Shan Missions

မၢတ်ႈထႄႇ

Chapter ၁     ၂     ၃     ၄     ၅     ၆     ၇     ၈     ၉     ၁၀     ၁၁     ၁၂     ၁၃     ၁၄     ၁၅     ၁၆     ၁၇     ၁၈     ၁၉     ၂၀     ၂၁     ၂၂     ၂၃     ၂၄     ၂၅     ၂၆     ၂၇     ၂၈ 

၉

ၸဝ်ႈယေႇသုႁႂ်ႈၵူၼ်းတိၼ်တၢႆမိုဝ်းတၢႆႁၢႆၶႅၼ်း

၁ မိူဝ်ႈၼၼ်ႉမၼ်းၸဝ်ႈၶီႇႁိူဝ်းလႄႈၶိုၼ်းၶၢမ်ႈၵႂႃႇႁွတ်ႈထိုင်ၵႃႈတီႈဝဵင်းၸဝ်ႈၵဝ်ႇပုၼ်ႉဢေႃႈ။ ၶဝ်ဢဝ်ၵူၼ်းတိၼ်တၢႆမိုဝ်းတၢႆဢၼ်ၼွၼ်းယူႇၵႃႈၼိူဝ်တီႈၼွၼ်းၼၼ်ႉၵေႃႉၼိုင်ႈမႃးသူင်ႇၵႃႈတီႈမၼ်းၸဝ်ႈဢေႃႈ။ 

၂ ၸဝ်ႈယေႇသုႁၼ်တၢင်းယုမ်ႇမၢတ်ႈၶဝ်ၼၼ်ႉလႄႈလၢတ်ႈတီႈၵေႃႉဢၼ်တိၼ်တၢႆမိုဝ်းတၢႆၼၼ်ႉလႄႈဝႃႈ၊-လုၵ်ႈၵဝ်ဢိူၺ်း၊ယႃႇပေမႆႈၸႂ်။ ဢပျႅတ်ႈမႂ်းၸိုင်လႆႈၶၢမ်ႇတၢင်းဢၼ်ပွႆႇလွတ်ႈယဝ်ႉ၊ဝႃႈၼင်ႇၼႆဢေႃႈ။ 

၃ ၵူၼ်းထုတ်ႇၵျၢမ်းၵမ်ႈၽွင်ႈထၢင်ႇၼႂ််းၸႂ်လႄႈဝႃႈ၊-

၄ ၵေႃႉၼႆႉလၢတ်ႈပူၼ်ႉလၢတ်ႈလိူဝ်ၽြႃးပဵၼ်ၸဝ်ႈယဝ်ႉ၊ဝႃႈၼင်ႇၼႆဢေႃႈ။ ၸဝ်ႈယေႇသုႁူႉႁၼ်တၢင်းၵျၢမ်ႇတၢင်းပွင်ၶဝ်ၼၼ်ႉလႄႈလၢတ်ႈဝႃႈ၊-ႁဵတ်းသင်လႄႈၼႂ်းၸႂ်သူၵျၢမ်ႇပွင်ဢၼ်ဢမ်ႇလီၸိူဝ်ႉၼႆ။ 

၅ ၵႂၢမ်းဢၼ်လႂ်ယဵင်ႈၶႅၼ်းလၢတ်ႈငၢႆႈ။ ဢပျႅတ်ႈမႂ်းၸိုင်လႆႈၶၢမ်ႇတၢင်းဢၼ်ပွႆႇလွတ်ႈယဝ်ႉ၊ဢၼ်ဝႃႈၼၼ်ႉလၢတ်ႈငၢႆႈႁိုဝ်။ ဢမ်ႇၼၼ်မႂ်းလုၵ်ႉလႄႈပႆတၢင်းၵႂႃႇတႃႉ၊ဢၼ်ဝႃႈၼၼ်ႉလၢတ်ႈငၢႆႈႁိုဝ်။ 

၆ ၼင်ႇႁိုဝ်သူတၵ်းႁူႉလွင်ႈဢၼ်လုၵ်ႈၵူၼ်းပိူင်ႇပွႆႇလွတ်ႈဢပျႅတ်ႈၵႃႈၼိူဝ်လိၼ်မိူင်းၼႆႉ၊ဢၼ်ဝႃႈၼၼ်ႉ၊မၼ်းၸဝ်ႈသမ်ႉလၢတ်ႈတီႈၵေႃႉဢၼ်တိၼ်တၢႆမိုဝ်းတၢႆၼၼ်ႉထႅင်ႈလႄႈဝႃႈ၊-လုၵ်ႉလႄႈဢဝ်တီႈၼွၼ်းမႂ်းမိူဝ်းၵႂႃႇၵႃႈတီႈႁိူၼ်းမႂ်းတႃႉ၊ဝႃႈၼင်ႇၼႆဢေႃႈ။ 

၇ ၵေႃႉၼၼ်ႉၵေႃႈလုၵ်ႉလႄႈမိူဝ်းၵႂႃႇၵႃႈတီႈႁိူၼ်းမၼ်းပုၼ်ႉသေဢေႃႈ။ 

၈ ၵူၼ်းၸူႉၵူၼ်းတုမ်ၸိူဝ်းၼၼ်ႉမိူဝ်ႈဢၼ်ႁၼ်ၼင်ႇၼၼ်ၼၼ်ႉၸိုင်ဢၢမ်းၼႃႇလူင်လၢင်လႄႈယွင်ႈယေႃးၽြႃးပဵၼ်ၸဝ်ႈဢၼ်ဢဝ်တၼ်းၶူဝ်းဢၢပ်ႈပၼ်တီႈၵူၼ်းၼၼ်ႉဢေႃႈ။ 

ၸဝ်ႈယေႇသုႁွင်ႉဢဝ်မၢတ်ႈထႄႇ

၉ မိူဝ်ႈဢၼ်ၸဝ်ႈယေႇသုလုၵ်ႉသေၵႃႈတီႈၼၼ်ႉလႄႈၵႂႃႇယူႇၼၼ်ႉၸိုင်မၼ်းၸဝ်ႈထူပ်းႁၼ်ၵူၼ်းၵေႃႉၼိုင်ႈဢၼ်လႆႈႁွင်ႉႁိၵ်ႈၸိုဝ်မၢတ်ႈထႄႇၼၼ်ႉၼင်ႈယူႇၵႃႈၼႂ်းထဵင်ၵဵပ်းၶွၼ်ႇဢေႃႈ။ မၼ်းၸဝ်ႈႁွင်ႉမၼ်းလႄႈဝႃႈ၊-ၸွမ်းပႃႈလင်ၵဝ်တႃႉ၊ဝႃႈၼင်ႇၼႆဢေႃႈ။ ၵေႃႉၼၼ်ႉၵေႃႈလုၵ်ႉၵမ်းလဵဝ်လႄႈၸွမ်းပႃႈလင်မၼ်းၸဝ်ႈၵႂႃႇဢေႃႈ။ 

၁၀ လိုၼ်းၼၼ်ႉၸင်ႇၼႂ်းမိူဝ်ႈဢၼ်မၼ်းၸဝ်ႈၵိၼ်ယူႇၵႃႈၼႂ်းႁိူၼ်းၵေႃႉၼၼ်ႉၸိုင်ၵူၼ်းၵဵပ်းၶွၼ်ႇတင်းၵူၼ်းဢၼ်မီးဢပျႅတ်ႈၼမ်ၼႃႇမႃးၵိၼ်လူၺ်ႈၵၼ်တင်းမၼ်းၸဝ်ႈဢိၵ်ႇတင်းတပႄးၸဝ်ႈတင်းလၢႆၸိူဝ်းၼၼ်ႉဢေႃႈ။ 

၁၁ ၽႃႇရိသေးၸိူဝ်းၼၼ်ႉႁၼ်လႄႈလၢတ်ႈတီႈတပႄးၸဝ်ႈၸိူဝ်းၼၼ်ႉလႄႈဝႃႈ၊-ႁဵတ်းႁိုဝ်လႄႈသြႃႇသူသမ်ႉၵိၼ်လူၺ်ႈၵၼ်တင်းၵူၼ်းၵဵပ်းၶွၼ်ႇတင်းၵူၼ်းဢၼ်မီးဢပျႅတ်ႈၸိူဝ်းၼၼ်ႉ၊ဝႃႈၼင်ႇၼႆဢေႃႈ။ 

၁၂ မိူဝ်ႈဢၼ်မၼ်းၸဝ်ႈငိၼ်းၵႂၢမ်းၶဝ်ၼၼ်ႉၸိုင်မၼ်းၸဝ်ႈလၢတ်ႈလႄႈဝႃႈ၊-ၶဝ်ၸိူဝ်းဢၼ်ယူႇလီၼၼ်ႉဢမ်ႇလူဝ်ႇမေႃယႃ။ ၶဝ်ၸိူဝ်းဢၼ်မီးတၢင်းၶႆႈတၢင်းပဵၼ်ၼၼ်ႉၵူၺ်းလူဝ်ႇမေႃယႃဢေႃႈ။ 

၁၃ ၼင်ႇႁိုဝ်သူတၵ်းႁူႉလွင်ႈဢၼ်ၵျၢမ်းလိၵ်ႈမီးဝႆႉလႄႈဝႃႈ၊-ၵဝ်ၵျိူၵ်ႈတၢင်းႁၵ်ႉၵရူႉၼႃႇလိူဝ်တွၼ်းၼႃႇသတေၢင်းဢၼ်ပုၵ်ႉၸေႃႇယိၸ်ႉဢေႃႈ၊ဢၼ်ဝႃႈၼၼ်ႉပဵၼ်ၸိူဝ်ႉၼင်ႇႁိုဝ်ဝႃႈၼႆသူၵႂႃႇလႄႈသွၼ်ဢဝ်တႃႉ။ ၵဝ်မႃးႁႂ်ႈလႆႈႁွင်ႉဢဝ်ၵူၼ်းသိုဝ်ႈတေႃႇတင်းလၢႆဢမ်ႇၸႂ်ႈ။ ၵဝ်မႃးႁႂ်ႈလႆႈႁွင်ႉဢဝ်ၵူၼ်းဢၼ်မီးဢပျႅတ်ႈတင်းလၢႆဢေႃႈ၊ဝႃႈၼင်ႇၼႆဢေႃႈ။ 

ထၢမ်လွင်ႈတၢင်းဢၼ်ၵမ်တၢင်းၵိၼ်

၁၄ မိူဝ်ႈၼၼ်ႉတပႄးယုဝ်းႁၢၼ်ႇတင်းလႆႈမႃးတီႈမၼ်းၸဝ်ႈလႄႈလဝ်ထၢမ်ဝႃႈ၊-ႁဝ်းၶႃႈတင်းၽႃႇရိသေးတင်းလၢႆၵမ်တၢင်းၵိၼ်ၶိူဝ်းၶိူဝ်းယႂ်းယႂ်းယူႇၶႃႈဢေႃႈ။ ႁဵတ်းသင်လႄႈတပႄးၸဝ်ႈႁဝ်းၸိူဝ်းၼႆႉဢမ်ႇၵမ်တၢင်းၵိၼ်ၶႃႈ၊ဝႃႈၼင်ႇၼႆဢေႃႈ။ 

၁၅ ၸဝ်ႈယေႇသုၵေႃႈလၢတ်ႈလႄႈဝႃႈ၊-မိူဝ်ႈဢၼ်ၵေႃႉဢၼ်သွင်ႇမင်ႇၵလႃႇမီးယူႇလူၺ်ႈၵၼ်တင်းၵေႃႉသေႈမၼ်းတင်းလၢႆယူႇၼၼ်ႉၸွင်ႇၶဝ်ၸၢင်ႊမႆႈၸႂ်ၶီၸႂ်ပွင်ႉၶင်းႁိုဝ်။ ၶိင်ႇၵႃႇလႃႉဢၼ်တၵ်းလႆႈဢဝ်ၵေႃႉဢၼ်သွင်ႇမင်ႇၵလႃႇၽၢတ်ႇယၢၼ်ၵၼ်တင်းၵေႃႉသေႈမၼ်းတင်းလၢႆၼၼ်ႉတၵ်းႁွတ်ႈထိုင်မႃးယူႇဢေႃႈ။ 

၁၆ ၶိင်ႇမိူဝ်ႈၼၼ်ႉၶဝ်တၵ်းၵမ်တၢင်းၵိၼ်ဢေႃႈ။ ၽႂ်ၵေႃႈဢမ်ႇဢဝ်ၽႅၼ်ႇမႂ်ႇၽုင်ၵူပ်းၶူဝ်းၵဝ်ႇ။ လွင်ႈမၼ်းၸမ်းၽႅၼ်ႇမႂ်ႇဢၼ်ၽုင်ၵူပ်းၼၼ်ႉတၵ်းႁုတ်ႉၸၼ်ၶူဝ်းၵဝ်ႇလႄႈႁူးမၼ်းယဵင်ႈၶႅၼ်းတၵ်းယႂ်ႇမႃးဢေႃႈ။ 

၁၇ ပိူင်လဵဝ်ၵၼ်ဢမ်ႇဢဝ်ၼမ်ႉၸပိတ်ႉဢၼ်မႂ်ႇသႂ်ႇၼႂ်းထူင်ၼင်ဢၼ်ၵဝ်ႇ။ ပေႃးသႂ်ႇၸိုင်ထူင်ၼင်ၼၼ်ႉတၵ်းတႅၵ်ႇဢေႃႈ။ ၼမ်ႉၸပိတ်ႉတၵ်းႁူဝ်ႈလႄႈထူင်ၵေႃႈတၵ်းလူႉတၵ်းလႅဝ်ဢေႃႈ။ ၼမ်ႉၸပိတ်ႉဢၼ်မႂ်ႇၸမ်းတၵ်းလႆႈသႂ်ႇၼႂ်းထူင်ၼင်ဢၼ်မႂ်ႇဢေႃႈ။ ပေႃးသႂ်ႇၸိုင်တင်းသွင်ၸိူဝ်ႉသွင်ပိူင်ဢမ်ႇလူႉဢမ်ႇလႅဝ်၊ဝႃႈၼင်ႇၼႆဢေႃႈ။ 

မႄႈယိင်းလိူတ်ႈထွၵ်ႇႁၢႆၶႅၼ်းၵူၼ်းတၢႆလုၵ်ႉၶိုၼ်း

၁၈ ၼႂ်းမိူဝ်ႈဢၼ်မၼ်းၸဝ်ႈလၢတ်ႈၵႂၢမ်းယူႇၼၼ်ႉၵူၼ်းဢၼ်ပဵၼ်ၵႄႇပဵၼ်ႁူဝ်ၵေႃႉၼိုင်ႈမႃးၶုပ်ႉမူပ်ႇသေလႄႈလဝ်လၢတ်ႈဝႃႈ၊-လုၵ်ႈယိင်းၵဝ်ၶႃႈၵေႃႉၼိုင်ႈတၢႆတေႃႈလဵဝ်ၼႆႉၵူၺ်းၶႃႈယဝ်ႉ။ ၼႂ်းဝႃႈၼၼ်သေၵေႃႈပေႃးၸဝ်ႈႁဝ်းၵႂႃႇလႄႈဢဝ်မိုဝ်းၸဝ်ႈႁဝ်းတၢင်ႇၵႃႈၼိူဝ်မၼ်းၸိုင်ဢသၢၵ်ႈမၼ်းတၵ်းၶိုၼ်းလိပ်းမႃးယူႇၶႃႈဢေႃႈ၊ဝႃႈၼင်ႇၼႆဢေႃႈ။ 

၁၉ ၸဝ်ႈယေႇသုဢိၵ်ႇတင်းတပႄးၸဝ်ႈတင်းလၢႆၵေႃႈလုၵ်ႉလႄႈၸွမ်းပႃႈလင်ၵေႃႉၼၼ်ႉၵႂႃႇဢေႃႈ။ 

၂၀ မိူဝ်ႈဢၼ်ယင်းတိူၵ်ႉၵႂႃႇယူႇၼၼ်ႉမႄႈယိင်းဢၼ်ၸပ်းတၢင်းပဵၼ်လိူတ်ႈထွၵ်ႇလႆႈသိပ်းသွင်ပီႊတဵမ်တဵမ်ၼၼ်ႉၵေႃႉၼိုင်ႈမႃးၵႃႈတီႈၽၢႆႇတၢင်းလင်မၼ်းၸဝ်ႈသေလႄႈတိူဝ်ႉယိပ်းပူးၶူဝ်းမၼ်းၸဝ်ႈဢေႃႈ။ 

၂၁ လွင်ႈမၼ်းၸမ်းမၼ်းယုမ်ႇၼႂ်းၸႂ်ဝႃႈ၊-ပေႃးၵဝ်လႆႈတိူဝ်ႉယိပ်းၶူဝ်းလဵင်းမၼ်းၸဝ်ႈၵူၺ်းၼႆၵေႃႈတၢင်းပဵၼ်ၵဝ်တၵ်းႁၢႆၶႅၼ်းယူႇဢေႃႈ၊ဝႃႈၼႆဢေႃႈ။ 

၂၂ ၸဝ်ႈယေႇသုဝၢႆႇတူၺ်းလႄႈႁၼ်မႄႈယိင်းၼၼ်ႉသေယဝ်ႉလၢတ်ႈဝႃႈ၊-လုၵ်ႈယိင်းၵဝ်ဢိူၺ်း၊ယႃႇပေမႆႈၸႂ်။ တၢင်းယုမ်ႇမၢတ်ႈမႂ်းႁႂ်ႈတၢင်းပဵၼ်မႂ်းႁၢႆၶႅၼ်းယဝ်ႉ၊ဝႃႈၼင်ႇၼႆဢေႃႈ။ ၸႃႉၸဵမ်ၶိင်ႇၼႃႇရီႇၼၼ်ႉၵမ်းလဵဝ်မႄႈယိင်းၵေႃႉၼၼ်ႉႁၢႆၶႅၼ်းမႃးဢေႃႈ။ 

၂၃ မိူဝ်ႈဢၼ်ၸဝ်ႈယေႇသုႁွတ်ႈထိုင်ၵႃႈၼႂ်းႁိူၼ်းၵေႃႉဢၼ်ပဵၼ်ၵႄႇပဵၼ်ႁူဝ်ၼၼ်ႉမၼ်းၸဝ်ႈႁၼ်ၶဝ်ၸိူဝ်းဢၼ်ပဝ်ႇပီႇပဝ်ႇၼႄးဢိၵ်ႇတင်းၶဝ်ၸိူဝ်းဢၼ်ဢူၼ်ဢဵၼ်မေႃးမႄးယူႇၼၼ်ႉၸိုင်မၼ်းၸဝ်ႈလၢတ်ႈတီႈၶဝ်လႄႈဝႃႈ၊-

၂၄ ဝေႈပၼ်တၢင်းၵဝ်တႃႉ။ မႄႈယိင်းဢွၼ်ႇၼႆႉတၢႆယဝ်ႉဢမ်ႇၸႂ်ႈ။ မၼ်းၼွၼ်းလပ်းယူႇၵူၺ်း၊ဝႃႈၼင်ႇၼႆဢေႃႈ။ ၶဝ်ၸိူဝ်းၼၼ်ႉႁဵတ်းပျၢၵ်ႈႁဵတ်းၶူဝ်မၼ်းၸဝ်ႈဢေႃႈ။ 

၂၅ မၼ်းၸဝ်ႈႁႂ်ႈၶဝ်ဢွၵ်ႇၵႂႃႇၵႃႈၼွၵ်ႈယဝ်ႉၸင်ႇၶဝ်ႈၵႂႃႇၵႃႈၼႂ်းလုၵ်းလႄႈယိပ်းၵမ်မိုဝ်းမႄႈယိင်းဢွၼ်ႇၼၼ်ႉဢေႃႈ။ 

၂၆ မႄႈယိင်းဢွၼ်ႇၼၼ်ႉလုၵ်ႉမႃးၵမ်းလဵဝ်ဢေႃႈ။ သတၢင်းသဵင်ၶၢဝ်ႇၼၼ်ႉသႃႇႁူင်ၸွတ်ႇဝၢၼ်ႈၸွတ်ႈမိူင်းၵႂႃႇဢေႃႈ။ 

ၵူၼ်းတႃမွတ်ႇၵူၼ်းဢႃႉႁၢႆၶႅၼ်း

၂၇ ၼႂ်းမိူဝ်ႈဢၼ်ၸဝ်ႈယေႇသုလုၵ်ႉသေၵႃႈတီႈၼၼ်ႉၵႂႃႇယူႇၼၼ်ႉၸိုင်ၵူၼ်းတႃမွတ်ႇသွင်ၵေႃႉၸွမ်းပႃႈလင်မၼ်းၸဝ်ႈလႄႈႁွင်ႉပၢဝ်ႇဝႃႈ၊-လုၵ်ႈတႃႇဝိတ်ႉၶႃႈဢိူၺ်း၊ဢိတ်းလူႁဝ်းၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။ 

၂၈ မိူဝ်ႈဢၼ်မၼ်းၸဝ်ႈၶဝ်ႈၵႃႈၼႂ်းႁိူၼ်းၸိုင်ၵူၼ်းတႃမွတ်ႇသွင်ၵေႃႉၼၼ်ႉသုတ်ႉၸပ်းသုတ်ႉၸူးတီႈမၼ်းၸဝ်ႈဢေႃႈ။ မၼ်းၸဝ်ႈၵေႃႈထၢမ်လႄႈဝႃႈ၊-လွင်ႈဢၼ်ၵဝ်တၢတ်ႈၼိုင်ႇႁဵတ်းပဵၼ်လႆႈၼၼ်ႉသူယုမ်ႇႁိုဝ်း၊ဝႃႈၼင်ႇၼႆဢေႃႈ။ ၶဝ်ၵေႃႈလၢတ်ႈလႄႈဝႃႈ၊-ယုမ်ႇၶႃႈဢေႃႈၸဝ်ႈ၊ဝႃႈၼင်ႇၼႆဢေႃႈ။ 

၂၉ မိူဝ်ႈၼၼ်ႉမၼ်းၸဝ်ႈတိူဝ်ႉမၢၵ်ႇတႃၶဝ်လႄႈဝႃႈ၊-ၵႃႈၼင်ႇဢၼ်တၢင်းယုမ်ႇမၢတ်ႈသူမီးၼၼ်ႉႁႂ်ႈပဵၼ်တီႈသူတႃႉ၊ဝႃႈၼင်ႇၼႆဢေႃႈ။ 

၃၀ မိူဝ်ႈၼၼ်ႉမၢၵ်ႇတႃသွင်ၶႃၽုၺ်ႇလႅင်းမႃးၵမ်းလဵဝ်ဢေႃႈ။ ၸဝ်ႈယေႇသုၵေႃႈႁႄႉၶဝ်ႁၢမ်ႈၶဝ်လႄႈဝႃႈ၊-

၃၁ ႁဵတ်းသတိတႃႉ။ ယႃႇႁႂ်ႈၽူႈလႂ်လႆႈႁူႉဝႃႈၼင်ႇၼႆဢေႃႈ။ ၼႂ်းဝႃႈၼၼ်သေၵေႃႈသွင်ၶႃၵႂႃႇလႄႈႁဵတ်းႁႂ်ႈသတၢင်းသဵင်ၶၢဝ်ႇမၼ်းၸဝ်ႈသႃႇႁူင်ၸွတ်ႇၵႂႃႇတင်းဝၢၼ်ႈတင်းမိူင်းဢေႃႈ။ 

၃၂ ဝၢႆးလင်ၶဝ်ဢွၵ်ႇၵႂႃႇယဝ်ႉပိူၼ်ႈဢဝ်ၵူၼ်းဢႃႉဢၼ်ၽီႁၢႆႉၶဝ်ႈၼၼ်ႉၵေႃႉၼိုင်ႈမႃးတီႈမၼ်းၸဝ်ႈဢေႃႈ။ မိူဝ်ႈဢၼ်မၼ်းၸဝ်ႈႁေႃႈၽီႁၢႆႉဢွၵ်ႇပႅတ်ႈယဝ်ႉၵူၼ်းဢႃႉၵေႃႉၼၼ်ႉလၢတ်ႈၵႂၢမ်းလႆႈမႃးၵမ်းလဵဝ်ဢေႃႈ။ 

၃၃ ၵူၼ်းၸူႉၵူၼ်းတုမ်ၸိူဝ်းၼၼ်ႉဢၢမ်းၼႃႇလႄႈဝႃႈ၊-ၵႃႈၼႂ်းၸိူဝ်ႉၶိူဝ်းဢိသရေႇလၼႆႉဢမ်ႇပႆႇတွၼ်ႉလႆႈႁၼ်ၸိူဝ်ႉၼင်ႇၼႆသေပွၵ်ႈ၊ဝႃႈၼႆဢေႃႈ။ 

၃၄ ၽႃႇရိသေးတင်းလၢႆၵေႃႈလၢတ်ႈလႄႈဝႃႈ၊-မၼ်းဢိင်ပိုင်ႈၶုၼ်ၽီႁၢႆႉသေလႄႈႁေႃႈၽီႁၢႆႉတင်းလၢႆဢွၵ်ႇပႅတ်ႈဢေႃႈ၊ဝႃႈၼင်ႇၼႆဢေႃႈ။ 

ၵူၼ်းၸိူဝ်းဢၼ်ပၢတ်ႇၶဝ်ႈမီးၵေႇၼႃႇ

၃၅ ၸဝ်ႈယေႇသုတေႇသႃႉၸႃႇရီႇလႄႇလဵပ်ႈၵူႈဝၢၼ်ႈၵူႈဝဵင်းၵႃႈမီးတင်းသဵင်ႈတင်းလူင်သေလႄႈသင်ႇသွၼ်သုင်းမပၼ်ၵႃႈၼႂ်းၸရွပ်ႈႁေႃးတြႃးႁေႃးလၢတ်ႈတြႃးသတၢင်းသိူဝ်းပျေႃႇဢၼ်ၸၢပ်ႈသႅင်ႇၵၼ်တင်းမိူင်းၸဝ်ႈသေလႄႈႁႂ်ႈတၢင်းၶႆႈတၢင်းပဵၼ်ၵူႈၸိူဝ်ႉၵူႈမဵဝ်းႁၢႆၶႅၼ်းဢေႃႈ။ 

၃၆ မိူဝ်ႈဢၼ်မၼ်းၸဝ်ႈႁၼ်ၵူၼ်းၸူႉၵူၼ်းတုမ်ၸိူဝ်းၼၼ်ႉမၼ်းၸဝ်ႈမီးၸႂ်ဢၼ်ဢိတ်းလူၶဝ်ဢေႃႈ။ လွင်ႈမၼ်းၸမ်းၶဝ်ၸိူဝ်းၼၼ်ႉပဵၼ်ဢၼ်ယၢပ်ႇၸႂ်ၶၢၼ်ၸႂ်ၶၢမ်ႇတၢင်းဢၼ်ပႅတ်ႈဝႆႉမိူၼ်ၸိူဝ်ႉၼင်ႇသူဝ်းဢၼ်ဢမ်ႇမီးၵေႃႉဢၼ်လဵင်ႉဢၼ်လူၼၼ်ႉဢေႃႈ။ 

၃၇ မိူဝ်ႈၼၼ်ႉမၼ်းၸဝ်ႈလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊-ၶဝ်ႈဢၼ်လီပၢတ်ႇၼၼ်ႉမီးၼမ်ၼႃႇဢေႃႈ။ 

၃၈ ၵူၼ်းဢၼ်ပၢတ်ႇၸမ်းမီးၵေႇၼႃႇဢေႃႈ။ ပိူဝ်ႈၼႆလႄႈၼင်ႇႁိူဝ်တၵ်းလႆႈပွႆႇၸႂ်ႉၵူၼ်းဢၼ်တၵ်းပၢတ်ႇၶဝ်ႈမႃးပၢတ်ႇၼၼ်ႉၸိုင်သူးတွင်းတီႈၸဝ်ႈၼႃးတႃႉ၊ဝႃႈၼင်ႇၼႆဢေႃႈ။