵင်ႉလုၵ်ႈၼၼ်ႉႁွတ်ႈထိုင်မႃးဢေႃႈ။

၇ မၼ်းၵိူတ်ႇလဵင်ႉလုၵ်ႈၸၢႆးမႃးလႄႈဢဝ်တင်းၶူဝ်းလဵင်းပူၵ်ႉႁေႃႇဝႆႉယဝ်ႉၸင်ႇပိူဝ်ႈဢၼ်ၵႃႈတီႈၼႂ်းႁိူၼ်းၶႅၵ်ႇၼၼ်ႉတီႈယူႇဢမ်ႇမီးလႄႈမၼ်းဢဝ်လုၵ်ႈဢွၼ်ႇၼၼ်ႉၶျႃးသႂ်ႇဝႆႉၵႃႈၼႂ်းႁၢင်းဝူဝ်းၵိၼ်ဢေႃႈ။

ၵူၼ်းလဵင်ႉသူဝ်းလႆႈငိၼ်းသတၢင်းသိူဝ်းပျေႃႇ

၈ ၼႂ်းမိူင်းၼၼ်ႉမီးၵူၼ်းလဵင်ႉသူဝ်းထိင်းသူဝ်းၸုမ်းၼိုင်ႈမီးယူႇၵႃႈၼႂ်းထိူၼ်ႇပႂ်ႉၽုင်သူဝ်းၶဝ်ယူႇၶိင်ႇၵၢင်ၶိုၼ်းဢေႃႈ။

၉ ၵမ်းၼၼ်ႉတမၢၼ်ႇၵၢင်ႁၢဝ်ထႃႇဝရႃႉၽြႃးပေႃႇမႃးတီႈၶဝ်လႄႈမူၼ်ၽုင်းထႃႇဝရႃႉၽြႃးၵေႃႈႁိူဝ်ႈလႅင်းၵႂႃႇၵႃႈတီႈႁိမ်းႁွမ်းၶဝ်ၼၼ်ႉဢေႃႈ။ၶဝ်ၵေႃႈၵူဝ်ႁႄၼႃႇလူင်လၢင်ဢေႃႈ။

၁၀ တမၢၼ်ႇၵၢင်ႁၢဝ်ၵေႃႈလၢတ်ႈလႄႈဝႃႈ၊-ယႃႇပေၵူဝ်ပေႁႄ။ၵဝ်မွၵ်ႇလၢတ်ႈသတၢင်းသဵင်ၶၢဝ်ႇဢၼ်ၵူၼ်းတင်းသဵင်ႈတင်းလူင်တၵ်းလႆႈသိူဝ်းၸူမ်းမူၼ်ႈပျေႃႇၼႃႇလူင်လၢင်ၼၼ်ႉတီႈသူဢေႃႈ။

၁၁ ဝၼ်းမိူဝ်ႈၼႆႉၸဝ်ႈဢၼ်ၵႄႇၶျွတ်ႈဢၼ်ပဵၼ်ၸဝ်ႈၶရိၸ်ႉၼၼ်ႉလႆႈၶၢမ်ႇတၢင်းဢၼ်ၵိူတ်ႇလဵင်ႉမႃးပုၼ်ႈသူၵႃႈၼႂ်းဝဵင်းတႃႇဝိတ်ႉၼၼ်ႉယဝ်ႉ။

၁၂ ဢၼ်တၵ်းပဵၼ်ၼီႉမိၵ်ႈလၵ်ႈၶၼႃႇတီႈသူၸမ်းသူတၵ်းထူပ်းႁၼ်လုၵ်ႈဢွၼ်ႇၼၼ်ႉပူၵ်ႉႁေႃႇဝႆႉတင်းၶူဝ်းလဵင်းသေလႄႈၶျႃးဝႆႉမီးယူႇၵႃႈၼႂ်းႁၢင်းဝူဝ်းၵိၼ်ဢေႃႈ၊ဝႃႈၼင်ႇၼႆသေယဝ်ႉ၊

၁၃ တပ်ႉတမၢၼ်ႇၵၢင်ႁၢဝ်ၼမ်ၼႃႇပေႃႇမႃးၵမ်းလဵဝ်လူၺ်ႈၵၼ်တင်းတမၢၼ်ႇၵၢင်ႁၢဝ်ၼၼ်ႉလႄႈၶဝ်ဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈလႄႈဝႃႈ၊-ၵႃႈၼိူဝ်ပၢႆၸိၵ်းၸွမ်ၵၢင်ႁၢဝ်ပုၼ်ႉႁႂ်ႈမုၼ်ၽုင်းၽြႃးပဵၼ်ၸဝ်ႈယႂ်ႇၼႃႇသေၵမ်းလူၺ်ႈ။

၁၄ ၵႃႈၼိူဝ်လိၼ်မိူင်းၼႆႉၵေႃႈႁႂ်ႈတၢင်းၼိမ်မီးၵႃႈတီႈၵူၼ်းၸိူဝ်းဢၼ်မၼ်းၸဝ်ႈထုၵ်ႇၸႂ်ၵျိူၵ်ႈၸႂ်တင်းလၢႆၼၼ်ႉသေၵမ်းလူၺ်ႈဝႃႈၼင်ႇၼႆဢေႃႈ။

၁၅ တမၢၼ်ႇၵၢင်ႁၢဝ်ၸိူဝ်းၼၼ်ႉၶိုၼ်းမိူဝ်းၵႂႃႇၵႃႈၼိူဝ်မိူင်းၵၢင်ႁၢဝ်ပုၼ်ႉယဝ်ႉၸင်ႇၵူၼ်းၸိူဝ်းဢၼ်လဵင်ႉထိင်းသူဝ်းတင်းလၢႆၸိူဝ်းၼၼ်ႉၵေႃႈၵေႃႉၼိုင်ႈလႄႈၵေႃႉၼိုင်ႈလၢတ်ႈၸႃၵၼ်လႄႈဝႃႈ၊-ႁဝ်းဢွၼ်ၵၼ်ၵႂႃႇၵႃႈတီႈဝဵင်းပႅတ်ႉလိႁႅမ်ႇပုၼ်ႉတႃႉႁဝ်း။တူၺ်းလွင်ႈတၢင်းဢၼ်ထႃႇဝရႃႉၽြႃးလၢတ်ႈၼႄတီႈႁဝ်းၼၼ်ႉတႃႉႁဝ်း၊ဝႃႈၼင်ႇၼႆသေယဝ်ႉ၊

၁၆ ၶဝ်ဢွၼ်ၵၼ်ၵႂႃႇၶၼ်ၶၼ်ၽႂ်းၽႂ်းလႄႈထူပ်းႁၼ်မႃႇရိတင်းယုဝ်းသႅပ်ႉတင်းလုၵ်ႈဢွၼ်ႇဢၼ်ၼွၼ်းယူႇၵႃႈၼႂ်းႁၢင်းဝူဝ်းၵိၼ်ၼၼ်ႉဢေႃႈ။

၁၇ ၶဝ်ထူပ်းႁၼ်သေယဝ်ႉၶဝ်ပိုၼ်ၶၢဝ်ႇဢၼ်ၶဝ်လႆႈငိၼ်းလွင်ႈလုၵ်ႈဢွၼ်ႇၼၼ်ႉၸွတ်ႇၸႅတ်ႇၵႂႃႇၵူႈတီႈၵူႈလႅၼ်ဢေႃႈ။

၁၈ ၶဝ်ၸိူဝ်းဢၼ်လႆႈငိၼ်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉၵေႃႈဢၢမ်းၵႂၢမ်းဢၼ်ၵူၼ်းလဵင်ႉသူဝ်းတင်းလၢႆလၢတ်ႈတီႈၶဝ်ၼၼ်ႉဢေႃႈ။

၁၉ မႃႇရိၵေႃႈမၢတ်ႈတွင်းဝႆႉလွင်ႈတၢင်းတင်းသဵင်ႈတင်းလူင်ၸိူဝ်းၼၼ်ႉလႄႈမီးတၢင်းဢၼ်ၶႆႈၸႂ်ဝူၼ်ႉၸႂ်ယူႇဢေႃႈ။

၂၀ ၵူၼ်းၸိူဝ်းဢၼ်လဵင်ႉထိင်းသူဝ်းတင်းလၢႆၸိူဝ်းၼၼ်ႉၵေႃႈၵွပ်ႈပိူဝ်ႈလွင်ႈတၢင်းဢၼ်လႆႈငိၼ်းလႆႈႁၼ်ၵႃႈမီးတင်းသဵင်ႈတင်းလူင်ၸိူဝ်းၼၼ်ႉမႅၼ်ႈၸွမ်းၼင်ႇၵႃႈဢၼ်လၢတ်ႈဝႆႉတီႈၶဝ်ၼၼ်ႉလႄႈၶဝ်ဢွၼ်ၵၼ်ယွင်ႈယေႃးၵျေးၸူးၽြႃးပဵၼ်ၸဝ်ႈသေယဝ်ႉၶိုၼ်းမိူဝ်းၵႂႃႇဢေႃႈ။

ၸဝ်ႈယေႇသုသၢၵ်ႈၵၢပ်ႈတီႈထႃႇဝရႃႉၽြႃး

၂၁ မိူဝ်ႈဢၼ်ႁွတ်ႈထိုင်ပႅတ်ႇဝၼ်းဝၼ်းဢၼ်တၵ်းလႆႈပၼ်တၢင်းဢၼ်ထိူဝ်ႁိမ်းတီႈလုၵ်ႈဢွၼ်ႇၼၼ်ႉၶဝ်ႁွင်ႉႁိၵ်ႈၸိုဝ်မၼ်းဝႃႈယေႇသုၵႃႈၼင်ႇဢၼ်တမၢၼ်ႇၵၢင်ႁၢဝ်ႁွင်ႉႁိၵ်ႈၸဵမ်မိူဝ်ႈဢၼ်မၼ်းၸဝ်ႈယင်းဢမ်ႇပႆႇတႄႇပတိၵ်ႉသၼ်ႇထေႇၼၼ်ႉဢေႃႈ။

၂၂ ၸွမ်းၼင်ႇပိင်းၺၢပ်ႈတြႃးမုဝ်းသေႇၼၼ်ႉဝၢႆးသေဝၼ်းဢၼ်ႁဵတ်းတၢင်းဢၼ်မူတ်းသႂ်မူတ်းသဵင်ႈယဝ်ႉၸိုင်ပေႃႈမေႈ

၂၃ ဢဝ်လုၵ်ႈဢွၼ်ႇၼၼ်ႉၵႂႃႇၵႃႈတီႈဝဵင်းယေႇရုသလႅမ်ႇႁႂ်ႈလႆႈသၢၵ်ႈၵၢပ်ႈၵႃႈတီႈထႃႇဝရႃႉၽြႃးၸွမ်းၵႃႈၼင်ႇဢၼ်ၵျၢမ်းပိင်းၺၢပ်ႈတိထႃႇဝရႃႉၽြႃးမီးဝႆႉၼၼ်ႉတေလႆႈဢဝ်လုၵ်ႈတူၼ်ႈၵူၼ်းၸၢႆးတင်းသဵင်ႈမူတ်းၸၢင်ႇ

၂၄ ပုၼ်ႈထႃႇဝရႃႉၽြႃးၼၼ်ႉတၵ်းလႆႈပုၵ်ႉၸေႃႇၵႃၵေသွင်တူဝ်ဢမ်ႇၼၼ်ၼူၵ်ႉတူႈသွင်တူဝ်ၵႃႈၼင်ႇဢၼ်မီးၼႂ်းၵျၢမ်းပိင်းၺၢပ်ႈတိၼၼ်ႉဢေႃႈ။

၂၅ မိူဝ်ႈၼၼ်ႉၼႂ်းဝဵင်းယေႇရုသလႅမ်ႇမီးၵူၼ်းၵေႃႉၼိုင်ႈဢၼ်လႆႈၸိုဝ်သုမွင်ႇဢၼ်ဝႃႈၼၼ်ႉဢေႃႈ။မၼ်းပဵၼ်ၵေႃႉဢၼ်သိုဝ်ႈတေႃႇၵေႃႉဢၼ်ရူဝ်ႇသေႇၵူဝ်ယမ်ၽြႃး၊ၵေႃႉဢၼ်မုင်ႈထႃႈမွင်းထႃႈတၢင်းသၢၵ်ႈသႃႇၸိူဝ်ႉၶိူဝ်းဢိသရေႇလၼၼ်ႉဢေႃႈ။ၵႃႈၼိူဝ်မၼ်းၼၼ်ႉဝိၺိၺ်ႇမူတ်းၸၢင်ႇၸဝ်ႈတႄႇယူႇဢေႃႈ။

၂၆ ၸူဝ်ႈဢၼ်မၼ်းဢမ်ႇပႆႇလႆႈႁၼ်ၸဝ်ႈၶရိၸ်ႉထႃႇဝရႃႉၽြႃးၼၼ်ႉၸိုင်မၼ်းတေဢမ်ႇလႆႈတၢႆဝႃႈၼႆမၼ်းလႆႈပျႃႇတိၵ်ႈၵႃႈတီႈဝိၺိၺ်ႇမူတ်းၸၢင်ႇၸဝ်ႈဝႆႉဢေႃႈ။

၂၇ မိူဝ်ႈဢၼ်မၼ်းၵႂႃႇၵႃႈတီႈပိၵ်ႉမၢၼ်ႇၸဝ်ႈယူႇၼၼ်ႉၵွပ်ႈပိူဝ်ႈဝိၺိၺ်ႇၸဝ်ႈလႄႈပေႃႈၸဝ်ႈမေႈၸဝ်ႈယင်းတိုၵ်ႉဢဝ်လုၵ်ႈဢွၼ်ႇၸဝ်ႈယေႇသုၶဝ်ႈၵႂႃႇၵႃႈၼႂ်းပိၵ်ႉမၢၼ်ႇႁႂ်ႈလႆႈႁဵတ်းၸွမ်းၼင်ႇထုင်းၸၢမ်ႇတြႃးမီးၼၼ်ႉၸိုင်၊

၂၈ သုမွင်ႇဢဝ်တင်းမိုဝ်းမၼ်းဢုမ်ႈႁွပ်ႇၸဝ်ႈယေႇသုသေယဝ်ႉယွင်ႈယေႃးၵျေးၸူးၽြႃးပဵၼ်ၸဝ်ႈလႄႈဝႃႈ၊-

၂၉ ၸဝ်ႈဢၼ်ဢုပ်ႉပိူင်ႇတီႈၶႃႈ။ၵႃႈၼင်ႇဢၼ်ပျႃႇတိၵ်ႈၸဝ်ႈႁဝ်းမီးၼၼ်ႉတေႃႈလဵဝ်ၼႆႉၸဝ်ႈႁဝ်းပၼ်ဢၶႂၢင်ႉႁႂ်ႈၶႃႈၸဝ်ႈတၵ်းလႆႈတၢႆၼိမ်ၼိမ်တီႈၶႃႈယဝ်ႉ။

၃၀ လွင်ႈမၼ်းၸမ်းၶႃႈၸဝ်ႈလႆႈဢဝ်တင်းမၢၵ်ႇတႃတူဝ်ၸဝ်ႈၵဝ်ႇလႆႈႁၼ်တၢင်းၵႄႇၶျွတ်ႈၸဝ်ႈႁဝ်း

၃၁ ဢၼ်ၸဝ်ႈႁဝ်းမႄးႁႅၼ်းဝႆႉသိုဝ်ႈၼႃႈတႂ်ႈတႃၵူၼ်းမဵဝ်းတင်းသဵင်ႈတင်းလူင်ဢၼ်ပဵၼ်ဢၼ်လႅင်းဢၼ်တၵ်းႁႂ်ႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႅင်းလႄႈ

၃၂ ယုၵ်ႉယွင်ႈၸိူဝ်ႉၶိူဝ်းဢိသရေႇလၵူၼ်းၸဝ်ႈႁဝ်းတင်းလၢႆၼၼ်ႉတီႈၶႃႈယဝ်ႉ၊ဝႃႈၼင်ႇၼႆဢေႃႈ။

၃၃ ပေႃႈမေႈမၼ်းၸဝ်ႈၼၼ်ႉဢၢမ်းလွင်ႈတၢင်းဢၼ်လၢတ်ႈလွင်ႈမၼ်းၸဝ်ႈၸိူဝ်းၼၼ်ႉဢေႃႈ။သုမွင်ႇၵေႃႈပၼ်တၢင်းလီတီႈၶဝ်လႄႈလၢတ်ႈတီႈမေႈၸဝ်ႈမႃႇရိလႄႈဝႃႈ၊-

၃၄ လုၵ်ႈဢွၼ်ႇၼႆႉပဵၼ်ၵေႃႉဢၼ်လႆႈၶၢမ်ႇတၢင်းဢၼ်ၶၢၼ်းဝႆႉၼႂ်းတၢင်းဢၼ်ၵူၼ်းဢိသရေႇလၼမ်ၼႃႇလႆႈလူႉသုမ်းဢိၵ်ႇတင်းလႆႈလုၵ်ႉၶိုၼ်းၵူၺ်းဢမ်ႇၵႃးတၵ်းပဵၼ်ၼီႉမိၵ်ႈဢၼ်ပိူၼ်ႈတၵ်းမီးတၢင်းဢၼ်တွပ်ႇထဵင်ၵၼ်ၼၼ်ႉဢေႃႈ။

၃၅ လၢပ်ႇလႅဝ်းတၵ်းတႅင်းပွင်ႇႁူဝ်ၸႂ်လႄႈႁႂ်ႈတၢင်းၵျၢမ်ႇတၢင်းပွင်ၵူၼ်းၼမ်ၼႃႇထၢင်ႇသႃးမႃးဢေႃႈ။

၃၆ မိူဝ်ႈၼၼ်ႉမီးမေႈယိင်းပရေႃးၽႅတ်ႈၵေႃႉၼိုင်ႈဢၼ်လႆႈၸိုဝ်ဢႃႇၼ၊ဢၼ်ပဵၼ်လုၵ်ႈယိင်းၽၼုၺ်ႇလ၊ၵူၼ်းမဵဝ်းဢႃႇသ၊ၼၼ်ႉမၼ်းတႄႇၼႃႈႁိူၼ်းယူႇလူၺ်ႈၵၼ်တင်းၽူဝ်မၼ်းၸဵတ်းပီႊသေယဝ်ႉလႆႈပဵၼ်မေႈမုၵ်ႉမေႈမၢႆႈဢၼ်ဢသၢၵ်ႈလႆႈပႅတ်ႇသိပ်းပၢႆသီႇပီႊၸမ်ၸမ်ဢေႃႈ။

၃၇ မၼ်းဢဝ်တင်းတၢင်းဢၼ်သူးတွင်းဢိၵ်ႇတင်းတၢင်းဢၼ်ၵမ်တၢင်းၵိၼ်ႁဵတ်းဝၢတ်ႈၽြႃးပဵၼ်ၸဝ်ႈတင်းဝၼ်းတင်းၶိုၼ်းတႃႇသေႇဢမ်ႇထၢတ်ႇဢမ်ႇၽၢတ်ႇဢမ်ႇယၢၼ်ပိၵ်ႉမၢၼ်ႇၸဝ်ႈလႄႈယူႇဢေႃႈ။

၃၈ မၼ်းၵေႃႈၶဝ်ႈၵႂႃႇၵမ်းလဵဝ်သေယဝ်ႉယွင်ႈယေႃးၵျေးၸူးထႃႇဝရႃႉၽြႃးသေလႄႈလၢတ်ႈလွင်ႈလုၵ်ႈဢွၼ်ႇၼၼ်ႉတီႈၶဝ်ၸိူဝ်းဢၼ်မုင်ႈထႃႈမွင်းထႃႈလွင်ႈတၢင်းဢၼ်တၵ်းထူတ်ႇဢဝ်ဝဵင်းယေႇရုသလႅမ်ႇၼၼ်ႉဢေႃႈ။

၃၉ ပေႃႈမေႈမၼ်းၸဝ်ႈၼၼ်ႉႁဵတ်းၵႃႈဢၼ်တၵ်းလႆႈႁဵတ်းၸွမ်းၼင်ႇပိင်းၺၢပ်ႈတြႃးၼၼ်ႉတင်းသဵင်ႈတင်းမူတ်းယဝ်ႉၸင်ႇၶိုၼ်းမိူဝ်းၵႂႃႇမိူင်းၵႃႇလိလႄးၸူးၵႃႈတီႈဝဵင်းၼႃႇၸရႅတ်ႉဢၼ်ပဵၼ်ဝဵင်းတူဝ်ၸဝ်ႈၵဝ်ႇၼၼ်ႉဢေႃႈ။

၄၀ လုၵ်ႈဢွၼ်ႇၼၼ်ႉၵေႃႈယႂ်ႇမႃးလႄႈတၢင်းႁူႉတၢင်းႁၼ်ၽႄၵႂၢင်ႈၼမ်မႃးသေယဝ်ႉတဵမ်ဝႆႉတင်းၺၢၼ်ႇပိင်ႇၺႃႇဢေႃႈ။ၵျေးၸူးၽြႃးပဵၼ်ၸဝ်ႈၵေႃႈတႄႇယူႇၵႃႈၼိူဝ်မၼ်းၸဝ်ႈဢေႃႈ။

ၼႂ်းပိၵ်ႉမၢၼ်ႇၽြႃးပဵၼ်ၸဝ်ႈ

၄၁ ပေႃးထိုင်ၶိင်ႇပွႆးပႃသၶႃႇၸိုင်ပေႃႈမေႈမၼ်းၸဝ်ႈၵႂႃႇၵႃႈတီႈဝဵင်းယေႇရုသလႅမ်ႇၵူႈပီႊၵူႈပီႊဢေႃႈ။

၄၂ မိူဝ်ႈဢၼ်ၸဝ်ႈယေႇသုလႆႈသိပ်းသွင်ပီႊၼၼ်ႉၸွမ်းၼင်ႇထုင်းၸၢမ်ႇပွႆးပႃသၶႃႇမီးၼၼ်ႉၶဝ်ၵႂႃႇၵႃႈတီႈဝဵင်းယေႇရုသလႅမ်ႇဢေႃႈ။

၄၃ ပူၼ်ႉသေဝၼ်းပွႆးယဝ်ႉလႄႈမိူဝ်ႈဢၼ်ၶိုၼ်းမိူဝ်းၼၼ်ႉၸဝ်ႈယေႇသုၵိုတ်းဝႆႉယူႇၵႃႈတီႈဝဵင်းယေႇရုသလႅမ်ႇဢေႃႈ။

၄၄ ပေႃႈမေႈမၼ်းၸဝ်ႈဢမ်ႇႁူႉလွင်ႈတီႈႁႅင်းၼၼ်ႉ။ၶဝ်ထၢင်ႇမၼ်းၸဝ်ႈပေႃးၵႂႃႇၸွမ်းၵၼ်တင်းၽုင်ၵေႃႉသေႈတင်းလၢႆယဝ်ႉ၊ဝႃႈၼႆလႄႈဝၢႆးသေၶဝ်ၵႂႃႇယဝ်ႉၶၢဝ်းတၢင်းလႆႈဝၼ်းၼိုင်ႈယဝ်ႉၸင်ႇ

၄၅ မိူဝ်ႈဢၼ်ၶဝ်ႁႃမၼ်းၸဝ်ႈၵႃႈၼႂ်းၸိူဝ်ႉၶိူဝ်းပီႈၼွင်ႉတင်းၵူၼ်းႁူႉၸၵ်းတင်းလၢႆၸိူဝ်းၼၼ်ႉၵေႃႈဢမ်ႇထူပ်းဢမ်ႇႁၼ်မၼ်းၸဝ်ႈၼၼ်ႉၸိုင်ၶဝ်ၶိုၼ်းမိူဝ်းၵႂႃႇၸူးဝဵင်းယေႇရုသလႅမ်ႇလႄႈႁႃမၼ်းၸဝ်ႈဢေႃႈ။

၄၆ ဝၢႆးသေပူၼ်ႉသၢမ်ဝၼ်းယဝ်ႉၸင်ႇၶဝ်ၶိုၼ်းထူပ်းႁၼ်မၼ်းၸဝ်ႈၼင်ႈယူႇၵႃႈၼႂ်းၵၢင်သြႃႇတင်းလၢႆလႄႈတိူင်ႇပၢင်ႇတွင်ႈထၢမ်လၢတ်ႈၸႃၵၼ်တင်းၶဝ်ယူႇၵႃႈတီႈၼႂ်းပိၵ်ႉမၢၼ်ႇၸဝ်ႈၼၼ်ႉဢေႃႈ။

၄၇ ၶဝ်ၸိူဝ်းဢၼ်ငိၼ်းၵႂၢမ်းမၼ်းၸဝ်ႈတင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်ဢၢမ်းပိင်ႇၺႃႇမၼ်းၸဝ်ႈဢိၵ်ႇတင်းၵႂၢမ်းဢၼ်မၼ်းၸဝ်ႈၶိုၼ်းလၢတ်ႈၸိူဝ်းၼၼ်ႉၼႃႇလူင်လၢင်ဢေႃႈ။

၄၈ ပေႃႈမေႈမၼ်းၸဝ်ႈၼၼ်ႉမိူဝ်ႈဢၼ်ႁၼ်မၼ်းၸဝ်ႈၸိုင်ၵႂင်ၸႂ်ယုင်ႈၸႂ်လႄႈမေႈၸဝ်ႈၵေႃႈလၢတ်ႈလႄႈဝႃႈ၊-လုၵ်ႈၵဝ်ဢိူၺ်း၊ႁဵတ်းႁိုဝ်လႄႈႁဵတ်းၸိူဝ်ႉၼင်ႇၼႆတီႈႁဝ်း။တူၺ်းလူႊ၊ပေႃႈမႂ်းတင်းၵဝ်မီးတၢင်းဢၼ်မႆႈၸႂ်လႅင်ၸႂ်သေလႄႈႁႃမႂ်းယူႇယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်ၸဝ်ႈယေႇသုၵေႃႈလၢတ်ႈလႄႈဝႃႈ၊-

၄၉ ႁဵတ်းသင်လႄႈလႆႈႁႃၵဝ်ၶႃႈၸိူဝ်ႉၼင်ႇႁိုဝ်ၶႃႈ။လွင်ႈဢၼ်ဝႃႈၵဝ်ၶႃႈတၵ်းလႆႈယူႇၼႂ်းႁိူၼ်းပေႃႈၵဝ်ၶႃႈဢၼ်ဝႃႈၼၼ်ႉဢမ်ႇႁူႉၶႃႈႁိုဝ်၊ဝႃႈၼင်ႇၼႆလႄႈ

၅၀ ၶဝ်ဢမ်ႇႁူႉပွင်ႇၵႂၢမ်းဢၼ်မၼ်းၸဝ်ႈလၢတ်ႈတီႈၶဝ်ၼၼ်ႉ။

၅၁ လိုၼ်းၼၼ်ႉမၼ်းၸဝ်ႈမိူဝ်းလူၺ်ႈၵၼ်တင်းပေႃႈမေႈသေယဝ်ႉႁွတ်ႈထိုင်ဝဵင်းၼႃႇၸရႅတ်ႉလႄႈထွမ်ႇဢဝ်ၵႂၢမ်းၶဝ်ယူႇဢေႃႈ။လွင်ႈတၢင်းတင်းသဵင်ႈတင်းလူင်ၸိူဝ်းၼၼ်ႉမေႈၸဝ်ႈမၢတ်ႈတွင်းဝႆႉၵႃႈၼႂ်းႁူဝ်ၸႂ်မၼ်းဢေႃႈ။

၅၂ ၸဝ်ႈယေႇသုၵေႃႈယႂ်ႇမႃးသေယဝ်ႉပိင်ႇၺႃႇၼမ်မႃးၵိုၼ်းမႃးလႄႈလႆႈၼႃႈလႆႈတႃၵႃႈတီႈၽၢႆႇၼႃႈၽြႃးပဵၼ်ၸဝ်ႈဢိၵ်ႇတင်းၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။