Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၂၂ 

၁ ပီႈၼွင်ႉဢိၵ်ႇတင်းပေႃႈတင်းလၢႆၶဝ်ဢိူၺ်း၊ထွမ်ႇငိၼ်းၵႂၢမ်းဢၼ်ၵဝ်ၶႃႈလၢတ်ႈၽေႇဢပျႅတ်ႈတူဝ်ၸဝ်ႈၵဝ်ႇၵႃႈတီႈၽၢႆႇၼႃႈသူၸဝ်ႈတေႃႈလဵဝ်ၼႆႉသေၵမ်းၶႃႈ၊

၂ ဝႃႈၼင်ႇၼႆလႄႈမိူဝ်ႈဢၼ်ၶဝ်ငိၼ်းမၼ်းဢဝ်တင်းၵႂၢမ်းၽႃႇသႃႇႁေႇပြႄးလၢတ်ႈၼၼ်ႉၸိုင်ၶဝ်ယဵင်ႈၶႅၼ်းယူႇတဵတ်ႇယဵၼ်ၼႃႇလူင်လၢင်ဢေႃႈ။

၃ မၼ်းၵေႃႈမွၵ်ႇလၢတ်ႈလႄႈဝႃႈ၊-ၵဝ်ၶႃႈၼႆႉပဵၼ်ၵူၼ်းဢၼ်ၵိူတ်ႇလဵင်ႉၵႃႈၼႂ်းဝဵင်းတႃႇသု၊မိူင်းၵိလိၵိပုၼ်ႉၶႃႈဢေႃႈ။ၵဝ်ၶႃႈယႂ်ႇၵႃႈၼႂ်းဝဵင်းၼၼ်ႉၵႃႈတႂ်ႈမိုဝ်းသြႃႇၵႃႇမလျေႇလၶႃႈဢေႃႈ။ၵဝ်ၶႃႈလႆႈသွၼ်ဢဝ်တြႃးဢၼ်ပူႇပေႃႈႁဝ်းသိုပ်ႇၵၼ်ၵမ်ၵျၢင်ႉမႃးၼၼ်ႉသေႇၶျႃႇလီငၢမ်းလႄႈၶၢမ်ႇဢဝ်ၼႄးဢူႉပတေႇၼၼ်ႉၶႃႈဢေႃႈ။

၄ ၸိူဝ်ႉၼင်ႇဢၼ်သူၸဝ်ႈမီးၸႂ်ႁႅင်းယႂ်ႇၽၢႆႇၽြႃးပဵၼ်ၸဝ်ႈတေႃႇထိုင်ႁွတ်ႈဝၼ်းမိူဝ်ႈၼႆႉၼၼ်ႉၵဝ်ၶႃႈၵေႃႈမီးၸႂ်ႁႅင်းယႂ်ႇၼႃႇလူင်လၢင်လႄႈတီႉမတ်ႉဢဝ်ၵူၼ်းယုမ်ႇမၢတ်ႈၸဵမ်ယိင်းၸဵမ်ၸၢႆးသေယဝ်ႉဢဝ်ၶင်ဝႆႉၵႃႈၼႂ်းထွင်ႇသေလႄႈၼိၵ်ႈၸၢၵ်ႈငႅၼ်းသေးသဵၼ်ႈတၢင်းၼႆႉတေႃႇထိုင်ႁွတ်ႈထၼ်ႈပႃးဢဝ်ၶဝ်တၢႆၶႃႈယဝ်ႉ။

၅ ၸႃႉၸဵမ်ၶုၼ်ယိတ်ႉပရေႃးႁိၵ်ႈဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းသဵင်ႈတင်းလူင်ၶဝ်ပဵၼ်သၢၵ်ႈသေႇၽၢႆႇၵဝ်ၶႃႈၶႃႈဢေႃႈ။ၵႃႈတီႈၶဝ်ၼၼ်ႉၵေႃႈၵဝ်ၶႃႈလႆႈၶၢမ်ႇဢဝ်လိၵ်ႈဢၼ်သင်ႇလၢတ်ႈပၼ်ထိုင်ၵႃႈတီႈၵူၼ်းဝဵင်းထမ်ႇမသႅတ်ႈႁႂ်ႈလႆႈတီႉမတ်ႉဢဝ်ၶဝ်ၸိူဝ်းဢၼ်ၶဝ်ႈၼႂ်းၽႃႇသႃႇၼၼ်ႉလႄႈႁႂ်ႈလႆႈဢဝ်သူင်ႇဝဵင်းယေႇရုသလႅမ်ႇႁႂ်ႈၶဝ်လႆႈၶၢမ်ႇတၢမ်ႇၶႃႈဢေႃႈ။

၆ ၼႂ်းမိူဝ်ႈဢၼ်ၵဝ်ၶႃႈယင်းတိုၵ်ႉၸွမ်းတၢင်းၵႂႃႇလႄႈႁွတ်ႈထိုင်ၵႃႈတီႈႁိမ်းဝဵင်းထမ်ႇမသႅတ်ႈၼၼ်ႉဢၼ်လႅင်းလူင်လုၵ်ႉသေၵႃႈတီႈၵၢင်ႁၢဝ်ပေႃႇမႃးၼႂ်းၶိင်ႇၵၢင်ဝၼ်းတဵင်ၼၼ်ႉလႄႈႁိူဝ်ႈလႅင်းႁွပ်ႈႁိမ်းၵဝ်ၶႃႈၵႂႃႇၵမ်းလဵဝ်ၶႃႈဢေႃႈ။

၇ ၵဝ်ၶႃႈလူမ်ႉဢူပ်ႇပူပ်ႇၵႃႈၼိူဝ်လိၼ်သေယဝ်ႉလႆႈငိၼ်းသဵင်ဢၼ်လၢတ်ႈတေႃႇၵဝ်ၶႃႈလႄႈဝႃႈ၊-သေႃးလုဢိူၺ်း၊သေႃးလုဢိူၺ်း၊ႁဵတ်းသင်လႄႈမႂ်းၼိၵ်ႈၸၢၵ်ႈငႅၼ်းသေးၵဝ်ၸိူဝ်ႉၼႆ၊မိူဝ်ႈဢၼ်ဝႃႈၼင်ႇၼႆၸိုင်ၵဝ်ၶႃႈၵေႃႈလဝ်ႈထၢမ်လႄႈဝႃႈ၊-

၈ ၸဝ်ႈႁဝ်းပဵၼ်ၽူႈလႂ်ၶႃႈ၊ဝႃႈၼင်ႇၼႆဢေႃႈ။မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊-ၵဝ်ပဵၼ်ယေႇသုၵူၼ်းဝဵင်းၼႃႇၸရႅတ်ႉ၊ဢၼ်မႂ်းၼိၵ်ႈၸၢၵ်ႈငႅၼ်းသေးၼၼ်ႉဢေႃႈ၊ဝႃႈၼင်ႇၼႆဢေႃႈ။

၉ ပဵၵ်ႉသမ်ႉၵူၼ်းဢၼ်ပႃးလူၺ်ႈၵၼ်တင်းၵဝ်ၶႃႈၸိူဝ်းၼၼ်ႉလႆႈႁၼ်ဢၼ်လႅင်းၼၼ်ႉလႄႈၵူဝ်ႁႄၼႃႇသေၵေႃႈၶဝ်ဢမ်ႇလႆႈငိၼ်းသဵင်ၵႂၢမ်းဢၼ်လၢတ်ႈတေႃႇၵဝ်ၶႃႈၼၼ်ႉ။မိူဝ်ႈၼၼ်ႉၵဝ်ၶႃႈၵေႃႈလဝ်ႈထၢမ်လႄႈဝႃႈ၊-

၁၀ ၸဝ်ႈႁဝ်း၊ၵဝ်ၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၸဝ်ႈၽြႃးၵေႃႈလၢတ်ႈလႄႈဝႃႈ၊-မႂ်းလုၵ်ႉလႄႈၶဝ်ႈၵႃႈၼႂ်းဝဵင်းထမ်ႇမသႅတ်ႈတႃႉ။ၵဝ်တၵ်းလၢတ်ႈပၼ်မႂ်းလွင်ႈတၢင်းၵႃႈဢၼ်ၵဝ်ၶၢၼ်းဝႆႉပုၼ်ႈဢၼ်မႂ်းတၵ်းလႆႈႁဵတ်းၸိူဝ်းၼၼ်ႉၵႃႈၼႂ်းဝဵင်းၼၼ်ႉဢေႃႈ၊ဝႃႈၼင်ႇၼႆဢေႃႈ။

၁၁ ပိူဝ်ႈဢၼ်ၵဝ်ၶႃႈတႃမွတ်ႈၵႂႃႇၵွပ်ႈပိူဝ်ႈႁႅင်းသၢႆဢရွင်ႇဢၼ်ႁိူဝ်ႈလႅင်းၼႃႇၼၼ်ႉလႄႈၵဝ်ၶႃႈလႆႈၶၢမ်ႇတၢင်းဢၼ်ၶဝ်ၸိူဝ်းဢၼ်ပႃးလူၺ်ႈၵၼ်တင်းၵဝ်ၶႃႈၼၼ်ႉၸုင်ဢဝ်မိုဝ်းၵဝ်ၶႃႈလႄႈၶဝ်ႈၵႃႈၼႂ်းဝဵင်းထမ်ႇမသႅတ်ႈၶႃႈဢေႃႈ။

၁၂ မိူဝ်ႈၼၼ်ႉဢႃႇၼၼိဢၼ်ပဵၼ်ၵေႃႉဢၼ်ယၢမ်ႈမူၼ်ႈပျေႃႇၼႂ်းဝၢတ်ႈၽြႃးပဵၼ်ၸဝ်ႈၸွမ်းၼင်ႇပိင်းၺၢပ်ႈတြႃးလႄႈပဵၼ်ၵေႃႉဢၼ်မီးသရေႇၵႃႈတီႈၵူၼ်းယုတဢၼ်ယူႇၵႃႈၼႂ်းဝဵင်းၼၼ်ႉမၼ်းမႃးၸုၵ်းယူႇၵႃႈတီႈႁိမ်းၵဝ်ၶႃႈသေလႄႈလၢတ်ႈဝႃႈ၊-

၁၃ ၼွင်ႉၵဝ်သေႃးလုဢိူၺ်း၊ၶၢမ်ႇတၢင်းဢၼ်မၢၵ်ႇတႃသမ်ႉၶိုၼ်းႁၼ်တႃႉ၊ဝႃႈၼင်ႇၼႆဢေႃႈ။ၵမ်းဢွၼ်ႇၼိုင်ႈၵူၺ်းၵဝ်ၶႃႈတူၺ်းလႄႈႁၼ်ၵမ်းလဵဝ်ဢေႃႈ။

၁၄ မၼ်းၵေႃႈလၢတ်ႈလႄႈဝႃႈ၊-ၽြႃးပဵၼ်ၸဝ်ႈပူႇမွၼ်ႇႁဝ်းလိူၵ်ႈၵဵပ်းဢဝ်မႂ်းႁႂ်ႈလႆႈႁူႉဢလူဝ်ႇၽြႃးပဵၼ်ၸဝ်ႈဢိၵ်ႇတင်းႁႂ်ႈလႆႈႁၼ်ၸဝ်ႈဢၼ်သိုဝ်ႈတေႃႇၼၼ်ႉလႄႈငိၼ်းသဵင်ဢၼ်ဢွၵ်ႇသူပ်းမၼ်းၸဝ်ႈၼၼ်ႉဢေႃႈ။

၁၅ လွင်ႈမၼ်းၸမ်းမႂ်းတၵ်းလႆႈလၢတ်ႈၵႃႈဢၼ်မႂ်းလႆႈႁၼ်ၵႃႈဢၼ်မႂ်းလႆႈငိၼ်းၸိူဝ်းၼႆႉတီႈၵူၼ်းတင်းသဵင်ႈတင်းလူင်လႄႈၶၢမ်ႇသၢၵ်ႈသေႇၽၢႆႇမၼ်းၸဝ်ႈဢေႃႈ။

၁၆ တေႃႈလဵဝ်ၼႆႉၵေႃႈႁဵတ်းသင်လႄႈထိူင်းၼၢၼ်းယူႇ။လုၵ်ႉတႃႉ။ႁဵတ်းပထၼႃႇတီႈၽြႃးပဵၼ်ၸဝ်ႈသေလႄႈၶၢမ်ႇဢဝ်ပပ်ႉတိၸၢမ်ႇသုၵ်ႈပွတ်ႈဢပျႅတ်ႈမႂ်းတႃႉ၊ဝႃႈၼင်ႇၼႆဢေႃႈ။

၁၇ လိုၼ်းၼၼ်ႉမိူဝ်ႈဢၼ်ၵဝ်ၶႃႈၶိုၼ်းမိူဝ်းၵႂႃႇၵႃႈတီႈဝဵင်းယေႇရုသလႅမ်ႇလႄႈယင်းတိုၵ်ႉသူးတွင်းၵႃႈၼႂ်းပိၵ်ႉမၢၼ်ႇၸဝ်ႈယူႇၼၼ်ႉၵဝ်ၶႃႈပဵၼ်ၸိူဝ်ႉၼင်ႇၼွၼ်းၽၼ်ႁၼ်ၼႂ်းတူဝ်ၸဝ်ႈၵဝ်ႇလႄႈလႆႈငိၼ်းမၼ်းၸဝ်ႈလၢတ်ႈတီႈၵဝ်ၶႃႈလႄႈဝႃႈ၊-

၁၈ မႂ်းၶတ်းၸႂ်လႄႈဢွၵ်ႇသေၵႃႈၼႂ်းဝဵင်းယေႇရုသလႅမ်ႇၼႆႉၵႂႃႇၶၼ်ၶၼ်ၽႂ်းၽႂ်းတႃႉ။ၵူၼ်းၸိူဝ်းၼႆႉတၵ်းဢမ်ႇၶၢမ်ႇဢဝ်ၵႂၢမ်းဢၼ်မႂ်းလၢတ်ႈၶၢမ်ႇသၢၵ်ႈသေႇလွင်ႈၵဝ်ၼၼ်ႉ၊ဝႃႈၼင်ႇၼႆဢေႃႈ။

၁၉ ၵဝ်ၶႃႈၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်း၊ၶဝ်ႁူႉလွင်ႈဢၼ်ၵဝ်ၶႃႈဢဝ်ၶဝ်ၸိူဝ်းဢၼ်ယုမ်ႇမၢတ်ႈၸဝ်ႈႁဝ်းၸိူဝ်းၼၼ်ႉၶင်ဝႆႉၵႃႈၼႂ်းထွင်ႇလႄႈပေႃႉယႅၼ်ႉၵႃႈၼႂ်းၸရွပ်ႈႁေႃးတြႃးလႂ်ၼၼ်ႉယူႇၶႃႈဢေႃႈ။

၂၀ မိူဝ်ႈဢၼ်ဢဝ်သထေႇၽၢၼ်ႇဢၼ်ပဵၼ်ၵေႃႉဢၼ်ၶၢမ်ႇသၢၵ်ႈသေႇၸဝ်ႈႁဝ်းတၢႆၼၼ်ႉၵေႃႈၵဝ်ၶႃႈၸုၵ်းယူႇၵႃႈတီႈႁိမ်းၼၼ်ႉသေလႄႈၽွမ်ႉၶဝ်ယူႇ၊ပႂ်ႉၶူဝ်းလဵင်းၶဝ်ၸိူဝ်းဢၼ်ဢဝ်မၼ်းတၢႆၼၼ်ႉၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈလၢတ်ႈတီႈၵဝ်ၶႃႈလႄႈဝႃႈ၊-

၂၁ ၵႂႃႇတႃႉ။ၵဝ်တၵ်းပွႆႇၸႂ်ႉမႂ်းၵႂႃႇၵႆၵႆတီႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆမီးၼၼ်ႉဢေႃႈ၊ဝႃႈၼင်ႇၼႆၶႃႈဢေႃႈ။

ပေႃးလုပဵၼ်ၵူၼ်းမိူင်းရူဝ်းမ

၂၂ ၶဝ်ဢွၼ်ၵၼ်ထွမ်ႇၵႂၢမ်းမၼ်းတေႃႇႁွတ်ႈထၼ်ႇၼၼ်ႉသေယဝ်ႉဢွၼ်ၵၼ်ႁွင်ႉသႅၼ်ႇလႄႈဝႃႈ၊-ဢဝ်ၵူၼ်းၸိူဝ်ႉၼင်ႇၼႆၼႆႉဢွၵ်ႇပႅတ်ႈသေၵႃႈၼိူဝ်လိၼ်မိူင်းၼႆႉတႃႉ။ဢမ်ႇထုၵ်ႇလီႁႂ်ႈမၼ်းဢသၢၵ်ႈလိပ်းယူႇၵူၺ်း၊ဝႃႈၼင်ႇၼႆဢေႃႈ။

၂၃ ၼႂ်းမိူဝ်ႈဢၼ်ၶဝ်ႁဵတ်းတၢင်းဢၼ်ႁွင်ႉသႅၼ်ႇသေယဝ်ႉယိပ်းၵမ်ဢဝ်ၶူဝ်းလဵင်းတူဝ်ၸဝ်ႈၵဝ်ႇလႄႈထိမ်ႈၶိုၼ်ႈၵႃႈၼိူဝ်ႁူဝ်ၶဝ်ယူႇ၊ဢဝ်မုၼ်ႈလိၼ်ပိုၼ်ၶိုၼ်ႈၵၢင်ႁၢဝ်ယူႇၼၼ်ႉၸိုင်၊

၂၄ ၵႄႇသိုၵ်းလူင်ၶႂ်ႈႁူႉၵွပ်ႈပိူဝ်ႈလွင်ႈတၢင်းၵႃႈသင်လႄႈၶဝ်ႁွင်ႉသႅၼ်ႇၸီႇယၢင်ႇဢဝ်ပေႃးလုမႃးၵႃႈၼႂ်းတပ်ႉသေလႄႈပေႃႉယႅၼ်ႉၸႅတ်ႈတူၺ်းမၼ်းၼၼ်ႉဢေႃႈ။

၂၅ မိူဝ်ႈဢၼ်ၶဝ်ဢဝ်တင်းသၢႆၼင်မတ်ႉၽုၵ်ႇတိုတ်ႉၸၼ်မၼ်းၼၼ်ႉၸိုင်ပေႃးလုလၢတ်ႈတီႈတပ်ႉမူးဢၼ်ၸုၵ်းယူႇၵႃႈတီႈႁိမ်းမၼ်းၼၼ်ႉလႄႈဝႃႈ၊-ယင်းဢမ်ႇပႆႇၸႅတ်ႈသေးၸွမ်းၼင်ႇတြႃးဢူႉပတေႇလႄႈႁဵတ်းသင်သူပေႃႉယႅၼ်ႉၵေႃႉဢၼ်ပဵၼ်ၵူၼ်းရူဝ်းမၼႆႉဝႃႈၼင်ႇၼႆဢေႃႈ။

၂၆ တပ်ႉမူးၼၼ်ႉမိူဝ်ႈဢၼ်လႆႈငိၼ်းၵႂၢမ်းၼၼ်ႉၸိုင်ၵႂႃႇၸူးၵႃႈတီႈၵႄႇသိုၵ်းၼၼ်ႉသေယဝ်ႉလၢတ်ႈဝႃႈ၊-တၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ။ၵေႃႉၼႆႉပဵၼ်ၵူၼ်းရူဝ်းမၶႃႈဢေႃႈ၊ဝႃႈၼင်ႇၼႆဢေႃႈ။

၂၇ ၵႄႇသိုၵ်းၼၼ်ႉၵေႃႈမႃးၸူးၵႃႈတီႈပေႃးလုသေလႄႈထၢမ်ဝႃႈ၊-မႂ်းပဵၼ်ၵူၼ်းရူဝ်းမႁိုဝ်၊လၢတ်ႈတီႈၵဝ်လူး၊မိူဝ်ႈဢၼ်ဝႃႈၼင်ႇၼႆၸိုင်၊ပေႃးလုၵေႃႈလဝ်ႈလၢတ်ႈလႄႈဝႃႈ၊-ၸႂ်ႈၶႃႈယဝ်ႉ၊ဝႃႈၼင်ႇၼႆဢေႃႈ။

၂၈ ၵႄႇသိုၵ်းၼၼ်ႉၵေႃႈလၢတ်ႈလႄႈဝႃႈ၊-တႃႇတေလႆႈပဵၼ်ၵူၼ်းရူဝ်းမၼၼ်ႉၵဝ်လႆႈပၼ်ငိုၼ်းၼမ်ၼႃႇဢိူဝ်း၊မိူဝ်ႈဢၼ်ဝႃႈၼင်ႇၼႆၸိုင်၊ပေႃးလုသမ်ႉလၢတ်ႈလႄႈဝႃႈ၊-ၵဝ်ၶႃႈပဵၼ်ၸႃႇတိၵူၼ်းရူဝ်းမၶႃႈဢေႃႈ၊ဝႃႈၼင်ႇၼႆဢေႃႈ။

၂၉ မိူဝ်ႈၼၼ်ႉၶဝ်ၸိူဝ်းဢၼ်တၵ်းၸႅတ်ႈသေးမၼ်းၼၼ်ႉဢွၵ်ႇပၢႆႊၵႂႃႇၵမ်းလဵဝ်လႄႈၵႄႇသိုၵ်းၵေႃႈလႆႈႁူႉလွင်ႈဢၼ်ဝႃႈမၼ်းပဵၼ်ၵူၼ်းရူဝ်းမဢိၵ်ႇတင်းလွင်ႈဢၼ်မၼ်းလႆႈမတ်ႉၽုၵ်ႇမႅၼ်ႈၵူၼ်းရူဝ်းမၼၼ်ႉလႄႈမီးတၢင်းဢၼ်ၵူဝ်ႁႄၼႃႇလူင်လၢင်ဢေႃႈ။

၃၀ ဝၼ်းမိူဝ်ႈၽုၵ်ႈပိူဝ်ႈဢၼ်ၵႄႇသိုၵ်းၼၼ်ႉၶႂ်ႈႁူႉလွင်ႈဢၼ်ၸိုဝ်ႈဢၼ်ၸႂ်ႈဢၼ်ၵူၼ်းယုတတင်းလၢႆတၢင်ႇဢပျႅတ်ႈၼိူဝ်ပေႃးလုၸိူဝ်ႉၼင်ႇႁိုဝ်ၼၼ်ႉလႄႈမၼ်းထွတ်ႇၸိူၵ်ႈလဵၵ်းဢၼ်မတ်ႉၽုၵ်ႇပေႃးလုၼၼ်ႉသေယဝ်ႉၸီႇယၢင်ႇႁႂ်ႈယိတ်ႉပရေႃးႁိၵ်ႈလူင်ဢိၵ်ႇတင်းဢရႃႇသိလူင်တင်းသဵင်ႈတင်းလူင်ၸူႉၵၼ်တုမ်ၵၼ်သေယဝ်ႉႁွင်ႉဢဝ်ပေႃးလုလႄႈဝႆႉၵႃႈတီႈၽၢႆႇၼႃႈၶဝ်ဢေႃႈ။