Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၁၂ 

ပေႇတရုလွတ်ႈဢွၵ်ႇထွင်ႇ

၁ မိူဝ်ႈၼၼ်ႉၶုၼ်ႁေႇရုတ်ႉယိုၼ်းမိုဝ်းၸီႇယၢင်ႇႁႂ်ႈလႆႈၼိၵ်ႉၸၢၵ်ႈငႅၼ်းသေးၵူၼ်းၶဝ်ႈၸိူဝ်းၸဝ်ႈၵမ်ႈၽွင်ႈလႄႈ

၂ ဢဝ်လၢပ်ႇၽၼ်းယႃႇၵုပ်ႉ၊ဢၼ်ပဵၼ်ပီႈၸၢႆးယုဝ်းႁၢၼ်ႇၼၼ်ႉတၢႆဢေႃႈ။

၃ မိူဝ်ႈဢၼ်မၼ်းႁၼ်ၵူၼ်းယုတတင်းလၢႆသႂၢင်ႇၸႂ်သိူဝ်းၸႂ်လူၺ်ႈလွင်ႈၼၼ်ႉၸိုင်မၼ်းသမ်ႉႁဵတ်းထႅင်ႈလႄႈတီႉဢဝ်ပေႇတရုဢေႃႈ။ဝၼ်းၼၼ်ႉပဵၼ်ဝၼ်းပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉဢေႃႈ။

၄ မၼ်းတီႉဢဝ်ပေႇတရုသေယဝ်ႉၶင်ဝႆႉၵႃႈၼႂ်းထွင်ႇဢၢပ်ႈပၼ်တီႈၵူၼ်းသိုၵ်းသိပ်းႁူၵ်းၵေႃႉႁႂ်ႈလႆႈပႂ်ႉတူၺ်းမၼ်းလႄႈဢၢင်ႈဢၢၼ်းပေႃးဝၢႆးပွႆးပႃႈသၶႃႇယဝ်ႉ၊တၵ်းဢဝ်မၼ်းဢွၵ်ႇပၼ်တီႈၵူၼ်းတင်းလၢႆဢေႃႈ။

၅ ၼႂ်းမိူဝ်ႈဢၼ်ပေႇတရုလႆႈၶၢမ်ႇတူၵ်းၵႅၼ်းယူႇၵႃႈၼႂ်းထွင်ႇၼၼ်ႉၵူၼ်းၶဝ်ႈၸိူဝ်းၸဝ်ႈတင်းလၢႆၸိူဝ်းၼၼ်ႉဢွၼ်ၵၼ်ၶတ်းၸႂ်ႁဵတ်းသူးတွင်းပထၼႃႇတီႈၽြႃးပဵၼ်ၸဝ်ႈပုၼ်ႈမၼ်းဢေႃႈ။

၆ မိူဝ်ႈဢၼ်ၸမ်ၶိင်ႇဢၼ်ၶုၼ်ႁေႃၶမ်းႁေႇရုတ်ႉတၵ်းဢဝ်မၼ်းဢွၵ်ႇၼၼ်ႉၸိုင်ၼႂ်းၶိင်ႇၵၢင်ၶိုၼ်းပေႇတရုလႆႈၶၢမ်ႇတၢင်းဢၼ်ဢဝ်ၸိူၵ်ႈလဵၵ်းသွင်သဵၼ်ႈမတ်ႉၽုၵ်ႇဝႆႉလႄႈလႆႈၼွၼ်းယူႇၵႃႈၼႂ်းၶိုင်ႈၵၢင်ၵူၼ်းသိုၵ်းသွင်ၵေႃႉဢေႃႈ။

၇ ၵူၼ်းပႂ်ႉၸိူဝ်းၼၼ်ႉၵေႃႈပႂ်ႉၼႃႈၽၵ်းတူထွင်ႇဝႆႉယူႇဢေႃႈ။မိူဝ်ႈၼၼ်ႉတမၢၼ်ႇၵၢင်ႁၢဝ်ထႃႇဝရႃႉၽြႃးပေႃႇမႃးၸုၵ်းယူႇၵႃႈတီႈႁိမ်းမၼ်းလႄႈဢၼ်လႅင်းထွင်ႇႁိူဝ်ႈလႅင်းၵႂႃႇၵႃႈၼႂ်းထွင်ႇၼၼ်ႉဢေႃႈ။တမၢၼ်ႇၵၢင်ႁၢဝ်ၼၼ်ႉတူပ်းသႂ်ႇပဵမ်ႉပေႇတရုသေယဝ်ႉႁႂ်ႈမၼ်းတိုၼ်ႇမႃးလႄႈဝႃႈ၊-လုၵ်ႉၶၼ်ၶၼ်ၽႂ်းၽႂ်းတႃႉ၊ဝႃႈၼင်ႇၼႆဢေႃႈ။မိူဝ်ႈၶိင်ႇၼၼ်ႉၸိူၵ်ႈလဵၵ်းဢၼ်မတ်ႉမိုဝ်းမၼ်းၸိူဝ်းၼၼ်ႉၵေႃႈလူမ်တူၵ်းသေၵႃႈတီႈမိုဝ်းမၼ်းၵႂႃႇၵမ်းလဵဝ်ဢေႃႈ။

၈ တမၢၼ်ႇၵၢင်ႁၢဝ်ၼၼ်ႉၵေႃႈလၢတ်ႈလႄႈဝႃႈ၊-ႁတ်ႉသၢႆဢႅဝ်မႂ်းတႃႉ။တိုဝ်းၶႅပ်းတိၼ်မႂ်းတႃႉ၊ဝႃႈၼႆလႄႈၵႃႈၼင်ႇဢၼ်ဝႃႈၼၼ်ႉ၊ပေႇတရုႁဵတ်းၸွမ်းလႄႈသမ်ႉလၢတ်ႈထႅင်ႈလႄႈဝႃႈ၊-မႆႊၽႃႈမႆႊမႂ်းသေလႄႈၸွမ်းပႃႈလင်ၵဝ်တႃႉ၊ဝႃႈၼင်ႇၼႆဢေႃႈ။

၉ မၼ်းၵေႃႈဢွၵ်ႇၸွမ်းၵႂႃႇလႄႈယင်းဢမ်ႇႁူႉလွင်ႈတၢင်းဢၼ်တမၢၼ်ႇၵၢင်ႁၢဝ်ႁဵတ်းတီႈမၼ်းၼၼ်ႉပဵၼ်တႄႉၼၼ်ႉလႄႈမၼ်းထၢင်ႇတူဝ်ၸဝ်ႈၵဝ်ႇလႆႈႁၼ်ပျႃႇတိၵ်ႈရူႇပႃႇရူင်ႇယူႇၵူၺ်းဢေႃႈ။

၁၀ ဝၢႆးသေပူၼ်ႉၵူၼ်းပႂ်ႉမုၵ်ႉၸုမ်းပထမဢိၵ်ႇတင်းမုၵ်ႉၸုမ်းတုတိယၵႂႃႇယဝ်ႉလႄႈႁွတ်ႈထိုင်ၵႂႃႇၵႃႈတီႈၽၵ်းတူလဵၵ်းဢၼ်ၶဝ်ႈဝဵင်းၼၼ်ႉၽၵ်းတူၼၼ်ႉၽုၺ်ႇၵႂႃႇႁင်းၵူၺ်းမၼ်းလႄႈသွင်ၶႃၵေႃႈဢွၵ်ႇၵႂႃႇသေယဝ်ႉမိူဝ်ႈဢၼ်ႁွတ်ႈထိုင်တၢင်းသဵၼ်ႈၼိုင်ႈၼၼ်ႉတမၢၼ်ႇၵၢင်ႁၢဝ်ၼၼ်ႉၵေႃႈၽၢတ်ႇယၢၼ်ၵၼ်တင်းပေႇတရုၵႂႃႇၵမ်းလဵဝ်ဢေႃႈ။

၁၁ မိူဝ်ႈၼၼ်ႉပေႇတရုၶိုၼ်းလႆႈသတိမႃးသေယဝ်ႉလၢတ်ႈဝႃႈ၊-တေႃႈလဵဝ်ၼႆႉၵဝ်ႁူႉလွင်ႈဢၼ်ၸဝ်ႈၽြႃးပွႆႇၸႂ်ႉတမၢၼ်ႇၵၢင်ႁၢဝ်မၼ်းၸဝ်ႈမႃးလႄႈၵႄႇသႄႇၼုၵ်ႉဢဝ်ၵဝ်ဢွၵ်ႇသေၵႃႈၼႂ်းမိုဝ်းၶုၼ်ႁေႇရုတ်ႉဢိၵ်ႇတင်းၵႃႈၼႂ်းတၢင်းဢၼ်ၵူၼ်းယုတတင်းလၢႆၵျၢမ်ႇပွင်ယူႇၼၼ်ႉလီလီငၢမ်းငၢမ်းယဝ်ႉ၊ဝႃႈၼင်ႇၼႆဢေႃႈ။

၁၂ ၼႂ်းမိူဝ်ႈဢၼ်မၼ်းၶႆႈၸႂ်ဝူၼ်ႉၸႂ်ၸိူဝ်ႉၼင်ႇၼၼ်ယူႇၼၼ်ႉမၼ်းႁွတ်ႈထိုင်ၵႂႃႇၵႃႈတီႈႁိူၼ်းမႃႇရိဢၼ်ပဵၼ်မေႈယုဝ်းႁၢၼ်ႇဢၼ်မီးၸိုဝ်ဝႃႈမႃႇၵုတီႈဢၼ်ၵူၼ်းၼမ်ၼႃႇၸူႉၵၼ်တုမ်ၵၼ်လႄႈသူးတွင်းယူႇၼၼ်ႉဢေႃႈ။

၁၃ မိူဝ်ႈဢၼ်မၼ်းတွႆႇၽၵ်းတူၼႃႈႁိူၼ်းၼၼ်ႉမေႈယိင်းဢွၼ်ႇၵေႃႉၼိုင်ႈဢၼ်လႆႈၸိုဝ်ရုဝ်ႇတေႇၼၼ်ႉမႃးထွမ်ႇလႄႈႁူႉပဵၼ်သဵင်ပေႇတရုသေယဝ်ႉ၊ၵွပ်ႈပိူဝ်ႈဢၼ်မၼ်းသိူဝ်းၸူမ်းၼႃႇလႄႈမၼ်းလိုမ်းၽုၺ်ႇၽၵ်းတူပၼ်လႄႈ

၁၄ မၼ်းလႅၼ်ႈၵႂႃႇၵႃႈၼႂ်းႁိူၼ်းသေယဝ်ႉလၢတ်ႈဝႃႈ၊-ပေႇတရုၸုၵ်းယူႇၵႃႈတီႈၽၢႆႇၼႃႈၽၵ်းတူယူႇဢေႃႈ၊ဝႃႈၼင်ႇၼႆဢေႃႈ။

၁၅ ၶဝ်ၸိူဝ်းၼၼ်ႉၵေႃႈလၢတ်ႈတီႈမၼ်းလႄႈဝႃႈ၊-မႂ်းယွင်ႇယဝ်ႉႁိုဝ်၊ဝႃႈၼႆဢေႃႈ။ပဵၵ်ႉသမ်ႉဝႃႈၸိူဝ်ႉၼႆသေၵေႃႈမၼ်းသမ်ႉလၢတ်ႈတႄႉတႄႉဝႃႈဝႃႈလႄႈဝႃႈ၊-ပဵၼ်မၼ်းတႄႉၶႃႈဢေႃႈ၊ဝႃႈၼင်ႇၼႆလႄႈၶဝ်ၸိူဝ်းၼၼ်ႉၵေႃႈလၢတ်ႈလႄႈဝႃႈ၊-ပဵၼ်တမၢၼ်ႇၵၢင်ႁၢဝ်ပေႇတရုႁိုဝ်၊ဝႃႈၼင်ႇၼႆဢေႃႈ။

၁၆ ၼႂ်းမိူဝ်ႈဢၼ်ပေႇတရုယင်းတိုၵ်ႉတွႆႇၽၵ်းတူယူႇၼၼ်ႉၶဝ်ၽုၺ်ႇၽၵ်းတူလႄႈလႆႈႁၼ်မၼ်းလႄႈဢၢမ်းၼႃႇလူင်လၢင်ဢေႃႈ။

၁၇ မၼ်းၵေႃႈၼႄမိုဝ်းပၼ်ၶဝ်ႁႂ်ႈၶဝ်ယူႇတဵတ်ႇတဵတ်ႇသေယဝ်ႉမၼ်းလၢတ်ႈၼႄၶဝ်လွင်ႈတၢင်းဢၼ်ၸဝ်ႈၽြႃးႁဵတ်းႁိုဝ်ဢဝ်မၼ်းဢွၵ်ႇသေၵႃႈၼႂ်းထွင်ႇမႃးဢၼ်ဝႃႈၼၼ်ႉသေယဝ်ႉလၢတ်ႈဝႃႈ၊-မွၵ်ႇလၢတ်ႈလွင်ႈတၢင်းၸိူဝ်းၼႆႉတီႈယႃႇၵုပ်ႉတင်းပီႈၼွင်ႉတင်းလၢႆတႃႉ၊ဝႃႈၼင်ႇၼႆယဝ်ႉၸင်ႇဢွၵ်ႇၵႂႃႇတၢင်ႇတီႈသေဢေႃႈ။

ၶုၼ်ႁေႇရုတ်ႉတၢႆ

၁၈ မိူဝ်ႈဢၼ်မိူင်းလႅင်းမႃးၸိုင်၊ၵူၼ်းသိုၵ်းၸိူဝ်းၼၼ်ႉပဵၼ်ဢၼ်ဢူၼ်ဢႅၼ်ႁူၼ်ႈမေႃးၵၼ်လူၺ်ႈလွင်ႈဢၼ်ပဵၼ်မႃးတီႈပေႇတရုၸိူဝ်ႉၼင်ႇႁိုဝ်ၼၼ်ႉဢေႃႈ။

၁၉ ၶုၼ်ႁေႇရုတ်ႉၼၼ်ႉမိူဝ်ႈဢၼ်ႁႃပေႇတရုလႄႈဢမ်ႇထူပ်းဢမ်ႇႁၼ်ၼၼ်ႉၸိုင်မၼ်းၸႅတ်ႈထၢမ်တူၺ်းၵူၼ်းပႂ်ႉၸိူဝ်းၼၼ်ႉသေယဝ်ႉမီးဢမိင်ႉႁႂ်ႈဢဝ်ၵူၼ်းပႂ်ႉၸိူဝ်းၼၼ်ႉတၢႆပႅတ်ႈဢေႃႈ။

၂၀ လိုၼ်းၼၼ်ႉၶုၼ်ႁေႇရုတ်ႉလုၵ်ႉသေၵႃႈတီႈမိူင်းယုတလူင်းၵႂႃႇၵႃႈတီႈဝဵင်းၵေႇသရိလႄႈယူႇတီႈၼၼ်ႉဢေႃႈ။မၼ်းၸႂ်မႆႈၶႂ်ႈၸႃႉၵႃႈၼိူဝ်ၵူၼ်းဝဵင်းတုရုဢိၵ်ႇတင်းၵူၼ်းဝဵင်းၸိတုင်ႇတင်းလၢႆၸိူဝ်းၼၼ်ႉဢေႃႈ။ၵူၼ်းမိူင်းၸိူဝ်းၼၼ်ႉဢဝ်တၢင်းၸွႆႈတၢင်းထႅမ်ဢတႂၢင်းဝုၼ်ႇဢၼ်လႆႈၸိုဝ်ပလတ်ႉတုၼၼ်ႉသေယဝ်ႉၽွမ်ႉၵၼ်မႃးတီႈမၼ်းၸဝ်ႈလႄႈလဝ်ႈလၢတ်ႈတွင်းပၢၼ်ႇႁႂ်ႈမိူင်းၶဝ်ၶိုၼ်းလီၵၼ်ဢေႃႈ။လွင်ႈမၼ်းၸမ်းမိူင်းၶဝ်ၼၼ်ႉလႆႈဢိင်ႈမိူင်းမၼ်းၸဝ်ႈၶုၼ်ပုၼ်ႈၶဝ်ႈၼမ်ႉတၢင်းၵိၼ်ဢေႃႈ။

၂၁ ၶုၼ်ႁေႇရုတ်ႉၵေႃႈၼႂ်းဝၼ်းဢၼ်မၵ်းၶဵၼ်းဝႆႉၼၼ်ႉမၼ်းၼုင်ႈၶူဝ်းၼုင်ႈၶုဝ်းမႆႊၶုၼ်သေလႄႈၼင်ႈယူႇၵႃႈၼိူဝ်ပလၢင်ႇသေယဝ်ႉလၢတ်ႈတေႃႇၶဝ်ဢေႃႈ။

၂၂ ၵူၼ်းၸိူဝ်းၼၼ်ႉၵေႃႈဢွၼ်ၵၼ်ႁွင်ႉသႅၼ်ႇလႄႈဝႃႈ၊-သဵင်ၼႆႉဢမ်ႇၸႂ်ႈသဵင်ၵူၼ်း။ပဵၼ်သဵင်ၽြႃးပဵၼ်ၸဝ်ႈဢိူဝ်း၊ဝႃႈၼႆလႄႈဢွၼ်ၵၼ်ယွင်ႈၶုၼ်ၼၼ်ႉဢေႃႈ။

၂၃ ၼႂ်းမိူဝ်ႈဢၼ်ၶဝ်ႁွင်ႉသႅၼ်ႇၸိူဝ်ႉၼင်ႇၼၼ်ယူႇၼၼ်ႉပိူဝ်ႈဢၼ်ၶုၼ်လူင်ၼၼ်ႉဢမ်ႇပၼ်မူၼ်ၵုင်ႇသရေႇတီႈၽြႃးပဵၼ်ၸဝ်ႈလႄႈတမၢၼ်ႇၵၢင်ႁၢဝ်ထႃႇဝရႃႉၽြႃးထုပ်ႉၼၢၵ်ႈမၼ်းၵမ်းလဵဝ်သေယဝ်ႉမူင်ႈၵိၼ်တူဝ်မၼ်းလႄႈတၢႆၵမ်းလဵဝ်ဢေႃႈ။

၂၄ ၼုၵ်ႉၵပၢတ်ႈၸဝ်ႈၽြႃးသႃႇၸွတ်ႇႁူင်ႈႁၢင်းၵႂႃႇလႄႈသႃႇသၼႃႇၵေႃႈယႂ်ႇၵႂၢင်ႈၼမ်မႃးဢေႃႈ။ပႃႇၼပတင်းသေႃးလုၵေႃႈႁွင်ႉဢဝ်ယုဝ်းႁၢၼ်ႇဢၼ်လႆႈၸိုဝ်မႂ်ႇမႃႇၵုၼၼ်ႉသေယဝ်ႉဢွၵ်ႇသေၵႃႈၼႂ်းဝဵင်းယေႇရုသလႅမ်ႇလႄႈမိူဝ်းၵႂႃႇဢေႃႈ။