Shan Missions

မၢတ်ႈထႄႇ

Chapter ၁     ၂     ၃     ၄     ၅     ၆     ၇     ၈     ၉     ၁၀     ၁၁     ၁၂     ၁၃     ၁၄     ၁၅     ၁၆     ၁၇     ၁၈     ၁၉     ၂၀     ၂၁     ၂၂     ၂၃     ၂၄     ၂၅     ၂၆     ၂၇     ၂၈ 

၃

ယုဝ်းႁၢၼ်ႇမႄးႁႅၼ်းသဵၼ်ႈတၢင်း

၁ မိူဝ်ႈၶိင်ႇၵႃႇလႃႉယၢမ်းၼၼ်ႉယုဝ်းႁၢၼ်ႇဢၼ်ပၼ်ပပ်ႉတိၸၢမ်ႇၼၼ်ႉပေႃႇမႃးသေယဝ်ႉႁေႃးလၢတ်ႈၵႃႈတီႈၼႂ်းထိူၼ်ႇမိူင်းယုတလႄႈဝႃႈ၊-

၂ ပိူဝ်ႈဢၼ်မိူင်းၵၢင်ႁၢဝ်ၸဝ်ႈၸမ်တၵ်းတႄႇပဵၼ်ယဝ်ႉလႄႈၶုၵ်းၸႂ်လႆႈမႆႈၸႂ်တႃႉ၊ဝႃႈၼင်ႇၼႆဢေႃႈ။ 

၃ ၸွမ်းၼင်ႇပရေႃးၽႅတ်ႈဢိသႃႇယႁေႃးလၢတ်ႈဝႆႉဝႃႈ၊သဵင်ၵေႃႉဢၼ်ႁွင်ႉသႅၼ်ႇၵႃႈၼႂ်းထိူၼ်ႇလႄႈဝႃႈ၊-မႄးႁႅၼ်းသဵၼ်ႈတၢင်းထႃႇဝရႃႉၽြုးတႃႉ။ ႁႂ်ႈသဵၼ်ႈတၢင်းမၼ်းၸဝ်ႈသိုဝ်ႈလီတႃႉ၊ဝႃႈၼင်ႇၼႆၼၼ်ႉၶႂ်ႈဝႃႈပဵၼ်ယုဝ်းႁၢၼ်ႇၼၼ်ႉဢေႃႈ။ 

၄ ယုဝ်းႁၢၼ်ႇၼုင်ႈၶူဝ်းဢၼ်ဢဝ်တင်းၶူၼ်ၵလႃႇဢုၵ်ႉတေႃးႁဵတ်းၼၼ်ႉလႄႈၵႃႈတီႈဢႅဝ်မၼ်းၵေႃႈဢဝ်တင်းသၢႆၼင်ႁတ်ႉသေယဝ်ႉၵိၼ်မႅင်းၵႅင်းတင်းၼမ်ႉၽိုင်ႈဢၼ်မီးၵႃႈၼႂ်းထိူၼ်ႇၼၼ်ႉၵူၺ်းဢေႃႈ။ 

၅ မိူဝ်ႈၼၼ်ႉၸႃႉၸဵမ်ၵူၼ်းဝဵင်းယေႇရုသလႅမ်ႇၵူၼ်းမိူင်းယုတၵူၼ်းဢၼ်ယူႇႁိမ်းႁွမ်းၼမ်ႉႁွင်ႊယေႃးတၢၼ်ႇတင်းသဵင်ႈတင်းလူင်ဢွၼ်ၵၼ်ၵႂုႇၸူးၵႃႈတီႈယုဝ်းႁၢၼ်ႇသေယဝ်ႉ

၆ ၽုၺ်ႇဢွၵ်ႇၼႄပျႃႉဢပျႅတ်ႈတူဝ်ၸဝ်ႈၵဝ်ႇတင်းလၢႆသေလႄႈၶၢမ်ႇဢဝ်ပပ်ႉတိၸၢမ်ႇၼႂ်းၼမ်ႉႁွင်ႊယေႃးတၢၼ်ႇဢေႃႈ။ 

၇ ယုဝ်းႁၢၼ်ႇၼၼ်ႉမိူဝ်ႈဢၼ်ႁၼ်ၽႃႇရိသေးတင်းၸတ်ႉတုၵေးၼမ်ၼႃႇၶႂ်ႈၶၢမ်ႇဢဝ်ပပ်ႉတိၸၢမ်ႇလႄႈမႃးယူႇၼၼ်ႉၸိုင်မၼ်းလၢတ်ႈလႄႈဝႃႈ၊-ၸိူဝ်ႉၶိူဝ်းငူးႁၢႆႉၶဝ်ဢိူၺ်း။ 

၈ ၼင်ႇႁိုဝ်သူတၵ်းလႆႈလႅၼ်ႈပၢႆႊသေၵႃႈတီႈၽေးတၢမ်ႇဢၼ်တၵ်းႁွတ်ႈထိုင်မႃးၵႃႈတီႈသူၼၼ်ႉၽူႈလႂ်ပၼ်သတိတီႈသူ။ မၢၵ်ႇမၢၵ်ႇဢၼ်ၵိုင်ႇၵၼ်တင်းတၢင်းဢၼ်ၶုၵ်းၸႂ်လႆႈမႆႈၸႂ်တႃႉ။ 

၉ ဢႃႇပြႁၢမ်ႇပဵၼ်ပေႃႈႁဝ်းဢိူဝ်ႈ၊ဝႃႈၼႆယႃႇပေထၢင်ႇပေဝႃႈၼႂ်းၸႂ်သူ။ ၽြႃးပဵၼ်ၸဝ်ႈဢဝ်ၼႂ်းမၢၵ်ႇႁိၼ်ၸိူဝ်းၼႆႉသေလႄႈၽၢၼ်ႇသၢင်းႁဵတ်းပဵၼ်လုၵ်ႈဢႃႇပြႁၢမ်ႇလႆႈယူႇဢိူဝ်ႈ။ 

၁၀ တေႃႈလဵဝ်ၼႆႉဢဝ်တင်းတႃမၢတ်ႇဝႆႉၵႃႈတီႈႁိမ်းႁၢၵ်ႈတူၼ်ႈယူႇလႄႈတူၼ်ႈဢၼ်ဢမ်ႇမၢၵ်ႇမၢၵ်ႇဢၼ်လီတင်းသဵင်ႈတင်းမူတ်းၸိူဝ်းၼၼ်ႉတၵ်းလႆႈၶၢမ်ႇတၢင်းဢၼ်ၽၼ်းလူမ်ႉလႄႈၶျႃးသႂ်ႇၵႃႈၼႂ်းၽႆးဢေႃႈ၊ဝႃႈၼင်ႇၼႆဢေႃႈ။ 

၁၁ ၵဝ်ပၼ်ပပ်ႉတိၸၢမ်ႇတီႈသူၵႃႈၼႂ်းၼမ်ႉပုၼ်ႈလွင်ႈၼင်ႇႁိုဝ်တၵ်းၶုၵ်းၸႂ်လႆႈမႆႈၸႂ်ဢေႃႈ။ ၵေႃႉဢၼ်မႃးလိုၼ်းၵဝ်ၼၼ်ႉယဵင်ႈၶႅၼ်းယႂ်ႇမျၢတ်ႈၼႃႇသေၵဝ်ဢေႃႈ။ ၵဝ်ယင်းဢမ်ႇထိူၵ်ႈဢမ်ႇတၢၼ်ႇႁႂ်ႈလႆႈယိပ်းၵမ်ၶႅပ်းတိၼ်မၼ်းၸဝ်ႈ။ ၵေႃႉၼၼ်ႉတၵ်းပၼ်ပပ်ႉတိၸၢမ်ႇတီႈသူၼႂ်းဝိၺိၺ်ႇမူတ်းၸၢင်ႇၸဝ်ႈတင်းၼႂ်းၽႆးဢေႃႈ။ 

၁၂ ၼႂ်းမိုဝ်းမၼ်းၸဝ်ႈၼၼ်ႉမီးလူင်ႈၽတ်းယူႇလႄႈတၵ်းႁႂ်ႈတလၢင်းယဵပ်ႇၶဝ်ႈမၼ်းၸဝ်ႈမူတ်းသႂ်ဢေႃႈ။ ၶဝ်ႈၵျုင်ႇၸမ်းတၵ်းဢဝ်ၸူႉဢဝ်သိမ်းဝႆႉၼႂ်းယွင်ၼႂ်းယေးလႄႈၶဝ်ႈလႅပ်ႈၸမ်းတၵ်းဢဝ်တင်းၽႆးဢၼ်ဢမ်ႇမွတ်ႇလႆႈၼၼ်ႉၸုတ်ႇပႅတ်ႈဢေႃႈ၊ဝႃႈၼင်ႇၼႆဢေႃႈ။ 

ၸဝ်ႈယေႇသုၶၢမ်ႇဢဝ်ပပ်ႉတိၸၢမ်ႇ

၁၃ မိူဝ်ႈၼၼ်ႉၸဝ်ႈယေႇသုလုၵ်ႉသေၵႃႈတီႈမိူင်းၵႃႇလိလႄးလူင်းမႃးၸူးၵႃႈတီႈယုဝ်းႁၢၼ်ႇႁိမ်းၼမ်ႉႁွင်ႊယေႃးတၢၼ်ႇႁႂ်ႈလႆႈၶၢမ်ႇဢဝ်ပပ်ႉတိၸၢမ်ႇဢေႃႈ။ 

၁၄ ယုဝ်းႁၢၼ်ႇၵေႃႈႁၢမ်ႈတၢပ်ႈႁႄႉၶႅၼ်ၸဝ်ႈယေႇသုလႄႈဝႃႈ၊-ၸဝ်ႈႁဝ်း၊ၵဝ်ၶႃႈယင်းမီးလွင်ႈဢၼ်တၵ်းလႆႈၶၢမ်ႇဢဝ်ပပ်ႉတိၸၢမ်ႇၵႃႈတီႈၸဝ်ႈႁဝ်းယူႇၶႃႈဢေႃႈ။ ႁဵတ်းသင်လႄႈၸဝ်ႈႁဝ်းမႃးၵႃႈတီႈၵဝ်ၶႃႈ၊ဝႃႈၼင်ႇၼႆဢေႃႈ။ 

၁၅ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ပိူဝ်ႈဢၼ်ထုၵ်ႇလီႁဵတ်းႁႂ်ႈတြႃးတၢင်းဢၼ်သိုဝ်ႈတေႃႇတဵမ်ထူၼ်ႈလႄႈတေႃႈလဵဝ်ၼႆႉပၼ်ဢၶႂၢင်ႉသေၵမ်း၊ဝႃႈၼင်ႇၼႆဢေႃႈ။ 

၁၆ မိူဝ်ႈၼၼ်ႉယုဝ်းႁၢၼ်ႇႁပ်ႉတုင်းဢဝ်မၼ်းၸဝ်ႈဢေႃႈ။ ၸဝ်ႈယေႇသုၶၢမ်ႇဢဝ်ပပ်ႉတိၸၢမ်ႇသေယဝ်ႉၼႂ်းမိူဝ်ႈဢၼ်ယင်းတိုၵ်ႉဢွၵ်ႇသေၵႃႈၼႂ်းၼမ်ႉမႃးယူႇၼၼ်ႉၸိုင်ၵၢင်ႁၢဝ်ၽုၺ်ႇပိုတ်ႇလႄႈလႆႈႁၼ်ဝိၺိၺ်ႇမူတ်းၸၢင်ႇၸဝ်ႈၵျွႃးလူင်းမႃးၸပ်းယူႇၵႃႈၼိူဝ်မၼ်းၸဝ်ႈမိူၼ်ၸိူဝ်ႉၼင်ႇၼူၵ်ႉတူႈလႄႈသဵင်ၸဝ်ႈၵေႃႈဢွၵ်ႇပဵၼ်မႃးၵႃႈၼိူဝ်ၵၢင်ႁၢဝ်လႄႈဝႃႈ၊-

၁၇ ၵေႃႉၼႆႉပဵၼ်လုၵ်ႈဢၼ်ၵဝ်ႁၵ်ႉၼႃႇ၊ၵေႃႉဢၼ်ၵဝ်ထုၵ်ႇၸႂ်ၵျိူၵ်ႈၸႂ်ၼႃႇဢေႃႈ၊ဝႃႈၼင်ႇၼႆဢေႃႈ။