Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၂

ဝိၺိၺ်ႇမူတ်းၸၢင်ႇၸဝ်ႈၵျွႃးလူင်းမႃး

၁ မိူဝ်ႈဢၼ်ႁွတ်ႈထိုင်ဝၼ်းပွႆးပိၼ်ႇတေႇၵုၵ်ႉတေႇၼၼ်ႉ၊ၶဝ်တင်းသဵင်ႈတင်းလူင်ၸူႉၵၼ်တုမ်ၵၼ်ယူႇတီႈလဵဝ်ဢေႃႈ။

၂ မိူဝ်ႈၶိင်ႇၼၼ်ႉသဵင်ဢၼ်မိူၼ်ၼင်ႇသဵင်လူမ်းၽိဝ်ႁူင်ၼၼ်ႉလုၵ်ႉသေၵႃႈၼိူဝ်ၵၢင်ႁၢဝ်တူၵ်းမႃးၵမ်းလဵဝ်လႄႈတဵမ်ႁိူၼ်းဢၼ်ၶဝ်ၼင်ႈယူႇၼၼ်ႉဢေႃႈ။

၃ မိူဝ်ႈၼၼ်ႉလိၼ်ႉဢၼ်မိူၼ်လိၼ်ႉၽႆးၼၼ်ႉတႅၵ်ႇၵီႈၽုတ်းပေႃႇမႃးလႄႈၵိုတ်းသဝ်းယူႇၵႃႈၼိူဝ်ၶဝ်ႁင်းၽႂ်ႁင်းမၼ်းဢေႃႈ။

၄ မိူဝ်ႈၼၼ်ႉၵမ်းလဵဝ်ၶဝ်တင်းသဵင်ႈတင်းလူင်ၸိူဝ်းၼၼ်ႉတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈလႄႈၵႃႈၼင်ႇဢၼ်ဝိၺိၺ်ႇမူတ်းၸၢင်ႇၸဝ်ႈပၼ်ဢၶႂၢင်ႉၼၼ်ႉ၊ၶဝ်ဢွၼ်ၵၼ်လၢတ်ႈၵႂၢမ်းၽႃႇသႃႇတၢင်ႇၸိူဝ်ႉတၢင်ႇပိူင်ဢေႃႈ။

၅ ၶိင်ႇမိူဝ်ႈၼၼ်ႉၵူၼ်းမဵဝ်းယုတဢၼ်ရူဝ်ႇသေႇၵူဝ်ယမ်ၽြႃးၸိူဝ်းၼၼ်ႉလုၵ်ႉသေၵူႈတီႈၵူႈလႅၼ်ၵႃႈတႂ်ႈၽႃႉၵၢင်ႁၢဝ်ဢွၼ်ၵၼ်မႃးမီးယူႇၵႃႈၼႂ်းဝဵင်းယေႇရုသလႅမ်ႇၼၼ်ႉဢေႃႈ။

၆ ၵူၼ်းၼမ်ၼႃႇဢၼ်မႃးၸူႉၵၼ်တုမ်ၵၼ်ၸိူဝ်းၼၼ်ႉၶဝ်လႆႈငိၼ်းၵႂၢမ်းဢၼ်တမၢၼ်ႇၸဝ်ႈၸိူဝ်းၼၼ်ႉလၢတ်ႈၼၼ်ႉပဵၼ်ၵႂၢမ်းၽႃႇသႃႇၶဝ်ႁင်းၽႂ်ၽႂ်ႁင်းမၼ်းလႄႈၶဝ်ၵိုတ်းမိုင်ၵႂင်ၸႂ်ယူႇဢေႃႈ။

၇ ၶဝ်တင်းသဵင်ႈတင်းလူင်ဢၢမ်းၼႃႇလူင်လၢင်လႄႈၵႂင်ၸႂ်ယုင်ႈၸႂ်ယူႇသေယဝ်ႉၼင်ႇၵၼ်ၵၼ်လၢတ်ႈၵၼ်လႄႈဝႃႈ၊-တူၺ်းလူ၊ၶဝ်ၸိူဝ်းဢၼ်လၢတ်ႈၵႂၢမ်းယူႇတေႃႈလဵဝ်ၼႆႉပဵၼ်ၵူၼ်းမိူင်းၵႃႇလိလႄးဢမ်ႇၸႂ်ႈႁိုဝ်။

၈ ၵႂၢမ်းဢၼ်ႁဝ်းလႆႈငိၼ်းတီႈၶဝ်ၼႆႉပဵၼ်ၵႂၢမ်းၽႃႇသႃႇႁဝ်းႁင်းၽႂ်ႁင်းမၼ်းၼၼ်ႉပဵၼ်လွင်ႈတၢင်းၸိူဝ်ႉၼင်ႇႁိုဝ်။

၉ ႁဝ်းပဵၼ်ၵူၼ်းမိူင်းပႃႇထိ၊မိူင်းမေႇတိ၊မိူင်းဢေႇလၢမ်ႇ၊မိူင်းမေႇသေႃးပေႃးတႃႇမိ၊မိူင်းယုတ၊မိူင်းၵပ်ႉပတေႃႇၵိ၊မိူင်းပွၼ်ႇတု၊မိူင်းဢႃႇသိ၊မိူင်းၽႃႇရုၵိ၊မိူင်းပမ်ႇၽုလိ၊မိူင်းဢေႇၵႅပ်ႉတု၊

၁၀ ဢိၵ်ႇတင်းၵူၼ်းဢၼ်ယူႇဝၢၼ်ႈၼွၵ်ႈၼႃးပၢင်ႇမိူင်းလိပုဢၼ်ၸၢပ်ႈသႅင်ႇၵၼ်တင်းဝဵင်းၵုရေႇၼေႇ၊တင်းၶႅၵ်ႇဢၼ်လုၵ်ႉသေၵႃႈတီႈဝဵင်းရူဝ်းမမႃးဢမ်ႇၸႂ်ႈႁိုဝ်။ပဵၼ်ၵူၼ်းယုတသေဢမ်ႇဝႃႈ၊ပဵၼ်ၵူၼ်းၶဝ်ႈၽႃႇသႃႇသေဢမ်ႇဝႃႈ၊

၁၁ ၵူၼ်းမိူင်းၵရေႇတေႇ၊ၵူၼ်းမိူင်းဢႃႇရေႇပျႃႉသေဢမ်ႇဝႃႈ၊ႁဝ်းလႆႈငိၼ်းၶဝ်ဢဝ်တင်းၵႂၢမ်းၽႃႇသႃႇႁဝ်းၵူႈမဵဝ်းမဵဝ်းလႄႈႁေႃးလၢတ်ႈလွင်ႈတၢင်းဢၼ်လီဢၢမ်းၽြႃးပဵၼ်ၸဝ်ႈၼၼ်ႉလူင်ပေႇ၊ဝႃႈၼင်ႇၼႆဢေႃႈ။

၁၂ ၶဝ်တင်းသဵင်ႈတင်းလူင်ၸိူဝ်းၼၼ်ႉဢၢမ်းလူင်ဢၢမ်းလၢင်လႄႈမီးၸႂ်ဢၼ်ဢမ်ႇပွင်ႇဢမ်ႇလႅင်းယူႇသေယဝ်ႉၵေႃႉၼိုင်ႈလႄႈၵေႃႉၼိုင်ႈတွင်ႈထၢမ်လၢတ်ႈၸႃၵၼ်လႄႈဝႃႈ၊-

၁၃ လွင်ႈတၢင်းၼႆႉပဵၼ်လွင်ႈတၢင်းၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။ၵမ်ႈၽွင်ႈၵေႃႈသေႉသွမ်းလႄႈဝႃႈ၊-ၶဝ်ၸိူဝ်းၼႆႉမဝ်းလဝ်ႈဝႆႉယဝ်ႉ၊ဝႃႈၼင်ႇၼႆဢေႃႈ။

ပေႇတရုႁေႃးလၢတ်ႈလွင်ႈၸဝ်ႈယေႇသု

၁၄ မိူဝ်ႈၼၼ်ႉပေႇတရုဢိၵ်ႇတင်းတပႄးၸဝ်ႈသိပ်းဢဵတ်းပႃးၸိူဝ်းၼၼ်ႉလုၵ်ႉၸုၵ်းသေလႄႈဢဝ်တင်းသဵင်ဢၼ်ယႂ်ႇၼႃႇႁေႃးလၢတ်ႈတီႈၶဝ်ၼၼ်ႉလႄႈဝႃႈ၊-ၵူၼ်းယုတဢိၵ်ႇတင်းၵူၼ်းဢၼ်ယူႇၵႃႈၼႂ်းဝဵင်းယေႇရုသလႅမ်ႇတင်းသဵင်ႈတင်းလူင်ၶဝ်ဢိူၺ်း၊သူမၢတ်ႈဝႆႉတွင်းဝႆႉလွင်ႈတၢင်းၼႆႉလႄႈထွမ်ႇဢဝ်ၵႂၢမ်းၵဝ်ၸေးၸေးၸွတ်ႇၸွတ်ႇသေၵမ်း။

၁၅ ၶိင်ႇတေႃႈလဵဝ်ၼႆႉပဵၼ်ၶိင်ႇၵၢင်ၼႂ်သၢမ်ၼႃႇရီႇလႄႈၶဝ်ၸိူဝ်းၼႆႉမဝ်းလဝ်ႈယူႇမိူၼ်ၸိူဝ်ႉၼင်ႇဢၼ်သူထၢင်ႇၼၼ်ႉဢမ်ႇၸႂ်ႈ။

၁၆ လွင်ႈတၢင်းၼႆႉၸမ်းပဵၼ်လွင်ႈတၢင်းဢၼ်ပရေႃးၽႅတ်ႈယုဝ်းဢေႇလႁေႃးလၢတ်ႈဝႆႉၼၼ်ႉယဝ်ႉ။ဢၼ်ႁေႃးလၢတ်ႈဝႆႉလႄႈဝႃႈၸမ်း၊-ၽြႃးပဵၼ်ၸဝ်ႈပျႃႇတိၵ်ႈဝႆႉလႄႈဝႃႈ၊-ၶိင်ႇၵႃႇလႃႉၵမ်းလိုၼ်းၼၼ်ႉ၊ၵဝ်တၵ်းဢဝ်ဝိၺိၺ်ႇၵဝ်သွၼ်းလေႃႇၵႃႈၼိူဝ်မဵဝ်းၵူၼ်းတင်းသဵင်ႈတင်းလူင်ဢေႃႈ။

၁၇ လုၵ်ႈလၢင်းသူတၵ်းလႆႈဢဝ်တင်းၺၢၼ်ႇပရေႃးၽႅတ်ႈသေလႄႈႁေႃးလၢတ်ႈဢေႃႈ။ၵူၼ်းၼုမ်ႇၵူၼ်းၵမ်သူၼၼ်ႉတၵ်းလႆႈရူႇပႃႇရူင်ႇပျႃႇတိၵ်ႈၸဝ်ႈဢေႃႈ။ၵူၼ်းထဝ်ႈၵူၼ်းၵႄႇသူၼၼ်ႉၵေႃႈတၵ်းလႆႈၼွၼ်းၽၼ်ႁၼ်ၼီႉမိၵ်ႈတင်းလၢႆဢေႃႈ။

၁၈ ၼႂ်းၶိင်ႇမိူဝ်ႈၼၼ်ႉၵဝ်တၵ်းသွၼ်းလေႃႇဝိၺိၺ်ႇမူတ်းၸၢင်ႇၸဝ်ႈၵႃႈၼိူဝ်ၵူၼ်းၸၢႆးၵူၼ်းယိင်းဢၼ်ပွင်ႁဵတ်းဢမူႉၸိူဝ်းၼၼ်ႉလႄႈၶဝ်ၼၼ်ႉတၵ်းလႆႈဢဝ်ၺၢၼ်ႇပရေႃးၽႅတ်ႈသေလႄႈႁေႃးလၢတ်ႈဢေႃႈ။

၁၉ ၵဝ်တၵ်းၼႄပျႃးလွင်ႈတၢင်းဢၼ်လီဢၢမ်းတင်းလၢႆၵႃႈၼိူဝ်ၽႃႉၵၢင်ႁၢဝ်ဢိၵ်ႇတင်းၸႃႉၸဵမ်လိူတ်ႈလႄႈပိဝ်ၽႆးၵႂမ်းၽႆးပုၵ်ႉပႃႉၼီႉမိၵ်ႈတင်းလၢႆၵႃႈၼိူဝ်လိၼ်မိူင်းၼႆႉဢေႃႈ။

၂၀ ၸူဝ်ႈဢၼ်ဝၼ်းထွတ်ႈဝၼ်းမျၢတ်ႈလူင်ထႃႇဝရႃႉၽြႃးဢမ်ႇပႆႇႁွတ်ႈမႃးၼၼ်ႉၸိုင်ၵၢင်ဝၼ်းတၵ်းပဵၼ်ဢၼ်လပ်းသိင်ႇၽိတ်းၽိတ်းၵႂႃႇဢေႃႈ။

၂၁ လိူၼ်ၵေႃႈတၵ်းပဵၼ်လိူတ်ႈၵႂႃႇဢေႃႈ။မိူဝ်ႈၼၼ်ႉၶဝ်ၸိူဝ်းဢၼ်ႁဵတ်းသူးတွင်းပထၼႃႇတီႈၼႃႇမႃႉၸိုဝ်သဵင်ထႃႇဝရႃႉၽြႃးၵႃႈမီးၸိူဝ်းၼၼ်ႉတၵ်းလႆႈႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ၊ဝႃႈၼင်ႇၼႆဢေႃႈ။

၂၂ ၵူၼ်းဢိသရေႇလၶဝ်ဢိူၺ်း၊ထွမ်ႇဢဝ်ၵႂၢမ်းၸိူဝ်းၼႆႉသေၵမ်းတႃႉ။ၸဝ်ႈယေႇသုၵူၼ်းဝဵင်းၼႃႇၸရႅတ်ႉဢၼ်ပဵၼ်ၵေႃႉဢၼ်လႆႈသၢၵ်ႈသေႇၵႃႈတီႈၽြႃးပဵၼ်ၸဝ်ႈၼႂ်းသူၵွပ်ႈပိူဝ်ႈတၼ်းၶူဝ်းဢၼ်လၢၵ်ႇလၢႆးဢိၵ်ႇတင်းၼီႉမိၵ်ႈလၵ်ႈၶၼႃႇတင်းလွင်ႈတၢင်းဢၼ်လီဢၢမ်းတင်းလၢႆဢၼ်ၽြႃးပဵၼ်ၸဝ်ႈဢဝ်မၼ်းၸဝ်ႈ

၂၃ ႁဵတ်းၵႃႈၼႂ်းၶိုင်ႈၵၢင်သူၵႃႈၼင်ႇဢၼ်သူႁူႉယဝ်ႉၼၼ်ႉမၼ်းၸဝ်ႈဢၼ်လႆႈၶၢမ်ႇတၢင်းဢၼ်ဢၢပ်ႈၵွပ်ႈပိူဝ်ႈဢလူဝ်ႇဢၼ်ၽြႃးပဵၼ်ၸဝ်ႈမၵ်းၶၢၼ်းဝႆႉဢိၵ်ႇတင်းဢၼႃႇၵတၢမ်ႇသႃႉၺၢၼ်ႇၸဝ်ႈၼၼ်ႉ၊သူတီႉဢဝ်မၼ်းၸဝ်ႈသေယဝ်ႉဢဝ်တင်းမိုဝ်းၶဝ်ၸိူဝ်းဢၼ်ဢမ်ႇတြႃးၼၼ်ႉတွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းလႄႈဢဝ်တၢႆယဝ်ႉ။

၂၄ မၼ်းၸဝ်ႈၼၼ်ႉပိူဝ်ႈဢၼ်ဝူၺ်ႇတၼႃႇတင်းလၢႆဢမ်ႇမတ်ႉၽုၵ်ႇၶျူၵ်ႉၵမ်ဝႆႉလႆႈလႄႈၽြႃးပဵၼ်ၸဝ်ႈၵႄႈဝူၺ်ႇတၼႃႇၼၼ်ႉပႅတ်ႈသေယဝ်ႉႁႂ်ႉႈမၼ်းၸဝ်ႈၶိုၼ်းလိပ်းယဝ်ႉ။

၂၅ ၶုၼ်လူင်တႃႇဝိတ်ႉဢဝ်လွင်ႈမၼ်းၸဝ်ႈလၢတ်ႈဝႆႉလႄႈဝႃႈ၊-ၵဝ်ႁၼ်ထႃႇဝရႃႉၽြႃးသိုဝ်ႈၼႃႈတႂ်ႈတႃယူႇတႃႇသေႇဢမ်ႇထၢတ်ႇဢေႃႈ။လွင်ႈမၼ်းၸမ်းၼင်ႇႁိုဝ်ၵဝ်တၵ်းဢမ်ႇမီးတၢင်းဢၼ်တူင်ႉဢၼ်ၶွၼ်းၸိုင်မၼ်းၸဝ်ႈမီးယူႇၵႃႈတီႈၽၢႆႇၶႂႃၵဝ်ဢေႃႈ။

၂၆ ပိူဝ်ႈၼႆလႄႈႁူဝ်ၸႂ်ၵဝ်ပၢင်ႇၸိုၼ်ႈဢေႃႈ။ဝိၺိၺ်ႇၵဝ်ၵေႃႈသႂၢင်ႇသိူဝ်းဢေႃႈ။လိူဝ်သေၼၼ်ႉၼႂ်းၼိူဝ်ႉၵဝ်ၼႆႉၵေႃႈတၢင်းမုင်ႈထႃႈမွင်းထႃႈၵိင်းဝၢပ်ႈယူႇဢေႃႈ။

၂၇ လွင်ႈမၼ်းၸမ်းၸဝ်ႈႁဝ်းတၵ်းဢမ်ႇပႅတ်ႈဝႆႉဝိၺိၺ်ႇၵဝ်ၶႃႈၵႃႈတီႈၼႂ်းမိူင်းမႃႇရၼႃႉတီႈၶႃႈ။တီႈၵူၼ်းမူတ်းၸၢင်ႇၸဝ်ႈႁဝ်းၵေႃႈၸဝ်ႈႁဝ်းတၵ်းဢမ်ႇပၼ်ႁႂ်ႈမီးတၢင်းဢၼ်တူႇဢၼ်ၼဝ်ႈတီႈၶႃႈ။

၂၈ ၸဝ်ႈႁဝ်းၼႄပျႃႉသဵၼ်ႈတၢင်းဢၼ်ႁွတ်ႈထိုင်တီႈဢၼ်ဢသၢၵ်ႈလိပ်းတင်းလၢႆၼၼ်ႉဝႆႉတီႈၵဝ်ၶႃႈတီႈၶႃႈဢေႃႈ။ၸဝ်ႈႁဝ်းတၵ်းႁႂ်ႈၵဝ်ၶႃႈတဵမ်ဝႆႉတင်းၸႂ်ဢၼ်သိူဝ်းပျေႃႇၵွပ်ႈပိူဝ်ႈဢၼ်လႆႈႁၼ်ၼႃႈၸဝ်ႈႁဝ်းၼၼ်ႉတီႈၶႃႈဢေႃႈ၊ဝႃႈၼင်ႇၼႆဢေႃႈ။

၂၉ ပီႈၼွင်ႉၶဝ်ဢိူၺ်း၊ႁႂ်ႈၵဝ်လႆႈဢဝ်လွင်ႈပေႃႈၸိူဝ်ႉၶိူဝ်းႁဝ်းတႃႇဝိတ်ႉၼၼ်ႉလၢတ်ႈပၼ်တီႈသူလႅင်းလႅင်းသေၵမ်း။မၼ်းတၢႆၵႂႃႇလႄႈလႆႈၶၢမ်ႇတၢင်းဢၼ်သၢင်းၵျူဝ်ႇယဝ်ႉဢေႃႈ။ၶုမ်သၢင်းၶျႅင်းမၼ်းၵေႃႈမီးယူႇတီႈႁဝ်းတေႃႇထိုင်ႁွတ်ႈမိူဝ်ႈလဵဝ်ၼႆႉဢေႃႈ။

၃၀ မၼ်းၼၼ်ႉပဵၼ်ပရေႃးၽႅတ်ႈလႄႈႁူႉလွင်ႈဢၼ်ၽြႃးပဵၼ်ၸဝ်ႈလႆႈတိၵ်ႉထၢၼ်ႇတိူင်ႇဝႃႈဝႆႉလႄႈဝႃႈ၊-မၼ်းၸဝ်ႈတၵ်းႁႂ်ႈၸဝ်ႈၶရိၸ်ႉဢဝ်ၸႃႇတိၵူၼ်းလႄႈပေႃႇဢွၵ်ႇမႃးၵႃႈၼႂ်းၸိူဝ်ႉၶိူဝ်းမၼ်းလႄႈဢဝ်တၢင်ႇၵႃႈၼိူဝ်ပလၢင်ႇမၼ်းဢေႃႈ။

၃၁ မၼ်းႁၼ်လွင်ႈတီႈႁႅင်းၼၼ်ႉဝႆႉဢွၼ်တၢင်းယူႇသေလႄႈဢဝ်တင်းဢၼႃႇၵတၢမ်ႇသႃႉၺၢၼ်ႇႁေႃးလၢတ်ႈဝႆႉလွင်ႈဢၼ်ၸဝ်ႈၶရိၸ်ႉတၵ်းလုၵ်ႉၶိုၼ်းၼၼ်ႉလႄႈဝႃႈ၊-ဝိၺိၺ်ႇမၼ်းၸဝ်ႈၼၼ်ႉဢမ်ႇၶၢမ်ႇတၢင်းဢၼ်ပႅတ်ႈဝႆႉၵႃႈၼႂ်းမိူင်းမႃႇရၼႃႉ။ၼိူဝ်ႉမၼ်းၸဝ်ႈၵေႃႈဢမ်ႇႁွတ်ႈထိုင်တၢင်းဢၼ်တူႇဢၼ်ၼဝ်ႈ၊ဝႃႈၼင်ႇၼႆဢေႃႈ။

၃၂ လွင်ႈဢၼ်ၽြႃးပဵၼ်ၸဝ်ႈႁႂ်ႈၸဝ်ႈယေႇသုလုၵ်ႉၶိုၼ်းယဝ်ႉၼၼ်ႉႁဝ်းၵႃႈမီးၸိူဝ်းၼႆႉပဵၼ်ၵေႃႉဢၼ်ၶၢမ်ႇသၢၵ်ႈသေႇဢေႃႈ။

၃၃ ပိူဝ်ႈၼႆလႄႈမၼ်းၸဝ်ႈလႆႈၶၢမ်ႇတၢင်းဢၼ်ယုၵ်ႉယွင်ႈဝႆႉၵႃႈတီႈၽၢႆႇၶႂႃမိုဝ်းၽြႃးပဵၼ်ၸဝ်ႈၸိူဝ်ႉၼင်ႇၼၼ်လႄႈလႆႈၵတိဢၼ်ၵိုင်ႇၵၼ်တင်းဝိၺိၺ်ႇမူတ်းၸၢင်ႇၸဝ်ႈၵႃႈတီႈပေႃႈၸဝ်ႈၼၼ်ႉယဝ်ႉၸင်ႇ၊သွၼ်းလေႃႇတၢင်းဢၼ်သူလႆႈႁူႉလႆႈငိၼ်းၼႆႉဢေႃႈ။

၃၄ တႃႇဝိတ်ႉဢမ်ႇၶိုၼ်ႈၵၢင်ႁၢဝ်။ၼႂ်းဝႃႈၼၼ်သေၵေႃႈမၼ်းဝႃႈ၊-ထႃႇဝရႃႉၽြႃးလၢတ်ႈတီႈၵဝ်ၶႃႈလႄႈဝႃႈ၊-

၃၅ ၸူဝ်ႈဢၼ်ၵဝ်ဢမ်ႇပႆႇဢဝ်ရၢၼ်ႇသူႇမႂ်းတင်းလၢႆၶျႃးဝႆႉႁႂ်ႈပဵၼ်တီႈတၢင်ႇတိၼ်မႂ်းၼၼ်ႉၸိုင်ၼင်ႈယူႇၵႃႈတီႈၽၢႆႇၶႂႃၵဝ်တႃႉ၊ဝႃႈၼင်ႇၼႆဢေႃႈ။

၃၆ ပိူဝ်ႈၼႆလႄႈလွင်ႈဢၼ်ၽြႃးပဵၼ်ၸဝ်ႈဢဝ်ၸဝ်ႈယေႇသုဢၼ်သူဢဝ်တွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းၼၼ်ႉၶၢၼ်းဝႆႉၼႂ်းဢရႃႇၸဝ်ႈၶရိၸ်ႉဢိၵ်ႇတင်းဢရႃႇၸဝ်ႈဢၼ်ဢုပ်ႉပိူင်ႇၼၼ်ႉၸိုင်ႁႂ်ႈမဵဝ်းၸိူဝ်ႉၶိူဝ်းဢိသရေႇလတင်းသဵင်ႈတင်းလူင်မၢတ်ႈတွင်းဝႆႉလီလီငၢမ်းငၢမ်းတႃႉ၊ဝႃႈၼင်ႇၼႆဢေႃႈ။

၃၇ ၶဝ်ၸိူဝ်းၼၼ်ႉလႆႈငိၼ်းၵႂၢမ်းၼၼ်ႉသေယဝ်ႉ၊မီးႁူဝ်ၸႂ်ဢၼ်မႆႈႁွၼ်ႉလႄႈတွင်ႈထၢမ်ပေႇတရုတင်းတမၢၼ်ႇၸဝ်ႈတၢင်ႇၵေႃႉၸိူဝ်းၼၼ်ႉလႄႈဝႃႈ၊-ပီႈၼွင်ႉၶဝ်ဢိူၺ်း၊ႁဝ်းၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ၊ဝႃႈၼင်ႇၼႆဢေႃႈ။

၃၈ ပေႇတရုၵေႃႈလၢတ်ႈလႄႈဝႃႈ၊-ပုၼ်ႈလွင်ႈၼင်ႇႁိုဝ်တၵ်းလွတ်ႈဢပျႅတ်ႈၸိုင်သူၶုၵ်းၸႂ်လႆႈမႆႈၸႂ်လႄႈၶၢမ်ႇဢဝ်ပပ်ႉတိၸၢမ်ႇၼႂ်းၼႃႇမႃႉၸိုဝ်သဵင်ၸဝ်ႈယေႇသုၶရိၸ်ႉၵူႈၵေႃႉၵူႈၵူၼ်းတႃႉ။ပေႃးႁဵတ်းၸိူဝ်ႉၼင်ႇၼၼ်ၸိုင်သူတၵ်းလႆႈၶၢမ်ႇဢဝ်သူႉၵျေးၸူးဝိၺိၺ်ႇမူတ်းၸၢင်ႇၸဝ်ႈဢေႃႈ။

၃၉ လွင်ႈမၼ်းၸမ်းၵတိၸဝ်ႈၼၼ်ႉၸၢပ်ႈသႅင်ႇၵၼ်တင်းသူဢိၵ်ႇတင်းလုၵ်ႈလၢင်းသူတင်းၵူၼ်းဢၼ်ၵႆတင်းသဵင်ႈတင်းလူင်ၵႃႈဢၼ်ၽြႃးပဵၼ်ၸဝ်ႈႁဝ်းထႃႇဝရႃႉၽြႃးတၵ်းႁွင်ႉဢဝ်ၼၼ်ႉဢေႃႈ၊ဝႃႈၼင်ႇၼႆဢေႃႈ။

၄၀ လိူဝ်သေၼၼ်ႉမၼ်းဢဝ်တင်းၵႂၢမ်းတၢင်ႇၸိူဝ်ႉတၢင်ႇဢၼ်ၼမ်ၼႃႇၶၢမ်ႇသၢၵ်ႈသေႇလႄႈတိုၵ်းယူင်းၶဝ်ၼၼ်ႉလႄႈဝႃႈ၊-ၵႄႇၶျွတ်ႈဢဝ်တူဝ်ၸဝ်ႈၵဝ်ႇသေၵႃႈတီႈၼႂ်းၵူၼ်းမဵဝ်းဢၼ်ၸႂ်ၵူတ်ႉၸႂ်ငေႃးၼႆႉတႃႉ၊ဝႃႈၼင်ႇၼႆဢေႃႈ။

၄၁ ၶဝ်ၸိူဝ်းဢၼ်ဢဝ်ၵႂၢမ်းၼၼ်ႉသႂ်ႇၸႂ်လီလီငၢမ်းငၢမ်းၼၼ်ႉၵေႃႈၶၢမ်ႇဢဝ်ပပ်ႉတိၸၢမ်ႇဢေႃႈ။ၼႂ်းဝၼ်းၼၼ်ႉၼပ်ႉဢၢၼ်ႇၵူၼ်းဢၼ်ၶဝ်ႈမႃးမီးသၢမ်ႁဵင်ၸမ်ၸမ်ဢေႃႈ။

ၵူၼ်းယုမ်ႇမၢတ်ႈတင်းလၢႆႁဵတ်းမိၵ်ႈသႁႃႇယႃႉလူၺ်ႈၵၼ်

၄၂ ၶဝ်ၶၢမ်ႇဢဝ်တၢင်းဢၼ်တမၢၼ်ႇၸဝ်ႈသင်ႇသွၼ်ပၼ်၊တၢင်းဢၼ်ႁဵတ်းမုၵ်ႉႁဵတ်းၸိူဝ်း၊တၢင်းဢၼ်မိတ်းၵိၼ်ၶဝ်ႈမုၼ်းတၢင်းဢၼ်ႁဵတ်းပထၼႃႇလူၺ်ႈၵၼ်သေႇသေႇဢေႃႈ။

၄၃ ၵွပ်ႈပိူဝ်ႈတမၢၼ်ႇၸဝ်ႈၸိူဝ်းၼၼ်ႉႁဵတ်းၼႄပျႃႉလွင်ႈတၢင်းဢၼ်လီဢၢမ်းဢိၵ်ႇတင်းၼီႉမိၵ်ႈလၵ်ႈၶၼႃႇၼမ်ၼႃႇလႄႈတၢင်းဢၼ်ဢၢမ်းဢေႃးၵူဝ်ႁႄတူၵ်းႁွတ်ႈထိုင်ၵႃႈၼိူဝ်ႁူုဝ်ၸႂ်ၶဝ်ၵူႈၵေႃႉဢေႃႈ။

၄၄ ၶဝ်ၸိူဝ်းဢၼ်ယုမ်ႇမၢတ်ႈတင်းသဵင်ႈတင်းလူင်ၸိူဝ်းၼၼ်ႉႁဵတ်းမုၵ်ႉႁဵတ်းၸုမ်းတီႈလဵဝ်ၵၼ်သေလႄႈဢွမ်ႇလွမ်ႉၽွမ်ႉၵၼ်ၸၢႆႇၵိၼ်ၸွမ်းၵၼ်ၵႃႈၼင်ႇဢၼ်တူဝ်ၸဝ်ႈၵဝ်ႇမီးၼၼ်ႉဢေႃႈ။

၄၅ ၶဝ်ၶၢႆဢုၵ်ႉၸႃႇၶူဝ်းလဵင်းဢၼ်တူဝ်ၸဝ်ႈၵဝ်ႇပိူင်ႇၼၼ်ႉသေယဝ်ႉၽႄမႅင်ႇပၼ်ၵၼ်ၸွမ်းၼင်ႇၵႃႈဢၼ်ၶဝ်လူဝ်ႇၼၼ်ႉႁင်းၽႂ်ႁင်းမၼ်းဢေႃႈ။

၄၆ ၶဝ်ၸူႉၵၼ်တုမ်ၵၼ်ၼႂ်းပိၵ်ႉမၢၼ်ႇၸဝ်ႈၵူႈမိူဝ်ႈၵူႈဝၼ်းဢေႃႈ။ၶဝ်မိတ်းၶဝ်ႈမုၼ်းၵိၼ်ၸွမ်းၵၼ်ၵႃႈတီႈႁိူၼ်းၶဝ်လႄႈမီးႁူဝ်ၸႂ်ဢၼ်ၶၢဝ်သႂ်ၸူမ်းသိူဝ်းမူၼ်ႈပျေႃႇၼၼ်ႉသေယဝ်ႉၵိၼ်တၢင်းၵိၼ်တၢင်းၶူပ်းၶဝ်ယူႇယွင်ႈယေႃးၽြႃးပဵၼ်ၸဝ်ႈယူႇလႆႈၼႃႈလႆႈတႃၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်ယူႇဢေႃႈ။

၄၇ ၶဝ်ၸိူဝ်းဢၼ်ႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉၵေႃႈမီးၵူႈဝၼ်းဢေႃႈ။