Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၅

ဢႃႇၼၼိတင်းသပ်ႉၽိရေႇပႅတ်ႉလႅၼ်

၁ ၼႂ်းဝႃႈၼၼ်သေၵေႃႈၵူၼ်းၵေႃႉၼိုင်ႈဢၼ်လႆႈၸိုဝ်ဢႃႇၼၼိတင်းမေးမၼ်းသပ်ႉၽိရေႇၼၼ်ႉၶဝ်ၶၢႆၵႂၢၵ်ႉလိၼ်သေယဝ်ႉသွင်ၶႃပူႇယႃႈလႆႈၸႂ်သၽေႃးမိူၼ်ၵၼ်လႄႈ

၂ ဢဝ်ငိုၼ်းဢၼ်လႆႈမႃးပုၼ်ႊၼိုင်ႈၼၼ်ႉသိူင်ႇမႅပ်းဝႆႉယဝ်ႉၸင်ႇဢဝ်ငိုၼ်းပုၼ်ႊၼိုင်ႈၵူၺ်းမႃးဝႆႉၵႃႈတီႈႁိမ်းတိၼ်တမၢၼ်ႇၸဝ်ႈၸိူဝ်းၼၼ်ႉဢေႃႈ။

၃ ပေႇတရုၵေႃႈထၢမ်လႄႈဝႃႈ၊-ဢႃႇၼၼိဢိူၺ်း၊ႁဵတ်းသင်လႄႈမႂ်းႁႂ်ၸႃႇတၢၼ်ႇမႃႇၼၢတ်ႈတဵမ်ဝႆႉၼႂ်းႁူဝ်ၸႂ်မႂ်းႁႂ်ႈလႆႈပႅတ်ႉလႅၼ်ဝိၺိၺ်ႇမူတ်းၸၢင်ႇၸဝ်ႈလႄႈဢဝ်ၵႃႊလိၼ်ၼၼ်ႉပုၼ်ႊၼိုင်ႈသိူင်ႇမႅပ်းဝႆႉ။

၄ မိူဝ်ႈဢၼ်မႂ်းဢမ်ႇပႆႇၶၢႆၼၼ်ႉလိၼ်ၼၼ်ႉပဵၼ်ဢၼ်တူဝ်ၸဝ်ႈၵဝ်ႇပိူင်ႇဢမ်ႇၸႂ်ႈႁိုဝ်။ဢၼ်ၶၢႆလႄႈလႆႈမႃးၼၼ်ႉၵေႃႈပဵၼ်တူဝ်ၸဝ်ႈၵဝ်ႇပိူင်ႇဢမ်ႇၸႂ်ႈႁိုဝ်။ႁဵတ်းသင်လႄႈမႂ်းၵျၢမ်ႇပွင်ၸိူဝ်ႉၼႆၵႃႈၼႂ်းၸႂ်မႂ်း။မႂ်းလၢတ်ႈၵႂၢမ်းမူႉသႃႇယဝ်ႉၵႃႈတီႈၵူၼ်းၵူၺ်းဢမ်ႇၸႂ်ႈ။မႂ်းလၢတ်ႈၵႂၢမ်းမူႉသႃႇၵႃႈတီႈၽြႃးပဵၼ်ၸဝ်ႈယဝ်ႉ၊ဝႃႈၼင်ႇၼႆဢေႃႈ။

၅ ဢႃႇၼၼိၼၼ်ႉငိၼ်းၵႂၢမ်းၼၼ်ႉသေယဝ်ႉလူမ်ႉတၢႆၵႂႃႇၵမ်းလဵဝ်ဢေႃႈ။ၶဝ်ၸိူဝ်းဢၼ်လႆႈငိၼ်းလွင်ႈတီႈႁႅင်းၼႆႉၼၼ်ႉတင်းသဵင်ႈတင်းလူင်မီးၸႂ်ဢၼ်ၵူဝ်ႁႄၼႃႇလူင်လၢင်ဢေႃႈ။

၆ ၵူၼ်းဢွၼ်ႇတင်းလၢႆၵေႃႈဢဝ်တင်းၶူဝ်းလဵင်းၶဵၼ်းႁေႃႇတူဝ်တၢႆၼၼ်ႉယဝ်ႉၸင်ႇဢဝ်ၵႂႃႇသၢင်းၵျူဝ်ႇပဵတ်ႈဢေႃႈ။

၇ လိုၼ်းသေၼၼ်ႉသၢမ်ၼႃႇရီႇၸမ်ၸမ်မေးမၼ်းယင်းဢမ်ႇႁူႉလွင်ႈဢၼ်ပဵၼ်ယဝ်ႉၵႃႈတီႈၽူဝ်မၼ်းၼၼ်ႉလႄႈမၼ်းၵေႃႈၶဝ်ႈမႃးဢေႃႈ။ပေႇတရုၵေႃႈထၢမ်မၼ်းလႄႈဝႃႈ၊-သူၶၢႆလိၼ်ၼၼ်ႉလႆႈထၢၼ်ႇၼႆႉၵူၺ်းႁိုဝ်၊လၢတ်ႈၵဝ်လူး၊ဝႃႈၼင်ႇၼႆဢေႃႈ။

၈ မၼ်းၵေႃႈလၢတ်ႈလႄႈဝႃႈ၊-ၸႂ်ႈၶႃႈယဝ်ႉ။လႆႈထၢၼ်ႇၼႆႉၵူၺ်းၶႃႈဢေႃႈ၊ဝႃႈၼင်ႇၼႆဢေႃႈ။ပေႇတရုၵေႃႈလၢတ်ႈတီႈမၼ်းလႄႈဝႃႈ၊-ႁဵတ်းသင်လႄႈသွင်ၶိူဝ်မီးၸႂ်သၽေႃးမိူၼ်ၵၼ်ၵျၢမ်ႇပွင်ႁႂ်ႈလႆႈၸၢမ်းတူၺ်းဝိၺိၺ်ႇမူတ်းၸၢင်ႇၸဝ်ႈၸိူဝ်ႉၼင်ႇၼႆ။

၉ တူၺ်းလူ။ၶဝ်ၸိူဝ်းဢၼ်သၢင်းၵျူဝ်ႇၽူဝ်မႂ်းၼၼ်ႉယင်းမီးယူႇၵႃႈတီႈႁိမ်းၽၵ်းတူၼၼ်ႉလႄႈမႂ်းၵေႃႈၶဝ်တၵ်းဢဝ်ၵႂႃႇလူးၵွၼ်ႇဢေႃႈ၊ဝႃႈၼင်ႇၼႆသေယဝ်ႉမေႈယိင်းၼၼ်ႉလူမ်ႉၵႃႈတီႈႁိမ်းတိၼ်ပေႇတရုလႄႈတၢႆၵႂႃႇၵမ်းလဵဝ်ဢေႃႈ။

၁၀ ၵူၼ်းဢွၼ်ႇၸိူဝ်းၼၼ်ႉၵေႃႈၶဝ်ႈမႃးလႄႈဢဝ်တူဝ်တၢႆမၼ်းၵႂႃႇသၢင်းၵျူဝ်ႇၵႃႈတီႈႁိမ်းၽူဝ်မၼ်းၼၼ်ႉသေဢေႃႈ။

၁၁ ၸႃႉၸဵမ်ၶဝ်ၸိူဝ်းဢၼ်ၶဝ်ႈၸိူဝ်းၸဝ်ႈဢိၵ်ႇတင်းၶဝ်ၸိူဝ်းဢၼ်လႆႈငိၼ်းလွင်ႈတီႈႁႅင်းၼၼ်ႉတင်းသဵင်ႈတင်းလူင်မီးၸႂ်ဢၼ်ၵူဝ်ႁႄၼႃႇလူင်လၢင်ဢေႃႈ။

တမၢၼ်ႇၸဝ်ႈလႂ်ႁႂ်ႈၵူၼ်းပဵၼ်ၼမ်ၼႃႇႁၢႆၶႅၼ်း

၁၂ တမၢၼ်ႇၸဝ်ႈၸိူဝ်းၼၼ်ႉၵေႃႈႁဵတ်းၼီႉမိၵ်ႈလၵ်ႈၶၼႃႇလႂ်၊လွင်ႈတၢင်းဢၼ်လီဢၢမ်းလႂ်၊ၵႃႈတီႈၽၢႆႇၼႃႈၵူၼ်းၼမ်ၼႃႇဢေႃႈ။

၁၃ ၶဝ်တင်းသဵင်ႈတင်းလူင်ယူႇၸွမ်းၵၼ်ၵႃႈတီႈၼႂ်းၸၢၼ်းသေႃးလမုၼ်ႇၼၼ်ႉလႄႈပဵၵ်ႉသမ်ႉၵူၼ်းဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉဢမ်ႇႁတ်းႁဵတ်းၵေႃႉႁဵတ်းသေႈလူၺ်ႈၵၼ်တင်းၶဝ်သေၵေႃႉသေၵူၼ်းသေၵေႃႈၵူၼ်းတင်းလၢႆယွင်ႈယေႃးပၼ်တၢင်းလီၶဝ်ယူႇဢေႃႈ။

၁၄ ၶဝ်ၸိူဝ်းဢၼ်ယုမ်ႇမၢတ်ႈၸဵမ်ယိင်းၸဵမ်ၸၢႆးယဵင်ႈၶႅၼ်းၼမ်မႃးၵိုၼ်းမႃးၼႃႇလူင်လၢင်လႄႈၶဝ်ႈၽၢႆႇၸဝ်ႈၽြႃးဢေႃႈ။

၁၅ ပိူဝ်ႈၼႆလႄႈၼႂ်းမိူဝ်ႈဢၼ်ပေႇတရုယင်းတိုၵ်ႉၸွမ်းတၢင်းၵႂႃႇယူႇၼၼ်ႉၸိုင်ၶဝ်ဢဝ်ၵူၼ်းၶႆႈၵူၼ်းပဵၼ်ဢွၵ်ႇဝႆႉၵႃႈတီႈႁိမ်းတၢင်းလႄႈတၢင်ႇဝႆႉၵႃႈၼိူဝ်ၵူႇလႂ်ၵႃႈၼိူဝ်ၽႃႈၵွပ်းလႂ်သေယဝ်ႉႁႂ်ႈႁူမ်ႊငဝ်းပေႇတရုလႆႈႁူမ်ႇမႅၼ်ႈၵႃႈၼိူဝ်ၶဝ်ဢေႃႈ။

၁၆ ၵူၼ်းဢၼ်မီးယူႇၵႃႈၼႂ်းဝဵင်းၵႃႈတီႈႁိမ်းဝဵင်းၼမ်ၼႃႇၸိူဝ်းၼၼ်ႉၵေႃႈဢဝ်ၶဝ်ၸိူဝ်းဢၼ်မီးတၢင်းၶႆႈတၢင်းပဵၼ်ဢိၵ်ႇတင်းၶဝ်ၸိူဝ်းဢၼ်ၽီႁၢႆႉၼိၵ်ႈၸၢၵ်ႈငႅၼ်းသေးၸိူဝ်းၼၼ်ႉမႃးၸူႉၵၼ်တုမ်ၵၼ်ၵႃႈတီႈဝဵင်းယေႇရုသလႅမ်ႇသေလႄႈႁႂ်ႈတၢင်းၶႆႈတၢင်းပဵၼ်ႁၢႆၶႅၼ်းဢေႃႈ။

တမၢၼ်ႇၸဝ်ႈလႂ်လႆႈၶၢမ်ႇတၢင်းဢၼ်ဢဝ်တၢႆ

၁၇ မိူဝ်ႈၼၼ်ႉၶုၼ်ယိတ်ႉပရေႃးႁိၵ်ႈဢိၵ်ႇတင်းၶဝ်ၸိူဝ်းဢၼ်မီးယူႇလူၺ်ႈၵၼ်တင်းမၼ်းဢၼ်ပဵၼ်ၸုမ်း

၁၈ ၸတ်ႉတုၵေးၸိူဝ်းၼၼ်ႉလုၵ်ႉလႄႈတဵမ်ဝႆႉတင်းတေႃးသႃႉၸႂ်မႆႈသေယဝ်ႉတီႉဢဝ်တမၢၼ်ႇၸဝ်ႈတင်းလၢႆလႄႈၶင်ဝႆႉၵႃႈၼႂ်းထွင်ႇဢေႃႈ။

၁၉ မိူဝ်ႈၶိင်ႇၵၢင်ၶိုၼ်းတမၢၼ်ႇၵၢင်ႁၢဝ်ထႃႇဝရႃႉၽြႃးၽုၺ်ႇၽၵ်းတူထွင်ႇယဝ်ႉၸင်ႇဢဝ်ၶဝ်ဢွၵ်ႇသေလႄႈသင်ႇလၢတ်ႈဝႃႈ၊-

၂၀ ၵႂႃႇၸုၵ်းယူႇၵႃႈၼႂ်းပိၵ်ႉမၢၼ်ႇၸဝ်ႈသေလႄႈႁေႃးလၢတ်ႈၵႂၢမ်းတြႃးတၢင်းဢၼ်ဢသၢၵ်ႈလိပ်းတင်းသဵင်ႈတင်းလူင်ၼၼ်ႉၵႃႈတီႈၵူၼ်းတင်းလၢႆတႃႉ၊ဝႃႈၼင်ႇၼႆဢေႃႈ။

၂၁ မိူဝ်ႈဢၼ်ငိၼ်းၵႂၢမ်းၼၼ်ႉယဝ်ႉၸိုင်ၶိင်ႇမိူင်းလႅင်းၵၢင်ၼႂ်ၸဝ်ႉၸဝ်ႉၶဝ်ၶဝ်ႈၵႃႈၼႂ်းပိၵ်ႉမၢၼ်ႇၸဝ်ႈသေလႄႈသင်ႇသွၼ်သုင်းမႃႉပၼ်ယူႇဢေႃႈ။ၶုၼ်ယိတ်ႉပရေႃးႁိၵ်ႈဢိၵ်ႇတင်းၶဝ်ၸိူဝ်းဢၼ်မီးယူႇလူၺ်ႈၵၼ်တင်းမၼ်းၸိူဝ်းၼၼ်ႉႁႂ်ႈၶုၼ်တီႈလုမ်းလူင်ဢိၵ်ႇတင်းၶဝ်ၸိူဝ်းဢၼ်ပဵၼ်ၵူၼ်းထဝ်ႈၵူၼ်းၵႄႇၵႃႈၼႂ်းၵူၼ်းဢိသရေႇလတင်းလၢႆၸူႉတုမ်ၵၼ်သေယဝ်ႉပွႆႇၸႂ်ႉၵူၼ်းဢွၼ်ႇၵႂႃႇၵႃႈတီႈထွင်ႇလႄႈႁႂ်ႈလႆႈႁွင်ႉဢဝ်တမၢၼ်ႇၸဝ်ႈၸိူဝ်းၼၼ်ႉမႃးဢေႃႈ။

၂၂ ၵူၼ်းဢွၼ်ႇၶုၼ်ၸိူဝ်းၼၼ်ႉၵေႃႈႁွတ်ႈထိုင်ၵႂႃႇၵႃႈတီႈထွင်ႇသေယဝ်ႉၶဝ်ဢမ်ႇထူပ်းဢမ်ႇႁၼ်တမၢၼ်ႇၸဝ်ႈၸိူဝ်းၼၼ်ႉၵႃႈၼႂ်းထွင်ႇၼၼ်ႉလႄႈၶဝ်ၶိုၼ်းမႃးလဝ်ႈလၢတ်ႈလႄႈဝႃႈ၊-

၂၃ ႁဝ်းလႆႈႁၼ်ၽၵ်းတူထွင်ႇဢိုတ်းဝႆႉမီးယူႇလီလီငၢမ်းငၢမ်းယူႇၶႃႈ။ၶဝ်ၸိူဝ်းဢၼ်ပႂ်ႉထွင်ႇၼၼ်ႉၵေႃႈၸုၵ်းယူႇၽၢႆႇတၢင်းၼွၵ်ႈၽၵ်းတူထွင်ႇဝႆႉယူႇၶႃႈ။ၵူၺ်းၵႃႈမိူဝ်ႈဢၼ်ႁဝ်းၽုၺ်ႇထွင်ႇၼၼ်ႉဢမ်ႇႁၼ်ၽူႈလႂ်သေၵေႃႉၵႃႈၼႂ်းထွင်ႇၼၼ်ႉၶႃႈ၊ဝႃႈၼင်ႇၼႆဢေႃႈ။

၂၄ ၵႄႇပိၵ်ႉမၢၼ်ႇၸဝ်ႈတင်းယိတ်ႉပရေႃးႁိၵ်ႈလူင်ၸိူဝ်းၼၼ်ႉငိၼ်းၵႂၢမ်းၼၼ်ႉသေယဝ်ႉဝူၼ်ႉၼႂ်းၸႂ်လႄႈဝႃႈ၊-လွင်ႈတၢင်းၼႆႉတၵ်းပဵၼ်လႆႈၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။

၂၅ မိူဝ်ႈၼၼ်ႉၵူၼ်းၵေႃႉၼိုင်ႈမႃးလႄႈလဝ်ႈလၢတ်ႈဝႃႈ၊-ၶဝ်ၸိူဝ်းဢၼ်သူၸဝ်ႈၶင်ဝႆႉၵႃႈၼႂ်းထွင်ႇၼၼ်ႉၸုၵ်းယူႇၵႃႈၼႂ်းပိၵ်ႉမၢၼ်ႇၸဝ်ႈသေလႄႈသင်ႇသွၼ်သုင်းမႃႉပၼ်ၵူၼ်းတင်းလၢႆယူႇၶႃႈဢေႃႈ၊ဝႃႈၼင်ႇၼႆဢေႃႈ။

၂၆ မိူဝ်ႈၼၼ်ႉၵႄႇပိၵ်ႉမၢၼ်ႇၸဝ်ႈဢိၵ်ႇတင်းၵူၼ်းဢွၼ်ႇၶုၼ်ၸိူဝ်းၼၼ်ႉဢွၼ်ၵၼ်ၵႂႃႇတူၺ်းလႄႈ၊ၶဝ်ယင်းဢမ်ႇႁဵတ်းပႄႉႁဵတ်းၼႅင်ႇလႄႈႁွင်ႉဢဝ်တမၢၼ်ႇၸဝ်ႈၸိူဝ်းၼၼ်ႉမႃး။ၵွပ်ႈပိူဝ်ႈၶဝ်ၵူဝ်ၵူၼ်းတင်းလၢႆတၵ်းဢဝ်မၢၵ်ႇႁိၼ်ထိမ်ႈၶဝ်ၼၼ်ႉဢေႃႈ။

၂၇ ဝႆးသေႁွင်ႉဢဝ်ၶဝ်မႃးလီလီယဝ်ႉ၊ဢဝ်ၶဝ်ဝႆႉၵႃႈတီႈၽၢႆႇၼႃႈၶုၼ်တီႈလုမ်းလူင်တင်းလၢႆသေလႄႈ၊ၶုၼ်ယိတ်ႉပရေႃးႁိၵ်ႈၵေႃႈထၢမ်လႄႈဝႃႈ၊-

၂၈ လွင်ႈၼင်ႇႁိုဝ်သူတၵ်းဢမ်ႇလႆႈဢိင်ပိုင်ႈၼႃႇမႃႉၸိုဝ်သဵင်ၸဝ်ႈယေႇသုသေလႄႈသင်ႇသွၼ်ပၼ်ပိူၼ်ႈၸိုင်ႁဝ်းသင်ႇလၢတ်ႈဝႆႉတီႈသူလီလီငၢမ်းငၢမ်းယဝ်ႉဢမ်ႇၸႂ်ႈႁိုဝ်။တူၺ်းလူ။သူႁႂ်ႈဝဵင်းယေႇရုသလႅမ်ႇၼႆႉတဵမ်ဝႆႉတင်းဢယူႇဝႃႇတႃႉသူၼၼ်ႉယဝ်ႉလႄႈၵျၢမ်ႇပွင်ႁႂ်ႈလိူတ်ႈၵေႃႉၼၼ်ႉႁွတ်ႈမႃးၵႃႈၼိူဝ်ႁူဝ်ႁဝ်းလူင်ပေႇ၊ဝႃႈၼင်ႇၼႆဢေႃႈ။

၂၉ ပေႇတရုတင်းတမၢၼ်ႇၸဝ်ႈၵေႃႉၼၼ်ႉၵေႃႈၶိုၼ်းလၢတ်ႈလႄႈဝႃႈ၊-ႁဝ်းထုၵ်ႇလီထွမ်ႇဢဝ်ၵႂၢမ်းၽြႃးပဵၼ်ၸဝ်ႈၼႃႇသေၵႂၢမ်းၵူၼ်းၶႃႈဢေႃႈ။

၃၀ ၽြႃးပဵၼ်ၸဝ်ႈပူႇပေႃႈႁဝ်းၼၼ်ႉႁႂ်ႈၸဝ်ႈယေႇသုဢၼ်သူဢဝ်တွၵ်ႇၵႃႈၼိူဝ်သဝ်လၵ်းဝႃးမိုဝ်းလႄႈဢဝ်တၢႆၼၼ်ႉလုၵ်ႉၶိုၼ်းမႃးယဝ်ႉ။

၃၁ ၸဝ်ႈၼၼ်ႉၸိုင်ၽြႃးပဵၼ်ၸဝ်ႈၶၢၼ်းဝႆႉၼႂ်းဢရႃႇၸဝ်ႈဢၼ်ဢုပ်ႉပိူင်ႇဢိၵ်ႇတင်းဢရႃႇၸဝ်ႈဢၼ်ၵႄႇၶျွတ်ႈၼၼ်ႉလႄႈယုၵ်ႉယွင်ႈဝႆႉၵႃႈတီႈၽၢႆႇၶႂႃမၼ်းၸဝ်ႈႁႂ်ႈလႆႈပၼ်တြႃးတၢင်းဢၼ်ၶုၵ်းၸႂ်လႆႈမႆႈၸႂ်တင်းဢၶႂၢင်ႉဢၼ်ပွႆႇလွတ်ႈဢပျႅတ်ႈၵႃႈတီႈၵူၼ်းဢိသရေႇလတင်းလၢႆၶႃႈယဝ်ႉ။

၃၂ ႁဝ်းၶႃႈပဵၼ်ၵေႃႉဢၼ်ၶၢမ်ႇသၢၵ်ႈသေႇလွင်ႈတၢင်းၸိူဝ်းၼႆႉၶႃႈဢေႃႈ။ဝိၺိၺ်ႇမူတ်းၸၢင်ႇၸဝ်ႈဢၼ်ၽြႃးပဵၼ်ၸဝ်ႈပၼ်တီႈၶဝ်ၸိူဝ်းဢၼ်ထွမ်ႇဢဝ်ၵႂၢမ်းမၼ်းၸဝ်ႈၼၼ်ႉၵေႃႈပဵၼ်ၵေႃႉဢၼ်ၶၢမ်ႇသၢၵ်ႈသေႇၶႃႈဢေႃႈ၊ဝႃႈၼင်ႇၼႆဢေႃႈ။

၃၃ ၶဝ်လႆႈငိၼ်းၵႂၢမ်းၼၼ်ႉသေယဝ်ႉႁူဝ်ၸႂ်ၶဝ်မိူၼ်ၸိူဝ်ႉၼင်ႇတၵ်းတႅၵ်ႇတၵ်းလႅဝ်ၵႂႃႇလႄႈၵေႃႉၼိုင်ႈလႄႈၵေႃႉၼိုင်ႈတိူင်ႇပၢင်ႇလၢတ်ႈၸႃၵၼ်ႁႂ်ႈလႆႈဢဝ်တမၢၼ်ႇၸဝ်ႈၸိူဝ်းၼၼ်ႉတၢႆဢေႃႈ။

၃၄ မိူဝ်ႈၼၼ်ႉၵူၼ်းၽႃႇရိသႄးဢၼ်လႆႈၸိုဝ်ၵႃႇမလျေႇလဢၼ်ပဵၼ်သြႃႇဢၼ်သွၼ်ပၼ်ၼႂ်းတြႃးၸဝ်ႈလႄႈလႆႈၶၢမ်ႇတၢင်းဢၼ်ၵူၼ်းတင်းလၢႆရူဝ်ႇသေႇၵူဝ်ယမ်ၼၼ်ႉၵေႃႉၼိုင်ႈလုၵ်ႉၵႃႈၼိူဝ်လုမ်းလူင်သေလႄႈမီးဢမိင်ႉႁႂ်ႈတမၢၼ်ႇၸဝ်ႈၸိူဝ်းၼၼ်ႉဢွၵ်ႇၵႂႃႇၵႃႈၼွၵ်ႈၵမ်းၼိုင်ႈယဝ်ႉၸင်ႇလၢတ်ႈလႄႈဝႃႈ၊-

၃၅ ၵူၼ်းဢိသရေႇလၶဝ်ဢိူၺ်း၊လွင်ႈတၢင်းဢၼ်သူတၵ်းႁဵတ်းတီႈၶဝ်ၸိူဝ်ႉၼင်ႇႁိုဝ်ၼၼ်ႉတူဝ်ၸဝ်ႈၵဝ်ႇႁဵတ်းသတိလႄႈၶႆႈၸႂ်ဝူၼ်ႉၸႂ်လီလီသေၵမ်း။လွင်ႈမၼ်းၸမ်းဢွၼ်တၢင်းမိူဝ်ႈၼၼ်ႉမီးၵူၼ်းၵေႃႉၼိုင်ႈဢၼ်လႆႈၸိုဝ်ထုတၼၼ်ႉ၊မၼ်းပေႃႇမႃးလႄႈလၢတ်ႈဝႃႈ၊-

၃၆ ၵဝ်ၼႆႉပဵၼ်ၵူၼ်းထွတ်ႈၵူၼ်းမျၢတ်ႈဢေႃႈ၊ဝႃႈၼင်ႇၼႆလႄႈၵူၼ်းသီႇပၢၵ်ႇၸမ်ၸမ်ၸူႉၵၼ်တုမ်ၵၼ်ပဵၼ်ၽၢႆႇမၼ်းၵႂႃႇဢေႃႈ။ဝၢႆးသေၵေႃႉၼၼ်ႉတၢႆယဝ်ႉ၊ၵူၼ်းဢၼ်ယုမ်ႇမၢတ်ႈမၼ်းၵႃႈမီးၸိူဝ်းၼၼ်ႉၵေႃႈၽၢတ်ႇၽႄၵၼ်လႄႈႁၢႆလၢႆၵႂႃႇဢေႃႈ။

၃၇ ဝၢႆးသေၵေႃႉၼၼ်ႉတၢႆယဝ်ႉၼႂ်းၶိင်ႇမိူဝ်ႈဢၼ်ၵဵပ်းငိုၼ်းၶွၼ်ႇၼၼ်ႉၵူၼ်းမိူင်းၵႃႇလိလႄးၵေႃႉၼိုင်ႈဢၼ်လႆႈၸိုဝ်ယုတၼၼ်ႉၵေႃႈပေႃႇမႃးလႄႈတိုၵ်းယူင်းၸူဝ်းဢဝ်ၵူၼ်းၼမ်ၼႃႇႁႂ်ႈလႆႈၸွမ်းပႃႈလင်မၼ်းဢေႃႈ။ဝၢႆးသေၵေႃႉၼၼ်ႉတၢႆယဝ်ႉၵူၼ်းဢၼ်ယုမ်ႇမၢတ်ႈမၼ်းၵႃႈမီးၸိူဝ်းၼၼ်ႉၵေႃႈႁၢႆလၢႆၵႂႃႇဢေႃႈ။

၃၈ တေႃႈလဵဝ်ၼႆႉၵေႃႈၵဝ်ၶႂ်ႈဝႃႈတီႈသူၸမ်း၊ဝေႈပိူင်ႈၶဝ်ၸိူဝ်းၼႆႉသေလႄႈႁႂ်ႈၶဝ်ယူႇႁင်းၶဝ်သေၵမ်း။တၢင်းၵျၢမ်ႇတၢင်းပွင်ၼႆႉ၊ဢမူႉၼႆႉ၊ပေႃးပဵၼ်တၢင်းၵျၢမ်ႇတၢင်းပွင်ၵူၼ်းဢမူႉၵူၼ်းၸိုင်မၼ်းတၵ်းႁွတ်ႈထိုင်တၢင်းဢၼ်လူႉဢၼ်လႅဝ်ယူႇဢေႃႈ။

၃၉ ၵူၺ်းၵႃႈပေႃးပဵၼ်တၢင်းဢၼ်ၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈၸိုင်သူဢမ်ႇယႃႉပႅတ်ႈလႆႈ။ၵူဝ်သူတၵ်းထူပ်းၺႃးလွင်ႈဢၼ်တူဝ်ၸဝ်ႈၵဝ်ႇပဵၼ်ၵေႃႉဢၼ်တိုၵ်းတေႃးၵၼ်တင်းၽြႃးပဵၼ်ၸဝ်ႈၼၼ်ႉယူႇဢေႃႈ၊ဝႃႈၼင်ႇၼႆဢေႃႈ။

၄၀ ၶဝ်ၵေႃႈထွမ်ႇဢဝ်ၵႂၢမ်းမၼ်းသေယဝ်ႉၶိုၼ်းႁွင်ႉဢဝ်တမၢၼ်ႇၸဝ်ႈၸိူဝ်းၼၼ်ႉမႃးလႄႈပေႃႉယႅၼ်ႉၶဝ်ယဝ်ႉၸင်ႇလွင်ႈၼင်ႇႁိုဝ်ၶဝ်တၵ်းဢမ်ႇလႆႈဢိင်ပိုင်ႈၼႃႇမႃႉၸိုဝ်သဵင်ၸဝ်ႈယေႇသုသေလႄႈႁေႃးလၢတ်ႈၸိုင်ႁၢမ်ႈတၢပ်ႈႁႄႉၶႅၼ်ၶဝ်လႄႈပွႆႇၶဝ်ၵႂႃႇသေဢေႃႈ။

၄၁ တမၢၼ်ႇၸဝ်ႈၸိူဝ်းၼၼ်ႉၵေႃႈၵွပ်ႈပိူဝ်ႈလႆႈၶၢမ်ႇတၢင်းဢၼ်မၼ်းၸဝ်ႈမၢတ်ႈၶဝ်ပဵၼ်ၵေႃႉဢၼ်ၵိုင်ႇထိူၵ်ႈႁႂ်ႈလႆႈႁွတ်ႈထိုင်တၢင်းဢၼ်ၶၢမ်ႇတၢင်းဢူၵ်းတၢင်းဢၢႆၵွပ်ႈပိူဝ်ႈၼႃႇမႃႉၸိုဝ်သဵင်မၼ်းၸဝ်ႈၼၼ်ႉလႄႈၶဝ်မီးတၢင်းဢၼ်ၸူမ်းသိူဝ်းလႄႈဢွၵ်ႇသေၵႃႈၼႂ်းလုမ်းလူင်ၼၼ်ႉၵႂႃႇဢေႃႈ။

၄၂ ၶဝ်သိုပ်ႇလႄႈသင်ႇသွၼ်သုင်းမႃႉႁေႃးလၢတ်ႈတြႃးသတၢင်းသိူဝ်းပျေႃႇလွင်ႈဢၼ်ဝႃႈ၊ၸဝ်ႈယေႇသုပဵၼ်ၸဝ်ႈၶရိၸ်ႉၼၼ်ႉၵႃႈၼႂ်းပိၵ်ႉမၢၼ်ႇၸဝ်ႈဢိၵ်ႇတင်းၵႃႈၼႂ်းႁိူၼ်းၵူႈမိူဝ်ႉၵူႈဝၼ်းဢေႃႈ။