Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၂၈ 

ႁွတ်ႈထိုင်ၵုၼ်မေႇလိတိ

၁

မိူဝ်ႈဢၼ်လွတ်ႈဢွၵ်ႇၸိူဝ်ႉၼင်ႇၼၼ်ယဝ်ႉၼၼ်ႉၸိုင်ႁဝ်းႁူႉလွင်ႈဢၼ်ၵုၼ်ၼၼ်ႉလႆႈႁွင်ႉႁိၵ်ႈဝႃႈၵုၼ်မေႇလိတိၼၼ်ႉဢေႃႈ။

၂ ၵွပ်ႈပိူဝ်ႈၽူၼ်တူၵ်းလႄႈၵတ်းၼႃႇလူင်လၢင်ၼၼ်ႉၵူၼ်းလိူင်းတင်းလၢႆသႂ်ႇၽႆးသေယဝ်ႉ၊ႁပ်ႉတုင်းဢဝ်ႁဝ်းလႄႈႁဵတ်းၵျေးၸူးယႂ်ႇၼႃႇတီႈႁဝ်းဢေႃႈ။

၃ မိူဝ်ႈဢၼ်ပေႃးလုႁုပ်ႈဢဝ်ၽိုၼ်းလႄႈသႂ်ႇၵႃႈၼႂ်းၽႆးယူႇၼၼ်ႉငူးႁၢႆႉတူဝ်ၼိုင်ႈဢွၵ်ႇသေၵႃႈၼႂ်းဢၢႆၽႆးမႃးလႄႈႁွႆႈၸပ်းၵႃႈၼိူဝ်မိုဝ်းမၼ်းဢေႃႈ။

၄ ၵူၼ်းလိူင်းၸိူဝ်းၼၼ်ႉႁၼ်သေယဝ်ႉၼင်ႇၵၼ်ၵၼ်လၢတ်ႈၵၼ်လႄႈဝႃႈ၊-ၵေႃႉၼႆႉပဵၼ်ၵေႃႉဢၼ်ဢဝ်ဢသၢၵ်ႈပိူၼ်ႈတၢႆဢမၢၼ်ႇၶၼ်ပဵၼ်ယဝ်ႉ။ပဵၵ်ႉသမ်ႉမၼ်းၵၢင်းလွတ်ႈၽေးပၢင်ႇလၢႆႇသေၵေႃႈတြႃးတၢင်းဢၼ်သိုဝ်ႈတေႃႇၼၼ်ႉဢမ်ႇပၼ်ဢၶႂၢင်ႉႁႂ်ႈဢသၢၵ်ႈမၼ်းလႆႈလိပ်း၊ဝႃႈၼင်ႇၼႆဢေႃႈ။

၅ ပေႃးလုၵေႃႈသၼ်ႇၽႅတ်းပႅတ်ႈငူးႁၢႆႉၼၼ်ႉတူၵ်းၵႂႃႇၵႃႈၼႂ်းၽႆးလႄႈဢမ်ႇပဵၼ်ၽေးၵႃႈတီႈမၼ်းၵႃႈသင်သေဢိတ်း။

၆ ၵမ်းဢွၼ်ႇၼိုင်ႈမၼ်းတၵ်းၵႂ်တင်းတူဝ်တင်းၶိင်း၊ဢမ်ႇၼၼ်ၵေႃႈ၊မၼ်းတၵ်းလူမ်ႉလႄႈတၢႆဢေႃႈဝႃႈၼႆပဵၵ်ႉသမ်ႉၶဝ်ထၢင်ႇလႄႈပႂ်ႉတူၺ်းယူႇႁိုင်ၼႃႇသေၵေႃႈမိူဝ်ႈဢၼ်ဢမ်ႇႁၼ်လွင်ႈဢၼ်ဢမ်ႇလီသေၸိူဝ်ႉသေပိူင်ပဵၼ်မႃးၵႃႈတီႈမၼ်းၼၼ်ႉၸိုင်ၸႂ်ၶဝ်ၶၢႆႉပုတ်ႈသေလႄႈလၢတ်ႈဝႃႈ၊-ၵေႃႉၼႆႉပဵၼ်ၽြႃးဢေႃႈ၊ဝႃႈၼင်ႇၼႆဢေႃႈ။

၇ ၵႃႈႁိမ်းတီႈၼၼ်ႉမီးလိၼ်ၵႂၢၵ်ႉၼိုင်ႈဢၼ်ပုပိလိဢၼ်ပဵၼ်ၵႄႇပိူင်ႇၼၼ်ႉဢေႃႈ။မၼ်းႁပ်ႉတုင်းဢဝ်ႁဝ်းလႄႈႁဵတ်းလဵင်ႉႁဵတ်းလူႁဝ်းလီလီငၢမ်းငၢမ်းသၢမ်ဝၼ်းဢေႃႈ။

၈ ၵေႃႉဢၼ်ပဵၼ်ပေႃႈၶုၼ်ပုပိလိၼၼ်ႉပဵၼ်တၢင်းပဵၼ်ဢၼ်ၼၢဝ်ဢိၵ်ႇတင်းတွင်ႉၵႂႃႇလိူတ်ႈလႄႈၼွၼ်းယူႇဢေႃႈ။ပေႃးလုၶဝ်ႈလႄႈသူးတွင်းသေယဝ်ႉဢဝ်မိုဝ်းတၢင်ႇၵႃႈၼိူဝ်မၼ်းလႄႈတၢင်းၶႆႈတၢင်းပဵၼ်မၼ်းႁၢႆၶႅၼ်းဢေႃႈ။

၉ ပိူဝ်ႈဢၼ်ႁဵတ်းၸိူဝ်ႉၼင်ႇၼၼ်လႄႈၵူၼ်းတၢင်ႇတီႈတၢင်ႇလႅၼ်ဢၼ်မီးတၢင်းၶႆႈတၢင်းပဵၼ်ၵႃႈၼႂ်းၵုၼ်ၼၼ်ႉဢွၼ်ၵၼ်မႃးၸူးတီႈပေႃးလုလႄႈလႆႈၵတ်းယဵၼ်ၶျၢမ်းသႃႇဢေႃႈ။

၁၀ ၶဝ်ႁဵတ်းလေႃးၵႃႉဝုတ်ႉၼမ်ၼႃႇတီႈႁဝ်းလႄႈမိူဝ်ႈဢၼ်ႁဝ်းၶီႇႁိူဝ်းဢွၵ်ႇၵႂႃႇၼၼ်ႉၶဝ်ဢဝ်ၶိူင်ႈပိူင်ဢၼ်ႁဝ်းလူဝ်ႇၵူႈၸိူဝ်ႉၵူႈပိူင်တၢင်ႇပၼ်ၵႃႈၼိူဝ်ႁိူဝ်းႁဝ်းဢေႃႈ။

ႁွတ်ႈထိုင်ဝဵင်းရူဝ်းမ

၁၁ ၼင်ႇၼၼ်လႄႈပူၼ်ႉသသေၢမ်လိူၼ်ယဝ်ႉႁဝ်းသမ်ႉၶီႇႁိူဝ်းဢႃႇလေႇၸၢၼ်ႇတရေႇဢၼ်ပႃးႁၢင်ႊရုၵ်ႉထူႉၽႃၽႄၵႃႈတီႈ

ႁူဝ်ႁိူဝ်းၼၼ်ႉၵႂႃႇလႄႈသိူၵ်ႈႁွတ်ႈၵႃႈတီႈဝဵင်းသုရၵုတ်ႉလႄႈယူႇသၢမ်ဝၼ်းဢေႃႈ။

၁၂ သမ်ႉလုၵ်ႉသေၵႃႈတီႈဝဵင်းၼၼ်ႉၶီႇႁိူဝ်းလဵပ်ႈၵႂႃႇႁွတ်ႈထိုင်ၵႃႈတီႈရေႇၵျုၼ်ႇလႄႈယူႇဝၼ်းၼိုင်ႈသေယဝ်ႉ၊

၁၃ ပိူဝ်ႈဢၼ်လူမ်းတၢင်းၸၢၼ်းထူဝ်းမႃးလႄႈၼႂ်းသွင်ဝၼ်းၵူၺ်းႁွတ်ႈထိုင်ၵႂႃႇၵႃႈတီႈဝဵင်းပေႃႇတယေႃႇလိဢေႃႈ။

၁၄ ႁဝ်းထူပ်းႁၼ်ပီႈၼွင်ႉတင်းလၢႆၵႃႈတီႈဝဵင်းၼၼ်ႉသေယဝ်ႉၸွမ်းၵႃႈၼင်ႇဢၼ်ၶဝ်တွင်းပၢၼ်ႇႁႂ်ႈယူႇၸဵတ်းဝၼ်းလႄႈႁဝ်းၵေႃႈယူႇယဝ်ႉၸင်ႇပႆတၢင်းၵႂႃႇၸူးၵႃႈတီႈဝဵင်းရူဝ်းမဢေႃႈ။

၁၅ မိူဝ်ႈဢၼ်ပီႈၼွင်ႉဢၼ်မီးယူႇၵႃႈၼႂ်းဝဵင်းရူဝ်းမၸိူဝ်းၼၼ်ႉႁူႉငိၼ်းလွင်ႈဢၼ်ႁဝ်းႁွတ်ႈမႃးၼၼ်ႉၸိုင်ၶဝ်ဢွၼ်ၵၼ်လုၵ်ႉတီႈၵၢတ်ႇဢၢပ်ႉပိၵမ်ႈၽွင်ႈလုၵ်ႉတီႈၸရွပ်ႈသၢမ်လင်ဢွၵ်ႇမႃးႁႂ်ႈလႆႈႁပ်ႉႁူဝ်တၢင်းႁဝ်းဢေႃႈ။မိူဝ်ႈဢၼ်ပေႃးလုႁၼ်ၶဝ်ၼၼ်ႉၸိုင်မၼ်းယွင်ႈယေႃးၵျေးၸူးၽြႃးပဵၼ်ၸဝ်ႈလႄႈမီးတၢင်းဢၼ်ၸႂ်သၢၵ်ႈသႃႇမႃးဢေႃႈ။

၁၆ မိူဝ်ႈဢၼ်ႁဝ်းႁွတ်ႈထိုင်ၵႃႈၼႂ်းဝဵင်းရူဝ်းမၼၼ်ႉတပ်ႉမူးၼၼ်ႉဢဝ်ၵူၼ်းဢၼ်ၶၢမ်ႇတူၵ်းၵႅၼ်းၸိူဝ်းၼၼ်ႉဢၢပ်ႈပၼ်တီႈၵႄႇပႂ်ႉလႄႈပေႃးလုၸမ်းလႆႈဢၶႂၢင်ႉဢၼ်လႆႈယူႇၶေႃၶေႃလူၺ်ႈၵၼ်တင်းၵူၼ်းသိုၵ်းဢၼ်ပႂ်ႉမၼ်းၼၼ်ႉဢေႃႈ။

ပေႃးလုႁေႃးလၢတ်ႈၼႂ်းဝဵင်းရူဝ်းမ

၁၇ ပူၼ်ႉသေသၢမ်ဝၼ်းယဝ်ႉပေႃးလုႁွင်ႉဢဝ်ၶဝ်ၸိူဝ်းဢၼ်ပဵၼ်ၵူၼ်းယႂ်ႇၵူၼ်းလူင်ၵႃႈၼႂ်းၵူၼ်းယုတတင်းလၢႆမႃးလႄႈၶဝ်ၸူႉၵၼ်တုမ်ၵၼ်သေယဝ်ႉမၼ်းၸင်ႇလၢတ်ႈလႄႈဝႃႈ၊-ပီႈၼွင်ႉၶဝ်ဢိူၺ်း၊ပဵၵ်ႉသမ်ႉၵဝ်ၶႃႈဢမ်ႇပိူင်ႈဢမ်ႇလွႆးၵူၼ်းမဵဝ်းႁဝ်းဢိၵ်ႇတင်းထုင်းၸၢမ်ႇဢၼ်ပူႇပေႃႈႁဝ်းၵမ်ၵျၢင်ႉၸိူဝ်းၼၼ်ႉသေၵေႃႈၵူၼ်းဝဵင်းယေႇရုသလႅမ်ႇၸိူဝ်းၼၼ်ႉဢဝ်ၵဝ်ၶႃႈတူၵ်းၵႅၼ်းသေလႄႈဢၢပ်ႈပၼ်ၵႃႈၼႂ်းမိုဝ်းၵူၼ်းရူဝ်းမတင်းလၢႆဢေႃႈ။

၁၈ ၶဝ်ၸႅတ်ႈထၢမ်ၸႅတ်ႈတူၺ်းၵဝ်ၶႃႈသေယဝ်ႉပိူဝ်ႈဢၼ်ဢမ်ႇထူပ်းဢမ်ႇႁၼ်ဢပျႅတ်ႈဢၼ်ထုၵ်ႇတၢႆသေၸိူဝ်ႉသေပိူင်ၼၼ်ႉလႄႈၶဝ်မီးဢလူဝ်ႇၶႂ်ႈပွႆႇၵဝ်ၶႃႈလွတ်ႈဢေႃႈ။

၁၉ မိူဝ်ႈဢၼ်ၵူၼ်းယုတၸိူဝ်းၼၼ်ႉႁႄႉၶႅၼ်ဢလူဝ်ႇၼၼ်ႉၸိုင်၊ၵဝ်ၶႃႈၸင်ႇလႆႈဝႃႈတၵ်းၶၢမ်ႇဢယူႇတီႈၶုၼ်ႁေႃးၶမ်းၵေႇသႃႇဢေႃႈ၊ဝႃႈၼင်ႇၼႆဢေႃႈ။ၼႂ်းလွင်ႈဢၼ်ဝႃႈၼင်ႇၼႆၼၼ်ႉၸမ်း၊ပိူဝ်ႈဢၼ်မီးတီႈတၢင်ႇဢပျႅတ်ႈသေၸိူဝ်ႉသေပိူင်ၵႃႈၼိူဝ်ၵူၼ်းမဵဝ်းႁဝ်းလႄႈဝႃႈဢမ်ႇၸႂ်ႈ။

၂၀ ပိူဝ်ႈၼႆလႄႈၵဝ်ၶႃႈၸင်ႇလႆႈယွၼ်းႁႂ်ႈလႆႈႁၼ်လႄႈတၵ်ႉလၢတ်ႈသူၸဝ်ႈဢေႃႈ။ၵွပ်ႈပိူဝ်ႈလွင်ႈတၢင်းဢၼ်ၵူၼ်းဢိသရေႇလတင်းလၢႆမုင်ႈထႃႈမွင်းထႃႈယူႇၼၼ်ႉလႄႈၵဝ်ၶႃႈၸင်ႇလႆႈၶၢမ်ႇတၢင်းဢၼ်ဢဝ်တင်းၸိူၵ်ႈလဵၵ်းမတ်ႉၽုၵ်ႇဝႆႉၶႃႈယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၼၼ်ႉၵေႃႈလၢတ်ႈတီႈမၼ်းလႄႈဝႃႈ၊-

၂၁ ႁဝ်းၶႃႈဢမ်ႇလႆႈလိၵ်ႈၵႃႈတီႈမိူင်းယုတလူၺ်ႈလွင်ႈမႂ်း။ၼႂ်းပီႈၼွင်ႉဢၼ်လုၵ်ႉသေၵႃႈတီႈမိူင်းၼၼ်ႉမႃးၸိူဝ်းၼၼ်ႉၵေႃႈၽူႈလႂ်သေၵေႃႉသေၵူၼ်းဢမ်ႇလၢတ်ႈဢမ်ႇဝႃႈလွင်ႈတၢင်းဢၼ်တၢင်ႇဢပျႅတ်ႈတီႈမႂ်း။

၂၂ ၼႂ်းဝႃႈၼၼ်သေၵေႃႈႁဝ်းၶႃႈမီးဢလူဝ်ႇၶႂ်ႈထွမ်ႇၶႂ်ႈငိၼ်းလွင်ႈဢၼ်မႂ်းထၢင်ႇၼၼ်ႉၶႃႈဢေႃႈ။လွင်ႈမၼ်းၸမ်း၊လွင်ႈဢၼ်ဝႃႈၽႃႇသႃႇၼႆႉပဵၼ်ၽႃႇသႃႇဢၼ်လႆႈၶၢမ်ႇတၢင်းဢၼ်သေႉသွမ်းတၢင်ႇဢပျႅတ်ႈၵူႈတီႈၵူႈလႅၼ်ၼၼ်ႉၸိုင်၊ႁဝ်းၶႃႈႁူႉယူႇၶႃႈ၊ဝႃႈၼင်ႇၼႆဢေႃႈ။

၂၃ ၼင်ႇၼၼ်လႄႈၶဝ်ၼၼ်ႉၶဵၼ်းမိူဝ်ႈၶဵၼ်းဝၼ်းဝႆႉသေယဝ်ႉမႃးၵႃႈတီႈဢၼ်မၼ်းသွၼ်ႈပိုင်ႈယူႇၼၼ်ႉၼမ်ၼႃႇဢေႃႈ။မၼ်းၵေႃႈၸႃႉၸဵမ်ၶိင်ႇၵၢင်ၼႂ်တေႃႇထိုင်ႁွတ်ႈၶိင်ႇၵၢင်ၶမ်ႈၽုၺ်ႇဢွၵ်ႇၼႄပျႃးၶၢမ်ႇသၢၵ်ႈသေႇႁေႃးလၢတ်ႈလွင်ႈမိူင်းၽြႃးပဵၼ်ၸဝ်ႈလႄႈဢိင်ၵျၢမ်းပိင်းၺၢပ်ႈတိမုဝ်းသေႇတင်းၵျၢမ်းဢၼႃႇၵၢတ်ႈတိတင်းလၢႆသေလႄႈတိုၵ်းယူင်းၸူဝ်းဢဝ်လွင်ႈတၢင်းဢၼ်ၸၢပ်ႈသႅင်ႇၵၼ်တင်းၸဝ်ႈယေႇသုၼၼ်ႉဢေႃႈ။

၂၄ ၵမ်ႈၽွင်ႈယုမ်ႇၵႂၢမ်းဢၼ်မၼ်းႁေႃးလၢတ်ႈၼၼ်ႉဢေႃႈ။ၵမ်ႈၽွင်ႈၵေႃႈဢမ်ႇယုမ်ႇ။ၼင်ႇၼၼ်လႄႈၶဝ်ၼင်ႇၵၼ်ၵၼ်ၸႂ်သၽေႃးပိူင်ႈၵၼ်သေယဝ်ႉဢွၵ်ႇၵႂႃႇဢေႃႈ။

၂၅ ၼႂ်းမိူဝ်ႈဢၼ်ၶဝ်ယင်းတိုၵ်ႉဢွၵ်ႇၵႂႃႇယူႇၼၼ်ႉၸိုင်ပေႃးလုလၢတ်ႈၵႂၢမ်းၶေႃႈၼိုင်ႈလႄႈဝႃႈ၊-ဝိၺိၺ်ႇမူတ်းၸၢင်ႇၸဝ်ႈဢဝ်ပရေႃးၽႅတ်ႈဢိသႃႇယႁေႃးလၢတ်ႈၵႃႈတီႈပူႇပေႃႈႁဝ်းဝႆႉသေၶျႃႇလီငၢမ်းလႄႈဝႃႈၸမ်းၵႂႃႇၵႃႈတီႈၵူၼ်းမဵဝ်းၼၼ်ႉသေလႄႈလၢတ်ႈဝႃႈ၊-

၂၆ သူငိၼ်းယူႇသေၵေႃႈ၊သူဢမ်ႇႁူႉဢမ်ႇၸႅင်ႈ။ႁၼ်ယူႇသေၵေႃႈ၊ဢမ်ႇမၢတ်ႈဢမ်ႇတွင်း။လွင်ႈမၼ်းၸမ်း၊ႁူဝ်ၸႂ်ၶဝ်ၼၵ်းၼႃယူႇ၊ႁူၶဝ်ၶၢၼ်ႉငိၼ်းယူႇ၊မၢၵ်ႇတႃၶဝ်လပ်းယူႇဢေႃႈ။

၂၇ ၼင်ႇႁိုဝ်တႃၶဝ်တၵ်းႁၼ်၊ႁူၶဝ်တၵ်းငိၼ်း၊ႁူဝ်ၸႂ်ၶဝ်တၵ်းႁူႉၸႅင်ႈ၊တၢင်းၵမ်တၢင်းၵျၢင်ႉၶဝ်တၵ်းၶၢႆႉပုတ်ႈၸိုင်၊ၶဝ်တၵ်းလႆႈဝၢႆႇမႃးၸူးၵဝ်လႄႈႁႂ်ႈတၢင်းၶႆႈတၢင်းပဵၼ်ၶဝ်ႁၢႆၼၼ်ႉဢေႃႈ။

၂၈ ပိူဝ်ႈၼႆလႄႈသူၸဝ်ႈႁူႉႁၼ်ၵျေးၸူးတၢင်းဢၼ်ၽြႃးပဵၼ်ၸဝ်ႈၵႄႇၶျွတ်ႈဢဝ်ၼၼ်ႉ၊လႆႈၶၢမ်ႇတၢင်းဢၼ်ပၼ်ၵႂႃႇၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႄႈၶဝ်ၵေႃႈတၵ်းထွမ်ႇဢဝ်ဢေႃႈ၊ဝႃႈၼင်ႇၼႆဢေႃႈ။

၂၉ ပေႃးလုလၢတ်ႈဝႃႈၸိူဝ်ႉၼင်ႇၼႆသေယဝ်ႉၵူၼ်းယုတၸိူဝ်းၼၼ်ႉဢွၵ်ႇၵႂႃႇလႄႈမီးတၢင်းဢၼ်ၼင်ႇၵၼ်ၵၼ်တိူင်ႇပၢင်ႇလၢတ်ႈၸႃၵၼ်ၼမ်ၼႃႇဢေႃႈ။

၃၀ လိုၼ်းၼၼ်ႉၸင်ႇမၼ်းယူႇၵႃႈၼႂ်းႁိူၼ်းဢၼ်မၼ်းၶၢတ်ႈဢဝ်ၼၼ်ႉသွင်ပီႊတဵမ်တဵမ်လႄႈၶၢမ်ႇၶႅၵ်ႇတီႈၶဝ်ၸိူဝ်းဢၼ်မႃးၸူးၵႃႈတီႈမၼ်းတင်းသဵင်ႈတင်းလူင်ၸိူဝ်းၼၼ်ႉဢေႃႈ။

ၽူႈလႂ်ၵေႃႈယင်းဢမ်ႇႁႄႉဢမ်ႇၶႅၼ်ဢၼ်မၼ်းႁေႃးလၢတ်ႈႁတ်းႁတ်းႁၢၼ်ႁၢၼ်လွင်ႈမိူင်းၽြႃးပဵၼ်ၸဝ်ႈလႄႈသင်ႇသွၼ်ၼႄပျႃးလွင်ႈတၢင်းဢၼ်ၸၢပ်ႈသႅင်ႇၵၼ်တင်းၸဝ်ႈယေႇသုၶရိၸ်ႉၼၼ်ႉဢေႃႈ။