Shan Missions

ၵျၢမ်းၶၢဝ်ႇငၢဝ်ႊသတၢင်းသိူဝ်းပျေႃႇယုဝ်းႁၢၼ်ႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂၀    ၂၁   

၈

၁ ၸဝ်ႈယေႇသုၵေႃႈၵႂႃႇၵႃႈတီႈလွႆသၼ်ႇလုၼ်ႇၼၼ်ႉသေဢေႃႈ။ၵၢင်ၼႂ်ၸဝ်ႉၸဝ်ႉမၼ်းၸဝ်ႈသမ်ႉၶိုၼ်းၶဝ်ႈၵႃႈၼႂ်းပိၵ်ႉမၢၼ်ႇၸဝ်ႈလႄႈၵူၼ်းတင်းသဵင်ႈတင်းလူင်မႃးၵႃႈတီႈမၼ်းၸဝ်ႈဢေႃႈ။

၂ ၼႂ်းမိူဝ်ႈဢၼ်မၼ်းၸဝ်ႈယင်းတိုၵ်ႉၼင်ႈလႄႈသင်ႇသွၼ်သုင်းမႃႉပၼ်ယူႇၼၼ်ႉၸိုင်၊

၃ ၵူၼ်းထုတ်ႇၵျၢမ်းဢိၵ်ႇတင်းၽႃႇရိသေးတင်းလၢႆဢဝ်မေႈယိင်းၵေႃႉၼိုင်ႈဢၼ်ၽိတ်းပိူင်ႈၵႃႇမေႇသုၼၼ်ႉမႃးဝႆႉၵႃႈတီႈၼႂ်းၶိုင်ႈၵၢင်ၶဝ်သေယဝ်ႉလၢတ်ႈဝႃႈ၊-

၄ သြႃႇၸဝ်ႈႁဝ်းၶႃႈလႆႈထူပ်းႁၼ်မေႈယိင်းၵေႃႉၼႆႉမိူဝ်ႈဢၼ်မၼ်းယင်းတိုၵ်ႉႁဵတ်းတၢင်းဢၼ်ၽိတ်းပိူင်ႈၵႃႇမေႇသုယူႇၼၼ်ႉၶႃႈယဝ်ႉ။

၅ မေႈယိင်းၸိူဝ်ႉၼင်ႇၼႆၼႆႉတၵ်းလႆႈၶၢမ်ႇတၢင်းဢၼ်ဢဝ်မၢၵ်ႇႁိၼ်ထိမ်ႈတၢႆဢေႃႈ၊ဝႃႈၼႆမုဝ်းသေႇၸီႇယၢင်ႇဝႆႉၼႂ်းပိင်းၺၢပ်ႈတြႃးတီႈႁဝ်းၶႃႈယဝ်ႉ။ၼႂ်းဝႃႈၼၼ်သေၵေႃႈၸဝ်ႈႁဝ်းတၵ်းဝႃႈၸိူဝ်ႉၼင်ႇႁိုဝ်ၶႃႈ၊ဝႃႈၼင်ႇၼႆဢေႃႈ။

၆ လွင်ႈဢၼ်ၶဝ်လဝ်ႈလၢတ်ႈၸိူဝ်ႉၼင်ႇၼၼ်ၸမ်း၊ၼင်ႇႁိုဝ်တၵ်းလႆႈမီးတီႈဢၼ်တၢင်ႇဢပျႅတ်ႈတီႈမၼ်းၸဝ်ႈၼၼ်ႉၶဝ်ၸင်ႇၸၢမ်းတူၺ်းယႃႉယူၵ်ႉမၼ်းၸဝ်ႈၵူၺ်းဢေႃႈ။ၸဝ်ႈယေႇသုၵေႃႈၵူမ်ႈသေယဝ်ႉဢဝ်တင်းၼဵဝ်ႉမိုဝ်းမၼ်းၸဝ်ႈၶိတ်ႇတႅမ်ႈၵႃႈၼိူဝ်လိၼ်ယူႇဢေႃႈ။

၇ မိူဝ်ႈဢၼ်ၶဝ်လဝ်ႈထၢမ်ၶိူဝ်းၶိူဝ်းယႂ်းယႂ်းယူႇၼၼ်ႉၸိုင်မၼ်းၸဝ်ႈလုၵ်ႉငွၵ်ႈသေလႄႈလၢတ်ႈဝႃႈ၊-ၼႂ်းသူၼႆႉၵေႃႉဢၼ်ဢမ်ႇမီးဢပျႅတ်ႈၵႃႈသင်ၼၼ်ႉႁႂ်ႈမၼ်းဢဝ်မၢၵ်ႇႁိၼ်ထိမ်ႈဢွၼ်တၢင်းတႃႉဝႃႈၼင်ႇၼႆသေယဝ်ႉ

၈ မၼ်းၸဝ်ႈသမ်ႉၶိုၼ်းၵူမ်ႈလႄႈၶိတ်ႇတႅမ်ႈယူႇၵႃႈၼိူဝ်လိၼ်ဢေႃႈ။

၉ မိူဝ်ႈဢၼ်ၶဝ်လႆႈငိၼ်းၵႂၢမ်းၼၼ်ႉၸိုင်ၵႂပ်ႈပိူဝ်ႈဢၼ်ႁူဝ်ၸႂ်တူဝ်ၸဝ်ႈၵဝ်ႇၽုၺ်ႇဢွၵ်ႇၼႄပျႃးဢပျႅတ်ႈတူဝ်ၸဝ်ႈၵဝ်ႇႁင်းၽႂ်ႁင်းမၼ်းလႄႈၸႃႉၸဵမ်ၵေႃႉဢၼ်ဢသၢၵ်ႈယႂ်ႇသေပိူၼ်ႈတေႃႇႁွတ်ႈၵေႃႉဢၼ်ဢသၢၵ်ႈလဵၵ်ႉသေပိူၼ်ႈၵေႃႉၼိုင်ႈယဝ်ႉၵေႃႉၼိုင်ႈၶဝ်ဢွၼ်ၵၼ်ပၢႆႊဢွၵ်ႇၵႂႃႇသေဢေႃႈ။ၵိုတ်းၵျၢၼ်ႇၸဝ်ႈယေႇသုပႃးလဵဝ်ၵူၺ်းလႄႈမေႈယိင်းၼၼ်ႉၵေႃႈၸုၵ်းဝႆႉယူႇဢေႃႈ။

၁၀ မိူဝ်ႈၼၼ်ႉၸဝ်ႈယေႇသုၶိုၼ်းလုၵ်ႉငွၵ်ႈလႄႈလႆႈႁၼ်မေႈယိင်းၼၼ်ႉၵေႃႉလဵဝ်ၵူၺ်းဢမ်ႇႁၼ်ၽူႈလႂ်သေၵေႃႉသေၵူၼ်းၼၼ်ႉၸိုင်မၼ်းၸဝ်ႈထၢမ်ဝႃႈ၊-မေႈယိင်းဢိူၺ်း၊ၶဝ်ၸိူဝ်းဢၼ်တၢင်ႇဢပျႅတ်ႈတီႈမႂ်းၸိူဝ်းၼၼ်ႉမီးၵႃႈတီႈလႂ်။ၽူႈလႂ်ၵေႃႈဢမ်ႇၸီႇယၢင်ႇမႂ်းႁိုဝ်၊ဝႃႈၼင်ႇၼႆဢေႃႈ။

၁၁ မေႈယိင်းၼၼ်ႉၵေႃႈလဝ်ႈလၢတ်ႈလႄႈဝႃႈ၊-ၽူႈလႂ်ၵေႃႈဢမ်ႇၸီႇယၢင်ႇၵဝ်ၶႃႈ၊ဝႃႈၼင်ႇၼႆဢေႃႈ။မၼ်းၸဝ်ႈၵေႃႈလၢတ်ႈလႄႈဝႃႈ၊-ၵဝ်ၵေႃႈဢမ်ႇၸီႇယၢင်ႇဢမူႉမႂ်း။ၵႂႃႇတႃႉ။ၵမ်းလိုၼ်းယႃႇပေႁဵတ်းတူႉၸရိူၵ်ႈဢပျႅတ်ႈထႅင်ႈယဝ်ႉ၊ဝႃႈၼင်ႇၼႆဢေႃႈ။

သၢၵ်ႈသေႇၸဝ်ႈယေႇသုဢၼ်တႄႇမၼ်ႈ

၁၂ လၢႆးသမ်ႉၸဝ်ႈယေႇသုလၢတ်ႈလႄႈဝႃႈ၊-ၵဝ်ပဵၼ်ဢၼ်လႅင်းလေႃးၵႃႉၼႆႉဢေႃႈ။ၵေႃႉဢၼ်ၸွမ်းပႃႈလင်ၵဝ်ၼၼ်ႉဢမ်ႇၵႂႃႇဢမ်ႇမႃးၵႃႈၼႂ်းဢၼ်လပ်းသိင်ႇ။တၵ်းလႆႈဢၼ်လႅင်းဢသၢၵ်ႈဢေႃႈ၊ဝႃႈၼင်ႇၼႆဢေႃႈ။

၁၃ ၽႃႇရိသေးတင်းလၢႆၵေႃႈလၢတ်ႈလႄႈဝႃႈ၊-မႂ်းၶၢမ်ႇသၢၵ်ႈသေႇလွင်ႈတူဝ်ၸဝ်ႈၵဝ်ႇၵူၺ်းဢေႃႈ။

၁၄ သၢၵ်ႈသေႇမႂ်းဢမ်ႇတႄႇဝႃႈၼင်ႇၼႆဢေႃႈ။ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ပဵၵ်ႉသမ်ႉၵဝ်ၶၢမ်ႇသၢၵ်ႈသေႇလွင်ႈတူဝ်ၸဝ်ႈၵဝ်ႇသေၵေႃႈသၢၵ်ႈသေႇၵဝ်တႄႇဢေႃႈ။လွင်ႈမၼ်းၸမ်းၵဝ်လုၵ်ႉၵႃႈတီႈလႂ်မႃး၊ဝႃႈၼႆလႄႈသင်၊ၵဝ်ၵႂႃႇၵႃႈတီႈလႂ်ပုၼ်ႉ၊ဝႃႈၼႆလႄႈသင်ၵဝ်ႁူႉယူႇဢေႃႈ။ၵဝ်လုၵ်ႉၵႃႈတီႈလႂ်မႃးၵဝ်ၵႂႃႇၵႃႈတီႈလႂ်ဝႃႈၼႆသူဢမ်ႇႁူႉ။

၁၅ သူၸၢင်ႊၸီႇယၢင်ႇၸွမ်းၼင်ႇၸႃႇတိပၵတိဢေႃႈ။ၵဝ်ဢမ်ႇၸီႇယၢင်ႇၽူႈလႂ်သေၵေႃႉသေၵူၼ်း။ၵူၺ်းၵႃႈပေႃးၵဝ်ၸီႇယၢင်ႇၸိုင်တၢင်းၸီႇယၢင်ႇၵဝ်ၼၼ်ႉတႄႇဢေႃႈ။

၁၆ လွင်ႈမၼ်းၸမ်းၵဝ်ၸီႇယၢင်ႇႁင်းၵဝ်ဢမ်ႇၸႂ်ႈ။ၵဝ်တင်းပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉၽွမ်ႉၵၼ်ၸီႇယၢင်ႇဢေႃႈ။

၁၇ ၸိူဝ်ႉၼင်ႇဢၼ်ၼႂ်းၵျၢမ်းပိင်းၺၢပ်ႈတိသူမီးၼၼ်ႉၵႂၢမ်းၶၢမ်ႇသၢၵ်ႈသေႇၵူၼ်းသွင်ၵေႃႉၼၼ်ႉတၵ်းလႆႈတႄႇဢေႃႈ၊ဝႃႈၼႆမီးဝႆႉယူႇဢေႃႈ။

၁၈ ၵဝ်ပဵၼ်ၵေႃႉဢၼ်ၶၢမ်ႇသၢၵ်ႈသေႇလွင်ႈတူဝ်ၸဝ်ႈၵဝ်ႇဢေႃႈ။ပေႃႈၸဝ်ႈဢၼ်ပွႆႇၸႂ်ႉၵဝ်မႃးၼၼ်ႉၵေႃႈၶၢမ်ႇသၢၵ်ႈသေႇလွင်ႈၵဝ်ယူႇဢေႃႈ၊ဝႃႈၼင်ႇၼႆဢေႃႈ။

၁၉ ၶဝ်ၸိူဝ်းၼၼ်ႉၵေႃႈထၢမ်လႄႈဝႃႈ၊-ပေႃႈမႂ်းမီးၵႃႈတီႈလႂ်၊ဝႃႈၼင်ႇၼႆဢေႃႈ။ၸဝ်ႈယေႇသုၵေႃႈလၢတ်ႈလႄႈဝႃႈ၊-သူဢမ်ႇႁူႉၵဝ်။ပေႃႈၸဝ်ႈၼၼ်ႉၵေႃႈသူဢမ်ႇႁူႉ။ပေႃးသူႁူႉၵဝ်ၸိုင်ၸဝ်ႈပေႃႈၵဝ်ၼၼ်ႉၵေႃႈသူတၵ်းႁူႉဢေႃႈ၊ဝႃႈၼင်ႇၼႆဢေႃႈ။

၂၀ မၼ်းၸဝ်ႈလၢတ်ႈၵႂၢမ်းၼႆႉၼႂ်းမိူဝ်ႈဢၼ်မၼ်းၸဝ်ႈသင်ႇသွၼ်သုင်းမႃႉပၼ်ၼႂ်းပိၵ်ႉမၢၼ်ႇၸဝ်ႈႁိမ်းတိူၵ်ႈၽၼ်ႇတႃႇၼၼ်ႉဢေႃႈ။ပိူဝ်ႈဢၼ်ၶိင်ႇမၼ်းၸဝ်ႈဢမ်ႇပႆႇႁွတ်ႈပႆႇထိုင်လႄႈၽူႈလႂ်ၵေႃႈဢမ်ႇတီႉဢမ်ႇဢဝ်မၼ်းၸဝ်ႈလႆႈ။

၂၁ လၢႆးသမ်ႉမၼ်းၸဝ်ႈသမ်ႉလၢတ်ႈလႄႈဝႃႈ၊-ၵဝ်တၵ်းလႆႈၵႂႃႇဢေႃႈ။သူတၵ်းႁႃၵဝ်ဢေႃႈ။သူတၵ်းတၢႆၵႃႈၼႂ်းဢပျႅတ်ႈသူဢေႃႈ။

၂၂ တီႈဢၼ်ၵဝ်ၵႂႃႇၼၼ်ႉသူဢမ်ႇမႃးလႆႈ။ၵူၼ်းယုတတင်းလၢႆၵေႃႈလၢတ်ႈလႄႈဝႃႈ၊-မိူဝ်ႈဢၼ်မၼ်းဝႃႈတီႈဢၼ်ၵဝ်ၵႂႃႇၼၼ်ႉသူဢမ်ႇမႃးလႆႈ၊ဝႃႈၼင်ႇၼႆၼၼ်ႉၸွင်ႇမၼ်းတၵ်းဢဝ်တူဝ်မၼ်းတၢႆႁိုဝ်၊ဝႃႈၼင်ႇၼႆဢေႃႈ။

၂၃ မၼ်းၸဝ်ႈၵေႃႈလၢတ်ႈလႄႈဝႃႈ၊-သူပဵၼ်ၵူၼ်းၵႃႈတႂ်ႈဢေႃႈ။ၵဝ်ၸမ်းပဵၼ်ၵူၼ်းၵႃႈၼိူဝ်ဢေႃႈ။သူပဵၼ်ၵူၼ်းလေႃးၵီႇၼႆႉဢေႃႈ။

၂၄ ၵဝ်ၸမ်းဢမ်ႇၸႂ်ႈၵူၼ်းလေႃးၵီႇ။ပိူဝ်ႈၼႆလႄႈသူတၵ်းတၢႆၵႃႈၼႂ်းဢပျႅတ်ႈသူဢေႃႈ၊ဝႃႈၼႆၵဝ်ဝႃႈဢေႃႈ။ပေႃးသူဢမ်ႇယုမ်ႇလွင်ႈဢၼ်ၵဝ်ပဵၼ်ၵေႃႉၼၼ်ႉၸိုင်သူတၵ်းတၢႆၵႃႈၼႂ်းဢပျႅတ်ႈသူဢေႃႈ၊ဝႃႈၼင်ႇၼႆဢေႃႈ။

၂၅ ၶဝ်ၸိူဝ်းၼၼ်ႉၵေႃႈထၢမ်လႄႈဝႃႈ၊-မႂ်းပဵၼ်ၽူႈလႂ်၊မိူဝ်ႈဢၼ်ဝႃႈၼင်ႇၼႆၸိုင်ၸဝ်ႈယေႇသုၵေႃႈလၢတ်ႈလႄႈဝႃႈ၊-ၵဝ်ပဵၼ်ယူႇၵႃႈၼင်ႇဢၼ်ၵဝ်လၢတ်ႈတီႈသူၸဵမ်မိူဝ်ႈၵေႃႇၸႃႉမၼ်းၼၼ်ႉဢေႃႈ။

၂၆ တီႈဢၼ်ၵဝ်လီလၢတ်ႈလွင်ႈဢၼ်ၸီႇယၢင်ႇသူၼၼ်ႉၸိုင်မီးၼမ်ၼႃႇဢေႃႈ။ၼႂ်းဝႃႈၼၼ်သေၵေႃႈၵေႃႉဢၼ်ပွႆႇၸႂ်ႉၵဝ်မႃးၼၼ်ႉတဵမ်ထူၼ်ႈဝႆႉတင်းသႅတ်ႈၸႃႇဢေႃႈ။ၵဝ်ႁေႃးလၢတ်ႈၼႂ်းလေႃးၵႃႉၼႆႉၵႃႈဢၼ်ၵဝ်လႆႈငိၼ်းတီႈမၼ်းၸဝ်ႈၼၼ်ႉၵူၺ်းဢေႃႈ၊ဝႃႈၼင်ႇၼႆဢေႃႈ။

၂၇ လွင်ႈဢၼ်မၼ်းၸဝ်ႈဢဝ်လွင်ႈပေႃႈၸဝ်ႈသေလႄႈဝႃႈၸိူဝ်ႉၼင်ႇၼႆၼၼ်ႉၸိုင်ၶဝ်ဢမ်ႇႁူႉ။ပိူဝ်ႈၼႆလႄႈၸဝ်ႈယေႇသုၵေႃႈလၢတ်ႈလႄႈဝႃႈ၊-

၂၈ မိူဝ်ႈဢၼ်သူယုၵ်ႉလုၵ်ႈၵူၼ်းဝႆႉၼၼ်ႉၸိုင်သူတၵ်းလႆႈႁူႉလွင်ႈဢၼ်ဝႃႈၵဝ်ပဵၼ်ၵေႃႉၼၼ်ႉဢိၵ်ႇတင်းလွင်ႈဢၼ်ဝႃႈၵဝ်ဢမ်ႇႁဵတ်းၵႃႈသင်ၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇလႄႈၵဝ်ႁေႃးလၢတ်ႈၵႃႈၼင်ႇဢၼ်ပေႃႈၵဝ်သွၼ်ပၼ်တီႈၵဝ်ၼၼ်ႉၵူၺ်းၼၼ်ႉဢေႃႈ။

၂၉ ၵေႃႉဢၼ်ပွႆႇၸႂ်ႉၵဝ်မႃးၼၼ်ႉမီးယူႇလူၺ်ႈၵၼ်တင်းၵဝ်ဢေႃႈ။မၼ်းၸဝ်ႈဢမ်ႇၸုၼ်ႉဢမ်ႇပႅတ်ႈၵဝ်ႁႂ်ႈၵဝ်လႆႈယူႇၵေႃႉလဵဝ်ၵူၺ်း။လွင်ႈမၼ်းၸမ်းၵဝ်ႁဵတ်းလွင်ႈတၢင်းဢၼ်ထုၵ်ႇၸႂ်မၼ်းၸဝ်ႈၼၼ်ႉယူႇတႃႇသေႇဢမ်ႇထၢတ်ႇဢေႃႈ၊ဝႃႈၼင်ႇၼႆဢေႃႈ။

၃၀ ၼႂ်းမိူဝ်ႈဢၼ်မၼ်းၸဝ်ႈယင်းတိုၵ်ႉလၢတ်ႈၵႂၢမ်းယူႇၼၼ်ႉၸိုင်ၵူၼ်းၼမ်ၼႃႇႁွတ်ႈထိုင်တၢင်းဢၼ်ယုမ်ႇမၢတ်ႈဢေႃႈ။

လုၵ်ႈလၢင်းဢႃႇပြႁၢမ်ႇ

၃၁ မိူဝ်ႈၼၼ်ႉၸဝ်ႈယေႇသုၵေႃႈလၢတ်ႈတီႈၵူၼ်းယုတဢၼ်ယုမ်ႇမၢတ်ႈၸိူဝ်းၼၼ်ႉလႄႈဝႃႈ၊-ပေႃးသူ

တႄႇယူႇၼႂ်းတေႇသၼႃႇၵဝ်ၸိုင်သူပဵၼ်တပႄးၵဝ်ဢမၢၼ်ႇၶၼ်ပဵၼ်ဢေႃႈ။

၃၂ သမ်ႇမႃႇတြႃးၵေႃႈသူတၵ်းႁူႉဢေႃႈ။သမ်ႇမႃႇတြႃးၼၼ်ႉတၵ်းပွႆႇသူလွတ်ႈဢေႃႈ၊ဝႃႈၼင်ႇၼႆဢေႃႈ။

၃၃ ၶဝ်ၼၼ်ႉၵေႃႈၶိုၼ်းလၢတ်ႈလႄႈဝႃႈ၊-ႁဝ်းပဵၼ်ၸိူဝ်ႉၶိူဝ်းဢႃႇပြႁၢမ်ႇဢေႃႈ။ဢမ်ႇပႆႇလႆႈၶၢမ်ႇႁဵတ်းၶႃႈတီႈၽူႈလႂ်သေၵေႃႉသေၵူၼ်းသေပွၵ်ႈ။ႁဵတ်းႁိုဝ်လႄႈမႂ်းလၢတ်ႈဝႃႈတၵ်းပွႆႇသူလွတ်ႈဢေႃႈ၊ဝႃႈၼင်ႇၼႆ။

၃၄ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ၵဝ်ဝႃႈတီႈၸိုဝ်ႈတီႈၸႂ်ႈၸမ်းၶဝ်ၸိူဝ်းဢၼ်ႁဵတ်းတူႉၸရိူၵ်ႈၵႃႈမီးတင်းသဵင်ႈတင်းလူင်ၼၼ်ႉပဵၼ်ၶႃႈတူႉၸရိူၵ်ႈဢေႃႈ။

၃၅ ၶႃႈၸမ်းယူႇၼႂ်းႁိူၼ်းတႃႇသေႇဢမ်ႇၸႂ်ႈ။လုၵ်ႈၸမ်းယူႇတႃႇသေႇဢေႃႈ။

၃၆ ပိူဝ်ႈၼႆလႄႈပေႃးလုၵ်ႈၸဝ်ႈပွႆႇသူလွတ်ႈၸိုင်သူတၵ်းလွတ်ႈဢမၢၼ်ႇၶၼ်ပဵၼ်ဢေႃႈ။

၃၇ ၵဝ်ႁူႉလွင်ႈဢၼ်သူပဵၼ်ၸိူဝ်ႉၶိူဝ်းဢႃႇပြႁၢမ်ႇယူႇဢေႃႈ။ၼႂ်းဝႃႈၼၼ်သေၵေႃႈၵႂပ်ႈပိူဝ်ႈတေႇသၼႃႇၵဝ်ဢမ်ႇတႄႇယူႇၵႃႈၼႂ်းသူလႄႈသူၵျၢမ်ႇႁႃႁႂ်ႈလႆႈဢဝ်ၵဝ်တၢႆယူႇဢေႃႈ။

၃၈ ၵဝ်ႁေႃးလၢတ်ႈၵႃႈၼင်ႇဢၼ်ၵဝ်လႆႈႁၼ်ၵႃႈတီႈပေႃႈၸဝ်ႈၼၼ်ႉဢေႃႈ။သူထုၵ်ႇလီႁဵတ်းၵႃႈၼင်ႇဢၼ်သူလႆႈငိၼ်းၵႃႈတီႈပေႃႈၸဝ်ႈၼၼ်ႉဢေႃႈ၊ဝႃႈၼင်ႇၼႆဢေႃႈ။

၃၉ ၶဝ်ၼၼ်ႉၵေႃႈၶိုၼ်းလၢတ်ႈလႄႈဝႃႈ၊-ဢႃႇပြႁၢမ်ႇပဵၼ်ပေႃႈႁဝ်းဢေႃႈ၊ဝႃႈၼင်ႇၼႆဢေႃႈ။ၸဝ်ႈယေႇသုၵေႃႈလၢတ်ႈလႄႈဝႃႈ၊-ပေႃးသူၸႂ်ႈလုၵ်ႈဢႃႇပြႁၢမ်ႇၸိုင်သူတၵ်းႁဵတ်းၵႃႈဢၼ်ဢႃႇပႁၢမ်ႇႁဵတ်းၼၼ်ႉဢေႃႈ။

၄၀ တေႃႈလဵဝ်ၼႆႉသူၵျၢမ်ႇႁႃႁႂ်ႈလႆႈဢဝ်ၵဝ်တၢႆယူႇဢေႃႈ။ၵဝ်ပဵၼ်ၵေႃႉဢၼ်ႁေႃးလၢတ်ႈတြႃးသႅတ်ႈၸႃႇဢၼ်ၵဝ်လႆႈငိၼ်းတီႈၽြႃးပဵၼ်ၸဝ်ႈၼၼ်ႉဢေႃႈ။ဢႃႇပြႁၢမ်ႇဢမ်ႇႁဵတ်းၸိူဝ်ႉၼင်ႇၼႆ။

၄၁ သူႁဵတ်းၸိူဝ်ႉၼင်ႇဢၼ်ပေႃႈသူႁဵတ်းၼၼ်ႉဢေႃႈ၊ဝႃႈၼင်ႇၼႆဢေႃႈ။ၶဝ်ၼၼ်ႉၵေႃႈလၢတ်ႈလႄႈဝႃႈ၊-ႁဝ်းပဵၼ်လုၵ်ႈမေႈမွၵ်ႇယႃႈဢမ်ႇၸႂ်ႈ။ႁဝ်းမီးပေႃႈၵေႃႉလဵဝ်ဢၼ်ပဵၼ်ၽြႃးပဵၼ်ၸဝ်ႈဢၼ်မီးယူႇပႃးလဵဝ်ၵူၺ်းၼၼ်ႉဢေႃႈ၊ဝႃႈၼင်ႇၼႆဢေႃႈ။

လုၵ်ႈလၢင်းၽီႁၢႆႉ

၄၂ ၸဝ်ႈယေႇသုၵေႃႈလၢတ်ႈလႄႈဝႃႈ၊-ပေႃးၽြႃးပဵၼ်ၸဝ်ႈပဵၼ်ပေႃႈသူၸိုင်၊သူတၵ်းႁၵ်ႉၵဝ်ဢေႃႈ။လွင်ႈမၼ်းၸမ်း၊ၵဝ်လုၵ်ႉၵႃႈတီႈၽြႃးပဵၼ်ၸဝ်ႈမႃးလႄႈႁွတ်ႈမႃးၵႃႈတီႈၼႆႉဢေႃႈ။

၄၃ ၵဝ်မႃးၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢမ်ႇၸႂ်ႈ။ၽြႃးပဵၼ်ၸဝ်ႈပွႆႇၸႂ်ႉၵဝ်မႃးဢေႃႈ။ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူဢမ်ႇႁူႉၵႂၢမ်းၵဝ်။ပိူဝ်ႈဢၼ်သူဢမ်ႇထွမ်ႇဢမ်ႇဢဝ်တေႇသၼႃႇၵဝ်လႄႈသူဢမ်ႇႁူႉၵႂၢမ်းၵဝ်။

၄၄ သူသိုပ်ႇလူင်းမႃးၵႃႈတီႈပေႃႈသူဢၼ်ပဵၼ်ၸႃႇတၢၼ်ႇမႃႇၼၢတ်ႈၼၼ်ႉဢေႃႈ။သူၸၢင်ႊထွမ်ႇဢဝ်ဢလူဝ်ႇပေႃႈသူဢေႃႈ။မၼ်းပဵၼ်ၵေႃႉဢၼ်ဢဝ်ဢသၢၵ်ႈၵူၼ်းတၢႆၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉဢေႃႈ။ပိူဝ်ႈဢၼ်သႅတ်ႈၸႃႇတြႃးဢမ်ႇမီးၼႂ်းမၼ်းလႄႈမၼ်းဢမ်ႇတႄႇဢမ်ႇယူႇၵႃႈၼႂ်းသႅတ်ႈၸႃႇတြႃးၼၼ်ႉ။မိူဝ်ႈဢၼ်မၼ်းလၢတ်ႈၵႂၢမ်းမူႉသႃႇၸိုင်မၼ်းလၢတ်ႈၸွမ်းၼင်ႇပၵတိတူဝ်ၸဝ်ႈၵဝ်ႇဢေႃႈ။

၄၅ လွင်ႈမၼ်းၸမ်းမၼ်းၸၢင်ႊလၢတ်ႈၵႂၢမ်းမူႉသႃႇဢေႃႈ။မၼ်းပဵၼ်ပေႃႈမူႉသႃႇဢေႃႈ။ပိူဝ်ႈဢၼ်ၵဝ်လၢတ်ႈၵႂၢမ်းသႅတ်ႈၸႃႇလႄႈသူဢမ်ႇယုမ်ႇၵဝ်။

၄၆ ၼႂ်းသူၼႆႉၽူႈလႂ်တၵ်းၽုၺ်ႇဢွၵ်ႇၼႄပျႃႉဢပျႅတ်ႈသေၸိူဝ်ႉသေမဵဝ်းၵႃႈၼႂ်းၵဝ်လႆႈ။ပေႃးၵဝ်လၢတ်ႈၵႂၢမ်းသႅတ်ႈၸႃႇယူႇၸိုင်ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈသူဢမ်ႇယုမ်ႇမၢတ်ႈ။

၄၇ ၵေႃႉဢၼ်ၸၢပ်ႈသႅင်ႇၵၼ်တင်းၽြႃး

ပဵၼ်ၸဝ်ႈၼၼ်ႉၸၢင်ႊထွမ်ႇဢဝ်ၵႂၢမ်းၽြႃးပဵၼ်ၸဝ်ႈဢေႃႈ။ပိူဝ်ႈဢၼ်သူဢမ်ႇၸၢပ်ႈသႅင်ႇၵၼ်တင်းၽြႃးပဵၼ်ၸဝ်ႈလႄႈသူဢမ်ႇထွမ်ႇဢမ်ႇဢဝ်၊ဝႃႈၼင်ႇၼႆဢေႃႈ။

၄၈ ၵူၼ်းယုတၸိူဝ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊-ၵႂၢမ်းဢၼ်ႁဝ်းလၢတ်ႈဝႃႈမႂ်းပဵၼ်ၵူၼ်းသမႃႇရိဢေႃႈ။ၵေႃႉဢၼ်ၽီႁၢႆႉၶဝ်ႈၵေႃႈပဵၼ်ဢေႃႈ၊ဝႃႈၼင်ႇၼႆၼၼ်ႉမႅၼ်ႈယူႇဢမ်ႇၸႂ်ႈႁိုဝ်၊ဝႃႈၼင်ႇၼႆဢေႃႈ။

ၸဝ်ႈယေႇသုလၢတ်ႈလွင်ႈတူဝ်ၸဝ်ႈၵဝ်ႇ

၄၉ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ၵဝ်ပဵၼ်ၵေႃႉဢၼ်ၽီႁၢႆႉၶဝ်ႈဢမ်ႇၸႂ်ႈ။ၵဝ်ယွင်ႈယေႃးပေႃႈၵဝ်ဢေႃႈ။

၅၀ သူယႃႉသရေႇၵဝ်ဢေႃႈ။ၵဝ်ဢမ်ႇႁႃဢဝ်မူၼ်သရေႇတူဝ်ၸဝ်ႈၵဝ်ႇ။ၵေႃႉဢၼ်ႁႃမူၼ်သရေႇၵဝ်ၼၼ်ႉမီးယူႇဢေႃႈ။

၅၁ မၼ်းပဵၼ်ၵေႃႉဢၼ်ၸီႇယၢင်ႇဢေႃႈ။ၵဝ်ဝႃႈတီႈၸိုဝ်ႈတီႈၸႂ်ႈၸမ်းၵေႃႉဢၼ်ထွမ်ႇဢဝ်ၵႂၢမ်းၵဝ်ၼႆႉၼၼ်ႉတၵ်းၵၢင်းလွတ်ႈတင်းတၢင်းတၢႆယူႇတႃႇသေႇဢမ်ႇထၢတ်ႇဢေႃႈ၊ဝႃႈၼင်ႇၼႆဢေႃႈ။

၅၂ ၵူၼ်းယုတၸိူဝ်းၼၼ်ႉၵေႃႈလၢတ်ႈလႄႈဝႃႈ၊-တေႃႈလဵဝ်ၼႆႉႁဝ်းႁူႉလွင်ႈဢၼ်ၽီႁၢႆႉၶဝ်ႈၼႂ်းမႂ်းဢေႃႈ။ၸႃႉၸဵမ်ဢႃႇပြႁၢမ်ႇလႄႈပရေႃးၽႅတ်ႈၸိူဝ်းၼၼ်ႉတၢႆၵႂႃႇယဝ်ႉ။မႂ်းသမ်ႉလၢတ်ႈဝႃႈၵေႃႉဢၼ်ထွမ်ႇဢဝ်ၵႂၢမ်းၵဝ်ၼႆႉၼၼ်ႉတၵ်းၵၢင်းလွတ်ႈတင်းတၢင်းတၢႆယူႇတႃႇသေႇဢေႃႈ၊ဝႃႈၼင်ႇၼႆလူင်ပေႇ။

၅၃ မႂ်းၼႆႉယဵင်ႈၶႅၼ်းယႂ်ႇမျၢတ်ႈၼႃႇသေပေႃႈႁဝ်းဢႃႇပြႁၢမ်ႇၼၼ်ႉႁိုဝ်။မၼ်းတၢႆၵႂႃႇယဝ်ႉ။ပရေႃးၽႅတ်ႈၸိူဝ်းၼၼ်ႉၵေႃႈတၢႆၵႂႃႇယဝ်ႉ။မႂ်းႁဵတ်းပုင်ႇႁၢင်ႊၽူႈလႂ်၊ဝႃႈၼင်ႇၼႆဢေႃႈ။

၅၄ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-ပေႃးၵဝ်ႁႂ်ႈမူၼ်ၽုင်းတူဝ်ၸဝ်ႈၵဝ်ႇထၢင်ႇသႃးၸိုင်ပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်ဢေႃႈ။ၵူၺ်းၵႃႈၸဝ်ႈဢၼ်ႁႂ်ႈမူၼ်ၽုင်းၵဝ်ထၢင်ႇသႃးမႃးၼၼ်ႉၸမ်းပဵၼ်ပေႃႈၵဝ်ဢၼ်သူယင်းဢမ်ႇႁူႉလႄႈႁွင်ႉဝႃႈၽြႃးပဵၼ်ၸဝ်ႈႁဝ်းဢၼ်ဝႃႈၼၼ်ႉဢေႃႈ။

၅၅ ၵဝ်ႁူႉမၼ်းၸဝ်ႈဢေႃႈ။သင်ၵဝ်ဝႃႈၵဝ်ဢမ်ႇႁူႉမၼ်းၸဝ်ႈဝႃႈၼင်ႇၼႆၸိုင်ၵဝ်တၵ်းပဵၼ်ၵေႃႉဢၼ်လၢတ်ႈမူႉသႃႇမိူၼ်ၸိူဝ်ႉၼင်ႇသူယဝ်ႉ။ၵဝ်ႁူႉမၼ်းၸဝ်ႈဢေႃႈ။ၵႂၢမ်းမၼ်းၸဝ်ႈၵေႃႈၵဝ်ထွမ်ႇဢဝ်ဢေႃႈ။

၅၆ ပေႃႈသူဢႃႇပြႁၢမ်ႇၼၼ်ႉမီးဢလူဝ်ႇၶႂ်ႈထူပ်းႁၼ်ၶိင်ႇၵႃႇလႃႉဝၼ်းၵဝ်ၼႆႉယူႇဢေႃႈ။မိူဝ်ႈဢၼ်မၼ်းလႆႈထူပ်းႁၼ်ၸိုင်မၼ်းႁွတ်ႈထိုင်တၢင်းဢၼ်ၸူမ်းသိူဝ်းဢေႃႈ၊ဝႃႈၼင်ႇၼႆဢေႃႈ။

၅၇ ပိူဝ်ႈၼႆလႄႈၵူၼ်းယုတၸိူဝ်းၼၼ်ႉၵေႃႈလၢတ်ႈလႄႈဝႃႈ၊-ဢသၢၵ်ႈမႂ်းယင်းဢမ်ႇပႆႇလႆႈႁႃႈသိပ်းပီႊ။မႂ်းႁဵတ်းႁိုဝ်လႄႈလႆႈႁၼ်ဢႃႇပြႁၢမ်ႇၼၼ်ႉယဝ်ႉ၊ဝႃႈၼင်ႇၼႆဢေႃႈ။

၅၈ ၸဝ်ႈယေႇသုၵေႃႈလၢတ်ႈလႄႈဝႃႈ၊-ၵဝ်ဝႃႈတီႈၸိုဝ်ႈတီႈၸႂ်ႈတီႈသူၸမ်းၸူဝ်ႈဢၼ်ဢႃႇပြႁၢမ်ႇယင်းဢမ်ႇပႆႇမီးၼၼ်ႉၵဝ်ယင်းမီးဝႆႉယဝ်ႉ၊ဝႃႈၼင်ႇၼႆဢေႃႈ။

၅၉ မိူဝ်ႈၼၼ်ႉၶဝ်ဢွၼ်ၵၼ်ၵဵပ်းဢဝ်မၢၵ်ႇႁိၼ်ႁႂ်ႈလႆႈထိမ်ႈမၼ်းၸဝ်ႈဢေႃႈ။ၸဝ်ႈယေႇသုလပ်ႉဝေႈလတ်းၶိုင်ႈၵၢင်ၶဝ်ၼၼ်ႉသေယဝ်ႉဢွၵ်ႇသေၵႃႈၼႂ်းပိၵ်ႉမၢၼ်ႇၸဝ်ႈၼၼ်ႉၵႂႃႇဢေႃႈ။