Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂ ၀    ၂၁    ၂၂    ၂၃    ၂၄   

၁၇ 

ဢပျႅတ်ႈ၊တၢင်းယုမ်ႇမၢတ်ႈ၊ပုၼ်ႈၽွၼ်း

၁ မၼ်းၸဝ်ႈသမ်ႉလၢတ်ႈတီႈတပႄးၸဝ်ႈတင်းလၢႆထႅင်ႈလႄႈဝႃႈ၊-လွင်ႈတၢင်းဢၼ်ၶီႈလိုတ်းလူမ်ႉၼၼ်ႉတၵ်းလႆႈမီးဢေႃႈ။ၼႂ်းဝႃႈၼၼ်သေၵေႃႈၵေႃႉဢၼ်ႁႂ်ႈလွင်ႈတၢင်းဢၼ်ၶီႈလိုတ်းလူမ်ႉပဵၼ်မႃးၼၼ်ႉမီးဢႃႉမင်ႇၵလႃႇဢေႃႈ။

၂ ၵေႃႉဢၼ်ႁႂ်ႈလုၵ်ႈဢွၼ်ႇၸိူဝ်းၼႆႉသေၵေႃႉၵေႃႉၶီႇလိုတ်းလူမ်ႉၼၼ်ႉတီႈၵေႃႉၼၼ်ႉပေႃးမၼ်းၶၢမ်ႇတၢင်းဢၼ်ဢဝ်မၢၵ်ႇႁိၼ်လူၺ်ႁွႆႈသႂ်ႇၵႃႈတီႈၶေႃးမၼ်းသေလႄႈပွႆႇၸူမ်လူင်းၵႂႃႇၵႃႈၼႂ်းၼမ်ႉပၢင်ႇလၢႆႇတီႈဢၼ်လိုၵ်ႉၼၼ်ႉၸိုင်ယဵင်ႈၶႅၼ်းတၵ်းလီဢေႃႈ။

၃ သူႁဵတ်းသတိတီႈတူဝ်ၸဝ်ႈၵဝ်ႇတႃႉ။ပေႃးပီႈၼွင်ႉမႂ်းၽိတ်းပိူင်ႈၸိုင်သင်ႇသွၼ်သုင်းမႃႉမၼ်းတႃႉ။ပေႃးမၼ်းၶုၵ်းၸႂ်လႆႈမႆႈၸႂ်ၸိုင်ပွႆႇလွတ်ႈဢပျႅတ်ႈမၼ်းတႃႉ။

၄ ၼႂ်းဝၼ်းၼိုင်ႈပေႃးမၼ်းၽိတ်းပိူင်ႈမႂ်းၸဵတ်းပွၵ်ႈလႄႈသမ်ႉၶိုၼ်းမႃးတီႈမႂ်းတေႃႇထိုင်ႁွတ်ႈၸဵတ်းပွၵ်ႈလႄႈဝႃႈ၊-ၵဝ်ၶႃႈၶုၵ်းၸႂ်လႆႈမႆႈၸႂ်ၶႃႈယဝ်ႉ၊ဝႃႈၼင်ႇၼႆၸိုင်ပွႆႇလွတ်ႈဢပျႅတ်ႈမၼ်းတႃႉ၊ဝႃႈၼင်ႇၼႆဢေႃႈ။

၅ တမၢၼ်ႇၸဝ်ႈတင်းလၢႆၵေႃႈတွင်းပၢၼ်ႇတီႈၸဝ်ႈၽြႃးလႄႈဝႃႈ၊-ႁႂ်ႈတၢင်းယုမ်ႇမၢတ်ႈႁဝ်းၶႃႈယႂ်ႇမႃးသေၵမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၸဝ်ႈၽြႃးၵေႃႈလၢတ်ႈလႄႈဝႃႈ၊-

၆ ပေႃးသူမီးတၢင်းယုမ်ႇမၢတ်ႈဢၼ်ယႂ်ႇတၢၼ်ႇၽၼ်းၽၵ်းၵၢတ်ႇမဵတ်ႉၼိုင်ႈၵူၺ်းၵေႃႈၼႂ်းလွင်ႈဢၼ်သူလၢတ်ႈတီႈတူၼ်ႈမၢၵ်ႇလိူဝ်ႇသၢင်းၽေႃးၼႆႉလႄႈဝႃႈ၊-ထူၺ်ႈဢဝ်ႁၢၵ်ႈမႂ်းသေလႄႈပၵ်းယူႇၵႃႈၼႂ်းပၢင်ႇလၢႆႇပုၼ်ႉတႃႉ၊ဝႃႈၼႆၵေႃႈ၊မၼ်းတၵ်းထွမ်ႇဢဝ်ၵႂၢမ်းသူဢေႃႈ။

၇ ၼႂ်းသူၼႆႉၽူႈလႂ်သေၵေႃႉသေၵူၼ်းမီးၵူၼ်းၸႂ်ႉၵူၼ်းသွႆဢၼ်ထႆၼႃးဢၼ်လဵင်ႉသူဝ်းလဵင်ႉဝူဝ်းလႂ်ၼၼ်ႉလႄႈမိူဝ်ႈဢၼ်မၼ်းလုၵ်ႉသေၵႃႈတီႈတူင်ႈၼႃးမႃးလႄႈၶဝ်ႈမႃးၼႂ်းႁိူၼ်းသူၼၼ်ႉၸွင်ႇသူတၵ်းလၢတ်ႈတီႈမၼ်းလႄႈဝႃႈ၊-မႃးၵမ်းလဵဝ်လႄႈၼင်ႈယူႇႁိမ်းၽိူၼ်တီႈၵိၼ်တႃႉ၊ဝႃႈၼင်ႇၼႆႁိုဝ်။

၈ ဢမ်ႇၼၼ်ၵေႃႈတၵ်းလၢတ်ႈတီႈမၼ်းလႄႈဝႃႈ၊-မႄးႁႅၼ်းပုၼ်ႈဢၼ်ၵဝ်တၵ်းၵိၼ်တႃႉ။ႁတ်ႉသၢႆဢႅဝ်မႂ်းသေလႄႈႁဵတ်းလဵင်ႉႁဵတ်းလူၵဝ်တေႃႇထိုင်ႁွတ်ႈၵဝ်ၵိၼ်ၶူပ်းယဝ်ႉၸင်ႇမႂ်းၵိၼ်တႃႉ၊ဝႃႈၼင်ႇၼႆဢမ်ႇၸႂ်ႈႁိုဝ်။

၉ ပိူဝ်ႈဢၼ်မၼ်းႁဵတ်းၸွမ်းလွင်ႈတၢင်းဢၼ်ၸဝ်ႈမၼ်းၸီႇယၢင်ႇဝႆႉတင်းလၢႆၼၼ်ႉလႄႈၸဝ်ႈမၼ်းတၵ်းလၢတ်ႈတီႈၵူၼ်းၸႂ်ႉၵူၼ်းသွႆၼၼ်ႉလႄႈဝႃႈ၊-ၵျေးၸူးမႂ်းယႂ်ႇၼႃႇဢေႃႈ၊ဝႃႈၼင်ႇၼႆဢမ်ႇၸႂ်ႈႁိုဝ်။

၁၀ ၼႄးလဵဝ်ၵၼ်မိူဝ်ႈဢၼ်သူၵမ်ၵျၢင်ႉလွင်ႈတၢင်းၵႃႈဢၼ်မၼ်းၸဝ်ႈၸီႇယၢင်ႇဝႆႉတင်းသဵင်ႈတင်းလူင်ၸိူဝ်းၼၼ်ႉယဝ်ႉၸိုင်သူလၢတ်ႈဝႃႈ၊-ႁဝ်းၶႃႈပဵၼ်ၵူၼ်းၸႂ်ႉၵူၼ်းသွႆဢၼ်ထိူၵ်ႈတၢၼ်ႇသူႉၵျေးၸူးဢမ်ႇၸႂ်ႈ။ႁဝ်းၶႃႈႁဵတ်းၸွမ်းၵႃႈၼင်ႇဢၼ်ႁဝ်းၶႃႈထုၵ်ႇလီႁဵတ်းၼၼ်ႉၵူၺ်းဢေႃႈ၊ဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။

ၵူၼ်းပဵၼ်တုတ်ႈသိပ်းၵေႃႉ

၁၁ မၼ်းၸဝ်ႈၼၼ်ႉမိူဝ်ႈဢၼ်ယင်းတိုၵ်ႉၵႂႃႇၵႃႈတီႈဝဵင်းယေႇရုသလႅမ်ႇယူႇၼၼ်ႉၸိုင်လတ်းၵႂႃႇၵႃႈၼႂ်းၶိုင်ႈၵၢင်မိူင်းသမႃႇရိတင်းမိူင်းၵႃႇလိလႄးဢေႃႈ။

၁၂ ၼႂ်းမိူဝ်ႈဢၼ်မၼ်းၸဝ်ႈၶဝ်ႈၵႂႃႇၵႃႈၼႂ်းဝၢၼ်ႈဝၢၼ်ႈၼိုင်ႈယူႇၼၼ်ႉၸိုင်ၵူၼ်းပဵၼ်တုတ်ႈသိပ်းၵေႃႉဢၼ်ၸုၵ်းယူႇၵႃႈတီႈဢၼ်ၵႆၼၼ်ႉႁပ်ႉႁူဝ်တၢင်းမၼ်းၸဝ်ႈသေလႄႈႁွင်ႉသႅၼ်ႇဝႃႈ၊-

၁၃ ၸဝ်ႈယေႇသုၸဝ်ႈႁဝ်းတီႈၶႃႈ။ၶႅၼ်းတေႃႈဢိတ်းလူႁဝ်းၶႃႈသေၵမ်းတီႈၶႃႈ၊ဝႃႈၼင်ႇၼႆဢေႃႈ။

၁၄ မၼ်းၸဝ်ႈႁၼ်ၶဝ်ၼၼ်ႉသေယဝ်ႉလၢတ်ႈဝႃႈ၊-သူၵႂႃႇလႄႈၼႄပျႃႉတူဝ်သူၵႃႈတီႈယိတ်ႉပရေႃးႁိၵ်ႈတင်းလၢႆပုၼ်ႉတႃႉ၊ဝႃႈၼႆဢေႃႈ။ၵႃႈၼင်ႇဢၼ်မၼ်းၸဝ်ႈဝႃႈၼၼ်ႉၼႂ်းမိူဝ်ႈဢၼ်ၶဝ်ယင်းတိုၵ်ႉၵႂႃႇယူႇၼၼ်ႉၸိုင်ၶဝ်ႁွတ်ႈထိုင်တၢင်းဢၼ်မူတ်းသႂ်ၵႃႈၼႂ်းၵၢင်တၢင်းဢေႃႈ။

၁၅ ၼႂ်းၶဝ်ၼၼ်ႉၵေႃႉၼိုင်ႈမိူဝ်ႈဢၼ်ႁၼ်တူဝ်ၸဝ်ႈၵဝ်ႇႁၢႆၶႅၼ်းၼၼ်ႉၸိုင်မၼ်းၶိုၼ်းပွၵ်ႈမႃးလႄႈႁဵတ်းတင်းသဵင်ဢၼ်ယႂ်ႇၼႃႇယွင်ႈယေႃးမူၼ်ၽြႃးပဵၼ်ၸဝ်ႈဢေႃႈ။

၁၆ မၼ်းၶုပ်ႉမူပ်ႇႁိမ်းတိၼ်မၼ်းၸဝ်ႈသေလႄႈလဝ်ႈလၢတ်ႈဝႃႈ၊-ၵျေးၸူးၸဝ်ႈႁဝ်းယႂ်ႇၼႃႇတီႈၶႃႈဢေႃႈ၊ဝႃႈၼင်ႇၼႆဢေႃႈ။ၵေႃႉၼၼ်ႉၸမ်းပဵၼ်ၵူၼ်းမဵဝ်းသမႃႇရိဢေႃႈ။

၁၇ ၸဝ်ႈယေႇသုၵေႃႈထၢမ်မၼ်းလႄႈဝႃႈ၊-ၵူၼ်းသိပ်းၵေႃႉႁွတ်ႈထိုင်တၢင်းဢၼ်မူတ်းသႂ်ဢမ်ႇၸႂ်ႈႁိုဝ်။

၁၈ ၵဝ်ႈၵေႃႉမီးၵႃႈတီႈလႂ်။လိူဝ်သေၵူၼ်းတၢင်ႇၸိူဝ်ႉတၢင်ႇၶိူဝ်းၵေႃႉၼိုင်ႈၼႆႉၵူၺ်းဢမ်ႇမီးၵေႃႉဢၼ်ၶိုၼ်းမႃးႁႂ်ႈလႆႈယွင်ႈယေႃးမူၼ်ၽြႃးပဵၼ်ၸဝ်ႈႁိုဝ်၊ဝႃႈၼင်ႇၼႆသေယဝ်ႉ၊မၼ်းၸဝ်ႈသမ်ႉလၢတ်ႈတီႈၵေႃႉၼၼ်ႉလႄႈဝႃႈ၊-

၁၉ မႂ်းလုၵ်ႉလႄႈၵႂႃႇတႃႉ။တၢင်းယုမ်ႇမၢတ်ႈမႂ်းႁႂ်ႈတၢင်းၶႆႈတၢင်းပဵၼ်မႂ်းႁၢႆၶႅၼ်းယဝ်ႉ၊ဝႃႈၼင်ႇၼႆဢေႃႈ။

မိူင်းၽြႃးပဵၼ်ၸဝ်ႈတၵ်းတႄႇပဵၼ်

၂၀ ၵမ်းၼၼ်ႉၽႃႇရိသေးတင်းလၢႆလဝ်ႈထၢမ်လႄႈဝႃႈ၊-မိူင်းၽြႃးပဵၼ်ၸဝ်ႈတၵ်းတႄႇပဵၼ်ၶိင်ႇၵႃႇလႃႉမိူဝ်ႈလႂ်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-မိူင်းၵၢင်ႁၢဝ်ၸဝ်ႈၼၼ်ႉဢမ်ႇတႄႇၵႃႈတီႈဢၼ်တႃၵူၼ်းႁၼ်ၼၼ်ႉ။

၂၁ တူၺ်းၵႃႈတီႈၼႆႉတႃႉ၊တူၺ်းၵႃႈတီႈၼၼ်ႉတႃႉ၊ဝႃႈၼႆတီႈဢၼ်တၵ်းလၢတ်ႈဢမ်ႇမီး။လွင်ႈမၼ်းၸမ်းမိူင်းၽြႃးပဵၼ်ၸဝ်ႈမီးယူႇၼႂ်းသူဢေႃႈ၊ဝႃႈၼင်ႇၼႆဢေႃႈ။

၂၂ မၼ်းၸဝ်ႈသမ်ႉလၢတ်ႈတီႈတပႄးၸဝ်ႈတင်းလၢႆထႅင်ႈလႄႈဝႃႈ၊-ၶိင်ႇၵႃႇလႃႉဢၼ်သူၶႂ်ႈထူပ်းၶႂ်ႈႁၼ်ဝၼ်းလုၵ်ႈၵူၼ်းဝၼ်းၼိုင်ႈၼၼ်ႉသေၵေႃႈဢမ်ႇထူပ်းဢမ်ႇႁၼ်လႆႈၼၼ်ႉတၵ်းႁွတ်ႈထိုင်မႃးယူႇဢေႃႈ။

၂၃ ပဵၵ်ႉသမ်ႉၶဝ်လၢတ်ႈတီႈသူလႄႈဝႃႈ၊-တူၺ်းၵႃႈတီႈၼႆႉတႃႉ၊တူၺ်းၵႃႈတီႈၼၼ်ႉတႃႉ၊ဝႃႈၼင်ႇၼႆသေၵေႃႈ၊ယႃႇပေၸွမ်းယႃႇပေၵႂႃႇ။

၂၄ လုၵ်ႈၵူၼ်းၸမ်း၊ၼႂ်းဝၼ်းတူဝ်ၸဝ်ႈၵဝ်ႇၼၼ်ႉတၵ်းပဵၼ်မႃးမိူၼ်ၸိူဝ်ႉၼင်ႇၽႃႉမႅပ်ႈဢၼ်လုၵ်ႉသေၵႃႈတီႈၽၢၵ်ႇၼိုင်ႈၼိူဝ်ၵၢင်ႁၢဝ်ႁိူဝ်ႈလႅင်းတေႃႇထိုင်ႁွတ်ႈၽၢၵ်ႇၼိုင်ႈၼၼ်ႉဢေႃႈ။

၂၅ ၸူဝ်ႈဢၼ်ဢမ်ႇပႆႇပဵၼ်ၸိူဝ်ႉၼင်ႇၼၼ်ၼၼ်ႉၸိုင်မၼ်းၸဝ်ႈတၵ်းလႆႈၶၢမ်ႇတုၵ်ႉၶႃႉတၢင်းယၢပ်ႇၼမ်ၼႃႇဢိၵ်ႇတင်းတၢင်းဢၼ်ၵူၼ်းမဵဝ်းၸူဝ်ႈပၢၼ်တေႃႈမိူဝ်ႈလဵဝ်ၼႆႉပႄႇပႅတ်ႈၼၼ်ႉဢေႃႈ။

၂၆ ၸိူဝ်ႉၼင်ႇဢၼ်ပဵၼ်ၼႂ်းၸူဝ်ႈပၢၼ်ၼုဝ်းဢႃႇၼၼ်ႉတၵ်းပဵၼ်ၼႂ်းၸူဝ်ႈပၢၼ်လုၵ်ႈၵူၼ်းဢေႃႈ။

၂၇ ၶဝ်ၼၼ်ႉၵိၼ်ယူႇၶူပ်းယူႇဢဝ်ၽူဝ်ယူႇဢၢပ်ႈပၼ်ပၼ်ၵၼ်ယူႇတေႃႇထိုင်ႁွတ်ႈဝၼ်းဢၼ်ၼုဝ်းဢႃႇၶဝ်ႈၵႃႈၼႂ်းႁိူဝ်းသၢင်းၽေႃးလႄႈၼမ်ႉထုမ်ႈမိူင်းမႃးၽဵဝ်ႈပႅတ်ႈၶဝ်တင်းသဵင်ႈတင်းမူတ်းဢေႃႈ။

၂၈ ပိူင်လဵဝ်ၵၼ်ၸိူဝ်ႉၼင်ႇဢၼ်ပဵၼ်မႃးၼႂ်းၸူဝ်ႈပၢၼ်လေႃးတၼၼ်ႉ၊ၶဝ်ၼၼ်ႉၵိၼ်ယူႇၶူပ်းယူႇသိုဝ်ႉယူႇၶၢႆယူႇ၊ၽုၵ်ႇသွမ်ႈယူႇ၊ႁဵတ်းႁိူၼ်းယူႇဢေႃႈ။

၂၉ ၵူၺ်းၵႃႈၼႂ်းဝၼ်းဢၼ်လေႃးတဢွၵ်ႇသေၵႃႈၼႂ်းဝဵင်းသေႃးတုမ်ၼၼ်ႉၽူၼႆ်းဢၼ်လေႃးၵၼ်တင်းၵၢၼ်ႉတူၵ်းသေၵႃႈၼိူဝ်ၽႃႉၵၢင်ႁၢဝ်မႃးလႄႈၽဵဝ်ႈပႅတ်ႈၶဝ်တင်းသဵင်ႈတင်းလူင်ဢေႃႈ။

၃၀ မိူၼ်ၸိူဝ်ႉၼင်ႇၼၼ်တၵ်းပဵၼ်ၼႂ်းဝၼ်းဢၼ်လုၵ်ႈၵူၼ်းပေႃႇမႃးၼၼ်ႉဢေႃႈ။

၃၁ ၼႂ်းဝၼ်းၼၼ်ႉယႃႇပေႁႂ်ႈၵေႃႉဢၼ်မီးယူႇၵႃႈၼိူဝ်ၸွမ်ႁိူၼ်းလူင်းၵႂႃႇဢဝ်ဢုၵ်ႉၸႃႇၶူဝ်းလဵင်းမၼ်းဢၼ်မီးၵႃႈၼႂ်းႁိူၼ်းမၼ်းၼၼ်ႉ။

၃၂ ယႃႇပေႁႂ်ႈၵေႃႉဢၼ်မီးယူႇၵႃႈၼႂ်းတူင်ၼႃးၼၼ်ႉဝၢႆႇၶိုၼ်းမိူဝ်းတၢင်းလင်။ၶုၵ်းၸႂ်လႆႈၶႆႈၸႂ်ထူပ်းမေးလေႃးတၼၼ်ႉတႃႉ။

၃၃ ၽူႈလႂ်သေဢမ်ႇဝႃႈၵေႃႉဢၼ်ၵျၢမ်ႇႁႃႁႂ်ႈလႆႈၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇၼၼ်ႉၵေႃႉၼၼ်ႉတၵ်းသုမ်းဢသၢၵ်ႈဢေႃႈ။ၽူႈလႂ်သေဢမ်ႇဝႃႈၵေႃႉဢၼ်သုမ်းဢသၢၵ်ႈၼၼ်ႉတၵ်းၵႄႇသႄႇဢဝ်ဢသၢၵ်ႈတူဝ်ၸဝ်ႈၵဝ်ႇဢေႃႈ။

၃၄ ၵဝ်ဝႃႈတီႈသူၸမ်းၼႂ်းၶိုၼ်းၼၼ်ႉၵူၼ်းသွင်ၵေႃႉတၵ်းမီးယူႇၵႃႈၼိူဝ်ၵူႇတီႈၼွၼ်းဢၼ်ၼိုင်ႈဢေႃႈ။တၵ်းသိမ်းဢဝ်ၵေႃႉၼိုင်ႈၵႂႃႇလႄႈၵေႃႉၼိုင်ႈၸမ်းတၵ်းလႆႈၵိုတ်းၵျၢၼ်ႇဝႆႉယူႇဢေႃႈ။ၵူၼ်းယိင်းသွင်ၵေႃႉတၵ်းလုၺ်ၶဝ်ႈၸွမ်းၵၼ်ယူႇဢေႃႈ။

၃၅ တၵ်းသိမ်းဢဝ်ၵေႃႉၼိုင်ႈၵႂႃႇလႄႈၵေႃႉၼိုင်ႈၸမ်းတၵ်းလႆႈၵိုတ်းၵျၢၼ်ႇဝႆႉယူႇဢေႃႈ။

၃၆ မိူဝ်ႈဢၼ်မၼ်းၸဝ်ႈဝႃႈၼင်ႇၼႆၸိုင်ၶဝ်ၶိုၼ်းလဝ်ႈထၢမ်လႄႈဝႃႈ၊-ၸဝ်ႈႁဝ်း၊တၵ်းပဵၼ်ၸိူဝ်ႉၼင်ႇၼၼ်ၵႃႈတီႈလႂ်ၶႃႈ၊ဝႃႈၼင်ႇၼႆလႄႈမၼ်းၸဝ်ႈၵေႃႈလၢတ်ႈလႄႈဝႃႈ၊-တီႈဢၼ်မီးတူဝ်တၢႆၼၼ်ႉလၢင်းတႃႉတင်းလၢႆတၵ်းၸူႉတုမ်ဢေႃႈ၊ဝႃႈၼင်ႇၼႆဢေႃႈ။