Shan Missions

မၢတ်ႈထႄႇ

Chapter ၁     ၂     ၃     ၄     ၅     ၆     ၇     ၈     ၉     ၁၀     ၁၁     ၁၂     ၁၃     ၁၄     ၁၅     ၁၆     ၁၇     ၁၈     ၁၉     ၂၀     ၂၁     ၂၂     ၂၃     ၂၄     ၂၅     ၂၆     ၂၇     ၂၈ 

၁၉

တၢင်းဢၼ်ပႅတ်ႈမေး

၁ ၸဝ်ႈယေႇသုၼၼ်ႉဝၢႆးသေႁေႃးလၢတ်ႈတေႇသၼႃႇတင်းသဵင်ႈတင်းမူတ်းယဝ်ႉၸိုင်ၽၢတ်ႇသေမိူင်းၵႃႇလိလႄးသေယဝ်ႉၵႂႃႇၵႃႈတီႈလႅၼ်လိၼ်မိူင်းယုတၽၢႆႇပုၼ်ႉၼမ်ႉႁွင်ႊယေႃးတၢၼ်ႇဢေႃႈ။ 

၂ ၵူၼ်းၸူႉၵူၼ်းတုမ်ၼမ်ၼႃႇၸွမ်းပႃႈလင်မၼ်းၸဝ်ႈလႄႈမၼ်းၸဝ်ႈႁႂ်ႈၶဝ်ၸိုၼ်ႈၶႅၼ်းၵႃႈတီႈၼၼ်ႉဢေႃႈ။ ၵမ်းၼၼ်ႉၽႃႇရိသေးတင်းလၢႆမႃးတီႈမၼ်းၸဝ်ႈသေလႄႈၼင်ႇႁိုဝ်တၵ်းလႆႈၸၢမ်းတူၺ်းယႃႉယူၵ်ႉမၼ်းၸဝ်ႈၼၼ်ႉၸိုင်ၶဝ်လဝ်ထၢမ်လႄႈဝႃႈ၊-

၃ ၵွပ်ႈပိူဝ်ႈလွင်ႈတၢင်းဢၼ်ၽိတ်းပိူင်ႈသေၸိူဝ်ႉသေပိူင်ၼၼ်ႉလႄႈၽူဝ်ထုၵ်ႇလီပႅတ်ႈမေးၶႃႈႁိုဝ်မိူဝ်ႈဢၼ်ဝႃႈၼင်ႇၼႆၸိုင်၊မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊-

၄ သူဢမ်ႇယၢမ်ႈလႆႈၽတ်းၵျၢမ်းလိၵ်ႈဢၼ်ဝႃႈ၊-မိူဝ်ႈၵေႃႇၸႃႉႁူဝ်ပိုင်းၼၼ်ႉၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၼၼ်ႉၽၢၼ်ႇသၢင်းႁဵတ်းပဵၼ်ၵူၼ်းၸၢႆးတင်းၵူၼ်းယိင်းသွင်ၵေႃႉၵူၺ်းဢေႃႈ။ 

၅ ၵွပ်ႈပိူဝ်ႈလွင်ႈတၢင်းၼၼ်ႉလႄႈၵူၼ်းၸၢႆးတၵ်းလႆႈၽၢတ်ႇၵၼ်တင်းပေႃႈမႄႈမၼ်းသေလႄႈၵူပ်ႉၵူမေးမၼ်းသေယဝ်ႉၶဝ်သွင်ၵေႃႉၼၼ်ႉတၵ်းလႆႈပဵၼ်ၼိူဝ်ႉပဵၼ်လိူတ်ႈဢၼ်လဵဝ်ၵၼ်ဢေႃႈ၊ဢၼ်ဝႃႈၼၼ်ႉႁိုဝ်။ 

၆ ပိူဝ်ႈၼႆလႄႈၶဝ်ၼၼ်ႉပဵၼ်သွင်ၵေႃႉဢမ်ႇၸႂ်ႈ။ ပဵၼ်ၵေႃႉလဵဝ်ၵူၺ်းဢေႃႈ။ လွင်ႈတၢင်းဢၼ်ၽြႃးပဵၼ်ၸဝ်ႈဢဝ်ၽၵ်းဢဝ်ႁွမ်းၵၼ်ၼၼ်ႉယႃႇပေႁႂ်ႈၵူၼ်းဢဝ်ၽၢတ်ႇဢဝ်ယၢၼ်ၵၼ်၊ဝႃႈၼင်ႇၼႆဢေႃႈ။ 

၇ ၶဝ်ၼၼ်ႉၵေႃႈလဝ်လၢတ်ႈလႄႈဝႃႈ၊-ပေႃးပဵၼ်ၸိူဝ်ႉၼင်ႇၼႆၸိုင်ႁဵတ်းသင်လႄႈမုဝ်းသေႇသမ်ႉၸီႇယၢင်ႇဝႆႉဝႃႈ၊-ႁႂ်ႈမၼ်းပၼ်လိၵ်ႈဢၼ်ပုတ်းဢၼ်ၶၢတ်ႇသေလႄႈပႅတ်ႈမေးမၼ်းတႃႉ၊ဝႃႈၸိူဝ်ႉၼင်ႇၼႆၶႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈလၢတ်ႈလႄႈဝႃႈ၊-

၈ ပိူဝ်ႈဢၼ်ႁူဝ်ၸႂ်သူၵႅၼ်ႇၶႅင်လႄႈမုဝ်းသေႇၸင်ႇလႆႈၸီႇယၢင်ႇပၼ်ဢၶႂၢင်ႉဢၼ်လႆႈပႅတ်ႈမေးဢေႃႈ။ 

၉ မိူဝ်ႈၵေႃႇၸႃႉႁူဝ်ပိုင်းၼၼ်ႉဢမ်ႇပဵၼ်ၸိူဝ်ႉၼင်ႇၼၼ်။ ၵဝ်ပိင်းၺၢပ်ႈတီႈသူၸမ်းလိူဝ်သေၵွပ်ႈပိူဝ်ႈတၢင်းဢၼ်ၽိတ်းၽူဝ်ၽိတ်းမေးၽိတ်းၵႃႇမေႇသူႉၼၼ်ႉၽူႈလႂ်သေဢမ်ႇဝႃႈၵေႃႉဢၼ်ပႅတ်ႈမေးမၼ်းသေယဝ်ႉသမ်ႉဢဝ်တၢင်ႇၵေႃႉၼၼ်ႉၵေႃႉၼၼ်ႉပဵၼ်ဢၼ်ၽိတ်းၵႃႇမေႇသူႉယဝ်ႉ။ ၵေႃႉဢၼ်ဢဝ်မႄႈႁၢင်ႉၼၼ်ႉၵေႃႈၽိတ်းပိူင်ႈမေးပိူၼ်ႈယဝ်ႉ၊ဝႃႈၼင်ႇၼႆဢေႃႈ။ 

၁၀ တပႄးၸဝ်ႈတင်းလၢႆၵေႃႈလဝ်လၢတ်ႈလႄႈဝႃႈ၊-ပေႃးလွင်ႈၽူဝ်လွင်ႈမေးပဵၼ်ၸိူဝ်ႉၼင်ႇၼႆၸိုင်ဢမ်ႇထူၵ်ႇလီဢဝ်ၵၼ်ယဝ်ႉ၊ဝႃႈၼင်ႇၼႆဢေႃႈ။ 

၁၁ မၼ်းၸဝ်ႈၵေႃႈလၢတ်ႈလႄႈဝႃႈ၊-ၵႂၢမ်းၼႆႉၸိုင်ၵူၼ်းၵူႈၵေႃႉဢမ်ႇႁပ်ႉတုင်းဢဝ်လႆႈ။ ၶဝ်ၸိူဝ်းဢၼ်လႆႈဢၶႂၢင်ႉၼၼ်ႉၵူၺ်းႁပ်ႉတုင်းဢဝ်လႆႈဢေႃႈ။ 

၁၂ မီးၶဝ်ၸိူဝ်းဢၼ်ပဵၼ်ၵူၼ်းတွၼ်ၵႃႈၼႂ်းတွင်ႉမႄႈမႃးၼၼ်ႉယူႇဢေႃႈ။ ၶဝ်ၸိူဝ်းဢၼ်ပိူၼ်ႈမႄးႁဵတ်းႁႂ်ႈပဵၼ်ၵူၼ်းတွၼ်ၼၼ်ႉၵေႃႈမီးဢေႃႈ။ ၶဝ်ၸိူဝ်းဢၼ်သင်ႇသွၼ်တူဝ်ၸဝ်ႈၵဝ်ႇလႄႈပဵၼ်ၵူၼ်းတွၼ်ပုၼ်ႈမိူင်းၵၢင်ႁၢဝ်ၼၼ်ႉၵေႃႈမီးဢေႃႈ။ ၵႂၢမ်းၼႆႉၸိုင်ႁႂ်ႈၵေႃႉဢၼ်ႁပ်ႉတုင်းဢဝ်လႆႈၼၼ်ႉႁပ်ႉတုင်းဢဝ်သေၵမ်း၊ဝႃႈၼင်ႇၼႆဢေႃႈ။ 

ၸဝ်ႈယေႇသုပၼ်တၢင်းလီလုၵ်ႈဢွၼ်ႇ

၁၃ မိူဝ်ႈၼၼ်ႉၼင်ႇႁိုဝ်မၼ်းၸဝ်ႈတၵ်းဢဝ်မိုဝ်းတၢင်ႇလႄႈပၼ်တၢင်းလီၸိုင်ၶဝ်ဢဝ်လုၵ်ႈဢွၼ်ႇတင်းလၢႆမႃးတီႈမၼ်းၸဝ်ႈဢေႃႈ။ ၵူၺ်းၵႃႈတပႄးၸဝ်ႈတင်းလၢႆတၢင်ႇဢပျႅတ်ႈတီႈၶဝ်ဢေႃႈ။ 

၁၄ ၸဝ်ႈယေႇသုၵေႃႈလၢတ်ႈဝႃႈ၊-ပၼ်ဢၶႂၢင်ႉတီႈလုၵ်ႈဢွၼ်ႇၸိူဝ်းၼၼ်ႉတႃႉ။ ယႃႇပေႁၢမ်ႈတၢပ်ႈႁႄႉၶႅၼ်လွင်ႈဢၼ်ၶဝ်တၵ်းမႃးတီႈၵဝ်ၼၼ်ႉ။ မိူင်းၵၢင်ႁၢဝ်ၸဝ်ႈပဵၼ်မိူင်းၸိူဝ်ႉၼင်ႇၶဝ်ၸိူဝ်းၼၼ်ႉဢေႃႈ၊ဝႃႈၼင်ႇၼႆဢေႃႈ။ 

၁၅ မၼ်းၸဝ်ႈဢဝ်မိုဝ်းတၢင်ႇၵႃႈၼိူဝ်လုၵ်ႈဢွၼ်ႇၸိူဝ်းၼၼ်ႉယဝ်ႉၸင်ႇဢွၵ်ႇသေၵႃႈတီႈၼၼ်ႉၵႂႃႇဢေႃႈ။ 

မၢဝ်ႇသတ်ႉထေးမႃးတီႈၸဝ်ႈယေႇသု

၁၆ လိုၼ်းၼၼ်ႉၵူၼ်းၵေႃႉၼိုင်ႈသုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈလဝ်ထၢမ်ဝႃႈ၊-သြႃႇၸဝ်ႈ၊ၼင်ႇႁိုဝ်တၵ်းလႆႈထႃႇဝရႃႉဢသၢၵ်ႈၸိုင်၊ၵဝ်ၶႃႈတၵ်းလႆႈႁဵတ်းတၢင်းလီဢၼ်လႂ်ၶႃႈ၊ဝႃႈၼင်ႇၼႆဢေႃႈ။ 

၁၇ မၼ်းၸဝ်ႈၵေႃႈလၢတ်ႈလႄႈဝႃႈ၊-ႁဵတ်းသင်လႄႈမႂ်းထၢမ်လွင်ႈဢၼ်မျၢတ်ႈဢၼ်လီတီႈၵဝ်ၸိူဝ်ႉၼႆ။ ဢၼ်မျၢတ်ႈဢၼ်လီၼၼ်ႉမီးသူႇလဵဝ်ပႃးလဵဝ်ၵူၺ်းဢေႃႈ။ ပေႃးမႂ်းၶႂ်ႈၶဝ်ႈၼႂ်းတၢင်းဢၼ်ဢသၢၵ်ႈလိပ်းၼၼ်ႉၸိုင်ၵမ်ၵျၢင်ႉပိင်းၺၢပ်ႈၸဝ်ႈတင်းလၢႆတႃႉ၊ဝႃႈၼင်ႇၼႆဢေႃႈ။ 

၁၈ မၼ်းသမ်ႉၶိုၼ်းလဝ်ထၢမ်လႄႈဝႃႈ၊-ပိင်းၺၢပ်ႈဢၼ်လႂ်ၶႃႈ၊ဝႃႈၼင်ႇၼႆလႄႈၸဝ်ႈယေႇသုၵေႃႈလၢတ်ႈလႄႈဝႃႈ၊-ယႃႇပေဢဝ်ဢသၢၵ်ႈၵူၼ်းတၢႆ၊ယႃႇပေၽိတ်းမေးပိူၼ်ႈ၊ယႃႇပလေၵ်ႉဢုၵ်ႉၸႃႇၶူဝ်းလဵင်းပိူၼ်ႈ၊ယႃႇပေၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉ။ 

၁၉ ရုဝ်ႇသေႇၵူဝ်ယမ်ပေႃႈမႄႈတႃႉ။ ႁၵ်ႉၵေႃႉဢၼ်ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇၼၼ်ႉမိူၼ်ၸိူဝ်ႉၼင်ႇႁၵ်ႉတူဝ်ၸဝ်ႈၵဝ်ႇၼၼ်ႉတႃႉ၊ဝႃႈၼင်ႇၼႆဢေႃႈ။ 

၂၀ ၵူၼ်းၼုမ်ႇၼၼ်ႉၵေႃႈၶိုၼ်းလဝ်လၢတ်ႈလႄႈဝႃႈ၊-ပိင်းၺၢပ်ႈၵႃႈမီးတင်းသဵင်ႈတင်းလူင်ၸိူဝ်းၼႆႉၵဝ်ၶႃႈၵမ်ၵျၢင်ႉမႃးၶႃႈယဝ်ႉ။ 

၂၁ ယင်းလူဝ်ႇထႅင်ႈဢၼ်လႂ်ၶႃႈ၊ဝႃႈၼင်ႇၼႆဢေႃႈ။ ၸဝ်ႈယေႇသုၵေႃႈလၢတ်ႈလႄႈဝႃႈ၊-ပေႃးမႂ်းၶႂ်ႈပဵၼ်တၢင်းဢၼ်ၸေးၸုမ်ႇၸိုင်ၵႂႃႇၶၢႆဢုၵ်ႉၸႃႇၶူဝ်းလဵင်းမႂ်းသေလႄႈပၼ်တီႈၶဝ်ၸိူဝ်းဢၼ်ယၢၵ်ႈၽၢၼ်တင်းလၢႆၸိူဝ်းၼၼ်ႉတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင်မႂ်းတၵ်းလႆႈၽၼ်ႇတႃႇၵႃႈၼိူဝ်မိူင်းၵၢင်ႁၢဝ်ပုၼ်ႉဢေႃႈ။ ႁဵတ်းၸိူဝ်ႉၼင်ႇၼၼ်ယဝ်ႉၸင်ႇမႃးလႄႈၸွမ်းပႃႈလင်ၵဝ်တႃႉ၊ဝႃႈၼင်ႇၼႆဢေႃႈ။ 

၂၂ ၵူၼ်းၼုမ်ႇၼၼ်ႉပိူဝ်ႈဢၼ်မၼ်းပဵၼ်ၵေႃႉဢၼ်မီးဢုၵ်ႉၸႃႇၶူဝ်းလဵင်းၼမ်ၼႃႇလႄႈမိူဝ်ႈဢၼ်လႆႈငိၼ်းၵႂၢမ်းၼၼ်ႉၸိုင်မၼ်းမီးၸႂ်ဢၼ်ဢမ်ႇသိူဝ်းဢမ်ႇပျေႃႇလႄႈဢွၵ်ႇၵႂႃႇသေဢေႃႈ။ 

၂၃ ၸဝ်ႈယေႇသုၵေႃႈလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊-ၵဝ်ဝႃႈတီႈၸိုဝ်ႈတီႈၸႂ်ႈၸမ်းၵူၼ်းမၢၵ်ႈၵူၼ်းမီးၶဝ်ႈၼႂ်းမိူင်းၵၢင်ႁၢဝ်ယၢပ်ႇၼႃႇလူင်လၢင်ဢေႃႈ။ 

၂၄ ၵဝ်သမ်ႉဝႃႈတီႈသူထႅင်ႈၸမ်းၵလႃႇဢုၵ်ႉလၼ်ႈႁူးၶဵမ်ယင်းငၢႆႈသေၵူၼ်းမၢၵ်ႈၵူၼ်းမီးၶဝ်ႈၼႂ်းမိူင်းၽြႃးပဵၼ်ၸဝ်ႈၼၼ်ႉဢေႃႈ၊ဝႃႈၼင်ႇၼႆဢေႃႈ။ 

၂၅ တပႄးၸဝ်ႈၸိူဝ်းၼၼ်ႉငိၼ်းသေယဝ်ႉၵႂင်ၸႂ်ယုင်ႈၸႂ်ၼႃႇလူင်လၢင်လႄႈဝႃႈ၊-ပေႃးပဵၼ်ၸိူဝ်ႉၼႆၸိုင်ၽူႈလႂ်တၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၼၼ်ႉလႆႈၶႃႈ၊ဝႃႈၼင်ႇၼႆဢေႃႈ။ 

၂၆ ၸဝ်ႈယေႇသုၵေႃႈတူၺ်းၶဝ်သေလႄႈလၢတ်ႈဝႃႈ၊-လွင်ႈတၢင်းၼႆႉၸိုင်ၵူၼ်းဢမ်ႇတတ်ႈၼိုင်ႇလႆႈ။ ၼႂ်းဝႃႈၼၼ်သေၵေႃႈၽြႃးပဵၼ်ၸဝ်ႈတတ်ႈၼိုင်ႇလႆႈလွင်ႈတၢင်းတင်းသဵင်ႈတင်းလူင်ယူႇဢေႃႈ၊ဝႃႈၼင်ႇၼႆဢေႃႈ။ 

၂၇ မိူဝ်ႈၼၼ်ႉပေႇတရုလဝ်လၢတ်ႈလႄႈဝႃႈ၊-ႁဝ်းၶႃႈၼႆႉၸုၼ်ႉပႅတ်ႈၵႃႈဢၼ်မီးတင်းသဵင်ႈတင်းလူင်သေလႄႈၸွမ်းပႃႈလင်ၸဝ်ႈႁဝ်းမႃးၶႃႈယဝ်ႉ။ ႁဝ်းၶႃႈတၵ်းလႆႈဢီသင်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၸဝ်ႈယေႇသုၵေႃႈလၢတ်ႈလႄႈဝႃႈ၊-

၂၈ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၼႂ်းၶိင်ႇၵႃႇလႃႉဢၼ်မႄးႁဵတ်းဢၼ်မႂ်ႇတင်းသဵင်ႈတင်းလူင်မိူဝ်ႈဢၼ်လုၵ်ႈၵူၼ်းၼင်ႈၵႃႈၼိူဝ်ပလၢင်ႇဢၼ်မီးမူၼ်ၽုင်းၼၼ်ႉသူၸိူဝ်းဢၼ်ၸွမ်းပႃႈလင်ၵဝ်ၼႆႉတၵ်းလႆႈၼင်ႈၵႃႈၼိူဝ်ပလၢင်ႇသိပ်းသွင်ဢၼ်သေလႄႈၸီႇယၢင်ႇၵူၼ်းဢိသရေႇလသိပ်းသွင်မဵဝ်းဢေႃႈ။ 

၂၉ ၽူႈလႂ်သေဢမ်ႇဝႃႈၵေႃႉဢၼ်ၸုၼ်ႉပႅတ်ႈႁိူၼ်း၊ပီႈၼွင်ႉၸဵမ်ယိင်းၸဵမ်ၸၢႆး၊ပေႃႈမႄႈ၊လုၵ်ႈမေး၊ႁႆႊၼႃး၊တင်းလၢႆၵွပ်ႈပိူဝ်ႈၼႃႇမႃႉၸိုဝ်သဵင်ၵဝ်ၼၼ်ႉၵေႃႉၼၼ်ႉတၵ်းယိင်ၶႅၼ်းလႆႈပၢၵ်ႇပုၼ်ႊလႄႈလႆႈၶၢမ်ႇဢမူၺ်ႇထႃႇဝရႃႉဢသၢၵ်ႈဢေႃႈ။ 

၃၀ ၶဝ်ၸိူဝ်းဢၼ်တူၵ်းဢွၼ်တၢင်းၼမ်ၼႃႇၼၼ်ႉတၵ်းတူၵ်းလိုၼ်းဢေႃႈ။ ၶဝ်ၸိူဝ်းဢၼ်တူၵ်းလိုၼ်းၼမ်ၼႃႇၼၼ်ႉတၵ်းတူၵ်းဢွၼ်တၢင်းဢေႃႈ။