Shan Missions

ၵျၢမ်းၶၢဝ်ႇငၢဝ်ႊသတၢင်းသိူဝ်းပျေႃႇယုဝ်းႁၢၼ်ႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂၀    ၂၁   

၂၀ 

ၸဝ်ႈယေႇသုလုၵ်ႉၵႃႈတၢင်းတၢႆၶိုၼ်းလိပ်း

၁ ၼႂ်းၸဵတ်းဝၼ်းဝၼ်းပထမၶိင်ႇၵၢင်ၼႂ်ၸဝ်ႉၸဝ်ႉၸူဝ်ႈဢၼ်မိူင်းဢမ်ႇပႆႇလႅင်းၼၼ်ႉမႃႇရိမႃႇၵတလၵႂႃႇၵႃႈတီႈၶုမ်သၢင်းၶျႅင်းၼၼ်ႉလႄႈလႆႈႁၼ်မၢၵ်ႇႁိၼ်ဢၼ်ဢိုတ်းပၢၵ်ႇၶုမ်ၼၼ်ႉၶၢႆႉတီႈယူႇဝႆႉလႄႈ

၂ မၼ်းၶုၼ်ႇလႅၼ်ႈၵႂႃႇၸူးသိမုၼ်ႇပေႇတရုဢိၵ်ႇတင်းတပႄးၸဝ်ႈတၢင်ႇၵေႃႉဢၼ်ၸဝ်ႈယေႇသုႁၵ်ႉၼၼ်ႉလႄႈလၢတ်ႈဝႃႈ၊-ၶဝ်ဢဝ်တူဝ်မၼ်းၸဝ်ႈဢွၵ်ႇသေၵႃႈၼႂ်းၶုမ်သၢင်းၶျႅင်းၵႂႃႇယဝ်ႉ။ၶဝ်ဢဝ်မၼ်းၸဝ်ႈၵႂႃႇဝႆႉၵႃႈတီႈလႂ်ဢမ်ႇႁူႉယဝ်ႉ၊ဝႃႈၼင်ႇၼႆဢေႃႈ။

၃ မိူဝ်ႈၼၼ်ႉပေႇတရုဢိၵ်ႇတင်းတပႄးၸဝ်ႈတၢင်ႇၵေႃႉၼၼ်ႉၵေႃႈဢွၵ်ႇၵႂႃႇၸူးၵႃႈတီႈၶုမ်သၢင်းၶျႅင်းၼၼ်ႉဢေႃႈ။

၄ သွင်ၶႃၶုၼ်ႇလႅၼ်ႈၵႂႃႇၸွမ်းၵၼ်လႄႈတပႄးၸဝ်ႈတၢင်ႇၵေႃႉၼၼ်ႉလႅၼ်ႈပူၼ်ႉပေႇတရုၵႂႃႇသေယဝ်ႉႁွတ်ႈထိုင်ၵႃႈတီႈၶုမ်သၢင်းၶျႅင်းဢွၼ်တၢင်းဢေႃႈ။

၅ မိူဝ်ႈဢၼ်မၼ်းၵူမ်ႈတူၺ်းၼၼ်ႉလႆႈႁၼ်ၽႃႈပိၵ်ႉၼၼ်ႉၵူၺ်းၵိုတ်းၵျၢၼ်ႇဝႆႉၵႃႈၼႂ်းၶုမ်သၢင်းၶျႅင်းၼၼ်ႉၸိုင်မၼ်းယင်းဢမ်ႇၶဝ်ႈၵႃႈၼႂ်းလႄႈယူႇဢေႃႈ။

၆ သိမုၼ်ႇပေႇတရုၸွမ်းလင်မၼ်းလႄႈႁွတ်ႈထိုင်မႃးသေယဝ်ႉၶဝ်ႈၵႃႈၼႂ်းၶုမ်သၢင်းၶျႅင်းလႄႈလႆႈႁၼ်ၽႃႈပိၵ်ႈၵိုတ်းၵျၢၼ်ႇဝႆႉ

၇ ဢိၵ်ႇတင်းၽႃႈၸဵတ်ႉဢၼ်ႁူမ်ႇႁူဝ်မၼ်းၸဝ်ႈၼၼ်ႉဢမ်ႇၸပ်းၵၼ်ဝႆႉတင်းၽႃႈပိၵ်ႈႁူမ်ႇတူဝ်ၼၼ်ႉလႄႈႁမ်းၵဵၼ်တမ်းဝႆႉတၢင်ႇတီႈဢေႃႈ။

၈ မိူဝ်ႈၼၼ်ႉတပႄးၸဝ်ႈတၢင်ႇၵေႃႉဢၼ်ႁွတ်ႈထိုင်မႃးၵႃႈတီႈၶုမ်သၢင်းၶျႅင်းဢွၼ်တၢင်းၼၼ်ႉၵေႃႈၶဝ်ႈၵႂႃႇလႄႈႁၼ်သေယဝ်ႉယုမ်ႇဢေႃႈ။

၉ တပႄးၸဝ်ႈၸိူဝ်းၼၼ်ႉဢမ်ႇပႆႇႁူႉၵႂၢမ်းၵျၢမ်းလိၵ်ႈဢၼ်ဝႃႈ၊-မၼ်းၸဝ်ႈတၵ်းလႆႈလုၵ်ႈၵႃႈတၢင်းတၢႆၶိုၼ်းလိပ်းဢေႃႈ၊ဝႃႈၼင်ႇၼႆၼၼ်ႉ။

၁၀ ပိူဝ်ႈၼႆလႄႈလိုၼ်းၼၼ်ႉတပႄးၸဝ်ႈၸိူဝ်းၼၼ်ႉၶိုၼ်းမိူဝ်းၵႂႃႇၵႃႈတီႈဢၼ်တူဝ်ၸဝ်ႈၵဝ်ႇယူႇၼၼ်ႉသေဢေႃႈ။

၁၁ မႃႇရိၸုၵ်းယူႇၵႃႈတီႈႁိမ်းၶုမ်သၢင်းၶျႅင်းလႄႈႁွင်ႉႁႆႈယူႇဢေႃႈ။ၼႂ်းမိူဝ်ႈဢၼ်မၼ်းႁွင်ႉႁႆႈယူႇၼၼ်ႉမၼ်းၵူမ်ႈတူၺ်းၼႂ်းၶုမ်သၢင်းၶျႅင်းၼၼ်ႉလႄႈလႆႈႁၼ်တမၢၼ်ႇၵၢင်ႁၢဝ်သွင်ပႃးၼုင်ႈၶူဝ်းဢၼ်ၽိူၵ်ႇဢၼ်ၶၢဝ်သေလႄႈ

၁၂ ၼင်ႈယူႇၵႃႈတီႈဢၼ်ဝႆႉၵႂႃႇတူဝ်တၢႆၸဝ်ႈယေႇသုၵႃႈတီႈၽၢႆႇႁူဝ်ၸဝ်ႈပႃးၼိုင်ႈၵႃႈတီႈၽၢႆႇတိၼ်ၸဝ်ႈပႃးၼိုင်ႈဢေႃႈ။

၁၃ ၶဝ်ၼၼ်ႉၵေႃႈထၢမ်လႄႈဝႃႈ၊-မေႈယိင်းဢိူၺ်း၊ၵႂပ်ႈပိူဝ်ႈလွင်ႈတၢင်းၸိူဝ်ႉၼင်ႇႁိုဝ်လႄႈႁွင်ႉႁႆႈယူႇ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၵေႃႈလၢတ်ႈလႄႈဝႃႈ၊- ၶဝ်ဢဝ်ၸဝ်ႈၵဝ်ၶႃႈၵႂႃႇဝႆႉၵႃႈတီႈလႂ်ဢမ်ႇႁူႉၶႃႈယဝ်ႉ၊ဝႃႈၼင်ႇၼႆဢေႃႈ။

၁၄ ဝၢႆးသဝေႃႈၸိူဝ်ႉၼင်ႇၼၼ်ယဝ်ႉမိူဝ်ႈဢၼ်မၼ်းဝၢႆႇတူၺ်းတၢင်းလင်ၸိုင်ပဵၵ်ႉသမ်ႉလႆႈႁၼ်ၸဝ်ႈယေႇသုၸုၵ်းယူႇသေၵေႃႈမၼ်းဢမ်ႇႁူႉလွင်ႈဢၼ်ဝႃႈပဵၼ်ၸဝ်ႈယေႇသု။

၁၅ ၸဝ်ႈယေႇသုၵေႃႈထၢမ်လႄႈဝႃႈ၊-မေႈယိင်းဢိူၺ်း၊ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈႁွင်ႉႁႆႈယူႇ။မႂ်းႁႃၽူႈလႂ်၊ဝႃႈၼင်ႇၼႆဢေႃႈ။မၼ်းထၢင်ႇဝႃႈၵေႃႉၼၼ်ႉပဵၼ်ၵူၼ်းပႂ်ႉသူၼ်ဢူးယဵၼ်ႇလႄႈမၼ်းသမ်ႉလၢတ်ႈဝႃႈ၊-ၸဝ်ႈဢိူၺ်း၊ပေႃးသူလႆႈဢဝ်တူဝ်မၼ်းၵႂႃႇယဝ်ႉၼႆၵေႃႈဢဝ်ၵႂႃႇဝႆႉၵႃႈတီႈလႂ်ဢၼ်ဝႃႈၼၼ်ႉလၢတ်ႈပၼ်ၵဝ်ၶႃႈသေၵမ်းၶႃႈ။ၵဝ်ၶႃႈတၵ်းၵႂႃႇဢဝ်ၶႃႈဢေႃႈ၊ဝႃႈၼင်ႇၼႆဢေႃႈ။

၁၆ ၸဝ်ႈယေႇသုၵေႃႈႁွင်ႉလႄႈဝႃႈ၊-မႃႇရိဢိူၺ်း။မိူဝ်ႈဢၼ်ဝႃႈၼင်ႇၼႆၸိုင်မႃႇရိၵေႃႈဝၢႆႇတူၺ်းလႄႈၶိုၼ်းဢိူဝ်ႉဝႃႈ၊-ရၢပ်ႉပုၼိ၊ဝႃႈၼင်ႇၼႆဢေႃႈ။ရၢပ်ႉပုၼိၸမ်းၶႂ်ႈပွင်ႇဝႃႈသြႃႇၸဝ်ႈဢေႃႈ။

၁၇ ၸဝ်ႈယေႇသုၵေႃႈလၢတ်ႈလႄႈဝႃႈ၊-ယႃႇပတေိူဝ်ႉပယေိပ်းၵဝ်လူးၵွၼ်ႇ။လွင်ႈမၼ်းၸမ်းၵဝ်ဢမ်ႇပႆႇလႆႈၶိုၼ်းၵႂႃႇၵႃႈတီႈပေႃႈၸဝ်ႈပုၼ်ႉ။မႂ်းၵႂႃႇၵႃႈတီႈၼွင်ႉၵဝ်ၸိူဝ်းၼၼ်ႉတႃႉ။လၢတ်ႈၼႄပၼ်ၶဝ်လွင်ႈဢၼ်ဝႃႈၵဝ်တၵ်းလႆႈၶိုၼ်းၵႂႃႇၵႃႈတီႈပေႃႈၵဝ်ဢၼ်ပဵၼ်ပေႃႈသူၵႃႈတီႈၽြႃးပဵၼ်ၸဝ်ႈၵဝ်ဢၼ်ပဵၼ်ၽြႃးပဵၼ်ၸဝ်ႈသူၼၼ်ႉဢေႃႈ၊ဝႃႈၼင်ႇၼႆဢေႃႈ။

၁၈ ၵႃႈၼင်ႇဢၼ်မၼ်းၸဝ်ႈဝႃႈၼၼ်ႉမႃႇရိမႃႇၵတလၵေႃႈၵႂႃႇလႄႈလၢတ်ႈၼႄလွင်ႈဢၼ်မၼ်းလႆႈထူပ်းလႆႈႁၼ်ၸဝ်ႈယေႇသုဢိၵ်ႇတင်းလွင်ႈဢၼ်မၼ်းၸဝ်ႈသင်ႇလၢတ်ႈဝႆႉၸိူဝ်းၼၼ်ႉတီႈတပႄးၸဝ်ႈတင်းလၢႆဢေႃႈ။

၁၉ မိူဝ်ႈဢၼ်ႁွတ်ႈထိုင်ၶိင်ႇၵၢင်ၶမ်ႈၼႂ်းဝၼ်းဢၼ်ပဵၼ်ဝၼ်းပထမၼႂ်းၸဵတ်းဝၼ်းၼၼ်ႉတပႄးၸဝ်ႈၸိူဝ်းၼၼ်ႉၸူႉၵၼ်တုမ်ၵၼ်ယူႇၼႂ်းႁိူၼ်းဢေႃႈ။ၵွပ်ႈပိူဝ်ႈၶဝ်ၵူဝ်ၵူၼ်းယုတတင်းလၢႆလႄႈၶဝ်ဢိုတ်းၽၵ်းတူဝႆႉယူႇဢေႃႈ။မိူဝ်ႈၶိင်ႇၼၼ်ႉၸဝ်ႈယေႇသုၽုတ်းပေႃႇမႃးၸုၵ်းယူႇၵႃႈတီႈၼႂ်းၶိုင်ႈၵၢင်ၶဝ်သေယဝ်ႉလၢတ်ႈဝႃႈ၊-

၂၀ ႁႂ်ႈတၢင်းၼိမ်မီးတီႈသူသေၵမ်းလူၺ်ႈ၊ဝႃႈၼင်ႇၼႆသေယဝ်ႉမၼ်းၸဝ်ႈၼႄပျႃႉမိုဝ်းမၼ်းၸဝ်ႈပဵမ်ႉမၼ်းၸဝ်ႈဢေႃႈ။တပႄးၸဝ်ႈၸိူဝ်းၼၼ်ႉႁၼ်မၼ်းၸဝ်ႈသေယဝ်ႉမီးတၢင်းဢၼ်ၸူမ်းသိူဝ်းၼႃႇဢေႃႈ။

၂၁ ၸဝ်ႈယေႇသုၵေႃႈသမ်ႉၶိုၼ်းလၢတ်ႈတီႈၶဝ်လႄႈဝႃႈ၊-ႁႂ်ႈတၢင်းၼိမ်မီးတီႈသူသေၵမ်းလူၺ်ႈ။

၂၂ ၸိူဝ်ႉၼင်ႇဢၼ်ပေႃႈၸဝ်ႈပွႆႇၸႂ်ႉၵဝ်မႃးၼၼ်ႉၵဝ်ပွႆႇၸႂ်ႉသူဢေႃႈ၊ဝႃႈၼင်ႇၼႆသေယဝ်ႉပဝ်ႇသႂ်ႇၵႃႈၼိူဝ်ၶဝ်ၼၼ်ႉသေလႄႈလၢတ်ႈဝႃႈ၊-

၂၃ သူၶၢမ်ႇဢဝ်ဝိၺိၺ်ႇမူတ်းၸၢင်ႇၸဝ်ႈတႃႉ။ဢပျႅတ်ႈၽူႈလႂ်ၵေႃႈပေႃးသူပွႆႇလွတ်ႈၸိုင်ၵေႃႉၼၼ်ႉမီးတၢင်းဢၼ်ၵၢင်းလွတ်ႈတင်းဢပျႅတ်ႈဢေႃႈ။ဢပျႅတ်ႈၽူႈလႂ်ၵေႃႈပေႃးသူႁႂ်ႈတႄႇယူႇၸိုင်ၵေႃႉၼၼ်ႉမီးတၢင်းဢၼ်ဢပျႅတ်ႈတႄႇယူႇဢေႃႈ၊ဝႃႈၼင်ႇၼႆဢေႃႈ။

၂၄ မိူဝ်ႈဢၼ်ၸဝ်ႈယေႇသုပေႃႇမႃးၵႃႈတီႈတပႄးၸဝ်ႈၸိူဝ်းၼၼ်ႉထုဝ်းမဢၼ်လႆႈၸိုဝ်တိတုမုၵေႃႉဢၼ်ၶဝ်ႈပႃးၼႂ်းတပႄးၸဝ်ႈသိပ်းသွင်ပႃးၼၼ်ႉမၼ်းဢမ်ႇမီးၵႃႈတီႈၼၼ်ႉ။

၂၅ မိူဝ်ႈဢၼ်တပႄးၸဝ်ႈၸိူဝ်းၼၼ်ႉလၢတ်ႈၼႄမၼ်းဝႃႈ၊-ႁဝ်းလႆႈႁၼ်ၸဝ်ႈႁဝ်းၼၼ်ႉယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၶိုၼ်းလၢတ်ႈဝႃႈ၊-ပေႃးၵဝ်ဢမ်ႇလႆႈႁၼ်ႁွႆးလဵၵ်းမႆႇၼႃးၵႃႈတီႈမိုဝ်းမၼ်းၸဝ်ႈဢမ်ႇလႆႈဢဝ်တင်းၼဵဝ်ႉမိုဝ်းၵဝ်သေႇတူၺ်းႁွႆးလဵၵ်းမႆႇၼႃး၊ဢမ်ႇလႆႈဢဝ်တင်းမိုဝ်းၵဝ်ယိပ်းတူၺ်းၵႃႈတီႈပဵမ်ႉမၼ်းၸဝ်ႈၸိုင်ၵဝ်ဢမ်ႇယုမ်ႇၵူၺ်း၊ဝႃႈၼင်ႇၼႆဢေႃႈ။

၂၆ လိုၼ်းၼၼ်ႉမိူဝ်ႈဢၼ်ထူၼ်ႈပႅတ်ႇဝၼ်းၸိုင်တပႄးၸဝ်ႈၸိူဝ်းၼၼ်ႉသမ်ႉမီးယူႇၵႃႈၼႂ်းတီႈၼၼ်ႉထႅင်ႈဢေႃႈ။ထုဝ်းမၵေႃႈမီးၵႃႈတီႈၼၼ်ႉဢေႃႈ။ပဵၵ်ႉသမ်ႉၶဝ်ဢိုတ်းၽၵ်းတူဝႆႉယူႇသေၵေႃႈၸဝ်ႈယေႇသုပေႃႇမႃးၸုၵ်းယူႇၵႃႈတီႈၼႂ်းၶိုင်ႈၵၢင်ၶဝ်သေယဝ်ႉလၢတ်ႈဝႃႈ၊-ႁႂ်ႈတၢင်းၼိမ်မီးတီႈသူသေၵမ်းလူၺ်ႈ၊ဝႃႈၼင်ႇၼႆဢေႃႈ။

၂၇ မိူဝ်ႈၼၼ်ႉမၼ်းၸဝ်ႈလၢတ်ႈတီႈထုဝ်းမလႄႈဝႃႈ၊-ယိုၼ်ႈၼဵဝ်ႉမိုဝ်းမႂ်းသေလႄႈသေႇတူၺ်းမိုဝ်းၵဝ်ပဵမ်ႉၵဝ်ၼႆႉတႃႉ။ယႃႇပေမီးတၢင်းဢၼ်ယုမ်ႇၶိုင်ႈၼိုင်ႈဢမ်ႇယုမ်ႇၶိုင်ႈၼိုင်ႈ။

၂၈ ယုမ်ႇတႃႉ၊ဝႃႈၼင်ႇၼႆဢေႃႈ။ထုဝ်းမၵေႃႈၶိုၼ်းလဝ်ႈလၢတ်ႈလႄႈဝႃႈ၊-ၸဝ်ႈၵဝ်ၶႃႈ၊ၽြႃးပဵၼ်ၸဝ်ႈၵဝ်ၶႃႈ၊ဝႃႈၼင်ႇၼႆဢေႃႈ။

၂၉ ၸဝ်ႈယေႇသုၵေႃႈလၢတ်ႈလႄႈဝႃႈ၊-ပိူဝ်ႈဢၼ်မႂ်းလႆႈႁၼ်ၵဝ်လႄႈမီးတၢင်းဢၼ်ယုမ်ႇမၢတ်ႈဢေႃႈ။ၶဝ်ၸိူဝ်းဢၼ်ယင်းဢမ်ႇလႆႈႁၼ်ၵဝ်လႄႈယုမ်ႇမၢတ်ႈၼၼ်ႉမီးမင်ႇၵလႃႇဢေႃႈ၊ဝႃႈၼင်ႇၼႆဢေႃႈ။

၃၀ ၼီႉမိၵ်ႈလၵ်ႈၶၼႃႇတၢင်ႇၸိူဝ်ႉတၢင်ႇဢၼ်ဢၼ်ဢမ်ႇတႅမ်ႈဝႆႉၵႃႈၼႂ်းၵျၢမ်းလိၵ်ႈၼႆႉယင်းမီးၼမ်ၼႃႇဢေႃႈ။ၸဝ်ယေႇသုၼႄပျႃးၵႃႈတီႈၽၢႆႇၼႃႈတပႄးၸဝ်ႈတင်းလၢႆဢေႃႈ။

၃၁ ၼင်ႇႁိုဝ်သူတၵ်းယုမ်ႇလွင်ႈဢၼ်ၸဝ်ႈယေႇသုပဵၼ်ၸဝ်ႈၶရိၸ်ႉလုၵ်ႈၽြႃးပဵၼ်ၸဝ်ႈၼၼ်ႉသေယဝ်ႉၼင်ႇႁိုဝ်သူတၵ်းလႆႈဢသၢၵ်ႈၵွပ်ႈပိူဝ်ႈၼႃႇမႃႉၸိုဝ်သဵင်မၼ်းၸဝ်ႈၸိုင်ၸင်ႇလႆႈမီးတၢင်းဢၼ်တႅမ်ႈဝႆႉထၢၼ်ႇၼႆႉဢေႃႈ။