Shan Missions

ၵျၢမ်းငဝ်ႈၵမ်ႇၽႃႇ

၁   ၂   ၃   ၄   ၅   ၆   ၇   ၈   ၉   ၁၀   ၁၁   ၁၂   ၁၃   ၁၄   ၁၅   ၁၆   ၁၇   ၁၈   ၁၉   ၂၀   ၂၁   ၂၂   ၂၃   ၂၄   ၂၅   ၂၆   ၂၇   ၂၈   ၂၉

၃၀   ၃၁   ၃၂   ၃၃   ၃၄   ၃၅   ၃၆   ၃၇   ၃၈   ၃၉   ၄၀   ၄၁   ၄၂   ၄၃   ၄၄   ၄၅   ၄၆   ၄၇   ၄၈   ၄၉   ၅၀   

၃၁

 ယႃႇၵုပ်ႉလႆႈပၢႆဢွၵ်ႇသေလႃႇပၢၼ်ႇၵွႃႇ

၁ မိူဝ်ႈၼၼ်ႉ ယႃႇၵုပ်ႉငိၼ်းလွင်ႈဢၼ်လုၵ်ႈၸၢႆးလႃႇပၢၼ်ႇ တင်းလၢႆလၢတ်ႈဝႃႈ၊-ယႃႇၵုပ်ႉ ဢဝ်ဢုၵ်ႉၸႃႇပေႃႈႁဝ်း ၵႃႈမီးတင်းသဵင်ႈတင်းလူင်ၼၼ်ႉၵွႃႇယဝ်ႉလူင်ပေႇ။ ၵွပ်ႈပိူဝ်ႈဢုၵ်ႉၸႃႇပေႃႈႁဝ်းၼၼ်ႉလႄႈတီႈမၼ်းပဵၼ်ၸေးၸိမ်ႇလူင်ၵွႃႇယဝ်ႉ၊ ဝႃႈၼင်ႇၼႆလႄႈ

၂ မိူဝ်ႈဢၼ် ယႃႇၵုပ်ႉ တူၺ်းၼႃႈ လႃႇပၢၼ်ႇ ၼၼ်ႉ၊မၼ်းလႆႈႁၼ် ဢမ်ႇမိူၼ်ၸိူဝ်ႉၼင်ႇမိူဝ်ႈဢွၼ်ၼၼ်ႉလႄႈပိူင်ႈၵွႃႇယဝ်ႉဢေႃႈ။

၃ ထႃႇဝရႃႉၽြႃးလၢတ်ႈတီႈယႃႇၵုပ်ႉလႄႈဝႃႈ၊-ၶိုၼ်းမိူဝ်းၵွႃႇၸူးၵႃႈတီႈ မိူင်းဢၼ်ပူႇပေႃႈမႂ်းၸိူဝ်ႉၶိူဝ်းမႂ်းယူႇပုၼ်ႉတႃႉ။ၵဝ်တၵ်းမီးယူႇလူၺ်ႈၵၼ်တင်းမႂ်းဢေႃႈ၊ဝႃႈၼင်ႇ ၼႆဢေႃႈ။

၄ ယႃႇၵုပ်ႉပွႆႇၸႂ်ႉၵူၼ်းၵွႃႇႁွင်ႉဢဝ် ရႃႇၶေႇလဢိၵ်ႇတင်း လေႇဢႃႇ မႃးၵႃႈတီႈထိူၼ်ႇတီႈဢၼ်ၽုင်သူဝ်းမၼ်းမီးၼၼ်ႉသေယဝ်ႉ လၢတ်ႈတီႈသွင်ၶႃလႄႈ ဝႃႈ၊-

၅ ၵဝ်ႁူႉႁၼ်လွင်ႈဢၼ်ၼႃႈပေႃႈသူဢမ်ႇမိူၼ်ၸိူဝ်ႉၼင်ႇမိူဝ်ႈဢွၼ်ၼႆႉၼၼ်ႉတီႈၵဝ်လႄႈပိူင်ႈၵွႃႇၼၼ်ႉဢေႃႈ။ၵူၺ်းၵႃႈၽြႃးပဵၼ်ၸဝ်ႈပေႃႈၵဝ်မီးယူႇလူၺ်ႈ ၵၼ်တင်းၵဝ်ဢေႃႈ။

၆ သူႁူႉလွင်ႈဢၼ်ၵဝ်လႆႈႁဵတ်းၵၢၼ်ပေႃႈသူ ၵႃႈၼင်ႇဢၼ်ၵဝ်တတ်ႈၼိုင်ႇၼၼ်ႉယူႇဢေႃႈ။

၇ ပေႃႈသူၵေႃႈ ပႅတ်ႉလႅၼ်ၵဝ်လႄႈဢဝ်ၵႃႊၶၼ်ဢၼ်ၵဝ်ထုၵ်ႇလီလႆႈၼၼ်ႉလႅၵ်ႈပုတ်ႈသိပ်းပွၵ်ႈယဝ်ႉ။ၵူၺ်းၵႃႈၽြႃးပဵၼ်ၸဝ်ႈ ဢမ်ႇပၼ်ဢၶႂၢင်ႉဢၼ်လႆႈၼိၵ်ႈၸၢၵ်ႈ ငႅၼ်းသေးၵဝ်။

၈ ပေႃးမၼ်းလၢတ်ႈဝႃႈ၊-ႁႂ်ႈတူဝ်ဢၼ်ပဵၼ်ၸုမ်ႈဝႆႉၸိူဝ်းၼၼ်ႉပဵၼ်ၵႃႊၶၼ်မႂ်းတႃႉ၊ ဝႃႈၼင်ႇၼႆၸိုင် ၽုင်သူဝ်းၽုင်ပေႉၵႃႈမီးတင်းသဵင်ႈတင်းလူင်ၵိူတ်ႇလဵင်ႉမႃးတူဝ်ဢၼ်ပဵၼ်ၸုမ်ႈဝႆႉဢေႃႈ။ပေႃးမၼ်းဝႃႈ၊-ႁႂ်ႈတူဝ်ဢၼ်လၢႆးဢၼ်လဵၼ်းၸိူဝ်းၼၼ်ႉ ပဵၼ်ၵႃႊၶၼ်မႂ်းတႃႉ၊ဝႃႈၼင်ႇၼႆၸိုင် ၽုင်သူဝ်းၽုင်ပေႉၵႃႈမီးတင်းသဵင်ႈတင်းလူင် ၵိူတ်ႇလဵင်ႉမႃး တူဝ်ဢၼ်လၢႆးဢၼ် လဵၼ်းဢေႃႈ။

၉ ၼင်ႇၼၼ်လႄႈၽြႃးပဵၼ်ၸဝ်ႈၼုၵ်ႈဢဝ် တရိၵ်ႈသၢၼ်ႇပေႃႈသူသေလႄႈပၼ်တီႈၵဝ်ယဝ်ႉ။

၁၀ မိူဝ်ႈဢၼ်တရိၵ်ႈသၢၼ်ႇၸိူဝ်းၼၼ်ႉဝၢင်ၵၼ်ၼၼ်ႉၸိုင် ၵဝ်လႆႈမုင်ႈတူၺ်းလႄႈႁၼ်လွင်ႈဢၼ် တူဝ်ပေႃႈတင်းလၢႆဢၼ်ၸွမ်းၽွၵ်ႇတူဝ်မေႈၸိူဝ်းၼၼ်ႉ မီးၵွင်ႉငဝ်းဢၼ်လၢႆးဢၼ်လဵၼ်း ဢၼ်ပဵၼ်ၸုမ်ႈဝႆႉၼၼ်ႉၼႂ်းတၢင်း ဢၼ်ၼွၼ်းၽၼ်ႁၼ်ဢေႃႈ။

၁၁ တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈၵေႃႈ ႁွင်ႉၵဝ်ၼႂ်းတၢင်းဢၼ်ၼွၼ်းၽၼ်ႁၼ်ၼၼ်ႉလႄႈဝႃႈ၊-ယႃႇၵုပ်ႉဢိူၺ်း၊ဝႃႈၼင်ႇၼႆလႄႈၵဝ်ဢိူဝ်ႈလႄႈဝႃႈ၊-ၶႃႈၸဝ်ႈမီးယူႇတီႈၶႃႈဢေႃႈ၊ ဝႃႈၼင်ႇ ၼႆဢေႃႈ။

၁၂ မၼ်းၸဝ်ႈၵေႃႈလၢတ်ႈလႄႈဝႃႈ၊-မုင်ႈလႄႈတူၺ်းတႃႉ။တူဝ်ပေႃႈတင်းလၢႆဢၼ်ၸွမ်းၽွၵ်ႇတူဝ်မေႈၸိူဝ်းၼၼ်ႉၵႃႈမီးတင်းသဵင်ႈတင်းလူင် မီးၵွင်ႉငဝ်းဢၼ်လၢႆးဢၼ်လဵၼ်းဢၼ်ပဵၼ်ၸုမ်ႈဝႆႉၼၼ်ႉဢေႃႈ။လွင်ႈမၼ်းၸမ်း ၵဝ်ႁၼ်တၢင်းဢၼ်လႃႇပၢၼ်ႇႁဵတ်းတီႈမႂ်း ၼၼ်ႉယဝ်ႉ။

၁၃ ၵဝ်ပဵၼ်ၽြႃးတီႈပေႇသလတီႈဢၼ်မႂ်းဢဝ်ၼမ်ႉမၼ်းထွၵ်ႇသႂ်ႇ ၵႃႈၼိူဝ်သဝ်တီႈမၢတ်ႈတီႈတွင်းလႄႈႁဵတ်းသႅတ်ႉၸႃႇၵတိၼၼ်ႉဢေႃႈ။တေႃႈလဵဝ်ၼႆႉလုၵ်ႉလႄႈဢွၵ်ႇသေၵႃႈၼႂ်းမိူင်းၼႆႉ ၶိုၼ်းမိူဝ်းၵွႃႇၸူးၵႃႈတီႈမိူင်းဢၼ်ၸိူဝ်ႉၶိူဝ်းမႂ်းယူႇပုၼ်ႉတႃႉ၊ ဝႃႈၼင်ႇၼႆယဝ်ႉ၊ဝႃႈၼင်ႇၼႆဢေႃႈ။

၁၄ ရႃႇၶေႇလ တင်း လေႇဢႃႇ ၶိုၼ်းလၢတ်ႈလႄႈဝႃႈ၊-ႁဝ်းၶႃႈၸၢပ်ႈသႅင်ႇၵၼ်တင်းႁိူၼ်းပေႃႈႁဝ်းၶႃႈၸိူဝ်ႉၼင်ႇႁိုဝ်ၶႃႈ။ ႁဝ်းၶႃႈတၵ်းလႆႈၶၢမ်ႇဢမူၺ်ႇၵႃႈသင် လူးၵွၼ်ႇၶႃႈ။

၁၅ မၼ်းၼၼ်ႉၸၢင်ႊမၢတ်ႈႁႂ်ႈႁဝ်းၶႃႈပဵၼ်ၸိူဝ်ႉၼင်ႇ ၵူၼ်းတၢင်ႇသိုင်ႇတၢင်ႇမိူင်းဢမ်ႇၸႂ်ႈၶႃႈႁိုဝ်။မၼ်းၶၢႆႁဝ်းၶႃႈပႅတ်ႈယဝ်ႉလူင်ပေႇ။ငိုၼ်းႁဝ်းၶႃႈၵေႃႈ မၼ်းၵိၼ်ပႅတ်ႈသဵင်ႈယဝ်ႉလူင်ပေႇ။

၁၆ ၸေးၸိမ်ႇၵႃႈဢၼ်ၽြႃးပဵၼ်ၸဝ်ႈ ၼုၵ်ႈဢွၵ်ႇသေၵႃႈတီႈပေႃႈႁဝ်းၶႃႈတင်းသဵင်ႈတင်းလူင်ၼၼ်ႉ ပဵၼ်ဢုၵ်ႉၸႃႇႁဝ်းၶႃႈတင်းလုၵ်ႉလၢင်းႁဝ်းၶႃႈၶႃႈဢေႃႈ။ပိူဝ်ႈၼႆလႄႈတေႃႈလဵဝ်ၼႆႉႁဵတ်းၸွမ်းၵႃႈၼင်ႇဢၼ် ၽြႃးပဵၼ်ၸဝ်ႈသင်ႇလၢတ်ႈဝႆႉတီႈၸဝ်ႈၼၼ်ႉသေၵမ်းၶႃႈ၊ဝႃႈၼင်ႇၼႆဢေႃႈ။

၁၇ မိူဝ်ႈၼၼ်ႉ ယႃႇၵုပ်ႉ လုၵ်ႉလႄႈဢဝ်လုၵ်ႈလၢင်းမၼ်းဢိၵ်ႇတင်းမေးမၼ်းၸိူဝ်းၼၼ်ႉ ႁႂ်ႈၶီႇၵႃႈၼိူဝ်ၵလႃႇဢုၵ်ႉဢေႃႈ။

၁၈ မၼ်းဢဝ်ဢုၵ်ႉၸႃႇၵႃႈဢၼ်မၼ်းမီးတင်းသဵင်ႈတင်းလူင်ဢိၵ်တင်းတရိၵ်ႈသၢၼ်ႇ ၵႃႈဢၼ်မၼ်းမီးတင်းသဵင်ႈတင်းလူင် ဢၼ်မၼ်းလႆႈၵႃႈတီႈ ပႃႇတၢၼ်ႇဢႃႇရၢမ်ႇ ဢၼ်မၼ်းၸူႉဝႆႉသိမ်းဝႆႉၸိူဝ်းၼၼ်ႉလႄႈ ဢွၵ်ႇၵွႃႇႁႂ်ႈလႆႈမိူဝ်းႁွတ်ႈမိူဝ်းထိုင်ၵႃႈတီႈပေႃႈမၼ်း ဢိၸၵ်ႉ၊ ၵႃႈတီႈမိူင်းၶႃႇၼၼ်ႇ ၼၼ်ႉဢေႃႈ။

၁၉ ၼႂ်းမိူဝ်ႈဢၼ် လႃႇပၢၼ်ႇ ၵွႃႇတၢင်ႇတီႈတၢင်ႇလႅၼ်ႁႂ်ႈလႆႈၵႅတ်းႁႆးၶူၼ်သူဝ်းယူႇၼၼ်ႉၸိုင်၊ ရႃႇၶေႇလ လၵ်ႉ ဢဝ်ရုၵ်ႉထူႉတေႇရၽိမ်ႇပေႃႈမၼ်းၵွႃႇဢေႃႈ။

၂၀ ယႃႇၵုပ်ႉၼၼ်ႉ ယင်းဢမ်ႇမွၵ်ႇဢမ်ႇလၢတ်ႈလွင်ႈဢၼ်မၼ်းတၵ်းပၢႆၵွႃႇၼၼ်ႉလႄႈ ႁဵတ်းတင်းပရီ့ယေႇသေလႄႈပႄႉၼႅင်ႇလႃႇပၢၼ်ႇ ဢၼ်ပဵၼ်ၵူၼ်းသုရိၼၼ်ႉဢေႃႈ။

၂၁ ၼင်ႇၼၼ်လႄႈ မၼ်းပႃးဢဝ်ၵႃႈဢၼ်မၼ်းမီးတင်းသဵင်ႈတင်းလူင် ဢွၵ်ႇပၢႆလႄႈၶၢမ်ႈၼမ်ႉႁွင်ႊၶၼ်ၶၼ်ၽႂ်းၽႂ်းသေယဝ်ႉ ဝၢႆႇၼႃႈတေႃႇလွႆၵိလတ်ႉလႄႈၵွႃႇဢေႃႈ။

၂၂ ပူၼ်ႉသၢမ်ဝၼ်းယဝ်ႉၸင်ႇ လႃႇပၢၼ်ႇ လႆႈငိၼ်းပိူၼ်ႈလၢတ်ႈလွင်ႈ ယႃႇၵုပ်ႉ ပၢႆၵွႃႇၼၼ်ႉလႄႈမၼ်းႁွင်ႉဢဝ်ပီႈၼွင်ႉမၼ်းတင်းလၢႆသေယဝ်ႉ လိုပ်ႈၸွမ်းၵွႃႇၶၢဝ်းတၢင်းၸဵတ်းဝၼ်းလႄႈၶိုတ်းၵႃႈၼိူဝ်လွႆ ၵိလတ်ႉ ဢေႃႈ။

၂၃ ၽြႃးပဵၼ်ၸဝ်ႈပေႃႇမႃးတီႈ လႃႇပၢၼ်ႇ ၵူၼ်း သုရိၼၼ်ႉ ၼႂ်းၼွၼ်းၽၼ်ႁၼ်ၶိင်ႇၵၢင်ၶိုၼ်းလႄႈဝႃႈ၊-

၂၄ ႁဵတ်းသတိ လွင်ႈဢၼ်မႂ်းတၵ်းလၢတ်ႈဢၼ်လီဢၼ်ဢမ်ႇလီတီႈ ယႃႇၵုပ်ႉ ၼၼ်ႉတႃႉ၊ဝႃႈၼင်ႇၼႆဢေႃႈ။

၂၅ မိူဝ်ႈဢၼ် လႃႇပၢၼ်ႇ ၸွမ်းၶိုတ်း ယႃႇၵုပ်ႉ ၼၼ်ႉၸိုင်၊ ယႃႇၵုပ်ႉ လႆႈမုင်းသုမ်ႉထဵင်မၼ်းၵႃႈၼိူဝ်လွႆၼၼ်ႉဢေႃႈ။ လႃႇပၢၼ်ႇ ဢိၵ်ႇတင်းပီႈၼွင်ႉမၼ်းတင်းလၢႆၵေႃႈ ဢွၼ်ၵၼ်မုင်းသုမ်ႉထဵင်ၶဝ်ၵႃႈၼိူဝ်လွႆ ၵိလတ်ႉၼၼ်ႉဢေႃႈ။

၂၆ လႃႇပၢၼ်ႇ လၢတ်ႈတီႈ ယႃႇၵုပ်ႉ လႄႈဝႃႈ၊-မႂ်းႁဵတ်းၸိူဝ်ႉၼင်ႇႁိုဝ်ၼႆႉ။မႂ်းပႅတ်ႉလႅၼ်ၵဝ်လႄႈသိမ်းဢဝ်လုၵ်ႈယိင်းၵဝ်တင်းလၢႆၵွႃႇ မိူၼ်ၸိူဝ်ႉၼင်ႇသိမ်းဢဝ်ၶဝ်ၸိူဝ်းဢၼ်တီႉလႆႈ ၼႂ်းတၢင်းဢၼ်တိုၵ်းသိုၵ်းၼၼ်ႉလူင်ပေႇ။

၂၇ ႁဵတ်းသင်လႄႈ ပႅတ်ႉလႅၼ်ၵဝ်သေလႄႈတဵတ်ႇတဵတ်ႇဢွၵ်ႇပၢႆ။ႁဵတ်းသင်လႄႈဢမ်ႇမွၵ်ႇဢမ်ႇလၢတ်ႈတီႈၵဝ်ႁႂ်ႈၵဝ်လႆႈႁဵတ်းတၢင်းဢၼ်မူၼ်ႈပျေႃႇ၊ တၢင်းဢၼ်ႁဵတ်းၵႂၢမ်း၊တၢင်းဢၼ်ႁႆႇၵွင်လဵတ်းတိင်ႇသေလႄႈ ပွႆႇ မႂ်းၵွႃႇ။

၂၈ ႁဵတ်းသင်လႄႈဢမ်ႇပၼ်ဢၶႂၢင်ႉႁႂ်ႈၵဝ်လႆႈၼူမ်ႈလုၵ်ႈၸၢႆးတင်းလုၵ်ႈယိင်းၵဝ်ၸိူဝ်းၼႆႉ။ မႂ်းလႆႈႁဵတ်း တၢင်းဢၼ်မိူၵ်ႈယဝ်ႉလူင်ပေႇ။

၂၉ မိူဝ်ႈလဵဝ်ၼႆႉၵဝ်ၼိၵ်ႈၸၢၵ်ႈငႅၼ်းသေးမႂ်းလႆႈယူႇဢေႃႈ။ ၼႂ်းဝႃႈၼၼ်သေၵေႃႈမိူဝ်ႈၶမ်ႈဝႃး ၽြႃးပဵၼ်ၸဝ်ႈဢၼ်ပေႃႈမႂ်းၵူဝ်းၵွႃႇၼၼ်ႉလၢတ်ႈတီႈၵဝ်လႄႈဝႃႈ၊-ႁဵတ်းသတိလွင်ႈဢၼ်မႂ်းတၵ်းလၢတ်ႈဢၼ်လီဢၼ်ဢမ်ႇလီတီႈ ယႃႇၵုပ်ႉ ၼၼ်ႉတႃႉ၊ဝႃႈၼင်ႇၼႆဢေႃႈ။

၃၀ တေႃႈလဵဝ်ၼႆႉ ပိူဝ်ႈဢၼ်မႂ်းၸႂ်ထိုင်ႁိူၼ်းပေႃႈမႂ်းၼႃႇလူင်လၢင်လႄႈ မႂ်းၶိုၼ်းမိူဝ်းၼၼ်ႉႁႂ်ႈၸႂ်ႈသေလူးၵွၼ်ႇတႃႉ။ၵူၺ်းၵႃႈႁဵတ်းသင်လႄႈမႂ်းလၵ်ႉဢဝ်ၽြႃးၵဝ်ၸိူဝ်းၼၼ်ႉၵွႃႇ၊ ဝႃႈၼင်ႇၼႆ ဢေႃႈ။

၃၁ ယႃႇၵုပ်ႉ ၵေႃႈၶိုၼ်းလၢတ်ႈတီႈ လႃႇပၢၼ်ႇလႄႈဝႃႈ၊-ပိူဝ်ႈဢၼ်ၵူဝ်ၸဝ်ႈၸၢင်ႊၶေးတၵ်းႁဵတ်းပႄႉႁဵတ်းၼႅင်ႇသေလႄႈ ၶိုၼ်းသိမ်းဢဝ်လုၵ်ႈယိင်းၸဝ်ႈ ၸိူဝ်းၼၼ်ႉလႄႈၸင်ႇလႆႈဢွၵ်ႇပၢႆၶႃႈဢေႃႈ။

၃၂ ၽြႃးၸဝ်ႈၸိူဝ်းၼၼ်ႉၸမ်း ပေႃးထူပ်းႁၼ်တီႈသေၵေႃႉသေၵူၼ်းၸိုင်ႁႂ်ႈၵေႃႉၼၼ်ႉတၢႆတႃႉ။ၼႄပျႃးဢုၵ်ႉၸႃႇၸဝ်ႈၵႃႈတီႈၽၢႆႇၼႃႈပီႈၼွင်ႉႁဝ်းတင်းလၢႆၼႆႉသေလႄႈ ၶိုၼ်းဢဝ်သေၵမ်းတႃႉ၊ ဝႃႈၼင်ႇၼႆဢေႃႈ။လွင်ႈဢၼ်ရႃႇၶေႇလ လႆႈလၵ်ႉဢဝ်မႃးၼၼ်ႉ ယႃႇၵုပ်ႉ ဢမ်ႇႁူႉ။

၃၃ ပိၵ်ႉသမ်ႉ လႃႇပၢၼ်ႇ ၶဝ်ႈလႄႈ ႁႃၵႃႈၼႂ်းသုမ်ႉထဵင်ယႃႇၵုပ်ႉ သုမ်ႉထဵင် လေႇဢႃႇ တင်းသုမ်ႉထဵင်မေႈယိင်းၶႃႈသွင်ၵေႃႉၼၼ်ႉသေၵေႃႈမၼ်းဢမ်ႇထူပ်းဢမ်ႇႁၼ်။မၼ်းၸင်ႇဢွၵ်ႇသေၵႃႈၼႂ်းသုမ်ႉထဵင် လေႇဢႃႇ လႄႈၶဝ်ႈၵႃႈၼႂ်းသုမ်ႉထဵင်ရႃႇၶေႇလဢေႃႈ။

၃၄ ရႃႇၶေႇလဢဝ်ရူၵ်ႈထူႉ တေႇရၽိမ်ႇ ၸိူဝ်းၼၼ်ႉသႂ်ႇၵႃႈၼိူဝ်ၶိူင်ႈၵလႃႇဢုၵ်ႉသေယဝ်ႉ ၼင်ႈတဵင်ယူႇၵႃႈၼိူဝ်ၶိူင်ႈၼၼ်ႉဢေႃႈ။လႃႇပၢၼ်ႇသွၵ်ႈႁႃတူၺ်းတင်းသဵင်ႈတင်းမူတ်းၵေႃႈဢမ်ႇထူပ်းဢမ်ႇႁၼ်။ရႃႇၶေႇလလၢတ်ႈတီႈပေႃႈ မၼ်းလႄႈဝႃႈ၊-

၃၅ ၵွပ်ႈပိူဝ်ႈဢၼ်ၵဝ်ၶႃႈဢမ်ႇလုၵ်ႉၵႃႈတီႈၽၢႆႇၼႃႈၸဝ်ႈလႆႈလႄႈ ယႃႇပေမီးၸႂ်သေၵမ်းၶႃႈ။ထုင်းၸၢမ်ႇဢၼ်ယၢမ်ႈပဵၼ်တီႈၽူႈယိင်းၼၼ်ႉ ပဵၼ်ယူႇတီႈၵဝ်ၶႃႈဢေႃႈ၊ဝႃႈၼင်ႇၼၼ်လႄႈ လႃႇပၢၼ်ႇႁႃၵေႃႈဢမ်ႇႁၼ်ရုၵ်ႈထူႉတေႇရၽိမ်ႇၸိူဝ်းၼၼ်ႉ။

၃၆မိူဝ်ႈၼၼ်ႉ ယႃႇၵုပ်ႉ ၸႂ်မႆႈၶႂ်ႈၸႃႉလႄႈလၢတ်ႈတီႈလႃႇပၢၼ်ႇ လႄႈဝႃႈ၊-ၼင်ႇႁိုဝ်တၵ်းလႆႈလိုပ်ႈၸွမ်ႈၵဝ်ၶႃႈထၢၼ်ႇၼႆႉၸိုင် ၵဝ်ၶႃႈၽိတ်းပိူင်ႈၸိူဝ်ႉၼင်ႇႁိုဝ်လႄႈ မီးဢပျႅတ်ႈဢၼ်လႂ်ၶႃႈ။

၃၇ ၸဝ်ႈလႆႈသွၵ်ႈႁႃတူၺ်းဢုၵ်ႉၸႃႇၶူဝ်းလဵင်းၵဝ်ၶႃႈၵႃႈမီး တင်းသဵင်ႈတင်းလူင်ၼၼ်ႉလႄႈ ထူပ်းမႅၼ်ႈဢုၵ်ႉၸႃႇၶူဝ်းႁိူၼ်းၶူဝ်းယေးၸဝ်ႈသေၸိူဝ်ႉသေပိူင်ၶႃႈႁိုဝ်။ပေႃးထူပ်းႁၼ်ၸိုင်၊ ဢဝ်ဝႆႉၵႃႈတီႈၽၢႆႇၼႃႈပီႈၼွင်ႉၸဝ်ႈဢိၵ်ႇတင်း ပီႈၼွင်ႉၵဝ်ၶႃႈၸိူဝ်းၼႆႉၵႃႈတီႈၼႆႉသေၵမ်းၶႃႈ။ ႁႂ်ႈၶဝ်ၸီႇယၢင်ႇဝူင်ႈၵၢင်ႁႃးသွင်ၵေႃႉသေၵမ်းတႃႉ။

၃၈ ၵဝ်ၶႃႈယူႇလူၺ်ႈၵၼ်တင်းၸဝ်ႈသၢဝ်းပီႊယဝ်ႉလႄႈသူဝ်းမေႈပေႉမေႈၸဝ်ႈ ဢၼ်ႁွမ်းၸိူဝ်းၼၼ်ႉဢမ်ႇလူႉဢမ်ႇယွတ်ႇသေတူဝ်။ပေႉပေႃႈသူဝ်း ပေႃႈၸဝ်ႈၵေႃႈၵဝ်ၶႃႈဢမ်ႇဢဝ်ၵိၼ်သေတူဝ်။

၃၉ တူဝ်ဢၼ်တူဝ်ထိူၼ်ႇၶူပ်းတၢႆၼၼ်ႉၵေႃႈ ၵဝ်ၶႃႈဢမ်ႇဢဝ်မႃးၸူးၵႃႈတီႈၸဝ်ႈ။ၵဝ်ၶႃႈလႆႈၶၢမ်ႇသုမ်းၶႃႈဢေႃႈ။ပိူၼ်ႈလၵ်ႉ ၶိင်ႇၵၢင်ဝၼ်းသေဢမ်ႇဝႃႈ လၵ်ႉၶိင်ႇၵၢင်ၶိုၼ်းသေဢမ်ႇဝႃႈ ၸဝ်ႈၸၢင်ႊယွၼ်းဢဝ်တီႈၵဝ်ၶႃႈ ဢၼ်တၢင်တူဝ်မၼ်းၼၼ်ႉၶႃႈဢေႃႈ။

၄၀ ၼင်ႇၼၼ်လႄႈၵဝ်ၶႃႈလႆႈၶၢမ်ႇ တၢင်းဢၼ်မႆႈဢၼ်ႁွၼ်ႉၶိင်ႇၵၢင်ဝၼ်းတၢင်းဢၼ်ၵတ်းဢၼ်ၼၢဝ်ၶိင်ႇၵၢင်ၶိုၼ်းမႃးယဝ်ႉ။

၄၁ တၢင်းဢၼ်တႃၼွၼ်းလူႉၵေႃႈလႆႈၶၢမ်ႇမႃးယဝ်ႉ။ၵဝ်ႈၶႃႈယူႇၵႃႈတီႈႁိူၼ်းၸဝ်ႈသၢဝ်းပီႊလႄႈ လႆႈၶၢမ်ႇတၢင်းၸႂ်ႉတၢင်းသွႆပုၼ်ႈလုၵ်ႈယိင်းသၢဝ်သွင်ၵေႃႉၼၼ်ႉ သိပ်းသီႇပီႊ၊ပုၼ်ႈသူဝ်းပေႉၸိူဝ်းၼၼ်ႉႁူၵ်းပီႊယဝ်ႉ။ၵူၺ်းၵႃႈၵႃႊၶၼ်ဢၼ်ၵဝ်ၶႃႈထုၵ်ႇလႆႈၼၼ်ႉ ၸဝ်ႈဢဝ်လႅၵ်ႈ ပုတ်ႈပႅတ်ႈသိပ်းပွၵ်ႈၶႃႈယဝ်ႉ။

၄၂ တေႃႈလဵဝ်ၼႆႉၵေႃႈသင်ၽြႃးပဵၼ်ၸဝ်ႈပေႃႈၵဝ်ၶႃႈ၊ ၽြႃးပဵၼ်ၸဝ်ႈဢႃႇပြႁမ်ႇ၊ၽြႃးပဵၼ်ၸဝ်ႈဢၼ် ဢိၸၵ်ႉ ရူဝ်ႇသေႇၵူဝ်ယမ်ၼၼ်ႉဢမ်ႇမီးယူႇလူၺ်ႈၵၼ်တင်းၵဝ်ၶႃႈၸိုင်၊ ၸဝ်ႈတၵ်းပွႆႇၵဝ်ၶႃႈမိူဝ်းၵွႃႇတိၼ်လၢႆမိုဝ်းပဝ်ႇ ဢမၢၼ်ႇၶၼ်ပဵၼ်လူင်ပေႇ။ ၽြႃးပဵၼ်ၸဝ်ႈႁၼ်တၢင်းဢၼ်ၵဝ်ၶႃႈလႆႈၶၢမ်ႇတုၵ်ႉၶႃႉတၢင်းၽၢၼ်လႄႈသင်ႇသွၼ်သုင်းမႃႉၸဝ်ႈမိူဝ်ႈၶမ်ႈဝႃးၼၼ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။

၄၃လႃႇပၢၼ်ႇ ၵေႃႈၶိုၼ်းလၢတ်ႈတီႈ ယႃႇၵုပ်ႉ လႄႈဝႃႈ၊- လုၵ်ႈယိင်းၸိူဝ်းၼႆႉပဵၼ်လုၵ်ႈယိင်းၵဝ်ဢေႃႈ။လုၵ်ႈဢွၼ်ႇၸိူဝ်းၼႆႉၵေႃႈ ပဵၼ်လုၵ်ႈဢွၼ်ႇၵဝ်ဢေႃႈ။တရိၵ်ႈသၢၼ်ႇၸိူဝ်းၼႆႉၵေႃႈ ပဵၼ်တရိၵ်ႈသၢၼ်ႇၵဝ်ဢေႃႈ။ ဢုၵ်ႉၸႃႇၶူဝ်းလဵင်းၵႃႈဢၼ်မႂ်းႁၼ်ၸိူဝ်းၼႆႉပဵၼ်ဢုၵ်ႉၸႃႇၶူဝ်းလဵင်းၵဝ်ဢေႃႈ။ ဝၼ်းမိူဝ်ႈၼႆႉၵဝ်တၵ်းႁဵတ်းတီႈလုၵ်ႈယိင်းၵဝ်ၸိူဝ်းၼႆႉ တီႈလုၵ်ႈဢွၼ်ႇၵဝ်ဢၼ်ၶဝ်ၵိူတ်ႇလဵင်ႉမႃးၸိူဝ်းၼႆႉ ၸိူဝ်ႉၼင်ႇႁိုဝ်လႆႈ။

၄၄ ပိူဝ်ႈၼႆလႄႈတေႃႈလဵဝ်ၼႆႉ မႂ်းတင်းၵဝ်ႁဵတ်းပတိၺိၺ်ႇလူၺ်ႈၵၼ်တႃႉႁႃး။ႁႂ်ႈပဵၼ်သၢၵ်ႈသေႇဝူင်ႈၵၢင်မႂ်းတင်း ၵဝ်ဝႆႉတႃႉႁႃး၊ဝႃႈၼင်ႇၼႆဢေႃႈ။

၄၅ ယႃႇၵုပ်ႉ ၵေႃႈဢဝ်မၢၵ်ႇႁိၼ်သေလႄႈ ပူၵ်းတင်ႈဝႆႉပုၼ်ႈသဝ်တီႈမၢတ်ႈတီႈတွင်းသေယဝ်ႉ လၢတ်ႈတီႈပီႈၼွင်ႉမၼ်းၸိူဝ်းၼၼ်ႉလႄႈဝႃႈ၊-

၄၆ ဢွၼ်ၵၼ်ၵဵပ်းမၢၵ်ႇႁိၼ်သေၵမ်း၊ဝႃႈၼင်ႇၼႆလႄႈ ၶဝ်ဢွၼ်ၵၼ်ၵဵပ်းမၢၵ်ႇႁိၼ်ၵူဝ်ႇႁဵတ်းၵွင်သေယဝ်ႉၵိၼ်တၢင်းၵိၼ်တၢင်းၶူပ်း ၵႃႈၼိူဝ်ၵွင်မၢၵ်ႇႁိၼ် ၼၼ်ႉဢေႃႈ။

၄၇ ၵွင်မၢၵ်ႇႁိၼ်ၼၼ်ႉၸိုင်၊ လႃႇပၢၼ်ႇ ႁွင်ႉႁိၵ်ႈၸိုဝ်ႈဝႃႈ ယေႇၵႃႇသႁႃႇတုသ ဢေႃႈ။ ယႃႇၵုပ်ႉသမ်ႉႁွင်ႉႁိၵ်ႈၸိုဝ်ႈဝႃႈ ၵိလတ်ႉ ဢေႃႈ။

၄၈ လႃႇပၢၼ်ႇ လၢတ်ႈလႄႈဝႃႈ၊-ဝၼ်းမိူဝ်ႈၼႆႉၵွင်မၢၵ်ႇႁိၼ်ၼႆႉပဵၼ်သၢၵ်ႈသေႇဝူင်ႈၵၢင်ၵဝ်တင်းမႂ်းယဝ်ႉ။ ပိူဝ်ႈၼႆလႄႈႁွင်ႉႁိၵ်ႈၸိုဝ်ႈဝႃႈၵိလတ်ႉဢေႃႈ။

၄၉ ယင်းႁွင်ႉႁိၵ်ႈၸိုဝ်ႈဝႃႈ မိၸပႃႇဝႃႇ ၼႆလူးၵွၼ်ႇဢေႃႈ။လွင်ႈမၼ်းၸမ်း၊လႃႇပၢၼ်ႇလၢတ်ႈဝႃႈ၊-ဝၢႆးသေႁဝ်းၵေႃႉၼိုင်ႈလႄႈၵေႃႉၼိုင်ႈ ၽၢတ်ႇယၢၼ်ၵၼ်ၵွႃႇယဝ်ႉၼၼ်ႉႁႂ်ႈထႃႇဝရႃႉၽြႃးပႂ်ႉဝူင်ႈၵၢင်ၵဝ်တင်းမႂ်း သေၵမ်း လူၺ်ႈ။

၅၀ ပေႃးမႂ်းၼိၵ်ႈၸၢၵ်ႈငႅၼ်းသေးလုၵ်ႈယိင်းၵဝ်ၸိူဝ်းၼႆႉ၊ဢမ်ႇၼၼ် လိူဝ်သလေုၵ်ႈယိင်းၵဝ်ၸိူဝ်းၼႆႉပေႃးမႂ်းဢဝ်မေးတၢင်ႇၵေႃႉထႅင်ႈၸိုင် ၵႃႈတီႈႁႃးၼႆႉဢမ်ႇမီးသၢၵ်ႈသေႇၵူၼ်း။ႁႂ်ႈၽြႃးပဵၼ်ၸဝ်ႈပဵၼ်သၢၵ်ႈသေႇဝူင်ႈၵၢင်ၵဝ်တင်းမႂ်းသေၵမ်းလူၺ်ႈ၊ ဝႃႈၼင်ႇၼႆ သေယဝ်ႉ၊ လႃႇပၢၼ်ႇ သမ်ႉလၢတ်ႈတီႈ ယႃႇၵုပ်ႉ ထႅင်ႈလႄႈဝႃႈ၊-

၅၁ တူၺ်းၵွင်မၢၵ်ႇႁိၼ်ၼႆႉဢိၵ်ႇတင်းသဝ်တီႈမၢတ်ႈတီႈတွင်း ဢၼ်ၵဝ်မႄးႁဵတ်းဝႆႉဝူင်ႈၵၢင်ၵဝ်တင်း မႂ်းၼႆႉသေၵမ်း။

၅၂ ႁႂ်ႈၵွင်မၢၵ်ႇႁိၼ်ၼႆႉဢိၵ်ႇတင်းသဝ်တီႈမၢတ်ႈတီႈတွင်းၼႆႉပဵၼ်သၢၵ်ႈသေႇလွင်ႈဢၼ်ဝႃႈ၊ ၵဝ်ဢမ်ႇဢဝ်ၵွင်မၢၵ်ႇႁိၼ်တင်းသဝ် တီႈမၢတ်ႈတီႈတွင်းၼႆႉလႄႈႁႂ်ႈလႆႈႁဵတ်းတၢင်းၽိတ်းသႂ်ႇတီႈမႂ်း။ မႂ်းၵေႃႈတၵ်းဢမ်ႇဢဝ်ၵွင်မၢၵ်ႇႁိၼ်ၼႆႉ ဢိၵ်ႇတင်း သဝ်တီႈမၢတ်ႈတီႈတွင်းၼႆႉလႄႈ ႁႂ်ႈလႆႈႁဵတ်းတၢင်းၽိတ်းသႂ်ႇတီႈၵဝ်ၼၼ်ႉသေၵမ်းလူၺ်ႈ။

၅၃ႁႂ်ႈၽြႃးပဵၼ်ၸဝ်ႈ ဢႃႇပြႁမ်ႇ ၽြႃးပဵၼ်ၸဝ်ႈၼႃႇၶေႃႇ၊ ၽြႃးပဵၼ်ၸဝ်ႈပေႃႈၶဝ်ၼၼ်ႉ ၸီႇယၢင်ႇဝူင်ႈၵၢင်ႁႃးသေၵမ်းလူၺ်ႈ၊ဝႃႈၼင်ႇၼႆဢေႃႈ။ယႃႇၵုပ်ႉၵေႃႈႁဵတ်းတၢင်းဢၼ်တိူင်ႇၽြႃးဢၼ်ပေႃႈမၼ်း ဢိၸၵ်ႉ ရူဝ်ႇသေႇၵူဝ်ယမ်ၼၼ်ႉဢေႃႈ။

၅၄ မိူဝ်ႈၼၼ်ႉ ယႃႇၵုပ်ႉပုၵ်ႉၸေႃႇယိၸ်ႉၵႃႈၼိူဝ်လွႆၼၼ်ႉဢေႃႈ။ ၶိင်ႇၵၢင်ၼႂ်ၸဝ်ႉၸဝ်ႉ လႃႇပၢၼ်ႇ လုၵ်ႉလႄႈၼူမ်ႈလုၵ်ႈၸၢႆးမၼ်းဢိၵ်ႇတင်း လုၵ်ႈယိင်းမၼ်းတင်းလၢႆသေယဝ်ႉ

ပၼ်တၢင်းလီတီႈၶဝ်သေလႄႈ ၶိုၼ်းမိူဝ်းၵွႃႇၸူးၵႃႈတီႈမိူင်းဢၼ်မၼ်းယူႇၼၼ်ႉသေဢေႃႈ။