ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇမႃႇၵု
Chapter ၁ ၂ ၃ ၄ ၅ ၆ ၇ ၈ ၉ ၁၀ ၁၁ ၁၂ ၁၃ ၁၄ ၁၅ ၁၆
၁၁
ၵျွႃးၶဝ်ႈဝဵင်းယေႇရုသလႅမ်ႇ
၁ မိူဝ်ႈဢၼ်ၶဝ်ႁွတ်ႈၸမ်ဝဵင်းယေႇရုသလႅမ်ႇတီႈဝၢၼ်ႈပိတ်ႉၽႃႇၵေႇတင်းဝၢၼ်ႈပေႇတၼိၵႃႈတီႈလွႆသၼ်ႇလုၼ်ႇၼၼ်ႉၸိုင်မၼ်းၸဝ်ႈပွႆႇၸႂ်ႉတပႄးၸဝ်ႈသွင်ၵေႃႉၵႂႃႇလႄႈသင်ႇလၢတ်ႈလႄႈဝႃႈ၊-
၂ ၵႂႃႇၵႃႈတီႈဝၢၼ်ႈဢၼ်မီးပႃႈၼႃႈသူၼၼ်ႉတႃႉ။ မိူဝ်ႈဢၼ်ႁွတ်ႈထိုင်ၵႃႈတီႈဝၢၼ်ႈၼၼ်ႉၸိုင်သူတၵ်းထူပ်းႁၼ်မႃႉလီႈဢွၼ်ႇဢၼ်ၽူႈလႂ်ဢမ်ႇပႆႇၶီႇသေပွၵ်ႈၼၼ်ႉမတ်ႉဝႆႉယူႇဢေႃႈ။
၃ ၵႄႈၸိူၵ်ႈမၼ်းလႄႈဢဝ်မႃးတႃႉ။ ပေႃးပိူၼ်ႈထၢမ်တီႈသူဝႃႈ၊-ႁဵတ်းသင်လႄႈႁဵတ်းၸိူဝ်ႉၼင်ႇၼႆ၊ဝႃႈၼႆၸိုင်ၶိုၼ်းလၢတ်ႈဝႃႈ၊-ၸဝ်ႈမီးဢလူဝ်ႇဢေႃႈ၊ဝႃႈၼင်ႇၼႆတႃႉ။ ၵေႃႉၼၼ်ႉတၵ်းပၼ်မႃးၵမ်းလဵဝ်ဢိူဝ်ႈ၊ဝႃႈၼင်ႇၼႆဢေႃႈ။
၄ ၶဝ်ၵေႃႈၵႂႃႇလႄႈထူပ်းႁၼ်မႃႉလီႈဢွၼ်ဢၼ်မတ်ႉဝႆႉၽၢႆႇၼွၵ်ႈၽၵ်းတူၵႃႈတီႈၵၢင်တၢင်းၼၼ်ႉသေယဝ်ႉၵႄႈဢဝ်ဢေႃႈ။
၅ ၶဝ်ၸိူဝ်းဢၼ်ၸုၵ်းယူႇၵႃႈတီႈၼၼ်ႉၵမ်ႈၽွင်ႈထၢမ်ဝႃႈ၊-ႁဵတ်းသင်လႄႈသူၵႄႈဢဝ်မႃႉလီႈဢွၼ်ႇၼႆႉ၊မိူဝ်ႈဢၼ်ဝႃႈၼင်ႇၼႆၸိုင်
၆ တပႄးၸဝ်ႈၸိူဝ်းၼၼ်ႉၵေႃႈၶိုၼ်းလၢတ်ႈၸိူဝ်ႉၼင်ႇဢၼ်ၸဝ်ႈယေႇသုသင်ႇလၢတ်ႈဝႆႉၼၼ်ႉတီႈၶဝ်ၼၼ်ႉလႄႈၵူၼ်းၸိူဝ်းၼၼ်ႉၵေႃႈပၼ်ၶဝ်ဢဝ်ၵႂႃႇဢေႃႈ။
၇ ၶဝ်ဢဝ်မႃႉလီႈဢွၼ်ႇၼၼ်ႉမႃးတီႈၸဝ်ႈယေႇသုလႄႈဢဝ်ၶူဝ်းၼုင်ႈၶဝ်တၢင်ႇသႂ်ႇၵႃႈၼိူဝ်လင်မႃႉလီႈဢွၼ်ႇၼၼ်ႉယဝ်ႉၸင်ႇမၼ်းၸဝ်ႈၼင်ႈၵႃႈၼိူဝ်လင်မၼ်းဢေႃႈ။
၈ ၵူၼ်းၼမ်ၼႃႇဢဝ်ၶူဝ်းၼုင်ႈၶဝ်သိူဝ်ႇဝႆႉပူးဝႆႉၵႃႈၼိူဝ်သဵၼ်ႈတၢင်းဢေႃႈ။ ၵမ်ႈၽွင်ႈၵေႃႈဢွၵ်ႇၵႃႈၼွၵ်ႈတၢင်းသေလႄႈၽၼ်းၵိင်ႇမႆႉၶူဝ်ႉမႆႉလႄႈဢဝ်သိူဝ်ႇဢဝ်ပူးဝႆႉၵႃႈၼႂ်းသဵၼ်ႈတၢင်းဢေႃႈ။
၉ ၵူၼ်းဢၼ်ၵႂႃႇပႃႈၼႃႈလႂ်ဢၼ်ၸွမ်းပႃႈလင်လႂ်ၸိူဝ်းၼၼ်ႉၵေႃႈႁွင်ႉသႅၼ်ႇဝႃႈ၊-ႁူဝ်းသၼ်ႇၼႃႉ။ ႁႂ်ႈၸဝ်ႈဢၼ်ပႃးတင်းဢၶႂၢင်ႉထႃႇဝရႃႉၽြႃးမႃးၼၼ်ႉမီးမင်ႇၵလႃႇသေၵမ်းလူၺ်ႈ။
၁၀ ႁႂ်ႈမိူင်းပေႃႈႁဝ်းတႃႇဝိတ်ႉဢၼ်တႄႇပဵၼ်မႃးယူႇၼႆႉမီးမင်ႇၵလႃႇသေၵမ်းလူၺ်ႈ။ ႁူဝ်းသၼ်ႇၼႃႉၵႃႈၼိူဝ်ၸိၵ်းၸွမ်ၵၢင်ႁၢဝ်ဢေႃႈ၊ဝႃႈၼင်ႇၼႆဢေႃႈ။ မၼ်းၸဝ်ႈၶဝ်ႈၼႂ်းဝဵင်းယေႇရုသလႅမ်ႇၵႃႈတီႈၼႂ်းပိၵ်ႉမၢၼ်ႇၸဝ်ႈလႄႈလူႈတူၺ်းၵူႈၸိူဝ်ႉၵူႈပိူင်ဢေႃႈ။
၁၁ ပိူဝ်ႈဢၼ်ဝၼ်းတူၵ်းယဝ်ႉလႄႈမၼ်းၸဝ်ႈတင်းတပႄးၸဝ်ႈသိပ်းသွင်ပႃးဢွၵ်ႇၵႂႃႇၵႃႈတီႈဝၢၼ်ႈပေႇထၼိပုၼ်ႉသေဢေႃႈ။
ၸဝ်ႈယေႇသုႁႂ်ႈပိၵ်ႉမၢၼ်ႇမူတ်းၸၢင်ႇ
၁၂ ဝၼ်းမိူဝ်ႈၽုၵ်ႈမိူဝ်ႈဢၼ်ၶဝ်ဢွၵ်ႇသေၵႃႈၼႂ်းဝၢၼ်ႈပေႇထၼိမႃးယူႇၼၼ်ႉၸိုင်မၼ်းၸဝ်ႈတွင်ႉမႆႈဢေႃႈ။ မၼ်းၸဝ်ႈယူႇတီႈဢၼ်ၵႆလႄႈမုင်ႈႁၼ်တူၼ်ႈမၢၵ်ႇလိူဝ်ႇသၢင်းၽေႃးတူၼ်ႈၼိုင်ႈဢၼ်မႂ်ႊမၼ်းတဵမ်ဝႆႉယူႇၼၼ်ႉလႄႈၸၢင်ႊၶေးတၵ်းထူပ်းႁၼ်မၢၵ်ႇမၼ်းၵႃႈတီႈတူၼ်ႈၼၼ်ႉဢေႃႈ၊ဝႃႈၼႆလႄႈၵႂႃႇၸူးဢေႃႈ။
၁၃ မိူဝ်ႈဢၼ်ႁွတ်ႈထိုင်ၵႃႈတီႈတူၼ်ႈၼၼ်ႉၸိုင်ပိူဝ်ႈဢၼ်ၶိင်ႇမၢၵ်ႇလိူဝ်ႇသၢင်းၽေႃးဢမ်ႇပႆႇႁွတ်ႈပႆႇထိုင်လႄႈလႆႈထူပ်းႁၼ်မႂ်ႊမၼ်းၵူၺ်းၼၼ်ႉၸိုင်မၼ်းၸဝ်ႈမီးဢမိင်ႉတီႈတူၼ်ႈၼၼ်ႉလႄႈဝႃႈ၊-
၁၄ ၸႃႉၸဵမ်မိူဝ်ႈလဵဝ်ၼႆႉၵႂႃႇမိူဝ်းၼႃႈယႃႇပေႁႂ်ႈၽူႈလႂ်သေၵေႃႉသေၵူၼ်းလႆႈၵိၼ်မၢၵ်ႇမႂ်း၊ဝႃႈၼင်ႇၼႆဢေႃႈ။ တပႄးၸဝ်ႈၸိူဝ်းၼၼ်ႉၵေႃႈငိၼ်းၵႂၢမ်းၼၼ်ႉဢေႃႈ။
၁၅ မိူဝ်ႈဢၼ်ၶဝ်ႁွတ်ႈထိုင်ၵႃႈတီႈဝဵင်းယေႇရုသလႅမ်ႇၼၼ်ႉမၼ်းၸဝ်ႈၶဝ်ႈၵႃႈၼႂ်းပိၵ်ႉမၢၼ်ႇၸဝ်ႈသေယဝ်ႉႁေႃႈႁိုပ်ႉၶဝ်ၸိူဝ်းဢၼ်သိုဝ်ႉဢၼ်ၶၢႆၵႃႈၼႂ်းပိၵ်ႉမၢၼ်ႇၸဝ်ႈၼၼ်ႉဢွၵ်ႇ
ပႅတ်ႈလႄႈပိၼ်ႈလူမ်ႉၽိူၼ်ၶဝ်ၸိူဝ်းဢၼ်လႅၵ်ႈငိုၼ်း၊တီႈၼင်ႈၶဝ်ၸိူဝ်းဢၼ်ၶၢႆၼူၵ်ႉတူႈၸိူဝ်းၼၼ်ႉပႅတ်ႈသေလႄႈ
၁၆ ႁၢမ်ႈတၢပ်ႈႁႄႉၶႅၼ်ဢမ်ႇႁႂ်ႈၽူႈလႂ်သေၵေႃႉသေၵူၼ်းလႆႈဢဝ်ၶိူင်ႈပိူင်သေၸိူဝ်ႉသေပိူင်ၽႃႇလတ်းၵႂႃႇၵႃႈၼႂ်းပိၵ်ႉမၢၼ်ႇၸဝ်ႈလႄႈ၊သင်ႇသွၼ်သုင်းမႃႉလႄႈဝႃႈ၊-
၁၇ ႁိူၼ်းၵဝ်ၼႆႉတၵ်းလႆႈၶၢမ်ႇတၢင်းဢၼ်ႁွင်ႉႁိၵ်ႈႁိူၼ်းသူးတွင်းၵူၼ်းၵူႈၸိူဝ်ႉၵူႈမဵဝ်းတင်းလၢႆဢေႃႈ။ ၼႂ်းဝႃႈၼၼ်သေၵေႃႈသူႁႂ်ႈမၼ်းပဵၼ်ထမ်ႈၸူၼ်ယဝ်ႉလူင်ပေႇ၊ဝႃႈၼႆ၊တႅမ်ႈဝႆႉၼႂ်းၵျၢမ်းလိၵ်ႈယဝ်ႉ။
ယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတင်းလၢႆငိၼ်းလႄႈၵျၢမ်ႇႁႃႁႂ်ႈလႆႈဢဝ်မၼ်းၸဝ်ႈတၢႆဢေႃႈ။ ပိူဝ်ႈဢၼ်ၵူၼ်းၸူႉၵူၼ်းတုမ်တင်းသဵင်ႈတင်းလူင်ၵႂင်ၸႂ်ယုင်ႈၸႂ်ဢၢမ်းလွင်ႈတၢင်းဢၼ်မၼ်းၸဝ်ႈသင်ႇသွၼ်ပၼ်ၼၼ်ႉလႄႈၶဝ်မီးတၢင်းဢၼ်ၵူဝ်ႁႄမၼ်းၸဝ်ႈဢေႃႈ။
၁၈ မိူဝ်ႈဢၼ်ႁွတ်ႈထိုင်ၶိင်ႇၵၢင်ၶမ်ႈၸိုင်ၶဝ်ဢွၵ်ႇၵႂႃႇၵႃႈၼွၵ်ႈဝဵင်းသေဢေႃႈ။ တူၼ်ႈမၢၵ်ႇလိူဝ်ႇသၢင်းၽေႃးႁႅင်ႈႁဵဝ်ႇၵွႃႇ
၂၀ ၶိင်ႇၵၢင်ၼႂ်မိူဝ်ႈဢၼ်ၶဝ်ၵႂႃႇတၢင်းယူႇၼၼ်ႉၶဝ်လႆႈႁၼ်တူၼ်ႈမၢၵ်ႇလိူဝ်ႇသၢင်းၽေႃးၼၼ်ႉၸႃႉၸဵမ်ႁၢၵ်ႈမၼ်းႁႅင်ႈႁဵဝ်ႇၵႂႃႇယဝ်ႉဢေႃႈ။ ပေႇတရုၶုၵ်းၸႂ်လႆႈလႄႈလဝ်ႈလၢတ်ႈဝႃႈ၊-
၂၁ ၸဝ်ႈႁဝ်းတူၺ်းသေၵမ်းၶႃႈ။ တူၼ်ႈမၢၵ်ႇလိူဝ်ႇသၢင်းၽေႃးဢၼ်ၸဝ်ႈႁဝ်းၵိၼ်ႇဝႃႈၼၼ်ႉႁႅင်ႈႁဵဝ်ႇၵႂႃႇယဝ်ႉၶႃႈဢေႃႈ၊ဝႃႈၼင်ႇၼႆဢေႃႈ။
၂၂ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-သူမီးတၢင်းဢၼ်ယုမ်ႇမၢတ်ႈၵႃႈၼႂ်းၽြႃးပဵၼ်ၸဝ်ႈတႃႉ။
၂၃ ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်းၽူႈလႂ်သေဢမ်ႇဝႃႈၵေႃႉဢၼ်ဢမ်ႇမီးၸႂ်ဢၼ်ယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈၼၼ်ႉသေလႄႈယုမ်ႇလွင်ႈဢၼ်ဝႃႈတၵ်းပဵၼ်ၸိူဝ်ႉၼင်ႇဢၼ်တူဝ်ၸဝ်ႈၵဝ်ႇဝႃႈၼၼ်ႉဢေႃႈ၊ဝႃႈၼႆသေယဝ်ႉ၊လၢတ်ႈတီႈလွႆၼႆႉလႄႈဝႃႈ၊-ၶၢႆႉတီႈမႂ်းတႃႉ။ တူၵ်းၵႃႈၼႂ်းပၢင်ႇလၢႆႇတႃႉ၊ဝႃႈၼႆၵေႃႈတၵ်းပဵၼ်ၸိူဝ်ႉၼင်ႇဢၼ်မၼ်းဝႃႈၼၼ်ႉဢေႃႈ။
၂၄ ပိူဝ်ႈၼႆလႄႈၵဝ်ဝႃႈတီႈသူၸမ်း၊ၵႃႈဢၼ်သူသူးတွင်းယွၼ်းတင်းသဵင်ႈတင်းလူင်ၼၼ်ႉပေႃးသူယုမ်ႇဝႃႈတၵ်းလႆႈဢေႃႈ၊ဝႃႈၼႆၸိုင်သူတၵ်းလႆႈဢေႃႈ။
၂၅ မိူဝ်ႈဢၼ်သူၸုၵ်းယူႇသေလႄႈသူးတွင်းၼၼ်ႉပေႃးသူမီးတီႈဢၼ်တၵ်းလႆႈတၢင်ႇဢပျႅတ်ႈတီႈပိူၼ်ႈတၢင်ႇၵေႃႉၸိုင်ပွႆႇလွတ်ႈပၼ်ဢပျႅတ်ႈမၼ်းတႃႉ။ ပေႃးသူပွႆႇလွတ်ႈၸိုင်ပေႃႈသူဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉၵေႃႈတၵ်းပွႆႇလွတ်ႈဢပျႅတ်ႈသူဢေႃႈ။
၂၆ ပေႃးသူဢမ်ႇပွႆႇလွတ်ႈဢပျႅတ်ႈပိူၼ်ႈတၢင်ႇၵေႃႉၸိုင်ပေႃႈသူ
ဢၼ်မီးယူႇၵႃႈၼိူဝ်မိူင်းၵၢင်ႁၢဝ်ပုၼ်ႉၼၼ်ႉၵေႃႈတၵ်းဢမ်ႇပွႆႇလွတ်ႈပၼ်ဢပျႅတ်ႈသူ၊ဝႃႈၼင်ႇၼႆဢေႃႈ။
တွင်ႈထၢမ်လွင်ႈတၼ်းၶူဝ်းၸဝ်ႈယေႇသု
၂၇ ၶဝ်သမ်ႉၶိုၼ်းႁွတ်ႈထိုင်ၵႃႈတီႈဝဵင်းယေႇရုသလႅမ်ႇယဝ်ႉၸင်ႇၼႂ်းမိူဝ်ႈဢၼ်မၼ်းၸဝ်ႈပႆၵႂႃႇပႆမႃးယူႇၵႃႈၼႂ်းပိၵ်ႉမၢၼ်ႇၸဝ်ႈယူႇၼၼ်ႉၸိုင်ယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းထုတ်ႇၵျၢမ်းတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆသုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈလဝ်ႈထၢမ်လႄႈဝႃႈ၊-
၂၈ ၸဝ်ႈႁဝ်းဢဝ်တင်းဢၶႂၢင်ႉဢၼ်လႂ်သေလႄႈႁဵတ်းလွင်ႈတၢင်းၸိူဝ်းၼႆႉၶႃႈ။ ၽူႈလႂ်ပၼ်ဢၶႂၢင်ႉႁႂ်ႈလႆႈႁဵတ်းလွင်ႈတၢင်းၸိူဝ်းၼႆႉၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၸဝ်ႈယေႇသု
ၵေႃႈလၢတ်ႈလႄႈဝႃႈ၊-
၂၉ ၵဝ်တၵ်းထၢမ်သေၸိူဝ်ႉသေပိူင်တီႈသူလူးၵွၼ်ႇဢေႃႈ။ သူၶိုၼ်းလၢတ်ႈတႃႉ။ ပေႃးသူၶိုၼ်းလၢတ်ႈပၼ်ၵဝ်ၸိုင်ၵဝ်တၵ်းလၢတ်ႈၼႄသူလွင်ႈဢၼ်ၵဝ်ဢဝ်တင်းဢၶႂၢင်ႉဢၼ်လႂ်လႄႈႁဵတ်းလွင်ႈတၢင်းၸိူဝ်းၼႆႉၼၼ်ႉဢေႃႈ။
၃၀ ပပ်ႉတိၸၢမ်ႇယုဝ်းႁၢၼ်ႇၼၼ်ႉပဵၼ်မႃးၵႃႈတီႈၵၢင်ႁၢဝ်ႁိုဝ်၊ပဵၼ်မႃးၵႃႈတီႈၵူၼ်းႁိုဝ်။ သူၶိုၼ်းလၢတ်ႈပၼ်ၵဝ်တႃႉ၊ဝႃႈၼင်ႇၼႆဢေႃႈ။
၃၁ ၶဝ်ၼၼ်ႉၼင်ႇၵၼ်ၵၼ်ၽွမ်ႉၵၼ်ၶႆႈၸႂ်လႄႈဝႃႈ၊-ပေႃးႁဝ်းဝႃႈ၊-ပဵၼ်မႃးၵႃႈတီႈၵၢင်ႁၢဝ်ဝႃႈၼႆၸိုင်၊မၼ်းၸဝ်ႈတၵ်းထၢမ်ဝႃႈ၊-ႁဵတ်းသင်သူဢမ်ႇယုမ်ႇမၢတ်ႈမၼ်း၊ဝႃႈၼင်ႇၼႆယူႇယဝ်ႉ။
၃၂ ပဵၼ်မႃးၵႃႈတီႈၵူၼ်းဝႃႈၼႆႁဝ်းတၵ်းဝႃႈလႆႈၸိူဝ်ႉၼင်ႇႁိုဝ်။ ၵူၼ်းတင်းသဵင်ႈတင်းလူင်ယုမ်ႇဝႃႈယုဝ်းႁၢၼ်ႇပဵၼ်ပရေႃးၽႅတ်ႈဢေႃႈ။
၃၃ ၶဝ်ၵူဝ်ၵူၼ်းတင်းလၢႆဢေႃႈ။ ၶဝ်ၸင်ႇၶိုၼ်းလဝ်ႈလၢတ်ႈတီႈၸဝ်ႈယေႇသုလႄႈဝႃႈ၊-ႁဝ်းၶႃႈဢမ်ႇႁူႉၶႃႈ၊ဝႃႈၼင်ႇၼႆလႄႈၸဝ်ႈယေႇသုၵေႃႈဝႃႈ၊-
လွင်ႈဢၼ်ၵဝ်ဢဝ်တင်းဢၶႂၢင်ႉဢၼ်လႂ်လႄႈႁဵတ်းလွင်ႈတၢင်းၸိူဝ်းၼႆႉဢၼ်ဝႃႈၼၼ်ႉၵဝ်ဢမ်ႇလၢတ်ႈပၼ်သူ၊ဝႃႈၼင်ႇၼႆဢေႃႈ။
ထမ်ႇမ ၵျၢမ်းၵဝ်ႇ
ၵျၢမ်းငဝ်ႈၵမ်ႇၽႃႇ ၵျၢမ်းဢၼ်ဢွၵ်ႇၵွႃႇ ၵျၢမ်းဢၼ်ႁဵတ်းဝၢတ်ႈ
ၵျၢမ်းဢၼ်ယူႇၼႂ်းထိူၼ်ႇ ၵျၢမ်းဢၼ်ႁေႃးတြႃး လိၵ်ႈမၢတ်ႈလွင်ႈယေႃးသု
လိၵ်ႈမၢတ်ႈလွင်ႈၵူၼ်းလူင်ဢၼ်ၸီႇယၢင်ႇတြႃး ဝုတ်ႉထုရုထ
ထမ်ႇမႃႉရႃႇၸဝၢင်ႇၽိုၼ်ပထမ ထမ်ႇမႃႉရႃႇၸဝၢင်ႇၽိုၼ်တုတိယ
ထမ်ႇမႃႉရႃႇၸဝၢင်ႇၽိုၼ်တတိယ ထမ်ႇမႃႉရႃႇၸဝၢင်ႇၽိုၼ်ၸတုၵ်ႉထ
ရႃႇၸဝၢင်ႇၶျူၵ်ႉၽိုၼ်ပထမ ရႃႇၸဝၢင်ႇၶျူၵ်ႉၽိုၼ်တုတိယ
လိၵ်ႈမၢတ်ႈလွင်ႈဢေႇၸရ လိၵ်ႈမၢတ်ႈလွင်ႈၼေႇႁမိ ဝုတ်ႉထုဢေးသတႃႇ
ဝုတ်ႉထုယေႃႇၽ ၵျၢမ်းသႃႇလၢမ်ႇ ၵျၢမ်းလိၵ်ႈသုၵ်ႉတၢမ်ႇ ၵျၢမ်းလိၵ်ႈတေႇသၼႃႇ
လိၵ်ႈႁဵတ်းၵႂၢမ်းသေႃးလမုၼ်ႇ ၵျၢမ်းဢၼႃႇၵၢတ်ႈတိဢိသႃႇယ
ၵျၢမ်းဢၼႃႇၵၢတ်ႈတိယေႇရမိ တၢင်းဢၼ်ယေႇရမိပွင်ႉၶင်းပွင်ႉဝႃႈ
ၵျၢမ်းဢၼႃႇၵၢတ်ႈတိယေႇၸၵျေႇလ ၵျၢမ်းဢၼႃႇၵၢတ်ႈတိတၢၼ်ႇယေႇလ
ၵျၢမ်းဢၼႃႇၵၢတ်ႈတိႁူဝ်ႇသေႇ ၵျၢမ်းဢၼႃႇၵၢတ်ႈတိယုဝ်းဢေႇလ
ၵျၢမ်းဢၼႃႇၵၢတ်ႈတိဢႃႇမုတ်ႉ ပျႃႇတိၵ်ႉယူႇပႃႇရုင်ႇဢေႃႇပတိ ဝုတ်ႉထုယုဝ်းၼ
ၵျၢမ်းဢၼႃႇၵၢတ်ႈတိမိၶႃႇ ၵျၢမ်းဢၼႃႇၵၢတ်ႈတိၼႃႇႁူမ်ႇ
ၵျၢမ်းဢၼႃႇၵၢတ်ႈတိႁပၵ်ႉၵုၵ်ႉ ၵျၢမ်းဢၼႃႇၵၢတ်ႈတိၸေႇပၼိ
ၵျၢမ်းဢၼႃႇၵၢတ်ႈတိႁၵ်ႉၵေး ၵျၢမ်းဢၼႃႇၵၢတ်ႈတိၸႃႇၶရိ
ထမ်ႇမ ၵျၢမ်းမႂ်ႇ
ၶၢဝ်ႇငၢဝ်းသတၢင်းသိူဝ်းပျေႃႇမၢတ်ႈထႄႇ ၶၢဝ်ႇငၢဝ်းသတၢင်းသိူဝ်းပျေႃႇမႃႇၵု
ၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ ၶၢဝ်ႇငၢဝ်းသတၢင်းသိူဝ်းပျေႃႇယုဝ်းႁၢၼ်ႇ
ဝုတ်ႉထုတမၢၼ်ႇၸဝ်ႈ လိၵ်ႈဢေႃးဝႃႇတႃႉရူဝ်းမ လိၵ်ႈဢေႃးဝႃႇတႃႉၵေႃ:ရဵၼ်ႇထုၽိုၼ်ပထမ
လိၵ်ႈဢေႃးဝႃႇတႃႉၵေႃ:ရဵၼ်ႇထုၽိုၼ်တုတိယ လိၵ်ႈဢေႃးဝႃႇတႃႉၵလႃႇတိ
လိၵ်ႈဢေႃးဝႃႇတႃႉဢေးၽႅတ်ႈ လိၵ်ႈဢေႃးဝႃႇတႃႉၽိလိပ်ႉပိ
လိၵ်ႈဢေႃးဝႃႇတႃႉၵေႃးလေႃးသႄး လိၵ်ႈဢေႃးဝႃႇတႃႉထိၵ်ႈသႃႇလေႃးၼိၵ်ႈၽိုၼ်ပထမ
လိၵ်ႈဢေႃးဝႃႇတႃႉထိၵ်ႈသႃႇလေႃးၼိၵ်ႈၽိုၼ်တုတိယ လိၵ်ႈဢေႃးဝႃႇတႃႉတိမေႃးသေႇၽိုၼ်ပထမ
လိၵ်ႈဢေႃးဝႃႇတႃႉတိမေႃးသေႇၽိုၼ်တုတိယ လိၵ်ႈဢေႃးဝႃႇတႃႉတိတု
လိၵ်ႈဢေႃးဝႃႇတႃႉၽိလေႇမုၼ်ႇ လိၵ်ႈဢေႃးဝႃႇတႃႉႁေႇပြႄး
လိၵ်ႈဢေႃးဝႃႇတႃႉယႃႇၵုပ်ႉ လိၵ်ႈဢေႃးဝႃႇတႃႉပေႇတရုၽိုၼ်ပထမ
လိၵ်ႈဢေႃးဝႃႇတႃႉပေႇတရုၽိုၼ်တုတိယ လိၵ်ႈဢေႃးဝႃႇတႃႉယုဝ်းႁၢၼ်ႇၽိုၼ်ပထမ
လိၵ်ႈဢေႃးဝႃႇတႃႉယုဝ်းႁၢၼ်ႇၽိုၼ်တုတိယ လိၵ်ႈဢေႃးဝႃႇတႃႉယုဝ်းႁၢၼ်ႇၽိုၼ်တတိယ
လိၵ်ႈဢေႃးဝႃႇတႃႉယုတ ၵျၢမ်းပျႃႇတိၵ်ႈ