Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၂၇ 

ပေႃးလုတင်းသီႇလလႆႈၶၢမ်ႇသူင်ႇၵႂႃႇမိူင်းရူဝ်းမ

၁ မိူဝ်ႈဢၼ်တႅပ်းတတ်းႁႂ်ႈႁဝ်းလႆႈၶီႇႁိူဝ်းလႄႈၵႂႃႇၵႃႈတီႈမိူင်းဢိတလိၼၼ်ႉၸိုင်၊ၶဝ်ဢဝ်ပေႃးလုဢိၵ်ႇတင်းၵူၼ်းတၢင်ႇတီႈဢၼ်လႆႈၶၢမ်ႇတူၵ်းၵႅၼ်းယူႇၸိူဝ်းၼၼ်ႉဢၢပ်ႈပၼ်တီႈတပ်ႉမူးဢၼ်လႆႈၸိုဝ်ယုလိဢၼ်ၸၢပ်ႈသႅင်ႇၵၼ်တင်းတပ်ႉဢေႃႇၵုတ်ႉတုၼၼ့်ဢေႃႈ။

၂ ႁဝ်းၶဝ်ႈၵႃႈၼႂ်းႁိူဝ်းဢႃႇတြႃႉမုတ်ႉတိၼၼ်ႉသေယဝ်ႉဢၢင်ႈတၵ်းလဵပ်ႈၸွမ်းၵႃႈတီႈႁိမ်းမိူင်းဢႃႇသိသေလႄႈပွႆႇႁိူဝ်းၵႂႃႇဢေႃႈ။ဢႃႇရိတ်ႉတႃႇၶုၵူၼ်းဝဵင်းထိၵ်ႈသႃႇလေႃးၼိၵ်ႈမိူင်းမႃႇၵေႇတေႃးၼိၼၼ်ႉၵေႃႈပႃးလူၺ်ႈၵၼ်တင်းႁဝ်းဢေႃႈ။

၃ ၼႂ်းဝၼ်းမိူဝ်ႈၽုၵ်ႈႁဝ်းသိူၵ်ႈၵႃႈတီႈဝဵင်းၸိတုင်ႇဢေႃႈ။ယုလိႁဵတ်းၵျေးၸူးၼိူဝ်ပေႃးလုလႄႈပၼ်ဢၶႂၢင်ႉႁႂ်ႈမၼ်းလႆႈၵႂႃႇလဵၼ်ႈၵႃႈတီႈၵေႃႉသေႈမၼ်းတင်းလၢႆလႄႈၶၢမ်ႇတၢင်းဢၼ်ၶဝ်ႁဵတ်းလဵင်ႉႁဵတ်းလူမၼ်းဢေႃႈ။

၄ ႁဝ်းၸင်ႇသမ်ႉဢွၵ်ႇသေၵႃႈတီႈဝဵင်းၼၼ်ႉသေယဝ်ႉပိူဝ်ႈဢၼ်လူမ်းမႃးဢမ်ႇထုၵ်ႇၼၼ်ႉလႄႈလဵပ်ႈၵႂႃႇၽၢႆႇတၢင်းၼိူဝ်ၵုၼ်ၵုပရုလႄႈ

၅ ၶၢမ်ႈပၢင်ႇလၢႆႇဢၼ်ၸပ်းၵၼ်တင်းမိူင်းၵိလိၵိတင်းမိူင်းပမ်ႇၽုလိၼၼ်ႉသေယဝ်ႉႁွတ်ႈထိုင်ၵႃႈတီႈဝဵင်းမုရမိူင်းလုၵိဢေႃႈ။

၆ တပ်ႉမူးၸင်ႇထူပ်းႁိူဝ်းဢႃႇလေႇၸၢၼ်ႇတရေႇဢၼ်တၵ်းၶၢမ်ႈၵႂႃႇၵႃႈတီႈမိူင်းဢိတလိၼၼ်ႉလႄႈဢဝ်ႁဝ်းသႂ်ႇၵႃႈၼႂ်းႁိူဝ်းၼၼ်ႉဢေႃႈ။

၇ မိူဝ်ႈဢၼ်ၵႂႃႇထိူင်းထိူင်းလႄႈသဵင်ႈၶိင်ႇဝၼ်းၼမ်ၼႃႇၼၼ်ႉႁဝ်းလႆႈၶတ်းၸႂ်ယၢပ်ႇၼႃႇလူင်လၢင်လႄႈၸင်ႇႁွတ်ႈထိုင်ၵႂႃႇၵႃႈတီႈဢၼ်သိုဝ်ႈၵၼ်တင်းဝဵင်းၵၼိတ်ႉၼၼ်ႉသေယဝ်ႉပိူဝ်ႈဢၼ်လူမ်းမႃးဢမ်ႇထုၵ်ႇလႄႈလဵပ်ႈၵုၼ်ၵရေႇတေႇၽၢႆႇတၢင်းဢၼ်လပ်ႉလူမ်းၵႃႈတီႈဢၼ်သိုဝ်ႈၵၼ်တင်းဝဵင်းသႃႇလမုၼ်ႇလႄႈ

၈ ၶတ်းၸႂ်လဵပ်ႈၵႃႈတီႈၼၼ်ႉယၢပ်ႇၼႃႇလူင်လၢင်သေယဝ်ႉႁွတ်ႈထိုင်ၵႃႈတီႈဢၼ်လႆႈႁွင်ႉၵႃႇလုလိမိၼ်ႇဢၼ်ၸမ်ၵၼ်တင်းဝဵင်းလႃႇသေႇၼၼ်ႉဢေႃႈ။

၉ မိူဝ်ႈဢၼ်ၶိင်ႇၵႃႇလႃႉသဵင်ႈၼမ်ၼႃႇၸိုင်ပေႃးလုထွၵ်ႈလူၺ်ႈလွင်ႈဢၼ်ၶိင်ႇၵႃႇလႃႉဢူႉတူႉဢၼ်ဢမ်ႇထုၵ်ႇလီၶၢမ်ႈပၢင်ႇလၢႆႇၵွပ်ႈပိူဝ်ႈပူၼ်ႉသေဝၼ်းဢၼ်ၵမ်တၢင်းၵိၼ်ၼၼ်ႉမႃးၼၼ်ႉလႄႈပေႃးလုပၼ်သတိလႄႈဝႃႈ၊-

၁၀ ၵူၼ်းတင်းလၢႆၶဝ်ဢိူၺ်း၊ပေႃးၶၢမ်ႈပၢင်ႇလၢႆႇတေႃႈလဵဝ်ၼႆႉၸိုင်ၵဝ်ႁူႉႁၼ်လွင်ႈဢၼ်ႁိူဝ်းဢိၵ်ႇတင်းဢုၵ်ႉၸႃႇၶူဝ်းလဵင်းၵူၺ်းဢမ်ႇၵႃးဢသၢၵ်ႈႁဝ်းၵေႃႈတၵ်းႁွတ်ႈထိုင်တၢင်းဢၼ်လူႉသုမ်းယူႇဢေႃႈ၊ဝႃႈၼင်ႇၼႆဢေႃႈ။

၁၁ ၼႂ်းဝႃႈၼၼ်သေၵေႃႈတပ်ႉမူးၼၼ်ႉထွမ်ႇဢဝ်ၵႂၢမ်းၵူၼ်းမေႃၶတ်းႁၢင်ႁိူဝ်းဢိၵ်ႇတင်းၵႄႇႁိူဝ်းၸိူဝ်းၼၼ်ႉလိူဝ်တွၼ်းၼႃႇသေၵႂၢမ်းဢၼ်ပေႃးလုလၢတ်ႈၼၼ်ႉဢေႃႈ။

၁၂ ပိူဝ်ႈဢၼ်ဢမ်ႇလီယူႇၵႃႈတီႈဝဵင်းၼၼ်ႉၼႂ်းၶိင်ႇၵတ်းလႄႈၵူၼ်းၼမ်ၼႃႇလၢတ်ႈလႄႈဝႃႈ၊-ပေႃးၶီႇႁိူဝ်းၵႂႃႇၵမ်းၼိုင်ႈလႄႈၶိုတ်းထိုင်ၵႃႈတီႈတိုဝ်ႉတႃႈဝဵင်းၽိၼိတ်ႉလႆႈၸိုင်တၢင်းဢၼ်ႁႂ်ႈပူၼ်ႉၶိင်ႇၵတ်းၵႃႈတီႈတိုဝ်ႉတႃႈၼၼ်ႉယဵင်ႈၶႅၼ်းတၵ်းလီဢေႃႈ၊ဝႃႈၼင်ႇၼႆဢေႃႈ။တိုဝ်ႉတႃႈၽိၼိတ်ႉၼၼ်ႉၸမ်းမီးၵႃႈတီႈၵုၼ်ၵရေႇတေႇဢေႃႈ။ဝၢႆႇၼႃႈတေႃႇၽၢႆႇဝၼ်းတူၵ်းၸဵင်ႇၼိူဝ်တင်းၽၢႆႇဝၼ်းတူၵ်းၸဵင်ႇတႂ်ႈယူႇဢေႃႈ။

ထူပ်းၺႃးလူမ်းလဵင်ႉလူင်

၁၃ မိူဝ်ႈဢၼ်လူမ်းတၢင်းၸၢၼ်းထူဝ်းမႃးလွႆးလွႆးယူႇၼၼ်ႉၸိုင်ၶဝ်မီးတင်းၸႂ်ဢၼ်ထၢင်ႇဝႃႈတၵ်းၶိုၼ်းထိုင်လႆႈတေႃႈလဵဝ်ၼႆႉယူႇဝႃႈၼႆလႄႈတိုတ်ႉထွၼ်ၵျွၵ်ႉသူးဢွၵ်ႇသေယဝ်ႉလဵပ်ႈၵႃႈတီႈႁိမ်းၵုၼ်ၵရေႇတေႇၼၼ်ႉၵႂႃႇဢေႃႈ။

၁၄ ဢမ်ႇပေႃးႁိုင်လူမ်းၽိဝ်ႁူင်ဢၼ်လႆႈၸိုဝ်ဢုရွၵ်ႉလုတုင်ႇၼၼ်ႉပတ်ႉမႃးဢဝ်ႁိူဝ်းၶဝ်ၵႂႃႇၵမ်းလဵဝ်လႄႈ

၁၅ ပိူဝ်ႈဢၼ်ႁိူဝ်းၼၼ်ႉဢမ်ႇၶၢမ်ႇလူမ်းလႆႈလႄႈႁဝ်းၵေႃႈႁႅင်းဢူၼ်ႈလႄႈပႃးၸွမ်းၵႂႃႇၽၢႆႇဢၼ်လူမ်းထူဝ်းၼၼ်ႉဢေႃႈ။

၁၆ ၼႂ်းမိူဝ်ႈဢၼ်ယင်းတိုၵ်ႉလႅၼ်ႈၵႂႃႇၽၢႆႇတၢင်းဢၼ်လပ်ႉလူမ်းတီႈၵုၼ်ဢွၼ်ႇၵလေႃႇတေႇယူႇၼၼ်ႉၸိုင်ႁဝ်းလႆႈၶတ်းၸႂ်ယၢပ်ႇၼႃႇလူင်လၢင်ႁႂ်ႈႁိူဝ်းဢွၼ်ႇဢမ်ႇလႆႈလူႉလႆႈလႅဝ်လႄႈဢဝ်တၢင်ႇၵႃႈၼိူဝ်ႁိူဝ်းလူင်သေယဝ်ႉဢဝ်ၸိူၵ်ႈဢၼ်တၵ်းၸွႆႈၵမ်ႉၸွႆႈထွၵ်ႈၸိူဝ်းၼၼ်ႉမတ်ႉၶႅၼ်ႈႁႂ်ႈႁိူဝ်းမၼ်ႈၶိူင်ႇဢေႃႈ။

၁၇ ပိူဝ်ႈဢၼ်ၵူဝ်ႁိူဝ်းတၵ်းတၢင်ႇၵႃႈၼိူဝ်ႁၢတ်ႇသၢႆးၼၼ်ႉလႄႈႁဝ်းသိမ်းဢဝ်လၢင်းယၢၼ်းသေယဝ်ႉပႃးၸွမ်းၵႂႃႇၽၢႆႇဢၼ်လူမ်းထူဝ်းၼၼ်ႉယူႇဢေႃႈ။

၁၈ ပိူဝ်ႈဢၼ်ႁဝ်းလႆႈၶၢမ်ႇတၢင်းဢၼ်ၽူၼ်လူင်လူမ်းလူင်ပတ်ႉထူဝ်းသၼ်ႇၶွၼ်းၼႃႇလူင်လၢင်ၼၼ်ႉလႄႈဝၼ်းမိူဝ်ႈၽုၵ်ႈႁဝ်းဢဝ်ဢုၵ်ႉၸႃႇၶူဝ်းလဵင်းႁဝ်းထိမ်ႈဢွၵ်ႇပႅတ်ႈဢေႃႈ။

၁၉ ၼႂ်းဝၼ်းဢၼ်ထူၼ်ႈထိုင်သၢမ်ဝၼ်းၼၼ်ႉႁဝ်းဢဝ်တင်းမိုဝ်းတူဝ်ၸဝ်ႈၵဝ်ႇယိပ်းဢဝ်ၶိူင်ႈႁိူဝ်းသေယဝ်ႉထိမ်ႈပႅတ်ႈဢေႃႈ။

၂၀ ပိူဝ်ႈဢၼ်ဢမ်ႇလႆႈႁၼ်ဝၼ်းႁၼ်လၢဝ်ႁိုင်ၼႃႇယဝ်ႉလႄႈၽူၼ်လူင်လူမ်းလူင်ယင်းတိုၵ်ႈႁဵင်းယႂ်ႇၼႃႇၼၼ်ႉႁဝ်းဢမ်ႇမီးတီႈမုင်ႈမွင်းဢၼ်တၵ်းလႆႈဢသၢၵ်ႈလိပ်းၼၼ်ႉယဝ်ႉဢေႃႈ။

၂၁ ၶဝ်ဢမ်ႇၵိၼ်တၢင်းၵိၼ်တၢင်းၶူပ်းႁိုင်ၼႃႇယဝ်ႉၼၼ်ႉၸိုင်ပေႃးလုၸင်ႇလုၵ်ႉၸုၵ်းၵႃႈၼႂ်းၶိုင်ႈၵၢင်ၶဝ်သေယဝ်ႉလၢတ်ႈဝႃႈ၊-ၵူၼ်းႁဝ်းၸိူဝ်းၼႆႉဢိူၺ်း၊သင်ဝႃႈသူထွမ်ႇဢဝ်ၵႂၢမ်းၵဝ်လႄႈဢမ်ႇလုၵ်ႉသေၵႃႈတီႈၵုၼ်ၵရေႇတေႇဢွၵ်ႇမႃးၸိုင်ႁဝ်းတၵ်းလႆႈဢမ်ႇလႆႈထူပ်းတၢင်းဢၼ်လူႉဢၼ်သုမ်းၸိူဝ်ႉၼႆ။

၂၂ ၼႂ်းဝႃႈၼၼ်သေၵေႃႈတေႃႈလဵဝ်ၼႆႉၵဝ်တိုၵ်းယူင်းသူႁႂ်ႈၸႂ်သူမီးတၢင်းဢၼ်သၢၵ်ႈသႃႇဢေႃႈ။လွင်ႈမၼ်းၸမ်းလိူဝ်သေသုမ်းႁိူဝ်းၼၼ်ႉၼႂ်းသူၼႆႉတၵ်းဢမ်ႇလႆႈသုမ်းဢသၢၵ်ႈသေၵေႃႉ။

၂၃ ႁဵတ်းႁိုဝ်လႄႈဝႃႈၸိူဝ်ႉၼႆၸမ်းမိူဝ်ႈၶမ်ႈဝႃးတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈ၊ၸဝ်ႈဢၼ်ဢုပ်ႉပိူင်ႇၵဝ်၊ၸဝ်ႈဢၼ်ၵဝ်ၵူဝ်းၵႂၢႆႇၼၼ်ႉ၊ပေႃႇမႃးၵႃႈတီႈႁိမ်းၵဝ်လႄႈလၢတ်ႈဝႃႈ၊-

၂၄ ပေႃးလုဢိူၺ်း၊မႂ်းယႃႇပေမႆႈၸႂ်။မႂ်းတၵ်းလႆႈႁွတ်ႈထိုင်ၵႃႈတီႈၽၢႆႇၼႃႈၶုၼ်ႁေႃၶမ်းၵေႇသႃႇဢေႃႈ။ၽြႃးပဵၼ်ၸဝ်ႈဢဝ်ၵူၼ်းဢၼ်ၶၢမ်ႈပၢင်ႇလၢႆႇလူၺ်ႈၵၼ်တင်းမႂ်းတင်းသဵင်ႈတင်းလူင်ၸိူဝ်းၼႆႉဢၢပ်ႈပၼ်တီႈမႂ်းယဝ်ႉ၊ဝႃႈၼင်ႇၼႆဢေႃႈ။

၂၅ ပိူဝ်ႈၼႆလႄႈၵူၼ်းႁဝ်းၸိူဝ်းၼႆႉဢိူၺ်း၊ႁႂ်ႈမီးတၢင်းဢၼ်သၢၵ်ႈသႃႇတႃႉ။ၵဝ်ဢိင်ပိုင်ႈၽြႃးပဵၼ်ၸဝ်ႈသေလႄႈမီးတၢင်းဢၼ်ယုမ်ႇမၢတ်ႈလွင်ႈဢၼ်တၵ်းပဵၼ်မႃးၵႃႈၼင်ႇဢၼ်မၼ်းၸဝ်ႈလၢတ်ႈဝႆႉတီႈၵဝ်ၼၼ်ႉဢေႃႈ။

၂၆ ၼႂ်းဝႃႈၼၼ်သေၵေႃႈႁိူဝ်းၼႆႉၸမ်းတၵ်းလႆႈလူႉလႆႈလႅဝ်ၵႃႈၼိူဝ်ၵုၼ်သေၵုၼ်ၵုၼ်ဢေႃႈ၊ဝႃႈၼင်ႇၼႆဢေႃႈ။

ႁိူဝ်းလူႉလႅဝ်

၂၇ ၶမ်ႈဢၼ်ထူၼ်ႈထိုင်သိပ်းသီႇဝၼ်းၼၼ်ႉၼႂ်းမိူဝ်ႈဢၼ်ႁဝ်းၵႂႃႇၵႂႃႇၶိုၼ်းၶိုၼ်းၵႃႈၼႂ်းပၢင်ႇလၢႆဢႃႇတြီႉယူႇၼၼ်ႉၵူၼ်းၼႂ်းႁိူဝ်းၸိူဝ်းၼၼ်ႉထၢင်ႇႁဝ်းၸမ်တၵ်းႁွတ်ႈထိုင်ၵႃႈတီႈႁိမ်းၽင်ႇသေႇတီႈတီႈလႄႈယင်ႇတူၺ်းၼမ်ႉလႄႈထူပ်းႁၼ်မီးသၢဝ်းဝႃးဢေႃႈ။

၂၈ ပူၼ်ႉၵႂႃႇဢိတ်းၼိုင်ႈယဝ်ႉၸင်ႇသမ်ႉယင်ႇတူၺ်းၼမ်ႉထႅင်ႈၵမ်းၼိုင်ႈလႄႈလႆႈႁၼ်မီးသိပ်းႁႃႈဝႃးဢေႃႈ။

၂၉ ပိူဝ်ႈဢၼ်ၵူဝ်တၵ်းတုမ်ႉတွၵ်ႈမႅၼ်ႈမၢၵ်ႇႁိၼ်လႄႈႁဝ်းၶျႃးၵျွၵ်ႉသူးသီႇမၢၵ်ႈတူၵ်းၵႃႈတီႈႁၢင်ႁိူဝ်းသေလႄႈပႂ်ႉႁႂ်ႈမိူင်းလႅင်းဢေႃႈ။

၃၀ ၼႂ်းမိူဝ်ႈဢၼ်ၵူၼ်းႁိူဝ်းၸိူဝ်းၼၼ်ႉႁဵတ်းၵႅင်ႈၼင်ႇႁၢင်ႊတၵ်းၶျႃးၵျွၵ်ႉသူးတူၵ်းၵႃႈတီႈႁိူဝ်းသေယဝ်ႉ၊ၶျႃးႁိူဝ်းဢွၼ်ႇတူၵ်းၵႃႈၼႂ်းပၢင်ႇလၢႆလႄႈ

၃၁ ၵျၢမ်ႇငႃတၵ်းပႅတ်ႈဝႆႉႁိူဝ်းလႄႈဢွၵ်ႇပၢႆႊၼၼ်ႉၸိုင်၊ပေႃးလုလၢတ်ႈတီႈတပ်ႉမူးဢိၵ်ႇတင်းၵူၼ်းသိုၵ်းၸိူဝ်းၼၼ်ႉလႄႈဝႃႈ၊-ပေႃးၵူၼ်းၸိူဝ်းၼႆႉဢမ်ႇယူႇၵႃႈၼိူဝ်ႁိူဝ်းၸိုင်ၶဝ်ဢမ်ႇၵတ်းယဵၼ်ၶျၢမ်းသႃႇလႆႈၵူၺ်း၊ဝႃႈၼင်ႇၼႆဢေႃႈ။

၃၂ မိူဝ်ႈၼၼ်ႉၵူၼ်းသိုၵ်းၸိူဝ်းၼၼ်ႉၽၼ်းၸိူၵ်ႈႁိူဝ်းဢွၼ်ႇၶၢတ်ႇတူၵ်းပႅတ်ႈသေဢေႃႈ။မိူဝ်ႈဢၼ်မိူင်းၸမ်တၵ်းလႅင်းၼၼ်ႉပေႃးလုတိုၵ်းယူင်းၸူဝ်းဢဝ်ၵူၼ်းတင်းသဵင်ႈတင်းလူင်ႁႂ်ႈၶဝ်ၵိၼ်တၢင်းၵိၼ်တၢင်းၶူပ်းသေယဝ်ႉလၢတ်ႈဝႃႈ၊-

၃၃ ဝၼ်းမိူဝ်ႈၼႆႉပဵၼ်ဝၼ်းဢၼ်ထူၼ်ႈထိုင်သိပ်းသီႇဝၼ်းဢၼ်သူမုင်ႈထႃႈမွင်းထႃႈလႄႈယင်းဢမ်ႇၵိၼ်တၢင်းၵိၼ်တၢင်းၶူပ်းလႄႈၶၢမ်ႇဢိုပ်းယူႇၼၼ်ႉဢေႃႈ။

၃၄ ပိူဝ်ႈၼႆလႄႈၵဝ်တိုၵ်းယူင်းၸူဝ်းဢဝ်သူႁႂ်ႈသူၵိၼ်ဢေႃႈ။ပေႃးသူၵိၼ်ၸိုင်တၵ်းပဵၼ်လွင်ႈတၢင်းဢၼ်သူတၵ်းလႆႈၵတ်းယဵၼ်ၶျၢမ်းသႃႇဢေႃႈ၊ၶူၼ်ႁူဝ်သူတၵ်းဢမ်ႇလႆႈလူႉလႆႈလႅဝ်သေသႅၼ်ႈ၊

၃၅ ဝႃႈၼင်ႇၼႆသေယဝ်ႉမၼ်းဢဝ်ၶဝ်ႈမုၼ်းလႄႈယွင်ႈယေႃးၵျေးၸူးၽြႃးပဵၼ်ၸဝ်ႈၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်ၸိူဝ်းၼၼ်ႉယဝ်ႉၸင်ႇမိတ်းၶဝ်ႈမုၼ်းလႄႈၵိၼ်ဢေႃႈ။

၃၆ ၶဝ်တင်းသဵင်ႈတင်းလူင်ၸိူဝ်းၼၼ်ႉၵေႃႈမီးတၢင်းဢၼ်သၢၵ်ႈသႃႇမႃးလႄႈၵိၼ်တၢင်းၵိၼ်တၢင်းၶူပ်းဢေႃႈ။

၃၇ ၼပ်ႉဢၢၼ်ႇတူၺ်းႁဝ်းၸိူဝ်းဢၼ်မီးၵႃႈၼႂ်းႁိူဝ်းၼၼ်ႉမီးသွင်ပၢၵ်ႇၸဵတ်းသိပ်းပၢႆႁူၵ်းၵေႃႉဢေႃႈ။

၃၈ ၶဝ်ၵိၼ်ဢိမ်ႇၵိၼ်တဵမ်သေယဝ်ႉဢဝ်ၶဝ်ႈသၢၼ်ၶဝ်ႈပိူၵ်ႇၸိူဝ်းၼၼ်ႉထႅမ်ႈတူၵ်းပႅတ်ႈၵႃႈၼႂ်းပၢင်ႇလၢႆလႄႈႁိူဝ်းၵေႃႈမဝ်မႃးဢေႃႈ။

၃၉ မိူဝ်ႈဢၼ်မိူင်းလႅင်းမႃးၼၼ်ႉပဵၵ်ႉသမ်ႉဢမ်ႇႁူႉတီႈၼၼ်ႉသေၵေႃႈၶဝ်ႁၼ်ၸဵင်ႇၵူတ်ႉၼမ်ႉပၢင်ႇလၢႆႇဢၼ်ၼိုင်ႈဢၼ်မီးၽင်ႇႁၢတ်ႇသၢႆးဝႆႉလႄႈၶဝ်မီးတၢင်းၵျၢမ်ႇတၢင်းပွင်ဝႃႈ၊ပေႃးဢဝ်ႁိူဝ်းၶဝ်ႈလႆႈၸိုင်တၵ်းဢဝ်ၶဝ်ႈတၢင်ႇၵႃႈၼိူဝ်ၽင်ႇၼၼ်ႉဢေႃႈ။

၄၀ ၶဝ်တႅပ်းပႅတ်ႈၵျွၵ်ႉသူးၸိူဝ်းၼၼ်ႉသေယဝ်ႉႁႂ်ႈၵိုတ်းပႅတ်ႈဝႆႉၵႃႈၼႂ်းပၢင်ႇလၢႆႇလႄႈၵႄႈၸိူၵ်ႈဢၼ်မတ်ႉႁွႆႈမႆႉလၢမ်ႈဢၼ်ၶတ်းႁၢင်မၼ်းၼၼ်ႉသေယဝ်ႉၵီႈၽုၺ်ႇလၢင်းယၢၼ်းထွင်ႇလူမ်းၵႂႃႇၸူးၵႃႈတီႈၽင်ႇဢေႃႈ။

၄၁ ႁဝ်းႁွတ်ႈထိုင်ၵႃႈတီႈဢၼ်ၼမ်ႉသွင်ၽၢႆႇၸၢပ်ႈၵၼ်ၼၼ်ႉသေယဝ်ႉႁႂ်ႈႁိူဝ်းတၢင်ႇၵႃႈၼိူဝ်ႁၢတ်ႇသၢႆးသေဢေႃႈ။ႁူဝ်ႁိူဝ်းၼၼ်ႉယင်းဢမ်ႇတူင်ႉဢမ်ႇၼိုင်လႆႈလႄႈပိူဝ်ႈဢၼ်လႅင်းၼမ်ႉပိူပ်ႈၼမ်ႉထိပ်ႇၽၢင်ႈၼႃႇၼၼ်ႉလႄႈႁၢင်မၼ်းႁၵ်းၵႂႃႇဢေႃႈ။

၄၂ မိူဝ်ႈၼၼ်ႉၵူၼ်းသိုၵ်းၸိူဝ်းၼၼ်ႉပိူဝ်ႈဢၼ်ၵူဝ်ၶဝ်ၸိူဝ်းဢၼ်တူၵ်းၵႅၼ်းၸိူဝ်းၼၼ်ႉတၵ်းလုၺ်းၼမ်ႉဢွၵ်ႇပၢႆႊလႄႈမီးတၢင်းၵျၢမ်ႇတၢင်းပွင်တၵ်းဢဝ်ၶဝ်တၢႆဢေႃႈ။

၄၃ တပ်ႉမူးၼၼ်ႉပိူဝ်ႈဢၼ်ၶႂ်ႈႁႂ်ႈပေႃးလုၵတ်းယဵၼ်ၶျၢမ်းသႃႇလႄႈႁႄႉၶႅၼ်တၢင်းၵျၢမ်ႇတၢင်းပွင်ၵူၼ်းသိုၵ်းၸိူဝ်းၼၼ်ႉလႄႈပၼ်ဢမိင်ႉႁႂ်ႈၶဝ်ၸိူဝ်းဢၼ်လုၺ်းၼမ်ႉလႆႈၼၼ်ႉလူင်းဢွၼ်တၢင်းလႄႈၵႂႃႇၵႃႈတီႈၼိူဝ်ၵုင်းဢေႃႈ။

၄၄ ႁႂ်ႈၵူၼ်းဢၼ်ၵိုတ်းဢၼ်ၵျၢၼ်ႇၸိူဝ်းၼၼ်ႉၶီႇပႅၼ်ႈလႂ်ၶိူင်ႈႁိူဝ်းလႂ်လႄႈၵႂႃႇဢေႃႈ။ၼင်ႇၼၼ်လႄႈၶဝ်တင်းသဵင်ႈတင်းလူင်ၸိူဝ်းၼၼ်ႉၵၢင်းလွတ်ႈတင်းၽေးလႄႈႁွတ်ႈထိုင်ၵႂႃႇၵႃႈၼိူဝ်ၵုင်းဢေႃႈ။