Shan Missions

ၵျၢမ်းၶၢဝ်ႇငၢဝ်ႊသတၢင်းသိူဝ်းပျေႃႇယုဝ်းႁၢၼ်ႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂၀    ၂၁   

၁၄ 

ၸဝ်ႈယေႇသုပၼ်ၸႂ်လီတီႈတပႄးၸဝ်ႈ

၁ ၸဝ်ႈယေႇသုသမ်ႉလၢတ်ႈလႄႈဝႃႈ၊-ယႃႇႁႂ်ႈႁူဝ်ၸႂ်သူမီးတၢင်းဢၼ်မႆႈၸႂ်ၶီၸႂ်။ယုမ်ႇမၢတ်ႈၽြႃးပဵၼ်ၸဝ်ႈတႃႉ။

၂ ၵဝ်ၼႆႉၵေႃႈယုမ်ႇမၢတ်ႈတႃႉ။ၼႂ်းႁိူၼ်းၸဝ်ႈပေႃႈၵဝ်ၼၼ်ႉမီးလုၵ်းပုၼ်ႈဢၼ်တၵ်းယူႇၼမ်ၼႃႇဢေႃႈ။ပေႃးဢမ်ႇမီးတႄႉၸိုင်ၵဝ်တၵ်းလၢတ်ႈသူလႄႈဝႃႈၵဝ်ၵႂႃႇႁႂ်ႈလႆႈမႄးႁႅၼ်းဝႆႉပုၼ်ႈဢၼ်သူတၵ်းယူႇၼၼ်ႉဢေႃႈ၊ဝႃႈၼင်ႇၼႆႁိုဝ်။

၃ ပေႃးမႄးႁႅၼ်းယဝ်ႉၸင်ႇၵဝ်သမ်ႉတၵ်းၶိုၼ်းမႃးထႅင်ႈလႄႈဢဝ်သူၵႂႃႇၵႃႈတီႈၵဝ်ပုၼ်ႉႁႂ်ႈသူလႆႈမီးၵႃႈတီႈဢၼ်ၵဝ်မီးၼၼ်ႉဢေႃႈ။

၄ သူႁူႉသဵၼ်ႈတၢင်းဢၼ်ၵႂႃႇၵႃႈတီႈဢၼ်ၵဝ်ၵႂႃႇၼၼ်ႉယူႇဢေႃႈ၊ဝႃႈၼင်ႇၼႆဢေႃႈ။

သဵၼ်ႈတၢင်းဢၼ်ႁွတ်ႈထိုင်တီႈပေႃႈၽြႃးပဵၼ်ၸဝ်ႈ

၅ ထုဝ်းမၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်း၊ႁဝ်းၶႃႈဢမ်ႇႁူႉတီႈဢၼ်ၸဝ်ႈႁဝ်းၵႂႃႇၼၼ်ႉလႄႈႁဵတ်းႁိုဝ်လႄႈတၵ်းႁူႉသဵၼ်ႈတၢင်းမၼ်းလႆႈၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၸဝ်ႈယေႇသုၵေႃႈလၢတ်ႈလႄႈဝႃႈ၊-

၆ ၵဝ်ပဵၼ်သဵၼ်ႈတၢင်းဢေႃႈ။သမ်ႇမႃႇတြႃးၵေႃႈပဵၼ်ဢေႃႈ။ဢသၢၵ်ႈၵေႃႈပဵၼ်ဢေႃႈ။ပေႃးဢမ်ႇဢိင်ပိုင်ႈၵဝ်ၸိုင်ၽူႈလႂ်သေၵေႃႉသေၵူၼ်းဢမ်ႇႁွတ်ႈထိုင်ၵႃႈတီႈၸဝ်ႈပေႃႈၵဝ်ၼၼ်ႉလႆႈ။

၇ ပေႃးသူႁူႉၵဝ်ၸိုင်ၸဝ်ႈပေႃႈၵဝ်ၵေႃႈသူတၵ်းႁူႉယူႇဢေႃႈ။ၸႃႉၸဵမ်တေႃႈလဵဝ်ၼႆႉသူႁူႉမၼ်းၸဝ်ႈလႄႈလႆႈႁၼ်မၼ်းၸဝ်ႈယဝ်ႉ၊ဝႃႈၼင်ႇၼႆဢေႃႈ။

၈ ၽိလိပ်ႉပုၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်း၊ၼင်ႇႁိုဝ်ဢလူဝ်ႇႁဝ်းၶႃႈတၵ်းတဵမ်ထူၼ်ႈၸိုင်ၶႅၼ်းတေႃႈၼႄပၼ်ပေႃႈၸဝ်ႈၼၼ်ႉတီႈႁဝ်းၶႃႈသေၵမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊

၉ ၸဝ်ႈယေႇသုၵေႃႈလၢတ်ႈလႄႈဝႃႈ၊-ၽိလိပ်ႉပုဢိူၺ်း။ၵဝ်မီးယူႇလူၺ်ႈၵၼ်တင်းမႂ်းႁိုင်ထၢၼ်ႇၼႆႉယဝ်ႉ။မႂ်းယင်းဢမ်ႇပႆႇႁူႉၸၵ်းၵဝ်လူးၵွၼ်ႇႁိုဝ်း။ၵေႃႉဢၼ်ႁၼ်ၵဝ်ၼၼ်ႉႁၼ်ပေႃႈၸဝ်ႈယဝ်ႉ။ပေႃးပဵၼ်ၸိူဝ်ႉၼင်ႇၼႆၸိုင်ႁဵတ်းၸိူဝ်ႉၼင်ႇႁိုဝ်လႄႈမႂ်းဝႃႈ၊-ၶႅၼ်းတေႃႈၼႄပေႃႈၸဝ်ႈၼၼ်ႉပၼ်တီႈႁဝ်းၶႃႈသေၵမ်းၶႃႈ၊ဝႃႈၼင်ႇၼႆ။

၁၀ မႂ်းဢမ်ႇယုမ်ႇလွင်ႈဢၼ်ၵဝ်မီးယူႇၼႂ်းပေႃႈၸဝ်ႈဢိၵ်ႇတင်းလွင်ႈဢၼ်ပေႃႈၸဝ်ႈမီးယူႇၼႂ်းၵဝ်ၼၼ်ႉႁိုဝ်။ၵႂၢမ်းဢၼ်ၵဝ်ႁေႃးလၢတ်ႈၼၼ်ႉၵဝ်ႁေႃးလၢတ်ႈၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢမ်ႇၸႂ်ႈ။လွင်ႈတၢင်းဢၼ်ၵဝ်ႁဵတ်းၸိူဝ်းၼၼ်ႉၵေႃႈပဵၼ်ပေႃႈၸဝ်ႈဢၼ်တႄႇယူႇၼႂ်းၵဝ်ၼၼ်ႉႁဵတ်းဢေႃႈ။

၁၁ ယုမ်ႇလွင်ႈဢၼ်ၵဝ်မီးယူႇၼႂ်းပေႃႈၸဝ်ႈဢိၵ်ႇတင်းပေႃႈၸဝ်မီးယူႇၵႃႈၼႂ်းၵဝ်ၼၼ်ႉတႃႉ။ပေႃးဢမ်ႇယုမ်ႇၵႂၢမ်းၵဝ်ၼႆၵေႃႈထွၵ်ႈလူၺ်ႈလွင်ႈတၢင်းဢၼ်ၵဝ်ႁဵတ်းၸိူဝ်းၼၼ်ႉလႄႈယုမ်ႇတႃႉ။

၁၂ ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်းၵေႃႉဢၼ်ယုမ်ႇမၢတ်ႈၵဝ်ၼၼ်ႉတၵ်းႁဵတ်းလွင်ႈတၢင်းဢၼ်ၵဝ်ႁဵတ်းၸိူဝ်းၼၼ်ႉဢေႃႈ။လွင်ႈတၢင်းဢၼ်ယဵင်ႈၶႅၼ်းယႂ်ႇၼႃႇသေလွင်ႈတၢင်းၸိူဝ်းၼၼ်ႉၵေႃႈမၼ်းတၵ်းႁဵတ်းဢေႃႈ။

၁၃ လွင်ႈမၼ်းၸမ်းၵဝ်ၵႂႃႇၵႃႈတီႈပေႃႈၸဝ်ႈပုၼ်ႉသေလႄႈၼင်ႇႁိုဝ်မူၼ်ၽုင်းပေႃႈၸဝ်ႈတၵ်းလႆႈမီးတၢင်းဢၼ်ထၢင်ႇသႃးမႃးၵႂပ်ႈပိူဝ်ႈလုၵ်ႈၸဝ်ႈၼၼ်ႉၸိုင်ၵဝ်တၵ်းႁဵတ်းၵႃႈၼင်ႇဢၼ်သူဢိင်ပိုင်ႈၼႃႇမႃႉၸိုဝ်သဵင်ၵဝ်သေလႄႈသူးတွင်းၵႃႈမီးတင်းသဵင်ႈတင်းလူင်ၼၼ်ႉဢေႃႈ။

၁၄ ပေႃးသူဢိင်ပိုင်ႈၼႃႇမႃႉၸိုဝ်သဵင်ၵဝ်သေလႄႈယွၼ်းသူးသေၸိူဝ်ႉသေပိူင်ၸိုင်ၵဝ်တၵ်းပၼ်ဢေႃႈ။

ဝိၺိၺ်ႇမူတ်းၸၢင်ႇၸဝ်ႈတၵ်းၵျွႃးလူင်းမႃး

၁၅ ပေႃးသူႁၵ်ႉၵဝ်ၸိုင်သူတၵ်းပႂ်ႉၸွမ်းပိင်းၺၢပ်ႈၵဝ်တင်းလၢႆဢေႃႈ။ၵဝ်ၵေႃႈတၵ်းယွၼ်းတီႈပေႃႈၸဝ်ႈလႄႈမၼ်းၸဝ်ႈတၵ်းပၼ်သြႃႇဢုပိတ်ႉသေႇတၢင်ႇပႃး

၁၆ ဢၼ်ဝႃႈဝိၺိၺ်ႇမူတ်းၸၢင်ႇၸဝ်ႈဢၼ်တၵ်းၼႄပျႃးသမ်ႇမႃႇတြႃးဢၼ်တၵ်းလႆႈမီးယူႇလူၺ်ႈၵၼ်တင်းသူတႃႇသေႇၼၼ်ႉဢေႃႈ။

၁၇ ဝိၺိၺ်ႇမူတ်းၸၢင်ႇၸဝ်ႈၼၼ်ႉပိူဝ်ႈဢၼ်လေႃးၵႃႉၼႆႉဢမ်ႇႁူႉဢမ်ႇႁၼ်လႄႈဢမ်ႇၶၢမ်ႇဢမ်ႇဢဝ်လႆႈ။ပိူဝ်ႈဢၼ်ဝိၺိၺ်ႇမူတ်းၸၢင်ႇၸဝ်ႈၼၼ်ႉတႄႇယူႇလူၺ်ႈၵၼ်တင်းသူ၊မီးယူႇၼႂ်းသူလႄႈသူလႆႈႁူႉဢေႃႈ။

၁၈ ၵဝ်တၵ်းၸုၼ်ႉပႅတ်ႈသူႁႂ်ႈသူလႆႈပဵၼ်ၵေႃႉဢၼ်ၽၢၼ်ပေႃႈၽၢၼ်မေႈယူႇဢမ်ႇၸႂ်ႈ။ၵဝ်တၵ်းၶိုၼ်းမႃးတီႈသူထႅင်ႈလူးၵွၼ်ႇဢေႃႈ။

၁၉ ႁိုင်ၵမ်းဢွၼ်ႇၼိုင်ႈၵူၺ်းသေယဝ်ႉလေႃးၵႃႉၼႆႉတၵ်းဢမ်ႇလႆႈႁၼ်ၵဝ်။သူၸမ်းတၵ်းလႆႈႁၼ်ၵဝ်ဢေႃႈ။ပိူဝ်ႈဢၼ်ၵဝ်ဢသၢၵ်ႈလိပ်းယူႇလႄႈသူၵေႃႈဢသၢၵ်ႈတၵ်းလႆႈလိပ်းယူႇဢေႃႈ။

၂၀ ၼႂ်းဝၼ်းၼၼ်ႉသူတၵ်းလႆႈႁူႉလွင်ႈဢၼ်ဝႃႈၵဝ်မီးယူႇၼႂ်းၸဝ်ႈပေႃႈၵဝ်၊လွင်ႈဢၼ်သူမီးယူႇၼႂ်းၵဝ်၊လွင်ႈဢၼ်ၵဝ်မီးယူႇၼႂ်းသူ၊ၼၼ်ႉဢေႃႈ။

၂၁ ၶဝ်ၸိူဝ်းဢၼ်လႆႈပိင်းၺၢပ်ႈၵဝ်တင်းလၢႆလႄႈပႂ်ႉၸွမ်းၼၼ်ႉပဵၼ်ၵေႃႉဢၼ်ႁၵ်ႉၵဝ်ဢေႃႈ။ၶဝ်ၸိူဝ်းဢၼ်ႁၵ်ႉၵဝ်ၼၼ်ႉၸဝ်ႈပေႃႈၵဝ်တၵ်းႁၵ်ႉၶဝ်ဢေႃႈ။ၵဝ်ၵေႃႈတၵ်းႁၵ်ႉၶဝ်လႄႈၼႄပျႃးတူဝ်ၸဝ်ႈၵဝ်ႇထၢင်ႇသႃးၵႃႈတီႈၶဝ်ၼၼ်ႉဢေႃႈ၊ဝႃႈၼင်ႇၼႆဢေႃႈ။

၂၂ ယုတဢၼ်ဢမ်ႇၸႂ်ႈယုတဢိသၵႃႇရေႇဢုတ်ႉၼၼ်ႉလဝ်ႈထၢမ်လႄႈဝႃႈ၊-ၸဝ်ႈႁဝ်း၊ၸဝ်ႈႁဝ်းယင်းဢမ်ႇၼႄပျႃးတီႈလေႃးၵႃႉၼႆႉလႄႈၶႂ်ႈၼႄပျႃးတီႈႁဝ်းၶႃႈၵူၺ်းၸိူဝ်ႉၼင်ႇႁိုဝ်ၶႃႈ၊ဝႃႈၼင်ႇၼႆဢေႃႈ။

၂၃ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ၶဝ်ၸိူဝ်းဢၼ်ႁၵ်ႉၵဝ်ၼၼ်ႉတၵ်းထွမ်ႇဢဝ်ၵႂၢမ်းၵဝ်ဢေႃႈ။ၸဝ်ႈပေႃႈၵဝ်တၵ်းႁၵ်ႉၶဝ်ဢေႃႈ။ႁဝ်းၵေႃႈတၵ်းမႃးတီႈမၼ်းလႄႈၶျႃးတီႈယူႇလူၺ်ႈၵၼ်တင်းၶဝ်ဢေႃႈ။

၂၄ ၵေႃႉဢၼ်ဢမ်ႇႁၵ်ႉၵဝ်ၼၼ်ႉဢမ်ႇထွမ်ႇဢမ်ႇဢဝ်ၵႂၢမ်းၵဝ်။ၵႂၢမ်းဢၼ်သူငိၼ်းၼႆႉပဵၼ်ၵႂၢမ်းၵဝ်ဢမ်ႇၸႂ်ႈ။

၂၅ ပဵၼ်ၵႂၢမ်းပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉဢေႃႈ။ၵဝ်လၢတ်ႈၵႂၢမ်းၼႆႉဝႆႉၼႂ်းမိူဝ်ႈဢၼ်ၵဝ်ယင်းမီးယူႇလူၺ်ႈၵၼ်တင်းသူၼႆႉယဝ်ႉ။

၂၆ သြႃႇဢုပိတ်ႉသေႇဢၼ်ဝႃႈဝိၺိၺ်ႇမူတ်းၸၢင်ႇၸဝ်ႈဢၼ်ပေႃႈၸဝ်ႈတၵ်းပွႆႇၸႂ်ႉမႃးၼႂ်းၼႃႇမႃႉၸိုဝ်သဵင်ၵဝ်ၼၼ်ႉတၵ်းၼႄပျႃးသင်ႇသွၼ်လွင်ႈတၢင်းတင်းသဵင်ႈတင်းလူင်ၵူႈၸိူဝ်ႉၵူႈပိူင်တီႈသူလႄႈႁႂ်ႈသူၶုၵ်းၸႂ်လႆႈၶႆႈၸႂ်ထူပ်းၵႂၢမ်းဢၼ်ၵဝ်လၢတ်ႈဝႆႉယဝ်ႉတင်းသဵင်ႈတင်းလူင်ၸိူဝ်းၼၼ်ႉဢေႃႈ။

၂၇ ၵဝ်ဢဝ်တၢင်းၼိမ်ဝႆႉတီႈသူဢေႃႈ။တၢင်းၼိမ်ၵဝ်ၼၼ်ႉၵဝ်ပၼ်ဝႆႉတီႈသူဢေႃႈ။ၵဝ်ပၼ်ၸိူဝ်ႉၼင်ႇလေႃးၵႃႉပၼ်ၼၼ်ႉဢမ်ႇၸႂ်ႈ။

၂၈ ယႃႇပေႁႂ်ႈႁူဝ်ၸႂ်သူမီးတၢင်းဢၼ်ယၢပ်ႇၸႂ်မႆႈၸႂ်လႄႈသၼ်ႇဝႆၵူဝ်ႁႄ။သူလႆႈငိၼ်းၵႂၢမ်းဢၼ်ၵဝ်လၢတ်ႈဝႃႈပဵၵ်ႉသမ်ႉၵဝ်ၵႂႃႇတေႃႈလဵဝ်ၼႆႉသေၵေႃႈၵဝ်တၵ်းၶိုၼ်းမႃးတီႈသူထႅင်ႈလူးၵွၼ်ႇဢေႃႈ၊ဝႃႈၼင်ႇၼႆၼၼ်ႉဝႆႉယဝ်ႉ။ပေႃးသူႁၵ်ႉၵဝ်ၸိုင်သူတၵ်းၸူမ်းသိူဝ်းလူၺ်ႈလွင်ႈဢၼ်ၵဝ်တၵ်းၵႂႃႇၵႃႈတီႈပေႃႈၸဝ်ႈၼၼ်ႉဢေႃႈ။လွင်ႈမၼ်းၸမ်းပေႃႈၵဝ်ၼၼ်ႉယဵင်ႈၶႅၼ်ႈယႂ်ႇမျၢတ်ႈၼႃႇသေၵဝ်ဢေႃႈ။

၂၉ မိူဝ်ႈဢၼ်ပဵၼ်မႃးၼၼ်ႉၼင်ႇႁိုဝ်သူတၵ်းယုမ်ႇမၢတ်ႈၸိုင်ၵဝ်ၸင်ႇလႆႈလၢတ်ႈဝႆႉတီႈသူၸူဝ်ႈဢၼ််ႉဢမ်ႇပႆႇပဵၼ်ၼၼ်ႉယဝ်ႉ။ၵဝ်တၵ်းဢမ်ႇလၢတ်ႈၼမ်ၼမ်တေႃႇသူထႅင်ႈယဝ်ႉ။

၃၀ လွင်ႈမၼ်းၸမ်းၶုၼ်ဢၼ်ဢုပ်ႉပိူင်ႇလေႃးၵႃႉၼႆႉၼၼ်ႉမႃးယူႇဢေႃႈ။ၼႂ်းဝႃႈၼၼ်သေၵေႃႈမၼ်းဢမ်ႇမီးတၼ်းၶူဝ်းၵႃႈၼိူဝ်ၵဝ်။

၃၁ ၵူၺ်းၵႃႈလွင်ႈၼင်ႇႁိုဝ်လေႃးၵႃႉၼႆႉတၵ်းလႆႈႁူႉလွင်ႈဢၼ်ဝႃႈၵဝ်ႁၵ်ႉပေႃႈၸဝ်ႈလႄႈၵဝ်ႁဵတ်းၸွမ်းၵႃႈၼင်ႇဢၼ်ပေႃႈၸဝ်ႈသင်ႇလၢတ်ႈဝႆႉၼၼ်ႉၸိုင်ၸင်ႇတေလႆႈပဵၼ်ဢေႃႈ။ႁဝ်းလုၵ်ႉသေၵႃႈတီႈၼႆႉလႄႈၵႂႃႇတႃႉႁဝ်း။