Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၁၀ 

ၵေႃးၼီႇလိပွႆႇၸႂ်ႉၵႂႃႇႁွင်ႉပေႇတရု

၁ ၵႃႈၼႂ်းဝဵင်းၵေႇသရိၼၼ်ႉမီးတပ်ႉမူးၵေႃႉၼိုင်ႈဢၼ်လႆႈၸိုဝ်ဝႃႈ၊ၵေႃးၼီႇလိ၊ၼၼ်ႉဢေႃႈ။မၼ်းလႆႈဢုပ်ႉၵူၼ်းသိုၵ်းပၢၵ်ႇၼိုင်ႈၵႃႈၼႂ်းတပ်ႉဢိတလိဢေႃႈ။

၂ မၼ်းဢိၵ်ႇတင်းၵူၼ်းဢၼ်မီးၼႂ်းႁိူၼ်းမၼ်းၸိူဝ်းၼၼ်ႉပဵၼ်ၶဝ်ၸိူဝ်းဢၼ်မူၼ်ႈပျေႃႇၼႂ်းဝၢတ်ႈၽြႃးလႄႈရူဝ်ႇသေႇၵူဝ်ယမ်ၽြႃးပဵၼ်ၸဝ်ႈသေယဝ်ႉႁဵတ်းတၢင်းဢၼ်ၽေးၸွၼ်းယိုၼ်ႈမႅင်ႇၼမ်ၼႃႇတီႈၵူၼ်းတင်းလၢႆလႄႈသူးတွင်းတီႈၽြႃးပဵၼ်ၸဝ်ႈယူႇတႃႇသေႇဢေႃႈ။

၃ မီးဝၼ်းၼိုင်ႈၶိင်ႇၵဝ်ႈၼႃႇရီႇၸမ်ၸမ်ၼၼ်ႉမၼ်းလႆႈႁၼ်တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈႁွတ်ႈမႃးႁွင်ႉမၼ်းလႄႈဝႃႈ၊-ၵေႃးၼီႇလိဢိူၺ်း၊ဝႃႈၼင်ႇၼႆၼႂ်းပျႃႇတိၵ်ႈရူႇပႃႇရူင်ႇမၼ်းထၢင်ႇထၢင်ႇသႃးသႃးဢေႃႈ။

၄ မၼ်းယႅၵ်ႉတူၺ်းတမၢၼ်ႇၵၢင်ႁၢဝ်ၼၼ်ႉၸေးၸေးသေယဝ်ႉတူၵ်းၸႂ်လႄႈထၢမ်ဝႃႈ၊-ၸဝ်ႈႁဝ်းမီးလွင်ႈတၢင်းၵႃႈသင်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင်တမၢၼ်ႇၵၢင်ႁၢဝ်ၵေႃႈလၢတ်ႈလႄႈဝႃႈတၢင်းဢၼ်မႂ်းသူးတွင်းႁဵတ်းပထၼႃႇဢိၵ်ႇတင်းတၢင်းဢၼ်မႂ်းၽေးၸွၼ်းယိုၼ်ႈမႅင်ႇၸိူဝ်းၼၼ်ႉၶိုၼ်ႈၵႂႃႇမိူၼ်ၼင်ႇတၢင်းလူႇဢၼ်ၶုၵ်းၸႂ်လႆႈၶႆႈၸႂ်ထူပ်းၽြႃးပဵၼ်ၸဝ်ႈၼၼ်ႉယဝ်ႉ။

၅ ပိူဝ်ႈၼႆၼႆလႄႈပွႆႇၸႂ်ႉၵူၼ်းၵႂႃႇၵႃႈတီႈဝဵင်းယွပ်ႇပပုၼ်ႉလႄႈပၢင်းဢဝ်သိမုၼ်ႇဢၼ်လႆႈၸိုဝ်မႂ်ႇပေႇတရုၼၼ်ႉမႃးတႃႉ။

၆ မၼ်းသွၼ်ႈယူႇၵႃႈတီႈႁိူၼ်းသိမုၼ်ႇဢၼ်ပဵၼ်ၵူၼ်းႁဵတ်းၼင်ၼၼ်ႉဢေႃႈ။ႁိူၼ်းမၼ်းမီးၵႃႈတီႈႁိမ်းပၢင်ႇလၢႆႇဢေႃႈ၊ဝႃႈၼင်ႇၼႆဢေႃႈ။

၇ ဝၢႆးသေတမၢၼ်ႇၵၢင်ႁၢဝ်ၼၼ်ႉမိူဝ်းၵႂႃႇယဝ်ႉ၊ၵေႃးၼီႇလိၵေႃႈႁွင်ႉဢဝ်ၵူၼ်းဢွၼ်ႇမၼ်းသွင်ၵေႃႉ၊ဢိၵ်ႇတင်းၵူၼ်းသိုၵ်းၵေႃႉၼိုင်ႈဢၼ်ယူႇႁူမ်ႈၵၼ်တင်းမၼ်းတႃႇသေႇလႄႈ

၈ မူၼ်ႈပျေႃႇၼႂ်းဝၢတ်ႈၽြႃးၼၼ်ႉမႃးလႄႈမွၵ်ႇလၢတ်ႈလွင်ႈတၢင်းၸိူဝ်းၼၼ်ႉတင်းသဵင်ႈတင်းမူတ်းယဝ်ႉၸင်ႇပွႆႇၸႂ်ႉၶဝ်ၵႂႃႇၵႃႈတီႈဝဵင်းယွပ်ႇပပုၼ်ႉဢေႃႈ။

ပေႇတရုလႆႈရူႇပႃႇရူင်ႇ

၉ ဝၼ်းမိူဝ်ႈၽုၵ်ႈၶိင်ႇမိူဝ်ႈဢၼ်ၶဝ်ႁွတ်ႈထိုင်ၵႃႈတီႈႁိမ်းဝဵင်းယွပ်ႇပၼၼ်ႉပဵၼ်ၶိင်ႇႁူၵ်းၼႃႇရီႇၸမ်ၸမ်ဢေႃႈ။

၁၀ ၶိင်ႇၼၼ်ႉပေႇတရုၶိုၼ်ႈၵႂႃႇၵႃႈၼိူဝ်မုင်းႁိူၼ်းႁႂ်ႈလႆႈသူးတွင်းဢေႃႈ။မၼ်းတွင်ႉမႆႈတွင်ႉႁွၼ်ႉၶႂ်ႈၵိၼ်မႃးဢေႃႈ။ၼႂ်းမိူဝ်ႈဢၼ်ပိူၼ်ႈယင်းတိုၵ်ႉမႄးႁႅၼ်းတၢင်းၵိၼ်ယူႇၼၼ်ႉမၼ်းၼၼ်ႉပဵၼ်ၸိူဝ်ႉၼင်ႇႁၢင်ႊၼွၼ်းၽၼ်ႁၼ်ၵႂႃႇၵႃႈၼႂ်းတူဝ်မၼ်းလႄႈ

၁၁ မၼ်းလႆႈႁၼ်ၵၢင်ႁၢဝ်ၽုၺ်ႇပိုတ်ႇသေယဝ်ႉၶိူင်ႈပိူင်ဢၼ်ပဵၼ်ၸိူဝ်ႉၼင်ႇတၢၼ်ႈသိူဝ်းလူင်ဢၼ်မတ်ႉဝႆႉတီႈသီႇၸဵင်ႇၼၼ်ႉၶျႃးယွၼ်ႇတူၵ်းလူင်းမႃးၵႃႈၼိူဝ်လိၼ်မိူင်းလူင်းမႃးၸူးၵႃႈတီႈမၼ်းဢေႃႈ။

၁၂ ၼႂ်းၶိူင်ႈပိူင်ၸိူဝ်းၼၼ်ႉပႃးဝႆႉၸႃႉၸဵမ်တရိၵ်ႉသၢၼ်ႇဢၼ်မီးတိၼ်သီႇၶွၼ်ၵူႈၸိူဝ်ႈၵူႈပိူင်၊တရိၵ်ႉသၢၼ်ႇဢၼ်ၸၢင်ႊၵႂႃႇၸၢင်ႊၵၢၼ်းၵႃႈၼိူဝ်လိၼ်၊ၼူၵ်ႉဢၼ်ၸၢင်ႊမိၼ်ၵႃႈၼိူဝ်ၽႃႉၵၢင်ႁၢဝ်တင်းလၢႆၸိူဝ်းၼၼ်ႉဢေႃႈ။

၁၃ သဵင်ၶေႃႈၵႂၢမ်းၵေႃႈႁွတ်ႈထိုင်မႃးတီႈမၼ်းလႄႈဝႃႈ၊-ပေႇတရုဢိူၺ်း၊ဢဝ်တၢႆသေလႄႈၵိၼ်တႃႉ၊ဝႃႈၼင်ႇၼႆဢေႃႈ။

၁၄ ပေႇတရုၵေႃႈၶိုၼ်းလၢတ်ႈလႄႈဝႃႈ၊-ဢမ်ႇပဵၼ်လႆႈၶႃႈၸဝ်ႈ။ၵဝ်ၶႃႈဢမ်ႇတွၼ်ႉၵိၼ်ၶိူင်ႈပိူင်ဢၼ်ၵူဝ်ႈၵိူၵ်ႇၶိူင်ႈပိူင်ဢၼ်ဢမ်ႇမူတ်းသႂ်ၼၼ်ႉသေပွၵ်ႈၶႃႈ၊ဝႃႈၼင်ႇၼႆဢေႃႈ။

၁၅ လိုၼ်းၼၼ်ႉသဵင်ၶေႃႈၵႂၢမ်းၽႅဝ်မႃးထႅင်ႈပွၵ်ႈတုတိယလႄႈဝႃႈ၊-ဢၼ်ၽြႃးပဵၼ်ၸဝ်ႈႁႂ်ႈမူတ်းသႂ်ၼၼ်ႉမႂ်းယႃႇပေဝႃႈၵူဝ်ႈၵိူၵ်ႇ၊ဝႃႈၼင်ႇၼႆဢေႃႈ။

၁၆ ပဵၼ်ၸိူဝ်ႉၼၼ်ထူၼ်ႈထိုင်သၢမ်ပွၵ်ႈယဝ်ႉၸင်ႇၶိုၼ်းသိမ်းဢဝ်ၶိူင်ႈပိူင်ၸိူဝ်းၼၼ်ႉၶိုၼ်ႈၵႂႃႇၵႃႈၼႂ်းၵၢင်ႁၢဝ်ပုၼ်ႉသေဢေႃႈ။

၁၇ ပျႃႇတိၵ်ႈရူႇပႃႇရူင်ႇဢၼ်တူဝ်ၸဝ်ႈၵဝ်ႇလႆႈႁၼ်ၼၼ်ႉၶႂ်ႈဝႃႈပွင်ႇၸိူဝ်ႉၼင်ႇႁိုဝ်ၼႄႃး၊ဝႃႈၼႆမိူဝ်ႈဢၼ်မၼ်းယင်းတိုၵ်ႉၶႆႈၸႂ်ဝူၼ်ႉၸႂ်ယူႇၼၼ်ႉၵူၼ်းဢၼ်ၵေႃးၼီႇလိပွႆႇၸႂ်ႉမႃးႁႂ်ႈလႆႈႁႃႁိူၼ်းသိမုၼ်ႇၼၼ်ႉႁွတ်ႈၽႅဝ်မႃးၸုၵ်းယူႇၵႃႈတီႈၽၢႆႇၼႃႈၽၵ်းတူသေလႄႈႁွင်ႉသႅၼ်ႇဝႃႈ၊-

၁၈ သိမုၼ်ႇ၊ဢၼ်လႆႈၸိုဝ်မႂ်ႇပေႇတရုၼၼ်ႉသွၼ်ႈယူႇၵႃႈတီႈၼႆႉႁိုဝ်၊ဝႃႈၼင်ႇၼႆဢေႃႈ။

၁၉ ၼႂ်းမိူဝ်ႈဢၼ်ပေႇတရုယင်းတိုၵ်ႉၶႆႈၸႂ်ဝူၼ်ႉၸႂ်လူၺ်ႈလွင်ႈပျႃႇတိၵ်ႈရူႇပႃႇရူင်ႇဢၼ်မၼ်းလႆႈႁၼ်ၼၼ်ႉၸိုင်ဝိၺိၺ်ႇမူတ်းၸၢင်ႇၸဝ်ႈလၢတ်ႈတီႈမၼ်းလႄႈဝႃႈ၊-တူၺ်းလူ၊ၵူၼ်းသၢမ်ၵေႃႉႁႃမႂ်းယူႇယဝ်ႉ။

၂၀ လုၵ်ႉလႄႈလူင်းၵႂႃႇတႃႉ။ယႃႇပေၶႆႈၸႂ်ဝူၼ်ႉၸႂ်သင်ယူႇ။ၸွမ်းၶဝ်ၵႂႃႇတႃႉ။လွင်ႈမၼ်းၸမ်းၶဝ်ပဵၼ်ၵေႃႉဢၼ်ၵဝ်ပွႆႇၸႂ်ႉမႃးၼၼ်ႉဢိူဝ်း၊မိူဝ်ႈဢၼ်ဝႃႈၼင်ႇၼႆၸိုင်၊ပေႇတရုၵေႃႈလူင်းၵႂႃႇလႄႈလၢတ်ႈတီႈၶဝ်ၼၼ်ႉလႄႈဝႃႈ၊-

၂၁ ၵဝ်ပဵၼ်ၵေႃႉဢၼ်သူႁႃၼၼ်ႉယဝ်ႉ။မီးလွင်ႈတၢင်းၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။

၂၂ ၶဝ်ၵေႃႈၶိုၼ်းလၢတ်ႈလႄႈဝႃႈ၊-တပ်ႉမူးၵေႃးၼီႇလိဢၼ်ပဵၼ်ၵေႃႉဢၼ်သိုဝ်ႈတေႃႇဢၼ်ရူဝ်ႇသေႇၵူဝ်ယမ်ၽြႃးပဵၼ်ၸဝ်ႈလႄႈမီးသရေႇၼႂ်းၵူၼ်းယုတတင်းသဵင်ႈတင်းလူင်ၼၼ်ႉၼင်ႇႁိုဝ်တၵ်းလႆႈႁွင်ႉပၢင်းဢဝ်ၸဝ်ႈႁဝ်းၵႂႃႇၸူးၵႃႈတီႈႁိူၼ်းမၼ်းလႄႈႁႂ်ႈမၼ်းပေႃးလႆႈထွမ်ႇလႆႈငိၼ်းၵႂၢမ်းၸဝ်ႈႁဝ်းၸိုင်မၼ်းလႆႈၶၢမ်ႇဢဝ်ပျႃႇတိၵ်ႈရူႇပႃႇရူင်ႇၵႃႈတီႈတမၢၼ်ႇၵၢင်ႁၢဝ်ဢၼ်မူတ်းၸၢင်ႇၼၼ်ႉၶႃႈယဝ်ႉဝႃႈၼင်ႇၼႆဢေႃႈ။

ပေႇတရုႁွတ်ႈထိုင်ႁိူၼ်းၵေႃးၼီႇလိ

၂၃ ပေႇတရုၵေႃႈႁွင်ႉဢဝ်ၶဝ်ၶဝ်ႈၵႃႈၼႂ်းႁိူၼ်းသေယဝ်ႉႁဵတ်းဝၢတ်ႈၶႅၵ်ႇဢေႃႈ။ဝၼ်းမိူဝ်ႈၽုၵ်ႈမၼ်းၵႂႃႇလူၺ်ႈၵၼ်တင်းၶဝ်လႄႈပီႈၼွင်ႉၵူၼ်းဝဵင်းယွပ်ႇပၵမ်ႈၽွင်ႈၵေႃႈၸွမ်းမၼ်းၵႂႃႇဢေႃႈ။

၂၄ ၵႃႈၼႂ်းဝဵင်းၵေႇသႃႇရိၼၼ်ႉၵေႃးၼီႇလိႁႂ်ႈပီႈၼွင်ႉၸိူဝ်ႉၶိူဝ်းမၼ်းဢိၵ်ႇတင်းၵေႃႉသေႈမၼ်းတင်းလၢႆမႃးၸူႉၵၼ်တုမ်ၵၼ်သေယဝ်ႉမုင်ႈမွင်းပႂ်ႉထႃႈၶဝ်ဝႆႉယူႇဢေႃႈ။

၂၅ မိူဝ်ႈဢၼ်ပေႇတရုႁွတ်ႈထိုင်မႃးယဝ်ႉၼၼ်ႉၸိုင်ၵေႃးၼီႇလိႁပ်ႉႁူဝ်တၢင်းမၼ်းလႄႈၶုပ်ႉမူပ်ႇၵႃႈတီႈႁိမ်းတိၼ်မၼ်းသေယဝ်ႉႁဵတ်းရူဝ်ႇသေႇၵူဝ်ယမ်ဢေႃႈ။

၂၆ ပေႇတရုၵေႃႈႁႂ်ႈမၼ်းလုၵ်ႉလႄႈလၢတ်ႈဝႃႈ၊-လုၵ်ႉတႃႉ၊ၵဝ်ၵေႃႈပဵၼ်ၵူၼ်းၼင်ႇၵဝ်ႇဝႃႈၼင်ႇၼႆဢေႃႈ။

၂၇ ပေႇတရုတၵ်ႉလၢတ်ႈၸိူဝ်ႉၼင်ႇၼၼ်သေယဝ်ႉၶဝ်ႈၵႂႃႇၵႃႈၼႂ်းႁိူၼ်းလႄႈထူပ်းႁၼ်ၵူၼ်းၸူႉၵူၼ်းတုမ်ၼမ်ၼႃႇလႄႈမၼ်းလၢတ်ႈတီႈၶဝ်ၼၼ်ႉလႄႈဝႃႈ၊-လွင်ႈဢၼ်ဝႃႈၵူၼ်းယုတဢမ်ႇလီႁဵတ်းၵေႃႉႁဵတ်းသေႈဢမ်ႇလီသုတ်ႉၸပ်းသုတ်ႉၸူးၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ဝႃႈၼၼ်ႉ၊သူႁူႉယူႇဢေႃႈ။

၂၈ ၼႂ်းဝႃႈၼၼ်သေၵေႃႈလွင်ႈၼင်ႇႁိုဝ်တၵ်းဢမ်ႇလႆႈႁွင်ႉၽူႈလႂ်ဝႃႈၵူဝ်ႈၵိူၵ်ႇဢမ်ႇမူတ်းသႂ်၊ဝႃႈၼင်ႇၼႆၼၼ်ႉၸိုင်ၽြႃးပဵၼ်ၸဝ်ႈၼႄပျႃးတီႈၵဝ်ယဝ်ႉ။

၂၉ ၵွပ်ႈၼႆလႄႈမိူဝ်ႈဢၼ်သူမႃးႁွင်ႉၵဝ်ၼၼ်ႉၵဝ်ယင်းဢမ်ႇတွပ်ႇဢမ်ႇထဵင်လႄႈမႃးဢေႃႈ။ပိူဝ်ႈၼႆလႄႈမီးလွင်ႈတၢင်းၸိူဝ်ႉၼင်ႇႁိုဝ်လႄႈသူႁွင်ႉၵဝ်မႃး၊ဝႃႈၼင်ႇၼႆဢေႃႈ။

၃၀ ၵေႃးၼီႇလိၵေႃႈလၢတ်ႈလႄႈဝႃႈ၊-မိူဝ်ႈဢၼ်ပူၼ်ႉမႃးသီႇဝၼ်းၼၼ်ႉၵဝ်ၶႃႈၵမ်တၢင်းၵိၼ်လႄႈမိူဝ်ႈဢၼ်ထိုင်ၶိင်ႇၵဝ်ႈၼႃႇရီႇၼၼ်ႉၵဝ်ၶႃႈသူးတွင်းယူႇၵႃႈတီႈႁိူၼ်းၶႃႈဢေႃႈ။မိူဝ်ႈၶိင်ႇၼၼ်ႉၵေႃႉဢၼ်ၼုင်ႈၶူဝ်းဢၼ်ႁိူဝ်ႈလႅင်းၼႃႇၼၼ်ႉၵေႃႉၼိုင်ႈပေႃႇမႃးၸုၵ်းယူႇၵႃႈတီႈၽၢႆႇၼႃႈၵဝ်ၶႃႈလႄႈဝႃႈ၊-

၃၁ ၵေႃးၼီႇလိဢိူၺ်း၊တၢင်းဢၼ်မႂ်းသူးတွင်းႁဵတ်းပထၼႃႇၼၼ်ႉမၼ်းၸဝ်ႈလႆႈငိၼ်းယဝ်ႉ။တၢင်းဢၼ်မႂ်းၽေးၸွၼ်းယိုၼ်ႈမႅင်ႇၸိူဝ်းၼၼ်ႉၵေႃႈမၼ်းၸဝ်ႈမၢတ်ႈတွင်းဝႆႉယဝ်ႉ။

၃၂ ပိူဝ်ႈၼႆလႄႈမႂ်းပွႆႇၸႂ်ႉၵူၼ်းၵႂႃႇၵႃႈတီႈဝဵင်းယွပ်ႇပလႄႈပၢင်းဢဝ်သိမုၼ်ႇဢၼ်လႆႈၸိုဝ်မႂ်ႇပေႇတရုၼၼ်ႉမႃးတႃႉ။မၼ်းသွၼ်ႈယူႇၵႃႈတီႈႁိူၼ်းသိမုၼ်ႇဢၼ်ပဵၼ်ၵူၼ်းႁဵတ်းၼင်ဢၼ်မီးယူႇၵႃႈတီႈႁိမ်းပၢင်ႇလၢႆႇၼၼ်ႉဢေႃႈ။ပေႃးမၼ်းႁွတ်ႈထိုင်မႃးၸိုင်မၼ်းတၵ်းႁေႃးလၢတ်ႈပၼ်တီႈမႂ်းဢေႃႈ၊ဝႃႈၼင်ႇၼႆၶႃႈဢေႃႈ။

၃၃ ပိူဝ်ႈၼႆလႄႈၵဝ်ၶႃႈၸင်ႇလႆႈပွႆႇၸႂ်ႉၶဝ်ၵႂႃႇၸူးၵႃႈတီႈၸဝ်ႈႁဝ်းၵမ်းလဵဝ်ၶႃႈဢေႃႈ။ၵွပ်ႈပိူဝ်ႈၸဝ်ႈႁဝ်းမႃးလႄႈပဵၼ်ဢၼ်လီဢၼ်ငၢမ်းၶႃႈယဝ်ႉ။တေႃႈလဵဝ်ၼႆႉႁဝ်းၶႃႈတင်းသဵင်ႈတင်းလူင်မီးယူႇၵႃႈတီႈၽၢႆႇၼႃႈၽြႃးပဵၼ်ၸဝ်ႈႁႂ်ႈလႆႈထွမ်ႇလႆႈငိၼ်းၵႃႈဢၼ်ၸဝ်ႈၽြႃးသင်ႇလၢတ်ႈဝႆႉၵႃႈတီႈၸဝ်ႈႁဝ်းၼၼ်ႉၶႃႈယဝ်ႉ၊ဝႃႈၼင်ႇၼႆဢေႃႈ။

၃၄ မိူဝ်ႈၼၼ်ႉပေႇတရုၸင်ႇမွၵ်ႇလၢတ်ႈလႄႈဝႃႈ၊-ၵဝ်ႁူႉႁၼ်လွင်ႈဢၼ်ၽြႃးပဵၼ်ၸဝ်ႈဢမ်ႇတူၺ်းၼႃႈၵူၼ်းလႄႈ

၃၅ ၼႂ်းၵူၼ်းၵူႈၸိူဝ်ႉၵူႈၶိူဝ်း၊ၵေႃႉဢၼ်ရူဝ်ႇသေႇၵူဝ်ယမ်ၽြႃးပဵၼ်ၸဝ်ႈလႄႈႁဵတ်းသိုဝ်ႈတေႃႇၼၼ်ႉလႆႈၼႃႈလႆႈတႃၵႃႈတီႈၽြႃးပဵၼ်ၸဝ်ႈဢေႃႈ။

၃၆ သူႁူႉတြႃးဢၼ်မၼ်းၸဝ်ႈပၼ်ၵႂႃႇၵႃႈတီႈၵူၼ်းမဵဝ်းဢိသရေႇလတင်းလၢႆဢၼ်ပဵၼ်တြႃးသတၢင်းသိူဝ်းပျေႃႇၸဝ်ႈဢၼ်ၸၢပ်ႈသႅင်ႇၵၼ်တင်းတၢင်းၼိမ်ၵွပ်ႈပိူဝ်ႈၸဝ်ႈယေႇသုၶရိၸ်ႉၸဝ်ႈဢၼ်ဢုပ်ႉပိူင်ႇၵူၼ်းတင်းသဵင်ႈတင်းလူင်ၼၼ်ႉယူႇဢေႃႈ။

၃၇ သူႁူႉလွင်ႈတၢင်းဢၼ်ၸွတ်ႇတူဝ်ၵႂႃႇၸႃႉၸဵမ်မိူင်းၵႃႇလိလႄးမိူင်းယုတၵူႈတီႈၵူႈလႅၼ်ဝၢႆးလင်ယုဝ်းႁၢၼ်ႇႁေႃးလၢတ်ႈတြႃးပပ်ႉတိၸၢမ်ႇၼၼ်ႉယူႇဢေႃႈ။

၃၈ လွင်ႈတီႈႁႅင်းၼႆႉၸမ်းပဵၼ်ၽြႃးပဵၼ်ၸဝ်ႈဢဝ်တင်းဝိၺိၺ်ႇမူတ်းၸၢင်ႇၸဝ်ႈဢိၵ်ႇတင်းတၼ်းၶူဝ်းၸဝ်ႈလႄႈပၼ်ၽိၵ်ႉသိၵ်ႈတီႈၸဝ်ႈယေႇသုၵူၼ်းဝဵင်းၼႃႇၸရႅတ်ႉၼၼ်ႉဢေႃႈ။ၵွပ်ႈပိူဝ်ႈၽြႃးပဵၼ်ၸဝ်ႈမီးယူႇလူၺ်ႈၵၼ်တင်းမၼ်းၸဝ်ႈလႄႈမၼ်းၸဝ်ႈလႄႇလဵပ်ႈၵႂႃႇႁဵတ်းၵျေးၸူးပၼ်ၵတ်းယဵၼ်ၶျၢမ်းသႃႇတီႈၶဝ်ၸိူဝ်းဢၼ်မႃႇၼၢတ်ႈၼိၵ်ႈၸၢၵ်ႈငႅၼ်းသေးၵႃႈမီးၸိူဝ်းၼၼ်ႉဢေႃႈ။

၃၉ ႁဝ်းၵေႃႈပဵၼ်ၵေႃႉဢၼ်ၶၢမ်ႇသၢၵ်ႈသေႇလွင်ႈတၢင်းၵႃႈဢၼ်မၼ်းၸဝ်ႈႁဵတ်းၸႃႉၸဵမ်ၼႂ်းဝဵင်းယေႇရုသလႅမ်ႇတင်းမိူင်းယုတၼၼ်ႉဢေႃႈ။

၄၀ ၶဝ်ဢဝ်ၸဝ်ႈၼၼ်ႉတွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းလႄႈဢဝ်တၢႆယဝ်ႉ။ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉၽြႃးပဵၼ်ၸဝ်ႈသမ်ႉႁႂ်ႈမၼ်းၸဝ်ႈလုၵ်ႉၶိုၼ်းလႄႈၼႄပျႃးတူဝ်မၼ်းၸဝ်ႈထၢင်ႇသႃးဢေႃႈ။

၄၁ ၼႄပျႃးတီႈၵူၼ်းတင်းသဵင်ႈတင်းလူင်ဢမ်ႇၸႂ်ႈ။ၼႄပျႃးတီႈၶဝ်ၸိူဝ်းဢၼ်ၶၢမ်ႇသၢၵ်ႈသေႇဢၼ်ၽြႃးပဵၼ်ၸဝ်ႈၶၢၼ်းဝႆႉဢွၼ်တၢင်းဢၼ်ပဵၼ်ႁဝ်းၸိူဝ်းဢၼ်လႆႈၵိၼ်လူၺ်ႈၵၼ်တင်းမၼ်းၸဝ်ႈဝၢႆးသေမၼ်းၸဝ်ႈလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉဢေႃႈ။

၄၂ မၼ်းၸဝ်ႈပိင်းၺၢပ်ႈဝႆႉတီႈႁဝ်းလွင်ႈဢၼ်ႁဝ်းတၵ်းလႆႈႁေႃးလၢတ်ႈတီႈၵူၼ်းတင်းလၢႆလႄႈၶၢမ်ႇသၢၵ်ႈသေႇလွင်ႈဢၼ်မၼ်းၸဝ်ႈပဵၼ်ၸဝ်ႈဢၼ်ၽြႃးပဵၼ်ၸဝ်ႈၶၢၼ်းဝႆႉႁႂ်ႈလႆႈၸီႇယၢင်ႇတြႃးတီႈၵူၼ်းဢၼ်လိပ်းဢၼ်တၢႆတင်းလၢႆၼၼ်ႉဢေႃႈ။

၄၃ ပရေႃးၽႅတ်ႈတင်းသဵင်ႈတင်းလူင်ၵေႃႈၶၢမ်ႇသၢၵ်ႈသေႇလွင်ႈဢၼ်ဝႃႈ၊ၶဝ်ၸိူဝ်းဢၼ်ယုမ်ႇမၢတ်ႈမၼ်းၸဝ်ႈၵႃႈမီးတင်းသဵင်ႈတင်းလူင်ၼၼ်ႉၵွပ်ႈပိူဝ်ႈၼႃႇမႃႉၸိုဝ်သဵင်မၼ်းၸဝ်ႈလႄႈတၵ်းလႆႈၶၢမ်ႇတၢင်းဢၼ်ပွႆႇလွတ်ႈဢပျႅတ်ႈဢေႃႈ၊ဝႃႈၼင်ႇၼႆဢေႃႈ။

၄၄ ၼႂ်းမိူဝ်ႈဢၼ်ပေႇတရုႁေႃးလၢတ်ႈၵႂၢမ်းၸိူဝ်ႉၼင်ႇၼၼ်ယူႇၼၼ်ႉၸိုင်ဝိၺိၺ်ႇမူတ်းၸၢင်ႇၸဝ်ႈၵျွႃးလူင်းမႃးၵႃႈၼိူဝ်ၶဝ်တင်းသဵင်ႈတင်းလူင်ဢၼ်ထွမ်ႇငိၼ်းၼုၵ်ႉပၵၢတ်ႈတြႃးၸဝ်ႈယူႇၸိူဝ်းၼၼ်ႉဢေႃႈ။

၄၅ ၶဝ်ၸိူဝ်းဢၼ်ၶၢမ်ႇတၢင်းဢၼ်ထိူဝ်ႁိမ်းဢၼ်ပဵၼ်ၵူၼ်းယုမ်ႇမၢတ်ႈဢၼ်ၸွမ်းပေႇတရုမႃးၸိူဝ်းၼၼ်ႉမိူဝ်ႈဢၼ်ၶဝ်ႁၼ်ၵူၼ်းတၢင်ႇၸိူဝ်ႉတၢင်ႇၶိူဝ်းလႆႈႁပ်ႉၶၢမ်ႇဢဝ်တၢင်းဢၼ်သူႉၵျေးၸူးဝိၺိၺ်ႇမူတ်းၸၢင်ႇၸဝ်ႈသွၼ်းလေႃႇၵႃႈၼိူဝ်ၶဝ်ၼၼ်ႉၸိုင်ၶဝ်မီးတၢင်းဢၼ်ၵႂင်ၼႃႇလူင်လၢင်ဢေႃႈ။

၄၆ လွင်ႈမၼ်းၸမ်းၶဝ်လႆႈငိၼ်းၶဝ်ၸိူဝ်းၼၼ်ႉဢဝ်တင်းၵႂၢမ်းၽႃႇသႃႇၵူႈၸိူဝ်ႉၵူႈပိူင်သေလႄႈယွင်ႈယေႃးၽြႃးပဵၼ်ၸဝ်ႈၼၼ်ႉဢေႃႈ။

၄၇ မိူဝ်ႈၼၼ်ႉပေႇတရုလၢတ်ႈလႄႈဝႃႈ၊-ၼင်ႇႁိုဝ်ၶဝ်ၸိူဝ်းဢၼ်လႆႈၶၢမ်ႇဢဝ်ဝိၺိၺ်ႇမူတ်းၸၢင်ႇၸဝ်ႈမိူၼ်ၸိူဝ်ႉၼင်ႇႁဝ်းၼႆႉတၵ်းဢမ်ႇလႆႈၶၢမ်ႇဢဝ်ပပ်ႉတိၸၢမ်ႇၼႂ်းၼမ်ႉၸိုင်ၽူႈလႂ်တၵ်းႁၢမ်ႈတၢပ်ႈႁႄႉၶႅၼ်ၶဝ်လႆႈ၊

၄၈ ဝႃႈၼင်ႇၼႆသေယဝ်ႉႁႂ်ႈၶဝ်လႆႈၶၢမ်ႇဢဝ်ပပ်ႉတိၸၢမ်ႇၼႂ်းၼႃႇမႃႉၸိုဝ်သဵင်ၸဝ်ႈယေႇသုၶရိၸ်ႉဢေႃႈ။လိုၼ်းၼၼ်ႉၶဝ်ယွၼ်းႁႂ်ႈပေႇတရုယူႇတီႈၼၼ်ႉႁမ်ႉႁိုင်ႁိုင်ဢေႃႈ။