Shan Missions

ၵျၢမ်းၶၢဝ်ႇငၢဝ်ႊသတၢင်းသိူဝ်းပျေႃႇယုဝ်းႁၢၼ်ႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂၀    ၂၁   

၁၀ 

ၸဝ်ႈသူဝ်းတင်းသူဝ်း

၁ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၵေႃႉဢၼ်ယင်းဢမ်ႇၶဝ်ႈၸွမ်းႁူးၽၵ်းတူလႄႈၶၢမ်ႈႁုဝ်ႉၶဝ်ႈၼႂ်းၶွၵ်ႈသူဝ်းၼၼ်ႉပဵၼ်ၽူႈလၵ်ႉၵူၼ်းၸူၼ်ဢေႃႈ။

၂ ၵေႃႉဢၼ်ၶဝ်ႈၸွမ်းႁူးၽၵ်းတူၵႂႃႇၼၼ်ႉၸမ်းပဵၼ်ၵေႃႉဢၼ်လဵင်ႉသူဝ်းထိင်းသူဝ်းဢေႃႈ။

၃ ၵူၼ်းပႂ်ႉၽၵ်းတူၵေႃႈတၵ်းၽုၺ်ႇပၼ်ၵေႃႉၼၼ်ႉဢေႃႈ။သူဝ်းတင်းလၢႆၵေႃႈတၵ်းထွမ်ႇဢဝ်သဵင်မၼ်းဢေႃႈ။မၼ်းႁွင်ႉၸိုဝ်ႁွင်ႉသဵင်သူဝ်းမၼ်းလႄႈဢဝ်ၶဝ်ဢွၵ်ႇၵႂႃႇဢေႃႈ။

၄ မိူဝ်ႈဢၼ်မၼ်းဢဝ်သူဝ်းမၼ်းဢွၵ်ႇၵႂႃႇၼၼ်ႉၸိုင်မၼ်းၸၢင်ႊပႆၵႂႃႇပႃႈၼႃႈသူဝ်းမၼ်းလႄႈသူဝ်းၸိူဝ်းၼၼ်ႉၵေႃႈပိူဝ်ႈဢၼ်ႁူႉၸၵ်းသဵင်ၸဝ်ႈၶဝ်လႄႈၸွမ်းၵႂႃႇဢေႃႈ။

၅ ပိူဝ်ႈဢၼ်ၶဝ်ဢမ်ႇႁူႉၸၵ်းသဵင်ၵေႃႉဢၼ်ဢမ်ႇၸၢပ်ႈသႅင်ႇၵၼ်တင်းၶဝ်ၼၼ်ႉလႄႈၶဝ်ဢမ်ႇၸွမ်းပႃႈလင်ၵေႃႉၼၼ်ႉလႄႈၸၢင်ႊၶုၼ်ႇလႅၼ်ႈပၢႆဢေႃႈ၊ဝႃႈၼင်ႇၼႆဢေႃႈ။

၆ မိူဝ်ႈဢၼ်ၸဝ်ႈယေႇသုႁေႃးလၢတ်ႈဢူႉပမႃႇၼႆႉယူႇၼၼ်ႉၸိုင်ပရိၵ်ႈသၢတ်ႈၸိူဝ်းၼၼ်ႉဢမ်ႇႁူႉဢၼၢၵ်ႈဢထိၵ်ႈပႄႇၵႂၢမ်းမၼ်းၸဝ်ႈ။

၇ ပိူဝ်ႈၼႆလႄႈၸဝ်ႈယေႇသုသမ်ႉလၢတ်ႈထႅင်ႈလႄႈဝႃႈ၊-ၵဝ်ဝႃႈတီႈၸိုဝ်ႈတီႈၸႂ်ႈၸမ်းၵဝ်ပဵၼ်ႁူးၽၵ်းတူဢၼ်သူဝ်းၶဝ်ႈၼၼ်ႉဢေႃႈ။

၈ ၶဝ်ၸိူဝ်းဢၼ်ပေႃႇမႃးဢွၼ်တၢင်းၵဝ်ၵႃႈမီးတင်းသဵင်ႈတင်းလူင်ၸိူဝ်းၼၼ်ႉပဵၼ်ၽူႈလၵ်ႉၵူၼ်းၸူၼ်ဢေႃႈ။သူဝ်းတင်းလၢႆဢမ်ႇထွမ်ႇဢဝ်သဵင်ၵႂၢမ်းၶဝ်ၼၼ်ႉ။ၵဝ်ပဵၼ်ႁူးၽၵ်းတူဢေႃႈ။

၉ ၵေႃႉဢၼ်ၸူးၵႃႈတီႈၵဝ်လႄႈၶဝ်ႈၵႂႃႇၼၼ်ႉတၵ်းၵၢင်းလွတ်ႈတင်းၽေးလႄႈတၵ်းလႆႈၶဝ်ႈၶဝ်ႈဢွၵ်ႇဢွၵ်ႇၵႂႃႇၵႂႃႇမႃးမႃးထူပ်းတီႈဢၼ်ၵိၼ်ယူႇသေႇသေႇဢေႃႈ။

၁၀ ၽူႈလၵ်ႉၸမ်းမႃးႁႂ်ႈလႆႈလၵ်ႉဢဝ်ႁႂ်ႈလႆႈဢဝ်တႆႁႂ်ႈလႆႈယႃႉပႅတ်ႈၵူၺ်းဢေႃႈ။ၵဝ်ၸမ်းမႃးႁႂ်ႈသူဝ်းတင်းလၢႆလႆႈဢသၢၵ်ႈၵူၺ်းဢမ်ႇၵႃးႁႂ်ႈလႆႈတဵမ်ထူၼ်ႈဝႆႉတင်းဢသၢၵ်ႈဢေႃႈ။

၁၁ ၵဝ်ပဵၼ်ၵေႃႉဢၼ်လဵင်ႉသူဝ်းထိင်းသူဝ်းဢၼ်လီဢေႃႈ။ၵေႃႉဢၼ်လဵင်ႉသူဝ်းထိင်းသူဝ်းဢၼ်လီၼၼ်ႉၸၢင်ႊၸုၼ်ႉဢသၢၵ်ႈတူဝ်ၸဝ်ႈၵဝ်ႇပုၼ်ႈသူဝ်းတင်းလၢႆဢေႃႈ။

၁၂ ၵေႃႉဢၼ်လဵင်ႉသူဝ်းဢၼ်ဢမ်ႇၸိုဝ်ႈဢမ်ႇၸႂ်ႈဢၼ်ဢမ်ႇပိူင်ႇသူဝ်းဢၼ်ပဵၼ်ၵူၼ်းၵိၼ်ၸၢင်ႈၵိၼ်ငႃးၼၼ်ႉၸမ်းမိူဝ်ႈဢၼ်ႁၼ်မႃထိူၼ်ႇမႃးၼၼ်ႉၸိုင်ၸၢင်ႊပႅတ်ႈဝႆႉသူဝ်းတင်းလၢႆသေလႄႈဢွၵ်ႇပၢႆႊဢေႃႈ။မႃထိူၼ်ႇၵေႃႈၵၢပ်ႈၶူပ်းသူဝ်းၸိူဝ်းၼၼ်ႉလႄႈႁႂ်ႈမိူၵ်ႇမိူဝ်ၵႂႃႇဢေႃႈ။

၁၃ ၵေႃႉၼၼ်ႉပိူဝ်ႈဢၼ်ပဵၼ်ၵူၼ်းဢၼ်ၵိၼ်ၸၢင်ႈၵိၼ်ငႃးၵူၺ်းလႄႈယင်းဢမ်ႇၶႆႈၸႂ်ပုၼ်ႈသူဝ်းတင်းလၢႆလႄႈၸၢင်ႊဢွၵ်ႇပၢႆဢေႃႈ။

၁၄ ၵဝ်ၸမ်းပဵၼ်ၵေႃႉဢၼ်လဵင်ႉသူဝ်းထိင်းသူဝ်းဢၼ်လီဢေႃႈ။ၸိူဝ်ႉၼင်ႇဢၼ်ပေႃႈၸဝ်ႈႁူႉၵဝ်လႄႈၵဝ်ၵေႃႈႁူႉပေႃႈၸဝ်ႈၼၼ်ႉၵဝ်ႁူႉသူဝ်းၵဝ်တင်းလၢႆယူႇဢေႃႈ။

၁၅ သူဝ်းၵဝ်တင်းလၢႆၸိူဝ်းၼၼ်ႉၵေႃႈႁူႉၵဝ်ယူႇဢေႃႈ။ၵဝ်ၸုၼ်ႉဢသၢၵ်ႈတူဝ်ၸဝ်ႈၵဝ်ႇပုၼ်ႈသူဝ်းၸိူဝ်းၼၼ်ႉဢေႃႈ။

၁၆ သူဝ်းတၢင်ႇတီႈတၢင်ႇလႅၼ်ဢၼ်ဢမ်ႇၶဝ်ႈၵႃႈၼႂ်းၶွၵ်ႈၼႆႉၼၼ်ႉၵေႃႈၵဝ်ပိူင်ႇယူႇလူးၵွၼ်ႇဢေႃႈ။ၵဝ်တၵ်းလႆႈဢဝ်သူဝ်းၸိူဝ်းၼၼ်ႉမႃးဢေႃႈ။ၶဝ်ၵေႃႈတၵ်းထွမ်ႇသဵင်ၵဝ်လႄႈတၵ်းလႆႈမီးၶွၵ်ႈသူဝ်းဢၼ်ၼိုင်ႈဢိၵ်ႇတင်းၵေႃႉလဵင်ႉသူဝ်းထိင်းသူဝ်းၵေႃႉလဵဝ်ၵူၺ်းဢေႃႈ။

၁၇ ပိူဝ်ႈဢၼ်ၵဝ်ၸုၼ်ႉဢသၢၵ်ႈတူဝ်ၸဝ်ႈၵဝ်ႇသေယဝ်ႉၵမ်းလိုၼ်းသမ်ႉၶိုၼ်းဢဝ်ၶိုၼ်းလႄႈပေႃႈၸဝ်ႈႁၵ်ႉၵဝ်ဢေႃႈ။

၁၈ ၽူႈလႂ်ဢမ်ႇဢဝ်ဢသၢၵ်ႈၵဝ်။ၸွမ်းၼင်ႇဢလူဝ်ႇၸဝ်ႈၵဝ်ႇလႄႈၵဝ်ၸုၼ်ႉဢေႃႈ။ဢၶႂၢင်ႉဢၼ်ၸုၼ်ႉဢသၢၵ်ႈတူဝ်ၸဝ်ႈၵဝ်ႇၼၼ်ႉမီးတီႈၵဝ်ဢေႃႈ။ဢၶႂၢင်ႉဢၼ်တၵ်းၶိုၼ်းဢဝ်ဢသၢၵ်ႈၶိုၼ်းၵမ်းလိုၼ်းၼၼ်ႉၵေႃႈမီးတီႈၵဝ်ဢေႃႈ။ပေႃႈၸဝ်ႈပၼ်ဢၶႂၢင်ႉၼၼ်ႉတီႈၵဝ်ယဝ်ႉ၊ဝႃႈၼင်ႇၼႆဢေႃႈ။

၁၉ ၵွပ်ႈပိူဝ်ႈၵႂၢမ်းမၼ်းၸဝ်ႈၼၼ်ႉၵူၼ်းယုတၸိူဝ်းၼၼ်ႉမီးတၢင်းဢၼ်ဢမ်ႇထုၵ်ႇဢမ်ႇမေႃၵၼ်လႄႈၽၢတ်ႇၽႄၵၼ်ထႅင်ႈဢေႃႈ။ၵူၼ်းၼမ်ၼႃႇဝႃႈ၊-မၼ်းၼႆႉၽီႁၢႆႉၶဝ်ႈလႄႈပဵၼ်ၵူၼ်းယွင်ႇဢေႃႈ။

၂၀ ႁဵတ်းႁိုဝ်လႄႈထွမ်ႇဢဝ်ၵႂၢမ်းမၼ်း၊ဝႃႈၼင်ႇၼႆဢေႃႈ။ၵမ်ႈၽွင်ႈၵေႃႈဝႃႈ၊-

၂၁ ၵႂၢမ်းမၼ်းၼႆႉပဵၼ်ၵႂၢမ်းၵူၼ်းဢၼ်ၽီႁၢႆႉၶဝ်ႈဢမ်ႇၸႂ်ႈ။ၸွင်ႇၽီႁၢႆႉတတ်ႈၼိုင်ႇႁဵတ်းႁႂ်ႈလႆႈၽုၺ်ႇမၢၵ်ႇတႃၶဝ်ၸိူဝ်းဢၼ်တႃမွတ်ႇၼၼ်ႉႁိုဝ်၊ဝႃႈၼင်ႇၼႆဢေႃႈ။

ၵူၼ်းယုတလႂ်ဢမ်ႇယုမ်ႇမၢတ်ႈ

၂၂ မိူဝ်ႈၼၼ်ႉပဵၼ်ၶိင်ႇၵတ်းလႄႈပဵၼ်ၶိင်ႇဢၼ်ၶဝ်ၶၢမ်ႇပွႆးဢၸႅၼ်ႇဢၼ်ႁဵတ်းဢၼူႉမေႃးတၼႃႇပိၵ်ႉမၢၼ်ႇၸဝ်ႈၵႃႈတီႈဝဵင်းယေႇရုသလႅမ်ႇၼၼ်ႉဢေႃႈ။

၂၃ ၸဝ်ႈယေႇသုၵေႃႈပႆသၢင်းၵျၢၼ်ႇၵႃႈၼႂ်းပိၵ်ႉမၢၼ်ႇၸဝ်ႈၵႃႈတီႈၸၢၼ်းသေႃးလမုၼ်ႇယူႇဢေႃႈ။ပိူဝ်ႈၼႆလႄႈၵူၼ်းယုတၸိူဝ်းၼၼ်ႉဝႅင်းႁွပ်ႈမၼ်းၸဝ်ႈသေလႄႈလၢတ်ႈဝႃႈ၊-

၂၄ ၸဝ်ႈႁဝ်းတေႁႂ်ႈႁဝ်းၶႃႈယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈၶိင်ႇၵႃႇလႃႉႁိုင်ၵႃႈႁိုဝ်ၶႃႈ။ပေႃးၸဝ်ႈႁဝ်းၸႂ်ႈၸဝ်ႈၶရိၸ်ႉၸိုင်ၶႅၼ်းတေႃႈလၢတ်ႈလႅင်းလႅင်းသေၵမ်းၶႃႈ၊ဝႃႈၼင်ႇၼႆဢေႃႈ။

၂၅ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ၵဝ်လၢတ်ႈယဝ်ႉ။သူဢမ်ႇယုမ်ႇ။လွင်ႈတၢင်းဢၼ်ၵဝ်ပႃးတင်းဢၶႂၢင်ႉၸဝ်ႈပေႃႈၵဝ်သေလႄႈႁဵတ်းၸိူဝ်းၼၼ်ႉပဵၼ်သၢၵ်ႈသေႇၵဝ်ယူႇဢေႃႈ။

၂၆ ၼႂ်းဝႃႈၼၼ်သေၵေႃႈသူဢမ်ႇယုမ်ႇ။လွင်ႈမၼ်းၸမ်းၸိူဝ်ႉၼင်ႇဢၼ်ၵဝ်လၢတ်ႈဝႆႉဢွၼ်တၢင်းၼၼ်ႉသူဢမ်ႇၶဝ်ႈပႃးၼႂ်းသူဝ်းၵဝ်ၼၼ်ႉ၊

၂၇ သူဝ်းၵဝ်ၸိူဝ်းၼၼ်ႉထွမ်ႇသဵင်ၵဝ်လႄႈၸွမ်းပႃႈလင်ၵဝ်ဢေႃႈ။

၂၈ ထႃႇဝရႃႉဢသၢၵ်ႈၵေႃႈၵဝ်ပၼ်တီႈၶဝ်ဢေႃႈ။ၶဝ်ၼၼ်ႉတၵ်းၵၢင်းလွတ်ႈတင်းတၢင်းလူႉတၢင်းလႅဝ်တႃႇသေႇဢမ်ႇထၢတ်ႇဢေႃႈ။ၽူႈလႂ်သေၵေႃႉသေၵူၼ်ဢမ်ႇၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိုဝ်းၵဝ်လႆႈ။

၂၉ ၸဝ်ႈပေႃႈၵဝ်ဢၼ်ဢဝ်သူဝ်းၸိူဝ်းၼၼ်ႉဢၢပ်ႈပၼ်တီႈၵဝ်ၼၼ်ႉယဵင်ႈၶႅၼ်းယႂ်ႇမျၢတ်ႈၼႃႇသေပိူၼ်ႈတင်းသဵင်ႈတင်းလူင်လႄႈၽူႈလႂ်သေၵေႃႉသေၵူၼ်းဢမ်ႇၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိုဝ်းပေႃႈၸဝ်ႈလႆႈ။

၃၀ ၵဝ်ဢိၵ်ႇတင်းပေႃႈၸဝ်ႈပဵၼ်ဢၼ်လဵဝ်ၵၼ်ဢေႃႈ၊ဝႃႈၼင်ႇၼႆဢေႃႈ။

၃၁ မိူဝ်ႈၼၼ်ႉၵူၼ်းယုတၸိူဝ်းၼၼ်ႉၵဵပ်းဢဝ်မၢၵ်ႇႁိၼ်ႁႂ်ႈလႆႈထိမ်ႈမၼ်းၸဝ်ႈဢေႃႈ။

၃၂ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ၵဝ်ပႃးတင်းဢၶႂၢင်ႉပေႃႈၸဝ်ႈသေလႄႈၼႄပျႃႉလွင်ႈတၢင်းဢၼ်လီဢၼ်ငၢမ်းၼမ်ၼႃႇတီႈသူယဝ်ႉ။ၼႂ်းလွင်ႈတၢင်းၸိူဝ်းၼၼ်ႉၵွပ်ႈပိူဝ်ႈလွင်ႈတၢင်းဢၼ်လႂ်လႄႈသူသမ်ႉတေဢဝ်မၢၵ်ႇႁိၼ်ထိမ်ႈၵဝ်၊မိူဝ်ႈဢၼ်ဝႃႈၼင်ႇၼႆၸိုင်ၵူၼ်းယုတၸိူဝ်းၼၼ်ႉၵေႃႈၶိုၼ်းလၢတ်ႈဝႃႈ၊-

၃၃ ၵွပ်ႈပိူဝ်ႈလွင်ႈတၢင်းဢၼ်လီဢၼ်ငၢမ်းလႄႈႁဝ်းတၵ်းဢဝ်မၢၵ်ႇႁိၼ်ထိမ်ႈမႂ်းဢမ်ႇၸႂ်ႈ။ၵွပ်ႈပိူဝ်ႈၵႂၢမ်းဢၼ်သေႉသွမ်းၽြႃးပဵၼ်ၸဝ်ႈဢိၵ်ႇတင်းၵွပ်ႈပိူဝ်ႈဢၼ်မႂ်းပဵၼ်ၵူၼ်းယူႇၼႆၵေႃႈသမ်ႉႁဵတ်းၸိူဝ်ႉၼင်ႇၽြႃးပဵၼ်ၸဝ်ႈလႄႈႁဝ်းတၵ်းဢဝ်မၢၵ်ႇႁိၼ်ထိမ်ႈမႂ်းဢိူဝ်ႈ၊ဝႃႈၼင်ႇၼႆဢေႃႈ။

၃၄ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ၼႂ်းၵျၢမ်းပိင်းၺၢပ်ႈတိသူၼၼ်ႉမီးဝႆႉလႄႈဝႃႈ၊-ၵဝ်ဝႃႈသူပဵၼ်ၽြႃးဢေႃႈ၊ဝႃႈၼင်ႇၼႆဢမ်ႇၸႂ်ႈႁိုဝ်။

၃၅ ပေႃးလႆႈႁွင်ႉၶဝ်ၸိူဝ်းဢၼ်လႆႈၶၢမ်ႇဢဝ်ပျႃႇတိၵ်ႈၽြႃးပဵၼ်ၸဝ်ႈၼၼ်ႉဝႃႈ၊ၽြႃး၊ဝႃႈၼင်ႇၼႆလႄႈတၵ်းဢမ်ႇလႆႈပႄႇပႅတ်ႈၵႂၢမ်းၵျၢမ်းလိၵ်ႈၼၼ်ႉၸိုင်ပေႃးၵေႃႉဢၼ်ပေႃႈၸဝ်ႈႁႂ်ႈမူတ်းၸၢင်ႇလႄႈပွႆႇၸႂ်ႉမႃးၼႂ်းလေႃးၵႃႉၼႆႉၼၼ်ႉလၢတ်ႈဝႃႈ၊-

၃၆ ၵဝ်ပဵၼ်လုၵ်ႈၽြႃးပဵၼ်ၸဝ်ႈဢေႃႈ၊ဝႃႈၼင်ႇၼႆၸိုင်၊သူသမ်ႉလၢတ်ႈတီႈၵေႃႉၼၼ်ႉလႄႈဝႃႈ၊-မႂ်းသေႉသွမ်းၽြႃးပဵၼ်ၸဝ်ႈယဝ်ႉဝႃႈၼင်ႇၼႆႁိုဝ်။

၃၇ သင်ၵဝ်ဢမ်ႇႁဵတ်းလွင်ႈတၢင်းဢၼ်ၸၢပ်ႈသႅင်ႇၵၼ်တင်းပေႃႈၸဝ်ႈၸိူဝ်းၼၼ်ႉၸိုင်ယႃႇပေယုမ်ႇမၢတ်ႈၵဝ်။ၵူၺ်းၵႃႈပေႃးၵဝ်ႁဵတ်းၸိုင်ပဵၵ်ႉသမ်ႉသူဢမ်ႇယုမ်ႇမၢတ်ႈၵဝ်သေၵေႃႈယုမ်ႇမၢတ်ႈလွင်ႈတၢင်းဢၼ်ၵဝ်ႁဵတ်းၸိူဝ်းၼၼ်ႉတႃႉ။

၃၈ ပေႃးယုမ်ႇၸိူဝ်ႉၼင်ႇၼၼ်ၸိုင်သူတၵ်းႁူႉၸႅင်ႈလွင်ႈဢၼ်ဝႃႈပေႃႈၸဝ်ႈမီးယူႇၼႂ်းၵဝ်ဢိၵ်ႇတင်းလွင်ႈဢၼ်ဝႃႈၵဝ်မီးယူႇၼႂ်းပေႃႈၸဝ်ႈၼၼ်ႉဢေႃႈ၊ဝႃႈၼင်ႇၼႆဢေႃႈ။

၃၉ မိူဝ်ႈၼၼ်ႉၶဝ်သမ်ႉၶိုၼ်းႁႃႁႂ်ႈလႆႈတီႉဢဝ်မၼ်းၸဝ်ႈထႅင်ႈလႄႈမၼ်းၸဝ်ႈၵေႃႈဢွၵ်ႇသေၵႃႈၼႂ်းမိုဝ်းၶဝ်ၼၼ်ႉၵႂႃႇဢေႃႈ။

၄၀ မၼ်းၸဝ်ႈသမ်ႉၵႂႃႇၵႃႈတီႈၽၢႆႇပုၼ်ႉၼမ်ႉႁွင်ႊယေႃးတၢၼ်ႇတီႈဢၼ်ယုဝ်းႁၢၼ်ႇပၼ်ပပ်ႉတိၸၢမ်ႇမိူဝ်ႈဢွၼ်တၢင်းၼၼ်ႉလႄႈယူႇၵႃႈတီႈၼၼ်ႉဢေႃႈ။

၄၁ ၵူၼ်းၼမ်ၼႃႇႁွတ်ႈထိုင်မႃးၵႃႈတီႈမၼ်းၸဝ်ႈလႄႈလၢတ်ႈဝႃႈ၊-ယုဝ်းႁၢၼ်ႇဢမ်ႇၼႄပျႃးၼီႉမိၵ်ႈလၵ်ႈၶၼႃႇ။ၼႂ်းဝႃႈၼၼ်သေၵေႃႈၵႃႈဢၼ်ယုဝ်းႁၢၼ်ႇလၢတ်ႈလွင်ႈၵေႃႉၼႆႉဝႆႉၼၼ်ႉၸႂ်ႈတႄႉဢေႃႈ၊ဝႃႈၼင်ႇၼႆဢေႃႈ။

၄၂ ၵႃႈတီႈၼၼ်ႉၵူၼ်းၼမ်ၼႃႇယုမ်ႇမၢတ်ႈမၼ်းၸဝ်ႈဢေႃႈ။