Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၁၄ 

တီႈဝဵင်းဢိၵေႃႇၼိ

၁ မိူဝ်ႈဢၼ်ယင်းမီးယူႇၵႃႈၼႂ်းဝဵင်းဢိၵေႃႇၼိၼၼ်ႉတမၢၼ်ႇၸဝ်ႈၸိူဝ်းၼၼ်ႉၶဝ်ႈၵႃႈၼႂ်းၸရွပ်ႈႁေႃးတြႃးၵူၼ်းယုတၶဝ်လႄႈႁေႃးလၢတ်ႈၼႃႇလူင်လၢင်ထၼ်ႈပေႃးၵူၼ်းယုတဢိၵ်ႇတင်းၵူၼ်းႁေႇလသၼမ်ၼႃႇႁွတ်ႈထိုင်တၢင်းဢၼ်ယုမ်ႇမၢတ်ႈဢေႃႈ။

၂ ၵူၼ်းယုတဢၼ်ဢမ်ႇယုမ်ႇမၢတ်ႈၸိူဝ်းၼၼ်ႉတိုၵ်းယူင်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႄႈႁႂ်ႈၶဝ်မီးၸႂ်ဢၼ်သီႇၵေႉတီႈပီႈၼွင်ႉၸိူဝ်းၼၼ်ႉဢေႃႈ။

၃ ပိူဝ်ႈၼႆၸင်ႇၶဝ်ယူႇႁိုင်ႁိုင်ၵႃႈၼၼ်ႉလႄႈႁေႃးလၢတ်ႈတြႃးၸဝ်ႈၽြႃးႁတ်းႁတ်းႁၢၼ်ႁၢၼ်လႄႈၸဝ်ႈၽြႃးပၼ်သၢၵ်ႈသေႇၼႂ်းတၢင်းဢၼ်ႁႂ်ႈၶဝ်လႆႈႁဵတ်းပျႃႉၼီႉမိၵ်ႈလၵ်ႈၶၼႃႇဢိၵ်ႇတင်းလွင်ႈတၢင်းဢၼ်လီဢၢမ်းတင်းလၢႆၸိူဝ်းၼၼ်ႉဢေႃႈ။

၄ ၵူၼ်းဝဵင်းတင်းသဵင်ႈတင်းလူင်ၸိူဝ်းၼၼ်ႉၵေႃႈမီးတၢင်းဢၼ်ၽႄၵိုင်းၵၼ်လႄႈၵမ်ႈၽွင်ႈယူႇၽၢႆႇၵူၼ်းယုတ၊ၵမ်ႈၽွင်ႈယူႇၽၢႆႇတမၢၼ်ႇၸဝ်ႈၸိူဝ်းၼၼ်ႉဢေႃႈ။

၅ မိူဝ်ႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းတင်းၵူၼ်းယုတဢိၵ်ႇတင်းၶုၼ်ဢရႃႇသိတင်းလၢႆတူင်ႉတိုၼ်ႇၵျၢမ်ႇႁႃႁႂ်ႈလႆႈၼိၵ်ႈၸၢၵ်ႈငႅၼ်းသေးတမၢၼ်ႇၸဝ်ႈၸိူဝ်းၼၼ်ႉလႄႈ

၆ ဢဝ်မၢၵ်ႇႁိၼ်ထိမ်ႈၶဝ်ၼၼ်ႉၸိုင်တမၢၼ်ႇၸဝ်ႈၸိူဝ်းၼၼ်ႉႁူႉႁၼ်သေယဝ်ႉဢွၵ်ႇပၢႆႊၵႂႃႇၸူးၵႃႈတီႈဝဵင်းလုတ်ႉတရတင်းဝဵင်းတေႇရပေႇဢၼ်မီးၼႂ်းမိူင်းလုၵေႃႇၼိၼၼ်ႉ

၇ သေလႄႈသိုပ်ႇႁေႃးလၢတ်ႈတြႃးသတၢင်းသိူဝ်းပျေႃႇၸဝ်ႈၵႃႈတီႈၼၼ်ႉဢေႃႈ။

တီႈဝဵင်းလုတ်ႉတရတင်းဝဵင်းတေႇရပေႇ

၈ ၼႂ်းဝဵင်းလုတ်ႉတရၼၼ်ႉမီးၵူၼ်းဢၼ်တိၼ်ဢမ်ႇလီၸဵမ်မိူဝ်ႈၼႂ်းတွင်ႉမေႈလႄႈဢမ်ႇပႆႇတွၼ်ႉပႆတၢင်းလႆႈသေပွၵ်ႈၼၼ်ႉၵေႃႉၼိုင်ႈၼင်ႈယူႇလႄႈထွမ်ႇငိၼ်းတၢင်းဢၼ်ပေႃးလုႁေႃးလၢတ်ႈၼၼ်ႉဢေႃႈ။

၉ ပေႃးလုၵေႃႈယႅၵ်ႉတူၺ်းၵေႃႉၼၼ်ႉၸေးၸေးၸွတ်ႇၸွတ်ႇသေယဝ်ႉလႆႈႁူႉႁၼ်လွင်ႈဢၼ်ၵႃႈၼႂ်းၵေႃႉၼၼ်ႉမီးတၢင်းဢၼ်ယုမ်ႇမၢတ်ႈဢၼ်တၵ်းႁဵတ်းႁႂ်ႈတၢင်းၶႆႈတၢင်းပဵၼ်မၼ်းႁၢႆၼၼ်ႉၸိုင်မၼ်းႁဵတ်းသဵင်ဢၼ်ယႂ်ႇၼႃႇလႄႈလၢတ်ႈဝႃႈ၊-

၁၀ လုၵ်ႉၸုၵ်းသိုဝ်ႈသိုဝ်ႈတႃႉ၊ဝႃႈၼင်ႇၼႆလႄႈၵေႃႉၼၼ်ႉၵေႃႈၽုတ်းလုၵ်ႉပႆတၢင်းၵႂႃႇၵမ်းလဵဝ်ဢေႃႈ။

၁၁ မိူဝ်ႈဢၼ်ၵူၼ်းၸူႉၵူၼ်းတုမ်ၸိူဝ်းၼၼ်ႉႁၼ်လွင်ႈတၢင်းဢၼ်ပေႃးလုႁဵတ်းၼၼ်ႉၸိုင်ၶဝ်ဢဝ်တင်းၵႂၢမ်းၽႃႇသႃႇလုၵေႃႇၼိလႄႈႁွင်ႉသႅၼ်ႇဝႃႈ၊-ၸဝ်ႈၽြႃးတင်းလၢႆႁဵတ်းၸိူဝ်ႉၼင်ႇပုင်ႇႁၢင်ႊၵူၼ်းသေလႄႈလူင်းမႃးတီႈႁဝ်းယဝ်ႉ၊ဝႃႈၼင်ႇၼႆဢေႃႈ။

၁၂ ၶဝ်ဢွၼ်ၵၼ်ႁွင်ႉပႃႇၼပဝႃႈၸုသလႄႈသမ်ႉႁွင်ႉပေႃးလုဝႃႈႁိုဝ်ႇမိ၊ၵွပ်ႈပိူဝ်မၼ်းပဵၼ်ၵေႃႉဢွၼ်ႁူဝ်ႁေႃးလၢတ်ႈၼၼ်ႉဢေႃႈ။

၁၃ ယိတ်ႉပရေႃးႁိၵ်ႈၸုသ၊ဢၼ်မီးၵႃႈတီႈၽၢႆႇၼႃႈဝဵင်းၼၼ်ႉ၊ဢဝ်ဝူဝ်းဢိၵ်ႇတင်းၶူဝ်းၶွင်ၼမ်ၼႃႇမႃးၵႃႈတီႈႁိမ်းၽၵ်းတူႁူမ်ႈလူၺ်ႈၵၼ်တင်းၵူၼ်းၸူႉၵူၼ်းတုမ်ၸိူဝ်းၼၼ်ႉသေယဝ်ႉဢွၼ်ၵၼ်ငႃတၵ်းႁဵတ်းတၢင်းဢၼ်ပုၵ်ႉၸေႃႇၶဝ်ဢေႃႈ။

၁၄ မိူဝ်ႈဢၼ်တမၢၼ်ႇၸဝ်ႈပႃႇၼပတင်းပေႃးလုငိၼ်းလွင်ႈၼၼ်ႉၸိုင်ၶဝ်ၸၵ်ႉသိၵ်ႇၶူဝ်းၼုင်ႈတူဝ်ၸဝ်ႈၵဝ်ႇသေယဝ်ႉလႅၼ်ႈၶဝ်ႈၵႂႃႇၵႃႈၼႂ်းၽုင်ၵူၼ်းၸိူဝ်းၼၼ်ႉသေလႄႈႁွင်ႉသႅၼ်ႇဝႃႈ၊-

၁၅ ၵူၼ်းတင်းလၢႆၶဝ်ဢိူၺ်း၊ႁဵတ်းသင်လႄႈသူႁဵတ်းၸိူဝ်ႉၼင်ႇၼႆ။ႁဝ်းပဵၼ်ၵူၼ်းမိူၼ်ၸိူဝ်ႉၼင်ႇသူၼင်ႇၵဝ်ႇဢေႃႈ။လွင်ႈၼင်ႇႁိုဝ်သူတၵ်းပႄႇပႅတ်ႈၶိူင်ႈပိူင်ဢၼ်ပဵၼ်လၢႆလၢႆဢမ်ႇပွင်ႇလွင်ႈၵႃႈသင်ၼၼ်ႉသေလႄႈၶၢႆႉပုတ်ႈမႃးၸူးၵႃႈတီႈၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇ၊ဢၼ်ပဵၼ်ၸဝ်ႈဢၼ်ၽၢၼ်ႇသၢင်းႁဵတ်းပဵၼ်ၵၢင်ႁၢဝ်လိၼ်မိူင်းၼမ်ႉသမ်ႇမုၵ်ႉတြႃႇတင်းၵႃႈဢၼ်မီးၵူႈတီႈၵူႈလႅၼ်ၼၼ်ႉၸိုင်ႁဝ်းၸင်ႇလႆႈႁေႃးလၢတ်ႈတြႃးသတၢင်းသိူဝ်းပျေႃႇၸဝ်ႈၼၼ်ႉတီႈသူဢေႃႈ။

၁၆ ၶိင်ႇၵႃႇလႃႉဢၼ်ပူၼ်ႉၵႂႃႇယဝ်ႉၼၼ်ႉမၼ်းၸဝ်ႈပွႆႇႁႂ်ႈၵူၼ်းၵူႈမဵဝ်းႁဵတ်းၸွမ်းၼင်ႇဢလူဝ်ႇတူဝ်ၸဝ်ႈၵဝ်ႇဢေႃႈ။

၁၇ ၼႂ်းဝႃႈၼၼ်သေၵေႃႈမၼ်းၸဝ်ႈယင်းႁဵတ်းၵျေးၸူးတီႈသူယူႇသေလႄႈႁႂ်ႈၽူၼ်လုၵ်ႉသေၽႃႉၵၢင်ႁၢဝ်တူၵ်းၵႃႈလႄႈပၼ်ၶိင်ႇဢူႉတူႉဢၼ်မၢၵ်ႇမႃးၸဵမ်ႁူင်းၸဵမ်မၢၵ်ႇပုၼ်ႈလွင်ႈၼင်ႇႁိုဝ်တၵ်းႁႂ်ႈသူတဵမ်ဝႆႉလိူင်ႇၸႂ်တင်းဢေႃးၸႃႇတၢင်းၵိၼ်တၢင်းၶူပ်းလႄႈသိူဝ်းပျေႃႇၼၼ်ႉမၼ်းၸဝ်ႈယင်းဢမ်ႇပၼ်သၢၵ်ႈသေႇလွင်ႈဢၼ်မၼ်းၸဝ်ႈမီးယူႇၼၼ်ႉလႄႈဢမ်ႇယူႇလႆႈ၊ဝႃႈၼင်ႇၼႆဢေႃႈ။

၁၈ လွင်ႈၼင်ႇႁိုဝ်ၵူၼ်းၸူႉၵူၼ်းတုမ်ၸိူဝ်းၼၼ်ႉတၵ်းဢမ်ႇလႆႈပုၵ်ႉၸေႃႇယိၸ်ႉတီႈၶဝ်ၸိုင်ၶဝ်ႁွင်ႉသႅၼ်ႇၸိူဝ်ႉၼင်ႇၼၼ်သေယဝ်ႉႁၢမ်ႈတၢပ်ႈႁႄႉၶႅၼ်ၶဝ်ယၢပ်ႇၼႃႇလူင်လၢင်ဢေႃႈ။

၁၉ မိူဝ်ႈၼၼ်ႉၵူၼ်းယုတၵမ်ႈၽွင်ႈလုၵ်ႉသေၵႃႈတီႈဝဵင်းဢၼ်ႇတိဢုၵ်ႉတင်းဝဵင်းဢိၵေႃႇၼိမႃးလႄႈတိူင်ႇပၢင်ႇၸူဝ်းဢဝ်ၵူၼ်းၸူႉၵူၼ်းတုမ်ၸိူဝ်းၼၼ်ႉသေယဝ်ႉဢွၼ်ၵၼ်ဢဝ်မၢၵ်ႇႁိၼ်ထိမ်ႈသႂ်ႇပေႃးလုယဝ်ႉၸင်ႇထၢင်ႇဝႃႈမၼ်းတၢႆယဝ်ႉဝႃႈၼႆလႄႈၶဝ်ၸၼ်ဢဝ်မၼ်းဢွၵ်ႇၵႂႃႇပႅတ်ႈၵႃႈၼွၵ်ႈဝဵင်းဢေႃႈ။

ၶိုၼ်းမိူဝ်းဝဵင်းဢၼ်ႇတိဢုၵ်ႉ

၂၀ ၼႂ်းမိူဝ်ႈဢၼ်တပႄးၸဝ်ႈတင်းလၢႆဝႅင်းႁွပ်ႈမၼ်းယူႇၼၼ်ႉမၼ်းၶိုၼ်းလုၵ်ႉလႄႈၶိုၼ်းၶဝ်ႈၵႂႃႇၵႃႈၼႂ်းဝဵင်းဢေႃႈ။ဝၼ်းမိူဝ်ႈၽုၵ်ႈမၼ်းဢိၵ်ႇတင်းပႃႇၼပဢွၵ်ႇၵႂႃႇၸူးၵႃႈတီႈဝဵင်းတေႇရပေႇဢေႃႈ။

၂၁ ၶဝ်ႁေႃးလၢတ်ႈတြႃးသတၢင်းသိူဝ်းပျေႃႇၸဝ်ႈၵႃႈၼႂ်းဝဵင်းၼၼ်ႉလႄႈႁႂ်ႈၵူၼ်းၼမ်ၼႃႇပဵၼ်တပႄးၸဝ်ႈသေယဝ်ႉၶိုၼ်းမိူဝ်းၵႂႃႇၵႃႈတီႈဝဵင်းလုတ်ႉတရ၊ဝဵင်းဢိၵေႃႇၼိ၊တင်းဝဵင်းဢၼ်ႇတိဢုၵ်ႉသေလႄႈႁႂ်ႈႁူဝ်ၸႂ်တပႄးၸဝ်ႈတင်းလၢႆမၼ်ႈၶိူင်ႇလႄႈလွင်ႈၼင်ႇႁိုဝ်ၶဝ်တၵ်းတႄႇယူႇၼႂ်းတၢင်းယုမ်ႇမၢတ်ႈၸိုင်တိုၵ်းယူင်းလၢတ်ႈလႄႈဝႃႈ၊-

၂၂ ႁဝ်းတၵ်းလႆႈၶၢမ်ႇတုၵ်ႉၶႃႉၼမ်ၼႃႇသေလႄႈၶဝ်ႈၵႃႈၼႂ်းမိူင်းၽြႃးပဵၼ်ၸဝ်ႈဢေႃႈ၊ဝႃႈၼင်ႇၼႆဢေႃႈ။

၂၃ ၶဝ်ၶၢၼ်းဝႆႉၵူၼ်းဢၼ်ဢုပ်ႉၸိူဝ်းၸဝ်ႈၼႂ်းၸိူဝ်းၸဝ်ႈၼၼ်ႉၵူႈၸိူဝ်းၸဝ်ႈယဝ်ႉၸင်ႇဢွၼ်ၵၼ်ၵမ်တၢင်းၵိၼ်သူးတွင်းပထၼႃႇသေလႄႈဢဝ်ၶဝ်ဢၢပ်ႈၵႃႈၼႂ်းမိုဝ်းၽြႃးပဵၼ်ၸဝ်ႈဢၼ်ၶဝ်ယုမ်ႇမၢတ်ႈၼၼ်ႉဢေႃႈ။

၂၄ ၶဝ်လႄႇၵႂႃႇၵႃႈၼႂ်းမိူင်းပိသိတိတင်းမိူင်းလႄႈႁွတ်ႈထိုင်ၵႂႃႇၵႃႈတီႈမိူင်းပမ်ႇပုလိသေယဝ်ႉႁေႃးလၢတ်ႈၼုၵ်ႉၵပၢတ်ႈတြႃးၸဝ်ႈၼႂ်းဝဵင်းပေႇရၵေႇလႄႈလူင်းၵႂႃႇၵႃႈတီႈဝဵင်းဢတ်ႉတလိဢေႃႈ။

၂၅ ၶဝ်ၸင်ႇလုၵ်ႉသေၵႃႈတီႈဝဵင်းၼၼ်ႉၶီႇႁိူဝ်းသၢင်းၽေႃးႁွတ်ႈထိုင်ၵႃႈတီႈဝဵင်းဢၼ်ႇတိဢုၵ်ႉ

၂၆ တီႈဢၼ်ၶဝ်လႆႈၶၢမ်ႇဢဝ်ၵျေးၸူးၽြႃးပဵၼ်ၸဝ်ႈပုၼ်ႈဢၼ်ၶဝ်တၵ်းႁဵတ်းယဝ်ႉတူဝ်လွင်ႈတၢင်းဢၼ်ၶဝ်လႆႈႁႅၼ်းမႃးယဝ်ႉၼၼ်ႉဢေႃႈ။

၂၇ ၶဝ်ႁွတ်ႈထိုင်သေယဝ်ႉႁႂ်ႈၵူၼ်းဢၼ်ၶဝ်ႈၸိူဝ်းၸဝ်ႈတင်းလၢႆၸူႉၵၼ်တုမ်ၵၼ်သေလႄႈၶဝ်မွၵ်ႇလၢတ်ႈပၼ်လွင်ႈတၢင်းၵႃႈဢၼ်ၽြႃးပဵၼ်ၸဝ်ႈဢဝ်ၶဝ်ႁဵတ်းၸိူဝ်းၼၼ်ႉဢိၵ်ႇတင်းလွင်ႈတၢင်းဢၼ်မၼ်းၸဝ်ႈၽုၺ်ႇပိုတ်ႇၽၵ်းတူတၢင်းယုမ်ႇမၢတ်ႈၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉဢေႃႈ။

၂၈ ၶဝ်ယူႇလူၺ်ႈၵၼ်တင်းတပႄးၸဝ်ႈၸိူဝ်းၼၼ်ႉႁိုင်ၼႃႇဢေႃႈ။