Mat 14

မၢတ်ႈထႄႇ

Chapter ၁ ၂ ၃ ၄ ၅ ၆ ၇ ၈ ၉ ၁၀ ၁၁ ၁၂ ၁၃ ၁၄ ၁၅ ၁၆ ၁၇ ၁၈ ၁၉ ၂၀ ၂၁ ၂၂ ၂၃ ၂၄ ၂၅ ၂၆ ၂၇ ၂၈

၁၄

ယုဝ်းႁၢၼ်ႇလႆႈၶၢမ်ႇတၢင်းဢၼ်တႅပ်းႁူဝ်

၁ မိူဝ်ႈၼၼ်ႉၸဝ်ႈၾႁေႇရုတ်ႉငိၼ်းသတၢင်းသဵင်ၶၢဝ်ႇလွင်ႈၸဝ်ႈယေႇသုလႄႈလၢတ်ႈၵႃႈတီႈၵူၼ်းဢွၼ်ႇမၼ်းတင်းလၢႆလႄႈဝႃႈ၊-

၂ ၵေႃႉၼႆႉပဵၼ်ယုဝ်းႁၢၼ်ႇဢၼ်ပၼ်ပပ်ႉတိၸၢမ်ႇၼၼ်ႉဢိူဝ်ႈ။ မၼ်းလုၵ်ႉသေၵႃႈတၢင်းတၢႆၶိုၼ်းလိပ်းမႃးယဝ်ႉ။ ပိူဝ်ႈၼႆၸင်ႇတၼ်းၶူဝ်းၼမ်ၼႃႇၼႆႉၸင်ႇႁဵတ်းပွင်ယူႇၵႃႈၼႂ်းမၼ်းဢိူဝ်ႈ၊ဝႃႈၼင်ႇၼႆဢေႃႈ။

၃ လွင်ႈမၼ်းၸမ်းမိူဝ်ႈဢွၼ်တၢင်းၼၼ်ႉၸဝ်ႈၾႁေႇရုတ်ႉတီႉမတ်ႉဢဝ်ယုဝ်းႁၢၼ်ႇၵွပ်ႈပိူဝ်ႈႁေႇရုဝ်းတိ၊ဢၼ်ပဵၼ်မေးၼွင်ႉၸၢႆးမၼ်း

၄ ၽိလိပ်ႉပုၼၼ်ႉလႄႈၶင်ယုဝ်းႁၢၼ်ႇဝႆႉၵႃႈၼႂ်းထွင်ႇၵွပ်ႈပိူဝ်ႈမၼ်းလႆႈလၢတ်ႈတီႈၸဝ်ႈၾႁေႇရုတ်ႉဝႃႈ၊-

၅ ၸဝ်ႈႁဝ်းဢမ်ႇထုၵ်ႇလီသိမ်းဢဝ်မႄႈယိင်းၵေႃႉၼၼ်ႉ၊ဝႃႈၼင်ႇၼႆၼၼ်ႉဢေႃႈ။ ပဵၵ်ႉသမ်ႉၸဝ်ႈၾမီးဢလူဝ်ႇၶႂ်ႈဢဝ်ယုဝ်းႁၢၼ်ႇတၢႆသေၵေႃႈမၼ်းၵူဝ်ၵူၼ်းတင်းလၢႆဢေႃႈ။

၆ လွင်ႈမၼ်းၸမ်းၵူၼ်းတင်းလၢႆထၢင်ႇယုဝ်းႁၢၼ်ႇပဵၼ်ပရေႃးၽႅတ်ႈဢေႃႈ။ ၼႂ်းမိူဝ်ႈဢၼ်ၶၢမ်ႇပွႆးဢၸႅၼ်ႇဝၼ်းၵိူတ်ႇၸဝ်ႈၾႁေႇရုတ်ႉၼၼ်ႉလုၵ်ႈယိင်းႁေႇရုဝ်းတိၵႃႈၼႄၵႃႈၼႂ်းပၢင်ပွႆးလႄႈ၊ၸဝ်ႈၾႁေႇရုတ်ႉထုၵ်ႇၸႂ်ၵျိူၵ်ႈၸႂ်ၼႃႇထၼ်ႈပေႃးၵိၼ်ႇလၢတ်ႈဝႃႈ၊-

၇ ၵဝ်တၵ်းပၼ်ၵႃႈဢၼ်မႂ်းယွၼ်းဢေႃႈ၊ဝႃႈၼင်ႇၼႆဢေႃႈ။ မႄႈယိင်းဢွၼ်ႇၼၼ်ႉၵေႃႈလဝ်လၢတ်ႈတီႈၸဝ်ႈၾၸွမ်းၵႃႈၼင်ႇဢၼ်မႄႈမၼ်းသွၼ်ပၼ်ၼၼ်ႉလႄႈဝႃႈ၊-

၈ ဢဝ်ႁူဝ်ယုဝ်းႁၢၼ်ႇၵေႃႉဢၼ်ပၼ်ပပ်ႉတိၸၢမ်ႇၼၼ်ႉသႂ်ႇၼႂ်းပၢၼ်ႉသေလႄႈပၼ်တီႈၵဝ်ၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။

၉ ၸဝ်ႈၾၼၼ်ႉပဵၵ်ႉသမ်ႉၸႂ်လဵၵ်ႉၼႃႇသေၵေႃႈၵွပ်ႈပိူဝ်ႈမၼ်းပေႃးလႆႈၵိၼ်ႇလႆႈဝႃႈဝႆႉယဝ်ႉၵူၺ်းဢမ်ႇၵႃးၵွပ်ႈပိူဝ်ႈၶဝ်ၸိူဝ်းဢၼ်ၼင်ႈယူႇၵႃႈတီႈႁိမ်းၽိူၼ်တီႈၵိၼ်လူၺ်ႈၵၼ်တင်းမၼ်းၸိူဝ်းၼၼ်ႉလႄႈ

၁၀ မၼ်းမီးဢမိင်ႉႁႂ်ႈပွႆႇၸႂ်ႉၵူၼ်းသိုၵ်းၵႂႃႇတႅပ်းဢဝ်ႁူဝ်ယုဝ်းႁၢၼ်ႇၵႃႈၼႂ်းထွင်ႇၼၼ်ႉမႃးဢေႃႈ။

၁၁ ၶဝ်ဢဝ်ႁူဝ်မၼ်းသႂ်ႇၵႃႈၼႂ်းပၢၼ်ႉမႃးလႄႈပၼ်တီႈမႄႈယိင်းဢွၼ်ႇၼၼ်ႉယဝ်ႉၸင်ႇမၼ်းၵေႃႈဢဝ်ၵႂႃႇၸူးၵႃးတီႈမႄႈမၼ်းဢေႃႈ။

၁၂ တပႄးယုဝ်းႁၢၼ်ႇတင်းလၢႆၵေႃႈမႃးဢဝ်တူဝ်တၢႆမၼ်းလႄႈသၢင်းၵျူဝ်ႇယဝ်ႉၸင်ႇၵႂႃႇလဝ်လၢတ်ႈလွင်ႈတၢင်းၼၼ်ႉၵႃႈတီႈၸဝ်ႈယေႇသုဢေႃႈ။

ၸဝ်ႈယေႇသုလဵင်ႉလူၵူၼ်းႁႃႈႁဵင်

၁၃ ၸဝ်ႈယေႇသုႁူႉငိၼ်းသေယဝ်ႉဢွၵ်ႇသေၵႃႈတီႈၼၼ်ႉႉလႄႈၶီႇႁိူဝ်းၵႂႃႇၵႃႈတီႈဢၼ်ဢမ်ႇမီးၵူၼ်းလႄႈသိတ်ႇယဵၼ်ၼၼ်ႉဢေႃႈ။ မိူဝ်ႈဢၼ်ၵူၼ်းၸူႉၵူၼ်းတုမ်ၸိူဝ်းၼၼ်ႉငိၼ်းၸိုင်ၶဝ်ဢွၵ်ႇသေၵႃႈတီႈၼႂ်းဝဵင်းၸိူဝ်းၼၼ်ႉသေယဝ်ႉပႆတိၼ်ၸွမ်းမၼ်းၸဝ်ႈၵႂႃႇဢေႃႈ။

၁၄ မၼ်းၸဝ်ႈဢွၵ်ႇၵႂႃႇလႄႈထူပ်းႁၼ်ၵူၼ်းၸူႉၵူၼ်းတုမ်ၼမ်ၼႃႇၸိူဝ်းၼၼ်ႉလႄႈမီးၸႂ်ဢၼ်ဢိတ်းလူၶဝ်လႄႈႁႂ်ႈၵူၼ်းၶႆႈၵူၼ်းပဵၼ်တင်းသဵင်ႈတင်းလူင်ႁၢႆၶႅၼ်းဢေႃႈ။

၁၅ မိူဝ်ႈဢၼ်ႁွတ်ႈထိုင်ၶိင်ႇႁူဝ်ၶမ်ႈၼၼ်ႉၸိုင်တပႄးၸဝ်ႈတင်းလၢႆသုတ်ႉၸပ်းသုတ်ႉၸူးတီႈမၼ်းၸဝ်ႈလႄႈလဝ်လၢတ်ႈဝႃႈ၊-ၵႃႈတီႈၼႆႉပဵၼ်တီႈထိူၼ်ႇၶႃႈဢေႃႈ။ ဝၼ်းၵေႃႈတူၵ်းတေႃႈလဵဝ်ၶႃႈယဝ်ႉ။ ၼင်ႇႁိုဝ်ၵူၼ်းၸူႉၵူၼ်းတုမ်ၸိူဝ်းၼႆႉတၵ်းလႆႈၵႂႃႇၵႃႈတီႈဝၢၼ်ႈလႄႈသိုဝ်ႉဢဝ်တၢင်းၵိၼ်ၼၼ်ႉၸိုင်ၸဝ်ႈႁဝ်းႁႂ်ႈၶဝ်ၵႂႃႇသေၵမ်းၶႃႈ၊ဝႃႈၼင်ႇၼႆဢေႃႈ။

၁၆ ၸဝ်ႈယေႇသုၵေႃႈလၢတ်ႈလႄႈဝႃႈ၊-လွင်ႈဢၼ်တၵ်းလႆႈၵႂႃႇဢမ်ႇမီး။

၁၇ သူပၼ်ပုၼ်ႈဢၼ်ၶဝ်တၵ်းၵိၼ်တႃႉ၊ဝႃႈၼင်ႇၼႆဢေႃႈ။ ၶဝ်ၵေႃႈၶိုၼ်းလဝ်လၢတ်ႈလႄႈဝႃႈ၊-ၵႃႈတီႈႁဝ်းၶႃႈၼႆႉလိူဝ်သေၶဝ်ႈမုၼ်းႁႃႈႁူၺ်ႇတင်းပႃသွင်တူဝ်ၼၼ်ႉဢမ်ႇမီးၵႃႈသင်ၶႃႈ။

၁၈ မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈလၢတ်ႈလႄႈဝႃႈ၊-ဢဝ်ၸိူဝ်းၼၼ်ႉမႃးၵႃႈတီႈၵဝ်တႃႉ၊ဝႃႈၼင်ႇၼႆဢေႃႈ။

၁၉ ဝၢႆးၼၼ်ႉမၼ်းၸဝ်ႈပၼ်ဢမိင်ႉႁႂ်ႈၵူၼ်းၸူႉၵူၼ်းတုမ်ၸိူဝ်းၼၼ်ႉၼင်ႈယူႇၵႃႈၼိူဝ်ယိူဝ်ႈသေယဝ်ႉဢဝ်ၶဝ်ႈမုၼ်းႁႃႈႁူၺ်ႇတင်းပႃသွင်တူဝ်ၼၼ်ႉသေလႄႈႁႅၼ်တူၺ်ႈၵႃႈၼိူဝ်ၵၢင်ႁၢဝ်ယဝ်ႉၸင်ႇယွင်ႈယေႃးၵျေးၸူးၸဝ်ႈသေယဝ်ႉမိတ်းၶဝ်ႈမုၼ်းလႄႈပၼ်တီႈတပႄးၸဝ်ႈတင်းလၢႆဢေႃႈ။ တပႄးၸဝ်ႈၸိူဝ်းၼၼ်ႉၵေႃႈပၼ်တီႈၵူၼ်းၸူႉၵူၼ်းတုမ်ၸိူဝ်းၼၼ်ႉဢေႃႈ။

၂၀ ၵူၼ်းတင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်ၵိၼ်ဢိမ်ႇယဝ်ႉၸင်ႇၶိုၼ်းၵဵပ်းသိမ်းဢဝ်ဢၼ်ႁၵ်းဢၼ်ႁိၵ်းဢၼ်ၵိုတ်းဢၼ်ၵျၢၼ်ႇမၼ်းလႆႈတဵမ်သိပ်းသွင်ပဵတ်ႈဢေႃႈ။

၂၁ ၵူၼ်းဢၼ်ၵိၼ်ၸိူဝ်းၼၼ်ႉယင်းဢမ်ႇဢၢၼ်ႇပႃးမႄႈယိင်းတင်းလုၵ်ႈဢွၼ်ႇမီးၵူၼ်းၸၢႆးႁႃႈႁဵင်ၸမ်ၸမ်ဢေႃႈ။

ၸဝ်ႈယေႇသုပႆၵႂႃႇၼိူဝ်ၼမ်ႉၼွင်

၂၂ မိူဝ်ႈဢၼ်ႁႂ်ႈၵူၼ်းၸူႉၵူၼ်းတုမ်ၸိူဝ်းၼၼ်ႉၵႂႃႇယဝ်ႉၼၼ်ႉၸိုင်မၼ်းၸဝ်ႈႁႂ်ႈတပႄးၸဝ်ႈတင်းလၢႆၶီႇႁိူဝ်းၶၢမ်ႈၵႂႃႇၽင်ႇၼမ်ႉၽၢႆႇပုၼ်ႉဢွၼ်တၢင်းမၼ်းၸဝ်ႈဢေႃႈ။ လိုၼ်းၼၼ်ႉမၼ်းၸဝ်ႈၶိုၼ်ႈၵႂႃႇၵႃႈၼိူဝ်လွႆတီႈဢၼ်ဢမ်ႇမီးၵူၼ်းၼၼ်ႉသေယဝ်ႉသူးတွင်းႁဵတ်းပထၼႃႇဢေႃႈ။

၂၃ မိူဝ်ႈဢၼ်ႁွတ်ႈထိုင်ၶိင်ႇၵၢင်ၶိုၼ်းၼၼ်ႉမၼ်းၸဝ်ႈမီးယူႇပႃးလဵဝ်ၵူၺ်းဢေႃႈ။ ႁိူဝ်းတပႄးၸဝ်ႈၸိူဝ်းၼၼ်ႉၸမ်းမီးယူႇၵႃႈၼႂ်းၵၢင်ၼမ်ႉၼွင်ဢေႃႈ။

၂၄ ၵွပ်ႈပိူဝ်ႈလူမ်းဢမ်ႇထုၵ်ႇလႄႈႁိူဝ်းၶဝ်လႆႈၶၢမ်ႇတၢင်းဢၼ်လႅင်းၼမ်ႉပိူပ်ႇၼမ်ႉၶွၼ်းၶႅၼ်းလွၵ်းလႅၵ်းၼႃႇလူင်လၢင်ဢေႃႈ။

၂၅ ၵၢင်ၶိုၼ်းၶိင်ႇဢၼ်ႁႆႇသၢမ်မွင်းလိူဝ်လိူဝ်ၼၼ်ႉမၼ်းၸဝ်ႈပႆၵႂႃႇၵႃႈၼိူဝ်ၼမ်ႉၼွင်ၵႂႃႇၸူးၵႃႈတီႈဢၼ်တပႄးၸဝ်ႈတင်းလၢႆမီးၼၼ်ႉဢေႃႈ။

၂၆ မိူဝ်ႈဢၼ်တပႄးၸဝ်ႈတင်းလၢႆႁၼ်မၼ်းၸဝ်ႈပႆယူႇၵႃႈၼိူဝ်ၼမ်ႉၼွင်ၼၼ်ႉၶဝ်တူၵ်းၸႂ်လႄႈဝႃႈ၊-ပဵၼ်ၽဵတ်ႇဢေႃႈ၊ဝႃႈၼင်ႇၼႆလႄႈမီးၸႂ်ဢၼ်ၵူဝ်ၼႃႇလႄႈႁွင်ႉသႅၼ်ႇဢေႃႈ။

၂၇ ၸဝ်ႈယေႇသုၵေႃႈတၵ်ႉလၢတ်ႈၶဝ်ၵမ်းလဵဝ်လႄႈဝႃႈ၊-မီးတၢင်းဢၼ်ႁတ်းႁၢၼ်တႃႉ။ ပဵၼ်ၵဝ်ဢေႃႈ။ ယႃႇပေၵူဝ်ပေႁႄ၊ဝႃႈၼင်ႇၼႆဢေႃႈ။

၂၈ ပေႇတရုၵေႃႈလဝ်လၢတ်ႈလႄႈဝႃႈ၊-ၸဝ်ႈႁဝ်း၊ပေႃးပဵၼ်ၸဝ်ႈႁဝ်းတႄႉၸိုင်ၸဝ်ႈႁဝ်းပၼ်ဢမိင်ႉႁႂ်ႈၵဝ်ၶႃႈလႆႈပႆၵႃႈၼိူဝ်ၼမ်ႉၼွင်ၵႂႃႇၸူးၵႃႈတီႈၸဝ်ႈႁဝ်းသေၵမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈလၢတ်ႈလႄႈဝႃႈ၊-မႃးတႃႉ၊ဝႃႈၼင်ႇၼႆဢေႃႈ။

၂၉ ပေႇတရုၵေႃႈလူင်းသေၵႃႈၼိူဝ်ႁိူဝ်းသေယဝ်ႉပႆၵႂႃႇၵႃႈၼိူဝ်ၼမ်ႉၼွင်ႁႂ်ႈလႆႈႁွတ်ႈထိုင်ၵႃႈတီႈၸဝ်ႈယေႇသုၼၼ်ႉဢေႃႈ။

၃၀ မိူဝ်ႈဢၼ်မၼ်းႁၼ်လူမ်းႁႅင်းယႂ်ႇၼႃႇလူင်လၢင်ၼၼ်ႉမၼ်းမီးၸႂ်ဢၼ်ၵူဝ်မႃးဢေႃႈ။ ၶိင်ႇၼၼ်ႉၵမ်းလဵဝ်မၼ်းၸႃႉငႃတၵ်းၸူမ်တူၵ်းၵႂႃႇၵႃႈၼႂ်းၼမ်ႉၼၼ်ႉလႄႈမၼ်းႁွင်ႉသႅၼ်ႇဝႃႈ၊-

၃၁ ၶႅၼ်းတေႃႈၵႄႇသႄႇဢဝ်ၵဝ်ၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။ ၸဝ်ႈယေႇသုၵေႃႈယိုၼ်ႈမိုဝ်းမၼ်းၸဝ်ႈၵမ်းလဵဝ်သေယဝ်ႉယိပ်းၵမ်ဢဝ်မၼ်းယဝ်ႉၸင်ႇလၢတ်ႈလႄႈဝႃႈ၊-

၃၂ ၵေႃႉဢၼ်ယုမ်ႇမၢတ်ႈၵေႇၼႆႉဢိူၺ်း၊ႁဵတ်းသင်လႄႈယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈၸိူဝ်ႉၼင်ႇၼႆ၊ဝႃႈၼႆဢေႃႈ။ မိူဝ်ႈဢၼ်မၼ်းၸဝ်ႈႁွတ်ႈထိုင်ၵႃႈၼိူဝ်ႁိူဝ်းၼၼ်ႉလူမ်းထၢတ်ႇယဵၼ်ၵႂႃႇဢေႃႈ။

၃၃ ၶဝ်ၸိူဝ်းဢၼ်မီးယူႇၵႃႈၼႂ်းႁိူဝ်းၼၼ်ႉသုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈၶုပ်ႉမူပ်ႇလဝ်လၢတ်ႈလႄႈဝႃႈ၊-ၸဝ်ႈႁဝ်းၼႆႉပဵၼ်လုၵ်ႈၽြႃးပဵၼ်ၸဝ်ႈဢမၢၼ်ႇၶၼ်ပဵၼ်ၶႃႈဢေႃႈ၊ဝႃႈၼင်ႇၼႆဢေႃႈ။

၃၄ ၶဝ်ၼၼ်ႉၶၢမ်ႈၵႂႃႇၵႃႈတီႈၽင်ႇၼမ်ႉၽၢႆႇပုၼ်ႉသေယဝ်ႉႁွတ်ႈထိုင်ၵႃႈတီႈမိူင်းၵိၼ်ႇၼီႇသႃႇရိတ်ႉဢေႃႈ။

၃၅ ၵူၼ်းဢၼ်ယူႇၵႃႈတီႈၼၼ်ႉတင်းလၢႆမိူဝ်ႈဢၼ်ႁူႉပဵၼ်မၼ်းၸဝ်ႈၼၼ်ႉၸိုင်ၶဝ်ပွႆႇၸႂ်ႉၵူၼ်းၵႂႃႇၵႃႈတီႈႁိမ်းႁွမ်းၸိူဝ်းၼၼ်ႉၵူႈတီႈၵူႈလႅၼ်သေယဝ်ႉဢဝ်ၵူၼ်းၶႆႈၵူၼ်းပဵၼ်ၵႃႈမီးတင်းသဵင်ႈတင်းလူင်မႃးတီႈမၼ်းၸဝ်ႈလႄႈဢွၼ်ၵၼ်ယွၼ်းဢၶႂၢင်ႉႁႂ်ႈၶဝ်လႆႈတိူဝ်ႉလႆႈယိပ်းပူးၶူဝ်းမၼ်းၸဝ်ႈၼၼ်ႉၵူၺ်းဢေႃႈ။

၃၆ ၵူၼ်းၶႆႈၵူၼ်းပဵၼ်ဢၼ်လႆႈတိူဝ်ႉလႆႈယိပ်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉလႆႈႁၢႆၶႅၼ်းဢေႃႈ။

ထမ်ႇမ ၵျၢမ်းၵဝ်ႇ

ၵျၢမ်းငဝ်ႈၵမ်ႇၽႃႇ ၵျၢမ်းဢၼ်ဢွၵ်ႇၵွႃႇ ၵျၢမ်းဢၼ်ႁဵတ်းဝၢတ်ႈ

ၵျၢမ်းဢၼ်ယူႇၼႂ်းထိူၼ်ႇ ၵျၢမ်းဢၼ်ႁေႃးတြႃး လိၵ်ႈမၢတ်ႈလွင်ႈယေႃးသု

လိၵ်ႈမၢတ်ႈလွင်ႈၵူၼ်းလူင်ဢၼ်ၸီႇယၢင်ႇတြႃး ဝုတ်ႉထုရုထ

ထမ်ႇမႃႉရႃႇၸဝၢင်ႇၽိုၼ်ပထမ ထမ်ႇမႃႉရႃႇၸဝၢင်ႇၽိုၼ်တုတိယ

ထမ်ႇမႃႉရႃႇၸဝၢင်ႇၽိုၼ်တတိယ ထမ်ႇမႃႉရႃႇၸဝၢင်ႇၽိုၼ်ၸတုၵ်ႉထ

ရႃႇၸဝၢင်ႇၶျူၵ်ႉၽိုၼ်ပထမ ရႃႇၸဝၢင်ႇၶျူၵ်ႉၽိုၼ်တုတိယ

လိၵ်ႈမၢတ်ႈလွင်ႈဢေႇၸရ လိၵ်ႈမၢတ်ႈလွင်ႈၼေႇႁမိ ဝုတ်ႉထုဢေးသတႃႇ

ဝုတ်ႉထုယေႃႇၽ ၵျၢမ်းသႃႇလၢမ်ႇ ၵျၢမ်းလိၵ်ႈသုၵ်ႉတၢမ်ႇ ၵျၢမ်းလိၵ်ႈတေႇသၼႃႇ

လိၵ်ႈႁဵတ်းၵႂၢမ်းသေႃးလမုၼ်ႇ ၵျၢမ်းဢၼႃႇၵၢတ်ႈတိဢိသႃႇယ

ၵျၢမ်းဢၼႃႇၵၢတ်ႈတိယေႇရမိ တၢင်းဢၼ်ယေႇရမိပွင်ႉၶင်းပွင်ႉဝႃႈ