Shan Missions

ၵျၢမ်းငဝ်ႈၵမ်ႇၽႃႇ

၁   ၂   ၃   ၄   ၅   ၆   ၇   ၈   ၉   ၁၀   ၁၁   ၁၂   ၁၃   ၁၄   ၁၅   ၁၆   ၁၇   ၁၈   ၁၉   ၂၀   ၂၁   ၂၂   ၂၃   ၂၄   ၂၅   ၂၆   ၂၇   ၂၈   ၂၉

၃၀   ၃၁   ၃၂   ၃၃   ၃၄   ၃၅   ၃၆   ၃၇   ၃၈   ၃၉   ၄၀   ၄၁   ၄၂   ၄၃   ၄၄   ၄၅   ၄၆   ၄၇   ၄၈   ၄၉   ၅၀   

၄၁

တၢင်းၼွၼ်းၽၼ်ၶုၼ်ႁေႃၶမ်းၽႃႇရေႃး

၁ လိုၼ်းၼၼ်ႉမိူဝ်ႈဢၼ်ပူၼ်ႉသေသွင်ပီႊယဝ်ႉၸိုင်၊ ၶုၼ်ႁေႃၶမ်းၽႃႇရေႃး ၼွၼ်းၽၼ်ႁၼ်ၸမ်းတူဝ်မၼ်းၸဝ်ႈၸုၵ်းယူႇၵႃႈတီႈႁိမ်းၼမ်ႉၼွင်ဢေႃႈ။

၂ မိူဝ်ႈၼၼ်ႉဝူဝ်းဢၼ်ႁၢင်ႊလီလႄႈ ပီးလီမၼ်းလီၸဵတ်းတူဝ်ဢွၵ်ႇသေၵႃႈၼႂ်းၼမ်ႉႁွင်ႊမႃးလႄႈ ၵိၼ်ယိူဝ်ႈယူႇဢေႃႈ။

၃ လိုၼ်းသေဝူဝ်းၸိူဝ်းၼၼ်ႉ ဝူဝ်းဢၼ်ႁၢင်ႊၸႃႉလႄႈယွမ်ႁဵဝ်ႇၸဵတ်းတူဝ် သမ်ႉဢွၵ်ႇသေၵႃႈၼႂ်းၼမ်ႉႁွင်ႊမႃးလႄႈ ၸုၵ်းယူႇၵႃႈတီႈႁိမ်းဝူဝ်းဢွၼ်တၢင်းၸိူဝ်းၼၼ်ႉၵႃႈၼိူဝ်ၽင်ႇၼမ်ႉႁွင်ႊၼၼ်ႉဢေႃႈ။

၄ ဝူဝ်းဢၼ်ႁၢင်ႊၸႃႉလႄႈ ယွမ်ႁဵဝ်ၸိူဝ်းၼၼ်ႉၶူပ်းၵိၼ်ဝူဝ်းဢၼ်ႁၢင်ႊလီလႄႈ ပီးလီမၼ်းလီၸဵတ်းတူဝ်ၸိူဝ်းၼၼ်ႉပႅတ်ႈဢေႃႈ။ၶုၼ်ႁေႃၶမ်းၽႃႇရေႃး ၵေႃႈတိုၼ်ႇမႃးဢေႃႈ။

၅ ၵမ်းၼၼ်ႉ သမ်ႉၶိုၼ်းၼွၼ်းလပ်းလႄႈသမ်ႉၶိုၼ်းၽၼ်ႁၼ်ထႅင်ႈၸမ်းႁူင်းၶဝ်ႈဢၼ်မီးမဵတ်ႉမၢၵ်ႈလီၼႃႇၸဵတ်းႁူင်း ဢွၵ်ႇပဵၼ်မႃးၵႃႈတီႈတူၼ်ႈလဵဝ်ၵူၺ်းဢေႃႈ။

၆ လိုၼ်းၼၼ်ႉ ႁူင်းၶဝ်ႈဢၼ်မီးမဵတ်ႉလိပ်ႈလႄႈလူႉၵွပ်ႈပိူဝ်ႈလူမ်းတၢင်းဝၼ်းဢွၵ်ႇၼၼ်ႉ ၸဵတ်းႁူင်းဢွၵ်ႇမႃးဢေႃႈ။ႁူင်းၶဝ်ႈဢၼ်မီးမဵတ်ႉလိပ်ႈၸိူဝ်းၼၼ်ႉၵိၼ်ႁူင်းၶဝ်ႈဢၼ်မီးမဵတ်ႉ မၢၵ်ႈလႄႈ လီၼႃႇၸိူဝ်းၼၼ်ႉပႅတ်ႈ ဢေႃႈ။

၇ ၶုၼ်ႁေႃၶမ်းၽႃႇရေႃး ၵေႃႈတိုၼ်ႇမႃးလႄႈႁူႉလွင်ႈဢၼ်ဝႃႈပဵၼ်တၢင်းဢၼ်ၼွၼ်းၽၼ်ႁၼ်ၼၼ်ႉဢေႃႈ။

၈ မိူဝ်ႈဢၼ်ထိုင်ႇၶိင်ႇၵၢင်ၼႂ်ၸိုင်၊ မၼ်းၸဝ်ႈယၢပ်ႇၸႂ်ယုင်ႈၸႂ်လႄႈ ႁွင်ႉဢဝ်ၵူၼ်းမေႃပေႇတၢင်ႇလႂ်၊ၵူၼ်းမေႃဢတၢတ်ႈပိင်ႇၺႃႇလႂ် ၵႃႈဢၼ်မီးၼႂ်းမိူင်းဢေႇၵႅပ်ႉတုၼၼ်ႉသေလႄႈ မွၵ်ႇလၢတ်ႈလွင်ႈမၼ်းတၢင်းမၼ်းတီႈၶဝ်ဢေႃႈ။ပိၵ်ႉသမ်ႉၶုၼ်ႁေႃၶမ်းမွၵ်ႇလၢတ်ႈလွင်ႈတၢင်းဢၼ်မၼ်းၸဝ်ႈၼွၼ်းၽၼ်ႁၼ်ၼၼ်ႉ တီႈၶဝ်သေၵေႃႈ ၵေႃႉဢၼ်ၽုၺ်ႇဢွၵ်ႇၼႄဢၼၢၵ်ႈဢထိၵ်ႈပေႇမၼ်းၵႃႈတီႈၶုၼ်ႁေႃၶမ်းၽႃႇရေႃးလႆႈၼၼ်ႉ ဢမ်ႇမီး သေၵေႃႉသေၵူၼ်း။

၉ မိူဝ်ႈၼၼ်ႉဝုၼ်ႇသၢၵ်ႈၵွၵ်းၵိၼ်ၸဝ်ႈလဝ်ႈလၢတ်ႈတီႈၶုၼ်ႁေႃၶမ်းၽႃႇရေႃးလႄႈဝႃႈ၊- မိူဝ်ႈၼႆႉၶႃႈၸဝ်ႈၶုၵ်းၸႂ်လႆႈၶႆႈၸႂ်ထူပ်းဢပျႅတ်ႈၶႃႈၸဝ်ႈ ယဝ်ႉ။

၁၀ မိူဝ်ႈဢၼ်ၶုၼ်ႁေႃၶမ်းၽႃႇရေႃးၸႂ်မႆႈၶႂ်ႈၸႃႉၶႃႈၸဝ်ႈဢိၵ်ႇတင်းဝုၼ်ႇသၢၵ်ႈတၢင်းၵိၼ်လႄႈ ဢဝ်ၶျုၵ်ႈ ဝႆႉၵႃႈၼႂ်းထွင်ႇၵူဝ်ႇရၢၼ်ႇတေႃႇမူးၼၼ်ႉ

၁၁ ႁဝ်းၶႃႈသွင်ၵေႃႉ ၼႂ်းၶိုၼ်းလဵဝ်ၵူၺ်းလႆႈၼွၼ်းၽၼ်ႁၼ်ဢၼ်မီး ဢထိၵ်ႈပေႇႁင်းၽႂ်ႁင်းမၼ်းၶႃႈဢေႃႈ။

၁၂ ၵႃႈတီႈၼၼ်ႉမီးၵူူၼ်းႁေႇပႄး ဢွၼ်ႇၵေႃႉၼိုင်ႈဢၼ်ပဵၼ်ၶႃႈၵူဝ်ႇရၢၼ်ႇတေႃႇမူးၼၼ်ႉၶႃႈဢေႃႈ။ၶႃႈၸဝ်ႈႁဝ်းၶဝ်ဢွၼ်ၵၼ်မွၵ်ႇလၢတ်ႈ တၢင်းၼွၼ်းၽၼ်ႁၼ်တီႈၵေႃႉၼၼ်ႉလႄႈမၼ်းၼၼ်ႉၵေႃႈ ၽုၺ်ႇဢွၵ်ႇၼႄပၼ် ဢၼၢၵ်ႈဢထိၵ်ႈပေႇတၢင်းၼွၼ်းၽၼ်ႁၼ်ၼၼ်ႉ တီႈႁဝ်းၶႃႈၶႃႈ ဢေႃႈ။

၁၃ ဢၼ်မၼ်းၽုၺ်ႇဢွၵ်ႇၼႄပၼ်တီႈၶႃႈၸဝ်ႈႁဝ်းၶဝ်ၼၼ်ႉၵေႃႈပဵၼ်ဢၼ်မႅၼ်ႈတီႈၶႃႈဢေႃႈ။ၶႃႈၸဝ်ႈၶိုၼ်းလႆႈဢရႃႇမိူၼ်ၸိူဝ်ႉၼင်ႇ ပၵ်းၵဝ်ႇပိူင်ၵဝ်ၼၼ်ႉလႄႈၵေႃႉၼိုင်ႈၸမ်း လႆႈၶၢမ်ႇတၢင်းဢၼ်ႁွႆးဝႆႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။

၁၄ မိူဝ်ႈၼၼ်ႉၶုၼ်ႁေႃၶမ်းၽႃႇရေႃးပွႆႇၸႂ်ႉၵူၼ်းၵွႃႇ ႁႂ်ႈလႆႈႁွင်ႉဢဝ်ယုဝ်းသႅပ်ႉ မႃးဢေႃႈ။ၶဝ်ဢဝ်မၼ်းဢွၵ်ႇသေၵႃႈၼႂ်းထွင်ႇ ၶၼ်ၶၼ်ၽႂ်းၽႂ်းလႄႈ မၼ်းၵေႃႈထႃၼူတ်ႇလၢႆႈၶူဝ်းလၢႆႈလဵင်းသေယဝ်ႉ ၶဝ်ၸူးၵႃႈတီႈၶုၼ် ႁေႃၶမ်းၽႃႇရေႃးဢေႃႈ။

၁၅ ၶုၼ်ႁေႃၶမ်းၽႃႇရေႃးလၢတ်ႈတီႈယုဝ်းသႅပ်ႉလႄႈဝႃႈ၊-ၵဝ်လႆႈၼွၼ်းၽၼ်ႁၼ်ယဝ်ႉ။ၽူႈလႂ်ၵေႃႈ ဢမ်ႇၽုၺ်ႇဢွၵ်ႇၼႄပျႃး ဢၼၢၵ်ႈဢထိၵ်ႈပေႇမၼ်းပၼ်ၵဝ်လႆႈ။ၵဝ်လႆႈငိၼ်းဝႃႈမႂ်းၸၢင်ႊမေႃၽုၺ်ႇဢွၵ်ႇၼႄပၼ်ဢၼၢၵ်ႈဢထိၵ်ႈပေႇ တၢင်းဢၼ်ၼွၼ်းၽၼ်ႁၼ်ၼၼ်ႉယဝ်ႉ၊ ဝႃႈၼင်ႇၼႆဢေႃႈ။

၁၆ယုဝ်းသႅပ်ႉ ၶိုၼ်းလဝ်ႈလၢတ်ႈတီႈၶုၼ်ႁေႃၶမ်းၽႃႇရေႃးလႄႈဝႃႈ၊-တီႈတူဝ်ၶႃႈၸဝ်ႈၼႆႉ၊ ဢမ်ႇပဵၼ်ၸိူဝ်ႉၼင်ႇၼၼ်ၶႃႈ။ႁႂ်ႈၽြႃးပဵၼ်ၸဝ်ႈၶိုၼ်းၵႄႈလိတ်ႈၵႂၢမ်းမင်ႇၵလႃႇပၼ်တီႈၶုၼ်ႁေႃၶမ်းၽႃႇရေႃး သေၵမ်းတီႈ ၶႃႈ၊ဝႃႈၼင်ႇၼႆဢေႃႈ။

၁၇ ၶုၼ်ႁေႃၶမ်းၽႃႇရေႃး ၵေႃႈလၢတ်ႈတီႈ ယုဝ်းသႅပ်ႉ လႄႈဝႃႈ၊-ၼႂ်းတၢင်းဢၼ်ၵဝ်ၼွၼ်းၽၼ်ႁၼ်ၼၼ်ႉၸမ်း ၵဝ်ၸုၵ်းယူႇၵႃႈၼိူဝ်ၽင်ႇ ၼမ်ႉႁွင်ႊဢေႃႈ။

၁၈ ဝူဝ်းဢၼ်ႁၢင်ႊလီလႄႈပီးလီမၼ်းလီၸဵတ်းတူဝ် ဢွၵ်ႇသေၵႃႈၼႂ်းၼမ်ႉႁွင်ႊမႃးလႄႈ ၵိၼ်ယိူဝ်ႈယူႇဢေႃႈ။ဝၢႆးသေဝူဝ်းၸိူဝ်းၼၼ်ႉယဝ်ႉ ဝူဝ်းဢၼ်ဢမ်ႇမီးၼိူဝ်ႉမီးၼင်ဢၼ်ႁၢင်ႊၸႃႉလႄႈ ယွမ်ႁဵဝ်ႇၼႃႇ ၼၼ်ႉၸဵတ်းတူဝ်ဢွၵ်ႇမႃးဢေႃႈ။

၁၉ ဝူဝ်းဢၼ်ႁၢင်ႊၸႃႉထၢၼ်ႇၼၼ်ႉ၊ၵႃႈၼႂ်းမိူင်းဢေႃႇၵႅပ်ႉတုၼႆႉ တီႈလႂ်ၵေႃႈ ၵဝ်ဢမ်ႇပႆႇယၢမ်ႈတွၼ်ႉလႆႈႁၼ်သေပွၵ်ႈ။ ဝူဝ်းဢၼ်ႁၢင်ႊၸႃႉလႄႈယွမ်ႁဵဝ်ႇၸိူဝ်းၼၼ်ႉ ၶူပ်းၵိၼ်ဝူဝ်းဢၼ်ပီးလီမၼ်းလီၸဵတ်းတူဝ်ၸိူဝ်းၼၼ်ႉဢေႃႈ။

၂၁ လိုၼ်းသေၶဝ်ၵိၼ်ယဝ်ႉ ၽူႈလႂ်ဢမ်ႇႁူႉ လွင်ႈဢၼ်ၶဝ်ၵိၼ်ၵွႃႇၼၼ်ႉ။ၶဝ်ယင်းႁၢင်ႊၸႃႉယူႇယွမ်ႁဵဝ်ႇယူႇမိူၼ်ၸိူဝ်ႉၼင်ႇဢွၼ်တၢင်းၼၼ်ႉယူႇဢေႃႈ။ ၵဝ်ၵေႃႈတိုၼ်ႇမႃးသေ ဢေႃႈ။

၂၂ ၵမ်းၼၼ်ႉၵဝ်သမ်ႉႁၼ်ၼႂ်းတၢင်းဢၼ်ၼွၼ်းၽၼ်ႁၼ်ထႅင်ႈၸမ်း ႁူင်းၶဝ်ႈဢၼ်မီးမဵတ်ႉမၢၵ်ႈလႄႈလီၼႃႇၸဵတ်းႁူင်းဢွၵ်ႇပဵၼ်မႃး ၵႃႈတီႈတူၼ်ႈလဵဝ် ၵူၺ်းဢေႃႈ။

၂၃ လိုၼ်းၼၼ်ႉႁူင်းၶဝ်ႈဢၼ်ႁဵဝ်ႇႁႅင်ႈမဵတ်ႉလိပ်ႈလႄႈ လူႉၵွပ်ႈပိူဝ်ႈလူမ်းဝၼ်းဢွၵ်ႇၼၼ်ႉၸဵတ်းႁူင်းဢွၵ်ႇမႃးဢေႃႈ။ ႁူင်းၶဝ်ႈဢၼ်မဵတ်းလိပ်ႈၸိူဝ်းၼၼ်ႉၵိၼ်ပႅတ်ႈႁူင်းၶဝ်ႈ ဢၼ်လီၼႃႇၸဵတ်းႁူင်းၸိူဝ်း ၼၼ်ႉဢေႃႈ။

၂၄ ၵဝ်မွၵ်ႇလၢတ်ႈလွင်ႈမၼ်းတီႈၵူၼ်းမေႃပေႇတၢင်ႇတင်းလၢႆၵေႃႈ ၽႂ်ဢမ်ႇၽုၺ်ႇဢွၵ်ႇၼႄပၼ်ဢၼၢၵ်ႈဢထိၵ်ႈပေႇမၼ်းလႆႈ၊ဝႃႈၼင်ႇၼႆဢေႃႈ။

၂၅ ယုဝ်းသႅပ်ႉ ၵေႃႈလဝ်ႈလၢတ်ႈတီႈၶုၼ်ႁေႃၶမ်းၽႃႇရေႃးလႄႈဝႃႈ၊-တၢင်းဢၼ်ၶုၼ်ႁေႃၶမ်းၼွၼ်းၽၼ်ႁၼ်ၼႆႉၸမ်းပဵၼ်ဢၼ်လဵဝ်ၵူၺ်းၶႃႈဢေႃႈ။ၽြႃးပဵၼ်ၸဝ်ႈၼႄပျႃး လွင်ႈတၢင်းဢၼ်မၼ်းၸဝ်ႈတၵ်းႁဵတ်းၼၼ်ႉ တီႈၸဝ်ႈႁဝ်းတီႈၶႃႈဢေႃႈ။

၂၆ ဝူဝ်းဢၼ်ႁၢင်ႊလီၸဵတ်းတူဝ်ၸိူဝ်းၼၼ်ႉပဵၼ်ၸဵတ်းပီႊၶႃႈဢေႃႈ။ႁူင်းၶဝ်ႈဢၼ်မၢၵ်ႈလီၸဵတ်းႁူင်းၸိူဝ်းၼၼ်ႉၵေႃႈ ပဵၼ်ၸဵတ်းပီႊၶႃႈဢေႃႈ။တၢင်းဢၼ်ၼွၼ်းၽၼ်ႁၼ်ၸမ်း ပဵၼ်ဢၼ် လဵဝ်ၵူၺ်းၶႃႈဢေႃႈ။

၂၇ ဝူဝ်းဢၼ်ယွမ်ႁဵဝ်ႇလႄႈႁၢင်ႊၸႃႉၸဵတ်းတူဝ် ဢၼ်ဢွၵ်ႇမႃးလိုၼ်းၶဝ်ၸိူဝ်းၼၼ်ႉပဵၼ်ၸဵတ်းပီႊၶႃႈဢေႃႈ။ ႁူင်းၶဝ်ႈလိပ်ႈဢၼ်လူႉၵွပ်ႈပိူဝ်ႈလူမ်းတၢင်းဝၼ်းဢွၵ်ႇၸဵတ်းႁူင်းၼၼ်ႉၵေႃႈ ပဵၼ်ၸဵတ်းပီႊဢၼ်ၶဝ်ႈတၵ်းၵႃႈ မၢၵ်ႇတၵ်းပႅင်းၼၼ်ႉၶႃႈဢေႃႈ။

၂၈ လွင်ႈတၢင်းဢၼ်ၶႃႈၸဝ်ႈ လႆႈလဝ်ႈလၢတ်ႈတီႈၶုၼ်ႁေႃၶမ်းၽႃႇရေႃးလႄႈဝႃႈ၊ ၼႆႉၸမ်းပဵၼ်ၽြႃးပဵၼ်ႈၸဝ်ႈၼႄပျႃး လွင်ႈတၢင်းဢၼ်မၼ်းၸဝ်ႈတၵ်းႁဵတ်း ၼၼ်ႉတီႈၶုၼ်ႁေႃၶမ်းၽႃႇရေႃးတီႈၶႃႈဢေႃႈ။

၂၉ ၵႃႈၼႂ်းမိူင်းဢေႇၵႅပ်ႉတု ၵူႈတီႈၵူႈလႅၼ်ၼႆႉတၵ်းမီးၸဵတ်းပီႊဢၼ်ၶဝ်ႈၼမ်ႉတၢင်းၵိၼ် လိူင်ႇၼမ်ၼႃႇၼၼ်ႉတီႈၶႃႈ ဢေႃႈ။

၃၀ လိုၼ်းၼၼ်ႉၸဵတ်းပီႊဢၼ်ၶဝ်ႈၵႃႊမၢၵ်ႇပႅင်းၼၼ်ႉ တၵ်းပဵၼ်မႃးၵႃႈၼႂ်းမိူင်းဢေႇၵႅပ်ႉတုလႄႈတၢင်းဢၼ်ၶဝ်ႈၼမ်ႉတၢင်းၵိၼ်လိူင်ႇၼမ်ၼႃႇ တင်းသဵင်ႈတင်းလူင်ၼၼ်ႉတၵ်းပူၼ်ႉလႄႈ တင်းဝၢၼ်ႈတင်းမိူင်းတၵ်းလူႉတၵ်းလႅဝ် ၵွပ်ႈပိူဝ်ႈတၢင်းဢၼ်ၶဝ်ႈၵႃႊမၢၵ်ႇ ပႅင်းၼၼ်ႉတီႈၶႃႈဢေႃႈ။

၃၁ ၵွပ်ႈပိူဝ်ႈတၢင်းဢၼ်ၶဝ်ႈၵႃႊမၢၵ်ႇပႅင်းၼၼ်ႉႁႅင်းယႂ်ႇၼႃႇလႄႈ လၢၵ်ႈၶၼႃႇတၢင်းဢၼ်ၶဝ်ႈၼမ်ႉတၢင်းၵိၼ်လိူင်ႇၼႃႇ မိူဝ်ႈဢွၼ်တၢင်း ၼၼ်ႉတၵ်းဢမ်ႇလႆႈထၢင်ႇသႃး။

၃၂ လွင်ႈဢၼ်တၢင်းဢၼ်ၼွၼ်းၽၼ်ႁၼ်ထၢပ်ႈထႅင်ႈလႄႈ ပဵၼ်သွင်ပွၵ်ႈတီႈၶုၼ်ႁေႃၶမ်းၽႃႇရေႃးၼၼ်ႉၸမ်း၊ၽြႃးပဵၼ်ၸဝ်ႈႁႂ်ႈလွင်ႈတၢင်းၼႆႉမၼ်ႈၶိူင်ႇလႄႈ ၽြႃးပဵၼ်ၸဝ်ႈတၵ်း ၸဵဝ်းႁဵတ်းတီႈၶႃႈဢေႃႈ။

၃၃ ပိူဝ်ႈၼႆလႄႈၸဝ်ႈႁဝ်းၶုၼ်ႁေႃၶမ်းၽႃႇရေႃးတီႈၶႃႈ၊ ၶႅၼ်းတေႃႈလိူၵ်ႈၵဵပ်းဢဝ်ၵေႃႉဢၼ်မီသတိလႄႈ တဵမ်ဝႆႉတင်းၺၢၼ်ႇပိင်ႇၺႃႇၼၼ်ႉသေလႄႈ ႁႂ်ႈမၼ်းဢုပ်ႉထိင်းၵႃႈၼိူဝ်မိူင်းဢေႇၵႅပ်ႉ တု ၼႆႉသေၵမ်းၶႃႈ။

၃၄ ၸဝ်ႈႁဝ်းၶုၼ်ႁေႃၶမ်းၽႃႇရေႃးတီႈၶႃႈ၊ၶႅၼ်းတေႃႈႁဵတ်းၸိူဝ်ႉၼင်ႇၼၼ်သေလႄႈ ႁႂ်ႈၵေႃႉၼၼ်ႉၶၢၼ်းဝႆႉ ၶဝ်ၸိူဝ်းဢၼ်ႁဵတ်းၵႄႇႁဵတ်းႁူဝ်တင်းလၢႆလႄႈ ႁႂ်ႈၶဝ်ၵဵပ်းဢဝ်ႁႃႈပုၼ်ႊပုၼ်ႊၼိုင်ႈၵႃႈတီႈမိူင်းဢေႇၵႅပ်ႉတု ၼႆႉၼႂ်းဢတွင်းၸဵတ်းပီႊ ဢၼ်ၶဝ်ႈၼမ်ႉတၢင်းၵိၼ်လိူင်ႇၼမ်ၼႃႇၼၼ်ႉ သေၵမ်းတီႈ ၶႃႈ။

၃၅ ၶႅၼ်းတေႃႈႁႂ်ႈၶဝ်ၸူႉသိမ်းဢဝ်တၢင်းၵိၼ်တၢင်းၶူပ်းတင်းသဵင်ႈတင်းလူင် ၼႂ်းပီႊဢၼ်လီဢၼ်ငၢမ်းဢၼ်တၵ်းပဵၼ်မႃးၸိူဝ်းၼၼ်ႉလႄႈဢဝ်ၶဝ်ႈၵျုင်ႇသိမ်းဝႆႉၵႃႈၼႂ်းမိူင်းၸဝ်ႈႁဝ်း ၵႃႈၼႂ်းဝဵင်းတင်းလၢႆသေ လႄႈ ႁႂ်ႈဢွၼ်ၵၼ်ပႂ်ႉလူပႂ်ႉထိင်းဝႆႉၵမ်းတီႈၶႃႈ။

၃၆ မိူဝ်ႈဢၼ်ၸဵတ်းပီႊ ဢၼ်ၶဝ်ႈတၵ်းၵႃႈမၢၵ်ႇတၵ်းပႅင်းၼၼ်ႉႁွတ်ႈမႃးၵႃႈတီႈမိူင်းဢေႇၵႅပ်ႉတုၼႆႉၼၼ်ႉၸိုင် တၢင်းၵိၼ်တၢင်းၶူပ်းၼၼ်ႉတၵ်းပဵၼ်တၢင်းဢၼ်သိမ်းပႅင်းမီးဝႆႉပုၼ်ႈသိုင်ႇၸိုင်ႈဝၢၼ်ႈမိူင်းၸဝ်ႈလႄႈ သိုင်ႇၸိုင်ႈဝၢၼ်ႈမိူင်းၸဝ်ႈၸင်ႇ တၵ်းဢမ်ႇလႆႈလူႉလႆႈလႅဝ် ၵွပ်ႈပိူဝ်ႈတၢင်းဢၼ်ၶဝ်ႈၵႃႊမၢၵ်ႇပႅင်းၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။

၃၇ လွင်ႈတၢင်းၼၼ်ႉထုၵ်ႇၸႂ်ၵျိူၵ်ႈၸႂ်ၸႃႉၸဵမ်ၶုၼ်ႁေႃၶမ်းၽႃႇရေႃး လႄႈ ၶႃႈမၼ်းၵူၼ်းမၼ်းတင်းသဵင်ႈတင်းလူင်လႄႈၶုၼ်ႁေႃၶမ်းၽႃႇရေႃးၵေႃႈ လၢတ်ႈတီႈၶႃႈမၼ်းၵူၼ်းမၼ်းၸိူဝ်းၼၼ်ႉလႄႈဝႃႈ၊-

၃၈ ၵေႃႉၸိူဝ်ႉၼင်ႇၼႆ ဢၼ်ဝိၺိၼ်ႇၽြႃးပဵၼ်ၸဝ်ႈၵိင်းဝပ်ႈယူႇၵႃႈၼႂ်းမၼ်းၼႆႉ ၼၼ်ႉႁႃလႄႈတၵ်းထူပ်းလႆႈလူးၵွၼ်ႁိုဝ်၊ဝႃႈၼင်ႇၼႆဢေႃႈ။

ယုဝ်းသႅပ်ႉလႆႈဢုပ်ႉၵႃႈၼိူဝ်ႁေႃၶမ်း

၃၉ ၵမ်းၼၼ်ႉၶုၼ်ႁေႃၶမ်းၽႃႇရေႃးၵေႃႈလၢတ်ႈတီႈယုဝ်းသႅပ်ႉ လႄႈဝႃႈ၊-ၵွပ်ႈပိူဝ်ႈဢၼ်ၽြႃးပဵၼ်ၸဝ်ႈၼႄပျႃးလွင်ႈတၢင်းတင်းသဵင်ႈတင်းလူင်ၼႆႉ တီႈမႂ်းလႄႈ ၵေႃႉဢၼ်မီးသတိတဵမ်ဝႆႉတင်းၺၢၼ်ႇပိင်ႇၺႃႇမိူၼ်ၸိူဝ်ႉၼင်ႇမႂ်းၼႆႉဢမ်ႇမီးယဝ်ႉ။မႂ်းတၵ်းလႆႈဢုပ်ႉၵႃႈ ၼိူဝ်ႁေႃၶမ်းၵဝ်ၼႆႉဢေႃႈ။

၄၀ ၵူၼ်းဝၢၼ်ႈၵူၼ်းမိူင်းၵဝ်တင်းသဵင်ႈတင်းလူင်တၵ်းလႆႈႁဵတ်းၸွမ်းသူပ်းမႂ်း ၵႂၢမ်းမႂ်းဢေႃႈ။ၵဝ်ၵူၺ်းတၵ်းပဵၼ်ၵေႃၵဢၼ်ယႂ်ႇမျၢတ်ႈသေမႂ်းၵႃႈၼႂ်းတီႈရႃႇၸႃႉပလၢင်ႇၼၼ်ႉၵူၺ်းဢေႃႈ၊ ဝႃႈ ၼင်ႇၼႆဢေႃႈ။

၄၁ ၵမ်းၼၼ်ႉၶုၼ်ႁေႃၶမ်းသမ်ႉလၢတ်ႈတီႈယုဝ်းသႅပ်ႉထႅင်ႈလႄႈဝႃႈ၊-တူၺ်းလူႊ၊ၵဝ်ၶၢၼ်းမႂ်းဝႆႉၵႃႈၼိူဝ်မိူင်းဢေႇၵႅပ်ႉတု တင်းသဵင်ႈတင်းလူင်ယဝ်ႉ၊ဝႃႈ ၼင်ႇၼႆလႄႈၶုၼ်ႁေႃၶမ်းၽႃႇရေႃး ၼၼ်ႉထွတ်ႇဢဝ်မွင်းၵူၺ်းၵႃႈတီႈမိုဝ်းမၼ်းၸဝ်ႈသေယဝ်ႉ တိုဝ်းပၼ်ၵႃႈတီႈမိုဝ်းယုဝ်းသႅပ်ႉ ဢေႃႈ။

၄၂ ဢဝ်ၶူဝ်းပိၵ်ႈၶျေႃးၼုင်ႈပၼ်မၼ်းလႄႈ ႁွႆးၸရွႆႇၶမ်းၵႃႈတီႈၶေႃးမၼ်းသေယဝ်ႉ၊ႁႂ်ႈမၼ်းၶီႇရထႃးတုတိယ ဢၼ်မီးတီႈမၼ်းၸဝ်ႈၼၼ်ႉ ဢေႃႈ။

၄၃ ၶဝ်ဢွၼ်ၵၼ်ႁွင်ႉပၢဝ်ႇႁွင်ႉသေႃႇၵႃႈတီႈၽၢႆႇၼႃႈမၼ်းလႄႈဝႃႈ၊- ဢွၼ်ၵၼ်ၶုပ်ႉမူပ်ႇတႃႉ၊ဝႃႈၼင်ႇၼႆဢေႃႈ။ ၼင်ႇၼၼ်လႄႈမၼ်းၸဝ်ႈၶၢၼ်းမၼ်းဝႆႉၵႃႈၼိူဝ်မိူင်းဢေႇၵႅပ်ႉတု တင်းသဵင်ႈတင်းလူင်ဢေႃႈ။

၄၄ ၶုၼ်ႁေႃၶမ်းၽႃႇရေႃး လၢတ်ႈတီႈ ယုဝ်းသႅပ်ႉ လႄႈဝႃႈ၊-ၵဝ်ပဵၼ်ၶုၼ်ႁေႃၶမ်းၽႃႇရေႃးဢေႃႈ။ ပေႃးဢမ်ႇလႆႈဢၶႂၢင်ႉမႂ်းၸိုင်၊ၵူၼ်းၵႃႈၼႂ်းမိူင်းဢေႇၵႅပ်ႉတု တင်းသဵင်ႈတင်းလူင်ၼႆႉ ၽႂ်ၵေႃႈတေဢမ်ႇလႆႈယုၵ်ႉတိၼ်ယုၵ်ႉမိုဝ်းမၼ်းၵူၺ်း၊ဝႃႈၼင်ႇၼႆဢေႃႈ။

၄၅ ၶုၼ်ႁေႃၶမ်းၽႃႇရေႃး တၢင်ႇပၼ်ၸိုဝ်ႈပၼ်သဵင်တီႈယုဝ်းသႅပ်ႉ ဝႃႈ၊-ၸႃႇၽၼႃႇသၽႃႇၼ၊ဝႃႈၼင်ႇၼႆလႄႈ ဢဝ်ဢႃႇသၼတ်ႉ ဢၼ်ပဵၼ်လုၵ်ႈယိင်းပေႃႇတိၽေႇရ ဢၼ်ပဵၼ်ယိၸ်ႉပရေႃးႁိၵ်ႈဝဵင်းဢေႃႇၼ ၼၼ်ႉပၼ်မၼ်းႁႂ်ႈႁဵတ်းမေးမၼ်းဢေႃႈ။ယုဝ်းသႅပ်ႉ ၵေႃႈဢွၵ်ႇသေလႄႈဢုပ်ႉထိင်းၵႃႈၼိူဝ်မိူင်းဢေႇၵႅပ်ႉတု ဢေႃႈ။

၄၆ မိူဝ်ႈဢၼ် ယုဝ်းသႅပ်ႉ လႆႈၶၢမ်ႇၸုၵ်းၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃးမိူင်းဢေႇၵႅပ်ႉတု ၼၼ်ႉဢသၢၵ်ႈမၼ်းလႆႈသၢမ်သိပ်းပီႊဢေႃႈ။ယုဝ်းသႅပ်ႉၸင်ႇဢွၵ်ႇသေၵႃႈတီႈၶုၼ်ႁေႃၶမ်းၽႃႇရေႃး သေလႄႈလႄႇလဵပ်ႈၵႃႈၼႂ်းမိူင်းဢေႇၵႅပ်ႉတု ၵူႈတီႈၵူႈလႅၼ်ဢေႃႈ။

၄၇ ၼႂ်းၸဵတ်းပီႊ ဢၼ်ၶဝ်ႈၼမ်ႉတၢင်းၵိၼ်လိူင်ႇၼၼ်ႉမၢၵ်ႇလိၼ်ႁူင်းလိၼ်ဢွၵ်ႇမႃးထၢၼ်ႈပေႃး ပဵၼ်ၵမ်ပဵၼ်ၵမ် ဝႆႉဢေႃႈ။

၄၈ မၼ်းဢဝ်တၢင်းၵိၼ်တၢင်းၶူပ်းၵႃႈဢၼ်မီးၵႃႈၼႂ်းမိုင်းဢေႇၵိပ်ႉတု ၼႂ်းၸဵတ်းပီႊၼၼ်ႉ ၸူႉၵၼ်ၶွၼ်ႈၵၼ်လႄႈသိမ်းဝႆႉၵႃႈၼႂ်းဝဵင်းတင်းလၢႆဢေႃႈ။တၢင်းၵိၼ်တၢင်းၶူပ်းဢၼ်လႆႈၵႃႈၼႂ်းတူင်ႈၼႃးၵႃႈတီႈႁိမ်းဝဵင်းၵူႈဝဵင်းၼၼ်ႉၵေႃႈ မၼ်းဢဝ်သိမ်းဝႆႉၵႃႈၼႂ်း ဝဵင်းလႂ်ဝဵင်းၼၼ်ႉဢေႃႈ။

၄၉ ၶဝ်ႈၵျုင်ႇၸမ်း၊ ယုဝ်းသႅပ်ႉသိမ်းဝႆႉၼမ်ၼႃႇ ပေႃးတၢၼ်ႇမဵတ်ႉႁိၼ်မဵတ်ႉသၢႆးၼမ်ႉသမ်ႇမုၵ်ႉတြႃႇၼၼ်ႉလႄႈ ၼမ်ၼႃႇလူင်လၢင်တေႃႇထိုင်ႁွတ်ႈထၢၼ်ႈပေႃး ဢမ်ႇၼပ်ႉဢမ်ႇဢၢၼ်ႇလႆႈယဝ်ႉလႄႈယင်းဢမ်ႇၼပ်ႉဢမ်ႇဢၢၼ်ႇယဝ်ႉဢေႃႈ။

၅၀ ၸူဝ်ႈဢၼ် ပီႊဢၼ်ၶဝ်ႈၵႃႊမၢၵ်ႇပႅင်းဢမ်ႇပႆႇႁွတ်ႈပႆႇထိုင်ၼၼ်ႉယုဝ်းသႅပ်ႉ လႆႈမီးလုၵ်ႈၸၢႆးသွင်ၵေႃႉ ဢၼ်ဢႃႇသၼတ်ႉ ဢၼ်ပဵၼ် လုၵ်ႈယိင်းပေႃႇတိၽေႇရ၊ယိၸ်ႉပရေႃးႁိၵ်ႈဝဵင်းဢေႃႇၼၵိူတ်ႇလဵင်ႉမႃးၼၼ်ႉဢေႃႈ။

၅၁ ယုဝ်းသႅပ်ႉ ႁွင်ႉႁိၵ်ႈၸိုဝ်ႈလုၵ်ႈတူၼ်ႈမၼ်းဝႃႈမၼႃႇသေႇ ဢေႃႈ။လွင်ႈမၼ်းၸမ်း၊ မၼ်းဝႃႈ၊-ၽြႃးပဵၼ်ၸဝ်ႈ ႁဵတ်းႁႂ်ႈၵဝ် လူင်လိုမ်းတၢင်းယၢပ်ႇတၢင်းၽိုတ်ႇဢၼ်ၵဝ်လႆႈၶၢမ်ႇမႃးၼၼ်ႉ ဢိၵ်ႇတင်းၵူၼ်းႁိူၼ်းၵူၼ်းယေးပေႃႈၵဝ် တင်းသဵင်ႈတင်းလူင် ၸိူဝ်းၼၼ်ႉယဝ်ႉ၊ဝႃႈၼင်ႇၼႆဢေႃႈ။

၅၂ လုၵ်ႈၸၢႆးဢၼ်လႆႈၵမ်းလိုၼ်းၸမ်း၊ မၼ်းႁွင်ႉႁိၵ်ႈၸိုဝ်ႈဝႃႈဢေႇၽရိမ်ႇဢေႃႈ။လွင်ႈမၼ်းၸမ်း၊မၼ်းဝႃႈ၊-ၽြႃးပဵၼ်ၸဝ်ႈႁဵတ်းႁႂ်ႈၵဝ်ယႂ်ႇၽႄႈၼမ်ၵိုၼ်းမႃး ၵႃႈၼႂ်းမိူင်းဢၼ်ၵဝ်လႆႈၶၢမ်ႇတၢင်းယၢၵ်ႈတၢင်းၽၢၼ်ၼႆႉယဝ်ႉ၊ ဝႃႈၼင်ႇၼႆဢေႃႈ။

၅၃ ဝၢႆးၼၼ်ႉၸဵတ်းပီႊ တၢင်းဢၼ်ၶဝ်ႈၼမ်ႉတၢင်းၵိၼ်လိူင်ႇၼမ်ၼႃႇဢၼ်ပဵၼ်ၵႃႈတီႈမိူင်းဢေႇၵႅပ်ႉတု ၼၼ်ႉ ပုၼ်ႉၵွႃႇဢေႃႈ။

၅၄ ပီႊဢၼ်ၶဝ်ႈၵႃႊမၢၵ်ႇပႅင်းၼၼ်ႉၸႃႉႁွတ်ႈမႃးမႅၼ်ႈၸွမ်းၵႃႈၼင်ႇဢၼ် ယုဝ်းသႅပ်ႉ ႁေႃးလၢတ်ႈဝႆႉၼၼ်ႉဢေႃႈ။မိူဝ်ႈၼၼ်ႉပိၵ်ႉသမ်ႉၵႃႈၼႂ်းမိူင်းတင်းသဵင်ႈတင်းလူင်ပဵၼ်တၢင်းဢၼ်ၶဝ်ႈၵႃႊမၢၵ်ႇပႅင်းၼၼ်ႉ သေၵေႃႈယႃႇၵႃႈတီႈမိူင်းဢေႇၵႅပ်ႉတု ယင်းမီးၶဝ်ႈမုၼ်းယူႇ ၵူႈတီႈဢေႃႈ။

၅၅ ဝၢႆးၼၼ်ႉမိူဝ်ႈဢၼ်သိုင်ႇၸိုင်ႈဝၢၼ်းမိူင်းဢေႇၵႅပ်ႉတု တင်းသဵင်ႈတင်းလူင်ဢိုပ်ႈယၢၵ်ႈတၢင်းၵိၼ်တၢင်းၶူပ်းၼႃႇလူင်လၢင်ၼၼ်ႉ၊ ၵူၼ်းဝၢၼ်ႈၵူၼ်းမိူင်းတင်းလၢႆ ဢွၼ်ၵၼ်ႁွင်ႉသႅၼ်ႇတီႈၶုၼ်ႁေႃၶမ်းၽႃႇရေႃး ႁႂ်ႈလႆႈၶဝ်ႈမုၼ်းဢေႃႈ။ၶုၼ်ႁေႃၶမ်းၽႃႇရေႃး ၵေႃႈလၢတ်ႈတီႈၵူၼ်းဢေႇၵႅပ်ႉတု တင်းသဵင်ႈတင်းလူင်ၸိူဝ်းၼၼ်ႉလႄႈဝႃႈ၊-ၵွႃႇၸူးတီႈ ယုဝ်းသႅပ်ႉတႃႉ။ ဢွၼ်ၵၼ်ႁဵတ်းၸွမ်း ၵႃႈၼင်ႇဢၼ်မၼ်းၸီႇ ယၢင်ႇၼၼ်ႉတႃႉ၊ဝႃႈၼင်ႇၼႆဢေႃႈ။

၅၆ မိူဝ်ႈဢၼ်ၶဝ်ႈၵႃႊမၢၵ်ႇပႅင်းၵႃႈၼိူဝ်ၽႅၼ်ႇလိၼ် တင်းသဵင်ႈတင်းလူင်ၼၼ်ႉ ယုဝ်းသႅပ်ႉ ၽုၺ်ႇယေးၶဝ်ႈၵႃႈမီးတင်းသဵင်ႈတင်းလူင်လႄႈ ၶၢႆတေႃႇၵူၼ်းဢေႇၵႅပ်ႉတု တင်းလၢႆဢေႃႈ။ မိူဝ်ႈၼၼ်ႉၵႃႈၼႂ်းမိူင်းဢေႇၵိပ်ႉတု ၼၼ်ႉၶဝ်ႈယင်းတိုၵ်ႉၵႃႈ မၢၵ်ႇယင်းတိုၵ်ႉပႅင်းၼႃႇလူင်လၢင်ယူႇ ဢေႃႈ။

၅၇ ၵႃႈတီႈၼိူဝ်လိၼ်မိူင်းတင်းသဵင်ႈတင်းလူင်ၵေႃႈပိူဝ်ႈဢၼ် ၶဝ်ႈၵႃႊမၢၵ်ႇပႅင်းၼႃႇလူင်လၢင်ၼၼ်ႉလႄႈၵူၼ်းၵူႈဝၢၼ်ႈၵူႈမိူင်း ဢွၼ်ၵၼ်ႁွတ်ႈၽႅဝ်မႃးၸူးၵႃႈတီႈ ယုဝ်းသႅပ်ႉ

ၵႃႈၼႂ်းမိူင်ဢေႇၵႅပ်ႉတု ႁႂ်ႈလႆႈသိုဝ်ႉဢဝ်တၢင်းၵိၼ်တၢင်းၶူပ်းဢေႃႈ။