Shan Missions

ၵျၢမ်းၶၢဝ်ႇငၢဝ်းသတၢင်းသိူဝ်းပျေႃႇလုၵႃႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂ ၀    ၂၁    ၂၂    ၂၃    ၂၄   

၁၄ 

ၼႂ်းႁိူၼ်းၽႃႇရိသေး

၁ ဝၼ်းၵမ်သိၼ်ဝၼ်းၼိုင်ႈမိူဝ်ႈဢၼ်မၼ်းၸဝ်ႈၶဝ်ႈၵႃႈၼႂ်းႁိူၼ်းၽႃႇရိသေးဢၼ်ပဵၼ်ဢရႃႇသိၵေႃႉၼိုင်ႈႁႂ်ႈလႆႈၵိၼ်တၢင်းၵိၼ်ၼၼ်ႉၸိုင်ၶဝ်လွမ်တူၺ်းမၼ်းၸဝ်ႈယူႇဢေႃႈ။

၂ ၵူၼ်းဢၼ်ပဵၼ်ၵႂ်လႄႈၽေႃးၼၼ်ႉၵေႃႉၼိုင်ႈမီးယူႇၵႃႈတီႈၽၢႆႇၼႃႈမၼ်းၸဝ်ႈဢေႃႈ။

၃ ၸဝ်ႈယေႇသုထၢမ်ၽႃႇရိသေးတင်းၵူၼ်းမေႃၵျၢမ်းၸိူဝ်းၼၼ်ႉလႄႈဝႃႈ၊-ၼႂ်းဝၼ်းၵမ်သိၼ်ထုၵ်ႇလီႁဵတ်းႁႂ်ႈတၢင်းၶႆႈတၢင်းပဵၼ်ႁၢႆႁိုဝ်၊ဢမ်ႇထုၵ်ႇလီႁဵတ်းႁႂ်ႈႁၢႆႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ၼၼ်ႉယူႇတဵတ်ႇတဵတ်ႇယူႇဢေႃႈ။

၄ မၼ်းၸဝ်ႈဢဝ်ၵေႃႉၼၼ်ႉလႄႈႁဵတ်းႁႂ်ႈတၢင်းၶႆႈတၢင်းပဵၼ်မၼ်းႁၢႆၶႅၼ်းယဝ်ႉၸင်ႇႁႂ်ႈမၼ်းၵႂႃႇသေဢေႃႈ။

၅ တီႈပရိၵ်ႈသၢတ်ႈၵေႃႈမၼ်းၸဝ်ႈထၢမ်လႄႈဝႃႈ၊-ပေႃးမႃႉလီႈသူဝူဝ်းသူတူၵ်းၵႃႈၼႂ်းလုၵ်းၼႂ်းထၢင်ၼႂ်းဝၼ်းၵမ်သိၼ်ၸိုင်ၼႂ်းသူၼႆႉၸွင်ႇတေမီးသေၵေႃႉသေၵူၼ်း

၆ ဢၼ်ဢမ်ႇတိုတ်ႉဢမ်ႇၸၼ်ဢဝ်လႄႈတၵ်းယူႇဝႆႉၸိူဝ်ႉၼႆႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ၼၼ်ႉဢမ်ႇၶိုၼ်းလၢတ်ႈၵႂၢမ်းလႆႈသေၶေႃႈသေၵမ်း။

၇ မိူဝ်ႈဢၼ်မၼ်းၸဝ်ႈႁၼ်ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်ၽိတ်ႈပၢင်းမႃးၼၼ်ႉလိူၵ်ႈဢဝ်တီႈယူႇတီႈၼင်ႈဢၼ်သုင်ဢၼ်မျၢတ်ႈတင်းလၢႆယူႇၼၼ်ႉၸိုင်မၼ်းၸဝ်ႈလၢတ်ႈၵႂၢမ်းဢူႉပမႃႇတီႈၶဝ်ၼၼ်ႉလႄႈဝႃႈၸမ်း၊-မိူဝ်ႈဢၼ်ပိူၼ်ႈၽိတ်ႈပၢင်းမႂ်းၵႂႃႇၵႃႈတီႈပွႆးမင်ႇၵလႃၼၼ်ႉယႃႇပေၵႂႃႇၼင်ႈယူႇၵႃႈတီႈဢၼ်သုင်ဢၼ်မျၢတ်ႈၼၼ်ႉ။

၈ ပေႃးၵႂႃႇၼင်ႈယူႇၸိူဝ်ႉၼင်ႇၼၼ်ၸိုင်မိူဝ်ႈဢၼ်ၵေႃႉဢၼ်ယဵင်ႈၶႅၼ်းမျၢတ်ႈၼႃႇသမေ်းႂႁွတ်ႈမႃးၵႃႈတီႈပွႆးၼၼ်ႉၸဝ်ႈၶႅၵ်ႇဢိၵ်ႇတင်းၵေႃႉၼၼ်ႉတၵ်းမႃးလၢတ်ႈတီႈမႂ်းဝႃႈ၊ၵေႃႉဢူၺ်းပၼ်တီႈယူႇၼႆႉတီႈၵေႃႉၼၼ်ႉတႃႉ၊ဝႃႈၼင်ႇၼႆလႄႈမႂ်းတၵ်းမီးတၢင်းဢၼ်လီဢူၵ်းလီဢၢႆလႄႈလႆႈလူင်းၵႂႃႇၸူးတီႈယူႇဢၼ်တႅမ်ႇၼၼ်ႉဢေႃႈ။

၉ ၵူၺ်းၵႃႈမိူဝ်ႈဢၼ်ပိူၼ်ႈၽိတ်ႈပၢင်းမႂ်းၼၼ်ႉၵႂႃႇလႄႈၼင်ႈယူႇၵႃႈတီႈဢၼ်တႅမ်ႇၼၼ်ႉတႃႉ။

၁၀ ပေႃးၵႂႃႇၼင်ႈယူႇၸိူဝ်ႉၼင်ႇၼၼ်ၸိုင်ၵေႃႉဢၼ်ႁွင်ႉပၢင်းမႂ်းၼၼ်ႉတၵ်းလၢတ်ႈတီႈမႂ်းလႄႈဝႃႈ၊-ၵေႃႉသေႈဢိူၺ်း၊ၶိုၼ်ႈၵႂႃႇၼင်ႈၵႃႈတီႈဢၼ်သုင်ၼၼ်ႉသေၵမ်းၶႃႈ၊ဝႃႈၼင်ႇၼႆလႄႈမႂ်းတၵ်းမီးသရေႇၵႃႈတီႈၽၢႆႇၼႃႈၶဝ်ၸိူဝ်းဢၼ်ၼင်ႈယူႇလူၺ်ႈၵၼ်တင်းမႂ်းၸိူဝ်းၼၼ်ႉဢေႃႈ။

၁၁ ၽူႈလႂ်သေဢမ်ႇဝႃႈၵေႃႉဢၼ်ယုၵ်ႉယွင်ႈတူဝ်ၸဝ်ႈၵဝ်ႇၼၼ်ႉၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ၶျႃးတူၵ်းတီႈတႅမ်ႇဢေႃႈ။ၽူႈလႂ်သေဢမ်ႇဝႃႈၵေႃႉဢၼ်ၶျႃးတႅမ်ႇတူဝ်ၸဝ်ႈၵဝ်ႇၼၼ်ႉၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ယုၵ်ႉယွင်ႈဢေႃႈ၊ဝႃႈၼင်ႇၼႆဢေႃႈ။

၁၂ မၼ်းၸဝ်ႈသမ်ႉလၢတ်ႈတီႈၵေႃႉဢၼ်ႁွင်ႉပၢင်းမၼ်းၸဝ်ႈမႃးၼၼ်ႉလႄႈဝႃႈ၊-မိူဝ်ႈဢၼ်မႂ်းႁဵတ်းလဵင်ႉႁဵတ်းလူၶဝ်ႈၶမ်ႈၼၼ်ႉၸိုင်မႂ်းယႃႇပေၽိတ်ႉပၢင်းၵေႃႉသေႈမႂ်း၊ပီႈၼွင်ႉမႂ်း၊ၸိူဝ်ႉၶိူဝ်းလဵဝ်ၵၼ်တင်းမႂ်း၊ၵူၼ်းႁိူၼ်းၸမ်ၵၼ်တင်းမႂ်းဢၼ်မၢၵ်ႈမီးၸိူဝ်းၼၼ်ႉၵူၺ်း။ပေႃးၽိတ်ႈပၢင်းၶဝ်ၸိုင်ၵမ်းလိုၼ်းၶဝ်ၼၼ်ႉၵေႃႈတၵ်းၶိုၼ်းၽိတ်ႈပၢင်းမႂ်းလႄႈတွပ်ႇတႅၼ်းၶိုၼ်းၵျေးၸူးတီႈမႂ်းဢေႃႈ။

၁၃ မိူဝ်ႈဢၼ်မႂ်းၶၢမ်ႇပွႆးၼၼ်ႉၽိတ်ႈပၢင်းဢဝ်ၶဝ်ၸိူဝ်းဢၼ်ယၢၵ်ႈဢၼ်ၽၢၼ်၊ၶဝ်ၸိူဝ်းဢၼ်ဢင်ႇၵႃႇလူႉ၊ၶဝ်ၸိူဝ်းဢၼ်တိၼ်ပုတ်း၊ၶဝ်ၸိူဝ်းဢၼ်တႃမွတ်ႇ၊တင်းလၢႆၸိူဝ်းၼၼ်ႉတႃႉ။

၁၄ ပေႃးမႂ်းၽိတ်ႈပၢင်းၶဝ်ၸိုင်မႂ်းမီးမင်ႇၵလႃႇဢေႃႈ။လွင်ႈမၼ်းၸမ်းပိူဝ်ႈဢၼ်ၶဝ်ဢမ်ႇၸၢင်ႊတွပ်ႇတႅၼ်းၶိုၼ်းၵျေးၸူးတီႈမႂ်းလႆႈလႄႈၼႂ်းၶိင်ႇမိူဝ်ႈဢၼ်ၶဝ်ၸိူဝ်းဢၼ်သိုဝ်ႈတေႃႇတင်းလၢႆလုၵ်ႉၶိုၼ်းၼၼ်ႉမႂ်းတၵ်းလႆႈၶၢမ်ႇဢၵျူဝ်းတၢင်းဢၼ်တွပ်ႇတႅၼ်းၶိုၼ်းၵျေးၸူးၼၼ်ႉဢေႃႈ၊ဝႃႈၼင်ႇၼႆဢေႃႈ။

ဢူႉပမႃႇတၢင်းဢၼ်ၽိတ်ႈပၢင်းႁႂ်ႈလႆႈၶဝ်ႈပွႆး

၁၅ ၵူၼ်းဢၼ်ၼင်ႈယူႇၵႃႈတီႈႁိမ်းၽိူၼ်တီႈၵိၼ်ၼၼ်ႉၵေႃႉၼိုင်ႈငိၼ်းၵႂၢမ်းမၼ်းၸဝ်ႈသေယဝ်ႉလဝ်ႈလၢတ်ႈလႄႈဝႃႈ၊-ၵေႃႉဢၼ်လႆႈၵိၼ်ၶဝ်ႈမုၼ်းၼႂ်းမိူင်းၽြႃးပဵၼ်ၸဝ်ႈၼၼ်ႉမီးမင်ႇၵလႃႇဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈလၢတ်ႈလႄႈဝႃႈ၊-

၁၆ ၵူၼ်းၵေႃႉၼိုင်ႈႁဵတ်းပွႆးလူင်လႄႈၽိတ်ႈပၢင်းၵူၼ်းၼမ်ၼႃႇဢေႃႈ။မိူဝ်ႈဢၼ်ထိုင်ၶိင်ႇဢၼ်ၶၢမ်ႇပွႆးၼၼ်ႉမၼ်းပွႆႇၵူၼ်းၸႂ်ႉၵူၼ်းသွႆမၼ်းၵႂႃႇႁႂ်ႈလႆႈလၢတ်ႈတီႈၶဝ်ၸိူဝ်းဢၼ်မၼ်းၽိတ်ႈပၢင်းၼၼ်ႉလႄႈဝႃႈ၊-

၁၇ မႃးသေၵမ်းၶႃႈ။ပေႃးႁႅၼ်းဝႆႉၵႃႈမီးၵူႈၸိူဝ်ႉၵူႈပိူင်ယဝ်ႉၶႃႈ၊ဝႃႈၼင်ႇၼႆသေၵေႃႈၶဝ်တင်းသဵင်ႈတင်းလူင်ၸိူဝ်းၼၼ်ႉဢွၼ်ၵၼ်ႁႃလွင်ႈႁႃတၢင်းလႄႈၵေႃႉၼိုင်ႈဝႃႈ၊-

၁၈ ၵဝ်ၶႃႈသိုဝ်ႉၵႂၢၵ်ႉလိၼ်ၵႂၢၵ်ႉၼိုင်ႈယဝ်ႉလႄႈၵဝ်ၶႃႈတၵ်းၵႂႃႇတူၺ်းၶႃႈဢေႃႈ။ဝၢင်းၶႂၢင်ႉၵဝ်ၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။

၁၉ ၵေႃႉၼိုင်ႈသမ်ႉတွင်းပၢၼ်ႇလႄႈဝႃႈ၊-ၵဝ်ၶႃႈသိုဝ်ႉဢဝ်ဝူဝ်းႁႃႈၵူႈၶႃႈယဝ်ႉ။ၵဝ်ၶႃႈတေၵႂႃႇၸၢမ်းတူၺ်းၶဝ်ယူႇၶႃႈဢေႃႈ၊ဝၢင်းၶႂၢင်ႉပၼ်ၵဝ်ၶႃႈသေၵမ်းၶႃႈ၊ဝႃႈၼင်ႇၼႆဢေႃႈ။

၂၀ ၵေႃႉၼိုင်ႈၵေႃႈတွင်းပၢၼ်ႇလႄႈဝႃႈ၊-ၵဝ်ၶႃႈဢဝ်မေးၶႃႈယဝ်ႉ။ပိူဝ်ႈၼႆလႄႈၵဝ်ၶႃႈဢမ်ႇမႃးလႆႈၶႃႈ၊ဝႃႈၼင်ႇၼႆဢေႃႈ။

၂၁ ၵူၼ်းၸႂ်ႉၵူၼ်းသွႆၼၼ်ႉၵေႃႈၶိုၼ်းမႃးလႄႈလဝ်ႈလၢတ်ႈလွင်ႈတၢင်းၸိူဝ်းၼၼ်ႉတီႈၸဝ်ႈမၼ်းဢေႃႈ။မိူဝ်ႈၼၼ်ႉၸဝ်ႈႁိူၼ်းၼၼ်ႉၸႂ်မႆႈၶႂ်ႈၸႃႉလႄႈလၢတ်ႈတီႈၵူၼ်းၸႂ်ႉၵူၼ်းသွႆၼၼ်ႉလႄႈဝႃႈ၊-မႂ်းၵႂႃႇၵႃႈတီႈသဵၼ်ႈတၢင်းလူင်သဵၼ်ႈတၢင်းဢွၼ်ႇတင်းလၢႆၵႃႈၼႂ်းဝဵင်းၶၼ်ၶၼ်ၽႂ်းၽႂ်းလႄႈႁွင်ႉၶဝ်ၸိူဝ်းဢၼ်ယၢၵ်ႈၽၢၼ်ၶဝ်ၸိူဝ်းဢၼ်ဢင်ႇၵႃႇလူႉၶဝ်ၸိူဝ်းဢၼ်တိၼ်ပုတ်းၶဝ်ၸိူဝ်းဢၼ်တႃမွတ်ႇတင်းလၢႆၸိူဝ်းၼၼ်ႉမႃးၵႃႈတီႈၼႆႉတႃႉ၊ဝႃႈၼင်ႇၼႆဢေႃႈ။

၂၂ ၵူၼ်းၸႂ်ႉၵူၼ်းသွႆၼၼ်ႉၵေႃႈၶိုၼ်းမႃးလႄႈလဝ်ႈလၢတ်ႈလႄႈဝႃႈ၊-ႁဵတ်းၵႃႈၼင်ႇဢၼ်ၸဝ်ႈႁဝ်းၸီႇယၢင်ႇၼၼ်ႉယဝ်ႉၶႃႈယဝ်ႉ။ၼႂ်းဝႃႈၼၼ်သေၵေႃႈဢွင်ႈဢၼ်ပဝ်ႇဢၼ်လပ်ႉယင်းမီးယူႇၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၸဝ်ႈၼၼ်ႉၵေႃႈလၢတ်ႈတီႈၵူၼ်းၸႂ်ႉၵူၼ်းသွႆမၼ်းလႄႈဝႃႈ၊-

၂၃ ဢွၵ်ႇၵႂႃႇၸူးၵႃႈတီႈၼႂ်းသဵၼ်ႈတၢင်းလူင်တင်းလၢႆၵႃႈတီႈႁိမ်းႁူဝ်ႉဝၢင်းတင်းလၢႆပုၼ်ႉလူးၵွၼ်ႇတႃႉ။ႁွင်ႉဢဝ်ၶဝ်မႃးႁႂ်ႈတဵမ်ႁိူၼ်းၵဝ်တႃႉ၊ဝႃႈၼင်ႇၼႆဢေႃႈ။

၂၄ ၵဝ်ဝႃႈတီႈသူၸမ်းၶဝ်ၸိူဝ်းဢၼ်ၵဝ်ႁွင်ႉပၢင်းဢွၼ်တၢင်းၼၼ်ႉတေဢမ်ႇလႆႈၶဝ်ႈပွႆးၵဝ်သေၵေႃႉသေၵူၼ်း၊ဝႃႈၼင်ႇၼႆဢေႃႈ။

တၢင်းဢၼ်ပဵၼ်တပႄးၸဝ်ႈယေႇသု

၂၅ ၵူၼ်းၸူႉၵူၼ်းတုမ်ၼမ်ၼႃႇၸွမ်းမၼ်းၸဝ်ႈဢေႃႈ။

၂၆ မၼ်းၸဝ်ႈဝၢႆႇၶိုၼ်းသေယဝ်ႉလၢတ်ႈတီႈၶဝ်လႄႈဝႃႈၽူႈလႂ်သေဢမ်ႇဝႃႈၵေႃႉဢၼ်မႃးၵႃႈတီႈၵဝ်ၼၼ်ႉပေႃးမၼ်းဢမ်ႇႁၵ်ႉၵဝ်ၼႃႇသေပေႃႈမေႈလုၵ်ႈလၢင်းမေးပီႈၼွင်ႉၸဵမ်ယိင်းၸဵမ်ၸၢႆးဢိၵ်ႇတင်းဢသၢၵ်ႈတူဝ်ၸဝ်ႈၵဝ်ႇၸိုင်ၵေႃႉၼၼ်ႉဢမ်ႇပဵၼ်တပႄးၵဝ်လႆႈ။

၂၇ ၽူႈလႂ်သေဢမ်ႇဝႃႈၵေႃႉဢၼ်ဢမ်ႇႁၢပ်ႇဢဝ်သဝ်လၵ်းဝႃးမိုဝ်းတူဝ်ၸဝ်ႈၵဝ်ႇသေလႄႈၸွမ်းပႃႈလင်ၵဝ်ၼၼ်ႉၵေႃႉၼၼ်ႉဢမ်ႇပဵၼ်တပႄးၵဝ်လႆႈ။

၂၈ ၼႂ်းသူၼႆႉၵေႃႈပေႃးသေၵေႃႉသေၵူၼ်းမီးတၢင်းၵျၢမ်ႇတၢင်းပွင်တၵ်းတႄႇႁဵတ်းသဝ်လင်းၸိုင်ဢွၼ်ႈတၢင်းသုတ်းမၼ်းတၵ်းၼင်ႈလႄႈၼပ်ႉဢၢၼ်ႇတွၵ်ႈတူၺ်းၸရိၵ်ႈဢၼ်တၵ်းသဵင်ႈၼၼ်ႉလႄႈႁႂ်ႈလႆႈႁူႉၸွင်ႇငိုၼ်းတၵ်းၵုမ်ႇႁိုဝ်ဢမ်ႇၵုမ်ႇႁိုဝ်ဢၼ်ဝႃႈၼၼ်ႉဢမ်ႇၸႂ်ႈႁိုဝ်။

၂၉ ပေႃးဢမ်ႇၼၼ်ပေႃးမၼ်းတႄႇႁဵတ်းငဝ်ႈႁၢၵ်ႈသဝ်မၼ်းသေယဝ်ႉသမ်ႉဢမ်ႇႁဵတ်းႁႂ်ႈယဝ်ႉတူဝ်လႆႈၸိုင်ၶဝ်ၸိူဝ်းဢၼ်ႁၼ်တင်းသဵင်ႈတင်းလူင်ၼၼ်ႉတၵ်းသေႉသွမ်းလႄႈဝႃႈ၊-

၃၀ ၵေႃႉၼႆႉႁဵတ်းၵေႃႇၸႃႉမၼ်းၵူၺ်းလႄႈဢမ်ႇႁဵတ်းႁႂ်ႈယဝ်ႉတူဝ်လႆႈ၊ဝႃႈၼင်ႇၼႆဢေႃႈ။

၃၁ ၼႄးၼိုင်ႈၸမ်းပေႃးၶုၼ်ႁေႃၶမ်းသပေႃးပႃးမီးတၢင်းဢၼ်တၵ်းလႆႈတိုၵ်းသိုၵ်းၵၼ်တင်းၶုၼ်ႁေႃၶမ်းတၢင်ႇပႃးၸိုင်မၼ်းတၵ်းၼင်ႈယူႇဢွၼ်တၢင်းလႄႈၶႆႈၸႂ်ဝူၼ်ႉၸႂ်တူၺ်းႁႂ်ႈလႆႈႁူႉလွင်ႈဢၼ်ဝႃႈၸွင်ႇမၼ်းတၵ်းဢဝ်ၵူၼ်းမိုၼ်ႇၼိုင်ႈလႄႈၶဵင်ႇၵၼ်လႆႈတင်းၶုၼ်ႁေႃၶမ်းဢၼ်ဢဝ်ၵူၼ်းသွင်မိုၼ်ႇမႃးၼၼ်ႉႁိုဝ်၊တၵ်းဢမ်ႇၶဵင်ႇလႆႈႁိုဝ်ဝႃႈၼႆယူႇဢမ်ႇၸႂ်ႈႁိုဝ်။

၃၂ ပေႃးႁူႉဝႃႈဢမ်ႇၶဵင်ႇလႆႈတႄႉၸိုင်မိူဝ်ႈဢၼ်ၶုၼ်ႁေႃၶမ်းတၢင်ႇပႃးယင်းမီးယူႇတီႈၵႆၼၼ်ႉမၼ်းၸၢင်ႊပွႆႇၸႂ်ႉၵူၼ်းၸႂ်ႉၵူၼ်းသွႆမၼ်းၵႂႃႇလႄႈႁႂ်ႈလႆႈတွင်းပၢၼ်ႇၼင်ႇႁိုဝ်ဢမ်ႇႁႂ်ႈလႆႈပဵၼ်သိုၵ်းဢမ်ႇၸႂ်ႈႁိုဝ်။

၃၃ မိူၼ်ၼင်ႇၼၼ်ၼႂ်းသူၼႆႉၽူႈလႂ်သေဢမ်ႇဝႃႈၵေႃႉဢၼ်ဢမ်ႇပႄႇပႅတ်ႈၵႃႈဢၼ်မီးတီႈတူဝ်ၸဝ်ႈၵဝ်ႇတင်းသဵင်ႈတင်းလူင်ၼၼ်ႉၵေႃႉၼၼ်ႉဢမ်ႇပဵၼ်တပႄးၵဝ်လႆႈ။

၃၄ ၵိူဝ်ၼႆႉလီဢေႃႈ။ၼႂ်းဝႃႈၼၼ်သေၵေႃႈပေႃးဢၼ်ၸဵမ်းမၼ်းႁၢႆၵႂႃႇၸိုင်တၵ်းၶိုၼ်းလႆႈဢၼ်ၸဵမ်းမၼ်းၸိူဝ်ႉၼင်ႇႁိုဝ်။ဢမ်ႇလီပုၼ်ႈလိၼ်။

၃၅ ဢမ်ႇလီပုၼ်ႈၵွင်ၽုၼ်ႇ။လႆႈၶၢမ်ႇတၢင်းဢၼ်ၵူၼ်းတင်းလၢႆဢဝ်ထိမ်ႈပႅတ်ႈၵႃႈၼွၵ်ႈသေဢေႃႈ။ၵေႃႉဢၼ်မီးႁူဢၼ်လီငိၼ်းၼၼ်ႉႁႂ်ႈငိၼ်းသေၵမ်းလူၺ်ႈ၊ဝႃႈၼင်ႇၼႆဢေႃႈ။