Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂ ၀    ၂၁    ၂၂    ၂၃    ၂၄   

၉

ၸဝ်ႈယေႇသုပွႆႇၸႂ်ႉတပႄးၸဝ်ႈသိပ်းသွင်ပႃးၵႂႃႇ

၁ မၼ်းၸဝ်ႈႁႂ်ႈတပႄးၸဝ်ႈသိပ်းသွင်ပႃးၸူႉၵၼ်တုမ်ၵၼ်ယဝ်ႉၸင်ႇဢၢပ်ႈပၼ်တၼ်းၶူဝ်းဢၼ်ပႄႉၼႅင်ႇၽီႁၢႆႉတင်းလၢႆဢိၵ်ႇတင်းဢၶႂၢင်ႉတၼ်းၶူဝ်းပုၼ်ႈလွင်ႈၼင်ႇႁိုဝ်တၵ်းႁဵတ်းႁႂ်ႈတၢင်းၶႆႈတၢင်းပဵၼ်တင်းလၢႆႁၢႆၶႅၼ်းၼၼ်ႉတီႈၶဝ်ဢေႃႈ။

၂

မၼ်းၸဝ်ႈပွႆႇၸႂ်ႉၶဝ်ၵႂႃႇႁႂ်ႈလႆႈႁေႃးလၢတ်ႈလွင်ႈမိူင်းၽြႃးပဵၼ်ၸဝ်ႈဢိၵ်ႇတင်းႁဵတ်းႁႂ်ႈၵူၼ်းၶႆႈၵူၼ်းပဵၼ်တင်းလၢႆၵတ်းယဵၼ်ၶျၢမ်းသႃႇဢေႃႈ။

၃ မၼ်းၸဝ်ႈသင်ႇလၢတ်ႈၶဝ်လႄႈဝႃႈ၊-ပုၼ်ႈဢၼ်တၵ်းၵႂႃႇၸိုင်သူယႃႇပေဢဝ်ၵႃႈသင်သေၸိူဝ်ႉသေပိူင်ၵႂႃႇ။ယႃႇပေဢဝ်ၶွၼ်ႉတဝ်ႉ၊ထူင်ပႃး၊ၶဝ်ႈမုၼ်း၊ငိုၼ်းတွင်းလႄႈၵႂႃႇ။သိူဝ်ႈသွင်ၽိုၼ်ၵေႃႈယႃႇပေပႃး။

၄ ၶဝ်ႈၵႃႈၼႂ်းႁိူၼ်းလႂ်သေဢမ်ႇဝႃႈၸူဝ်ႈဢၼ်ဢမ်ႇပႆႇဢွၵ်ႇၵႂႃႇသေႇတီႈၼၼ်ႉၸိုင်ယူႇၵႃႈတီႈႁိူၼ်းၼၼ်ႉတႃႉ။

၅ ၽူႈလႂ်သေဢမ်ႇဝႃႈၶဝ်ၸိူဝ်းဢၼ်ဢမ်ႇႁပ်ႉတုင်းဢဝ်သူၼၼ်ႉမိူဝ်ႈဢၼ်သူဢွၵ်ႇသေၵႃႈၼႂ်းဝဵင်းၼၼ်ႉၵႂႃႇယူႇၼၼ်ႉၸိုင်တႃႇတပေဵၼ်သၢၵ်ႈသေႇတီႈၶဝ်ၼၼ်ႉသၼ်ႇမုၼ်ႈလိၼ်ဢၼ်ၸပ်းတိၼ်သူၼၼ်ႉပႅတ်ႈတႃႉ၊ဝႃႈၼင်ႇၼႆဢေႃႈ။

၆ ၶဝ်ၵေႃႈဢွၵ်ႇၵႂႃႇလႄႇလဵပ်ႈၵႃႈၼႂ်းဝၢၼ်ႈၼႂ်းဝဵင်းတင်းလၢႆလႄႈႁေႃးလၢတ်ႈတြႃးသတၢင်းသိူဝ်းပျေႃႇႁႂ်ႈတၢင်းၶႆႈတၢင်းပဵၼ်တင်းလၢႆႁၢႆၶႅၼ်းၵူႈတီႈၵူႈလႅၼ်ဢေႃႈ။

၇ ၸဝ်ႈၾႃႉႁေႇရုတ်ႉငိၼ်းလွင်ႈတၢင်းဢၼ်ပဵၼ်မႃးတင်းသဵင်ႈတင်းလူင်ၸိူဝ်းၼၼ်ႉလႄႈမီးတၢင်းဢၼ်ၶႆႈၸႂ်ဝူၼ်ႉၸႂ်ယူႇဢေႃႈ။လွင်ႈမၼ်းၸမ်းၵူၼ်းၵမ်ႈၽွင်ႈဝႃႈ၊-ယုဝ်းႁၢၼ်ႇလုၵ်ႉၵႃႈတၢင်းတၢႆၶိုၼ်းလိပ်းမႃးယဝ်ႉ၊ဝႃႈၼင်ႇၼႆဢေႃႈ။

၈ ၵမ်ႈၽွင်ႈသမ်ႉဝႃႈ၊-ဢေးလိယပေႃႇမႃးယဝ်ႉ၊ဝႃႈၼင်ႇၼႆဢေႃႈ။ၵမ်ႈၽွင်ႈသမ်ႉဝႃႈ၊-ပရေႃးၽႅတ်ႈဢွၼ်ႈတၢင်းၸိူဝ်းၼၼ်ႉသပေႃးပႃးလုၵ်ႉၶိုၼ်းမႃးယဝ်ႉ၊ဝႃႈၼင်ႇၼႆဢေႃႈ။ၶုၼ်ႁေႇရုတ်ႉၵေႃႈလၢတ်ႈလႄႈဝႃႈ၊-

၉ ၵဝ်လႆႈတႅပ်းႁူဝ်ယုဝ်းႁၢၼ်ႇယဝ်ႉ။ၵေႃႉဢၼ်ၵဝ်လႆႈငိၼ်းသတၢင်းသဵင်ၶၢဝ်ႇလွင်ႈမၼ်းထၼ်ႇၼႆႉၼၼ်ႉပဵၼ်ၽူႈလႂ်၊ဝႃႈၼင်ႇၼႆလႄႈ၊ၵျၢမ်ႇႁႃႁႂ်ႈလႆႈထူပ်းႁၼ်ၸဝ်ႈယေႇသုဢေႃႈ။

ၸဝ်ႈယေႇသုလဵင်ႉလူၵူၼ်းႁႃႈႁဵင်

၁၀ တမၢၼ်ႇၸဝ်ႈတင်းလၢႆၶိုၼ်းမႃးၵႃႈတီႈမၼ်းၸဝ်ႈသေလႄႈလဝ်ႈလၢတ်ႈၶႆႊၼႄလွင်ႈတၢင်းဢၼ်ၶဝ်လႆႈႁဵတ်းမႃးတင်းသဵင်ႈတင်းလူင်ၼၼ်ႉဢေႃႈ။မၼ်းၸဝ်ႈႁွင်ႉဢဝ်ၶဝ်တဵတ်ႇတဵတ်ႇလႄႈၵႂႃႇၵႃႈတီႈဝဵင်းပိတ်ႉၸေႇတပုၼ်ႉဢေႃႈ။

၁၁ မိူဝ်ႈဢၼ်ၵူၼ်းၸူႉၵူၼ်းတုမ်တင်းလၢႆႁူႉၼၼ်ႉၸိုင်ၶဝ်ၸွမ်းမၼ်းၸဝ်ႈၵႂႃႇဢေႃႈ။မၼ်းၸဝ်ႈႁပ်ႉတုင်းဢဝ်ၶဝ်သေယဝ်ႉႁေႃးလၢတ်ႈလွင်ႈမိူင်းၽြႃးပဵၼ်ၸဝ်ႈလႄႈႁႂ်ႈၶဝ်ၸိူဝ်းဢၼ်မီးတၢင်းၶႆႈတၢင်းပဵၼ်ၸိူဝ်းၼၼ်ႉႁၢႆၶႅၼ်းဢေႃႈ။

၁၂ မိူဝ်ႈဢၼ်ႁွတ်ႈထိုင်ၶိင်ႇႁူဝ်ၶမ်ႈၸိုင်တပႄးၸဝ်ႈသိပ်းသွင်ပႃးသုတ်ႉၸပ်းသုတ်ႉၸူးသေလႄႈလဝ်ႈလၢတ်ႈလႄႈဝႃႈ၊-ပိူဝ်ႈဢၼ်ၵႃႈတီႈၼႆႉပဵၼ်တီႈထိူၼ်ႇလႄႈၼင်ႇႁိုဝ်ၵူၼ်းၸူႉၵူၼ်းတုမ်ၸိူဝ်းၼႆႉတၵ်းလႆႈၵႂႃႇၵႃႈတီႈၼႂ်းဝၢၼ်ႈပုၼ်ႉလႄႈႁႃတီႈဢၼ်တၵ်းၼွၼ်း၊တၢင်းၵိၼ်တၢင်းၶူပ်းဢၼ်တၵ်းလႆႈၵိၼ်ၼၼ်ႉၸိုင်ၸဝ်ႈႁဝ်းႁႂ်ႈၶဝ်ၵႂႃႇသေၵမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊-သူပၼ်ပုၼ်ႈဢၼ်ၶဝ်တၵ်းၵိၼ်တႃႉ၊ဝႃႈၼင်ႇၼႆဢေႃႈ။

၁၃ ၶဝ်ၼၼ်ႉၵေႃႈလဝ်ႈလၢတ်ႈလႄႈဝႃႈ၊-ပေႃးႁဝ်းၶႃႈဢမ်ႇၵႂႃႇသိုဝ်ႉဢဝ်တၢင်းၵိၼ်ပုၼ်ႈၵူၼ်းတင်းသဵင်ႈတင်းလူင်တၵ်းလႆႈၵိၼ်ၸိုင်ၵႃႈတီႈႁဝ်းၶႃႈၼႆႉလိူဝ်သေၶဝ်ႈမုၼ်းႁႃႈႁူၺ်ႇတင်းပႃသွင်တူဝ်ၼၼ်ႉႁဝ်းၶႃႈဢမ်ႇမီးတၢင်းၵိၼ်သေၸိူဝ်ႉသေပိူင်ၶႃႈ၊ဝႃႈၼင်ႇၼႆဢေႃႈ။

၁၄ ပိူဝ်ႈဢၼ်မီးၵူၼ်းႁႃႈႁဵင်ၸမ်ၸမ်လႄႈၶဝ်လဝ်ႈလၢတ်ႈၸိူဝ်ႉၼင်ႇၼႆဢေႃႈ။ၵမ်းၼၼ်ႉမၼ်းၸဝ်ႈၵေႃႈမီးဢမိင်ႉႁႂ်ႈၵူၼ်းၸိူဝ်းၼၼ်ႉႁဵတ်းပဵၼ်မုၵ်ႉယေႈမုၵ်ႉႁႃႈသိပ်းလႄႈၼင်ႈယူႇဢေႃႈ။

၁၅ ၶဝ်ၵေႃႈႁဵတ်းၸွမ်းၼင်ႇဢမိင်ႉမၼ်းၸဝ်ႈလႄႈႁႂ်ႈၵူၼ်းတင်းသဵင်ႈတင်းလူင်ၼင်ႈယဝ်ႉၸင်ႇမၼ်းၸဝ်ႈဢဝ်ၶဝ်ႈမုၼ်းႁႃႈႁူၺ်ႇတင်းပႃသွင်တူဝ်သေယဝ်ႉ

၁၆ ႁႅၼ်တူၺ်းၵႃႈၼိူဝ်ၵၢင်ႁၢဝ်သေလႄႈယွင်ႈယေႃးၵျေးၸူးၸဝ်ႈယဝ်ႉၸင်ႇမိတ်းၶဝ်ႈမုၼ်းပၼ်တီႈတပႄးၸဝ်ႈတင်းလၢႆႁႂ်ႈသႂ်ႇတမ်းပၼ်ၵႃႈတီႈၽၢႆႇၼႃႈၵူၼ်းၸူႉၵူၼ်းတုမ်ၸိူဝ်းၼၼ်ႉဢေႃႈ။

၁၇ ၵူၼ်းတင်းသဵင်ႈတင်းလူင်ၸိူဝ်းၼၼ်ႉၵေႃႈဢွၼ်ၵၼ်ၵိၼ်ဢိမ်ႇၵိၼ်တဵမ်ယဝ်ႉၸင်ႇၶဝ်ၶိုၼ်းၵဵပ်းသိမ်းဢဝ်ဢၼ်ၵိုတ်းဢၼ်ၵျၢၼ်ႇဢၼ်ႁၵ်းဢၼ်ႁိၵ်းမၼ်းၸိူဝ်းၼၼ်ႉလႆႈတဵမ်သိပ်းသွင်ပဵတ်ႈဢေႃႈ။

ပေႇတရုယိုၼ်ၸဝ်ႈယေႇသုပဵၼ်ၸဝ်ႈၶရိၸ်ႉ

၁၈ မိူဝ်ႈဢၼ်မၼ်းၸဝ်ႈမီးယူႇလူၺ်ႈၵၼ်တင်းတပႄးၸဝ်ႈတင်းလၢႆလႄႈသူးတွင်းယူႇၵႃႈတီႈဢၼ်ပိူၼ်ႈဢမ်ႇမီးၼၼ်ႉၸိုင်မၼ်းၸဝ်ႈထၢမ်တီႈၶဝ်လႄႈဝႃႈ၊-ၵူၼ်းတင်းလၢႆဝႃႈၵဝ်ၼႆႉပဵၼ်ၽူႈလႂ်၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၵေႃႈၶိုၼ်းလၢတ်ႈလႄႈဝႃႈ၊-

၁၉ ၵမ်ႈၽွင်ႈဝႃႈၸဝ်ႈႁဝ်းပဵၼ်ယုဝ်းႁၢၼ်ႇဢၼ်ပၼ်ပပ်ႉတိၸၢမ်ႇၼၼ်ႉၶႃႈဢေႃႈ။ၵမ်ႈၽွင်ႈသမ်ႉဝႃႈ၊-ပဵၼ်ဢေးလိယဝႃႈၼင်ႇၼႆၶႃႈဢေႃႈ။ၵမ်ႈၽွင်ႈသမ်ႉဝႃႈ၊-ပဵၼ်ပရေႃးၽႅတ်ႈမိူဝ်ႈၵွၼ်ႇသပေႃးပႃးလုၵ်ႉၶိုၼ်းလိပ်းမႃးၶႃႈဢေႃႈ၊ဝႃႈၼင်ႇၼႆဢေႃႈ။

၂၀ မၼ်းၸဝ်ႈသမ်ႉထၢမ်ဝႃႈ၊-သူသမ်ႉဝႃႈၵဝ်ၼႆႉပဵၼ်ၽူႈလႂ်၊မိူဝ်ႈဢၼ်ဝႃႈၼင်ႇၼႆၸိုင်ပေႇတရုၵေႃႈၶိုၼ်းလဝ်ႈလၢတ်ႈလႄႈဝႃႈၸဝ်ႈႁဝ်းပဵၼ်ၸဝ်ႈၶရိၸ်ႉလုၵ်ႈၽြႃးပဵၼ်ၸဝ်ႈၶႃႈဢေႃႈ၊ဝႃႈၼင်ႇၼႆဢေႃႈ။

၂၁ ၼင်ႇႁိုဝ်တၵ်းဢမ်ႇမွၵ်ႇလၢတ်ႈလွင်ႈတီႈႁႅင်းၼႆႉတီႈၽူႈလႂ်သေၵေႃႉသေၵူၼ်းၸိုင်မၼ်းၸဝ်ႈပိင်းၺၢပ်ႈဝႆႉတီႈတပႄးၸဝ်ႈၸိူဝ်းၼၼ်ႉသေယဝ်ႉ၊သမ်ႉလၢတ်ႈလႄႈဝႃႈ၊-

၂၂ လုၵ်ႈၵူၼ်းတၵ်းလႆႈၶၢမ်ႇၼမ်ၼႃႇလူင်လၢင်ဢေႃႈ။တၵ်းလႆႈၶၢမ်ႇတၢင်းဢၼ်ၵူၼ်းဢၼ်ပဵၼ်ၵႄႇပဵၼ်ႁူဝ်ယိတ်ႉပရေႃးႁဵၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတင်းလၢႆပႄႇပႅတ်ႈဢေႃႈ။တၵ်းလႆႈၶၢမ်ႇတၢင်းဢၼ်ဢဝ်တၢႆဢေႃႈ။တၵ်းလုၵ်ႉၶိုၼ်းလိပ်းၼႂ်းသၢမ်ဝၼ်းၼၼ်ႉဢေႃႈ၊ဝႃႈၼင်ႇၼႆဢေႃႈ။

၂၃ လိူဝ်သေၼၼ်ႉမၼ်းၸဝ်ႈလၢတ်ႈတီႈၵူၼ်းတင်းသဵင်ႈတင်းလူင်လႄႈဝႃႈ၊-ပေႃးသေၵေႃႉသေၵူၼ်းမီးဢလူဝ်ႇၶႂ်ႈၸွမ်းပႃႈလင်ၵဝ်ၸိုင်ႁႂ်ႈမၼ်းပႄႇပႅတ်ႈတူဝ်ၸဝ်ႈၵဝ်ႇသေယဝ်ႉႁၢပ်ႇဢဝ်သဝ်လၵ်းဝႃးမိုဝ်းတူဝ်ၸဝ်ႈၵဝ်ႇၵူႈမိူဝ်ႈၵူႈဝၼ်းလႄႈၸွမ်းပႃႈလင်ၵဝ်တႃႉ။

၂၄ လွင်ႈမၼ်းၸမ်းၽူႈလႂ်သေဢမ်ႇဝႃႈၵေႃႉဢၼ်မီးဢလူဝ်ႇၶႂ်ႈၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇၼၼ်ႉၵေႃႉၼၼ်ႉတၵ်းသုမ်းဢသၢၵ်ႈဢေႃႈ။ၽူႈလႂ်သေဢမ်ႇဝႃႈၵေႃႉဢၼ်သုမ်းဢသၢၵ်ႈၵွပ်ႈပိူဝ်ႈၵဝ်ၼၼ်ႉၵေႃႉၼၼ်ႉတၵ်းၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇဢေႃႈ။

၂၅ ပေႃးၵူၼ်းၵေႃၵၼိုင်ႈလႆႈဢုပ်ႉပိူင်ႇလေႃးၵႃႉၼႆႉတင်းသဵင်ႈတင်းမူတ်းသေၵေႃႈပေႃးသုမ်းတူဝ်ၸဝ်ႈၵဝ်ႇၸိုင်တၵ်းမီးဢၵျူဝ်းၵႃႈသင်။

၂၆ ၽူးလႂ်သေဢမ်ႇဝႃႈၵေႃႉဢၼ်မီးၸႂ်ဢူၵ်းဢၢႆၵွပ်ႈပိူဝ်ႈၵဝ်ဢိၵ်ႇတင်းၵွပ်ႈပိူဝ်ႈၵႂၢမ်းၵဝ်ၼၼ်ႉၵေႃႉၼၼ်ႉလုၵ်ႈၵူၼ်းတၵ်းဢူၵ်းဢၢႆမၼ်းမိူဝ်ႈဢၼ်မၼ်းၸဝ်ႈပႃးတင်းမူၼ်ၽုင်းတူဝ်ၸဝ်ႈၵဝ်ႇဢိၵ်ႇတင်းမူၼ်ၽုင်းတမၢၼ်ႇၵၢင်ႁၢဝ်ဢၼ်မူတ်းၸၢင်ႇတင်းလၢႆၸိူဝ်းၼၼ်ႉလႄႈမႃးၼၼ်ႉဢေႃႈ။

၂၇ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၵူၼ်းၵမ်ႈၽွင်ႈဢၼ်ၸုၵ်းယူႇၵႃႈတီႈၼႆႉၸူဝ်ႈဢၼ်ၶဝ်ဢမ်ႇပႆႇလႆႈႁၼ်မိူင်းၽြႃးပဵၼ်ၸဝ်ႈၼၼ်ႉၶဝ်တၵ်းဢမ်ႇလႆႈႁွတ်ႈထိုင်တၢင်းတၢႆ၊ဝႃႈၼင်ႇၼႆဢေႃႈ။

ႁၢင်ႊၽၢင်ၸဝ်ႈယေႇသုလႅၵ်ႈလၢႆႈ

၂၈ ဝၢႆးသေမၼ်းၸဝ်ႈလၢတ်ႈၸိူဝ်ႉၼင်ႇၼၼ်ယဝ်ႉပူၼ်ႉပႅတ်ႇဝၼ်းၸမ်ၸမ်ၸိုင်ၸဝ်ႈယေႇသုႁွင်ႉဢဝ်ပေႇတရုယုဝ်းႁၢၼ်ႇတင်းယႃႇၵုပ်ႉလႄႈၶိုၼ်ႈၵႂႃႇၵႃႈၼိူဝ်လွႆႁႂ်ႈလႆႈသူးတွင်းဢေႃႈ။

၂၉ ၼႂ်းမိူဝ်ႈဢၼ်မၼ်းၸဝ်ႈသူးတွင်းယူႇၼၼ်ႉၸိုင်ၼႃႈမၼ်းၸဝ်ႈမီးႁၢင်ႊၽၢင်ဢၼ်လၢၵ်ႇလၢႆးလႄႈၶူဝ်းၼုင်ႈမၼ်းၸဝ်ႈၵေႃႈၽိူၵ်ႇၶၢဝ်ႁိူဝ်ႈလႅင်းမူၼ်ၼင်ႇၽႃႉမႅပ်ႈဢေႃႈ။

၃၀ ၵူၼ်းသွင်ၵေႃႉဢၼ်ပဵၼ်မုဝ်းသေႇတင်းဢေးလိယၵေႃႈပႃးတင်းမူၼ်သရေႇလႄႈပေႃႇမႃးသေယဝ်ႉ

၃၁ လၢတ်ႈတေႃႇၵၼ်တင်းမၼ်းၸဝ်ႈလွင်ႈဢၼ်မၼ်းၸဝ်ႈၸမ်တၵ်းလႆႈၶၢမ်ႇတၢႆၵႃႈၼႂ်းဝဵင်းယေႇရုသလႅမ်ႇၼၼ်ႉဢေႃႈ။

၃၂ ပေႇတရုတင်းၶဝ်ၸိူဝ်းဢၼ်မီးယူႇလူၺ်ႈၵၼ်တင်းမၼ်းၸိူဝ်းၼၼ်ႉမၢၵ်ႇတႃၼၵ်းၼႃႇလႄႈငဝ်ၼွၼ်းယူႇဢေႃႈ။မိူဝ်ႈဢၼ်တိုၼ်ႇႁူႉတူဝ်မႃးၼၼ်ႉၶဝ်လႆႈႁၼ်မူၼ်သရေႇမၼ်းၸဝ်ႈဢိၵ်ႇတင်းၵူၼ်းသွင်ၵေႃႉဢၼ်ၸုၵ်းယူႇလူၺ်ႈၵၼ်တင်းမၼ်းၸဝ်ႈၼၼ်ႉဢေႃႈ။

၃၃ ၼႂ်းမိူဝ်ႈဢၼ်သွင်ၵေႃႉၼၼ်ႉၽၢတ်ႇသေၵႃႈတီႈမၼ်းၸဝ်ႈၵႂႃႇယဝ်ႉၼၼ်ႉၸိုင်ပေႇတရုလဝ်ႈလၢတ်ႈတီႈၸဝ်ႈယေႇသုလႄႈဝႃႈ၊-ၸဝ်ႈႁဝ်း၊ၵႃႈတီႈၼႆႉပဵၼ်ဢၼ်လီပုၼ်ႈဢၼ်ႁဝ်းၶႃႈတၵ်းယူႇၶႃႈဢေႃႈ။ႁႂ်ႈႁဝ်းၶႃႈလႆႈႁဵတ်းသုမ်ႉသၢမ်လင်ပုၼ်ႈၸဝ်ႈႁဝ်းလင်ၼိုင်ႈပုၼ်ႈမုဝ်းသေႇလင်ၼိုင်ႈပုၼ်ႈဢေးလိယလင်ၼိုင်ႈသေၵမ်းၶႃႈ၊ဝႃႈၼႆမၼ်းၵႂင်ၸႂ်ၼႃႇလႄႈၸင်ႇလဝ်ႈလၢတ်ႈၸိူဝ်ႉၼင်ႇၼၼ်ဢေႃႈ။

၃၄ ၼႂ်းမိူဝ်ႈဢၼ်မၼ်းလၢတ်ႈၸိူဝ်ႉၼင်ႇၼၼ်ယူႇၼၼ်ႉမွၵ်ႇၵုမ်ႈမုင်းႁူမ်ႇၶဝ်လႄႈၶဝ်လႆႈႁၼ်မုဝ်းသေႇဢိၵ်ႇတင်းဢေးလိယၶဝ်ႈၵႂႃႇၵႃႈၼႂ်းမွၵ်ႇၵုမ်ႈယူႇၼၼ်ႉၶဝ်မီးတၢင်းဢၼ်ၵူဝ်ႁႄၼႃႇဢေႃႈ။

၃၅ ၵမ်းၼၼ်ႉသဵင်ပဵၼ်မႃးၵႃႈၼႂ်းမွၵ်ႇၵုမ်ႈၼၼ်ႉလႄႈဝႃႈ၊-ၵေႃႉၼႆႉပဵၼ်လုၵ်ႈၵဝ်ဢၼ်ၵဝ်လိူၵ်ႈၵဵပ်းဢဝ်ၼၼ်ႉဢေႃႈ။

၃၆ ထွမ်ႇဢဝ်ၵႂၢမ်းမၼ်းတႃႉ၊ဝႃႈၼင်ႇၼႆဢေႃႈ။မိူဝ်ႈဢၼ်သဵင်ၸဝ်ႈပဵၼ်မႃးၼၼ်ႉၵႃႈတီႈၼၼ်ႉလႆႈႁၼ်ၸဝ်ႈယေႇသုပႃးလဵဝ်ၵူၺ်းဢေႃႈ။မိူဝ်ႈဝၼ်းၼၼ်ႉၶဝ်ယူႇတဵတ်ႇတဵတ်ႇလႄႈဢမ်ႇလၢတ်ႈလွင်ႈတၢင်းဢၼ်ၶဝ်လႆႈႁၼ်ၸိူဝ်းၼၼ်ႉသေၸိူဝ်ႉသေပိူင်ၵႃႈတီႈၽူႈလႂ်သေၵေႃႉသေၵူၼ်း။

ၸဝ်ႈယေႇသုႁႂ်ႈလုၵ်ႈဢွၼ်ႇၽီၶဝ်ႈႁၢႆၶႅၼ်း

၃၇ ၼႂ်းဝၼ်းမိူဝ်ႈၽုၵ်ႈမိူဝ်ႈဢၼ်ၶဝ်လူင်းသေၵႃႈၼိူဝ်လွႆမႃးၼၼ်ႉၵူၼ်းၸူႉၵူၼ်းတုမ်ၼမ်ၼႃႇမႃးႁပ်ႉႁူဝ်တၢင်းမၼ်းၸဝ်ႈဢေႃႈ။

၃၈ ၵူၼ်းဢၼ်ပႃးၼႂ်းၵူၼ်းၸူႉၵူၼ်းတုမ်ၸိူဝ်းၼၼ်ႉၵေႃႉၼိုင်ႈႁွင်ႉသႅၼ်ႇလႄႈဝႃႈ၊-သြႃႇၸဝ်ႈ၊ၵဝ်ၶႃႈတွင်းပၢၼ်ႇႁႂ်ႈၸဝ်ႈႁဝ်းတူၺ်းလုၵ်ႈၸၢႆးၵဝ်ၶႃႈသေၵမ်းၶုႈ။ၵဝ်ၶႃႈမီးလုၵ်ႈၸၢႆးၵေႃႉလဵဝ်ၵူၺ်းၶႃႈဢေႃႈ။

၃၉ ၽီတီႉဢဝ်မၼ်းလႄႈမၼ်းၸၢင်ႊႁွင်ႉသႅၼ်ႇသေယဝ်ႉၵႅၼ်ႇၶႅင်ၵႂႃႇတင်းတူဝ်တင်းၶိင်းတေႃႇထိုင်ႁွတ်ႈပူၵ်ႇဢွၵ်ႇသူပ်းယူႇၶႃႈဢေႃႈ။ၽီၼၼ်ႉၼိၵ်ႈၸၢၵ်ႈငႅၼ်းသေးမၼ်းၼႃႇလူင်လၢင်လႄႈဢွၵ်ႇယၢပ်ႇဢွၵ်ႇယဵၼ်းၼႃႇၶႃႈဢေႃႈ။

၄၀ ပဵၵ်ႉသမ်ႉၵဝ်ၶႃႈတွင်းပၢၼ်ႇတပႄးၸဝ်ႈႁဝ်းၶဝ်ႁႂ်ႈၶဝ်ႁေႃႈၽီႁၢႆႉၼၼ်ႉဢွၵ်ႇပႅတ်ႈသေၵေႃႈၶဝ်ဢမ်ႇတတ်ႈၼိုင်ႇလႆႈၶႃႈ၊ဝႃႈၼင်ႇၼႆဢေႃႈ။

၄၁ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ၵူၼ်းမဵဝ်းဢၼ်ဢမ်ႇမီးတၢင်းယုမ်ႇမၢတ်ႈလႄႈၸၢင်ႊၶၢႆႉပုတ်ႉၼႆႉဢိူၺ်း၊ၵဝ်တၵ်းလႆႈယူႇလူၺ်ႈၵၼ်တင်းသူလၢႆၶိင်ႇလၢႆမိူဝ်ႈ။တၵ်းလႆႈယိူၼ်ႉၶၢမ်ႇသူလၢႆၶိင်ႇလၢႆမိူဝ်ႈ။ဢဝ်လုၵ်ႈၸၢႆးမႂ်းမႃးတီႈၵဝ်တႃႉ၊ဝႃႈၼင်ႇၼႆဢေႃႈ။

၄၂ ၼႂ်းမိူဝ်ႈဢၼ်မၼ်းယင်းတိုၵ်ႉမႃးယူႇၼၼ်ႉၸိုင်ၽီႁၢႆႉၼၼ်ႉႁႂ်ႈမၼ်းလူမ်ႉၵႃႈၼိူဝ်လိၼ်လႄႈၵႅၼ်ႇၶႅင်ၵႂႃႇဢေႃႈ။ၸဝ်ႈယေႇသုၵေႃႈသုင်းမႃႉၽီႁၢႆႉဢၼ်ၵူဝ်ႈၵိူၵ်ႇၼၼ်ႉသေယဝ်ႉႁႂ်ႈလုၵ်ႈဢွၼ်ႇၼၼ်ႉလႆႈၵတ်းယဵၼ်ၶျၢမ်းသႃႇယဝ်ႉၸင်ႇဢဝ်မၼ်းဢၢပ်ႈပၼ်တီႈပေႃႈမၼ်းဢေႃႈ။

၄၃ ၵူၼ်းတင်းသဵင်ႈတင်းလူင်ၸိူဝ်းၼၼ်ႉလႆႈႁၼ်မႁႃႇတၼ်းၶူဝ်းၽြႃးပဵၼ်ၸဝ်ႈလႄႈမီးတၢင်းဢၼ်ၵႂင်ၸႂ်ယုင်ႈၸႂ်ၼႃႇလူင်လၢင်ဢေႃႈ။ၼႂ်းမိူဝ်ႈဢၼ်ၵူၼ်းတင်းသဵင်ႈတင်းလူင်ဢၢမ်းလွင်ႈတၢင်းဢၼ်ၸဝ်ႈယေႇသုႁဵတ်းတင်းသဵင်ႈတင်းလူင်ၸိူဝ်းၼၼ်ႉယူႇၼၼ်ႉၸိုင်၊မၼ်းၸဝ်ႈလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊-

၄၄ သူထွမ်ႇၵႂၢမ်းၵဝ်ၼႆႉလႄႈတွင်းဝႆႉတႃႉ။လုၵ်ႈၵူၼ်းၸမ်တၵ်းလႆႈၶၢမ်ႇတၢင်းဢၼ်ဢၢပ်ႈၵႃႈၼႂ်းမိုဝ်းၵူၼ်းတင်းလၢႆယဝ်ႉ၊ဝႃႈၼင်ႇၼႆဢေႃႈ။

၄၅ ဢထိၵ်ႈပႄႇၵႂၢမ်းမၼ်းၸဝ်ႈၼၼ်ႉဢမ်ႇပေႃႇဢမ်ႇဢွၵ်ႇလႄႈသိူင်ႇဝႆႉဢမ်ဝႆႉတီႈၶဝ်တေႃႇထိုင်ႁွတ်ႈထၼ်ႈပေႃးၶဝ်ဢမ်ႇႁူႉဢမ်ႇၸႅင်ႈဢေႃႈ။လွင်ႈဢထိၵ်ႈပႄႇၼၼ်ႉၵေႃႈၶဝ်ဢမ်ႇႁတ်းလဝ်ႈႁတ်းထၢမ်တီႈမၼ်းၸဝ်ႈ။

ၵေႃႉလႂ်တၵ်းယႂ်ႇမျၢတ်ႈသေပိူၼ်ႈ

၄၆ မိူဝ်ႈၼၼ်ႉၶဝ်ၵေႃႉၼိုင်ႈလႄႈၵေႃႉၼိုင်ႈလၢတ်ႈၵၼ်ထဵင်ၵၼ်လူၺ်ႈလွင်ႈဢၼ်ဝႃႈၵႃႈၼႂ်းၶဝ်ၼၼ်ႉၽူႈလႂ်တၵ်းယႂ်ႇမျၢတ်ႈသေပိူၼ်ႈဢၼ်ဝႃႈၼၼ်ႉဢေႃႈ။

၄၇ ၸဝ်ႈယေႇသုႁူႉႁၼ်တၢင်းၵျၢမ်ႇတၢင်းပွင်ၶဝ်ၼၼ်ႉလႄႈမၼ်းၸဝ်ႈဢဝ်လုၵ်ႈဢွၼ်ႇၵေႃႉၼိုင်ႈမႃးဝႆႉၵႃႈတီႈႁိမ်းမၼ်းၸဝ်ႈယဝ်ႉၸင်ႇလၢတ်ႈတီႈၶဝ်ၼၼ်ႉလႄႈဝႃႈ၊-ၽူႈလႂ်သေဢမ်ႇဝႃႈၵေႃႉဢၼ်ဢိင်ပိုင်ႈၸိုဝ်သဵင်ၵဝ်သေလႄႈႁပ်ႉတုင်းဢဝ်လုၵ်ႈဢွၼ်ႇၼႆႉၼၼ်ႉၵေႃႉၼၼ်ႉႁပ်ႉတုင်းဢဝ်ၵဝ်ဢေႃႈ။

၄၈ ၵေႃႉဢၼ်ႁပ်ႉတုင်းဢဝ်ၵဝ်ၼၼ်ႉၵေႃႈႁပ်ႉတုင်းဢဝ်ၵေႃႉဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။လွင်ႈမၼ်းၸမ်းၵေႃႉဢၼ်လဵၵ်ႉၵေႇဢေႇမၢင်ႊသေပိူၼ်ႈၵႃႈၼႂ်းသူၼႆႉၼၼ်ႉပဵၼ်ၵေႃႉဢၼ်ယႂ်ႇမျၢတ်ႈသေပိူၼ်ႈဢေႃႈ၊ဝႃႈၼင်ႇၼႆဢေႃႈ။

၄၉ ယုဝ်းႁၢၼ်ႇၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်း၊ႁဝ်းၶႃႈလႆႈထူပ်းၺႃးၵူၼ်းၵေႃႉၼိုင်ႈမၼ်းဢိင်ပိုင်ႈၸိုဝ်သဵင်ၸဝ်ႈႁဝ်းသေလႄႈႁေႃႈၽီႁၢႆႉဢွၵ်ႇပႅတ်ႈယူႇၶႃႈဢေႃႈ။ပိူဝ်ႈဢၼ်မၼ်းဢမ်ႇၸႂ်ႈၵေႃႉဢၼ်ၸွမ်းလူၺ်ႈၵၼ်တင်းႁဝ်းၶႃႈၼၼ်ႉလႄႈႁဝ်းၶႃႈႁႄႉၶႅၼ်မၼ်းယူႇၶႃႈဢေႃႈ၊

၅၀ မိူဝ်ႈဢၼ်ဝႃႈၼင်ႇၼႆၸိုင်ၸဝ်ႈယေႇသုၵေႃႈလၢတ်ႈတီႈမၼ်းလႄႈဝႃႈ၊-ယႃႇပေႁႄႉၶႅၼ်မၼ်း။ၵေႃႉဢၼ်ဢမ်ႇၶတ်းၵၼ်တင်းသူၼၼ်ႉမီးၽၢႆႇသူဢေႃႈ၊ဝႃႈၼင်ႇၼႆဢေႃႈ။

၅၁ မၼ်းၸဝ်ႈၼၼ်ႉမိူဝ်ႈဢၼ်ၸမ်တၵ်းထိုင်ႁွတ်ႈၶိင်ႇဢၼ်တၵ်းလႆႈၶၢမ်ႇတၢင်ႈဢၼ်ဢဝ်ၶိုၼ်ႈၵႂႃႇၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉၸိုင်မၼ်းၸဝ်ႈဝၢႆႇၼႃႈႁႂ်ႈလႆႈၵႂႃႇၸူးၵႃႈတီႈဝဵင်းယေႇရုသလႅမ်ႇသိုဝ်ႈသိုဝ်ႈဢေႃႈ။

၅၂ မၼ်းၸဝ်ႈပွႆႇၸႂ်ႉတပႄးၸဝ်ႈၵႂႃႇၵႃႈၼႂ်းဝၢၼ်ႈၵူၼ်းသမႃႇရိဝၢၼ်ႈၼိုင်ႈဢွၼ်တၢင်းမၼ်းၸဝ်ႈႁႂ်ႈလႆႈမႄးႁႅၼ်းပုၼ်ႈမၼ်းၸဝ်ႈဢေႃႈ။

၅၃ ပိူဝ်ႈဢၼ်မၼ်းၸဝ်ႈဝၢႆႇၼႃႈၵႂႃႇၸူးဝဵင်းယေႇရုသလႅမ်ႇသိုဝ်ႈသိုဝ်ႈယူႇလႄႈၵူၼ်းဝၢၼ်ႈၸိူဝ်းၼၼ်ႉဢမ်ႇႁပ်ႉတုင်းဢဝ်မၼ်းၸဝ်ႈ။

၅၄ တပႄးမၼ်းၸဝ်ႈဢၼ်ပဵၼ်ယႃႇၵုပ်ႉတင်းယုဝ်းႁၢၼ်ႇၼၼ်ႉႁၼ်လွင်ႈတၢင်းၼၼ်ႉသေယဝ်ႉလဝ်ႈလၢတ်ႈလႄႈဝႃႈ၊-ၸဝ်ႈႁဝ်းမိူၼ်ၸိူဝ်ႉၼင်ႇဢေးလိယႁဵတ်းၼၼ်ႉၸွင်ႇၸဝ်ႈႁဝ်းၶႂ်ႈႁႂ်ႈႁဝ်းၶႃႈယွၼ်းႁႂ်ႈၽႆးတူၵ်းသေၵႃႈၼိူဝ်ၵၢင်ႁၢဝ်လူင်းမႃးလႄႈမႆႈၶဝ်ၸိူဝ်းၼႆႉပဵတ်ႈၶႃႈႁိုဝ်၊

၅၅ မိူဝ်ႈဢၼ်ဝႃႈၼင်ႇၼႆၸိုင်၊ၸဝ်ႈယေႇသုဝၢႆႇတူၺ်းသေလႄႈသင်ႇသွၼ်သုင်းမႃႉၶဝ်ဢေႃႈ။

၅၆ ဝၢႆးသေၼၼ်ႉၶဝ်ဢွၵ်ႇၵႂႃႇၸူးၵႃႈတီႈတၢင်ႇဝၢၼ်ႈဢေႃႈ။

ၵႃႊၶၼ်ဢၼ်ၸွမ်းပႃႈလင်ၸဝ်ႈယေႇသု

၅၇ ၼႂ်းမိူဝ်ႈဢၼ်ၶဝ်ယင်းတိုၵ်ႉၵႂႃႇၸွမ်းတၢင်းယူႇၼၼ်ႉၸိုင်ၵူၼ်းၵေႃႉၼိုင်ႈလၢတ်ႈလႄႈဝႃႈ၊-ၸဝ်ႈႁဝ်း၊ၵဝ်ၶႃႈတၵ်းၸွမ်းၸဝ်ႈႁဝ်းၵႂႃႇၵႃႈတီႈဢၼ်ၸဝ်ႈႁဝ်းၵႂႃႇၵူႈတီႈၵူႈလႅၼ်ၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။

၅၈ ၸဝ်ႈယေႇသုၵေႃႈလၢတ်ႈတီႈမၼ်းလႄႈဝႃႈ၊-မႃလိၼ်တင်းလၢႆယင်းမီးႁူးလိၼ်ဢေႃႈ။ၼူၵ်ႉဢၼ်မိၼ်ၵႃႈၼိူဝ်ၵၢင်ႁၢဝ်တင်းလၢႆၵေႃႈယင်းမီးႁင်းဢေႃႈ။လုၵ်ႈၵူၼ်းၸမ်းတီႈဢၼ်တၵ်းဝၢင်းႁူဝ်ယင်းဢမ်ႇမီးဝႃႈၼင်ႇၼႆဢေႃႈ။

၅၉ မၼ်းၸဝ်ႈလၢတ်ႈတီႈၵူၼ်းတၢင်ႇၵေႃႉလႄႈဝႃႈ၊-ၸွမ်းပႃႈလင်ၵဝ်တႃႉ၊မိူဝ်ႈဢၼ်ဝႃႈၼင်ႇၼႆၸိုင်ၵေႃႉၼၼ်ႉၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်း၊ၶႅၼ်းတေႃႈပၼ်ဢၶႂၢင်ႉႁႂ်ႈၵဝ်ၶႃႈလႆႈၵႂႃႇသၢင်းၵျူဝ်ႇပေႃႈၵဝ်ၶႃႈဢွၼ်တၢင်းလူးၵွၼ်ႇၶႃႈမိူဝ်ႈဢၼ်ဝႃႈၼင်ႇၼႆၸိုင်၊

၆၀ မၼ်းၸဝ်ႈၵေႃႈဝႃႈ၊ႁႂ်ႈၵူၼ်းတၢႆတင်းလၢႆသၢင်းၵျူဝ်ႇၵူၼ်းတၢႆၶဝ်တႃႉ။မႂ်းၸမ်းၵႂႃႇလႄႈႁေႃးမွၵ်ႇလၢတ်ႈလွင်ႈမိူင်းၽြႃးပဵၼ်ၸဝ်ႈတႃႉ၊ဝႃႈၼင်ႇၼႆဢေႃႈ။

၆၁ ၵူၼ်းတၢင်ႇၵေႃႉၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်း၊ၵဝ်ၶႃႈတၵ်းၸွမ်းပႃႈလင်ၸဝ်ႈႁဝ်းယူႇၶႃႈဢေႃႈ။ၼႂ်းဝႃႈၼၼ်သေၵေႃႈၶႅၼ်းတေႃႈပၼ်ဢၶႂၢင်ႉႁႂ်ႈၵဝ်ၶႃႈလႆႈၵႂႃႇတၵ်ႉလၢတ်ႈၶဝ်ၸိူဝ်းဢၼ်ၵိုတ်းၵျၢၼ်ႇယူႇၵႃႈၼႂ်းႁိူၼ်းၵဝ်ၶႃႈၼၼ်ႉဢွၼ်တၢင်းလူးၵွၼ်ႇၶႃႈမိူဝ်ႈဢၼ်ဝႃႈၼင်ႇၼႆၸိုင်၊

၆၂ ၸဝ်ႈယေႇသုၵေႃႈလၢတ်ႈတီႈမၼ်းလႄႈဝႃႈ၊-ၽူႈလႂ်သေဢမ်ႇဝႃႈၵေႃႉဢၼ်ယိပ်းၵၢၼ်းထႆလႄႈဝၢႆႇတူၺ်းတၢင်းလင်ၼၼ်ႉၵေႃႉၼၼ်ႉဢမ်ႇထိူၵ်ႈဢမ်ႇတၢၼ်ႇၵၼ်တင်းမိူင်းၽြႃးပဵၼ်ၸဝ်ႈ၊ဝႃႈၼင်ႇၼႆဢေႃႈ။