Mat 15

မၢတ်ႈထႄႇ

Chapter ၁ ၂ ၃ ၄ ၅ ၆ ၇ ၈ ၉ ၁၀ ၁၁ ၁၂ ၁၃ ၁၄ ၁၅ ၁၆ ၁၇ ၁၈ ၁၉ ၂၀ ၂၁ ၂၂ ၂၃ ၂၄ ၂၅ ၂၆ ၂၇ ၂၈

၁၅

ဢၼ်မူတ်းၸၢင်ႇတင်းဢၼ်ဢမ်ႇမူတ်းၸၢင်ႇ

၁ မိူဝ်ႈၼၼ်ႉၽႃႇရိသေးဢိၵ်ႇတင်းၵူၼ်းထုတ်ႇၵျၢမ်းတင်းလၢႆလုၵ်ႉသေၵႃႈတီႈဝဵင်းယေႇရုသလႅမ်ႇမႃးတီႈၸဝ်ႈယေႇသုလႄႈလဝ်လၢတ်ႈလႄႈဝႃႈ၊-

၂ ႁဵတ်းသင်လႄႈတပႄးၸဝ်ႈႁဝ်းၸိူဝ်းၼၼ်ႉပူၼ်ႉလိူဝ်ၼႄးဢူႉပတေႇဢၼ်သိုပ်ႇလူင်းမႃးၵႃႈတီႈၵူၼ်းမိူဝ်ႈၵွၼ်ႇၼၼ်ႉၶႃႈ။ၶဝ်ၸိူဝ်းၼၼ်ႉမိူဝ်ႈဢၼ်ၵိၼ်တၢင်းၵိၼ်ၼၼ်ႉယင်းဢမ်ႇသုၵ်ႈမိုဝ်းႁဵတ်းတၢင်းဢၼ်မူတ်းသႂ်လႄႈၸင်ႇၵိၼ်၊ဝႃႈၼင်ႇၼႆဢေႃႈ။

၃ မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊-ႁဵတ်းသင်လႄႈသူပူၼ်ႉလိူဝ်ပိင်းၺၢပ်ႈၽြႃးပဵၼ်ၸဝ်ႈၵွပ်ႈပိူဝ်ႈၼႄးဢူႉပတေႇမိူဝ်ႈၵွၼ်ႇဢၼ်သိုပ်ႇလူင်းမႃးၼၼ်ႉ။

၄ ၽြႃးပဵၼ်ၸဝ်ႈပိင်းၺၢပ်ႈဝႆႉဝႃႈ၊-ႁဵတ်းရူဝ်ႇသေႇၵူဝ်ယမ်ပေႃႈမႄႈမႂ်းတႃႉ။ ႁႂ်ႈၵေႃႉဢၼ်ၵိၼ်ႇလႃႇပေႃႈမႄႈမၼ်းၼၼ်ႉလႆႈၶၢမ်ႇတၢင်းဢၼ်ဢဝ်တၢႆတႃႉ၊ဝႃႈၼႆမီးမႃးၼင်ႇၼႆယဝ်ႉ။

၅ ၵူၺ်းၵႃႈသူသမ်ႉဝႃႈ၊-ၽူႈလႂ်သေဢမ်ႇဝႃႈၵေႃႉဢၼ်လၢတ်ႈတီႈပေႃႈမႄႈမၼ်းလႄႈဝႃႈ၊-ဢုၵ်ႉၸႃႇၵဝ်ဢၼ်သူဢဝ်သုင်းဢဝ်သွင်ႇၼၼ်ႉႁႂ်ႈပဵၼ်တႃႇၼႃႉတၢင်းလူႇသတေႃႉ၊ဝႃႈၼင်ႇၼႆၼၼ်ႉ၊ၵေႃႉၼၼ်ႉဢမ်ႇလူဝ်ႇႁဵတ်းတၢင်းဢၼ်ရူဝ်ႇသေႇၵူဝ်ယမ်ပေႃႈမႄႈမၼ်းယဝ်ႉ၊ဝႃႈၸိူဝ်ႉၼင်ႇၼႆ။

၆ သူပႄႇပႅတ်ႈပိင်းၺၢပ်ႈၽြႃးပဵၼ်ၸဝ်ႈၵွပ်ႈပိူဝ်ႈၼႄးဢူႉပတေႇမိူဝ်ႈၵွၼ်ႇၼၼ်ႉယဝ်ႉ။

၇ သူၸိူဝ်းဢၼ်ၸၢင်ႊႁဵတ်းႁၢင်ႊတင်းလၢႆၼႆႉဢိူၺ်း၊ဢၼ်ဢိသႃႇယႁေႃးလၢတ်ႈလွင်ႈသူဝႆႉလီလီငၢမ်းငၢမ်းလႄႈဝႃႈၸမ်း၊-

၈ ၵူၼ်းမဵဝ်းၼႆႉဢဝ်တင်းသူပ်းရူဝ်ႇသေႇၵူဝ်ယမ်ၵဝ်ဢေႃႈ။ ၵူၺ်းၵႃႈႁူဝ်ၸႂ်ၶဝ်ၵႆၵၼ်တင်းၵဝ်ဢေႃႈ။

၉ ၶဝ်ဢဝ်ၼႄးဢူႉပတေႇဢၼ်ၵူၼ်းၸီႇယၢင်ႇတႅမ်ႈဝႆႉၸိူဝ်းၼၼ်ႉလႄႈသင်ႇသွၼ်သုင်းမပၼ်ၸိူဝ်ႉၼင်ႇပိင်းၺၢပ်ႈတေႇသၼႃႇၸဝ်ႈသေလႄႈၵူဝ်းၵႂၢႆႇၵဝ်လၢႆလၢႆလွၵ်ႇလွၵ်ႇၵူၺ်း၊ဝႃႈၼႆမီးမႃးၼင်ႇၼႆဢေႃႈ။

၁၀ မိူဝ်ႈၼၼ်ႉမၼ်းၸဝ်ႈႁွင်ႉဢဝ်ၵူၼ်းၸူႉၵူၼ်းတုမ်ၸိူဝ်းၼၼ်ႉမႃးတီႈမၼ်းၸဝ်ႈသေလႄႈလၢတ်ႈဝႃႈ၊-

၁၁ သူထွမ်ႇငိၼ်းလႄႈႁူႉတႃႉ။ ဢၼ်ၶဝ်ႈၵႃႈၼႂ်းသူပ်းၼၼ်ႉႁဵတ်းႁႂ်ႈၵူၼ်းၵူဝ်ႈၵိူၵ်ႇဢမ်ႇၸႂ်ႈ။ ဢၼ်ဢွၵ်ႇၵႃႈၼႂ်းသူပ်းၼၼ်ႉၵူၺ်းႁဵတ်းႁႂ်ႈၵူၼ်းၵူဝ်ႈၵိူၵ်ႇဢေႃႈ၊ဝႃႈၼင်ႇၼႆဢေႃႈ။

၁၂ မိူဝ်ႈၼၼ်ႉတပႄးၸဝ်ႈတင်းလၢႆသုတ်ႉၸပ်းသုတ်ႉၸူးသေလႄႈလဝ်လၢတ်ႈလႄႈဝႃႈ၊-မိူဝ်ႈဢၼ်ငိၼ်းၵႂၢမ်းၸဝ်ႈႁဝ်းလၢတ်ႈၼၼ်ႉၽႃႇရိသေးၸိူဝ်းၼၼ်ႉၸႂ်လူႉၵႂႃႇဢၼ်ဝႃႈၼၼ်ႉၸွင်ႇၸဝ်ႈႁဝ်းႁူႉၶႃႈႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊-

၁၃ တူၼ်ႈၵႃႈမီးတင်းသဵင်ႈတင်းလူင်ဢၼ်ပေႃႈၵဝ်ဢၼ်မီးယူႇၵႃႈၼိူဝ်မိူင်းၵၢင်ႁၢဝ်ဢမ်ႇၽုၵ်ႇဢမ်ႇသွမ်ႈၼၼ်ႉတၵ်းလႆႈၶၢမ်ႇတၢင်းဢၼ်ထူၺ်ႈပႅတ်ႈဢေႃႈ။

၁၄ ယႃႇၶဝ်တႃႉ။ ၶဝ်ပဵၼ်ၵူၼ်းတႃမွတ်ႇဢၼ်ၼႄတၢင်းၵူၼ်းတႃမွတ်ႇဢေႃႈ။ ပေႃးၵူၼ်းတႃမွတ်ႇၼႄတၢင်းၵူၼ်းတႃမွတ်ႇၸိုင်တင်းသွင်ၵေႃႉတၵ်းတူၵ်းၵႃႈၼႂ်းလုၵ်းၼႂ်းၶူင်ႈဢေႃႈ၊ဝႃႈၼင်ႇၼႆဢေႃႈ။

၁၅ ပေႇတရုၵေႃႈၶိုၼ်းလဝ်လၢတ်ႈလႄႈဝႃႈ၊-ၽုၺ်ႇၼႄပၼ်ဢူႉပမႃႇၼႆႉတီႈႁဝ်းၶႃႈသေၵမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၸဝ်ႈၵေႃႈလၢတ်ႈလႄႈဝႃႈ၊-

၁၆ သူယင်းဢမ်ႇပႆႇမီးပိင်ႇၺႃႇတေႃႇထိုင်ႁွတ်ႈမိူဝ်ႈလဵဝ်ၼႆႉလူးၵွၼ်ႇႁိုဝ်။

၁၇ ၵႃႈဢၼ်ၶဝ်ႈၵႃႈၼႂ်းသူပ်းၼၼ်ႉလူင်းၵႂႃႇၵႃႈၼႂ်းတွင်ႉလႄႈဢွၵ်ႇပႅတ်ႈၵႃႈၼႂ်းထၢင်ဢၼ်ဝႃႈၼၼ်ႉသူဢမ်ႇပႆႇႁူႉလူးၵွၼ်ႇႁိုဝ်။

၁၈ ဢၼ်ဢွၵ်ႇၵႃႈၼႂ်းသူပ်းၸမ်းဢွၵ်ႇသေၵႃႈၼႂ်းမၢၵ်ႇႁူဝ်ၸႂ်မႃးလႄႈပဵၼ်ဢၼ်ႁဵတ်းႁႂ်ႈၵူၼ်းၵူဝ်ႈၵိူၵ်ႇဢေႃႈ။

၁၉ လွင်ႈမၼ်းၸမ်းတၢင်းၵျၢမ်ႇတၢင်းပွင်ဢၼ်ဢမ်ႇလီလႂ်တၢင်းဢၼ်ဢဝ်ဢသၢၵ်ႈၵူၼ်းတၢႆလႂ်တၢင်းဢၼ်ၵူတ်ႉမေးပိူၼ်ႈလႂ်တၢင်းဢၼ်ၽိတ်းပိူင်ႈမႄႈယိင်းလႂ်တၢင်းဢၼ်လၵ်ႉဢုၵ်ႉၸႃႇၶူဝ်းလဵင်းလႂ်တၢင်းဢၼ်ၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈလႂ်တၢင်းဢၼ်သေႉသွမ်းၽြႃးပဵၼ်ၸဝ်ႈလႂ်ၸိူဝ်းၼၼ်ႉဢွၵ်ႇၵႃႈၼႂ်းႁူဝ်ၸႂ်မႃးလႄႈပဵၼ်ဢၼ်ႁဵတ်းႁႂ်ႈၵူၼ်းၵူဝ်ႈၵိူၵ်ႇဢေႃႈ။

၂၀ ၵူၺ်းၵႃႈလွင်ႈဢၼ်ဢမ်ႇသုၵ်ႈမိုဝ်းႁဵတ်းတၢင်းဢၼ်မူတ်းသႂ်လႄႈၵိၼ်တၢင်းၵိၼ်ၼၼ်ႉၸမ်းႁဵတ်းႁႂ်ႈၵူၼ်းၵူဝ်ႈၵိူၵ်ႇဢမ်ႇၸႂ်ႈ၊ဝႃႈၼင်ႇၼႆဢေႃႈ။

တၢင်းယုမ်ႇမၢတ်ႈမႄႈယိင်းၶႃႇၼၢၼ်း

၂၁ မိူဝ်ႈဢၼ်ၸဝ်ႈယေႇသုဢွၵ်ႇသေၵႃႈတီႈၼၼ်ႉလႄႈၵႂႃႇၸူးၵႃႈတီႈဝၢၼ်ႈၼွၵ်ႈၼႃးပၢင်ႇဝဵင်းတုရုတင်းဝဵင်းၸိတုပုၼ်ႉၼၼ်ႉၸိုင်မႄႈယိင်းၵေႃႉၼိုင်ႈဢၼ်ပဵၼ်ၸိူဝ်ႉၶိူဝ်းၵူၼ်းၶႃႇၼၢၼ်းၼၼ်ႉဢွၵ်ႇမႃးလႄႈႁွင်ႉသႅၼ်ႇလႄႈဝႃႈ၊-

၂၂ ၸဝ်ႈႁဝ်းလုၵ်ႈတႃႇဝိတ်ႉတီႈၶႃႈ၊ဢိတ်းလူၵဝ်ၶႃႈသေၵမ်းၶႃႈ။ လုၵ်ႈယိင်းၵဝ်ၶႃႈဢၼ်ၽီႁၢႆႉၶဝ်ႈၼၼ်ႉလႆႈၶၢမ်ႇၵိၼ်းၼႃႇလူင်လၢင်ၶႃႈဢေႃႈ၊ဝႃႈၼႆသေၵေႃႈမၼ်းၸဝ်ႈဢမ်ႇၶိုၼ်းလၢတ်ႈၵႂၢမ်းသေၶေႃႈသေၵမ်း။

၂၃ တပႄးၸဝ်ႈတင်းလၢႆသုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈတွင်းပၢၼ်ႇလဝ်လၢတ်ႈလႄႈဝႃႈ၊-ႁႂ်ႈမႄႈယိင်းၵေႃႉၼႆႉၶိုၼ်းမိူဝ်းၵႂႃႇသေၵမ်းၶႃႈ။ မၼ်းႁွင်ႉသႅၼ်ႇလႄႈၸွမ်းပႃႈလင်ႁဝ်းၶႃႈယူႇၶႃႈဢေႃႈ၊ဝႃႈၼင်ႇၼႆဢေႃႈ။

၂၄ မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊-ၵဝ်ၶၢမ်ႇတၢင်းဢၼ်ပွႆႇၸႂ်ႉမႃးၵႃႈတီႈသူဝ်းဢၼ်ႁၢႆၵႂႃႇဢၼ်ပဵၼ်ၸိူဝ်ႉၶိူဝ်းဢိသရေႇလၼၼ်ႉၵူၺ်းဢေႃႈ၊ဝႃႈၼင်ႇၼႆဢေႃႈ။

၂၅ မႄႈယိင်းၼၼ်ႉၵေႃႈသုတ်ႉၸပ်းသုတ်ႉၸူးလႄႈၶုပ်ႉမူပ်ႇသေယဝ်ႉလဝ်လၢတ်ႈဝႃႈ၊-ၸွႆႈထႅမ်မႃႉၸႃႉၵဝ်ၶႃႈသေၵမ်းၶႃႈ၊မိူဝ်ႈဢၼ်ဝႃႈၼင်ႇၼႆၸိုင်

၂၆ မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊-

ဢမ်ႇထုၵ်ႇလီဢဝ်တၢင်းၵိၼ်လုၵ်ႈလၢင်းတမ်းပၼ်တီႈမႃ၊ဝႃႈၼင်ႇၼႆဢေႃႈ။ မႄႈယိင်းၼၼ်ႉၵေႃႈလဝ်လၢတ်ႈလႄႈဝႃႈ၊-ၸႂ်ႈၶႃႈယဝ်ႉၸဝ်ႈ။

၂၇ မႃဢၼ်ဝႃႈၼၼ်ႉၸၢင်ႊၵိၼ်ဢၼ်ယွႆဢၼ်ယဵမ်းဢၼ်တူၵ်းၵႃႈတႂ်ႈၽိူၼ်တီႈၵိၼ်ၸဝ်ႈၶဝ်ၼၼ်ႉၶႃႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်

၂၈ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-မႄႈယိင်းဢိူၺ်း၊တၢင်းယုမ်ႇမၢတ်ႈမႂ်းယႂ်ႇၼႃႇတႄႉယဝ်ႉ။ ၵႃႈၼင်ႇဢၼ်မႂ်းမီးဢလူဝ်ႇၼၼ်ႉႁႂ်ႈပဵၼ်တီႈမႂ်းတႃႉ၊ဝႃႈၼင်ႇၼႆဢေႃႈ။ ၶိင်ႇၼႃႇရီႇၼၼ်ႉၵမ်းလဵဝ်လုၵ်ႈယိင်းမႄႈယိင်းၼၼ်ႉႁၢႆၶႅၼ်းမႃးဢေႃႈ။

ၸဝ်ႈယေႇသုလဵင်ႉလူၵူၼ်းသီႇႁဵင်

၂၉ ၸဝ်ႈယေႇသုလုၵ်ႉသေၵႃႈတီႈၼၼ်ႉၵႂႃႇလႄႈႁွတ်ႈထိုင်ၵႃႈႁိမ်းၼွင်ၵႃႇလိလႄးပုၼ်ႉသေယဝ်ႉၶိုၼ်ႈၵႂႃႇၼိူဝ်လွႆဢေႃႈ။

၃၀ ၵူၼ်းၸူႉၵူၼ်းတုမ်ၼမ်ၼႃႇမႃးၵႃႈတီႈမၼ်းၸဝ်ႈလႄႈၶဝ်ဢဝ်ၵူၼ်းဢၼ်တိၼ်ဢမ်ႇလီလႂ်ဢၼ်တႃမွတ်ႇလႂ်ဢၼ်ဢႃႉလႂ်ဢၼ်ဢင်ႇၵႃႇလူႉလႂ်ၸိူဝ်းၼၼ်ႉမႃးၶျႃးဝႆႉၵႃႈတီႈႁိမ်းတိၼ်မၼ်းၸဝ်ႈဢေႃႈ။

၃၁ မၼ်းၸဝ်ႈႁႂ်ႈတၢင်းၶႆႈတၢင်းပဵၼ်ၶဝ်ႁၢႆဢေႃႈ။ ပိူဝ်ႈၼႆလႄႈၵူၼ်းၸူႉၵူၼ်းတုမ်ၸိူဝ်းၼၼ်ႉမိူဝ်ႈဢၼ်လႆႈႁၼ်ၶဝ်ၸိူဝ်းဢၼ်ဢႃႉလၢတ်ႈၵႂၢမ်းလႆႈမႃးၶဝ်ၸိူဝ်းဢၼ်ဢင်ႇၵႃႇလူႉလႂ်လႆႈလီမႃးၶဝ်ၸိူဝ်းဢၼ်တိၼ်ဢမ်ႇလီလႂ်လႆႈပႆတၢင်းၵႂႃႇၶဝ်ၸိူဝ်းဢၼ်တႃမွတ်ႇလႂ်လႆႈႁၼ်မႃးၼၼ်ႉၸိုင်၊ၶဝ်ဢၢမ်းၼႃႇလႄႈယွင်ႈယေႃးမူၼ်ၽြႃးပဵၼ်ၸဝ်ႈၸိူဝ်ႉၶိူဝ်းဢိသရေႇလၼၼ်ႉဢေႃႈ။

၃၂ မိူဝ်ႈၼၼ်ႉၸဝ်ႈယေႇသုႁွင်ႉဢဝ်တပႄးၸဝ်ႈတင်းလၢႆမႃးလႄႈဝႃႈ၊-ၵဝ်ဢိတ်းလူၵူၼ်းၸူႉၵူၼ်းတုမ်ၸိူဝ်းၼႆႉဢေႃႈ။ ၶဝ်မီးယူႇလူၺ်ႈၵၼ်တင်းၵဝ်လႆႈသၢမ်ဝၼ်းတဵမ်တဵမ်ယဝ်ႉ။ ၶဝ်ဢမ်ႇမီးတၢင်းၵိၼ်ၵႃႈသင်သေဢိတ်းပိူဝ်ႈဢၼ်ၵူဝ်ၶဝ်တၵ်းႁိူဝ်ႉတၵ်းဢူၼ်ႈၵႃႈၼႂ်းၵၢင်တၢင်းလႄႈၸူဝ်ႈဢၼ်ၶဝ်ဢမ်ႇပႆႇလႆႈၵိၼ်တၢင်းၵိၼ်ၼၼ်ႉၵဝ်ဢမ်ႇမီးဢလူဝ်ႇၶႂ်ႈႁႂ်ႈၶဝ်မိူဝ်းၵႂႃႇ၊မိူဝ်ႈဢၼ်ဝႃႈၼင်ႇၼႆၸိုင်၊တပႄးၸဝ်ႈၸိူဝ်းၼၼ်ႉၵေႃႈလၢတ်ႈလႄႈဝႃႈ၊-

၃၃ ၵႃႈတီႈၼႂ်းထိူၼ်ႇၼႆႉဢၼ်တၵ်းႁႂ်ႈၵုမ်ႇၵူၼ်းၼမ်ၼႃႇထၼ်ႇၼႆႉပေႃးတေလႆႈၵိၼ်ဢိမ်ႇၵိၼ်တဵမ်ၼၼ်ႉႁဝ်းၶႃႈတၵ်းလႆႈတၢင်းၵိၼ်ၵႃႈတီႈလႂ်မႃးၶႃႈ၊ဝႃႈၼင်ႇၼႆဢေႃႈ။

၃၄ ၸဝ်ႈယေႇသုၵေႃႈထၢမ်လႄႈဝႃႈ၊-သူမီးၶဝ်ႈမုၼ်းလၢႆႁူၺ်ႇ၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ၵေႃႈၶိုၼ်းလဝ်လၢတ်ႈလႄႈဝႃႈ၊-မီးၶဝ်ႈမုၼ်းၸဵတ်းႁူၺ်ႇတင်းပႃဢွၼ်ႇဢိတ်းၼိုင်ႈၶႃႈဢေႃႈ၊ဝႃႈၼင်ႇၼႆဢေႃႈ။

၃၅ မိူဝ်ႈၼၼ်ႉမၼ်းၸဝ်ႈမီးဢမိင်ႉႁႂ်ႈၵူၼ်းဢၼ်ၸူႉဢၼ်တုမ်ၸိူဝ်းၼၼ်ႉၼင်ႈယူႇၵႃႈၼိူဝ်လိၼ်ဢေႃႈ။

၃၆ မၼ်းၸဝ်ႈဢဝ်ၶဝ်ႈမုၼ်းၸဵတ်းႁူၺ်ႇတင်းပႃၸိူဝ်းၼၼ်ႉသေယဝ်ႉယွင်ႈယေႃးၵျေးၸူးၸဝ်ႈယဝ်ႉၸင်ႇမိတ်းၶဝ်ႈမုၼ်းလႄႈပၼ်တပႄးၸဝ်ႈတင်းလၢႆဢေႃႈ။ တပႄးၸဝ်ႈၸိူဝ်းၼၼ်ႉၵေႃႈပၼ်တီႈၵူၼ်းၸူႉၵူၼ်းတုမ်ၸိူဝ်းၼၼ်ႉဢေႃႈ။

၃၇ ၵူၼ်းတင်းသဵင်ႈတင်းလူင်ၵိၼ်ဢိမ်ႇယဝ်ႉၸင်ႇၶိုၼ်းၵဵပ်းသိမ်းဢဝ်ဢၼ်ၵိုတ်းဢၼ်ၵျၢၼ်ႇဢၼ်ႁၵ်းဢၼ်ႁိၵ်းၸိူဝ်းၼၼ်ႉလႆႈၸဵတ်းပဵတ်ႈတဵမ်တဵမ်ဢေႃႈ။

၃၈ ၵူၼ်းဢၼ်ၵိၼ်ၸိူဝ်းၼၼ်ႉယင်းဢမ်ႇဢၢၼ်ႇပႃးမႄႈယိင်းတင်းလုၵ်ႈဢွၼ်ႇမီးၵူၼ်းၸၢႆးသီႇႁဵင်ဢေႃႈ။

၃၉ မၼ်းၸဝ်ႈႁႂ်ႈၵူၼ်းၸူႉၵူၼ်းတုမ်ၸိူဝ်းၼၼ်ႉမိူဝ်းယဝ်ႉၸင်ႇၶီႇႁိူဝ်းလႄႈၵႂႃႇႁွတ်ႈထိုင်ၵႃႈတီႈဝၢၼ်ႈၼွၵ်ႈၼႃးပၢင်ႇဝဵင်းမႃႇၵတလပုၼ်ႉဢေႃႈ။

ထမ်ႇမ ၵျၢမ်းၵဝ်ႇ

ၵျၢမ်းငဝ်ႈၵမ်ႇၽႃႇ ၵျၢမ်းဢၼ်ဢွၵ်ႇၵွႃႇ ၵျၢမ်းဢၼ်ႁဵတ်းဝၢတ်ႈ

ၵျၢမ်းဢၼ်ယူႇၼႂ်းထိူၼ်ႇ ၵျၢမ်းဢၼ်ႁေႃးတြႃး လိၵ်ႈမၢတ်ႈလွင်ႈယေႃးသု

လိၵ်ႈမၢတ်ႈလွင်ႈၵူၼ်းလူင်ဢၼ်ၸီႇယၢင်ႇတြႃး ဝုတ်ႉထုရုထ

ထမ်ႇမႃႉရႃႇၸဝၢင်ႇၽိုၼ်ပထမ ထမ်ႇမႃႉရႃႇၸဝၢင်ႇၽိုၼ်တုတိယ

ထမ်ႇမႃႉရႃႇၸဝၢင်ႇၽိုၼ်တတိယ ထမ်ႇမႃႉရႃႇၸဝၢင်ႇၽိုၼ်ၸတုၵ်ႉထ

ရႃႇၸဝၢင်ႇၶျူၵ်ႉၽိုၼ်ပထမ ရႃႇၸဝၢင်ႇၶျူၵ်ႉၽိုၼ်တုတိယ

လိၵ်ႈမၢတ်ႈလွင်ႈဢေႇၸရ လိၵ်ႈမၢတ်ႈလွင်ႈၼေႇႁမိ ဝုတ်ႉထုဢေးသတႃႇ

ဝုတ်ႉထုယေႃႇၽ ၵျၢမ်းသႃႇလၢမ်ႇ ၵျၢမ်းလိၵ်ႈသုၵ်ႉတၢမ်ႇ ၵျၢမ်းလိၵ်ႈတေႇသၼႃႇ