Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၁၃ 

ပႃႇၼပတင်းသေႃးလုလႆႈဢွၵ်ႇတၢင်း

၁ ၼႂ်းၸိူဝ်းၸဝ်ႈဢၼ်မီးယူႇၵႃႈတီႈဝဵင်းဢၼ်ႇတိဢုၵ်ႉၼၼ်ႉမီးၶဝ်ၸိူဝ်းဢၼ်ႁဵတ်းပရေႃးၽႅတ်ႈလႂ်ၶဝ်ၸိူဝ်းဢၼ်ႁဵတ်းသြႃႇလႂ်ဢၼ်ပဵၼ်ပႃႇၼပ၊သုမွင်ႇ၊ဢၼ်လႆႈႁွင်ႉၸိုဝ်ၼိၵႃႇ၊တင်းလုၵိ၊ၵူၼ်းမိူင်းၵုရေႇၼေႇတင်းမႃႇၼိၼ်ႇ၊မိူဝ်ႈလဵၵ်ႉဢၼ်ပဵၼ်ၵေႃႉသေႈၵၼ်တင်းၸဝ်ႈၽႃႉႁေႇရုတ်ႉ၊တင်းသေႃးလုၸိူဝ်းၼၼ်ႉဢေႃႈ။

၂ ၼႂ်းမိူဝ်ႈဢၼ်ၶဝ်ႁဵတ်းဝၢတ်ႈၽြႃးလႄႈၵမ်တၢင်းၵိၼ်ယူႇၼၼ်ႉဝိၺိၺ်ႇမူတ်းၸၢင်ႇၸဝ်ႈမီးဢမိင်ႉလႄႈဝႃႈ၊-လိူၵ်ႈၵဵပ်းဢဝ်ပႃႇၼပတင်းသေႃးလုလႄႈၽႄဢဝ်ၶဝ်ဝႆႉႁႂ်ႈလႆႈပွင်ႁဵတ်းလွင်ႈတၢင်းဢၼ်ၵဝ်ၶၢၼ်းဝႆႉၼၼ်ႉတႃႉ၊ဝႃႈၼႆလႄႈၵႃႈၼင်ႇဢၼ်မၼ်းၸဝ်ႈဝႃႈၼၼ်ႉ

၃ ၶဝ်ၵမ်တၢင်းၵိၼ်ႁဵတ်းဝၢတ်ႈပထၼႃႇလႄႈဢဝ်မိုဝ်းတၢင်ႇၵႃႈၼိူဝ်ႁူဝ်ၶဝ်ၼၼ်ႉသေယဝ်ႉပွႆႇၸႂ်ႉၶဝ်ၵႂႃႇဢေႃႈ။

တီႈဝဵင်းသေႇလုၵိ

၄ ၼင်ႇၼၼ်လႄႈဝိၺိၺ်ႇမူတ်းၸၢင်ႇၸဝ်ႈပွႆႇၸႂ်ႉၶဝ်ၵႂႃႇသေယဝ်ႉၶဝ်ၼၼ်ႉၵေႃႈလူင်းၵႂႃႇၵႃႈတီႈဝဵင်းသေႇလုၵိလႄႈသမ်ႉလုၵ်ႉသေၵႃႈတီႈဝဵင်းၼၼ်ႉၶီႇႁိူဝ်းသၢင်းၽေႃးၵႂႃႇၸူးၵုၼ်ၵုပရုပုၼ်ႉဢေႃႈ။

၅ မိူဝ်ႈဢၼ်ႁွတ်ႈထိုင်ၵႃႈတီႈဝဵင်းသႃႇလမိၼၼ်ႉၶဝ်ႁေႃးလၢတ်ႈၼုၵ်ႉၵပၢတ်ႈတြႃးၽြႃးပဵၼ်ၸဝ်ႈၵႃႈၼႂ်းၸရွပ်ႈႁေႃးတြႃးၵူၼ်းယုတတင်းလၢႆဢေႃႈ။ယုဝ်းႁၢၼ်ႇၵေႃႈပဵၼ်ၵေႃႉဢၼ်ၸွႆႈထႅမ်ၶဝ်ဢေႃႈ။

၆ မိူဝ်ႈဢၼ်ၶဝ်လႄႇၼႂ်းၵုၼ်ၼၼ်ႉၵူႈတီႈၵူႈလႅၼ်လႄႈႁွတ်ႈထိုင်ၵႃႈတီႈဝဵင်းၽႃႇပုၼၼ်ႉၸိုင်ၶဝ်ထူပ်းႁၼ်သြႃႇၽီမေႃႇမိၵ်ႉသႃႇပရေႃးၽႅတ်ႈၵေႃႉၼိုင်ႈဢၼ်ပဵၼ်ၵူၼ်းယုတဢၼ်မီးၸိုဝ်ဝႃႈပႃႉယေႇသုၼၼ်ႉဢေႃႈ။

၇ ၵေႃႉၼၼ်ႉယူႇၵႃႈတီႈၶုၼ်သေႇရၵီႇပေႃႇလုဢၼ်မီးပိင်ႇၺႃႇသတိၼၼ်ႉဢေႃႈ။ၶုၼ်ၼၼ်ႉမီးၸႂ်ဢၼ်ၶႂ်ႈထွမ်ႇၶႂ်ႈငိၼ်းၼုၵ်ႉၵပၢတ်ႈတြႃးၽြႃးပဵၼ်ၸဝ်ႈလႄႈႁွင်ႉပၢင်းဢဝ်ပႃႇၼပတင်းသေႃးလုမႃးဢေႃႈ။

၈ ဢေႇလုမ၊ဢၼ်ဢၼၢၵ်ႈၸိုဝ်သဵင်မၼ်းပွင်ႇဝႃႈသြႃႇၽီမေႃႇဢၼ်ဝႃႈၼၼ်ႉဢမ်ႇၶႂ်ႈႁႂ်ႈၶုၼ်ၼၼ်ႉယုမ်ႇမၢတ်ႈလႄႈမၼ်းႁႄႉၶႅၼ်ၶဝ်ဢေႃႈ။

၉ မိူဝ်ႈၼၼ်ႉသေႃးလုဢၼ်လႆႈၸိုဝ်ပေႃးလုၼၼ်ႉတဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈသေယဝ်ႉယႅၵ်ႉတူၺ်းသြႃႇၽီမေႃႇၼၼ်ႉၸေးၸေးသေလႄႈလၢတ်ႈဝႃႈ၊-

၁၀ ၵူၼ်းဢၼ်တဵမ်ဝႆႉတင်းတၢင်းဢၼ်ၸၢင်ႊပႅတ်ႉၸၢင်ႊလႅၼ်ဢိၵ်ႇတင်းတၢင်းဢၼ်ႁဵတ်းႁုၵ်းႁဵတ်းႁၢႆႉၵူႈၸိူဝ်ႉၵူႈပိူင်၊ဢၼ်ပဵၼ်လုၵ်ႈၸႃႇတၢၼ်ႇမႃႇၼၢတ်ႈ၊ရၢၼ်ႇသူႇတြႃးတၢင်းဢၼ်သိုဝ်ႈတေႃႇၼႆႉဢိူၺ်း၊မႂ်းၼႆႉယင်းဢမ်ႇယႃႉသဵၼ်ႈတၢင်းထႃႇဝရႃႉၽြႃးဢၼ်သိုဝ်ႈတေႃႇတင်းလၢႆၼၼ်ႉလႄႈဢမ်ႇယူႇလႆႈႁိုဝ်။

၁၁ တေႃႈလဵဝ်ၼႆႉမိုဝ်းထႃႇဝရႃႉၽြႃးႁွတ်ႈထိုင်မႃးၵႃႈၼိူဝ်မႂ်းလႄႈတႃမႂ်းတၵ်းမွတ်ႇတေႃႇထိုင်ႁွတ်ႈထၼ်ႈပေႃးဢမ်ႇႁၼ်လႆႈၵၢင်ဝၼ်းႁိုင်တၢၼ်ႇတၢၼ်ႇဢေႃႈ၊ဝႃႈၼင်ႇၼႆလႄႈၸူဝ်ႈၵမ်းဢွၼ်ႇၼိုင်ႈၵူၺ်းတႃမၼ်းၵုမ်ႈမႃးလႄႈပဵၼ်ဢၼ်လပ်းသိင်ႇၵႂႃႇၽိတ်းၽိတ်းသေယဝ်ႉပၼ်ႇၵႂႃႇပၼ်ႇၶိုၼ်းယူႇလႄႈႁႃၵေႃႉ၊၊

၁၂ ဢၼ်တၵ်းၸုင်မိုဝ်းမၼ်းၼၼ်ႉဢေႃႈ။ၶုၼ်ၼၼ်ႉႁၼ်လွင်ႈတၢင်းၼၼ်ႉသေယဝ်ႉႁွတ်ႈထိုင်တၢင်းဢၼ်ယုမ်ႇမၢတ်ႈလႄႈၵႂင်ၸႂ်ယုင်ႈၸႂ်ဢၢမ်းဢေႃးတေႇသၼႃႇၸဝ်ႈၽြႃးယူႇဢေႃႈ။

တီႈဝဵင်းဢၼ်ႇတိဢုၵ်ႉမိူင်းပိသိတိ

၁၃ ပေႃးလုတင်းၶဝ်ၸိူဝ်းဢၼ်ပႃးလူၺ်ႈၵၼ်တင်းမၼ်းၸိူဝ်းၼၼ်ႉၶီႇႁိူဝ်းသၢင်းၽေႃးဢွၵ်ႇသေၵႃႈတီႈဝဵင်းၽႃႇပုလႄႈႁွတ်ႈထိုင်ၵႂႃႇၵႃႈတီႈဝဵင်းပေႇရၵေႇမိူင်းပၢမ်ႇပုလိသေယဝ်ႉယုဝ်းႁၢၼ်ႇၸင်ႇၽၢတ်ႇၵၼ်တင်းၶဝ်လႄႈၶိုၼ်းမိူဝ်းၵႂႃႇၵႃႈတီႈဝဵင်းယေႇရုသလႅမ်ႇသေဢေႃႈ။

၁၄ ၶဝ်သမ်ႉဢွၵ်ႇသေၵႃႈတီႈဝဵင်းပေႇရၵေႇလႄႈၵႂႃႇႁွတ်ႈထိုင်ၵႃႈတီႈဝဵင်းဢၼ်ႇတိဢုၵ်ႉမိူင်းပိသိတိသေယဝ်ႉၼႂ်းဝၼ်းၵမ်သိၼ်ၼၼ်ႉၶဝ်ၶဝ်ႈၵႃႈၼႂ်းၸရွပ်ႈႁေႃးတြႃးလႄႈၼင်ႈယူႇဢေႃႈ။

၁၅ ဝၢႆးသေၽတ်းၵျၢမ်းဢၼႃႇၵၢတ်ႈတိယဝ်ႉၼၼ်ႉၵႄႇၸရွပ်ႈႁေႃးတြႃးၸိူဝ်းၼၼ်ႉပွႆႇၸႂ်ႉၵူၼ်းမႃးတီႈၶဝ်လႄႈလၢတ်ႈဝႃႈ၊-ပေႃးသူမီးၵႂၢမ်းဢၼ်လီႁေႃးလီလၢတ်ႈတီႈၵူၼ်းတင်းလၢႆၸိုင်ႁေႃးလၢတ်ႈသေၵမ်းတႃႉ၊ဝႃႈၼင်ႇၼႆဢေႃႈ။

၁၆ မိူဝ်ႈၼၼ်ႉပေႃးလုၸင်ႇၼႄမိုဝ်းမၼ်းသေလႄႈလၢတ်ႈဝႃႈ၊-ၵူၼ်းဢိသရေႇလတင်းလၢႆဢိၵ်ႇတင်းၶဝ်ၸိူဝ်းဢၼ်ၵူဝ်ယမ်ၽြႃးပဵၼ်ၸဝ်ႈၶဝ်ဢိူၺ်း၊ထွမ်ႇငိၼ်းသေၵမ်းတႃႉ။

၁၇ ၽြႃးပဵၼ်ၸဝ်ႈၵူၼ်းမဵဝ်းဢိသရေႇလၼႆႉ၊လိူၵ်ႈၵဵပ်းဢဝ်ပူႇပေႃႈႁဝ်း၊မိူဝ်ႈဢၼ်ၶဝ်ယင်းတိုၵ်ႉပဵၼ်ၶႅၵ်ႇယူႇၵႃႈၼႂ်းမိူင်းဢေႇၵႅပ်ႉတုၼၼ်ႉလႄႈယုၵ်ႉယွင်ႈၶဝ်ဢဝ်တင်းမိုဝ်းဢၼ်ပူၼ်ႉပိူၼ်ႈၼၼ်ႉၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်းၼၼ်ႉမႃးဢေႃႈ။

၁၈ သီႇသိပ်းပီႊၸမ်ၸမ်မၼ်းၸဝ်ႈလဵင်ႉလူၶဝ်ဝႆႉၵႃႈၼႂ်းထိူၼ်ႇဢေႃႈ။

၁၉ မၼ်းၸဝ်ႈယႃႉပႅတ်ႈၵူၼ်းၸဵတ်းမဵဝ်းဢၼ်မီးၵႃႈၼႂ်းမိူင်းၶႃႇၼၢၼ်ႇၼၼ်ႉသေယဝ်ႉဢဝ်မိူင်းၼၼ်ႉမႅင်ႇပၼ်ဢမူၺ်ႇတီႈၶဝ်သီႇပၢၵ်ႇပၢႆႁႃႈသိပ်းပီႊၸမ်ၸမ်ဢေႃႈ။

၂၀ ဝၢႆးသေၼၼ်ႉယဝ်ႉမၼ်းၸဝ်ႈသမ်ႉပၼ်တီႈၵူၼ်းဢၼ်ၸီႇယၢင်ႇတြႃးၸိူဝ်းၼၼ်ႉတေႃႇထိုင်ႁွတ်ႈပၢၼ်ပရေႃးၽႅတ်ႈသမူၺ်ႇလၼၼ်ႉဢေႃႈ။

၂၁ လိုၼ်းၼၼ်ႉမိူဝ်ႈဢၼ်ၶဝ်ယွၼ်းႁႂ်ႈမီးၶုၼ်ႁေႃၶမ်းၼၼ်ႉၸိုင်ၽြႃးပဵၼ်ၸဝ်ႈပၼ်သေႃးလု၊လုၵ်ႈၸၢႆးၵိသ၊ဢၼ်ပဵၼ်ၸိူဝ်ႉၶိူဝ်းပိၼ်ႇယႃႇမိၼ်ႇၼၼ်ႉတီႈၶဝ်သီႇသိပ်းပီႊတဵမ်တဵမ်ဢေႃႈ။

၂၂ လိုၼ်းၼၼ်ႉမၼ်းၸဝ်ႈဢဝ်ၵေႃႉၼၼ်ႉပဵတ်ႈသေလႄႈယုၵ်ႉယွင်ႈတႃႇဝိတ်ႉႁႂ်ႈပဵၼ်ၶုၼ်ႁေႃၶမ်းဢေႃႈ။တီႈၵေႃႉၼၼ်ႉမၼ်းၸဝ်ႈၶၢမ်ႇသၢၵ်ႈသေႇလႄႈဝႃႈၵဝ်လႆႈထူပ်းလွင်ႈဢၼ်တႃႇဝိတ်ႉလုၵ်ႈၸၢႆးယေႇသေႇၼၼ်ႉပဵၼ်ဢၼ်မႅၼ်ႈၵၼ်တင်းၸႂ်ၵဝ်လႄႈတၵ်းႁဵတ်းဢလူဝ်ႇၵဝ်တင်းသဵင်ႈတင်းလူင်ၼၼ်ႉယဝ်ႉဝႃႈၼင်ႇၼႆဢေႃႈ။

၂၃ ၵႃႈၼႂ်းၸိူဝ်ႉၶိူဝ်းၵေႃႉၼၼ်ႉၽြႃးပဵၼ်ၸဝ်ႈႁႂ်ႈၸဝ်ႈယေႇသုၸဝ်ႈဢၼ်ၵႄႇၶျွတ်ႈဢဝ်ၼၼ်ႉပေႃႇမႃးတီႈၵူၼ်းဢိသရေႇလတင်းလၢႆၵႃႈၼင်ႇဢၼ်ၵတိမၼ်းၸဝ်ႈမီးဝႆႉၼၼ်ႉယဝ်ႉ။

၂၄ ၸူဝ်ႈဢၼ်ၸဝ်ႈၼၼ်ႉဢမ်ႇပႆႇပေႃႇမႃးၼၼ်ႉၸိုင်ယုဝ်းႁၢၼ်ႇလႆႈႁေႃးလၢတ်ႈတြႃးပပ်ႉတိၸၢမ်ႇဢၼ်ၸၢပ်ႈသႅင်ႇၵၼ်တင်းတၢင်းဢၼ်ၶုၵ်းၸႂ်လႆႈမႆႈၸႂ်ၼၼ်ႉၵႃႈတီႈၵူၼ်းဢိသရေႇလတင်းသဵင်ႈတင်းလူင်ဢေႃႈ။

၂၅ ယုဝ်းႁၢၼ်ႇၼၼ်ႉၼႂ်းမိူဝ်ႈဢၼ်မၼ်းယင်းတိုၵ်ႉႁဵတ်းလွင်ႈတၢင်းဢၼ်မၼ်းတၵ်းလႆႈႁဵတ်းၼၼ်ႉလႄႈလၢတ်ႈဝႃႈ၊-သူထၢင်ႇၵဝ်ပဵၼ်ၽူႈလႂ်။ၵဝ်ပဵၼ်ၵေႃႉၼၼ်ႉဢမ်ႇၸႂ်ႈ။ၵေႃႉဢၼ်မႃးလိုၼ်းၵဝ်ၼၼ်ႉယင်းမီးယူႇလူးၵွၼ်ႇဢေႃႈ။ၵဝ်ယင်းဢမ်ႇထိူၵ်ႈဢမ်ႇတၢၼ်ႇႁႂ်ႈလႆႈထွတ်ႇၶႅပ်းတိၼ်ၵေႃႉၼၼ်ႉဝႃႈၼင်ႇၼႆဢေႃႈ။

၂၆ ပီႈၼွင်ႉဢၼ်ပဵၼ်ၸိူဝ်ႉၶိူဝ်းဢႃႇပြႁၢမ်ႇဢိၵ်ႇတင်းၶဝ်ၸိူဝ်းဢၼ်ၵူဝ်ယမ်ၽြႃးပဵၼ်ၸဝ်ႈၼႆႉဢိူၺ်း၊မၼ်းၸဝ်ႈပွႆႇပၼ်ၵႂၢမ်းတြႃးတၢင်းဢၼ်ၵႄႇၶျွတ်ႈဢဝ်ၼႆႉမႃးၵႃႈတီႈသူဢေႃႈ။

၂၇ ၶဝ်ၸိူဝ်းဢၼ်ယူႇၵႃႈၼႂ်းဝဵင်းယေႇရုသလႅမ်ႇဢိၵ်ႇတင်းၶုၼ်ၸိူဝ်းၼၼ်ႉပိူဝ်ႈဢၼ်ဢမ်ႇႁူႉၸၵ်းမၼ်းၸဝ်ႈလႄႈၼႂ်းတၢင်းဢၼ်ၶဝ်ၸီႇယၢင်ႇမၼ်းၸဝ်ႈၼၼ်ႉပဵၼ်တၢင်းဢၼ်ႁဵတ်းႁႂ်ႈၵႂၢမ်းပရေႃးၽႅတ်ႈတင်းလၢႆဢၼ်ၽတ်းၼႂ်းဝၼ်းၵမ်သိၼ်ၵူႈဝၼ်းၼၼ်ႉတဵမ်ထူၼ်ႈဢေႃႈ။

၂၈ ပဵၵ်ႉသမ်ႉၶဝ်ဢမ်ႇႁၼ်တၢင်းၽိတ်းသေၸိူဝ်ႉသေပိူင်တီႈမၼ်းၸဝ်ႈဢၼ်ထုၵ်ႇလီတၢႆၼၼ်ႉသေၵေႃႈၶဝ်လဝ်ႈယွၼ်းတီႈၶုၼ်ပိလၢတ်ႉႁႂ်ႈလႆႈဢဝ်မၼ်းၸဝ်ႈတၢႆဢေႃႈ။

၂၉ မိူဝ်ႈဢၼ်ၶဝ်ႁဵတ်းႁႂ်ႈလွင်ႈတၢင်းဢၼ်တႅမ်ႈဝႆႉၼႂ်းၵျၢမ်းလိၵ်ႈလွင်ႈမၼ်းၸဝ်ႈၵႃႈမီးတင်းသဵင်ႈတင်းလူင်ၼၼ်ႉတဵမ်ထူၼ်ႈယဝ်ႉၸိုင်ၶဝ်ဢဝ်တူဝ်တၢႆမၼ်းၸဝ်ႈၶျႃးလူင်းသေၵႃႈတီႈသဝ်လၵ်းဝႃးမိုဝ်းလႄႈဢဝ်ဝႆႉၵႃႈၼႂ်းႁူးၶုမ်သၢင်းၶျႅင်းဢေႃႈ။

၃၀ ၽြႃးပဵၼ်ၸဝ်ႈၵေႃႈႁႂ်ႈၸဝ်ႈၼၼ်ႉလုၵ်ႉၵႃႈတၢင်းတၢႆၶိုၼ်းလိပ်းလႄႈၸဝ်ႈၼၼ်ႉၵေႃႈၼႄပျႃးတူဝ်မၼ်းၸဝ်ႈတီႈၶဝ်ၸိူဝ်းဢၼ်လႆႈၸွမ်းပႃႈလင်မၼ်းၸဝ်ႈၸႃႉၸဵမ်မိူင်းၵႃႇလိလႄးတေႃႇဝဵင်းယေႇရုသလႅမ်ႇၼၼ်ႉဢေႃႈ။

၃၁ ၶဝ်ၼၼ်ႉပဵၼ်ၵေႃႉဢၼ်ၶၢမ်ႇသၢၵ်ႈသေႇလွင်ႈမၼ်းၸဝ်ႈတီႈၵူၼ်းတင်းလၢႆဢေႃႈ။

၃၂ ႁဝ်းမွၵ်ႇလၢတ်ႈတြႃးသတၢင်းသိူဝ်းပျေႃႇဢၼ်ၸၢပ်ႈသႅင်ႇၵၼ်တင်းၵတိၸဝ်ႈဢၼ်မီးဝႆႉတီႈပူႇမွၼ်ႇႁဝ်းဢၼ်ဝႃႈၽြႃးပဵၼ်ၸဝ်ႈႁႂ်ႈၵတိၸဝ်ႈၼၼ်ႉတဵမ်ဝႆႉၵႃႈတီႈႁဝ်းဢၼ်ပဵၼ်လုၵ်ႈလၢင်းၶဝ်ၼႂ်းလွင်ႈဢၼ်မၼ်းၸဝ်ႈႁႂ်ႈၸဝ်ႈယေႇသုလုၵ်ႉၶိုၼ်းၵႃႈၼင်ႇဢၼ်တႅမ်ႈဝႆႉၼႂ်းၵျၢမ်းသႃႇလၢမ်ႇၶၢၼ်းတုတိယၼၼ်ႉလႄႈဝႃႈ၊-

၃၃ မႂ်းပဵၼ်လုၵ်ႈၸၢႆးၵဝ်ဢေႃႈ။ၼႂ်းဝၼ်းမိူဝ်ႈၼႆႉၵဝ်ႁႂ်ႈမႂ်းၵိူတ်ႇလဵင်ႉပဵၼ်မႃးယဝ်ႉ၊ဝႃႈၼင်ႇၼႆၼၼ်ႉဢိၵ်ႇတင်းလွင်ႈဢၼ်မၼ်းၸဝ်ႈႁႂ်ႈၸဝ်ႈၼၼ်ႉလုၵ်ႉၵႃႈတၢင်းတၢႆၶိုၼ်းလိပ်းလႄႈပၼ်ဢၶႂၢင်ႉဢၼ်ၵမ်းလိုၼ်းဢမ်ႇလႆႈႁွတ်ႈထိုင်တၢင်းဢၼ်တူႇဢၼ်ၼဝ်ႈၵႃႈၼင်ႇဢၼ်ပျႃႇတိၵ်ႈၸဝ်ႈဝႃႈ၊-

၃၄ ၵဝ်တၵ်းဢဝ်ၵျေးၸူးၸဝ်ႈဢၼ်မူတ်းၸၢင်ႇလႄႈမၼ်ႈၶိူင်ႇတီႈတႃႇဝိတ်ႉၼၼ်ႉပၼ်တီႈသူဢေႃႈ၊ဝႃႈၼင်ႇၼႆၼၼ်ႉဢေႃႈ။

၃၅ ပိူဝ်ႈၼႆလႄႈၵျၢမ်းသႃႇလၢမ်ႇတီႈၼိုင်ႈသမ်ႉမီးဝႆႉထႅင်ႈလႄႈဝႃႈၸမ်း၊-တီႈၵူၼ်းဢၼ်မူတ်းၸၢင်ႇၸဝ်ႈႁဝ်းၼၼ်ႉၸဝ်ႈႁဝ်းတၵ်းဢမ်ႇပၼ်ႁႂ်ႈၶဝ်ႁွတ်ႈထိုင်တၢင်းဢၼ်တူႇဢၼ်ၼဝ်ႈတီႈၶႃႈဝႃႈၼင်ႇၼႆဢေႃႈ။

၃၆ တႃႇဝိတ်ႉၼၼ်ႉပွင်ႁဵတ်းၸွမ်းဢလူဝ်ႇၽြႃးပဵၼ်ၸဝ်ႈၼႂ်းၶိင်ႇၵႃႇလႃႉတူဝ်ၸဝ်ႈၵဝ်ႇၼၼ်ႉယဝ်ႉၸင်ႇၵိင်းၼွၼ်းလႄႈၶဝ်ႈၸူးၵႃႈတီႈဢၼ်ပူႇပေႃႈတူဝ်ၸဝ်ႈၵဝ်ႇမီးၼၼ်ႉလႄႈႁွတ်ႈထိုင်တၢင်းဢၼ်တူႇၼဝ်ႈဢေႃႈ။

၃၇ ၵေႃႉဢၼ်ၽြႃးပဵၼ်ၸဝ်ႈႁႂ်ႈလုၵ်ႉၶိုၼ်းၼၼ်ႉၸမ်းဢမ်ႇႁွတ်ႈထိုင်တၢင်းဢၼ်တူႇဢၼ်ၼဝ်ႈပိူဝ်ႈၼႆလႄႈပီႈၼွင်ႉၶဝ်ဢိူၺ်း၊ႁူႉႁၼ်လွင်ႈတြႃးတၢင်းဢၼ်ပွႆႇလွတ်ႈဢပျႅတ်ႈ

၃၈ ၵွပ်ႈပိူဝ်ႈၵျေးၸူးၸဝ်ႈၼၼ်ႉဢိၵ်ႇတင်းၵေႃႉဢၼ်ယုမ်ႇမၢတ်ႈၸဝ်ႈၼၼ်ႉၵႃႈမီးတင်းသဵင်ႈတင်းလူင်

၃၉ လႆႈၵၢင်းလွတ်ႈတင်းတၢင်းဢၼ်ဢမ်ႇၵၢင်းဢမ်ႇလွတ်ႈလႆႈၸွမ်းၼင်ႇတြႃးမုဝ်းသေႇၼၼ်ႉတႃႉ။

၄၀ ပိူဝ်ႈၼႆလႄႈၼင်ႇႁိုဝ်လွင်ႈတၢင်းဢၼ်ပႃးၵႃႈၼႂ်းၵျၢမ်းလိၵ်ႈဢၼႃႇၵၢတ်ႈတိၼၼ်ႉတၵ်းဢမ်ႇႁွတ်ႈထိုင်ၵႃႈၼိူဝ်သူၸိုင်ႁဵတ်းသတိတႃႉ။

၄၁ ဢၼ်မႃးၼႂ်းၵျၢမ်းလိၵ်ႈဢၼႃႇၵၢတ်ႈတိၼၼ်ႉလႄႈဝႃႈၸမ်း၊-ၵူၼ်းၸိူဝ်းဢၼ်ၸၢင်ႊႁဵတ်းဢၼ်ဢမ်ႇၼပ်ႉဢမ်ႇၶၢၼ်းၶဝ်ဢိူၺ်း၊လူတူၺ်းဢၢမ်းယွင်ႈသေလႄႈႁွတ်ႈထိုင်တၢင်းဢၼ်လူႉလႅဝ်တႃႉ။လွင်ႈမၼ်းၸမ်းၵဝ်တၵ်းႁဵတ်းလွင်ႈတၢင်းပိူင်ၼိုင်ႈၼႂ်းၸူဝ်ႈပၢၼ်သူၼႆႉၵေႃႈသူတၵ်းဢမ်ႇယုမ်ႇ။ပဵၵ်ႉသမ်ႉပိူၼ်ႈမွၵ်ႇသူသေၵေႃႈသူတၵ်းဢမ်ႇယုမ်ႇ၊ဝႃႈၼႆမီးမႃးၼင်ႇၼႆယဝ်ႉ၊ဝႃႈၼင်ႇၼႆဢေႃႈ။

၄၂ ၼႂ်းမိူဝ်ႈဢၼ်ၶဝ်ဢွၵ်ႇသေၵႃႈၼႂ်းၸရွပ်ႈႁေႃးတြႃးၵႂႃႇယူႇၼၼ်ႉၸိုင်ၵူၼ်းၸိူဝ်းၼၼ်ႉတွင်းပၢၼ်ႇႁႂ်ႈၶဝ်ႁေႃးလၢတ်ႈလွင်ႈတၢင်းၸိူဝ်းၼၼ်ႉၼႂ်းဝၼ်းၵမ်သိၼ်ပၢတ်ႈတမေႃးၼၼ်ႉဢေႃႈ။

၄၃ ဝၢႆးသေၵူၼ်းၸူႉၵူၼ်းတုမ်ၸိူဝ်းၼၼ်ႉၵႂႃႇယဝ်ႉၼၼ်ႉၸိုင်ၵူၼ်းယုတဢိၵ်ႇတင်းၵူၼ်းဢၼ်ၶဝ်ႈၽႃႇသႃႇၵူဝ်းၵႂၢႆႇၽြႃးပဵၼ်ၸဝ်ႈၼမ်ၼႃႇၸွမ်းပေႃးလုတင်းပႃႇၼပယူႇလႄႈတမၢၼ်ႇၸဝ်ႈၸိူဝ်းၼၼ်ႉၵေႃႈသင်ႇသွၼ်သုင်းမႃႉၶဝ်၊တိုၵ်းယူင်းပၼ်ႁႅင်းၶဝ်ႁႂ်ႈၶဝ်မၼ်ႈၶိူင်ႇၼႂ်းၵျေးၸူးၽြႃးပဵၼ်ၸဝ်ႈဢေႃႈ။

၄၄ ဝၼ်းၵမ်သိၼ်ၼၼ်ႉၵူၼ်းၼမ်ၼႃႇတင်းဝၢၼ်ႈတင်းဝဵင်းဢွၼ်ၵၼ်မႃးၸူႉၵၼ်တုမ်ၵၼ်ႁႂ်ႈလႆႈထွမ်ႇလႆႈငိၼ်းၼုၵ်ႉၵပၢတ်ႈတြႃးၽြႃးပဵၼ်ၸဝ်ႈဢေႃႈ။

၄၅ ၵူၼ်းယုတတင်းလၢႆႁၼ်ၵူၼ်းၸူႉၵူၼ်းတုမ်ၸိူဝ်းၼၼ်ႉလႄႈမီးၸႂ်ဢၼ်သီႇၵေႉႁေႈတႃသေယဝ်ႉတွပ်ႇထဵင်ၵႂၢမ်းပေႃးလုၵူၺ်းဢမ်ႇၵႃးလႃႇလင်သေႉသွမ်းၶဝ်ဢေႃႈ။

၄၆ မိူဝ်ႈၼၼ်ႉပေႃးလုတင်းပႃႇၼပႁေႃးလၢတ်ႈႁတ်းႁတ်းႁၢၼ်ႁၢၼ်လႄႈဝႃႈ၊-ၼုၵ်ႉၵပၢတ်ႈတြႃးၽြႃးပဵၼ်ၸဝ်ႈၼႆႉလႆႈႁေႃးလၢတ်ႈတီႈသူဢွၼ်ႈတၢင်းဢေႃႈ။ၼႂ်းဝႃႈၼၼ်သေၵေႃႈပိူဝ်ႈဢၼ်သူၸုၼ်ႉပႅတ်ႈလႄႈၸီႇယၢင်ႇဝႃႈ၊-တူဝ်ၸဝ်ႈၵဝ်ႇဢမ်ႇထိူၵ်ႈၶၢမ်ႇထႃႇဝရႃႉဢသၢၵ်ႈဝႃႈၼင်ႇၼႆလႄႈႁဝ်းဝၢႆႇၼႃႈၸူးၵႃႈတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆဢေႃႈ။

၄၇ လွင်ႈမၼ်းၸမ်းၽြႃးပဵၼ်ၸဝ်ႈသင်ႇလၢတ်ႈတီႈႁဝ်းၸိူဝ်ႉၼင်ႇၼႆဝႆႉလႄႈဝႃႈၸမ်း၊-ၵဝ်ၶၢၼ်းမႂ်းဝႆႉပုၼ်ႈဢၼ်တၵ်းပဵၼ်ဢၼ်လႅင်းတီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆလႄႈႁႂ်ႈမႂ်းလႆႈပဵၼ်ပုၼ်ႈတၢင်းဢၼ်ၵႄႇၶျွတ်ႈဢဝ်တေႃႇထိုင်ႁွတ်ႈတီႈလႅၼ်သုတ်းလိၼ်မိူင်းပုၼ်ႉဢေႃႈ၊ဝႃႈၼင်ႇၼႆဝႆႉယဝ်ႉ၊ဝႃႈၼင်ႇၼႆဢေႃႈ။

၄၈ မိူဝ်ႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉငိၼ်းၵႂၢမ်းၼၼ်ႉၸိုင်ၶဝ်သိူဝ်းၸူမ်းလႄႈယွင်ႈယေႃးၼုၵ်ႉၵပၢတ်ႈတြႃးထႃႇဝရႃႉၽြႃးဢေႃႈ။ၶဝ်ၸိူဝ်းဢၼ်မၼ်းၸဝ်ႈၶၢၼ်းဝႆႉႁႂ်ႈလႆႈထႃႇဝရႃႉဢသၢၵ်ႈၵႃႈမီးၼၼ်ႉႁွတ်ႈထိုင်တၢင်းဢၼ်ယုမ်ႇမၢတ်ႈဢေႃႈ။

၄၉ ၼုၵ်ႉၵပၢတ်ႈထႃႇဝရႃႉၽြႃးၼၼ်ႉၸွတ်ႇတူဝ်ၵႂႃႇတင်းမိူင်းဢေႃႈ။

၅၀ မိူဝ်ႈၼၼ်ႉၵူၼ်းယုတၸိူဝ်းၼၼ်ႉတိုၵ်းယူင်းမေႈယိင်းဢၼ်မီးသရေႇလႄႈၵူဝ်းၵႂၢႆႇၽြႃးပဵၼ်ၸဝ်ႈဢိၵ်ႇတင်းၵူၼ်းယႂ်ႇၵူၼ်းလူင်ၵႃႈၼႂ်းဝဵင်းၼၼ်ႉတင်းလၢႆလႄႈႁဵတ်းတၢင်းဢၼ်ဢူၼ်ဢဵၼ်မေႃးမႄးယႃႉၵဝ်းပေႃးလုတင်းပႃႇၼပသေယဝ်ႉႁေႃႈၶဝ်ဢွၵ်ႇသေၵႃႈၼႂ်းလႅၼ်လိၼ်မိူင်းၼၼ်ႉၵႂႃႇဢေႃႈ။

၅၁ တမၢၼ်ႇၸဝ်ႈၸိူဝ်းၼၼ်ႉၵေႃႈသၼ်ႇမုၼ်ႈလိၼ်ဢၼ်ၸပ်းတိၼ်ၶဝ်ၼၼ်ႉပႅတ်ႈသေယဝ်ႉၸင်ႇၵႂႃႇၵႃႈတီႈဝဵင်းဢိၵေႃႇၼိသေဢေႃႈ။

၅၂ တပႄးၸဝ်ႈတင်းလၢႆၵေႃႈတဵမ်ဝႆႉတင်းၸႂ်ဢၼ်သိူဝ်းသႂၢင်ႇဢိၵ်ႇတင်းဝိၺိၺ်ႇမူတ်းၸၢင်ႇၸဝ်ႈဢေႃႈ။