Shan Missions

၁၂

 တၢင်းဢၼ်ႁွင်ႉဢဝ်ဢႃႇပြမ်ႇ

၁ ထႃႇဝရႃႉၽြႃးလၢတ်ႈတီႈဢႃႇပြမ်ႇဝႃႈ၊- ဢွၵ်ႇသေၵႃႈၼႂ်းမိူင်းမႂ်း ဢိၵ်ႇတင်းႁိူၼ်းပေႃႈမႂ်းတင်းၸိူဝ်ႉၶိူဝ်းမႂ်းလႄႈ ၵွႃႇၵႃႈတီႈမိူင်းဢၼ်ၵဝ်တၵ်းၼႄပၼ်တီႈမႂ်း ၼၼ်ႉတႃႉ။

၂ ၵဝ်တၵ်းႁႂ်ႈမႂ်းပဵၼ်မဵဝ်းၵူၼ်းဢၼ်ယႂ်ႇၼႃႇၼၼ်ႉဢေႃႈ။ ၵဝ်တၵ်းပၼ်တၢင်းလီတီႈမႂ်းလႄႈႁႂ်ႈၼႃႇမႃႉၸိုဝ်ႈသဵင်မႂ်းယႂ်ႇမျၢတ်ႈၼႃႇဢေႃႈ။ မႂ်းတၵ်းပဵၼ် ၵေႃႉဢၼ်လႆႈပၼ်တၢင်းလီဢေႃႈ။

၃ ၵဝ်တၵ်းပၼ်တၢင်းလီတီႈၵေႃႉဢၼ်ပၼ်တၢင်းလီတီႈမႂ်းၼၼ်ႉဢေႃႈ။ ၵဝ်တၵ်းၵိၼ်ႇဝႃႈ တီႈၵေႃႉဢၼ်ၵိၼ်ႇဝႃႈမႂ်းၼၼ်ႉဢေႃႈ။ၵူၼ်းမဵဝ်းတင်းသဵင်ႈတင်းလူင် ၵႃႈၼိူဝ်လိၼ်မိူင်းၼႆႉတၵ်းလႆႈၶၢမ်ႇ တၢင်းလီမင်ႇၵလႃႇၵႃႈၼႂ်းမႂ်းဢေႃႈ၊ ဝႃႈၼင်ႇၼႆဢေႃႈ။

၄ ၵႃႈၼင်ႇဢၼ်ထႃႇဝရႃႉၽြႃးမီးဢမိင်ႉၼၼ်ႉဢႃႇပြမ်ႇဢွၵ်ႇၵွႃႇလႄႈ လေႃးတ ၵေႃႈၸွမ်းဢေႃႈ။ မိူဝ်ႈဢၼ်ဢွၵ်ႇသေၵႃႈၼႂ်းဝဵင်း ၶႃႇရၼ်ႇၵွႃႇၼၼ်ႉ ဢႃႇပြမ်ႇ ဢသၢၵ်ႈလႆႈၸဵတ်းသိပ်းပၢႆႁႃႈပီႊ ဢေႃႈ။

၅ ဢႃႇပြမ်ႇ ဢဝ်မေးမၼ်း ၸႃႇရေႇ ဢိၵ်ႇတင်းလၢၼ်ၸၢႆးမၼ်း လေႃးတ တင်းဢုၵ်ႉၸႃႇၶူဝ်းလဵင်းၵႃႈဢၼ်ၶဝ်မီး တင်းၵူၼ်းဢၼ်ၶဝ်လႆႈၵႃႈၼႂ်းဝဵင်းၶႃႇရၼ်ႇ ၸိူဝ်းၼၼ်ႉသေယဝ်ႉဢွၵ်ႇၵွႃႇႁႂ်ႈလႆႈႁွတ်ႈထိုင်ၵႃႈတီႈမိူင်း ၶႃႇၼၼ်ႇ လႄႈႁွတ်ႈထိုင်ၵႃႈတီႈမိူင်းၼၼ်ႉဢေႃႈ။

၆ ဢႃႇပြမ်ႇ ပႆလတ်းၵႃႈၼႂ်းမိူင်းၼၼ်ႉၵွႃႇလႄႈ ႁွတ်ႈထိုင်ၵႃႈတီႈ သိၶိမ်ႇ၊ တီႈတူၼ်ႈမႆႉၼိမ်မေႃႇရေႇၼၼ်ႉဢေႃႈ။ မိူဝ်ႈၼၼ်ႉၵူၼ်း ၶႃႇၼၼ်ႇ တင်းလၢႆမီးယူႇၵႃႈၼႂ်းမိူင်းၼၼ်ႉဢေႃႈ။ ထႃႇဝရႃႉၽြႃးပေႃႇမႃးတီႈဢႃႇပြမ်ႇ လႄႈလၢတ်ႈဝႃႈ၊-ၵဝ်တၵ်းဢဝ်မိူင်းၼႆႉပၼ် တီႈၸိူဝ်ႉၶိူဝ်းမႂ်းဢေႃႈ၊ဝႃႈၼင်ႇၼႆဢေႃႈ။

၇ ၼႂ်းတီႈၼၼ်ႉမၼ်းႁဵတ်းယိၸ်ႉပလၢင်ႇပုၼ်ႈထႃႇဝရႃႉၽြႃး ဢၼ်ပေႃႇမႃးတီႈမၼ်းၼၼ်ႉဢေႃႈ။

၈ မၼ်းသမ်ႉ ဢွၵ်ႇသေၵႃႈၼႂ်းတီႈၼၼ်ႉလႄႈၶၢႆႉၵွႃႇၵႃႈတီႈလွႆဢၼ်မီးၽၢႆႇဝၼ်းဢွၵ်ႇဝဵင်း ပေႇသလ ၼၼ်ႉလႄႈဝဵင်း ပေႇသလ မီးတၢင်းဝၼ်းတူၵ်း၊ဝဵင်း ဢႃႇဢိမီးတၢင်းဝၼ်းဢွၵ်ႇလႄႈ မၼ်းမုင်းသုမ်ႉထဵင်ၵႃႈတီႈၼၼ်ႉသေယဝ်ႉ ႁဵတ်းယိၸ်ႉပလၢင်ႇပုၼ်ႈထႃႇဝရႃႉၽြႃးသေလႄႈ ႁဵတ်းပထၼႃႇတီႈ ၼႃႇမႃႉၸိုဝ်ႈသဵင်ထႃႇ ဝရႃႉၽြႃးဢေႃႈ။

၉ ဢႃႇပြမ်ႇ ၵႂႆႈၶၢႆႉၵႂႆႈၶၢႆႉတီႈယူႇမၼ်းၵွႃႇၸူးၵႃႈတီႈပွတ်းတၢင်းၸၢၼ်းဢေႃႈ။

ဢႃႇပြမ်ႇၼႂ်းမိူင်းဢေႇၵႅပ်ႉတု

၁၀ ဝၢႆးၼၼ်ႉၵႃႈၼႂ်းမိူင်း ၶႃႇၼၼ်ႇ ၼၼ်ႉပဵၼ်တၢင်းဢၼ်ၶဝ်ႈၵႃႊမၢၵ်ႇပႅင်းဢေႃႈ။ၵွပ်ႈပိူဝ်ႈဢၼ်ၶဝ်ႈၵႃႊမၢၵ်ႇပႅင်းၼႃလူင်လၢင်ၼၼ်ႉလႄႈ ဢႃႇပြမ်ႇ သမ်ႉလူင်းၵွႃႇၵႃႈတီႈမိူင်း ဢေႇၵႅပ်ႉတု ႁႂ်ႈလႆႈသွၼ်ႈပိုင်ႈၵႃႈတီႈၼၼ်ႉ ထႅင်ႈဢေႃႈ။

၁၁ မိူဝ်ႈဢၼ်ႁွတ်ႈထိုင်ၵႃႈတီႈဢၼ်ၸမ်တၵ်းၶဝ်ႈၵႃႈၼႂ်းမိူင်း ဢေႇၵႅပ်ႉတု ၼၼ်ႉၸိုင်၊ မၼ်းလၢတ်ႈ တီႈမေးမၼ်း ၸႃႇရေႇ ဝႃႈ၊-

၁၂ တူၺ်းလူ၊ ၵဝ်ႁူႉလွင်ႈဢၼ်မႂ်းပဵၼ်ၽူႈယိင်းဢၼ်ႁၢင်ႊလီၽၢင်လီဢေႃႈ။မိူဝ်ႈဢၼ်ၵူၼ်း ဢေႇၵႅပ်ႉတု ၸိူဝ်းၼၼ်ႉႁၼ်မႂ်းၸိုင်ၶဝ်တၵ်းဝႃႈ၊-ၽူႈယိင်းၼႆႉပဵၼ်မေးမၼ်းဢေႃႈ၊ဝႃႈၼႆလႄႈ ၶဝ်တၵ်းဢဝ်ၵဝ်တၢႆလႄႈပၼ်ဢသၢၵ်ႈမႂ်းၵူၺ်း ၵတ်းယဵၼ်ၶျၢမ်းသႃႇဢေႃႈ။

၁၃ ပိူဝ်ႈၼႆလႄႈ မႂ်းတေႃႈလၢတ်ႈဝႃႈ၊-မႂ်းပဵၼ်ၼွင်ႉယိင်းၵဝ်ဝႃႈၼင်ႇၼႆတႃႉ။ပေႃးလၢတ်ႈၸိူဝ်ႉၼင်ႇၼႆၸိုင် ၶဝ်တၵ်းသိူၵ်ႈသမ်ႇၵဝ်လီလီငၢမ်းငၢမ်းၵွပ်ႈပိူဝ်ႈမႂ်းဢေႃႈ။ၵဝ်တၵ်းလႆႈဢသၢၵ်ႈၵတ်းယဵၼ်ၶျၢမ်းသႃႇ ၵွပ်ႈပိူဝ်ႈၵျေးၸူးမႂ်းဢေႃႈ၊ ဝႃႈၼင်ႇၼႆဢေႃႈ။

၁၄မိူဝ်ႈဢၼ်ဢႃႇပြမ်ႇႁွတ်ႈထိုင်ၵွႃႇၵႃႈတီႈမိူင်းဢေႇၵႅပ်ႉတု ၼၼ်ႉၵူၼ်း ဢေႇၵႅပ်ႉတု တင်းလၢႆႁၼ်လွင်ႈဢၼ်မေးမၼ်း ႁၢင်ႊလီၽၢင်လီၼႃလူင်လၢင် ၼၼ်ႉဢေႃႈ။

၁၅ မူးမၢတ်ႈၽွင်းမိူင်းၶုၼ်ႁေႃၶမ်းတင်းလၢႆၵေႃႈ ႁၼ်မၼ်းႁၢင်ႊလီလႄႈယွင်ႈမၼ်းၵႃႈတီႈၽၢႆႇၼႃႈၶုၼ်ႁေႃၶမ်း ၽႃႇရေႃး သေယဝ်ႉ မၼ်းလႆႈၶၢမ်ႇတၢင်းဢၼ်ဢဝ်သႂၢင်းၶဝ်ႈၵႃႈၼႂ်းႁေႃဢေႃႈ။

၁၆ၶုၼ်ႁေႃၶမ်း ၽႃႇရေႃး ၵေႃႈ ႁဵတ်းၵျေးၸူးတီႈဢႃႇပြမ်ႇ ၵွပ်ႈပိူဝ်ႈၽူႈယိင်းၼၼ်ႉလႄႈမၼ်းလႆႈသူဝ်းလႂ်၊ဝူဝ်းလႂ်၊မႃႉလီႈတူဝ်ပေႃႈတူဝ်မေႈလႂ်၊ ၶႃႈၵူၼ်းၸၢႆး လႂ်၊ၶႃႈၵူၼ်းယိင်းလႂ်တင်းၵလႃႇဢုၵ်ႉလႂ်ဢေႃႈ။

၁၇ ၵွပ်ႈပိူဝ်ႈ ၸႃႇရေႇ၊ မေး ဢႃႇပြမ်ႇ ၼၼ်ႉထႃႇဝရႃႉၽြႃးဢဝ်ၽေးတၢမ်ႇဢၼ်ယႂ်ႇၼႃႇ သင်ႇသွၼ်ၸႃႉၸဵမ်ၶုၼ်ႁေႃၶမ်း ၽႃႇရေႃး ဢိၵ်ႇတင်းၵူၼ်းၵႃႈဢၼ်မီးၵႃႈၼႂ်း ႁေႃမၼ်းၸိူဝ်းၼၼ်ႉဢေႃႈ။

၁၈ ၶုၼ်ႁေႃၶမ်း ၽႃႇရေႃးၵေႃႈႁွင်ႉဢဝ် ဢႃႇပြမ်ႇ လႄႈဝႃႈ၊-လွင်ႈတၢင်းဢၼ်မႂ်းႁဵတ်းတီႈၵဝ်ၼႆႉပဵၼ်ၸိူဝ်ႉၼင်ႇႁိုဝ်။ ႁဵတ်းႁိုဝ်လႄႈမႂ်းဢမ်ႇလၢတ်ႈၵဝ် လွင်ႈဢၼ်ဝႃႈ မၼ်းပဵၼ်မေးမႂ်း ၼၼ်ႉ။

၁၉ ႁဵတ်းသင်လႄႈမႂ်းဝႃႈမၼ်းပဵၼ်ၼွင်ႉယိင်းမႂ်းဝႃႈၼင်ႇၼႆလႄႈႁႂ်ႈၵဝ်ပေႃးလႆႈသိမ်းဢဝ်မၼ်း။ တေႃႈလဵဝ်ၼႆႉၶိုၼ်းဢဝ်မေးမႂ်းလႄႈၵွႃႇတႃႉ၊ဝႃႈၼင်ႇၼႆ ဢေႃႈ။

၂၀ ၼင်ႇၼၼ်လႄႈၶုၼ်ႁေႃၶမ်း ၽႃႇရေႃး ၸီႇယၢင်ႇတီႈၵူၼ်းမၼ်းႁႂ်ႈၶဝ်ဢဝ်ၸႃႉၸဵမ်ဢႃႇပြမ်ႇဢိၵ်ႇတင်းမေးမၼ်း၊ ဢုၵ်ႉၸႃႇၶူဝ်းလဵင်းၵႃႈဢၼ်မီးတီႈမၼ်းၼၼ်ႉလႄႈဢွၵ်ႇမိူင်းၵွႃႇသေဢေႃႈ။