Shan Missions

မၢတ်ႈထႄႇ

Chapter   ၁     ၂     ၃     ၄     ၅     ၆     ၇     ၈     ၉     ၁၀     ၁၁     ၁၂     ၁၃     ၁၄     ၁၅     ၁၆     ၁၇     ၁၈     ၁၉     ၂၀     ၂၁     ၂၂     ၂၃     ၂၄     ၂၅     ၂၆     ၂၇     ၂၈ 

၂၁

ၶီႇမႃႉလီႈၶဝ်ႈဝဵင်းယေႇရုသလႅမ်ႇ

၁ မိူဝ်ႈဢၼ်ၶဝ်ၸမ်ဝဵင်းယေႇရုသလႅမ်ႇတီႈဝၢၼ်ႈပိတ်ႉၽႃႇၵေႇၵႃႈတီႈလွႆသၼ်ႇလုၼ်ႇၼၼ်ႉၸိုင်ၸဝ်ႈယေႇသုပွႆႇၸႂ်ႉတပႄးၸဝ်ႈသွင်ၵေႃႉလႄႈသင်ႇလၢတ်ႈဝႃႈ၊-

၂ သူၵႂႃႇၵႃႈတီႈဝၢၼ်ႈဢၼ်မီးပႃႈၼႃႈသူၼၼ်ႉတႃႉ။ သူတၵ်းထူပ်းႁၼ်မႃႉလီႈမႄႈဢိၵ်ႇတင်းမႃႉလီႈဢွၼ်ႇဢၼ်မတ်ႉဝႆႉၼၼ်ႉဢေႃႈ။ 

၃ ၵႄႈလႄႈဢဝ်မႃးတီႈၵဝ်တႃႉ။ ပေႃးပိူၼ်ႈထၢမ်သူသေၸိူဝ်ႉသေပိူင်ၸိုင်ၶိုၼ်းလၢတ်ႈလႄႈဝႃႈ၊-ၸဝ်ႈႁဝ်းမီးဢလူဝ်ႇဢေႃႈ၊ဝႃႈၼင်ႇၼႆတႃႉ။ ၵေႃႉၼၼ်ႉတၵ်းပၼ်မႃးၵမ်းလဵဝ်ဢေႃႈ၊ဝႃႈၼင်ႇၼႆဢေႃႈ။ 

၄ လွင်ႈတၢင်းၼႆႉၸမ်းၼင်ႇႁိုဝ်ၵႂၢမ်းဢၼ်ဢွၵ်ႇသူပ်းပရေႃးၽႅတ်ႈတၵ်းလႆႈတဵမ်ထူၼ်ႈၸိုင်ၸင်ႇပဵၼ်ဢေႃႈ။ 

၅ ၵႂၢမ်းၼၼ်ႉၸမ်းမီးဝႆႉဝႃႈ၊-လၢတ်ႈတီႈလုၵ်ႈယိင်းသၢဝ်ၸိဢုၼ်ႇလႄႈဝႃႈ၊-တူၺ်းလူႊ၊ၶုၼ်လူင်မႂ်းၼၼ်ႉမီးတင်းၸႂ်ဢၼ်ဢူၼ်ႈဢွၼ်ႇလႄႈၶီႇမႃႉလီႈဢွၼ်ႇမႃးၵႃႈတီႈမႂ်းဢေႃႈ၊ဝႃႈၼင်ႇၼႆဢေႃႈ။ 

၆ တပႄးၸဝ်ႈၸိူဝ်းၼၼ်ႉၵေႃႈၵႂႃႇလႄႈႁဵတ်းၸွမ်းၵႃႈၼင်ႇဢၼ်မၼ်းၸဝ်ႈသင်ႇလၢတ်ႈၼၼ်ႉသေယဝ်ႉ၊

၇ ဢဝ်မႃႉလီႈမႄႈတင်းမႃႉလီႈဢွၼ်ႇမႃးလႄႈဢဝ်ၶူဝ်းၼုင်ႈၶဝ်တၢင်ႇၵႃႈၼိူဝ်လင်မႃႉလီႈၼၼ်ႉယဝ်ႉၸင်ႇမၼ်းၸဝ်ႈၼင်ႈၵႃႈၼိူဝ်ၼၼ်ႉဢေႃႈ။ 

၈ ၵူၼ်းၸူႉၵူၼ်းတုမ်ၼမ်ၼႃႇဢဝ်ၶူဝ်းၼုင်ႈၶဝ်သိူဝ်ႇဝႆႉပူးဝႆႉၵႃႈၼႂ်းသဵၼ်ႈတၢင်းဢေႃႈ။ ၵမ်ႈၽွင်ႈၵေႃႈၽၼ်းၵိင်ႇမႆႉၶူဝ်ႉမႆႉသေလႄႈသိူဝ်ႇဝႆႉပူးဝႆႉၵႃႈၼိူဝ်တၢင်းဢေႃႈ။ 

၉ ၵူၼ်းၸူႉၵူၼ်းတုမ်ဢၼ်ၵႂႃႇပႃႈၼႃႈလႂ်ဢၼ်ၸွမ်းပႃႈလင်လႂ်ၸိူဝ်းၼၼ်ႉၵေႃႈႁွင်ႉသႅၼ်ႇလႄႈဝႃႈ၊-ႁႂ်ႈပဵၼ်ႁူဝ်းသၼ်ႇၼတီႈလုၵ်ႈတႃႇဝိတ်ႉၼႆႉသေၵမ်းလူၺ်ႈ။ ႁႂ်ႈၸဝ်ႈဢၼ်ပႃးတင်းဢၶႂၢင်ႉၽြႃးပဵၼ်ၸဝ်ႈလႄႈမႃးၼႆႉမီးမင်ႇၵလႃႇသေၵမ်းလူၺ်ႈ။ ႁႂ်ႈပဵၼ်ႁူဝ်းသၼ်ႇၼၵႃႈၼိူဝ်ၸိၵ်းၸွမ်ၵၢင်ႁၢဝ်ပုၼ်ႉသေၵမ်းလူၺ်ႈ၊ဝႃႈၼင်ႇၼႆဢေႃႈ။ 

၁၀ မိူဝ်ႈဢၼ်မၼ်းၸဝ်ႈၶဝ်ႈၵႃႈၼႂ်းဝဵင်းယေႇရုသလႅမ်ႇၼၼ်ႉၵူၼ်းတင်းဝဵင်းပဵၼ်တၢင်းဢၼ်ဢူၼ်ဢဵၼ်မေႃးမႄးၵႂင်ၸႂ်ယုင်ႈၸႂ်လႄႈတွင်ႈထၢမ်လႄႈဝႃႈ၊-ၵေႃႉၼႆႉပဵၼ်ၽူႈလႂ်ဝႃႈၼင်ႇၼႆဢေႃႈ။ 

၁၁ ၵူၼ်းၸူႉၵူၼ်းတုမ်ၸိူဝ်းၼၼ်ႉၵေႃႈလၢတ်ႈလႄႈဝႃႈ၊-ၵေႃႉၼႆႉပဵၼ်ပရေႃးၽႅတ်ႈယေႇသုဢၼ်ပေႃႇမႃးၵႃႈၼႂ်းဝဵင်းၼႃႇၸရႅတ်ႉမိူင်းၵႃႇလိလႄးၼၼ်ႉဢေႃႈ၊ဝႃႈၼင်ႇၼႆဢေႃႈ။ 

ၼႂ်းၵျွင်းပိၵ်ႉမၢၼ်ႇၽြႃးပဵၼ်ၸဝ်ႈ

၁၂ ၸဝ်ႈယေႇသုၶဝ်ႈၵႂႃႇၵႃႈၼႂ်းပိၵ်ႉမၢၼ်ႇၽြႃးပဵၼ်ၸဝ်ႈသေယဝ်ႉႁေႃႈႁိုပ်ႉၶဝ်ၸိူဝ်းဢၼ်ႁဵတ်းသိုဝ်ႉႁဵတ်းၶၢႆၵႃႈၼႂ်းပိၵ်ႉမၢၼ်ႇၸဝ်ႈၼၼ်ႉဢွၵ်ႇပႅတ်ႈလႄႈပိၼ်ႈလူမ်ႉၽိူၼ်ၶဝ်ၸိူဝ်းဢၼ်လႅၵ်ႈငိုၼ်းတီႈၼင်ႈၶဝ်ၸိူဝ်းဢၼ်ၶၢႆၼူၵ်ႉတူႈၸိူဝ်းၼၼ်ႉပႅတ်ႈလႄႈဝႃႈ၊-

၁၃ ႁိူၼ်းၵဝ်ၼႆႉတၵ်းလႆႈၶၢမ်ႇတၢင်းဢၼ်ႁွင်ႉႁိၵ်ႈႁိူၼ်းတီႈဢၼ်သူးတွင်းဢေႃႈ။ ၼႂ်းဝႃႈၼၼ်သေၵေႃႈသူဢွၼ်ၵၼ်ႁဵတ်းႁႂ်ႈမၼ်းပဵၼ်ထမ်ႈၸူၼ်ယဝ်ႉလူင်ပေႇ၊ဝႃႈၼႆ၊တႅမ်ႈဝႆႉၼႂ်းၵျၢမ်းလိၵ်ႈၸိူဝ်ႉၼင်ႇၼႆယဝ်ႉ၊ဝႃႈၼင်ႇၼႆဢေႃႈ။ 

၁၄ မိူဝ်ႈၼၼ်ႉၶဝ်ၸိူဝ်းဢၼ်တႃမွတ်ႇဢိၵ်ႇတင်းၶဝ်ၸိူဝ်းဢၼ်တိၼ်ဢမ်ႇလီတင်းလၢႆမႃးတီႈမၼ်းၸဝ်ႈၵႃႈၼႂ်းပိၵ်ႉမၢၼ်ႇလႄႈမၼ်းၸဝ်ႈႁႂ်ႈတၢင်းၶႆႈတၢင်းပဵၼ်ၶဝ်ႁၢႆၶႅၼ်းဢေႃႈ။ 

၁၅ မိူဝ်ႈဢၼ်ယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတင်းလၢႆႁူႉႁၼ်လွင်ႈတၢင်းဢၼ်လီဢၢမ်းဢၼ်မၼ်းၸဝ်ႈႁဵတ်းၸိူဝ်းၼၼ်ႉဢိၵ်ႇတင်းလွင်ႈဢၼ်လုၵ်ႈဢွၼ်ႇတင်းလၢႆႁွင်ႉသႅၼ်ႇၵႃႈၼႂ်းပိၵ်ႉမၢၼ်ႇမၼ်းၸဝ်ႈဝႃႈ၊-ႁႂ်ႈပဵၼ်ႁူဝ်းသၼ်ႇၼႃႉတီႈလုၵ်ႈတႃႇဝိတ်ႉသေၵမ်းလူၺ်ႈ၊ဝႃႈၼင်ႇၼႆၼၼ်ႉၸိုင်ၶဝ်ၸႂ်မႆႈၶႆႈၸႃႉလႄႈထၢမ်တီႈမၼ်းၸဝ်ႈလႄႈဝႃႈ၊-လွင်ႈဢၼ်ၶဝ်လၢတ်ႈၸိူဝ်ႉၼင်ႇႁိုဝ်ၼၼ်ႉမႂ်းငိၼ်းယူႇဢမ်ႇၸႂ်ႈႁိုဝ်၊ဝႃႈၼင်ႇၼႆဢေႃႈ။ 

၁၆ ၸဝ်ႈယေႇသုၵေႃႈလၢတ်ႈလႄႈဝႃႈ၊-ၸႂ်ႈယဝ်ႉ။ သူဢမ်ႇယၢမ်ႈလႆႈၽတ်းၵႂၢမ်းဢၼ်မီးမႃးလႄႈဝႃႈ၊-ၸဝ်ႈႁဝ်းမႄးဝႆႉတၢင်းဢၼ်ယွင်ႈယေႃးၵႃႈၼႂ်းသူပ်းလုၵ်ႈဢွၼ်ႇတင်းၶဝ်ၸိူဝ်းဢၼ်ၵိၼ်ၼူမ်းတင်းလၢႆၼၼ်ႉၶႃႈဢေႃႈ၊ဝႃႈၼင်ႇၼႆၼၼ်ႉႁိုဝ်၊ဝႃႈၼင်ႇၼႆဢေႃႈ။ 

၁၇ မၼ်းၸဝ်ႈပႅတ်ႈဝႆႉၶဝ်သေယဝ်ႉဢွၵ်ႇၵႂႃႇၵႃႈၼွၵ်ႈဝဵင်းယဝ်ႉၸင်ႇႁွတ်ႈထိုင်ၵႃႈတီႈဝၢၼ်ႈပေႇထၼိပုၼ်ႉလႄႈၼွၼ်းၵႃႈတီႈၼၼ်ႉၶမ်ႈၼိုင်ႈဢေႃႈ။ 

တူၼ်ႈမၢၵ်ႇလိူဝ်ႇသၢင်းၽေႃးႁဵဝ်ႇႁႅင်ႈၵွႃႇ

၁၈ ၶိင်ႇၵၢင်ၼႂ်ၼႂ်းမိူဝ်ႈဢၼ်မၼ်းၸဝ်ႈယင်းတိုၵ်ႉၶိုၼ်းမိူဝ်းၸူးၵႃႈတီႈဝဵင်းယူႇၼၼ်ႉၸိုင်မၼ်းၸဝ်ႈတွင်ႉမႆႈဢေႃႈ။ 

၁၉ မၼ်းၸဝ်ႈႁၼ်တူၼ်ႈမၢၵ်ႇလိူဝ်ႇသၢင်းၽေႃးတူၼ်ႈၼိုင်ႈၵႃႈတီႈႁိမ်းတၢင်းၼၼ်ႉလႄႈၵႂႃႇၸူးၵႃႈတီႈတူၼ်ႈၼၼ်ႉဢေႃႈ။ မိူဝ်ႈဢၼ်ႁၼ်မီးမႂ်ႊမၼ်းၵူၺ်းၼၼ်ႉၸိုင်မၼ်းၸဝ်ႈလၢတ်ႈဝႃႈ၊-ၸႃႉၸဵမ်မိူဝ်ႈလဵဝ်ၼႆႉၵႂႃႇယႃႇႁႂ်ႈမႂ်းလႆႈမၢၵ်ႇသေပွၵ်ႈ၊ဝႃႈၼင်ႇၼႆဢေႃႈ။ 

၂၀ ၶိင်ႇၼၼ်ႉၵမ်းလဵဝ်တူၼ်ႈၼၼ်ႉႁဵဝ်ႇႁႅင်ႈၵႂႃႇဢေႃႈ။ တပႄးၸဝ်ႈတင်းလၢႆႁၼ်သေယဝ်ႉဢွၼ်ၵၼ်ဢၢမ်းလႄႈဝႃႈ၊-ႁဵတ်းၸိူဝ်ႉၼင်ႇႁိုဝ်လႄႈတူၼ်ႈမၢၵ်ႇလိူဝ်ႇသၢင်းၽေႃးၼၼ်ႉႁဵဝ်ႇႁႅင်ႈၵႂႃႇၵမ်းလဵဝ်၊ဝႃႈၼင်ႇၼႆဢေႃႈ။ 

၂၁ ၸဝ်ႈယေႇသုၵေႃႈလၢတ်ႈလႄႈဝႃႈ၊-ၵဝ်ဝႃႈတီႈၸိုဝ်ႈတီႈၸႂ်ႈၸမ်းပေႃးသူမီးတၢင်းယုမ်ႇမၢတ်ႈလႄႈၵၢင်းလွတ်ႈတင်းတၢင်းဢၼ်ယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈၸိုင်သူႁဵတ်းၸိူဝ်ႉၼင်ႇဢၼ်ႁဵတ်းတီႈတူၼ်ႈမၢၵ်ႇလိူဝ်ႇသၢင်းၽေႃးၼၼ်ႉလႆႈယူႇၵူၺ်းဢမ်ႇၵႃးပေႃးလၢတ်ႈတီႈလွႆၼႆႉလႄႈဝႃႈ၊-ၶၢႆႉတီႈမႂ်းတႃႉ။ တူၵ်းၵႃႈၼႂ်းပၢင်ႇလၢႆႇပုၼ်ႉတႃႉ၊ဝႃႈၼႆၵေႃႈတၵ်းပဵၼ်ဢေႃႈ။ 

၂၂ ၵႃႈဢၼ်သူမီးတၢင်းဢၼ်ယုမ်ႇမၢတ်ႈလႄႈသူးတွင်းယွၼ်းတင်းသဵင်ႈတင်းလူင်ၼၼ်ႉသူတၵ်းလႆႈဢေႃႈ၊ဝႃႈၼင်ႇၼႆဢေႃႈ။ 

ဢႃႇၼႃႇတၼ်းၶူဝ်းၸဝ်ႈယေႇသု

၂၃ မိူဝ်ႈဢၼ်မၼ်းၸဝ်ႈၶိုၼ်းၶဝ်ႈၵႃႈၼႂ်းပိၵ်ႉမၢၼ်ႇၸဝ်ႈလႄႈသင်ႇသွၼ်သုင်းမပၼ်ယူႇၼၼ်ႉၸိုင်ယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆသုတ်ႉၸပ်းသုတ်ႉၸူးတီႈမၼ်းၸဝ်ႈလႄႈလဝ်ထၢမ်လႄႈဝႃႈ၊-ၸဝ်ႈႁဝ်းဢဝ်တင်းဢၶႂၢင်ႉဢၼ်လႂ်လႄႈႁဵတ်းလွင်ႈတၢင်းၸိူဝ်းၼႆႉၶႃႈ။ ၽူႈလႂ်ပၼ်ဢၶႂၢင်ႉၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-

၂၄ ၵဝ်တၵ်းထၢမ်သူမဵဝ်းၼိုင်ႈလူးၵွၼ်ႇ။ ပေႃးသူၶိုၼ်းလၢတ်ႈပၼ်ၵဝ်ၸိုင်ၵဝ်တၵ်းလၢတ်ႈပၼ်တီႈသူလွင်ႈဢၼ်ၵဝ်ဢဝ်တင်းဢၶႂၢင်ႉဢၼ်လႂ်လႄႈႁဵတ်းလွင်ႈတၢင်းၸိူဝ်းၼႆႉၼၼ်ႉဢေႃႈ။ 

၂၅ ပပ်ႉတိၸၢမ်ႇယုဝ်းႁၢၼ်ႇၼၼ်ႉလုၵ်ႉၵႃႈတီႈလႂ်မႃး။ လုၵ်ႉၵႃႈတီႈၵၢင်ႁၢဝ်မႃးႁိုဝ်။ 

၂၆ လုၵ်ႉၵႃႈတီႈၵူၼ်းမႃးႁိုဝ်၊ဝႃႈၼင်ႇၼႆဢေႃႈ။ ၶဝ်ၼၼ်ႉၼင်ႇၵၼ်ၵၼ်ၽွမ်ႉၵၼ်ၶႆႈၸႂ်လႄႈဝႃႈ၊-ပေႃးႁဝ်ႈဝႃႈလုၵ်ႉၵႃႈတီႈၵၢင်ႁၢဝ်မႃး၊ဝႃႈၼႆၸိုင်၊မၼ်းၸဝ်ႈသမ်ႉတၵ်းထၢမ်ႁဝ်းဝႃႈ၊-ႁဵတ်းသင်လႄႈသူဢမ်ႇယုမ်ႇမၢတ်ႈမၼ်း၊ဝႃႈၼင်ႇၼႆဢိူဝ်ႈ။ ပေႃးႁဝ်းဝႃႈ၊-လုၵ်ႉၵႃႈတီႈၵူၼ်းမႃး၊ဝႃႈၼႆၸိုင်၊ႁဝ်းသမ်ႉၵူဝ်ၵူၼ်းၸူႉၵူၼ်းတုမ်ၸိူဝ်းၼႆႉဢိူဝ်ႈ။ လွင်ႈမၼ်းၸမ်းၵူၼ်းတင်းသဵင်ႈတင်းႁပ်ႉဝႃႈယုဝ်းႁၢၼ်ႇပဵၼ်ပရေႃးၽႅတ်ႈဢေႃႈ။ 

၂၇ ၶဝ်ၶိုၼ်းလၢတ်ႈတီႈၸဝ်ႈယေႇသုဝႃႈ၊-ႁဝ်းၶႃႈဢမ်ႇႁူႉၶႃႈ၊ဝႃႈၼင်ႇၼႆဢေႃႈ။ မၼ်းၸဝ်ႈၵေႃႈလၢတ်ႈဝႃႈ၊-ၵဝ်ၵေႃႈဢမ်ႇလၢတ်ႈတီႈသူလွင်ႈဢၼ်ၵဝ်ဢဝ်ဢၶႂၢင်ႉဢၼ်လႂ်လႄႈႁဵတ်းလွင်ႈတၢင်းၸိူဝ်းၼႆႉဢၼ်ဝႃႈၼၼ်ႉ၊ဝႃႈၼင်ႇၼႆဢေႃႈ။ 

ဢူႉပမႃႇလုၵ်ႈၸၢႆးသွင်ၵေႃႉ

၂၈ သူထၢင်ႇၸိူဝ်ႉၼင်ႇႁိုဝ်။ ၵူၼ်းၵေႃႉၼိုင်ႈမီးလုၵ်ႈၸၢႆးသွင်ၵေႃႉဢေႃႈ။ မၼ်းၵႂႃႇၵႃႈတီႈလုၵ်ႈၸၢႆးလူင်မၼ်းသေလႄႈဝႃႈ၊-လုၵ်ႈၸၢႆးဢိူၺ်း၊မိူဝ်ႈၼႆႉၵႂႃႇႁဵတ်းၵၢၼ်ၵႃႈၼႂ်းသူၼ်မၢၵ်ႇၸပိတ်ႉပုၼ်ႉတႃႉ၊မိူဝ်ႈဢၼ်ဝႃႈၼင်ႇၼႆၸိုင်၊လုၵ်ႈၸၢႆးလူင်ၼၼ်ႉၶိုၼ်းလၢတ်ႈလႄႈဝႃႈ၊-

၂၉ ၵဝ်ဢမ်ႇၵႂႃႇဝႃႈၼႆသေၵေႃႈယႃႇလိုၼ်းၼၼ်ႉမၼ်းသမ်ႉၶုၵ်းၸႂ်လႆႈမႆႈၸႂ်လႄႈၵႂႃႇႁဵတ်းဢေႃႈ။ 

၃၀ ပေႃႈၼၼ်ႉသမ်ႉၵႂႃႇၵႃႈတီႈလုၵ်ႈၸၢႆးဢွၼ်ႇလႄႈလၢတ်ႈၸိူဝ်ႉၼင်ႇၵမ်းဢွၼ်တၢင်းၼၼ်ႉဢေႃႈ။ လုၵ်ႈၸၢႆးဢွၼ်ႇၼၼ်ႉလၢတ်ႈဝႃႈ၊-

၃၁ တၵ်းၵႂႃႇၶႃႈဢေႃႈပေႃႈ၊ဝႃႈၼင်ႇၼႆၵေႃႈယႃႇယင်းဢမ်ႇၵႂႃႇလႄႈယူႇဢေႃႈ။ ၼႂ်းလုၵ်ႈၸၢႆးသွင်ၵေႃႉၼၼ်ႉၵေႃႉလႂ်ပဵၼ်ၵေႃႉဢၼ်ႁဵတ်းၸွမ်းဢလူဝ်ႇပေႃႈၶဝ်၊မိူဝ်ႈဢၼ်မၼ်းၸဝ်ႈထၢမ်ၸိူဝ်ႉၼင်ႇၼၼ်ၸိုင်ၶဝ်ၵေႃႈလဝ်လၢတ်ႈလႄႈဝႃႈ၊-လုၵ်ႈၸၢႆးလူင်ႁဵတ်းၶႃႈဢေႃႈ၊ဝႃႈၼင်ႇၼႆဢေႃႈ။ ၸဝ်ႈယေႇသုၵေႃႈလၢတ်ႈလႄႈဝႃႈ၊-ၵဝ်ဝႃႈတီႈၸိုဝ်ႈတီႈၸႂ်ႈၸမ်းၵူၼ်းၵဵပ်းၶွၼ်ႇဢိၵ်ႇတင်းမႄႈမွၵ်ႇယႃႈယင်းၸၢင်ႊၶဝ်ႈၼႂ်းမိူင်းၽြႃးပဵၼ်ၸဝ်ႈဢွၼ်ႈတၢင်းသူဢေႃႈ။ 

၃၂ လွင်ႈမၼ်းၸမ်းပဵၵ်ႉသမ်ႉယုဝ်းႁၢၼ်ႇၸွမ်းသဵၼ်ႈတၢင်းဢၼ်သိုဝ်ႈတေႃႇလႄႈမႃးတီႈသူသေၵေႃႈသူဢမ်ႇယုမ်ႇမၢတ်ႈမၼ်း။ ပဵၵ်ႉသမ်ႉသူႁၼ်လွင်ႈတၢင်းၼၼ်ႉသေၵေႃႈသူဢမ်ႇၶုၵ်းၸႂ်လႆႈမႆႈၸႂ်ႁႂ်ႈလႆႈယုမ်ႇမၢတ်ႈ။ ၵူၼ်းၵဵပ်းၶွၼ်ႇတင်းမႄႈမွၵ်ႇယႃႈၸိူဝ်းၼၼ်ႉယုမ်ႇမၢတ်ႈဢေႃႈ။ 

ဢူႉပမႃႇၵူၼ်းဢၼ်ၶၢတ်ႈသူၼ်

၃၃ ထွမ်ႇၵႂၢမ်းဢူႉပမႃႇတၢင်ႇၸိူဝ်ႉတၢင်ႇဢၼ်တႃႉ။ ၸဝ်ႈႁိူၼ်းၵေႃႉၼိုင်ႈႁဵတ်းသူၼ်မၢၵ်ႇၸပိတ်ႉလႄႈႁဵတ်းႁူဝ်ႉလွမ်ႉႁွပ်ႈဝႆႉၶူတ်ႉႁၢင်းတီႈဢၼ်တၵ်းယဵပ်ႇမၢၵ်ႇၸပိတ်ႉလႄႈပုၵ်းထဵင်လင်ဝႆႉယဝ်ႉၸင်ႇၶၢတ်ႈသူၼ်ၼၼ်ႉပၼ်တီႈၶဝ်ၸိူဝ်းဢၼ်ႁဵတ်းသူၼ်တင်းလၢႆယဝ်ႉၸင်ႇၵႂႃႇတၢင်ႇဝၢၼ်ႈတၢင်ႇမိူင်းသေဢေႃႈ။ 

၃၄ မိူဝ်ႈဢၼ်ၸမ်တၵ်းႁွတ်ႈထိုင်ၶိင်ႇဢၼ်ဢွၵ်ႇမၢၵ်ႇၼၼ်ႉမၼ်းပွႆႇၸႂ်ႉၵူၼ်းဢွၼ်ႇမၼ်းတင်းလၢႆၵႂႃႇၵႃႈတီႈၶဝ်ၸိူဝ်းဢၼ်ၶၢတ်ႈႁဵတ်းသူၼ်ၼၼ်ႉလႄႈႁႂ်ႈလႆႈဢဝ်မၢၵ်ႇၸပိတ်ႉဢေႃႈ။ 

၃၅ ၵူၼ်းႁဵတ်းသူၼ်ၸိူဝ်းၼၼ်ႉတီႉဢဝ်ၵူၼ်းဢွၼ်ႇၸိူဝ်းၼၼ်ႉသေယဝ်ႉပေႃႉယႅၼ်ႉၵေႃႉၼိုင်ႈဢဝ်တၢႆၵေႃႉၼိုင်ႈဢဝ်မၢၵ်ႇႁိၼ်ထိမ်ႈၵေႃႉၼိုင်ႈဢေႃႈ။ 

၃၆ လိုၼ်းၼၼ်ႉမၼ်းသမ်ႉၶိုၼ်းပွႆႇၸႂ်ႉၵူၼ်းဢွၼ်ႇၼမ်ၼႃႇသေၵမ်းဢွၼ်တၢင်းၼၼ်ႉၵႂႃႇထႅင်ႈဢေႃႈ။ ၶဝ်ၸိူဝ်းဢၼ်ႁဵတ်းသူၼ်ၼၼ်ႉၵေႃႈႁဵတ်းၸိူဝ်ႉၼင်ႇၵမ်းဢွၼ်တၢင်းၼၼ်ႉဢေႃႈ။ 

၃၇ ပွၵ်ႈလိုၼ်းလင်သုတ်းမၼ်းပွႆႇၸႂ်ႉလုၵ်ႈၸၢႆးတူဝ်ၸဝ်ႈၵဝ်ႇၵႂႃႇဢေႃႈ။ မၼ်းဝႃႈ၊-ၶဝ်တၵ်းရူဝ်ႇသေႇၵူဝ်ယမ်လုၵ်ႈၸၢႆးၵဝ်ယူႇဢိူဝ်ႈ၊ဝႃႈၼင်ႇၼႆၼႆဢေႃႈ။ 

၃၈ ၶဝ်ၸိူဝ်းဢၼ်ၶၢတ်ႈသူၼ်ၼၼ်ႉမိူဝ်ႈဢၼ်ႁၼ်လုၵ်ႈၸၢႆးၸဝ်ႈသူၼ်မႃးယူႇၼၼ်ႉၸိုင်ၶဝ်ၵေႃႉၼိုင်ႈလႄႈၵေႃႉၼိုင်ႈတိူင်ႇပၢင်ႇလၢတ်ႈၸႃၵၼ်လႄႈဝႃႈ၊-

၃၉ ၵေႃႉၼႆႉပဵၼ်ၵေႃႉဢၼ်တၵ်းလႆႈၶၢမ်ႇဢမူၺ်ႇပေႃႈမၼ်းဢိူဝ်း။ မႃးမႃးဢိူၺ်း။ ဢဝ်မၼ်းတၢႆလႄႈဢဝ်ဢမူၺ်ႇမၼ်းတႃႉႁဝ်း၊ဝႃႈၼင်ႇၼႆသေယဝ်ႉၶဝ်တီႉဢဝ်မၼ်းဢဝ်ဢွၵ်ႇၵႃႈတီႈၼွၵ်ႈသူၼ်လႄႈဢဝ်တၢႆပႅတ်ႈဢေႃႈ။ 

၄၀ ပေႃးပဵၼ်ၸိူဝ်ႉၼင်ႇၼႆၸိုင်မိူဝ်ႈဢၼ်ၸဝ်ႈသူၼ်မႃးၼၼ်ႉမၼ်တၵ်းႁဵတ်းတီႈၶဝ်ၸိူဝ်းဢၼ်ၶၢတ်ႈသူၼ်ၼၼ်ႉၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။ ပရိၵ်ႈသၢတ်ႈၸိူဝ်းၼၼ်ႉၵေႃႈလဝ်လၢတ်ႈလႄႈဝႃႈ၊-မၼ်းတၵ်းမႃးယႃႉၽဵဝ်ႈပႅတ်ႈၵူၼ်းဢၼ်ႁၢႆႉၸိူဝ်းၼၼ်ႉလႄႈႁႂ်ႈၶဝ်လႆႈႁွတ်ႈထိုင်တၢင်းဢၼ်လူႉလႅဝ်ၶႃႈဢေႃႈ။ 

၄၁ တၵ်းဢဝ်သူၼ်မၢၵ်ႇၸပိတ်ႉၼၼ်ႉၶၢတ်ႈပၼ်တီႈပိူၼ်ႈတၢင်ႇၵေႃႉဢၼ်တၵ်းပၼ်မၢၵ်ႇမၼ်းၼႂ်းၶိင်ႇမိူဝ်ႈဢၼ်မီးမၢၵ်ႇၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။ 

၄၂ ၸဝ်ႈယေႇသုၵေႃႈလၢတ်ႈလႄႈဝႃႈ၊-သူဢမ်ႇယၢမ်ႈလႆႈၽတ်းၼႂ်းၵျၢမ်းလိၵ်ႈဢၼ်ဝႃႈ၊-မၢၵ်ႇႁိၼ်ဢၼ်ၵူၼ်းႁဵတ်းတိူၵ်ႈၶဝ်ပႅတ်ႈဝႆႉၼၼ်ႉၵမ်းလိုၼ်းပဵၼ်ႁူဝ်ၸဵင်ႇတိူၵ်ႈဢေႃႈ။ လွင်ႈတီႈႁႅင်းၼႆႉပဵၼ်တီႈဢၼ်ထႃႇဝရႃႉၽြႃးႁဵတ်းဝႆႉဢေႃႈ။ ၵႃႈတႂ်ႈတႃႁဝ်းၼႆႉၵေႃႈပဵၼ်ဢၼ်လီဢၢမ်းဢေႃႈ၊ဝႃႈၼင်ႇၼႆၼၼ်ႉႁိုဝ်။ 

၄၃ ပိူဝ်ႈၼႆလႄႈၵဝ်ဝႃႈတီႈသူၸမ်းတၵ်းၼုၵ်ႈဢဝ်မိူင်းၽြႃးပဵၼ်ၸဝ်ႈတီႈသူသေလႄႈပၼ်တီႈမဵဝ်းၵူၼ်းဢၼ်တၵ်းမၢၵ်ႇမၢၵ်ႇမိူင်းၸဝ်ႈၼၼ်ႉဢေႃႈ။ 

၄၄ ၽူႈလႂ်သေဢမ်ႇဝႃႈၵေႃႉဢၼ်တူၵ်းသႂ်ႇၵႃႈၼိူဝ်မၢၵ်ႇႁိၼ်ၼႆႉၼၼ်ႉၵေႃႉၼၼ်ႉတၵ်းႁၵ်းဢေႃႈ။ ၵႃႈၼိူဝ်ၽူႈလႂ်ၵေႃႈဢၼ်မၢၵ်ႇႁိၼ်ၼႆႉတူၵ်းသႂ်ႇၼၼ်ႉၵေႃႉၼၼ်ႉတၵ်းလႅဝ်ပဵၼ်မုၼ်ႈပဵၼ်ၽွင်ၵႂႃႇဢေႃႈ၊ဝႃႈၼင်ႇၼႆဢေႃႈ။ 

၄၅ မိူဝ်ႈဢၼ်ယိတ်ႉပရေႃးႁိၵ်ႈလူင်ဢိၵ်ႇတင်းၽႃႇရိသေးတင်းလၢႆလႆႈငိၼ်းၵႂၢမ်းဢူႉပမႃႇၼၼ်ႉၸိုင်ၶဝ်ႁူႉလွင်ႈဢၼ်ဝႃႈမၼ်းၸဝ်ႈႁေႃးလၢတ်ႈလွင်ႈၶဝ်ၼၼ်ႉဢေႃႈ။ 

၄၆ မိူဝ်ႈဢၼ်ၶဝ်ႁႃႁႂ်ႈလႆႈတီႉဢဝ်မၼ်းၸဝ်ႈၼၼ်ႉၸိုင်ၶဝ်ၵူဝ်ၵူၼ်းၸူႉၵူၼ်းတုမ်တင်းလၢႆၸိူဝ်းၼၼ်ႉဢေႃႈ။ လွင်ႈမၼ်းၸမ်းၵူၼ်းတင်းလၢႆမၢတ်ႈမၼ်းၸဝ်ႈပဵၼ်ပရေႃးၽႅတ်ႈဢေႃႈ။