Shan Missions

၁၁

 လမ်းဝဵင်းလူင်ပႃႇပေႇလ

၁ ၵူၼ်းၼိူဝ်လိၼ်မိူင်း တင်းသဵင်ႈတင်းလူင် မီးၵႂၢမ်းၽႃႇသႃႇဢၼ်လဵဝ်ၵၼ် ၵႂၢမ်းမဵဝ်းလဵဝ်ၵၼ်ဢေႃႈ။

၂ ၼႂ်းမိူဝ်ႈဢၼ်ၶဝ် ယင်းတိုၵ်ႉပႆတၢင်းၵွႃႇၽၢႆႇၼႃႈဝၼ်းဢွၵ်ႇယူႇၼၼ်ႉ ၶဝ်ထူပ်းႁၼ်တီႈဢၼ်လိၼ်ပၢင်ႇလီပဵင်းလီၵႃႈၼႂ်းမိူင်း သိၼႃႇ ၼၼ်ႉလႄႈၶဝ်ၶျႃးတီႈယူႇ ၵႃႈတီႈၼၼ်ႉဢေႃႈ။

၃ ၶဝ်ၵေႃႉၼိုင်ႈလႄႈၵေႃႉၼိုင်ႈလၢတ်ႈၵၼ်လႄႈဝႃႈ၊-မႃးမႃးဢိူၺ်း။ႁဝ်းဢွၼ်ၵၼ်ႁဵတ်းမၢၵ်ႇဢုတ်ႇလႄႈ ၽဝ်မၼ်ႈမၼ်ႈၵႅၼ်ႇၵႅၼ်ႇတႃႉႁဝ်း၊ ဝႃႈ ၼင်ႇၼႆဢေႃႈ။

၄ ၼင်ႇၼၼ်လႄႈၶဝ်လႆႈမၢၵ်ႇဢုတ်ႇတင်းမၢၵ်ႇႁိၼ်ဢိၵ်ႇတင်းၵႆးတဝ်းမဵဝ်းၼိုင်ႈ တင်းဢၢင်းၵတေႇသေယဝ်ႉသမ်ႉလၢတ်ႈၵၼ်လႄႈဝႃႈ၊-မႃးမႃးဢိူၺ်း၊ ၼင်ႇႁိုဝ်ႁဝ်းတၵ်းဢမ်ႇၽၢတ်ႇဢမ်ႇၽႄၵၼ်ၵွႃႇၵႃႈၼိူဝ်လိၼ်မိူင်းၵူႈတီႈၵူႈလႅၼ်လႄႈ ၼင်ႇႁိုဝ် တေႁဵတ်းႁႂ်ႈၸိုဝ်သဵင်ႁဝ်းဢွၵ်ႇၼၼ်ႉၸိုင် ႁဝ်းဢွၼ်ၵၼ်တႄႇႁဵတ်းဝဵင်းဢိၵ်ႇတင်း ထဵင်လၢင်းလူင်ဢၼ်တၵ်းသုင်ၶိုတ်းထိုင်ၽႃႉၵၢင်ႁၢဝ်ၼၼ်ႉ တႃႉႁဝ်း၊ ဝႃႈၼင်ႇၼႆဢေႃႈ။

၅ ထႃႇဝရႃႉၽြႃးလူင်းမႃးႁႂ်ႈလႆႈလူတူၺ်းဝဵင်းဢိၵ်ႇတင်း ထဵင်လၢင်းလူင်ဢၼ်လုၵ်ႈၵူၼ်း တင်းလၢႆတႄႇႁဵတ်းၼၼ်ႉဢေႃႈ။

၆ ထႃႇဝရႃႉၽြႃးဝႃႈ၊-တူၺ်းလူႊ၊ ၶဝ်ပဵၼ်မဵဝ်းၵူၼ်းဢၼ်လဵဝ်ၵၼ်ၵႂၢမ်းဢၼ်လဵဝ်ၵၼ်လႄႈ ၶဝ်တႄႇၸႃႉႁဵတ်းလွင်ႈတၢင်းၼႆႉယဝ်ႉ။ဢၼ်တၵ်းႁႄႉၶႅၼ် လွင်ႈတၢင်းဢၼ်ၶဝ်တၵ်းၵျၢမ်ႇပွင် ၼၼ်ႉဢမ်မီးလႄႈၶဝ်တၵ်းႁဵတ်းၵူႈမဵဝ်းယဝ်ႉ။

၇ မႃးမႃးဢိူၺ်ႈ။ႁဝ်းလူင်းၵွႃႇတႃႉႁဝ်း။ ၼင်ႇႁိုဝ်ၶဝ်ၼင်ႇၵၼ်ၵၼ်တၵ်းဢမ်ႇႁူႉၵၼ်ၸိုင်ႁဝ်းႁဵတ်းႁႂ်ႈၵႂၢမ်းၶဝ် သုၵ်ႉသၢၵ်ႉသူၼ်သၢၼ်ၵၼ်ၵွႃႇတႃႉႁဝ်း၊ ဝႃႈၼင်ႇၼႆဢေႃႈ။

၈ ၼင်ႇၼၼ်လႄႈ ထႃႇဝရႃႉၽြႃးႁႂ်ႈၶဝ်ၽၢတ်ႇၽႄၵၼ်ၵွႃႇၵႃႈၼိူဝ်လိၼ်မိူင်းၵူႈတီႈၵူႈလႅၼ်လႄႈ ၶဝ်ဢမ်ႇၸၢင်ႊတႄႇႁဵတ်းဝဵင်းၼၼ်ႉယဝ်ႉဢေႃႈ။

၉ ၵွပ်ႈႁွႆးၼႆႉၵွပ်ႈပိူဝ်ႈဢၼ်ထႃႇဝရႃႉၽြႃး ႁႂ်ႈၵႂၢမ်းလုၵ်ႈၵူၼ်းတင်းလၢႆၵႃႈဢၼ်မီးၵႃႈၼိူဝ်လိၼ်မိူင်း သုၵ်ႉသၢၵ်ႉသူၼ်သၢၼ်ၵၼ်ၵွႃႇလႄႈၽၢတ်ႇၽႄၵၼ်သေၵႃႈတီႈၼၼ်ႉၵွႃႇ ၵူႈတီႈၵူႈလႅၼ်ၵႃႈၼိူဝ်လိၼ်မိူင်းဢေႃႈ။ ဝဵင်းၼၼ်ႉလႆႈၸိုဝ်ႈဝႃႈဝဵင်း ပႃႇပေႇလ ဢေႃႈ။

 ၸိူဝ်ႉၶိူဝ်း သေႇမ တေႃႇ ဢႃႇပြမ်ႇ

၁၀ ၸရၢင်း ၸူဝ်ႈလုၵ်ႈပၢၼ်လၢၼ် ၸိူဝ်ႉၶိူဝ်း သေႇမၸမ်း၊၊ သေႇမ ၼၼ်ႉဢသၢၵ်ႈလႆႈပၢၵ်ႇပီႊလႄႈဝၢႆးသေၼမ်ႉထုမ်ႈမိူင်းယဝ်ႉ သွင်ပီႊ မၼ်းမီးလုၵ်ႈၸၢႆး ဢႃႇၽၵ်ႉၸတ်ႉ ဢေႃႈ။

၁၁ ဝၢႆးသေမီး ဢႃႇၽၵ်ႉၸတ်ႉယဝ်ႉ သေႇမ ဢသၢၵ်ႈလိပ်းထူၼ်ႈႁႃႈပၢၵ်ႇပီႊဢေႃႈ။မၼ်းသမ်ႉမီးထႅင်ႈ လုၵ်ႈၸၢႆးလႂ်လုၵ်ႈယိင်းလႂ်ဢေႃႈ။

၁၂ ဢႃႇၽၵ်ႉၸတ်ႉ ၼၼ်ႉဢသၢၵ်ႈလႆႈသၢမ်သိပ်းပၢႆႁႃႈပီႊလႄႈမီးလုၵ်ႈၸၢႆး သႃႇလ ဢေႃႈ။ဝၢႆးသေမီးသႃႇလ ယဝ်ႉ ဢႃႇၽၵ်ႉၸတ်ႉ ဢသၢၵ်ႈလိပ်းထူၼ်ႈ သီႇပၢၵ်ႇပၢႆသၢမ်ပီႊဢေႃႈ။

၁၃ မၼ်းသမ်ႉ မီးထႅင်ႈလုၵ်ႈၸၢႆးလႂ်လုၵ်ႈယိင်းလႂ်ဢေႃႈ။

၁၄ သႃႇလ ၼၼ်ႉဢသၢၵ်ႈလႆႈသၢမ်သိပ်းပီႊလႄႈမီးလုၵ်ႈ ၸၢႆး ႁေႇပ ဢေႃႈ။

၁၅ ဝၢႆးသေမီး ႁေႇပ ယဝ်ႉ သႃႇလဢသၢၵ်ႈလိပ်းထူၼ်ႈ သီႇပၢၵ်ႇပၢႆသၢမ်ပီႊဢေႃႈ။ မၼ်းသမ်ႉမီးလုၵ်ႈၸၢႆးလႂ်လုၵ်ႈယိင်းလႂ်ဢေႃႈ။

၁၆ ႁေႇပ ၼၼ်ႉ ဢသၢၵ်ႈလႆႈသၢမ်သိပ်းပၢႆသီႇပီႊလႄႈမီးလုၵ်ႈၸၢႆး ၽႃႇလိၵ်ႉ ဢေႃႈ။

၁၇ ဝၢႆးသေမီး ၽႃႇလိၵ်ႉယဝ်ႉ ႁေႇပ ဢသၢၵ်ႈလိပ်းထူၼ်ႈ သီႇပၢၵ်ႇပၢႆသၢမ်သိပ်းပီႊဢေႃႈ။ မၼ်းသမ်ႉမီးထႅင်ႈလုၵ်ႈၸၢႆးလႂ်လုၵ်ႈယိင်းလႂ်ဢေႃႈ။

၁၈ ၽႃႇလိၵ်ႉ ၼၼ်ႉဢသၢၵ်ႈလႆႈသၢမ်သိပ်းပီႊလႄႈ မီးလုၵ်ႈၸၢႆး ရူႇ ဢေႃႈ။

၁၉ ဝၢႆးသေမီး ရူႇ ယဝ်ႉ ၽႃႇလိၵ်ႉဢသၢၵ်ႈလိပ်းထူၼ်ႈသွင်ပၢၵ်ႇပၢႆၵဝ်ႈပီႊဢေႃႈ။ မၼ်းသမ်ႉမီးထႅင်ႈလုၵ်ႈၸၢႆးလႂ်လုၵ်ႈယိင်းလႂ်ဢေႃႈ။

၂၀ ရူႇ ၼၼ်ႉဢသၢၵ်ႈလႆႈသၢမ်သိပ်းပၢႆသွင်ပီႊလႄႈ မီးလုၵ်ႈၸၢႆး ၸေႇရွၵ်ႇ ဢေႃႈ။

၂၁ ဝၢႆးသေမီး ၸေႇရွၵ်ႇၼၼ်ႉ ရူႇ ဢသၢၵ်ႈလိပ်းထူၼ်ႈသွင်ပၢၵ်ႇပၢႆၸဵတ်းပီႊဢေႃႈ။ မၼ်းသမ်ႉမီးထႅင်ႈလုၵ်ႈၸၢႆးလႂ်လုၵ်ႈယိင်းလႂ်ဢေႃႈ။

၂၂ ၸေႇရွၵ်ႇ ၼၼ်ႉဢသၢၵ်ႈလႆႈသၢမ်သိပ်းပီႊလႄႈ မီးလုၵ်ႈၸၢႆး ၼႃႇၶေႃႇ ဢေႃႈ။

၂၃ ဝၢႆးသေမီး ၼႃႇၶေႃႇယဝ်ႉ ၸေႇရွၵ်ႇ ဢသၢၵ်ႈလိပ်းထူၼ်ႈ သွင်ပၢၵ်ႇပီႊဢေႃႈ။ မၼ်းသမ်ႉမီးထႅင်ႈလုၵ်ႈၸၢႆးလႂ်လုၵ်ႈယိင်းလႂ်ဢေႃႈ။

၂၄ ၼႃႇၶေႃႇ ၼၼ်ႉ ဢသၢၵ်ႈလႆႈသၢဝ်းပၢႆၵဝ်ႈပီႊလႄႈမီးလုၵ်ႈၸၢႆး တေႇရ ဢေႃႈ။

၂၅ ဝၢႆးသေမီး တေႇရ ယဝ်ႉၼႃႇၶေႃႇ ဢသၢၵ်ႈလိပ်းထူၼ်ႈပၢၵ်ႇပၢႆႇသိပ်းၵဝ်ႈပီႊဢေႃႈ။ မၼ်းသမ်ႉမီးထႅင်ႈလုၵ်ႈၸၢႆးလႂ်လုၵ်ႈယိင်းလႂ်ဢေႃႈ။

၂၆တေႇရ ၼၼ်ႉဢသၢၵ်ႈလႆႈၸဵတ်းသိပ်းပီႊလႄႈ မီးလုၵ်ႈၸၢႆး ဢႃႇပြမ်ႇ၊ ၼႃႇၶေႃႇ တင်း ၶႃႇရၼ်ဢေႃႈ။

၂၇ ၸရၢင်းၸူဝ်ႈလုၵ်ႈပၢၼ်လၢၼ်ၸိူဝ်ႉၶိူဝ်း တေႇရ ၸမ်းတေႇရ ၼၼ်ႉမီးလုၵ်ႈၸၢႆး ဢႃႇပြမ်ႇ၊ၼႃႇၶေႃႇ တင်းၶႃႇရၼ်ႇ ဢေႃႈ။ ၶႃႇရၼ်ႇၵေႃႈမီးလုၵ်ႈၸၢႆး လေႃးတ ဢေႃႈ။

၂၈ ၶႃႇရၼ်ႇ ၼၼ်ႉတၢႆၸဵမ်မိူဝ်ႈၸူဝ်ႈဢၼ်ပေႃႈမၼ်း တေႇရ ဢမ်ႇပႆႇတၢႆၵႃႈတီႈမိူင်းဢၼ်မၼ်းၵိူတ်ႇလဵင်ႉမႃးၵႃႈၼႂ်းဝဵင်း ဢုရ တီႈယူႇၵူၼ်းမိူင်း ၶႃႇလတေႇ ၼၼ်ႉဢေႃႈ။

၂၉ ဢႃႇပြမ်ႇ တင်း ၼႃႇၶေႃႇဢဝ်မေးလႄႈမေး ဢႃႇပြမ်ႇ ၸမ်းလႆႈၸိုဝ်ႈဝႃႈၸႃႇရေႇ ဢေႃႈ။ မေး ၼႃႇၶေႃႇ ၸမ်းလႆႈၸိုဝ်ႈဝႃႈ မိလၶႃႇ၊ လုၵ်ႈယိင်း ၶႃႇရၼ်ႇ ဢေႃႈ။

၃၀ ၶႃႇရၼ်ႇၼၼ်ႉပဵၼ်ပေႃႈမိလၶႃႇ တင်း ဢိၸၶ ဢေႃႈ။ၸႃႇရေႇ ၸမ်းပဵၼ်မေႈယိင်းဢၼ်မၼ်လႄႈဢမ်ႇမီး လုၵ်ႈမီးလၢင်း။

၃၁ တေႇရ ၼၼ်ႉႁွင်ႉဢဝ်လုၵ်ႈၸၢႆးမၼ်းဢႃႇပြမ်ႇ ဢိၵ်ႇတင်းလၢၼ်မၼ်း လေႃးတ ဢၼ်ပဵၼ်လုၵ်ႈၸၢႆး ၶႃႇရၼ်ႇ ၼၼ်ႉ တင်းလုၵ်ႈပႂ်ႉမၼ်းၸႃႇရေႇဢၼ်ပဵၼ်မေးလုၵ်ႈၸၢႆးမၼ်း ဢႃႇပြမ်ႇၼၼ်ႉသေလႄႈ ၶဝ်ဢွၼ်ၵၼ်ဢွၵ်ႇသေၵႃႈၼႂ်းဝဵင်းဢုရ တီႈယူႇၵူၼ်းမိူင်း ၶႃႇလတေႇ ၼၼ်ႉႁႂ်ႈလႆႈၵွႃႇၸူးၵႃႈတီႈမိူင်း ၶႃႇၼၼ်ႇ လႄႈႁွတ်ႈထိုင်ၵႃႈတီႈဝဵင်းၶႃႇရၼ်ႇ သေယဝ်ႉယူႇၵႃႈတီႈၼၼ်ႉဢေႃႈ။

၃၂ တေႇရ ၼၼ်ႉ ဢသၢၵ်ႈလႆႈသွင်ပၢၵ်ႇပၢႆႁႃႈပီႊလႄႈတၢႆၵႃႈတီႈၼႂ်းဝဵင်း ၶႃႇရၼ်ႇ ၼၼ်ႉဢေႃႈ။