Shan Missions

   ၵျၢမ်းငဝ်ႈၵမ်ႇၽႃႇ

၁   ၂   ၃   ၄   ၅   ၆   ၇   ၈   ၉   ၁၀   ၁၁   ၁၂   ၁၃   ၁၄   ၁၅   ၁၆   ၁၇   ၁၈   ၁၉   ၂၀   ၂၁   ၂၂   ၂၃   ၂၄   ၂၅   ၂၆   ၂၇   ၂၈   ၂၉

၃၀   ၃၁   ၃၂   ၃၃   ၃၄   ၃၅   ၃၆   ၃၇   ၃၈   ၃၉   ၄၀   ၄၁   ၄၂   ၄၃   ၄၄   ၄၅   ၄၆   ၄၇   ၄၈   ၄၉   ၅၀   

    ၃၄

တိၼတင်းသေႇၶိမ်ႇ

၁ တိၼ လုၵ်ႈယိင်းဢၼ် လေႇဢႃႇ ဢၼ်ၵိူတ်ႇလဵင်ႉမႃးတီႈ ယႃႇၵုပ်ႉ ၼၼ်ႉဢွၵ်ႇၵွႃႇႁႂ်ႈလႆႈလူႈလႆႈတူၺ်းလုၵ်ႈ ယိင်းၸိူဝ်ႉၶိူဝ်းၵူၼ်းမိူင်းၼၼ်ႉဢေႃႈ။

၂ သေႇၶိမ်ႇလုၵ်ႈၸၢႆးႁႃႇမေႃႇ ၵူၼ်း ႁိတ်ႉတိ ၶုၼ်ဢၼ်ဢုပ်ႉၵႃႈၼိူဝ်မိူင်းၼၼ်ႉႁၼ် တိၼ လႄႈဢဝ်မၼ်းၵွႃႇသေယဝ်ႉ ႁဵတ်းတၢင်းဢၼ်ၼွၼ်းလူၺ်ႈၵၼ်တင်းမၼ်းလႄႈ ယႃႉသ ရေႇမၼ်းဢေႃႈ။

၃ လိုၼ်းၼၼ်ႉၸႂ်ဢၼ်ႁၵ်ႉပႅင်း တိၼလုၵ်ႈယိင်း ယႃႇၵုပ်ႉ ၼၼ်ႉပေႃႇမႃးၼမ်မႃးၼႂ်းႁူဝ်ၸႂ်မၼ်းလႄႈမၼ်းဢဝ်ၵႂၢမ်းလၢတ်ႈၶျေႃးတိၼ ဢေႃႈ။

၄ တီႈပေႃႈမၼ်းၶုၼ် ႁႃႇမေႃႇ ၼၼ်ႉၵေႃႈ သေႇၶိမ်ႇလဝ်ႈဝႃႈ၊- ၼင်ႇႁိုဝ်မေႈယိင်းဢွၼ်ႇၼႆႉတၵ်းလႆႈပဵၼ်မေးၵဝ်ၶႃႈၸိုင်၊ယွၼ်းပၼ်သေၵမ်းၶႃႈ၊ ဝႃႈၼင်ႇၼႆ ဢေႃႈ။

၅ ယႃႇၵုပ်ႉ ၼၼ်ႉပိၵ်ႉသမ်ႉႁူႉငိၼ်းလွင်ႈဢၼ်သေႇၶိမ်ႇ ယႃႉသရေႇလုၵ်ႈယိင်းမၼ်း တိၼ ၼၼ်ႉသေၵေႃႈ ၵွပ်ႈပိူဝ်ႈဢၼ်လုၵ်ႈၸၢႆးမၼ်းတင်းလၢႆ မီးယူႇလူၺ်ႈၵၼ်တင်းတရိၵ်ႈသၢၼ်ႇၵႃႈတီႈထိူၼ်ႇလႄႈ ယူႇ တဵတ်ႇတဵတ်ႇပႂ်ႉထႃႈၶဝ်ယူႇဢေႃႈ။

၆ လိုၼ်းၼၼ်ႉၶုၼ်ႁႃႇမေႃႇ ဢၼ်ပဵၼ်ပေႃႈ သေႇၶိမ်ႇ ၼၼ်ႉဢွၵ်ႇမႃးႁႂ်ႈလႆႈတၵ်ႉလၢတ်ႈ ယႃႇၵုပ်ႉ ဢေႃႈ။

၇ လုၵ်ႈၸၢႆး ယႃႇၵုပ်ႉၸိူဝ်းၼၼ်ႉ မိူဝ်ႈဢၼ်ငိၼ်းသတၢင်းၶၢဝ်ႇၼၼ်ႉၸိုင်၊ဢွၼ်ၵၼ်လုၵ်ႉသေၵႃႈတီႈထိူၼ်ႇၶိုၼ်းမႃး ႁွတ်ႈထိုင်ဢေႃႈ။ပိူဝ်ႈဢၼ်ၵေႃႉၼၼ်ႉလႆႈၼွၼ်းလူၺ်ႈၵၼ်တင်းလုၵ်ႈယိင်း ယႃႇၵုပ်ႉ လႄႈႁဵတ်းဢမူႉဢၼ်မိူၵ်ႈၼႂ်းၸိူဝ်ႉၶိူဝ်း ဢိသရေႇလ ဢၼ်ပဵၼ်ဢမူႉဢၼ်ဢမ်ႇထုၵ်ႇလီႁဵတ်းၼၼ်ႉလႄႈ ၶဝ်ၼၼ်ႉ ၸဵပ်းၸႂ်လႄႈတေႃးသႃႉ တၢင်းၸႂ်မႆႈဢွၵ်ႇၼႃႇဢေႃႈ။

၈ ၶုၼ် ႁႃႇမေႃႇ ၵေႃႈတၵ်ႉလၢတ်ႈၵၼ်တင်းၶဝ်လႄႈဝႃႈ၊- ႁူဝ်ၸႂ်လုၵ်ႈၸၢႆးၵဝ်သေႇၶိမ်ႇ ၼၼ်ႉၸပ်းၸွႆးလုၵ်ႈယိင်းသူယႂ်ႇၼႃႇလူင်လၢင်ဢေႃႈ။ဢဝ်ဢၢပ်ႈပၼ်ႁႂ်ႈပဵၼ်မေးမၼ်းသေၵမ်း။

၉ သူတင်းႁဝ်းၼင်ႇၵၼ်ၵၼ် ႁဵတ်းမီးတၢင်းဢၼ်သွင်ႇမင်ႇၵလႃႇဢဝ်ၵၼ်လႄႈ ပၼ်လုၵ်ႈၸၢႆးႁဝ်းဢဝ်လုၵ်ႈယိင်းသူသေၵမ်း။လုၵ်ႈယိင်းႁဝ်းၵေႃႈပၼ်လုၵ်ႈၸၢႆး သူဢဝ်သေၵမ်း။

၁၀ သူယူႇလူၺ်ႈၵၼ်တင်းႁဝ်းၵႃႈတီႈမိူင်းၼႆႉယင်းဢမ်ႇလႆႈမီးဢၼ်ႁႄႉဢၼ်ၶႅၼ်၊ ၶျႃးတီႈယူႇႁဵတ်းလွင်ႈသိုဝ်ႉၶၢႆယူႇသေလႄႈ ႁႂ်ႈမီးတီႈဢၼ်ဢုပ်ႉဢၼ်ပိူင်ႇသေၵမ်း၊ဝႃႈၼင်ႇၼႆဢေႃႈ။

၁၁ သေႇၶိမ်ႇ ၵေႃႈလၢတ်ႈတီႈပေႃႈမေႈယိင်းဢိၵ်ႇတင်း ပီႈၸၢႆးမၼ်းတင်းလၢႆၼၼ်ႉလႄႈဝႃႈ၊-ႁႂ်ႈၵဝ်ၶႃႈထူပ်းၵျေးၸူးသိုဝ်ႈၼႃႈတႂ်ႈတႃသူၸဝ်ႈသေၵမ်း။ၵဝ်ၶႃႈတၵ်းပၼ်ၵႃႈဢၼ်သူ ၸဝ်ႈယွၼ်းၼၼ်ႉၶႃႈဢေႃႈ။

၁၂ ဢုၵ်ႉၸႃႇဢၼ်ၵၼ်ႇတေႃးသေဢမ်ႇဝႃႈ၊လၵ်ႈသွင်ႇသေဢမ်ႇဝႃႈ၊ၵေႇႁိုဝ်ၼမ် ႁိုဝ်ဢမ်ႇဝႃႈ၊ ၵႃႈဢၼ်သူၸဝ်ႈယွၼ်းၼၼ်ႉၵဝ်ၶႃႈတၵ်းပၼ်ၶႃႈဢေႃႈ။ ၵူၺ်းၵွမ်ႉပၼ်မေႈယိင်းၼႆႉတီႈၵဝ်ၶႃႈၵူၺ်းသေၵမ်းၶႃႈ၊ဝႃႈၼင်ႇၼႆဢေႃႈ။

၁၃ လုၵ်ႈၸၢႆး ယႃႇၵုပ်ႉ ၸိူဝ်းၼၼ်ႉၵွပ်ႈပိူဝ်ႈဢၼ်သေႇၶိမ်ႇယႃႉသရေႇၼွင်ႉယိင်းၶဝ်တိၼ ၼၼ်ႉလႄႈၶဝ်ဢဝ်တင်းပရီ့ယေႇၶိုၼ်းလၢတ်ႈတီႈ သေႇၶိမ်ႇ တင်းပေႃႈမၼ်း ႁႃႇမေႃႇ ၼၼ်ႉလႄႈဝႃႈ၊-

၁၄ ႁဝ်းဢမ်ႇႁဵတ်းလွင်ႈဢၼ်တၵ်းဢဝ်ၼွင်ႉယိင်းႁဝ်းၶႃႈဢၢပ်ႈပၼ်တီႈ ၵေႃႉဢၼ်ဢမ်ႇပႆႇၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်း ၼၼ်ႉလႆႈၶႃႈ။ ပေႃးပၼ်ၸိုင်၊ပဵၼ်လွင်ႈဢၼ်လီသေႉသွမ်းၶႃႈ ဢေႃႈ။

၁၅ မီးလွင်ႈၼိုင်ႈၵူၺ်းဢၼ်ႁဝ်းၶႃႈတၵ်းႁပ်ႉတုင်းဢဝ်ၼၼ်ႉၸမ်း၊ ပေႃးသူတၵ်းႁဵတ်းၸွမ်းၼင်ႇၽႃႇသႃႇႁဝ်းၶႃႈလႄႈ ႁႂ်ႈၵူၼ်းၸၢႆးၵူႈၵေႃႉၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းၸိုင် ႁဝ်းၶႃႈတၵ်းဢဝ်လုၵ်ႈယိင်းႁဝ်းၶႃႈဢၢပ်ႈပၼ်တီႈသူၸဝ်ႈလႄႈလုၵ်ႈယိင်းသူ ၸဝ်ႈၵေႃႈႁဝ်းၶႃႈတၵ်းဢဝ်ဢေႃႈ။

၁၆ ၵမ်းၼၼ်ႉႁဝ်းၶႃႈတၵ်းယူႇလူၺ်ႈၵၼ်တင်းသူၸဝ်ႈလႄႈ ပဵၼ်မဵဝ်းလဵဝ် ၵၼ်ဢေႃႈ။

၁၇ ပေႃးဢမ်ႇၼၼ်ပေႃးဢမ်ႇထွမ်ႇဢဝ်ၵႂၢမ်းႁဝ်းၶႃႈလႄႈ ဢမ်ႇၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းၸိုင် ႁဝ်းၶႃႈတၵ်းဢဝ်လုၵ်ႈယိင်းႁဝ်းၶႃႈသေလႄႈၵွႃႇၶႃႈယဝ်ႉ၊ဝႃႈၼင်ႇၼႆဢေႃႈ။

၁၈ၵႂၢမ်းၶဝ်ၼၼ်ႉ ထုၵ်ႇၸႂ်ၵျိူၵ်ႈၸႂ်ၶုၼ်ႁႃႇမေႃႇတင်းလုၵ်ႈၸၢႆးမၼ်း သေႇၶိမ်ႇ ၼၼ်ႉလႄႈ

၁၉ လုၵ်ႈၸၢႆးမၼ်းၵေႃႈပိူဝ်ႈဢၼ်ႁၵ်ႉပႅင်းလုၵ်ႈယိင်း ယႃႇၵုပ်ႉ ယႂ်ႇၼႃႇလူင်လၢင်ဢိၵ်ႇတင်း ပိူဝ်ႈဢၼ်မၼ်းမီးသရေႇလိူဝ်တွၼ်းသေပိူၼ်ႈ ၼႂ်းၸိူဝ်ႉၶိူဝ်းပေႃႈမၼ်း တင်းသဵင်ႈတင်းလူင်ၼၼ်ႉလႄႈဢမ်ႇႁဵတ်းၵွႆႈႁဵတ်းထိူင်း။

၂၀ ၶုၼ် ႁႃႇမေႃႇ တင်းလုၵ်ႈၸၢႆးမၼ်း သေႇၶိမ်ႇ ၵွႃႇၵႃႈတီႈႁူးၽၵ်းတူဝဵင်းၶဝ်ၼၼ်ႉလႄႈ တၵ်ႉလၢတ်ႈၵူၼ်း ဝဵင်းတင်းလၢႆလႄႈဝႃႈ၊-

၂၁ ၵူၼ်းၸိူဝ်းၼႆႉထုၵ်ႇမေႃၵၼ်တင်းႁဝ်းယဝ်ႉ။ပိူဝ်ႈၼႆလႄႈႁႂ်ႈၶဝ်ယူႇၵႃႈတီႈမိူင်းႁဝ်းၼႆႉလႄႈႁဵတ်းလွင်ႈသိုဝ်ႉလွင်ႈၶၢႆသေၵမ်း။ တူၺ်းလူႊ။မိူင်းႁဝ်းၵႂၢင်ႈၼႃႇပုၼ်ႈၶဝ်တၵ်းယူႇဢေႃႈ။ဢွၼ်ၵၼ်ဢဝ်လုၵ်ႈယိင်းၶဝ်လႄႈ ပဵၼ်ႁိူၼ်းပဵၼ်ယေးလူၺ်ႈ ၵၼ်တႃႉ။

၂၂ လုၵ်ႈယိင်းႁဝ်းၵေႃႈႁႂ်ႈၶဝ်ဢဝ်တႃႉ။ၵူၺ်းၵွမ်ႉမီးလွင်ႈၼိုင်ႈၵူၺ်း ဢၼ်ၶဝ်တၵ်းႁပ်ႉတုင်းဢဝ်လွင်ႈဢၼ်ၶဝ်တၵ်းယူႇလူၺ်ႈၵၼ်တင်းႁဝ်းလႄႈ ပဵၼ်မဵဝ်းလဵဝ်ၵၼ်တင်းႁဝ်းၼၼ်ႉၸမ်း ၸိူဝ်ႉၼင်ႇဢၼ်ၶဝ်ၶၢမ်ႇမင်ႇၵလႃႇတၢင်းဢၼ်ထိူဝ်ႁိမ်းၼၼ်ႉ ၵူၼ်းၸၢႆးႁဝ်းၵူႈၵေႃႉတၵ်းလႆႈၶၢမ်ႇမင်ႇၵလႃႇ တၢင်းဢၼ်ထိူဝ်ႁိမ်း ဢေႃႈ။

၂၃ ၸႃႉၸဵမ်ၽုင်သူဝ်းၽုင်ဝူဝ်းၶဝ်တရိၵ်ႈသၢၼ်ႇၶဝ်တင်းလၢႆဢိၵ်ႇတင်း ဢုုၵ်ႉၸႃႇၶူဝ်းလဵင်းၶဝ်ၼၼ်ႉတၵ်းပဵၼ်ၶွင်ႁဝ်းဢမ်ႇၸႂ်ႈႁိုဝ်။ဢွၼ်ၵၼ်ၸွမ်းဢလူဝ်ႇၶဝ်တႃႉႁဝ်း။ပေႃးႁဵတ်းၸိူဝ်ႉၼင်ႇၼၼ်ၸိုင်၊ၶဝ်တၵ်း ယူႇလူၺ်ႈၵၼ်တင်းႁဝ်းဢေႃႈ၊ ဝႃႈၼင်ႇၼႆလႄႈ

၂၄ ၶဝ်ၸိူဝ်းဢၼ်ဢွၵ်ႇၽၵ်းတူဝဵင်းၼၼ်ႉ တင်းသဵင်ႈတင်းလူင်ဢွၼ်ၵၼ်ထွမ်ႇဢဝ်ၵႂၢမ်းဢၼ်ၶုၼ်ႁႃႇမေႃႇ တင်းလုၵ်ႈၸၢႆးမၼ်းသေႇၶိမ်ႇ လၢတ်ႈၼၼ်ႉလႄႈၵူၼ်းၸၢႆးၵႃႈမီးဢၼ်ဝႃႈ ၶဝ်ၸိူဝ်းဢၼ်ဢွၵ်ႇၽၵ်းတူဝဵင်းၼၼ်ႉတင်းသဵင်ႈတင်းလူင်ဢွၼ်ၵၼ်ၶၢမ်ႇမင်ႇၵလႃႇ တၢင်းဢၼ်ထိူဝ်ႁိမ်းဢေႃႈ။

၂၅ လႆႈသၢမ်ဝၼ်းယဝ်ႉ မိူဝ်ႈဢၼ်ၶဝ်ယင်းတိုၵ်ႉၸဵပ်းသႅပ်ႇယူႇၼၼ်ႉၸိုင်၊လုၵ်ႈၸၢႆးယႃႇၵုပ်ႉသွင်ၵေႃႉ သိမုၼ်ႇတင်း လေႇဝိ၊ ပီႈၸၢႆး တိၼ ၼၼ်ႉ ယိပ်းၵမ်ဢဝ်လၢပ်ႇဢဝ်လႅဝ်းယေႈၵေႃႉယေႈမၢၵ်ႈသေလႄႈ ၶဝ်ႈၵွႃႇၵႃႈၼႂ်းဝဵင်းႁတ်းႁတ်းႁၢၼ်ႁၢၼ်သေယဝ်ႉ ဢဝ်ၵူၼ်း ၸၢႆးၵႃႈမီးတင်းသဵင်ႈတင်းလူင်တၢႆဢေႃႈ။

၂၆ ၶုၼ်ႁႃႇမေႃႇတင်းလုၵ်ႈၸၢႆးမၼ်းသေၶိမ်ႇ ၵေႃႈၶဝ်ၼ်းတၢႆပႅတ်ႈသေယဝ်ႉ ၼုၵ်ႈဢဝ် တိၼ ဢွၵ်ႇသေၵႃႈၼႂ်းႁိူၼ်း သေႇၶိမ်ႇ လႄႈၶိုၼ်းမိူဝ်းၵွႃႇဢေႃႈ။

၂၇ ပိူဝ်ႈဢၼ်ၶဝ်ယႃႉသရေႇၼွင်ႉယိင်းၶဝ်လႄႈလုၵ်ႈၸၢႆး ယႃႇၵုုပ်ႉ ၸိူဝ်းၼၼ်ႉ သမ်ႉၶိုၼ်း ၵွႃႇၵႃႈတီႈၶဝ်ၸိူဝ်းဢၼ်တၢႆယဝ်ႉ ၼၼ်ႉလႄႈယႃႉဝဵင်းၶဝ်ပႅတ်ႈဢေႃႈ။

၂၈ ၶဝ်သိမ်းဢဝ်ၸႃႉၸဵမ်ၽုင်သူဝ်း၊ၽုင်ပေႉ၊ၽုင်ဝူဝ်း၊မႃႉလီႈတင်းလၢႆ ဢိၵ်ႇတင်းဢုၵ်ႉၸႃႇၶူဝ်းလဵင်း ၵႃႈဢၼ်မီးၵႃႈၼႂ်းဝဵင်းတင်း ဢုၵ်ႉၸႃႇၶူဝ်းလဵင်းၵႃႈဢၼ်မီးၵႃႈတီႈတူင်ႊၼႃး၊

၂၉ ၸေးၸိမ်ႇၶဝ်တင်းသဵင်ႈတင်းလူင်ဢိၵ်ႇတင်း မေးၶဝ်တင်းလုၵ်ႈဢွၼ်ႇၶဝ် တင်းသဵင်ႈတင်းလူင်လႄႈ ႁိမ်ႁုင်ႈဢဝ်ၵႃႈဢၼ်မီးၵႃႈတီႈႁိူၼ်းၶဝ်တင်းသဵင်ႈတင်းလူင် ၼၼ်ႉ ဢေႃႈ။

၃၀ မိူဝ်ႈၼၼ်ႉ ယႃႇၵုပ်ႉ လၢတ်ႈတီႈသိမုၼ်ႇ တင်းလေႇဝိ လႄႈဝႃႈ၊-သူပၼ်တၢင်းယၢပ်ႇတီႈၵဝ်လႄႈႁဵတ်းႁႂ်ႈၵဝ်ပဵၼ်တီႈဢၼ်လီႁင်ႈဢဵတ်ႇသဵတ်ႇ ၵႃႈတီႈၵူၼ်းမိူင်းၼႆႉဢၼ်ပဵၼ်ၵူၼ်းၶႃႇၼၼ်ႇတင်းၵူၼ်း ၽေႇရၸိ ၸိူဝ်းၼၼ်ႉယဝ်ႉလူင်ပေႇ။ပိူဝ်ႈဢၼ်ၵူၼ်းၵႃႈတီႈၵဝ်ၼႆႉၵေႇၼႃႇလႄႈ ၶဝ်တၵ်းၸူႉၵၼ်တုမ်ၵၼ်လႄႈ တိုၵ်းတေႃးယႃႉပႅတ်ႈၵဝ်ဢေႃႈ။

၃၁ ၵဝ်တၵ်းလႆႈၶၢမ်ႇတၢင်းဢၼ်ယႃႉပႅတ်ႈတင်းႁိူၼ်းတင်းယေးယဝ်ႉ ၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၵေႃႈၶိုၼ်းလၢတ်ႈဝႃႈ၊-မၼ်းတၵ်းလႆႈမၢတ်ႈၼွင်ႉယိင်းႁဝ်း ပဵၼ်ၸိူဝ်ႉၼင်ႇမေႈမွၵ်ႇယႃႈလႄႈႁဵတ်းၸိူဝ်ႉၼႆႁိုဝ်၊ဝႃႈၼင်ႇၼႆဢေႃႈ။