Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၁၆ 

တိမေႃးသေႇၸွမ်းပေႃးလုတင်းသီႇလ

၁ လိုၼ်းၼၼ်ႉပေႃးလုလူင်းမႃးၵႃႈတီႈဝဵင်းတေႇရပေႇတင်းဝဵင်းလုတ်ႉတရဢေႃႈ။ၵႃႈတီႈၼၼ်ႉမီးတပႄးၸဝ်ႈၵေႃႉၼိုင်ႈဢၼ်လႆႈၸိုဝ်တိမေႃးသေႇၼၼ်ႉဢေႃႈ။မေႈမၼ်းပဵၼ်မေႈယိင်းယုတဢၼ်ယုမ်ႇမၢတ်ႈၼၼ်ႉဢေႃႈ။

၂ ပေႃႈမၼ်းၸမ်း၊ပဵၼ်ၵူၼ်းႁေႇလသဢေႃႈ။မၼ်းပဵၼ်ၵူၼ်းဢၼ်မီးသရေႇၵႃႈတီႈပီႈၼွင်ႉဢၼ်မီးယူႇၵႃႈၼႂ်းဝဵင်းလုတ်ႉတရတင်းဝဵင်းဢိၵေႃႇၼိၸိူဝ်းၼၼ်ႉဢေႃႈ။

၃ ပေႃးလုၶႂ်ႈႁွင်ႉဢဝ်မၼ်းၸွမ်းလႄႈပၼ်တၢင်းဢၼ်ထိူဝ်ႁိမ်းတီႈမၼ်းဢေႃႈ။လွင်ႈမၼ်းၸမ်းၵႂပ်ႈပိူဝ်ႈၵူၼ်းယုတဢၼ်မီးယူႇၵႃႈတီႈၼၼ်ႉတင်းသဵင်ႈတင်းလူင်ႁူႉလွင်ႈဢၼ်ဝႃႈပေႃႈမၼ်းပဵၼ်ၵူၼ်းႁေႇလသၼၼ်ႉဢေႃႈ။

၄ ၼႂ်းမိူဝ်ႈဢၼ်ၶဝ်လႄႇၵႂႃႇၵႃႈတီႈဝဵင်းၸိူဝ်းၼၼ်ႉယူႇၼၼ်ႉၸိုင်ၶဝ်ဢဝ်တၢင်းဢၼ်တမၢၼ်ႇၸဝ်ႈလႂ်ဢိၵ်ႇတင်းၵူၼ်းဢုပ်ႉၸိူဝ်းၸဝ်ႈလႂ်လႆႈၸႂ်ၵၼ်လႄႈတႅပ်းတတ်းတီႈဝဵင်းယေႇရုသလႅမ်ႇၼၼ်ႉဢၢပ်ႈပၼ်တီႈၶဝ်ႁႂ်ႈၶဝ်လၢႆၵမ်ၵျၢင်ႉဢေႃႈ။

၅ ပိူဝ်ႈၼႆလႄႈၸိူဝ်းၸဝ်ႈတင်းလၢႆမီးတၢင်းဢၼ်မၼ်ႈၶိူင်ႇၵႃႈၼႂ်းတၢင်းယုမ်ႇမၢတ်ႈလႄႈဝၼ်းၼိုင်ႈယဝ်ႉဝၼ်းၼိုင်ႈၵူၼ်းယုမ်ႇမၢတ်ႈၵေႃႈၼမ်မႃးတိၵ်းတိၵ်းဢေႃႈ။

ပေႃးလုလႆႈရူႇပႃႇရူင်ႇၵူၼ်းမိူင်းမႃႇၵေႇတေႃးၼိ

၆ ၵွပ်ႈပိူဝ်ႈဝိၺိၺ်ႇမူတ်းၸၢင်ႇၸဝ်ႈႁႄႉၶႅၼ်ၶဝ်ဢမ်ႇႁႂ်ႈၶဝ်လႆႈႁေႃးလၢတ်ႈၼုၵ်ႉၵပၢတ်ႈတြႃးၸဝ်ႈၵႃႈၼႂ်းမိူင်းဢႃႇသိၼၼ်ႉလႄႈၶဝ်လႄႇၵႂႃႇၵႃႈၼႂ်းမိူင်းရုၵိတင်းမိူင်းၵလႃႇတိဢေႃႈ။

၇ မိူဝ်ႈဢၼ်ၶဝ်ႁွတ်ႈထိုင်ၵႃႈတီႈမိူင်းမုသိလႄႈဢၢင်ႈတၵ်းၵႂႃႇၵႃႈတီႈမိူင်းပိသုၼိၼၼ်ႉၸိုင်

၈ ဝိၺိၺ်ႇၸဝ်ႈယေႇသုဢမ်ႇပၼ်ဢၶႂၢင်ႉလႄႈၶဝ်ဝေႈပႅတ်ႈမိူင်းမုသိသေယဝ်ႉလူင်းၵႂႃႇၵႃႈတီႈဝဵင်းထရေႃႇဢေႃႈ။

၉ မိူဝ်ႈၶိင်ႇၵၢင်ၶိုၼ်း၊ပေႃးလုလႆႈႁၼ်ပျႃႇတိၵ်ႈရူႇပႃႇရူင်ႇဢေႃႈ။ၼႂ်းပျႃႇတိၵ်ႈရူႇပႃႇရုင်ႇၼၼ်ႉမၼ်းလႆႈႁၼ်ၵူၼ်းမႃႇၵေႇတေႃးၼိၵေႃႉၼိုင်ႈၸုၵ်းယူႇသေလႄႈတွင်းပၢၼ်ႇမၼ်းလႄႈဝႃႈ၊-ၶၢမ်ႈမႃးၵႃႈတီႈမိူင်းမႃႇၵေႇတေႃးၼိလႄႈၸွႆႈထႅမ်ႁဝ်းၶႃႈသေၵမ်း၊ဝႃႈၼင်ႇၼႆဢေႃႈ။

၁၀ မိူဝ်ႈဢၼ်မၼ်းလႆႈႁၼ်ပျႃႇတိၵ်ႈရူႇပႃႇရူင်ႇၼၼ်ႉၸိုင်ႁဝ်းတုၵ်းၵၢင်ၸႂ်ဝႃႈ၊ၸဝ်ႈၽြႃးႁွင်ႉဢဝ်ႁဝ်းႁႂ်ႈႁဝ်းလႆႈႁေႃးလၢတ်ႈတြႃးသတၢင်းသိူဝ်းပျေႃႇၸဝ်ႈၵႃႈၼႂ်းမိူင်းမႃႇၵေႇတေႃးၼိပုၼ်ႉဢေႃႈ၊ဝႃႈၼႆလႄႈႁဝ်းမႄးႁႅၼ်းႁႂ်ႈလႆႈၵႂႃႇၵႃႈတီႈမိူင်းၼၼ်ႉၵမ်းလဵဝ်ဢေႃႈ။

၁၁ ႁဝ်းၸင်ႇလုၵ်ႉသေၵႃႈတီႈဝဵင်းထရေႃႇၶီႇႁိူဝ်းၵႂႃႇသိုဝ်ႈသိုဝ်ႈၸူးၵႃႈတီႈၵုၼ်သမေႃႇထရိတ်ႉလႄႈၼႂ်းဝၼ်းမိူဝ်ႈၽုၵ်ႈႁဝ်းႁွတ်ႈထိုင်ၵႃႈတီႈဝဵင်းၼႃႇပေႃးလိဢေႃႈ။

လုတိယုမ်ႇမၢတ်ႈၸဝ်ႈယေႇသု

၁၂ ႁဝ်းသမ်ႉဢွၵ်ႇသေၵႃႈတီႈဝဵင်းၼၼ်ႉသေယဝ်ႉႁွတ်ႈထိုင်ၵႃႈတီးဝဵင်းၽိလိပ်ႉပိဢၼ်မီးၼႂ်းမိူင်းမႃႇၵေႇတေႃးၼိဢၼ်ပဵၼ်ဝဵင်းဢၼ်ၵူၼ်းတၢင်ႇဝၢၼ်ႈတၢင်ႇမိူင်းတႄႇဝႆႉမိူဝ်ႈၼၼ်ႉၼၼ်ႉလႄႈယူႇၵႃႈတီႈဝဵင်းၼၼ်ႉႁိုင်တၢၼ်ႇတၢၼ်ႇဢေႃႈ။

၁၃ ၼႂ်းဝၼ်းၵမ်သိၼ်ႁဝ်းဢွၵ်ႇၵႃႈၼွၵ်ႈၽၵ်းတူဝဵင်းၵႂႃႇၸူးတီႈႁိမ်းၽင်ႇၼမ်ႉႁွင်ႊတီႈဢၼ်ယၢမ်ႈမီးၸရွပ်ႈသူးတွင်းၼၼ်ႉသေယဝ်ႉႁဝ်းၼင်ႈလႄႈႁေႃးလၢတ်ႈတီႈမေႈယိင်းဢၼ်ၸူႉဢၼ်တုမ်ၵၼ်ယူႇၸိူဝ်းၼၼ်ႉဢေႃႈ။

၁၄ မိူဝ်ႈၼၼ်ႉမေႈယိင်းဢၼ်လႆႈၸိုဝ်လုတိ၊ဢၼ်ပဵၼ်ၵူၼ်းဝဵင်းသႂႃႇတိရေႇ၊ဢၼ်ၶၢႆၶူဝ်းလဵင်းဢၼ်လႅင်ႊၶွင်ႇ၊ဢၼ်ပဵၼ်ၵေႃႉဢၼ်ၵူဝ်းၵႂၢႆႇၽြႃးပဵၼ်ၸဝ်ႈၼၼ်ႉၵေႃႉၼိုင်ႈ၊ထွမ်ႇငိၼ်းဢဝ်တြႃးလႄႈၸဝ်ႈၽြႃးၽုၺ်ႇႁူဝ်ၸႂ်မၼ်းႁႂ်ႈမၼ်းဢိင်ပိုင်ႈႁပ်ႉတုင်းဢဝ်တၢင်းဢၼ်ပေႃးလုႁေႃးလၢတ်ႈၼၼ်ႉဢေႃႈ။

၁၅ မၼ်းဢိၵ်ႇတင်းၵူၼ်းႁိူၼ်းၵူၼ်းယေးမၼ်းၶၢမ်ႇဢဝ်ပပ်ႉတိၸၢမ်ႇသေယဝ်ႉၽိတ်ႉပၢင်းႁဝ်းလႄႈဝႃႈ၊-ပေႃးသူၸဝ်ႈမၢတ်ႈၵဝ်ၶႃႈပဵၼ်ၵူၼ်းယုမ်ႇမၢတ်ႈၸဝ်ႈၽြႃးယဝ်ႉၸိုင်မႃးလိုဝ်ႈသဝ်းတီႈႁိူၼ်းၵဝ်ၶႃႈသေၵမ်းၶႃႈ၊ဝႃႈၼႆဢေႃႈ။

ပေႃးလုတင်းသီႇလတူၵ်းထွင်ႇ

၁၆ လိုၼ်းၼၼ်ႉၼႂ်းမိူဝ်ႈဢၼ်ႁဝ်းၵႂႃႇၵႃႈတီႈၸရွပ်ႈလႄႈႁဵတ်းသူးတွင်းပထၼႃႇယူႇၼၼ်ႉၸိုင်မေႈယိင်းဢွၼ်ႇၵေႃႉၼိုင်ႈဢၼ်ၽီၶဝ်ႈလႄႈၸၢင်ႊႁေႃးလၢတ်ႈၵႂၢမ်းဢၼႃႇၵၢတ်ႈဢၼ်ႁဵတ်းႁႂ်ႈၸဝ်ႈမၼ်းလႆႈပဵၼ်တိုၼ်းပဵၼ်ႁွၼ်းၼမ်ၼႃႇၼၼ်ႉမႃးႁႄႉႁပ်ႉႁူဝ်တၢင်းႁဝ်းဢေႃႈ။

၁၇ မၼ်းၸွမ်းပႃႈလင်ပေႃးလုတင်းႁဝ်းသေလႄႈႁွင်ႉသႅၼ်ႇလႄႈဝႃႈ၊-ၵူၼ်းၸိူဝ်းၼႆႉပဵၼ်ၶႃႈၽြႃးပဵၼ်ၸဝ်ႈဢၼ်သုင်ၼႃႇသေပိူၼ်ႈၼၼ်ႉလႄႈၶဝ်ႁေႃးလၢတ်ႈသဵၼ်ႈတၢင်းတြႃးတၢင်းဢၼ်ၵႄႇၶျွတ်ႈဢဝ်ၼၼ်ႉတီႈႁဝ်းဢေႃႈ၊ဝႃႈၼင်ႇၼႆဢေႃႈ။

၁၈ ၵွပ်ႈပိူဝ်ႈမၼ်းႁဵတ်းၸိူဝ်ႉၼင်ႇၼၼ်မိူဝ်ႈဝၼ်းၼမ်ၼႃႇလႄႈပေႃးလုမီးၸႂ်သုၵ်ႉသၵ်ႉမႃးသေယဝ်ႉဝၢႆႇၼႃႈတူၺ်းမၼ်းလႄႈလၢတ်ႈတီႈၽီၼၼ်ႉလႄႈဝႃႈ၊-မႂ်းၼႆႉဢွၵ်ႇသေၵႃႈၼႂ်းမၼ်းၵႂႃႇတႃႉ။ၵဝ်ဢိင်ပိုင်ႈၼႃႇမႃႉၸိုဝ်သဵင်ၸဝ်ႈယေႇသုလႄႈမီးဢမိင်ႉဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ၽီၼၼ်ႉဢွၵ်ႇၵႂႃႇၵမ်းလဵဝ်ဢေႃႈ။

၁၉ ၸဝ်ႈမၼ်းၸိူဝ်းၼၼ်ႉမိူဝ်ႈဢၼ်ႁူႉဝႃႈၵမ်းလိုၼ်းတီႈမုင်ႈမွင်းဢၼ်တၵ်းလႆႈပဵၼ်တိုၼ်းပဵၼ်ႁွၼ်းၼၼ်ႉဢမ်ႇမီးယဝ်ႉၼၼ်ႉၸိုင်ၶဝ်တီႉဢဝ်ပေႃးလုတင်းသီႇလသေယဝ်ႉဢဝ်ၶဝ်ၵႂႃႇၵႃႈတီႈၵၢတ်ႇသူင်ႇၸူးတီႈၶုၼ်တင်းလၢႆဢေႃႈ။

၂၀ မိူဝ်ႈဢၼ်ၶဝ်ႁွတ်ႈထိုင်ၵႃႈတီႈၶုၼ်ၸိူဝ်းၼၼ်ႉၸိုင်ၶဝ်လဝ်ႈလၢတ်ႈလႄႈဝႃႈ၊-ၵူၼ်းၸိူဝ်းၼႆႉပဵၼ်ၵူၼ်းယုတလႄႈၶဝ်ယႃႉယူၵ်ႉဝဵင်းႁဝ်းၼႆႉၶႃႈဢေႃႈ။

၂၁ ၶဝ်ၸၢင်ႊႁေႃးလၢတ်ႈသင်ႇသွၼ်ပၼ်ထုင်းၸၢမ်ႇဢၼ်ၵူၼ်းရူဝ်းမႁဝ်းဢမ်ႇထုၵ်ႇလီၶၢမ်ႇဢဝ်ဢမ်ႇထုၵ်ႇလီၵမ်ၵျၢင်ႉၼၼ်ႉၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ၵူၼ်းၸူႉၵူၼ်းတုမ်ၸိူဝ်းၼၼ်ႉၵေႃႈၽွမ်ႉၵၼ်ၸီႉၼႄးတၢင်ႇဢပျႅတ်ႈၶဝ်ဢေႃႈ။

၂၂ ၶုၼ်ၸိူဝ်းၼၼ်ႉၵေႃႈမီးဢမိင်ႉႁႂ်ႈသိၵ်ႇထွတ်ႇပႅတ်ႈၶူဝ်းၼုင်ႈၶဝ်သေယဝ်ႉႁႂ်ႈဢဝ်ၶွၼ်ႉပေႃႉယႅၼ်ႉၶဝ်ဢေႃႈ။

၂၃ ဝၢႆးသပေေႃႉယႅၼ်ႉၶဝ်ယဝ်ႉမီးႁွႆးၶွၼ်ႉၼမ်ၼႃႇယဝ်ႉၸင်ႇဢဝ်ၶဝ်ၶင်ဝႆႉၵႃႈၼႂ်းထွင်ႇလႄႈသင်ႇလၢတ်ႈတီႈထွင်ႇမူးဝႆႉႁႂ်ႈမၼ်းပႂ်ႉလီလီဢေႃႈ။

၂၄ ၵႃႈၼင်ႇဢၼ်သင်ႇလၢတ်ႈဝႆႉၼၼ်ႉထွင်ႇမူးၵေႃႈဢဝ်ၶဝ်ၶင်ဝႆႉၵႃႈၼႂ်းထွင်ႇၼႂ်းလုၵ်းလႄႈဢဝ်တိၼ်ၶဝ်သႂ်ႇထၢင်ႇဝႆႉဢေႃႈ။

၂၅ မိူဝ်ႈၶိင်ႇတဵင်ႈၶိုၼ်းပေႃးလုတင်းသီႇလႁဵတ်းသူးတွင်းပထၼႃႇလႄႈႁဵတ်းၵႂၢမ်းဢၼ်ယွင်ႈယေႃးၽြႃးပဵၼ်ၸဝ်ႈယူႇဢေႃႈ။ၶဝ်ၸိူဝ်းဢၼ်လႆႈၶၢမ်ႇတၢင်းဢၼ်မတ်ႉဝႆႉၶင်ဝႆႉၵႃႈၼႂ်းထွင်ႇၸိူဝ်းၼၼ်ႉၵေႃႈဢွၼ်ၵၼ်ထွမ်ႇယူႇဢေႃႈ။

၂၆ မိူဝ်ႈၶိင်ႇၼၼ်ႉဢိင်ႇသၼ်ႇမႃးႁႅင်းယႂ်ႇၼႃႇလူင်လၢင်လႄႈတိၼ်ထွင်ႇၵေႃႈသၼ်ႇၶွၼ်းဝႆဢေႃႈ။ၽၵ်းတူၵႃႈမီးၸိူဝ်းၼၼ်ႉၵေႃႈၽုၺ်ႇပိုတ်ႇၵႂႃႇၵမ်းလဵဝ်လႄႈၸိူၵ်ႈလဵၵ်းဢၼ်မတ်ႉၽုၵ်ႇၵူၼ်းထွင်ႇၸိူဝ်းၼၼ်ႉၵေႃႈလူမ်တူၵ်းၵႂႃႇၵမ်းလဵဝ်ဢေႃႈ။

၂၇ ထွင်ႇမူးၼၼ်ႉတိုၼ်ႇမႃးလႄႈလႆႈႁၼ်ၽၵ်းတူထွင်ႇၸိူဝ်းၼၼ်ႉၽုၺ်ႇပိုတ်ႇဝႆႉသေယဝ်ႉမၼ်းထၢင်ႇဝႃႈၵူၼ်းတူၵ်းထွင်ႇၸိူဝ်းၼၼ်ႉလွတ်ႈဢွၵ်ႇပၢႆႊၵႂႃႇမူတ်းယဝ်ႉဝႃႈၼႆလႄႈမၼ်းထွတ်ႇဢဝ်လၢပ်ႇမၼ်းဢွၵ်ႇၵႃႈၼႂ်းၵပ်းမၼ်းသေယဝ်ႉဢၢင်ႈဢၢၼ်းတၵ်းဢဝ်တူဝ်ၸဝ်ႈၵဝ်ႇတၢႆဢေႃႈ။

၂၈ မိူဝ်ႈၼၼ်ႉပေႃးလုႁဵတ်းတင်းသဵင်ဢၼ်ယႂ်ႇၼႃႇႁွင်ႉလႄႈဝႃႈ၊-ယႃႇပေႁဵတ်းဢၼ်ဢမ်ႇလီဢမ်ႇငၢမ်းတီႈတူဝ်ၸဝ်ႈၵဝ်ႇ။ႁဝ်းတင်းသဵင်ႈတင်းလူင်မီးယူႇဢေႃႈ၊ဝႃႈၼင်ႇၼႆဢေႃႈ။

၂၉ ထွင်ႇမူးၼၼ်ႉၵေႃႈယွၼ်းဢဝ်ၽႆးဢၼ်တႆႈဝႆႉၼၼ်ႉသေယဝ်ႉလႅၼ်ႈၶဝ်ႈမႃးသၼ်ႇသၼ်ႇသၢႆသၢႆယူႇသေလႄႈၶုပ်ႉမူပ်ႇၵႃႈတီႈႁိမ်းတိၼ်ပေႃးလုတင်းသီႇလၼၼ်ႉဢေႃႈ။

၃၀ မၼ်းဢဝ်ၶဝ်ဢွၵ်ႇၵႃႈၼွၵ်ႈသေယဝ်ႉလဝ်ႈထၢမ်လႄႈဝႃႈ၊-ၸဝ်ႈၶဝ်ဢိူၺ်း၊ၼင်ႇႁိုဝ်ၵဝ်ၶႃႈတၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ၸိုင်တၵ်းလႆႈႁဵတ်းၸိူဝ်ႉႁိုဝ်ၶႃႈ၊ဝႃႈၼင်ႇၼႆဢေႃႈ။

၃၁ ၶဝ်ၵေႃႈလၢတ်ႈလႄႈဝႃႈ၊-ယုမ်ႇမၢတ်ႈၸဝ်ႈယေႇသုၶရိၸ်ႉတႃႉ။ပေႃးႁဵတ်းၸိူဝ်ႉၼင်ႇၼၼ်ၸိုင်မႂ်းဢိၵ်ႇတင်းၵူၼ်းႁိူၼ်းၵူၼ်းယေးမႂ်းတၵ်းႁွတ်ႈထိုင်တၢင်းဢၼ်ၵႄႇၶျွတ်ႈဢဝ်ဢေႃႈ၊ဝႃႈၼင်ႇၼႆလႄႈ

၃၂ ႁေႃးလၢတ်ႈၼုၵ်ႉၵပၢတ်ႈတြႃးၸဝ်ႈၽြႃးပၼ်တီႈမၼ်းဢိၵ်ႇတင်းၵူၼ်းၵႃႈဢၼ်မီးယူႇၵႃႈၼႂ်းႁိူၼ်းမၼ်းၸိူဝ်းၼၼ်ႉဢေႃႈ။

၃၃ ၼႂ်းၶိင်ႇၼႃႇရီႇၶိုၼ်းၼၼ်ႉမၼ်းသုၵ်ႈပွတ်ႈႁွႆးၶွၼ်ႉတီႈပေႃးလုတင်းသီႇလသေယဝ်ႉမၼ်းဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းသဵင်ႈတင်းလူင်ၶၢမ်ႇဢဝ်ပပ်ႉတိၸၢမ်ႇၵမ်းလဵဝ်ဢေႃႈ။

၃၄ ၵမ်းၼၼ်ႉမၼ်းပၢင်းဢဝ်ပေႃးလုတင်းသီႇလမႃးၵႃႈၼိူဝ်ႁိူၼ်းမၼ်းယဝ်ႉၸင်ႇႁဵတ်းလဵင်ႉႁဵတ်းလူၶဝ်ဢေႃႈ။ပိူဝ်ႈဢၼ်ယုမ်ႇမၢတ်ႈၽြႃးပဵၼ်ၸဝ်ႈယဝ်ႉလႄႈမၼ်းဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းလၢႆၸူမ်းသိူဝ်းၼႃႇလူင်လၢင်ဢေႃႈ။

၃၅ မိူဝ်ႈဢၼ်ႁွတ်ႈထိုင်ၶိင်ႇၵၢင်ၼႂ်ၸိုင်ၶုၼ်ၸိူဝ်းၼၼ်ႉပွႆႇၸႂ်ႉၵူၼ်းဢွၼ်ႇၶုၼ်မႃးလႄႈသင်ႇလၢတ်ႈဝႃႈ၊-ႁႂ်ႈပွႆႇၶဝ်လွတ်ႈတႃႉ၊ဝႃႈၼင်ႇၼႆဢေႃႈ။

၃၆ ထွင်ႇမူးၵေႃႈဢဝ်ၵႂၢမ်းၼၼ်ႉမွၵ်ႇလၢတ်ႈတီႈပေႃးလုလႄႈဝႃႈ၊-ၶုၼ်တင်းလၢႆပူင်ႈဢမိင်ႉမႃးႁႂ်ႈလႆႈပွႆႇသူၸဝ်ႈလွတ်ႈၶႃႈယဝ်ႉ။ပိူဝ်ႈၼႆလႄႈတေႃႈလဵဝ်ၼႆႉဢွၵ်ႇလႄႈၵႂႃႇၼိမ်ၼိမ်လီလီသေၵမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ပေႃးလုၵေႃႈၶိုၼ်းလၢတ်ႈတီႈၵူၼ်းဢွၼ်ႇၶုၼ်ၸိူဝ်းၼၼ်ႉလႄႈဝႃႈ၊-

၃၇ ႁဝ်းပဵၼ်ၵူၼ်းရူဝ်းမဢိူဝ်း။ၶဝ်ယင်းဢမ်ႇၸႅတ်ႈဢမ်ႇသေးဢီႈသင်လႄႈၶဝ်ပေႃႉယႅၼ်ႉႁဝ်းဢဝ်ႁဝ်းၶင်ဝႆႉၵႃႈၼႂ်းထွင်ႇထၢင်ႇထၢင်ႇသႃးသႃးလႄႈတေႃႈလဵဝ်ၼႆႉသမ်ႉတၵ်းပွႆႇႁဝ်းဢွၵ်ႇၵႂႃႇတဵတ်ႇတဵတ်ႇႁိုဝ်။ဢမ်ႇထုၵ်ႇလီႁဵတ်းၸိူဝ်ႉၼင်ႇၼႆ။ႁႂ်ႈတူဝ်ၶဝ်မႃးလႄႈၼုၵ်ႈဢဝ်ႁဝ်းဢွၵ်ႇသေၵမ်း၊ဝႃႈၼင်ႇၼႆဢေႃႈ။

၃၈ ၵူၼ်းဢွၼ်ႇၶုၼ်ၸိူဝ်ၼၼ်ႉၵေႃႈဢဝ်ၵႂၢမ်းၶဝ်ၼၼ်ႉၶိုၼ်းလဝ်ႈလၢတ်ႈတီႈၶုၼ်တင်းလၢႆလႄႈမိူဝ်ႈဢၼ်ၶဝ်လႆႈႁူႉလွင်ႈဢၼ်ဝႃႈပေႃးလုတင်းသီႇလပဵၼ်ၵူၼ်းရူဝ်းမၼၼ်ႉၸိုင်

၃၉ ၶဝ်မီးတၢင်းဢၼ်ၵူဝ်ႁႄၼႃႇလႄႈတူဝ်ၶဝ်မႃးဢဝ်တင်းၵႂၢမ်းၶျေႃးၵႂၢမ်းဝွၼ်းသေယဝ်ႉၼုၵ်ႈဢဝ်ၶဝ်လႄႈတွင်းပၢၼ်ႇၶဝ်ႁႂ်ႈၶဝ်ဢွၵ်ႇသေၵႃႈၼႂ်းဝဵင်းၼၼ်ႉၵႂႃႇဢေႃႈ။

၄၀ မိူဝ်ႈၼၼ်ႉၶဝ်ၸင်ႇဢွၵ်ႇသေၵႃႈၼႂ်းထွင်ႇလႄႈၵႂႃႇၶဝ်ႈၵႃႈၼႂ်းႁိူၼ်းလုတိသေယဝ်ႉထူပ်းႁၼ်ပီႈၼွင်ႉတင်းလၢႆလႄႈႁႂ်ႈၸႂ်ၶဝ်သၢၵ်ႈသႃႇယဝ်ႉၸင်ႇဢွၵ်ႇၵႂႃႇသေဢေႃႈ။