Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂ ၀    ၂၁    ၂၂    ၂၃    ၂၄   

၁၈ 

ဢူႉပမႃႇမေႈမၢႆႈဢၼ်ၸႂ်ဢမ်ႇလူႉ

၁ လွင်ႈၼင်ႇႁိုဝ်ၵူၼ်းတင်းလၢႆႁႅင်းယင်းဢမ်ႇဢူၼ်ႈလႄႈတၵ်းလႆႈၶတ်းၸႂ်သူးတွင်းယူႇသေႇသေႇၸိုင်မၼ်းၸဝ်ႈလၢတ်ႈၵႂၢမ်းဢူႉပမႃႇလႄႈဝႃႈၸမ်း၊-

၂ ၼႂ်းဝဵင်းၼိုင်ႈမီးၶုၼ်ဢၼ်ၸီႇယၢင်ႇတြႃးၵေႃႉၼိုင်ႈဢၼ်ဢမ်ႇၵူဝ်ယမ်ၽြႃးပဵၼ်ၸဝ်ႈဢမ်ႇၸၢင်ႊဢႃးၼႃႇၵူၼ်းၼၼ်ႉဢေႃႈ။

၃ မေႈမုၵ်ႉမေႈမၢႆႈဢၼ်မီးယူႇၵႃႈၼႂ်းဝဵင်းၼၼ်ႉၵေႃႉၼိုင်ႈၵႂႃႇၵႃႈတီႈၶုၼ်ဢၼ်ၸီႇယၢင်ႇတြႃးၼၼ်ႉလႄႈတွင်းပၢၼ်ႇလႄႈဝႃႈ၊-ၶႅၼ်းတေႃႈယူႇၽၢႆႇၵဝ်ၶႃႈသေလႄႈၸီႇယၢင်ႇတြႃးႁႂ်ႈလွင်ႈၵေႃႉဢၼ်ၽိတ်းၵဝ်ၶႃႈၼၼ်ႉယဝ်ႉတူဝ်သေၵမ်းၶႃႈ၊ဝႃႈၼင်ႇၼႆသေၵေႃႈၶုၼ်ၼၼ်ႉယင်းဢမ်ႇၸီႇယၢင်ႇတြႃးလႄႈယူႇႁိုင်ၼႃႇဢေႃႈ။

၄ လိုၼ်းၼၼ်ႉမၼ်းလၢတ်ႈတီႈတူဝ်ၸဝ်ႈၵဝ်ႇလႄႈဝႃႈ၊-ပဵၵ်ႉသမ်ႉၵဝ်ဢမ်ႇၵူဝ်ၽြႃးပဵၼ်ၸဝ်ႈဢမ်ႇမေႃဢႃးၼႃႇၵူၼ်းသေၵေႃႈယုႇပိူဝ်ႈဢၼ်မေႈမုၵ်ႉမေႈမၢႆႈၵေႃႉၼႆႉမႃးယႃႉယူၵ်ႉၵဝ်ယူႇလႄႈၵဝ်တၵ်းၸီႇယၢင်ႇတြႃးမၼ်းယဝ်ႉ။

၅ ပေႃးဢမ်ႇၼၼ်မၼ်းတၵ်းမႃးၶိူဝ်းၶိူဝ်းယႂ်းယႂ်းလႄႈသုၵ်ႉသၢၵ်ႉၵဝ်ယူႇဢိူဝ်ႈ၊ဝႃႈၼင်ႇၼႆဢေႃႈ။

၆ မၢတ်ႈတွင်းတၢင်းၵျၢမ်ႇတၢင်းပွင်ၶုၼ်ဢၼ်ဢမ်ႇတြႃးဢၼ်ၸီႇယၢင်ႇတြႃးၼႆႉတႃႉ။

၇ တီႈၶဝ်ၸိူဝ်းဢၼ်မၼ်းၸဝ်ႈလိူၵ်ႈၵဵပ်းဢဝ်ဢၼ်ႁွင်ႉႁႃလႄႈယွၼ်းတီႈမၼ်းၸဝ်ႈယူႇတင်းဝၼ်းတင်းၶိုၼ်းၼၼ်ႉၽြႃးပဵၼ်ၸဝ်ႈယင်းဢမ်ႇၸီႇယၢင်ႇတြႃးလႄႈတၵ်းယူႇႁိုဝ်း။ၽြႃးပဵၼ်ၸဝ်ႈတၵ်းဢမ်ႇထွမ်ႇလႄႈယူႇႁိုဝ်။

၈ ၵဝ်ဝႃႈတီႈသူၸမ်းမၼ်းၸဝ်ႈတၵ်းၸီႇယၢင်ႇတြႃးၽၢႆႇၶဝ်ၶၼ်ၶၼ်ၽႂ်းၽႂ်းဢေႃႈ။ၼႂ်းဝႃႈၼၼ်သေၵေႃႈမိူဝ်ႈဢၼ်လုၵ်ႈၵူၼ်းမႃးၼၼ်ႉတၵ်းထူပ်းႁၼ်တၢင်းယုမ်ႇမၢတ်ႈၵႃႈၼိူဝ်လိၼ်မိူင်းၼႆႉႁိုဝ်၊ဝႃႈၼင်ႇၼႆဢေႃႈ။

ဢူႉပမႃႇၽႃႇရိသေးတင်းၵူၼ်းၵဵပ်းၶွၼ်ႇ

၉ မၼ်းၸဝ်ႈလၢတ်ႈၵႂၢမ်းဢူႉပမႃႇတီႈၶဝ်ၸိူဝ်းဢၼ်ဢိင်ပိုင်ႈၵူႉသူဝ်ႇတူဝ်ၸဝ်ႈၵဝ်ႇၼၼ်ႉသေလႄႈႁဵတ်းဢမ်ႇပေႃးၼင်ႇႁိုဝ်တီႈပိူၼ်ႈၵမ်ႈၽွင်ႈၸိူဝ်းၼၼ်ႉလႄႈဝႃႈၸမ်း၊-

၁၀ ၵူၼ်းသွင်ၵေႃႉၶိုၼ်ႈၵႂႃႇၵႃႈတီႈပိၵ်ႉမၢၼ်ႇၸဝ်ႈႁႂ်ႈလႆႈႁဵတ်းသူးတွင်းပထၼႃႇဢေႃႈ။ၵေႃႉၼိုင်ႈပဵၼ်ၽႃႇရိသေးဢေႃႈ။ၵေႃႉၼိုင်ႈၸမ်းပဵၼ်ၵူၼ်းၵဵပ်းၶွၼ်ႇဢေႃႈ။

၁၁ ၽႃႇရိသေးၼၼ်ႉၸုၵ်းယူႇႁင်းၵူၺ်းသေလႄႈသူးတွင်းပထၼႃႇဝႃႈ၊-ဢူဝ်းၽြႃးပဵၼ်ၸဝ်ႈ။ၵဝ်ၶႃႈဢမ်ႇပဵၼ်ၸိူဝ်ႉၼင်ႇပိူၼ်ႈတၢင်ႇၵေႃႉဢၼ်ႁဵတ်းပႄႉႁဵတ်းၼႅင်ႇႁိမ်ဢဝ်ဢုၵ်ႉၸႃႇပိူၼ်ႈ။ဢမ်ႇႁဵတ်းဢၼ်ဢမ်ႇတြႃး။ဢမ်ႇၽိတ်းပိူင်ႈမေးပိူၼ်ႈၵူၺ်းဢမ်ႇၵႃးဢမ်ႇပဵၼ်ၸိူဝ်ႉၼင်ႇၵူၼ်းၵဵပ်းၶွၼ်ႇၼၼ်ႉလႄႈၵျေးၸူးၸဝ်ႈႁဝ်းယႂ်ႇၼႃႇတီႈၶႃႈဢေႃႈ။

၁၂ ၼႂ်းၸဵတ်းဝၼ်းၵဝ်ၶႃႈၵမ်တၢင်းၵိၼ်သွင်ဝၼ်းၶႃႈဢေႃႈ။ၵဝ်ၶႃႈဢဝ်ဢုၵ်ႉၸႃႇၶူဝ်းလဵင်းသိပ်းပုၼ်ႊပုၼ်ႊၼိုင်ႈၼႂ်းၵႃႈမီးတင်းသဵင်ႈတင်းလူင်လႄႈလူႇတၢၼ်းယူႇၶႃႈဢေႃႈ၊ဝႃႈၼင်ႇၼႆဢေႃႈ။

၁၃ ၵူၼ်းၵဵပ်းၶွၼ်ႇၵေႃႉၼိုင်ႈၸမ်းၸုၵ်းယူႇၵႃႈတီႈဢၼ်ၵႆလႄႈယင်းဢမ်ႇႁတ်းႁႅၼ်တူၺ်းၼိူဝ်ၽႃႉၵၢင်ႁၢဝ်။မၼ်းတူပ်းဢူၵ်းမၼ်းယူႇသေယဝ်ႉသူးတွင်းဝႃႈ၊-ဢူဝ်းၽြႃးပဵၼ်ၸဝ်ႈၶႅၼ်းတေႃႈမီးၵရူႉၼႃႇတၢင်းဢၼ်ဢိတ်းလူၵႃႈၼိူဝ်ၵဝ်ၶႃႈဢၼ်မီးဢပျႅတ်ႈၼမ်ၼႃႇၼႆႉသေၵမ်းၶႃႈ၊ဝႃႈၼင်ႇၼႆဢေႃႈ။

၁၄ ၵဝ်ဝႃႈတီႈသူၸမ်းမၼ်းလႆႈၶၢမ်ႇတၢင်ႈဢၼ်မၢတ်ႈပဵၼ်ၵူၼ်းသိုဝ်ႈတေႃႇၼႃႇသေၽႃႇရိသေးၵေႃႉၼၼ်ႉလႄႈၶိုၼ်းမိူဝ်းၵႂႃႇၵႃႈတီႈႁိူၼ်းမၼ်းဢေႃႈ။လွင်ႈမၼ်းၸမ်းၵေႃႉဢၼ်ယုၵ်ႉယွင်ႈတူဝ်ၸဝ်ႈၵဝ်ႇၼၼ်ႉတၵ်းလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇဢေႃႈ။ၵေႃႉဢၼ်ၶျႃးတႅမ်ႇတူဝ်ၸဝ်ႈၵဝ်ႇၼၼ်ႉတၵ်းလႆႈၶၢမ်ႇတၢင်းဢၼ်ယုၵ်ႉယွင်ႈဢေႃႈ၊ဝႃႈၼင်ႇၼႆဢေႃႈ။

လုၵ်ႈဢွၼ်ႇတင်းၸဝ်ႈယေႇသု

၁၅ မိူဝ်ႈၼၼ်ႉၼင်ႇႁိုဝ်မၼ်းၸဝ်ႈတၵ်းဢဝ်မိုဝ်းတိူဝ်ႉၸိုင်ၶဝ်ဢဝ်လုၵ်ႈဢွၼ်ႇတင်းလၢႆမႃးတီႈမၼ်းၸဝ်ႈဢေႃႈ။မိူဝ်ႈဢၼ်တပႄးၸဝ်ႈၸိူဝ်းၼၼ်ႉႁၼ်ၼၼ်ႉၸိုင်ၶဝ်ႁၢပ်ႈတၢပ်ႈဢေႃႈ။

၁၆ ၵူၺ်းၵႃႈၸဝ်ႈယေႇသုႁွင်ႉဢဝ်လုၵ်ႈဢွၼ်ႇၸိူဝ်းၼၼ်ႉလႄႈဝႃႈပၼ်လုၵ်ႈဢွၼ်ႇၸိူဝ်းၼၼ်ႉမႃးၵႃႈတီႈၵဝ်တႃႉ။ယႃႇပေႁၢမ်ႈတၢပ်ႈႁႄႉၶႅၼ်ၶဝ်။မိူင်းၽြႃးပဵၼ်ၸဝ်ႈပဵၼ်မိူင်းၸိူဝ်ႉၼင်ႇၶဝ်ၼႆႉဢေႃႈ။

၁၇ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၽူႈလႂ်သေဢမ်ႇဝႃႈၵေႃႉဢၼ်ဢမ်ႇၶၢမ်ႇဢဝ်မိူင်းၽြႃးပဵၼ်ၸဝ်ႈမိူၼ်ၸိူဝ်ႉၼင်ႇလုၵ်ႈဢွၼ်ႇၼႆႉၼၼ်ႉဢမ်ႇလႆႈၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈ၊ဝႃႈၼင်ႇၼႆဢေႃႈ။

ၶုၼ်သထေးၸႂ်လူႉ

၁၈ ၶုၼ်ၵေႃႉၼိုင်ႈလဝ်ႈထၢမ်လႄႈဝႃႈ၊-သြႃႇဢၼ်မျၢတ်ႈလီၼႃႇၶႃႈဢိူၺ်း၊ၼင်ႇႁိုဝ်တၵ်းလႆႈၶၢမ်ႇဢမူၺ်ႇထႃႇဝရႃႉဢသၢၵ်ႈၸိုင်ၵဝ်ၶႃႈတၵ်းလႆႈႁဵတ်းၸိူဝ်ႉၼင်ႇႁိုဝ်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင်ၸဝ်ႈယေႇသုၵေႃႈလၢတ်ႈလႄႈဝႃႈ၊-

၁၉ ႁဵတ်းႁိုဝ်လႄႈမႂ်းႁွင်ႉၵဝ်ဝႃႈမျၢတ်ႈလီၸိူဝ်ႉၼႆ။လိူဝ်သေၽြႃးပဵၼ်ၸဝ်ႈသူႇလဵဝ်ပႃးလဵဝ်ၼၼ်ႉၽူႈလႂ်ဢမ်ႇမျၢတ်ႈဢမ်ႇလီသေၵေႃႉ။

၂၀ မႂ်းႁူႉပိင်းၺၢပ်ႈၸဝ်ႈတင်းလၢႆယူႇဢမ်ႇၸႂ်ႈႁိုဝ်။ယႃႇပေၽိတ်းပိူင်ႈမေးပိူၼ်ႈ၊ယႃႇပေဢဝ်ဢသၢၵ်ႈၵူၼ်းတၢႆ၊ယႃႇပလေၵ်ႉဢဝ်ဢုၵ်ႉၸႃႇၶူဝ်းလဵင်းပိူၼ်ႈ၊ယႃႇပေၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉ။ႁဵတ်းတၢင်းဢၼ်ရူဝ်ႇသေႇၵူဝ်ယမ်ပေႃႈမေႈတႃႉ၊မိူဝ်ႈဢၼ်ဝႃႈၼင်ႇၼႆၸိုင်၊ၵေႃႉၼၼ်ႉၵေႃႈၶိုၼ်းလၢတ်ႈလႄႈဝႃႈ၊-

၂၁ ပိင်းၺၢပ်ႈၵႃႈမီးတင်းသဵင်ႈတင်းလူင်ၸိူဝ်းၼၼ်ႉၵဝ်ၶႃႈၵမ်ၵျၢင်ႉမႃးၸဵမ်မိူဝ်ႈၵဝ်ၶႃႈယင်းလဵၵ်ႉယင်းဢွၼ်ႇၼၼ်ႉၶႃႈယဝ်ႉ၊ဝႃႈၼင်ႇၼႆဢေႃႈ။

၂၂ ၸဝ်ႈယေႇသုငိၼ်းသေယဝ်ႉသမ်ႉလၢတ်ႈလႄႈဝႃႈ၊-မႂ်းလူဝ်ႇထႅင်ႈဢၼ်ၼိုင်ႈလူးၵွၼ်ႇဢေႃႈ။ၶၢႆပႅတ်ႈဢုၵ်ႉၸႃႇၶူဝ်းလဵင်းမႂ်းၵႃႈမီးတင်းသဵင်ႈတင်းလူင်သေယဝ်ႉဢဝ်ငိုၼ်းဢၼ်လႆႈမႃးၼၼ်ႉပၼ်တီႈၶဝ်ၸိူဝ်းဢၼ်ယၢၵ်ႈဢၼ်ၽၢၼ်တင်းလၢႆၼၼ်ႉတႃႉ။ပေႃးႁဵတ်းၸိူဝ်ႉၼင်ႇၼႆၸိုင်တၵ်းလႆႈၽၼ်ႇတႃႇၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ။ႁဵတ်းၸိူဝ်ႉၼင်ႇၼႆသေယဝ်ႉၸင်ႇမႃးလႄႈၸွမ်းပႃႈလင်ၵဝ်တႃႉ၊ဝႃႈၼင်ႇၼႆဢေႃႈ။

၂၃ ၵေႃႉၼၼ်ႉငိၼ်းၵႂၢမ်းၼၼ်ႉသေယဝ်ႉၵႂပ်ႈပိူဝ်ႈမၼ်းပဵၼ်ၵေႃႉဢၼ်မီးဢုၵ်ႉၸႃႇၶူဝ်းလဵင်းၼမ်ၼႃႇၼၼ်ႉလႄႈမၼ်းႁွတ်ႈထိုင်တၢင်းဢၼ်ၸႂ်လဵၵ်ႉၼႃႇလူင်လၢင်ဢေႃႈ။

၂၄ ၸဝ်ႈယေႇသုႁၼ်ၵေႃႉၼၼ်ႉႁွတ်ႈထိုင်တၢင်းဢၼ်ၸႂ်လဵၵ်ႉၸိူဝ်ႉၼင်ႇၼၼ်လႄႈမၼ်းၸဝ်ႈလၢတ်ႈဝႃႈ၊-ၶဝ်ၸိူဝ်းဢၼ်ၸၢင်ႊမၢၵ်ႈၸၢင်ႊမီးၼၼ်ႉၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈယၢပ်ႇၼႃႇဢေႃႈ။

၂၅ ၵလႃႇဢုၵ်ႉလၼ်ႈႁူးၶဵမ်ငၢႆႈသေၵူၼ်းမၢၵ်ႈၵူၼ်းမီးၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈၼၼ်ႉဢေႃႈ၊ဝႃႈၼင်ႇၼႆဢေႃႈ။

၂၆ ၶဝ်ၸိူဝ်းဢၼ်ငိၼ်းၼၼ်ႉၵေႃႈလၢတ်ႈလႄႈဝႃႈ၊-ၽူႈလႂ်တၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်လႆႈၶႃႈ၊ဝႃႈၼင်ႇၼႆဢေႃႈ။

၂၇ မၼ်းၸဝ်ႈၵေႃႈလၢတ်ႈလႄႈဝႃႈ၊-လွင်ႈတၢင်းဢၼ်ၵူၼ်းဢမ်ႇတတ်ႈၼိုင်ႇလႆႈၼၼ်ႉၽြႃးပဵၼ်ၸဝ်ႈတတ်ႈၼိုင်ႇလႆႈယူႇဢေႃႈ၊ဝႃႈၼင်ႇၼႆဢေႃႈ။

၂၈ မိူဝ်ႈၼၼ်ႉပေႇတရုလဝ်ႈလၢတ်ႈလႄႈဝႃႈ၊-ႁဝ်းၶႃႈၼႆႉၸုၼ်ႉပႅတ်ႈၵႃႈဢၼ်ႁဝ်းၶႃႈမီးတင်းသဵင်ႈတင်းလူင်သေလႄႈၸွမ်းပႃႈလင်ၸဝ်ႈႁဝ်းမႃးၶႃႈယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊

၂၉ မၼ်းၸဝ်ႈၵေႃႈလၢတ်ႈလႄႈဝႃႈ၊-ၵဝ်ဝႃႈတီႈၸိုဝ်ႈတီႈၸႂ်ႈၸမ်းၽူႈလႂ်သေဢမ်ႇဝႃႈၵေႃႉဢၼ်ၸုၼ်ႉပႅတ်ႈႁိူၼ်းပေႃႈမေႈပီႈၼွင်ႉမေးလုၵ်ႈလၢင်းတင်းလၢႆၵႂပ်ႈပိူဝ်ႈမိူင်းၽြႃးပဵၼ်ၸဝ်ႈၼၼ်ႉ

၃၀ ၵေႃႉၼၼ်ႉတၵ်းလႆႈၶၢမ်ႇဢၵျူဝ်းၼမ်ၼႃႇၼႂ်းၶိင်ႇတေႃႈလဵဝ်ၼႆႉဢမ်ႇၵႃးၸၢတ်ႈၼႃႈမႃးတၵ်းလႆႈထႃႇဝရႃႉဢသၢၵ်ႈဢေႃႈ၊ဝႃႈၼင်ႇၼႆဢေႃႈ။

ၸဝ်ႈယေႇသုလၢတ်ႈလွင်ႈတၵ်းၶၢမ်ႇတၢင်းတၢႆ

၃၁ မိူဝ်ႈၼၼ်ႉမၼ်းၸဝ်ႈႁွင်ႉဢဝ်တပႄးၸဝ်ႈသိပ်းသွင်ပႃးသေယဝ်ႉလၢတ်ႈဝႃႈ၊-တေႃႈလဵဝ်ၼႆႉႁဝ်းၵႂႃႇၵႃႈတီႈဝဵင်းယေႇရုသလႅမ်ႇယူႇဢေႃႈ။ၵႃႈဢၼ်ပရေႃးၽႅတ်ႈတင်းလၢႆႁေႃးလၢတ်ႈဝႆႉၼၼ်ႉတၵ်ႈလႆႈတဵမ်ထူၼ်ႈတီႈလုၵ်ႈၵူၼ်းဢေႃႈ။

၃၂ မၼ်းတၵ်းလႆႈၶၢမ်ႇတၢင်းဢၼ်ဢၢပ်ႈၵႃႈၼႂ်းမိုဝ်းၵူၼ်းတၢင်ႇၸိူဝ်ႉတၢင်ႇၶိူဝ်းလႂ်ၶၢမ်ႇတၢင်းဢၼ်ႁဵတ်းပျၢၵ်ႈႁဵတ်းၶူဝ်လႂ်တၢင်းဢၼ်ၼိၵ်ႈၸၢၵ်ႈငႅၼ်းသေးလႂ်တၢင်းဢၼ်ဢဝ်တင်းၼမ်ႉလၢႆးထုမ်ႇသႂ်ႇလႂ်ၼၼ်ႉဢေႃႈ။

၃၃ ၶဝ်တၵ်းယႅၼ်ႉထုပ်ႉမၼ်းလႄႈဢဝ်မၼ်းတၢႆဢေႃႈ။ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉမၼ်းတၵ်းလုၵ်ႉၶိုၼ်းလိပ်းဢေႃႈ၊ဝႃႈၼင်ႇၼႆဢေႃႈ။

၃၄ တပႄးၸဝ်ႈတင်းလၢႆဢမ်ႇႁူႉပွင်ႇလွင်ႈတၢင်းၸိူဝ်းၼၼ်ႉသေဢိတ်း။ပိူဝ်ႈဢၼ်လပ်ႉသိူင်ႇဝႆႉၵႃႈတီႈၶဝ်လႄႈၶဝ်ဢမ်ႇႁူႉဢမ်ႇၸႅင်ႈလွင်ႈဢၼ်မၼ်းၸဝ်ႈလၢတ်ႈၼၼ်ႉ။

ၵူၼ်းယွၼ်းဢၼ်တႃမွတ်ႇၶိုၼ်းႁၼ်မႃး

၃၅ ၼႂ်းမိူဝ်ႈဢၼ်မၼ်းၸဝ်ႈမီးၸမ်ၵႃႈတီႈႁိမ်းဝဵင်းယေႇရိၶုဝ်းၼၼ်ႉၸိုင်ၵူၼ်းတႃမွတ်ႇၵေႃႉၼိုင်ႈၼင်ႈယူႇၵႃႈႁိမ်းတၢင်းလႄႈယွၼ်းပိူၼ်ႈၵိၼ်ယူႇဢေႃႈ။

၃၆ မိူဝ်ႈဢၼ်မၼ်းလႆႈငိၼ်းသဵင်ၵူၼ်းၼမ်ၼႃႇၵႂႃႇၵႃႈၼႂ်းတၢင်းယူႇၼၼ်ႉၸိုင်မၼ်းထၢမ်လႄႈဝႃႈ၊-ပဵၼ်လွင်ႈတၢင်းၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။

၃၇ မိူဝ်ႈဢၼ်မၼ်းငိၼ်းပိူၼ်ႈလၢတ်ႈလွင်ႈၸဝ်ႈယေႇသုၵူၼ်းဝဵင်းၼႃႇၸရႅတ်ႉၸွမ်းတၢင်းမႃးၵႃႈႁိမ်းမၼ်းယူႇၼၼ်ႉၸိုင်၊မၼ်းႁွင်ႉသႅၼ်ႇလႄႈဝႃႈ၊-

၃၈ ၸဝ်ႈယေႇသုလုၵ်ႈတႃႇဝိတ်ႉတီႈၶႃႈ။ဢိတ်းလူၵဝ်ၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။

၃၉ ပဵၵ်ႉသမ်ႉၶဝ်ၸိူဝ်းဢၼ်ၵႂႃႇပႃႈၼႃႈမၼ်းၸဝ်ႈၸိူဝ်းၼၼ်ႉႁိုတ်းဝႃႈတီႈမၼ်းႁႂ်ႈမၼ်းယူႇတဵတ်ႇတဵတ်ႇသေၵေႃႈမၼ်းၼၼ်ႉယဵင်ႈၶႅၼ်းႁွင်ႉသႅၼ်ႇလႄႈဝႃႈ၊-လုၵ်ႈတႃႇဝိတ်ႉတီႈၶႃႈ။ဢိတ်းလူၵဝ်ၶႃႈသေၵမ်းၶႃႈ။ဝႃႈၼင်ႇၼႆဢေႃႈ။

၄၀ ၸဝ်ႈယေႇသုၵေႃႈၸုၵ်းၵိုတ်းသေယဝ်ႉမီးဢမိင်ႉႁႂ်ႈဢဝ်ၵေႃႉၼၼ်ႉမႃးၵႃႈတီႈႁိမ်းမၼ်းၸဝ်ႈဢေႃႈ။မၼ်းၵေႃႈသုတ်ႉၸပ်းသုတ်ႉၸူးၵႃႈတီႈမၼ်းၸဝ်ႈလႄႈမၼ်းၸဝ်ႈၵေႃႈထၢမ်မၼ်းလႄႈဝႃႈ၊-

၄၁ ၶႂ်ႈႁႂ်ႈၵဝ်ႁဵတ်းတီႈမႂ်းၸိူဝ်ႉၼင်ႇႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်မၼ်းၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်းၶႅၺ်းတေႃႈႁဵတ်းႁႂ်ႈမၢၵ်ႇတႃၵဝ်ၶႃႈႁၼ်မႃးသေၵမ်းၶႃႈဝႃႈၼင်ႇၼႆဢေႃႈ။

၄၂ ၸဝ်ႈယေႇသုၵေႃႈလၢတ်ႈလႄႈဝႃႈ၊-ႁႂ်ႈမၢၵ်ႇတႃမႂ်းႁၼ်မႃးတႃႉ။တၢင်းယုမ်ႇမၢတ်ႈမႂ်းၵႄႇၶျွတ်ႈဢဝ်မႂ်းယဝ်ႉ၊ဝႃႈၼင်ႇၼႆဢေႃႈ။

၄၃ မိူဝ်ႈၼၼ်ႉၵမ်းလဵဝ်မၢၵ်ႇတႃမၼ်းႁၼ်မႃးသေယဝ်ႉမၼ်းယွင်ႈယေႃးမူၼ်ၽြႃးပဵၼ်ၸဝ်ႈယူႇသေလႄႈၸွမ်းပႃႈလင်မၼ်းၸဝ်ႈၵႂႃႇဢေႃႈ။ၵူၼ်းတင်းသဵင်ႈတင်းလူင်ႁၼ်သေယဝ်ႉဢွၼ်ၵၼ်ယွင်ႈယေႃးၽြႃးပဵၼ်ၸဝ်ႈဢေႃႈ။