Shan Missions

ၵျၢမ်းငဝ်ႈၵမ်ႇၽႃႇ

၁   ၂   ၃   ၄   ၅   ၆   ၇   ၈   ၉   ၁၀   ၁၁   ၁၂   ၁၃   ၁၄   ၁၅   ၁၆   ၁၇   ၁၈   ၁၉   ၂၀   ၂၁   ၂၂   ၂၃   ၂၄   ၂၅   ၂၆   ၂၇   ၂၈   ၂၉

၃၀   ၃၁   ၃၂   ၃၃   ၃၄   ၃၅   ၃၆   ၃၇   ၃၈   ၃၉   ၄၀   ၄၁   ၄၂   ၄၃   ၄၄   ၄၅   ၄၆   ၄၇   ၄၈   ၄၉   ၅၀   

၄၇

၁ မိူဝ်ႈၼၼ်ႉ ယုဝ်းသႅပ်ႉ ၶဝ်ႈၸူးၵႃႈတီႈၶုၼ်ႁေႃၶမ်းၽႃႇရေႃး လႄႈလဝ်ႈလၢတ်ႈဝႃႈ၊-ပေႃႈၶႃႈၸဝ်ႈဢိၵ်ႇတင်းပီႈဢၢႆႈၶႃႈၸဝ်ႈတင်းလၢႆ ပႃးဢဝ်တင်းၽုင်သူဝ်းၽုင်ဝူဝ်းဢိၵ်ႇတင်း ၵႃႈဢၼ်ၶဝ်မီးတင်းသဵင်ႈတင်းလူင်ၼၼ်ႉသေလႄႈ လုၵ်ႉသေၵႃႈတီႈ မိူင်းၶႃႇၼၼ်ႇပုၼ်ႉႁွတ်ႈမႃးလႄႈမီးယူၵႃႈတီႈမိူင်းၵေႃႇသိၼ်ႇ တီႈၶႃႈ ဢေႃႈ၊ဝႃႈၼင်ႇၼႆသေယဝ်ႉ၊

၂ လိူၵ်ႈၵဵပ်းဢဝ်ႁႃႈၵေႃႉၵႃႈၼႂ်းပီႈဢၢႆႈမၼ်း တင်းသဵင်ႈတင်းလူင်ၸိူဝ်းၼၼ်ႉသေလႄႈ သႂၢင်းၶဝ်ႈၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃး ဢေႃႈ။

၃ ၶုၼ်ႁေႃၶမ်းၽႃႇရေႃး ၵေႃႈထၢမ်တီႈပီႈၼွင်ႉမၼ်းၸိူဝ်းၼၼ်ႉလႄႈဝႃႈ၊-သူၸၢင်ႊသၢင်ႈႁဵတ်းၵၢၼ်ငၢၼ်းၵႃႈသင်၊ မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၵေႃႈလဝ်ႈလၢတ်ႈတီႈၶုၼ်ႁေႃၶမ်းၽႃႇရေႃးလႄႈဝႃႈ၊- ၶႃႈၸဝ်ႈႁဝ်းၶဝ်ဢိၵ်ႇတင်း ပူႇမွၼ်ႇၶႃႈၸဝ်ႈႁဝ်းၶဝ်ၸိူဝ်းၼႆႉၼၼ်ႉ ပဵၼ်ၵူၼ်းဢၼ်လဵင်ႉသူဝ်းထိင်းသူဝ်းတီႈၶႃႈ ဢေႃႈ၊ဝႃႈၼင်ႇၼႆဢေႃႈ။

၄ ၶဝ်သမ်ႉလဝ်ႈလၢတ်ႈတီႈၶုၼ်ႁေႃၶမ်းၽႃႇရေႃးထႅင်ႈလႄႈဝႃႈ၊- ပိူဝ်ႈဢၼ်ၵႃႈတီႈမိူင်းၶႃႇၼၼ်ႇ ပုၼ်ႉၶဝ်ႈၵႃႊမၢၵ်ႇပႅင်းၼႃႇလူင်လၢင်လႄႈ ဢမ်ႇမီးပုၼ်ႈဢၼ်ၽုင်သူဝ်းၽုင်ဝူဝ်းတၵ်းၵိၼ်ၼၼ်ႉလႄႈ ၶႃႈၸဝ်ႈႁဝ်းၸိူဝ်းၼႆႉၸင်ႇဢွၼ်ၵၼ်မႃးႁႂ်ႈလႆႈသွၼ်ႈပိုင်ႈၵႃႈၼႂ်းမိူင်းၸဝ်ႈၼႆႉ တီႈၶႃႈယဝ်ႉဢေႃႈ။ပိူဝ်ႈၼႆလႄႈ ၶႅၼ်းတေႃႈပၼ်ဢၶႂၢင်ႉႁႂ်ႈၶႃႈၸဝ်ႈႁဝ်းၶဝ်ၸိူဝ်းၼႆႉလႆႈယူႇၵႃႈၼႂ်းမိူင်းၵေႃႇသိၼ်ႇ သေၵမ်းတီႈ ၶႃႈ၊ဝႃႈၼင်ႇၼႆဢေႃႈ။

၅ ၶုၼ်ႁေႃၶမ်းၽႃႇရေႃးၵေႃႈလၢတ်ႈတီႈယုဝ်းသႅပ်ႉလႄႈဝႃႈ၊-ပေႃႈမႂ်းဢိၵ်ႇတင်းပီႈ ဢၢႆႈမႂ်းတင်းလၢႆႁွတ်ႈမႃးၵႃႈတီႈမႂ်းယဝ်ႉ။

၆ မိူင်းဢေႇၵႅပ်ႉတု မီးယူႇၵႃႈတီႈၽၢႆႇၼႃႈမႂ်းဢေႃႈ။ႁႂ်ႈပေႃႈမႂ်းဢိၵ်ႇတင်းပီႈဢၢႆႈမႂ်းၸိူဝ်းၼၼ်ႉ လိူၵ်ႈၵဵပ်းဢဝ်တီႈဢၼ်လိၼ်လီသေပိူၼ်ႈလႄႈ ၶျႃးတီႈယူႇပၼ်ၵႃႈတီႈမိူင်းၵေႃႇသိၼ်ႇပုၼ်ႉတႃႉ။ ပေႃးမႂ်းႁူႉလွင်ႈဢၼ်ၵႃႈၼႂ်းၶဝ်ၼၼ်ႉမီးၵေႃႉဢၼ် ၸၢင်ႊမေႃလၵ်းလႅမ်ၵမ်ႈၽွင်ႈၸိုင်ၶၢၼ်းၶဝ်ဝႆႉၼႂ်းဢရႃႇၵေႃႉဢၼ်ဢုပ်ႉၵႃႈၼိူဝ်ၽုင်တရိၵ်ႈသၢၼ်ႇၵဝ်တႃႉ၊ ဝႃႈၼင်ႇၼႆဢေႃႈ။

ရ ယုဝ်းသႅပ်ႉ ဢဝ်ပေႃႈမၼ်းယႃႇၵုပ်ႉ ၼၼ်ႉမႃးသႂၢင်းၶဝ်ႈလႄႈဝႆႈၵႃႈတီႈၽၢႆႇၼႃႈၶုၼ်ႁေႃၶမ်းၽႃႇရေႃး လႄႈယႃႇၵုပ်ႉ ၵေႃႈပၼ်တၢင်းလီတီႈၶုၼ်ႁေႃၶမ်းၽႃႇရေႃး ဢေႃႈ။

၈ ၶုၼ်ႁေႃၶမ်းၽႃႇရေႃးထၢမ်တီႈယႃႇၵုပ်ႉ လႄႈဝႃႈ၊-မိူဝ်ႉဝၼ်းၶူပ်ႇၼီႈပီႊမိူင်းဢသၢၵ်ႈမႂ်းလႆႈၼမ်လႂ်ယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊ယႃႇၵုပ်ႉ လဝ်ႈလၢတ်ႈတီႈၶုၼ်ႁေႃၶမ်းၽႃႇရေႃးလႄႈဝႃႈ၊-

၉ မိူဝ်ႉဝၼ်းဢသၢၵ်ႈဢၼ်ၶႃႈၸဝ်ႈလႆႈပဵၼ်ၶႅၵ်ႇဢႃႇၵၼ်ႇတူႉလႄႈ ပူၼ်ႉမႃးယဝ်ႉၼၼ်ႉ လႆႈပၢၵ်ႇပၢႆသၢမ်သိပ်းပီႊမိူင်းတီႈၶႃႈယဝ်ႉ။မိူဝ်ႉဝၼ်းၶူပ်ႇၼီႈပီႊမိူင်း ဢၼ်ၶႃႈၸဝ်ႈဢသၢၵ်ႈလိပ်းမႃးယဝ်ႉၼၼ်ႉၵေႇၼႃႈလႄႈ ႁၢႆႉမိူၵ်ႈတီႈၶႃႈဢေႃႈ။ဢမ်ႇၶိုတ်း မိူဝ်ႉဝၼ်းပီႊမိူင်းဢသၢၵ်ႈပူႇမွၼ်ႇၶႃႈၸဝ်ႈဢၼ်ဝႃႈမိူဝ်ႉဝၼ်း ဢၼ်ၶဝ်ပဵၼ်ၶႅၵ်ႇဢႃႇၵၼ်ႇတူႉၼၼ်ႉ တီႈၶႃႈ၊ဝႃႈၼင်ႇၼႆသေယဝ်ႉ

၁၀ ယႃႇၵုပ်ႉ ပၼ်တၢင်းလီတီႈၶုၼ်ႁေႃၶမ်းၽႃႇရေႃးလႄႈ ဢွၵ်ႇသေၵႃႈတီႈၶုၼ်ႁေႃၶမ်းၽႃႇရေႃး ၼၼ်ႉၵွႃႇသေဢေႃႈ။

၁၁ ယုဝ်းသႅပ်ႉ ဢဝ်ပေႃႈမၼ်းဢိၵ်ႇတင်းပီႈၼွင်ႉမၼ်းၸိူဝ်းၼၼ်ႉၶျႃးတီႈယူႇလႄႈပၼ်ၶဝ်လႆႈပိူင်ႇၵႃႈၼႂ်းမိူင်းဢေႇၵႅပ်ႉတု ၵႃႈတီႈဢၼ်လီသေပိူၼ်ႈဢၼ်ဝႃႈၵႃႈၼႂ်းလိၼ် ရႃႇမသိတ်ႉ ၸွမ်းၵႃႈၼင်ႇဢၼ်ၶုၼ်ႁေႃၶမ်း ၽႃႇရေႃး မီးဢမိင်ႉၼၼ်ႉဢေႃႈ။

၁၂ ယုဝ်းသႅပ်ႉ ဢဝ်တၢင်းၵိၼ်တၢင်းၶူပ်းလဵင်ႉလူပေႃႈမၼ်း ဢိၵ်ႇတင်းပီႈၼွင်ႉမၼ်းတင်းလၢႆ တင်းၵူၼ်းႁိူၼ်းၵူၼ်းယေးပေႃႈမၼ်းၸိူဝ်းၼၼ်ႉ ၸွမ်းၵႃႈၼင်ႇဢၼ် ၶဝ်မီးလုၵ်ႈဢွၼ်ႇလၢင်းဢွၼ်ႇၼၼ်ႉဢေႃႈ။

ယႃႇၵုပ်ႉတင်းတၢင်းဢၼ်ပဵၼ်ၶဝ်ႈၵႃႊမၢၵ်ႇပႅင်း

၁၃ ၵႃႈၼႂ်းမိူင်းၼၼ်ႉၵူႈတီႈၵူႈလႅၼ် ဢမ်ႇမီးတၢင်းၵိၼ်တၢင်းၶူပ်းလႃးလႃး။လွင်ႈမၼ်းၸမ်းပဵၼ်တၢင်းဢၼ်ၶဝ်ႈၵႃႊမၢၵ်ႇပႅင်းၼႃႇလူင်လၢင်ထၢၼ်ႈပေႃး မိူင်းဢေႇၵႅပ်ႉတုဢိၵ်ႇတင်းမိူင်းၶႃႇၼၼ်ႇ ၸိူဝ်းၼၼ်ႉႁႅင်းလႆႈဢူၼ်ႈၵွႃႇ ၵွပ်ႈပိူဝ်ႈတၢင်းဢၼ်ပဵၼ်ၶဝ်ႈၵႃႊမၢၵ်ႇပႅင်း ၼၼ်ႉဢေႃႈ။

၁၄ ယုဝ်းသႅပ်ႉ သိမ်းဢဝ်ငိုၼ်းၵႃႈဢၼ်မီးၵႃႈၼႂ်းမိူင်းဢေႇၵႅပ်ႉတု ဢိၵ်ႇတင်းမိူင်းၶႃႇၼၼ်ႇ ဢၼ်ပဵၼ်ၵႃႊၶဝ်ႈၵျုင်ႇ ဢၼ်သိုဝ်ႉဢဝ်ၼၼ်ႉဝႆႉလႄႈသႂၢင်း ၶဝ်ႈၵႃႈၼႂ်းႁေႃၶမ်းၽႃႇရေႃး ဢေႃႈ။

၁၅ မိူဝ်ႈဢၼ်ငိုၼ်းၵႃႈတီႈမိူင်းဢေႇၵႅပ်ႉတု ဢိၵ်ႇတင်းမိူင်းၶႃႇၼၼ်ႇၼၼ်ႉသဵင်ႈယဝ်ႉၸိုင်၊ၵူၼ်းဢေႇၵႅပ်ႉတု တင်းသဵင်ႈတင်းလူင်ဢွၼ်ၵၼ်မႃးၵႃႈတီႈယုဝ်းသႅပ်ႉ လႄႈ လဝ်ႈလၢတ်ႈလႄႈဝႃႈ၊-ၶႅၼ်းတေႃႈပၼ်တၢင်းၵိၼ်သေၵမ်းတီႈၶႃႈ။ၶႃႈၸဝ်ႈႁဝ်းၶဝ်ၸိူဝ်းၼႆႉ ပိူဝ်ႈဢၼ်ငိုၼ်းမူတ်းၵွႃႇသဵင်ႈၵွႃႇယဝ်ႉလႄႈ တၵ်းလႆႈတၢႆၵႃႈတီႈၽၢႆႇၼႃႈၸဝ်ႈႁဝ်း ၸိူဝ်ႉၼင်ႇႁိုဝ်တီႈၶႃႈ၊မိူဝ်ႈဢၼ်ဝႃႈၼင်ႇၼႆၸိုင်ယုဝ်းသႅပ်ႉ ၵေႃႈလၢတ်ႈလႄႈဝႃႈ၊-

၁၆ ဢွၼ်ၵၼ်ဢဝ်တရိၵ်ႈသၢၼ်ႇသူပၼ်တႃႉ။ ပေႃးငိုၼ်းသဵင်ႈယဝ်ႉၸိုင်ၵဝ်တၵ်းပၼ်တၢင်းၵိၼ်တၢင်းၶူပ်းပုၼ်ႈၵႃႊၶၼ်တရိၵ်ႈသၢၼ်ႇသူၸိူဝ်းၼၼ်ႉဢေႃႈ၊ ဝႃႈၼင်ႇၼႆလႄႈ၊

၁၇ ၶဝ်ၼၼ်ႉဢဝ်တရိၵ်ႈသၢၼ်ႇၶဝ်မႃးတီႈယုဝ်းသႅပ်ႉ လႄႈယုဝ်းသႅပ်ႉ ၵေႃႈပၼ်တၢင်းၵိၼ်တၢင်းၶူပ်းပုၼ်ႈၵႃႊၶၼ်မႃႉ၊ၽုင်သူဝ်း၊ၽုင်ဝူဝ်း၊မႃႉလီႈၶဝ်ၼၼ်ႉလႄႈ ပီႊၼၼ်ႉဢဝ်တၢင်းၵိၼ်တၢင်းၶူပ်းပုၼ်ႈ ၵႃႊၶၼ်တရိၵ်ႈသၢၼ်ႇၶဝ်ၵႃႈမီးတင်းသဵင်ႈတင်းလူင်ၼၼ်ႉ လဵင်ႉလူၶဝ်ဢေႃႈ။

၁၈ ပီႊၼၼ်ႉသဵင်ႈသေယဝ်ႉၼႂ်းပီႊတုတိယၼၼ်ႉ ၶဝ်ဢွၼ်ၵၼ်မႃးတီႈမၼ်းလႄႈလဝ်ႈလၢတ်ႈဝႃႈ၊-ၶႃႈၸဝ်ႈႁဝ်းၸိူဝ်းၼႆႉ ဢမ်ႇထိမ်ႇဢမ်ႇမႅပ်းလွင်ႈဢၼ်ငိုၼ်းၶႃႈၸဝ်ႈႁဝ်းၸိူဝ်းၼႆႉသဵင်ႈယဝ်ႉမူတ်းယဝ်ႉ ဢိၵ်ႇတင်းလွင်ႈဢၼ်ၸဝ်ႈႁဝ်းလႆႈ ၽုင်တရိၵ်ႈသၢၼ်ႇၶႃႈၸဝ်ႈႁဝ်းၸိူဝ်းၼႆႉယဝ်ႉၼၼ်ႉၵႃႈတီႈၽၢႆႇၼႃႈၸဝ်ႈႁဝ်ႈတီႈၶႃႈ။လိူဝ်သေတူဝ်တင်းၵႂၢၵ်ႈလိၼ်ၶႃႈၸဝ်ႈႁဝ်းၸိူဝ်းၼႆႉ ဢမ်ႇၵိုတ်းဢမ်ႇၵျၢၼ်ႇၵႃႈသင်ဝႆႉၵႃႈတီႈၽၢႆႇၼႃႈၸဝ်ႈႁဝ်း တီႈ ၶႃႈယဝ်ႉ။

၁၉ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၶႃႈၸဝ်ႈႁဝ်းၸိူဝ်းၼႆႉ တၵ်းလႆႈတၢႆသိုဝ်ႈၼႃႈတႂ်ႈတႃၸဝ်ႈႁဝ်းလႄႈၵႂၢၵ်ႈလိၼ်ၶႃႈၸဝ်ႈႁဝ်းၸိူဝ်းၼႆႉ တၵ်းလႆႈလူႉလႆႈလႅဝ်ၸိူဝ်ႉၼင်ႇႁိုဝ်တီႈၶႃႈ။ၶႅၼ်းတေႃႈပၼ်တၢင်းၵိၼ်တၢင်းၶူပ်းလႄႈ သိုဝ်ႉဢဝ်ၶႃႈၸဝ်ႈႁဝ်းၸိူဝ်းၼႆႉဢိၵ်ႇတင်းၵႂၢၵ်ႈလိၼ်ၶႃႈၸဝ်ႈႁဝ်းၸိူဝ်းၼႆႉသေၵမ်းတီႈၶႃႈ။ ၶႃႈၸဝ်ႈႁဝ်းၸိူဝ်းၼႆႉ တင်းၵႂၢၵ်ႈလိၼ်ၶႃႈၸဝ်ႈႁဝ်းၸိူဝ်းၼႆႉတၵ်းၶၢမ်ႇႁဵတ်းၶႃႈတီႈၶုၼ်ႁေႃၶမ်းၽႃႇရေႃး တီႈ ၶႃႈဢေႃႈ။

၂၀ လွင်ႈၼင်ႇႁိုဝ်ၶႃႈၸဝ်ႈႁဝ်းၸိူဝ်းၼႆႉတၵ်းဢမ်ႇလႆႈတၢႆလႄႈ ဢသၢၵ်ႈလိပ်းယူႇဢိၵ်ႇတင်းလွင်ႈၼင်ႇႁိုဝ်မိူင်းၸဝ်ႈႁဝ်း တၵ်းဢမ်ႇလႆႈပဵၼ်တီႈဢၼ်သိတ်ႇဢၼ်ယဵၼ်ၸိုင် ၶႅၼ်းတေႃႈပၼ်ၸိူဝ်ႉပၼ်ၽၼ်းသေၵမ်းတီႈၶႃႈ၊ဝႃႈၼင်ႇၼႆသေယဝ်ႉ၊ ယုဝ်းသႅပ်ႉ သိုဝ်ႉဢဝ်ၵႂၢၵ်ႈလိၼ်ၵႃႈၼႂ်းမိူင်းဢေႇၵႅပ်ႉတု တင်းသဵင်ႈတင်းလူင်ၼၼ်ႉပုၼ်ႈၶုၼ်ႁေႃၶမ်းၽႃႇရေႃး ဢေႃႈ။ၵူၼ်းမိူင်းဢေႇၵႅပ်ႉတု ဢွၼ်ၵၼ်ၶၢႆၵႂၢၵ်ႈလိၼ်ဢၼ်ၶဝ်ပိူင်ႇႁင်းၽႂ်ႁင်းမၼ်း ၵွပ်ႈပိူဝ်ႈတၢင်းဢၼ်ၶဝ်ႈၵႃႊမၢၵ်ႇပႅင်းယႂ်ႇၼႃႇၶိုၵ်ႉၼႃႇတီႈၶဝ်ၼၼ်ႉလႄႈ လိၼ်ၸိူဝ်းၼၼ်ႉလႆႈပဵၼ်ၽၼ်ႇတႃႇၶုၼ်ႁေႃၶမ်းၽႃႇရေႃးဢေႃႈ။

၂၁ ၵူၼ်းတင်းလၢႆၸမ်း မၼ်းႁႂ်ႈလုၵ်ႉသေၵႃႈတီႈႁိမ်းလႅၼ်လိၼ်မိူင်းဢေႇၵႅပ်ႉတု ၸႃႉၸဵမ်ၽၢႆႇၼိုင်ႈတေႃႇထိုင်ႁွတ်ႈၽၢႆႇၼိုင်ႈဢွၼ်ၵၼ်ၶၢႆႉတီႈယူႇ ၵႃႈတီႈၼႂ်းဝဵင်းတင်းလၢႆဢေႃႈ။လိၼ်ဢၼ်ယိၸ်ႉပရေႃႇႁိၵ်ႈတင်းလၢႆ ပိူင်ႇၸမ်းမၼ်းဢမ်ႇသိုဝ်ႉဢမ်ႇဢဝ်။

၂၂ ယိၸ်ႉပရေႃးႁိၵ်ႈၸိူဝ်းၼၼ်ႉဢွၼ်ၵၼ်လႆႈပုၼ်ႈလႆႈတႃႇတီႈ ၶုၼ်ႁေႃၶမ်းၽႃႇရေႃး လႄႈ ၵိၼ်ပုၼ်ႈၵိၼ်တႃႇဢၼ်ၶုၼ်ႁေႃၶမ်းၽႃႇရေႃးပၼ်တီႈၶဝ်ၼၼ်ႉဢေႃႈ။ ပိူဝ်ႈၼႆလႄႈ ၶဝ်ဢမ်ႇလႆႈၶၢႆၵႂၢၵ်ႈလိၼ်ၶဝ်ၼၼ်ႉ။

၂၃ ယုဝ်းသႅပ်ႉ ၵေႃႈလၢတ်ႈတီႈၵူၼ်းမိူင်းတင်းလၢႆလႄႈဝႃႈ၊-ဝၼ်းမိူဝ်ႈၼႆႉၵဝ်သိုဝ်ႉဢဝ်တူဝ်သူတင်းလိၼ်သူပုၼ်ႈၶုၼ်ႁေႃၶမ်း ၽႃႇရေႃး ယဝ်ႉ။

၂၄ ဢဝ်ၸိူဝ်ႉဢဝ်ၽၼ်းဢၼ်မီးၵႃႈတီႈၼႆႉလႄႈ ႁဵတ်းႁႆႊႁဵတ်းၼႃးတႃႉ၊ မိူဝ်ႈဢၼ်လႆႈသိမ်းမၢၵ်ႇသိမ်းႁူင်းၼၼ်ႉၸိုင် တၵ်းလႆႈဢဝ်ႁႃႈပုၼ်ႊပုၼ်ႊၼိုင်ႈသၢၵ်ႈတီႈၶုၼ်ႁေႃၶမ်းၽႃႇရေႃး ဢေႃႈ။သီႇပုၼ်ႈၸမ်း တၵ်းလႆႈပဵၼ်တီႈဢၼ်သူပိူင်ႇ ပုၼ်ႈဢၼ်သူတၵ်းလႆႈႁဵတ်း တၢင်းဢၼ်ဝၢၼ်ႇၸိူဝ်ႉဝၢၼ်ႇၽၼ်းၵႃႈၼႂ်းႁႆႊၼႂ်းၼႃး၊ တင်းဢၼ်သူၵိၼ်သူၶူပ်းဢိၵ်ႇတင်းတၢင်းဢၼ်သူလဵင်ႉလူၵူၼ်းႁိူၼ်းၵူၼ်းယေးသူတင်းလုၵ်ႈဢွၼ်ႇလၢင်းဢွၼ်ႇသူၸိူဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။

၂၅ ၶဝ်ၼၼ်ႉၵေႃႈလဝ်ႈလၢတ်ႈလႄႈဝႃႈ၊-ၸဝ်ႈႁဝ်းၵႄႇသေႇဢသၢၵ်ႈၶႃႈၸဝ်ႈႁဝ်းၸိူဝ်းၼႆႉ တီႈၶႃႈယဝ်ႉ။ ၶႅၼ်းတေႃႈႁႂ်ႈၶႃႈၸဝ်ႈႁဝ်းၸိူဝ်းၼႆႉလႆႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈႁဝ်းသေၵမ်းတီႈၶႃႈ။ ၶႃႈၸဝ်ႈၸိူဝ်းၼႆႉ တၵ်းလႆႈဢွၼ်ၵၼ်ပဵၼ်ၶႃႈၶုၼ်ႁေႃ ၶမ်းၽႃႇရေႃး တီႈၶႃႈဢေႃႈ၊ဝႃႈၼင်ႇၼႆဢေႃႈ။

၂၆ ပိူဝ်ႈၼႆလႄႈ လွင်ႈၼင်ႇႁိုဝ်ၶုၼ်ႁေႃၶမ်းၽႃႇရေႃးတၵ်းလႆႈပိူင်ႇႁႃႈပုၼ်ႊပုၼ်ႊၼိုင်ႈၸိုင်၊ယုဝ်းသႅပ်ႉ ၸီႇယၢင်ႇဝႆႉထမ်ႇမႃႉသတ်ႉဢၼ်တႄႇယူႇၵႃႈၼႂ်းမိူင်းဢေႇၵႅပ်ႉတုႁၢၼ်ႉတေႃႇဝၼ်းမိူဝ်ႈၼႆႉဢေႃႈ။ၵူၺ်းၵႃႈၵႂၢၵ်ႈလိၼ်ယိၸ်ႉပရေႃးႁိၵ်ႈၸိူဝ်းၼၼ်ႉၵူၺ်း ၶုၼ်ႁေႃၶမ်းၽႃႇရေႃး ဢမ်ႇလႆႈပိူင်ႇ။

၂၇ ၵူၼ်းဢိသရေႇလ ၸိူဝ်းၼၼ်ႉယူႇၵႃႈၼႂ်းမိူင်းဢေႇၵိပ်ႉတု ၵႃႈတီႈမိူင်းၵေႃႇသိၼ်ႇၼၼ်ႉလႄႈဢွၼ်ၵၼ်ၸၢင်ႊမၢၵ်ႈၸၢင်ႊမီးဢုၵ်ႉၸႃႇၶူဝ်းလဵင်းလႄႈ ၵိူတ်ႇလဵင်ႉလုၵ်ႈလဵင်ႉလၢင်းယႂ်ႇၽႄႈၼမ်ၵိုၼ်းမႃးဢေႃႈ။

၂၈ ယႃႇၵုပ်ႉယူႇၵႃႈတီႈမိူင်းဢေႇၵႅပ်ႉတုသိပ်းပၢႆၸဵတ်းပီႊလႄႈၶူပ်ႇၼီႈပီႊမိူင်းဢသၢၵ်ႈယႃႇၵုပ်ႉ မီးပၢၵ်ႇပၢႆသီႇ သိပ်းပၢႆၸဵတ်းပီႊဢေႃႈ။

၂၉ ဢိသရေႇလ ၼၼ်ႉမိူဝ်ႈဢၼ်ၶိင်ႇဢၼ် မၼ်းတၵ်းလႆႈတၢႆၼၼ်ႉၸမ်မႃးၼၼ်ႉၸိုင်မၼ်းႁွင်ႉဢဝ်ယုဝ်းသႅပ်ႉ လုၵ်ႈၸၢႆးမၼ်းလႄႈလၢတ်ႈဝႃႈ၊- ပေႃးၵဝ်လႆႈထူပ်းၵျေးၸူးသိုဝ်ႈၼႂ်ႈတႂ်ႈတႃမႂ်းၸိုင်၊ဢဝ်မိုဝ်းမႂ်းဝႆႉၵႃႈတႂ်ႈၶႃၵဝ်တႃႉ။မီးၵရူႉၼႃႇတင်း သႅတ်ႉၸႃႇသေလႄႈႁဵတ်းတီႈၵဝ်တႃႉ။

၃၀ ယႃႇပေသၢင်းၵျူဝ်ႇၵဝ်ၵႃႈတီႈမိူင်းဢေႇၵႅပ်ႉတုၼႆႉ။မိူဝ်ႈဢၼ်ၵဝ်ၼွၼ်းလူၺ်ႈၵၼ်တင်းပူႇမွၼ်ႇၵဝ်ၸိူဝ်းၼၼ်ႉၸိုင် မႂ်းတၵ်းလႆႈဢဝ်ၵဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတု ၼႆႉၵွႃႇလႄႈ သၢင်းၵျူဝ်ႇၵဝ်ၵႃႈၼႂ်းပႃႇႁဵဝ်ႈၶဝ်ၼၼ်ႉဢေႃႈဝႃႈၼင်ႇၼႆဢေႃႈ။ယုဝ်းသႅပ်ႉၵေႃႈလၢတ်ႈလႄႈဝႃႈ၊-ၵဝ်ၶႃႈတၵ်းႁဵတ်းၸွမ်း ၵႃႈၼင်ႇဢၼ်ပေႃႈႁဝ်းဝႃႈ ၼၼ်ႉၶႃႈဢေႃႈ၊ဝႃႈၼင်ႇၼႆဢေႃႈ။

၃၁ ပေႃႈမၼ်းသမ်ႉၶိုၼ်းလၢတ်ႈလႄႈဝႃႈ၊-ႁဵတ်းတၢင်းဢၼ်ၵိၼ်ႇဢၼ်ဝႃႈတီႈၵဝ်တႃႉ၊မိူဝ်ႈဢၼ်ဝႃႈၼင်ႇၼႆၸိုင် မၼ်းၵေႃႈႁဵတ်းတၢင်းဢၼ်ၵိၼ်ႇဢၼ်ဝႃႈဢေႃႈ။ဢိသရေႇလ ၵေႃႈႁဵတ်းတၢင်းဢၼ်ၵူမ်ႈၵွမ်းႁူဝ် ၵႃႈၼိူဝ်ႁူဝ်တီႈၼွၼ်းမၼ်းဢေႃႈ။