Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၁

ၸဝ်ႈယေႇသုၶိုၼ်ႈၵႂႃႇမိူင်းၵၢင်ႁၢဝ်

၁ ဢူဝ်းထေႃႇၽိလု။လွင်ႈတၢင်းဢၼ်ၸဝ်ႈယေႇသုၸႃႉႁဵတ်းလႄႈသင်ႇသွၼ်ပၼ်တေႃႇထိုင်ႁွတ်ႈမိူဝ်ႈဝၼ်းဢၼ်မၼ်းၸဝ်ႈဢဝ်တင်းဝိၺိၺ်ႇမူတ်းၸၢင်ႇၸဝ်ႈ

၂ သင်ႇလၢတ်ႈဝႆႉတီႈတမၢၼ်ႇၸဝ်ႈဢၼ်မၼ်းၸဝ်ႈလိူၵ်ႈၵဵပ်းဢဝ်ၸိူဝ်းၼၼ်ႉသေယဝ်ႉလႆႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵႃႈၼိူဝ်ၼၼ်ႉၸိုင်၊ၵဝ်ၸီႇယၢင်ႇတႅမ်ႈလိၵ်ႈၽိုၼ်ဢွၼ်တၢင်းၼၼ်ႉဝႆႉယဝ်ႉ။

၃ မၼ်းၸဝ်ႈၼၼ်ႉလႆႈၶၢမ်ႇတၢင်းတၢႆသေယဝ်ႉၼႄပျႃးတူဝ်မၼ်းၸဝ်ႈတီႈၼၼ်ႉသီႇသိပ်းဝၼ်းတဵမ်တဵမ်လႄႈႁေႃးလၢတ်ႈလွင်ႈတၢင်းဢၼ်ၸၢပ်ႈသႅင်ႇၵၼ်တင်းမိူင်းၽြႃးပဵၼ်ၸဝ်ႈၸိူဝ်းၼၼ်ႉသေလႄႈဢဝ်တင်းသၢၵ်ႈသေႇဢၼ်မၼ်ႈဢၼ်ၶိူင်ႇၼမ်ၼႃႇၼႄပျႃးလွင်ႈဢၼ်မၼ်းၸဝ်ႈဢသၢၵ်ႈလိပ်းယူႇၼၼ်ႉဢေႃႈ။

၄ မၼ်းၸဝ်ႈယူႇလူၺ်ႈၵၼ်တင်းၶဝ်ၼၼ်ႉသေယဝ်ႉ၊လွင်ႈၼင်ႇႁိုဝ်ၶဝ်တၵ်းဢမ်ႇဢွၵ်ႇသေၵႃႈၼႂ်းဝဵင်းယေႇရုသလႅမ်ႇၵႂႃႇလႄႈတၵ်းလႆႈပႂ်ႉထႃႈၵတိပေႃႈၸဝ်ႈၼၼ်ႉၸိုင်၊မၼ်းၸဝ်ႈသင်ႇလၢတ်ႈဝႆႉလႄႈဝႃႈ၊-

၅ ၵတိၼၼ်ႉၸိုင်သူလႆႈငိၼ်းၵႃႈတီႈၵဝ်ဢေႃႈ။ၵတိၼၼ်ႉၸမ်း၊ယုဝ်းႁၢၼ်ႇပၼ်ပပ်ႉတိၸၢမ်ႇၼႂ်းၼမ်ႉဢေႃႈ။သူၸမ်းဢမ်ႇပေႃးႁိုင်ပေႃးၼၢၼ်းတၵ်းလႆႈၶၢမ်ႇပပ်ႉတိၸၢမ်ႇၼႂ်းဝိၺိၺ်ႇမူတ်းၸၢင်ႇၸဝ်ႈဢေႃႈ၊ဝႃႈၼႆမီးမႃးၼင်ႇၼႆယဝ်ႉ။

၆ ၶဝ်ၼၼ်ႉၵေႃႈၸူႉၵၼ်တုမ်ၵၼ်သေယဝ်ႉလဝ်ႈထၢမ်လႄႈဝႃႈ၊-ၸဝ်ႈႁဝ်းမိူဝ်ႈလဵဝ်ၼႆႉတၵ်းၶိုၼ်းပၼ်မိူင်းတီႈၵူၼ်းမဵဝ်းဢိသရေႇလတင်းလၢႆၶႃႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၸဝ်ႈၵေႃႈလၢတ်ႈလႄႈဝႃႈ၊-

၇ ဢၶႂၢင်ႉဢၼ်တၵ်းလႆႈႁူႉၶိင်ႇၵႃႇလႃႉဢၼ်ပေႃႈၸဝ်ႈဢဝ်တၼ်းၶူဝ်းမၼ်းၸဝ်ႈလႄႈၸီႇယၢင်ႇဝႆႉၸိူဝ်းၼၼ်ႉဢမ်ႇမီးတီႈသူ။

၈ ၼႂ်းဝႃႈၼၼ်သေၵေႃႈယၢမ်းမိူဝ်ႈဢၼ်ဝိၺိၺ်ႇမူတ်းၸၢင်ႇၸဝ်ႈလူင်းမႃးၵႃႈၼိူဝ်သူၼၼ်ႉၸိုင်၊သူတၵ်းလႆႈၶၢမ်ႇဢဝ်ႁႅင်းတၼ်းၶူဝ်းလႄႈတၵ်းပဵၼ်ၵေႃႉဢၼ်ၶၢမ်ႇသၢၵ်ႈသေႇၵဝ်ၸႃႉၸဵမ်ၵႃႈၼႂ်းဝဵင်းယေႇရုသလႅမ်ႇတင်းမိူင်းယုတတင်းမိူင်းသမႃႇရိတေႃႇထိုင်ႁွတ်ႈတီႈသုတ်းလိၼ်မိူင်းပုၼ်ႉဢေႃႈ၊ဝႃႈၼင်ႇၼႆသေယဝ်ႉ၊

၉ ၼႂ်းမိူဝ်ႈဢၼ်ၶဝ်ယင်းတိုၵ်ႉလူတူၺ်းယူႇၼၼ်ႉၸိုင်မၼ်းၸဝ်ႈၶၢမ်ႇတၢင်းဢၼ်မွၵ်ႇၵုမ်ႈႁပ်ႉဢဝ်မၼ်းၸဝ်ႈၶိုၼ်ႈၵႂႃႇၵႃႈၼိူဝ်ၵၢင်ႁၢဝ်ပုၼ်ႉလႄႈလပ်ႉတႃၶဝ်ၵႂႃႇသေဢေႃႈ။

၁၀ ၼႂ်းမိူဝ်ႈဢၼ်မၼ်းၸဝ်ႈၶိုၼ်ႈၵႂႃႇၸိူဝ်ႉၼင်ႇၼၼ်လႄႈၶဝ်ယင်းတိုၵ်ႉမုင်ႈတူၺ်းၵႃႈၼိူဝ်ၵၢင်ႁၢဝ်ၸေးၸေးၸွတ်ႇၸွတ်ႇယူႇၼၼ်ႉၸိုင်ၵူၼ်းသွင်ၵေႃႉဢၼ်ၼုင်ႈမႆႊၶူဝ်းၼုင်ႈဢၼ်ၽိူၵ်ႇဢၼ်ၶၢဝ်ၼၼ်ႉၽုတ်းပေႃႇမႃးၵႃႈတီႈႁိမ်းၶဝ်လႄႈလၢတ်ႈဝႃႈ၊-

၁၁ ၵူၼ်းၵႃႇလိလႄးၶဝ်ဢိူၺ်း၊ႁဵတ်းသင်လႄႈသူၸုၵ်းယူႇမုင်ႈတူၺ်းယူႇၵႃႈၼိူဝ်ၵၢင်ႁၢဝ်ၼၼ်ႉ။ၸဝ်ႈယေႇသုဢၼ်ၽၢတ်ႇယၢၼ်ၵၼ်တင်းသူလႄႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵႃႈၼိူဝ်ၵၢင်ႁၢဝ်ပုၼ်ႉၼၼ်ႉၸိူဝ်ႉၼင်ႇဢၼ်မၼ်းၸဝ်ႈၶိုၼ်ႈၵႂႃႇၵႃႈၼိူဝ်ၵၢင်ႁၢဝ်သိုဝ်ႈၼႃႈတႂ်ႈတႃသူၼၼ်ႉမၼ်းၸဝ်ႈသမ်ႉၶိုၼ်းတၵ်းလူင်းမႃးထႅင်ႈပွၵ်ႈၼိုင်ႈလူးၵွၼ်ႇဢေႃႈ၊ဝႃႈၼင်ႇၼႆဢေႃႈ။

လိူၵ်ႈၵဵပ်းဢဝ်မၢတ်ႈထိႁႂ်ႈၶၢမ်ႇဢရႃႇယုတဢိသၵႃႇရေႇဢုတ်ႉ

၁၂ မိူဝ်ႈၼၼ်ႉၶဝ်လုၵ်ႉသေၵႃႈတီႈလွႆဢၼ်လႆႈႁွင်ႉႁိၵ်ႈၸိုဝ်လွႆသၼ်ႇလုၼ်ႇ၊ဢၼ်ၶၢဝ်းတၢင်းၵႆယၢၼ်ၵၼ်တင်းဝဵင်းယေႇရုသလႅမ်ႇပၢတ်ႈၼိုင်ႈၼၼ်ႉသေလႄႈၶိုၼ်းမိူဝ်းၵႂႃႇၸူးၵႃႈတီႈဝဵင်းယေႇရုသလႅမ်ႇဢေႃႈ။

၁၃ မိူဝ်ႈဢၼ်ႁွတ်ႈထိုင်ယဝ်ႉၼၼ်ႉၸိုင်ၶဝ်ၶိုၼ်ႈၵႂႃႇၸူးၵႃႈတီႈလုၵ်းႁိူၼ်းႁၢၼ်ႉၼိူဝ်တီႈဢၼ်ပေႇတရု၊ယႃႇၵုပ်ႉ၊ယုဝ်းႁၢၼ်ႇ၊ဢၼ်ႇတရေႇ၊ၽိလိပ်ႉပု၊ထုဝ်းမ၊ပႃႇထေႃးလမႄး၊မၢတ်ႈထႄႇ၊ယႃႇၵုပ်ႉဢၼ်ပဵၼ်လုၵ်ႈၸၢႆးဢႃႇလၽေႇ၊သိမုၼ်ႇ၊ၸေႇလုတ်ႉ၊ယုတဢၼ်ပဵၼ်ၼွင်ႉၸၢႆးယႃႇၵုပ်ႉ၊ၶဝ်ယူႇသဝ်းၼၼ်ႉဢေႃႈ။

၁၄ ၶဝ်တင်းသဵင်ႈတင်းလူင်ၽွမ်ႉၵၼ်ၶတ်းၸႂ်ႁဵတ်းသူးတွင်းပထၼႃႇလူၺ်ႈၵၼ်တင်းမေႈယိင်းတင်းလၢႆဢိၵ်ႇတင်းမႃႇရိ၊မေႈၸဝ်ႈယေႇသု၊တင်းၼွင်ႉၸၢႆးၸဝ်ႈၸိူဝ်းၼၼ်ႉယူႇဢေႃႈ။

၁၅ မိူဝ်ႈၼၼ်ႉပေႇတရုလုၵ်ႉၸုၵ်းၵႃႈၼႂ်းၵၢင်တပႄးၸဝ်ႈဢၼ်ၸူႉၵၼ်တုမ်ၵၼ်ယူႇတီႈလဵဝ်မီးပၢၵ်ႇပၢႆသၢဝ်းၼိုင်ႈၸမ်ၸမ်ၸိူဝ်းၼၼ်ႉသေလႄႈလၢတ်ႈဝႃႈ၊-

၁၆ ပီႈၼွင်ႉၶဝ်ဢိူၺ်း၊တီႈၼႂ်းၵျၢမ်းလိၵ်ႈဢၼ်ဝိၺိၺ်ႇမူတ်းၸၢင်ႇၸဝ်ႈဢဝ်တင်းသူပ်းတႃႇဝိတ်ႉပျႃႇတိၵ်ႈဝႆႉလွင်ႈယုတဢိသၵႃႇရေႇဢုတ်ႉ၊ၵေႃႉဢၼ်ၼႄပၼ်သဵၼ်ႈတၢင်းတီႈၶဝ်ၸိူဝ်းဢၼ်တီႉဢဝ်ၸဝ်ႈယေႇသုၼၼ်ႉၸိုင်၊ယင်းဢမ်ႇတဵမ်ဢမ်ႇထူၼ်ႈလႄႈဢမ်ႇလႆႈယူႇ။

၁၇ ၵေႃႉၼၼ်ႉလႆႈၶၢမ်ႇတၢင်းဢၼ်ၼပ်ႉဢၢၼ်ႇၶဝ်ႈပႃးႁူမ်ႈလူၺ်ႈၵၼ်တင်းႁဝ်းလႄႈလႆႈဢၶႂၢင်ႉၼႂ်းဢမူႉၸဝ်ႈယဝ်ႉ။

၁၈ ၵေႃႉၼၼ်ႉဢဝ်တင်းငိုၼ်းဢၼ်လႆႈၵွပ်ႈပိူဝ်ႈဢမူႉဢၼ်ဢမ်ႇတြႃးၼၼ်ႉသေလႄႈသိုဝ်ႉဢဝ်လိၼ်ၵႂၢၵ်ႉၼိုင်ႈယဝ်ႉၸင်ႇလူမ်ႉပၵ်းၶိတ်းတူၵ်းသေယဝ်ႉတွင်ႉတႅၵ်ႇလႄႈသႆႈမၼ်းဢွၵ်ႇယဝ်ႉ။

၁၉ လွင်ႈတၢင်းၼၼ်ႉၸိုင်ၵူၼ်းဢၼ်ယူႇၵႃႈၼႂ်းဝဵင်းယေႇရုသလႅမ်ႇတင်းသဵင်ႈတင်းလူင်ႁူႉလႄႈၸွမ်းၼင်ႇၵႂၢမ်းၽႃႇသႃႇၶဝ်ၼၼ်ႉၶဝ်ႁွင်ႉႁိၵ်ႉၵႂၢၵ်ႉလိၼ်ၼၼ်ႉဝႃႈ၊-ဢၵေႇလတမ၊ဝႃႈၼႆဢေႃႈ။ဢထိၵ်ႈပႄႇမၼ်းၸမ်း၊ၵႂၢၵ်ႉလိၼ်လိူတ်ႈ၊ဝႃႈၼင်ႇၼႆဢေႃႈ။

၂၀ ဢၼ်တႅမ်ႈဝႆႉၼႂ်းၵျၢမ်းသႃႇလၢမ်ႇလႄႈဝႃႈၸမ်း၊-ႁႂ်ႈတီႈဢၼ်မၼ်းယူႇၼၼ်ႉပဵၼ်တီႈဢၼ်ၵူၼ်းသိတ်ႇၵူၼ်းယဵၼ်သေၵမ်းလူၺ်ႈ။ယႃႇပေႁႂ်ႈမီးၵေႃႉဢၼ်ယူႇသေၵမ်းလူၺ်ႈ။ဢရႃႇမၼ်းၵေႃႈႁႂ်ႈပိူၼ်ႈတၢင်ႇၵေႃႉလႆႈသေၵမ်းလူၺ်ႈ၊ဝႃႈၼင်ႇၼႆဢေႃႈ။

၂၁ ပိူဝ်ႈၼႆလႄႈႁဝ်းလိူၵ်ႈၵဵပ်းဢဝ်သေၵေႃႉၵေႃႉၵႃႈၼႂ်းၶဝ်ၸိူဝ်းဢၼ်ႁဵတ်းၵေႃႉႁဵတ်းသေႈႁူမ်ႈလူၺ်ႈၵၼ်တင်းႁဝ်းၼႂ်းၶိင်ႇၵႃႇလႃႉဢၼ်ၸဝ်ႈယေႇသုၵႂႃႇမႃးၶဝ်ႈဢွၵ်ႇလူၺ်ႈၵၼ်တင်းႁဝ်း၊

၂၂ ၸႃႉၸဵမ်မိူဝ်ႈၶိင်ႇဢၼ်ယုဝ်းႁၢၼ်ႇပၼ်ပပ်ႉတိၸၢမ်ႇတေႃႇထိုင်ႁွတ်ႈဝၼ်းဢၼ်မၼ်းၸဝ်ႈၽၢတ်ႇယၢၼ်ၵၼ်တင်းႁဝ်းလႄႈၶၢမ်ႇတၢင်းဢၼ်ဢဝ်ၶိုၼ်ႈၵႂႃႇၵႃႈၼိူဝ်ပုၼ်ႉၼၼ်ႉ၊ၽူႈလႂ်တၵ်းလႆႈပဵၼ်ၵေႃႉဢၼ်တၵ်းလႆႈၶၢမ်ႇသၢၵ်ႈသေႇလူၺ်ႈၵၼ်တင်းႁဝ်းၼႂ်းလွင်ႈတၢင်းဢၼ်မၼ်းၸဝ်ႈလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉ၊ဝႃႈၼင်ႇၼႆလႄႈ၊

၂၃ ၶဝ်ၸင်ႇဢဝ်ၵူၼ်းသွင်ၵေႃႉဢၼ်မီးၸိုဝ်ဝႃႈယုဝ်းသႅပ်ႉ၊ဢမ်ႇၼၼ်ပႃႇသပ၊ဝၢႆးလင်ဢၼ်လႆႈၸိုဝ်မႂ်ႇယုသတုဢိၵ်ႇတင်းမၢတ်ႈထိသေယဝ်ႉသူးတွင်းလႄႈဝႃႈ၊-

၂၄ ဢူဝ်း၊ၸဝ်ႈၽြႃးဢၼ်ႁူႉႁၼ်ႁူဝ်ၸႂ်ၵူၼ်းတင်းသဵင်ႈတင်းလူင်ၼၼ်ႉတီႈၶႃႈ။

၂၅ ၼႂ်းၶဝ်သွင်ၵေႃႉၼႆႉၶႅၼ်းတေႃႈၼႄပျႃႉပၼ်ၵေႃႉဢၼ်ၸဝ်ႈႁဝ်းလိူၵ်ႈၵဵပ်းဢဝ်ႁႂ်ႈလႆႈၶၢမ်ႇဢဝ်ဢရႃႇထမ်ႇမႃႉသြႃႇတင်းဢရႃႇတမၢၼ်ႇၸဝ်ႈၼၼ်ႉသေၵမ်းတီႈၶႃႈ၊ဝႃႈၼင်ႇၼႆယဝ်ႉၸင်ႇ

၂၆ တူၵ်းၸႃႇၵွၵ်ႈလႄႈမၢတ်ႈထိလႆႈၸႃႇၵွၵ်ႈလႄႈမၼ်းလႆႈၶဝ်ႈပႃးႁူမ်ႈလူၺ်ႈၵၼ်တင်းတမၢၼ်ႇၸဝ်ႈသိပ်းဢဵတ်းပႃးၸိူဝ်းၼၼ်ႉဢေႃႈ။