Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၂၃ 

ၽၢႆႇၼႃႈယိတ်ႉပရေႃးႁိၵ်ႈလူင်

၁ ပေႃးလုယႅၵ်ႉတူၺ်းၶုၼ်ဢရႃႇသိလုမ်းလူင်ၸိူဝ်းၼၼ်ႉၸေးၸေးသေလႄႈလၢတ်ႈဝႃႈ၊-ပီႈၼွင်ႉၶဝ်ဢိူၺ်း၊ၼႂ်းလွင်ႈတၢင်းဢၼ်ႁဵတ်းဝၢတ်ႈၽြႃးပဵၼ်ၸဝ်ႈၼၼ်ႉၵဝ်ၶႃႈဢဝ်တင်းႁူဝ်ၸႂ်တူဝ်ၸဝ်ႈၵဝ်ႇဢၼ်ၵၢင်းလွတ်ႈတင်းတၢင်းဢၼ်တၢင်ႇဢပျႅတ်ႈၼၼ်ႉလႄႈပွင်ႁဵတ်းယူႇတေႃႇထိုင်ႁွတ်ႈဝၼ်းမိူဝ်ႈၼႆႉယူႇၶႃႈဢေႃႈ၊ဝႃႈၼင်ႇၼႆဢေႃႈ။

၂ ၶုၼ်ယိတ်ႉပရေႃးႁိၵ်ႈဢႃႇၼၼိၼၼ်ႉၵေႃႈမီးဢမိင်ႉႁႂ်ႈၶဝ်ၸိူဝ်းဢၼ်ၸုၵ်းယူႇၵႃႈတီႈႁိမ်းမၼ်းၼၼ်ႉတူပ်းယႅၼ်ႉသူပ်းမၼ်းဢေႃႈ။

၃ မိူဝ်ႈၼၼ်ႉပေႃးလုလၢတ်ႈလႄႈဝႃႈ၊-ၽႃဢုတ်ႉဢၼ်တႃးထုၼ်ၽိူၵ်ႇၼႆႉဢိူၺ်း၊ၽြႃးပဵၼ်ၸဝ်ႈတၵ်းပေႃႉယႅၼ်ႉမႂ်းဢေႃႈ။မႂ်းၼင်ႈယူႇလႄႈႁႂ်ႈလႆႈၸီႇယၢင်ႇၵဝ်ၶႃႈၸွမ်းၼင်ႇတြႃးႁိုဝ်။ယင်းဢမ်ႇၸွမ်းၼင်ႇတြႃးလႄႈမႂ်းႁႂ်ႈၶဝ်ပေႃႉယႅၼ်ႉၵဝ်ၶႃႈႁိုဝ်၊ဝႃႈၼင်ႇၼႆဢေႃႈ။

၄ ၶဝ်ၸိူဝ်းဢၼ်ၸုၵ်းယူႇၵႃႈတီႈႁိမ်းမၼ်းၼၼ်ႉၵေႃႈလၢတ်ႈဝႃႈ၊-မႂ်းသေႉသွမ်းၶုၼ်ယိတ်ႉပရေႃးႁိၵ်ႈၽြႃးပဵၼ်ၸဝ်ႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ပေႃးလုၵေႃႈလၢတ်ႈလႄႈဝႃႈ၊-

၅ ပီႈၼွင်ႉၶဝ်ဢိူၺ်း၊ၵဝ်ၶႃႈဢမ်ႇႁူႉလွင်ႈဢၼ်မၼ်းပဵၼ်ၶုၼ်ယိတ်ႉပရေႃးႁိၵ်ႈလူင်။ဢၼ်တႅမ်ႈဝႆႉၼႂ်းၵျၢမ်းလိၵ်ႈလႄႈဝႃႈၸမ်း၊-မႂ်းဢမ်ႇလႆႈသေႉသွမ်းၶုၼ်ဢၼ်ဢုပ်ႉပိူင်ႇၵူၼ်းမဵဝ်းၸိူဝ်ႉၶိူဝ်းမႂ်းၼၼ်ႉ၊ဝႃႈၼင်ႇၼႆယူႇယဝ်ႉ၊ဝႃႈၼင်ႇၼႆဢေႃႈ။

၆ မိူဝ်ႈဢၼ်ပေႃးလုႁူႉႁၼ်လွင်ႈဢၼ်ဝႃႈၶုၼ်ဢရႃႇသိၸိူဝ်းၼၼ်ႉၵမ်ႈၽွင်ႈပဵၼ်ၸတ်ႉတုၵေး၊ၵမ်ႈၽွင်ႈပဵၼ်ၽႃႇရိသေးၼၼ်ႉၸိုင်၊မၼ်းႁွင်ႉသႅၼ်ႇၵႃႈၼႂ်းလုမ်းလူင်လႄႈဝႃႈ၊-ပီႈၼွင်ႉၶဝ်ဢိူၺ်း၊ၵဝ်ၶႃႈပဵၼ်ၽႃႇရိသေးၶႃႈဢေႃႈ။လုၵ်ႈၸၢႆးၽႃႇရိသေးၵေႃႈၸႂ်ႈဢေႃႈ။ၵွပ်ႈပိူဝ်ႈတၢင်းမုင်ႈထႃႈမွင်းထႃႈၵဝ်ၶႃႈၼႂ်းလွင်ႈတၢင်းၶဝ်ၸိူဝ်းဢၼ်တၢႆယဝ်ႉတၵ်းလုၵ်ႉၶိုၼ်းၼၼ်ႉလႄႈၵဝ်ၶႃႈၸင်ႇလႆႈၶၢမ်ႇတၢင်းဢၼ်ၸီႇယၢင်ႇၸႅတ်ႈထၢမ်ၶႃႈယဝ်ႉ၊ဝႃႈၼင်ႇၼႆဢေႃႈ။

၇ မိူဝ်ႈဢၼ်မၼ်းဝႃႈၸိူဝ်ႉၼင်ႇၼႆၼၼ်ႉၸိုင်၊ၽႃႇရိသေးဢိၵ်ႇတင်းၸတ်ႉတုၵေးၸိူဝ်းၼၼ်ႉ၊ၵေႃႉၼိုင်ႈလႄႈၵေႃႉၼိုင်ႈတွပ်ႇၵၼ်ထဵင်ၵၼ်လႄႈပရိၵ်ႈသၢတ်ႈဢၼ်ၸူႉဢၼ်တုမ်ၸိူဝ်းၼၼ်ႉပဵၼ်တၢင်းဢၼ်ၽၢတ်ႇၽႄၵၼ်ဢေႃႈ။

၈ လွင်ႈဢၼ်ၽၢတ်ႇၽႄၵၼ်ၼၼ်ႉၸမ်း၊ၸတ်ႉတုၵေးတင်းလၢႆဝႃႈ၊-ဢမ်ႇမီးတၢင်းဢၼ်လုၵ်ႉၶိုၼ်း။ဢမ်ႇမီးတမၢၼ်ႇၵၢင်ႁၢဝ်။ဢမ်ႇမီးၸႂ်ဝိၺိၺ်ႇဝႃႈၼင်ႇၼႆဢေႃႈ။ၽႃႇရိသေးတင်းလၢႆၸမ်းၶဝ်ႁပ်ႉတုင်းဢဝ်တင်းသၢမ်ပိူင်ဢေႃႈ။

၉ ၵမ်းၼၼ်ႉပဵၼ်မႃးသဵင်ဢၼ်ႁွင်ႉသႅၼ်ႇယႂ်ႇၼမ်ၼႃႇလူင်လၢင်လႄႈၵူၼ်းထုတ်ႇၵျၢမ်းဢၼ်ယူႇၽၢႆႇၽႃႇရိသေးတင်းလၢႆၼၼ်ႉတွပ်ႇထဵင်လႄႈဝႃႈ၊-ႁဝ်းဢမ်ႇႁၼ်ဢပျႅတ်ႈၼႂ်းၵေႃႉၼႆႉလႃးလႃး။ပေႃးဝိၺိၺ်ႇ၊ဢမ်ႇၼၼ်ၵေႃႈတမၢၼ်ႇၵၢင်ႁၢဝ်လႆႈလၢတ်ႈတေႃႇမၼ်းယဝ်ႉၸိုင်ယႃႇပေႁႄႉၶႅၼ်ၽြႃးပဵၼ်ၸဝ်ႈ၊ဝႃႈၼင်ႇၼႆဢေႃႈ။

၁၀ မိူဝ်ႈဢၼ်ၶဝ်တွပ်ႇထဵင်ၵၼ်ၼမ်ၼႃႇလူင်လၢင်ၼၼ်ႉၸိုင်ၵႄႇသိုၵ်းၼၼ်ႉပိူဝ်ႈဢၼ်ၵူဝ်ၶဝ်တၵ်းတိုတ်ႉၸၼ်ပေႃးလုၶၢတ်ႇပဵၼ်ပိတ်းပဵၼ်တွၼ်ႈၵႂႃႇလႄႈမၼ်းမီးဢမိင်ႉႁႂ်ႈၵူၼ်းသိုၵ်းၼမ်ၼႃႇလူင်းၵႂႃႇႁိမ်ဢဝ်ပေႃးလုဢွၵ်ႇသေၵႃႈၼႂ်းၵၢင်ၶဝ်သေယဝ်ႉၵႂႃႇသူင်ႇၵႃႈတီႈၼႂ်းတပ်ႉသေဢေႃႈ။

၁၁ ၼႂ်းၶမ်ႈဝၼ်းမိူဝ်ႈၽုၵ်ႈၼၼ်ႉၸဝ်ႈၽြႃးပေႃႇမႃးၵႃႈတီႈႁိမ်းမၼ်းလႄႈဝႃႈ၊-မီးၸႂ်ဢၼ်ႁတ်းႁၢၼ်တႃႉ။ၸိူဝ်ႉၼင်ႇဢၼ်မႂ်းၶၢမ်ႇသၢၵ်ႈသေႇလွင်ႈၵဝ်ၵႃႈၼႂ်းဝဵင်းယေႇရုသလႅမ်ႇယဝ်ႉၼၼ်ႉ၊ၵႃႈၼႂ်းဝဵင်းရူဝ်းမၵေႃႈမႂ်းတၵ်းလႆႈၶၢမ်ႇသၢၵ်ႈသေႇလူးၵွၼ်ႇဢေႃႈ၊ဝႃႈၼင်ႇၼႆဢေႃႈ။

ၵျၢမ်ႇႁႃႁႂ်ႈလႆႈဢဝ်ပေႃးလုတၢႆ

၁၂ မိူဝ်ႈဢၼ်မိူင်းလႅင်းမႃးၸိုင်ၵူၼ်းယုတၵမ်ႈၽွင်ႈႁဵတ်းမုၵ်ႉႁဵတ်းၸိူဝ်းၵၼ်သေလႄႈႁဵတ်းတိၵ်ႉထၢၼ်ႇၵိၼ်ႇတီႈတူဝ်ၸဝ်ႈၵဝ်ႇလႄႈဝႃႈ၊-ၸူဝ်ႈဢၼ်ႁဝ်းယင်းဢမ်ႇပႆႇလႆႈဢဝ်ပေႃးလုတၢႆၸိုင်၊ႁဝ်းတၵ်းဢမ်ႇၵိၼ်တၢင်းၵိၼ်တၢင်းၶူပ်းသေဢိတ်း၊ဝႃႈၼင်ႇၼႆဢေႃႈ။

၁၃ ၶဝ်ၸိူဝ်းဢၼ်ႁဵတ်းမုၵ်ႉႁဵတ်းၸိူဝ်းၼင်ႇၼႆၼၼ်ႉမီးသေၵူၼ်းသီႇသိပ်းလိူဝ်လိူဝ်ဢေႃႈ။ၶဝ်ၼၼ်ႉၵႂႃႇၸူးၵႃႈတီႈယိတ်ႉပရေႃးႁိၵ်ႈလူင်တင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆလႄႈလဝ်ႈလၢတ်ႈဝႃႈ၊-ႁဝ်းၶႃႈလႆႈႁဵတ်းတိၵ်ႉထၢၼ်ႇၵိၼ်ႇတီႈတူဝ်ၸဝ်ႈၵဝ်ႇဝႆႉဝႃႈ၊-

၁၄ ၸူဝ်ႈဢၼ်ႁဝ်းဢမ်ႇပႆႇလႆႈဢဝ်ပေႃးလုတၢႆၼၼ်ႉႁဝ်းတၵ်းဢမ်ႇၵိၼ်တၢင်းၵိၼ်တၢင်းၶူပ်းသေဢိတ်း၊ဝႃႈၼႆယဝ်ႉၶႃႈ၊ဝႃႈၼင်ႇၼႆဢေႃႈ။

၁၅ ပိူဝ်ႈၼႆလႄႈသူၸဝ်ႈဢိၵ်ႇတင်းၶုၼ်ဢရႃႇသိတင်းလၢႆဢွၼ်ၵၼ်လဝ်ႈလၢတ်ႈတီႈၵႄႇသိုၵ်းႁႂ်ႈဢဝ်ပေႃးလုမႃးၵႃႈတီႈသူၸဝ်ႈလႄႈသူၸဝ်ႈၵေႃႈႁဵတ်းၵႅင်ႈမိူၼ်ႁၢင်ႊတၵ်းၶႂ်ႈယဵင်ႈၶႅၼ်းၸႅတ်ႈထၢမ်လွင်ႈတၢင်းမၼ်းလီလီငၢမ်းငၢမ်းထႅင်ႈၼႆ၊သေၵမ်းၶႃႈ။ၸူဝ်ႈဢၼ်ပေႃးလုဢမ်ႇပႆႇႁွတ်ႈပႆႇထိုင်ၸမ်တီႈႁိမ်းသူၸဝ်ႈၼၼ်ႉႁဝ်းၶႃႈတၵ်းမႄးႁႅၼ်းထႃႈဝႆႉႁႂ်ႈလႆႈဢဝ်မၼ်းတၢႆၵႃႈၼႂ်းၵၢင်တၢင်းၶႃႈဢေႃႈ၊ဝႃႈၼင်ႇၼႆဢေႃႈ။

၁၆ လၢၼ်ၸၢႆးပေႃးလုလႆႈငိၼ်းလွင်ႈတၢင်းဢၼ်ၶဝ်ပႂ်ႉလွမ်ယူႇၵႃႈတီႈႁိမ်းတၢင်းၸိူဝ်ႉၼင်ႇၼၼ်ၼၼ်ႉလႄႈမၼ်းၶဝ်ႈၵႂႃႇၵႃႈၼႂ်းတပ်ႉသေယဝ်ႉမွၵ်ႇလၢတ်ႈလွင်ႈတၢင်းၼၼ်ႉတီႈပေႃးလုဢေႃႈ။

၁၇ ပေႃးလုၵေႃႈႁွင်ႉဢဝ်တပ်ႉမူးၵေႃႉၼိုင်ႈမႃးလႄႈလၢတ်ႈဝႃႈ၊-ဢဝ်ၵူၼ်းဢွၼ်ႇၼႆႉသူင်ႇၵႂႃႇၸူးၵႃႈတီႈၵႄႇသိုၵ်းသေၵမ်း။မၼ်းမီးလွင်ႈဢၼ်တၵ်းလႆႈလဝ်ႈလၢတ်ႈသေၸိူဝ်ႉသေပိူင်တီႈၵႄႇသိုၵ်းယူႇဢေႃႈ၊ဝႃႈၼင်ႇၼႆဢေႃႈ။တပ်ႉမူးၼၼ်ႉၵေႃႈဢဝ်ၵူၼ်းဢွၼ်ႇၼၼ်ႉၵႂႃႇသူင်ႇၵႃႈတီႈၵႄႇသိုၵ်းလႄႈဝႃႈ၊-

၁၈ ပေႃးလု၊ဢၼ်လႆႈၶၢမ်ႇတူၵ်းၵႅၼ်းယူႇၼၼ်ႉႁွင်ႉဢဝ်ၵဝ်ၶႃႈလႄႈတွင်းပၢၼ်ႇႁႂ်ႈၵဝ်ၶႃႈႁႂ်ႈလႆႈဢဝ်ၵူၼ်းဢွၼ်ႇၵေႃႉၼႆႉမႃးသူင်ႇတီႈၸဝ်ႈႁဝ်းၶႃႈဢေႃႈ။မၼ်းမီးလွင်ႈဢၼ်တၵ်းလႆႈလဝ်ႈလၢတ်ႈၵႃႈတီႈၸဝ်ႈႁဝ်းသေၸိူဝ်ႉသေပိူင်ယူႇၶႃႈဢေႃႈ၊ဝႃႈၼႆဢေႃႈ။

၁၉ ၵႄႇသိုၵ်းၼၼ်ႉၵေႃႈယိပ်းဢဝ်မိုဝ်းၵူၼ်းဢွၼ်ႇၼၼ်ႉၵႂႃႇတီႈဢၼ်ပိူၼ်ႈဢမ်ႇမီးၼၼ်ႉသေယဝ်ႉထၢမ်ဝႃႈ၊-မႂ်းၶႂ်ႈလဝ်ႈလၢတ်ႈတီႈၵဝ်လွင်ႈတၢင်းၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။

၂၀ မၼ်းၵေႃႈလဝ်ႈလၢတ်ႈလႄႈဝႃႈ၊-ၵူၼ်းယုတၵမ်ႈၽွင်ႈၽွမ်ႉၵၼ်တိူင်ႇပၢင်ႇႁႂ်ႈလႆႈလဝ်ႈယွၼ်းတီႈၸဝ်ႈႁဝ်းႁႂ်ႈၸဝ်ႈႁဝ်းဢဝ်ပေႃးလုၵႂႃႇၵႃႈတီႈလုမ်းလူင်ၼႂ်းဝၼ်းမိူဝ်ႈၽုၵ်ႈၼၼ်ႉလႄႈႁဵတ်းၵႅင်ႈမိူၼ်ၼင်ႇႁၢင်ႊတၵ်းၶႂ်ႈယဵင်ႈၶႅၼ်းၸႅတ်ႈထၢမ်ၸႅတ်ႈတူၺ်းမၼ်းလီလီငၢမ်းငၢမ်းဢေႃႈ။

၂၁ ၵူၺ်းၵႃႈယႃႇပေထွမ်ႇယႃႇပေၸွမ်းဢလူဝ်ႇၶဝ်ၶႃႈ။လွင်ႈမၼ်းၸမ်းမီးၵူၼ်းယုတသီႇသိပ်းၵေႃႉလိူဝ်လိူဝ်ၶဝ်ႁဵတ်းတိၵ်ႉထၢၼ်ႇၵိၼ်ႇတီႈတူဝ်ၸဝ်ႈၵဝ်ႇဝႆႉဝႃႈ၊ၸူဝ်ႈဢၼ်ၶဝ်ယင်းဢမ်ႇပႆႇလႆႈဢဝ်ပေႃးလုတၢႆၼၼ်ႉၸိုင်ၶဝ်တၵ်းဢမ်ႇၵိၼ်တၢင်းၵိၼ်တၢင်းၶူပ်းသေဢိတ်း၊ဝႃႈၼင်ႇၼႆလႄႈၶဝ်ပႂ်ႉလွမ်ယူႇၵႃႈတီႈႁိမ်းတၢင်းႁႂ်ႈလႆႈဢဝ်ပေႃးလုတၢႆၶႃႈဢေႃႈ။တေႃႈလဵဝ်ၼႆႉၶဝ်ပႂ်ႉထႃႈၵႂၢမ်းၸဝ်ႈႁဝ်းဝႆႉလႄႈမႄးႁႅၼ်းထႃႈဝႆႉယူႇၶႃႈယဝ်ႉ၊ဝႃႈၼင်ႇၼႆဢေႃႈ။

သူင်ႇပေႃးလုၵႂႃႇဝဵင်းၵေႇသရိ

၂၂ ပိူဝ်ႈၼႆလႄႈၵႄႇသိုၵ်းၼၼ်ႉၵေႃႈသင်ႇၵူၼ်းဢွၼ်ႇၼၼ်ႉလႄႈဝႃႈ၊-ယႃႇပလေၢတ်ႈလွင်ႈတၢင်းၼႆႉၵႃႈတီႈၽူႈလႂ်၊ဝႃႈၼင်ႇၼႆသေယဝ်ႉပွႆႇမၼ်းၵႂႃႇဢေႃႈ။

၂၃ ဝၢႆးၼၼ်ႉမၼ်းႁွင်ႉဢဝ်တပ်ႉမူးသွင်ၵေႃႉလႄႈပၼ်ဢမိင်ႉဝႃႈ၊-မႄးႁႅၼ်းဝႆႉၵူၼ်းသိုၵ်းသွင်ပၢၵ်ႇ၊ၵူၼ်းသိုၵ်းၶီႇမႃႉၸဵတ်းသိပ်း၊ဢိၵ်ႇတင်းၵူၼ်းသိုၵ်းဢၼ်ယိပ်းၵမ်ႁွၵ်ႇသွင်ပၢၵ်ႇ၊ႁႂ်ႈလႆႈၵႂႃႇၵႃႈတီႈဝဵင်းၵေႇသရိၶမ်ႈၼႆႉၶိင်ႇသၢမ်ၼႃႇရီႇၼၼ်ႉတႃႉ။

၂၄ မႃႉဢၼ်တၵ်းလႆႈတၢင်ႇဢဝ်ပေႃးလုၵႂႃႇၵႃႈတီႈၶုၼ်ၽေးလိတ်ႉၼၼ်ႉၵေႃႈမႄးႁႅၼ်းဝႆႉလီလီငၢမ်းငၢမ်းတႃႉ၊ဝႃႈၼင်ႇၼႆဢေႃႈ။

၂၅ လိၵ်ႈဢၼ်ၵႄႇသိုၵ်းတႅမ်ႈပၼ်ၵႂႃႇၼၼ်ႉမီးဝႆႉလႄႈဝႃႈၸမ်း၊ၵလေႃႇတိလုသိ၊

၂၆ မီးတင်းမႅတ်ႈတႃႇလဝ်ႈလၢတ်ႈပၼ်ငိၼ်းၵႂႃႇၵႃႈတီႈၶုၼ်ၽေးလိတ်ႉဢၼ်မျၢတ်ႈၼႃႇၼၼ်ႉၶႃႈဢေႃႈ။

၂၇ ၼႂ်းမိူဝ်ႈဢၼ်ၵူၼ်းယုတတင်းလၢႆတီႉဢဝ်ၵေႃႉၼႆႉလႄႈငႃတၵ်းဢဝ်မၼ်းတၢႆၼၼ်ႉပိူဝ်ႈဢၼ်ၵဝ်ၶႃႈႁူႉငိၼ်းလွင်ႈဢၼ်ဝႃႈမၼ်းပဵၼ်ၵူၼ်းရူဝ်းမၼၼ်ႉလႄႈၵဝ်ၶႃႈၸင်ႇဢဝ်ၵူၼ်းသိုၵ်းတင်းလၢႆၵႂႃႇၼုၵ်ႈဢဝ်မၼ်းမႃးၶႃႈဢေႃႈ။

၂၈ ပိူဝ်ႈဢၼ်ၵဝ်ၶႃႈၶႂ်ႈႁူႉလွင်ႈတၢင်းဢၼ်ၶဝ်ႁဵတ်းဢမူႉတီႈမၼ်းၵွပ်ႈပိူဝ်ႈဢပျႅတ်ႈဢၼ်လႂ်ၼၼ်ႉလႄႈၵဝ်ၶႃႈၸင်ႇဢဝ်မၼ်းၵႂႃႇသူင်ႇတီႈလုမ်းလူင်သေယဝ်ႉ၊လႆႈႁူႉႁၼ်လွင်ႈဢၼ်ဝႃႈ၊ၶဝ်ႁဵတ်းဢမူႉတီႈမၼ်းၵွပ်ႈပိူဝ်ႈဢပျႅတ်ႈဢၼ်ထိူၵ်ႈၶၢမ်ႇတၢင်းတၢႆ၊ဢမ်ႇၼၼ်ၵွပ်ႈပိူဝ်ႈဢပျႅတ်ႈဢၼ်ထိူၵ်ႈၶၢမ်ႇတၢင်းဢၼ်တူၵ်းၵႅၼ်းၼၼ်ႉဢမ်ႇၸႂ်ႈ။

၂၉ ပဵၼ်ၵွပ်ႈပိူဝ်ႈလွင်ႈဢၼ်ၶဝ်ဢဝ်တီႈတွင်ႈတီႈထၢမ်ဢၼ်ၸၢပ်ႈသႅင်ႇၵၼ်တင်းတြႃးၶဝ်ၼၼ်ႉလႄႈႁဵတ်းဢမူႉတီႈမၼ်းၶႃႈဢေႃႈ။

၃၀ မိူဝ်ႈဢၼ်ၵဝ်ၶႃႈလႆႈႁူႉလႆႈငိၼ်းလွင်ႈဢၼ်ပိူၼ်ႈဢၢင်ႈဢၢၼ်းတၵ်းၵျၢမ်ႇႁဵတ်းဢၼ်ဢမ်ႇလီတီႈမၼ်းလႄႈၵဝ်ၶႃႈၸင်ႇလႆႈပွႆႇၸႂ်ႉမၼ်းၵႂႃႇၵႃႈတီႈၸဝ်ႈႁဝ်းၵမ်းလဵဝ်လႄႈ၊ႁႂ်ႈၶဝ်ၸိူဝ်းဢၼ်ႁဵတ်းဢမူႉတီႈမၼ်းၼၼ်ႉလဝ်ႈလၢတ်ႈၵႃႈတီႈၽၢႆႇၼႃႈၸဝ်ႈႁဝ်းၶႃႈဢေႃႈ။ႁႂ်ႈၸဝ်ႈႁဝ်းယူႇလီၵိၼ်ဝၢၼ်သေၵမ်းလူၺ်ႈ၊ဝႃႈၼင်ႇၼႆဢေႃႈ။

၃၁ ၵႃႈၼင်ႇဢၼ်ၵႄႇသိုၵ်းသင်ႇလၢတ်ႈဝႆႉၼၼ်ႉၶိင်ႇၵၢင်ၶိုၼ်းၵူၼ်းသိုၵ်းၸိူဝ်းၼၼ်ႉဢဝ်ပေႃးလုၵႂႃႇလႄႈသူင်ႇႁွတ်ႈထိုင်ၵႃႈတီႈဢၼ်ႇတိပတရိသေယဝ်ႉ၊

၃၂ ဝၼ်းမိူဝ်ႈၽုၵ်ႈပွႆႇၸႂ်ႉၵူၼ်းသိုၵ်းၶီႇမႃႉတင်းလၢႆၵႂႃႇလူၺ်ႈၵၼ်တင်းပေႃးလုသေလႄႈၶဝ်ၶိုၼ်းမိူဝ်းၵႂႃႇၵႃႈတီႈတပ်ႉသေဢေႃႈ။

၃၃ ၵူၼ်းသိုၵ်းၶီႇမႃႉၸိူဝ်းၼၼ်ႉႁွတ်ႈထိုင်ၵႂႃႇၵႃႈတီႈဝဵင်းၵေႇသရိသေယဝ်ႉဢဝ်လိၵ်ႈၼၼ်ႉဢၢပ်ႈပၼ်တီႈၶုၼ်လႄႈဢဝ်ပေႃးလုဝႆႉၵႃႈတီႈၽၢႆႇၼႃႈၸဝ်ႈၶုၼ်ဢေႃႈ။

၃၄ ၶုၼ်ၼၼ်ႉၽတ်းတူၺ်းလိၵ်ႈၼၼ်ႉယဝ်ႉၸင်ႇထၢမ်လႄႈဝႃႈ၊-မၼ်းၸၢပ်ႈသႅင်ႇၵၼ်တင်းမိူင်းလႂ်၊ဝႃႈၼင်ႇၼႆလႄႈ၊ႁူႉလွင်ႈဢၼ်ဝႃႈမၼ်းပဵၼ်ၵူၼ်းမိူင်းၵိလိတိသေယဝ်ႉလႄႈၶုၼ်ၼၼ်ႉလၢတ်ႈလႄႈဝႃႈ၊-

၃၅ မိူဝ်ႈဢၼ်ၶဝ်ၸိူဝ်းဢၼ်ႁဵတ်းဢမူႉတီႈမႂ်းႁွတ်ႈထိုင်မႃးၼၼ်ႉၵဝ်တၵ်းထွမ်ႇၶဝ်လူးၵွၼ်ႇ၊ဝႃႈၼင်ႇၼႆလႄႈႁႂ်ႈပေႃးလုၶမ်ႇတူၵ်းၵႅၼ်းယူႇၼႂ်းႁေႃၶုၼ်ႁေႇရုတ်ႉၼၼ်ႉဢေႃႈ။