Shan Missions

မၢတ်ႈထႄႇ

Chapter   ၁     ၂     ၃     ၄     ၅     ၆     ၇     ၈     ၉     ၁၀     ၁၁     ၁၂     ၁၃     ၁၄     ၁၅     ၁၆     ၁၇     ၁၈     ၁၉     ၂၀     ၂၁     ၂၂     ၂၃     ၂၄     ၂၅     ၂၆     ၂၇     ၂၈ 

၂၈

ၸဝ်ႈယေႇသုလုၵ်ႉၵႃႈတၢင်းတၢႆၶိုၼ်းလိပ်း

၁ ပူၼ်ႉဝၼ်းၵမ်သိၼ်လႄႈဝၼ်းဢၼ်ပဵၼ်ဝၼ်းပထမၼႂ်းၸဵတ်းဝၼ်းၶိင်ႇဢၼ်မိူင်းၸမ်တၵ်းလႅင်းၼၼ်ႉမႃႇရိမႃႇၵတလတင်းမႃႇရိတၢင်ႇၵေႃႉသွင်ၶႃၵႂႃႇၵႃႈတီႈသၢင်းၶျႅင်းမၼ်းၸဝ်ႈႁႂ်ႈလႆႈလူႈလႆႈတူၺ်းဢေႃႈ။ 

၂ မိူဝ်ႈၼၼ်ႉဢိင်ႇသၼ်ႇႁႅင်းၼႃႇလူင်လၢင်ဢေႃႈ။ လွင်ႈမၼ်းၸမ်းတမၢၼ်ႇၵၢင်ႁၢဝ်ထႃႇဝရႃႉၽြႃးလုၵ်ႉသေၵႃႈၼိူဝ်မိူင်းၵၢင်ႁၢဝ်ပုၼ်ႉလူင်းမႃးလႄႈၵိင်ႈပႅတ်ႈမၢၵ်ႇႁိၼ်ၼၼ်ႉယဝ်ႉၸင်ႇၼင်ႈယူႇၵႃႈၼိူဝ်ၼၼ်ႉဢေႃႈ။ 

၃ ႁၢင်ႊၽၢင်မၼ်းၵေႃႈႁိူဝ်ႈလႅင်းမိူၼ်ၸိူဝ်ႉၼင်ႇၽႃႉမႅပ်ႈဢေႃႈ။ 

၄ ၶူဝ်းၼုင်ႈမၼ်းၵေႃႈၽိူၵ်ႇၶၢဝ်မိူၼ်ၸိူဝ်ႉၼင်ႇမူၺ်ႁႃႇဢေႃႈ။ ၵူၼ်းပႂ်ႉၸိူဝ်းၼၼ်ႉၵူဝ်ႁႄသၼ်ႇဝႆၼႃႇလူင်လၢင်ထၼ်ပေႃးမိူၼ်ၼင်ႇႁၢင်ႊၸမ်တၵ်းတၢႆဢေႃႈ။ 

၅ တမၢၼ်ႇၵၢင်ႁၢဝ်ၵေႃႈလၢတ်ႈတီႈမႄႈယိင်းၸိူဝ်းၼၼ်ႉလႄႈဝႃႈ၊-ယႃႇပေၵူဝ်ပေႁႄ။ ၵဝ်ႁူႉလွင်ႈဢၼ်သူႁႃၸဝ်ႈယေႇသုဢၼ်လႆႈၶၢမ်ႇတၢင်းဢၼ်တွၵ်ႇဝႆႉယဝ်ႉၵႃႈၼိူဝ်သဝ်လၵ်းဝႃးမိုဝ်းၼၼ်ႉယူႇဢေႃႈ။ 

၆ မၼ်းၸဝ်ႈဢမ်ႇမီးၵႃႈတီႈၼႆႉ။ ၵႃႈၼင်ႇဢၼ်မၼ်းၸဝ်ႈလၢတ်ႈဝႆႉၼၼ်ႉမၼ်းၸဝ်ႈလုၵ်ႉၶိုၼ်းယဝ်ႉ။ မႃးလႄႈတူၺ်းတီႈဢၼ်မၼ်းၸဝ်ႈၵိင်းၼွၼ်းၼၼ်ႉတႃႉ။ 

၇ ၵႂႃႇၶၼ်ၶၼ်ၽႂ်းၽႂ်းလႄႈမွၵ်ႇလၢတ်ႈလွင်ႈတၢင်းဢၼ်မၼ်းၸဝ်ႈလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉတီႈတပႄးမၼ်းၸဝ်ႈတင်းလၢႆတႃႉ။ တူၺ်းလူႊ။ မၼ်းၸဝ်ႈၵႂႃႇၵႃႈတီႈမိူင်းၵႃႇလိလႄးပုၼ်ႉဢွၼ်ႈတၢင်းသူယဝ်ႉ။ သူတၵ်းထူပ်းႁၼ်မၼ်းၸဝ်ႈၵႃႈတီႈမိူင်းၼၼ်ႉဢေႃႈ။ 

၈ တေႃႈလဵဝ်ၼႆႉၵဝ်မွၵ်ႇလၢတ်ႈတီႈသူယဝ်ႉ၊ဝႃႈၼင်ႇၼႆဢေႃႈ။ ၶဝ်ၵေႃႈမီးတင်းၸႂ်ဢၼ်ၵူဝ်ၼႃႇဢိၵ်ႇတင်းၸႂ်ဢၼ်သိူဝ်းၸူမ်းၼႃႇလႄႈလုၵ်ႉသေၵႃႈတီႈသၢင်းၶျႅင်းမၼ်းၸဝ်ႈၼၼ်ႉၶုၼ်ႇလႅၼ်ႈၵႂႃႇၶၼ်ၶၼ်ၽႂ်းၽႂ်းႁႂ်ႈလႆႈမွၵ်ႇလၢတ်ႈသတၢင်းၼၼ်ႉပၼ်တီႈတပႄးၸဝ်ႈတင်းလၢႆဢေႃႈ။ 

၉ မိူဝ်ႈၼၼ်ႉၸဝ်ႈယေႇသုႁပ်ႉႁူဝ်တၢင်းၶဝ်လႄႈလၢတ်ႈဝႃႈ၊-ႁႂ်ႈမင်ႇၵလႃႇမီးတီႈသူတႃႉ၊ဝႃႈၼင်ႇၼႆဢေႃႈ။ ၶဝ်ၵေႃႈသုတ်ႉၸပ်းသုတ်ႉၸူးတီႈမၼ်းၸဝ်ႈသေယဝ်ႉၵွတ်ႇတိၼ်မၼ်းၸဝ်ႈလႄႈၶုပ်ႉမူပ်ႇၵူဝ်းၵႂၢႆႇမၼ်းၸဝ်ႈဢေႃႈ။ 

၁၀ ၸဝ်ႈယေႇသုၵေႃႈလၢတ်ႈလႄႈဝႃႈ၊-ယႃႇပေၵူဝ်ပေႁႄ။ ၵႂႃႇတႃႉ။ ၼင်ႇႁိုဝ်ၼွင်ႉၵဝ်တင်းလၢႆတၵ်းၵႂႃႇၵႃႈတီႈမိူင်းၵႃႇလိလႄးၸိုင်မွၵ်ႇလၢတ်ႈပၼ်ၶဝ်တႃႉ။ ၶဝ်တၵ်းထူပ်းႁၼ်ၵဝ်ၵႃႈတီႈမိူင်းၼၼ်ႉဢေႃႈ၊ဝႃႈၼင်ႇၼႆဢေႃႈ။ 

လုၵ်ႈသိုၵ်းလၢတ်ႈၼႄလွင်ႈၸဝ်ႈယေႇသုလုၵ်ႉၶိုၼ်းလိပ်း

၁၁ ၼႂ်းမိူဝ်ႈဢၼ်ၶဝ်ယင်းတိုၵ်ႉၵႂႃႇယူႇၼၼ်ႉၸိုင်ၵူၼ်းဢၼ်ပႂ်ႉၶုမ်သၢင်းၶျႅင်းၸိူဝ်းၼၼ်ႉၵမ်ႈၽွင်ႈၶဝ်ႈၵႃႈၼႂ်းဝဵင်းသေလႄႈမွၵ်ႇလၢတ်ႈလွင်ႈတၢင်းဢၼ်ပဵၼ်မႃးတင်းသဵင်ႈတင်းလူင်ၼၼ်ႉတီႈယိတ်ႉပရေႃးႁိၵ်ႈလူင်တင်းလၢႆဢေႃႈ။ 

၁၂ ယိတ်ႉပရေႃးႁိၵ်ႈလူင်ၸိူဝ်းၼၼ်ႉၵေႃႈၸူႉတုမ်လူၺ်ႈၵၼ်တင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆၸိူဝ်းၼၼ်ႉသေလႄႈတိူင်ႇပၢင်ႇၵၼ်သေယဝ်ႉၸင်ႇပၼ်ငိုၼ်းၼမ်ၼႃႇတီႈၵူၼ်းသိုၵ်းၸိူဝ်းၼၼ်ႉလႄႈဝႃႈ၊-

၁၃ သူဢွၼ်ၵၼ်ဝႃႈ၊-တပႄးမၼ်းၸဝ်ႈတင်းလၢႆမႃးမိူဝ်ႈၶိင်ႇၵၢင်ၶိုၼ်းလႄႈလၵ်ႉဢဝ်တူဝ်တၢႆမၼ်းၸဝ်ႈၵႂႃႇမိူဝ်ႈဢၼ်ႁဝ်းၶႃႈၼွၼ်းလပ်းယူႇၼၼ်ႉဢေႃႈ၊ဝႃႈၼင်ႇၼႆတႃႉ။ 

၁၄ ပေႃးၵႂၢမ်းၼႆႉႁွတ်ႈထိုင်ႁူၶုၼ်လူင်ၸိုင်ႁဝ်းတၵ်းၶျေႃးၶုၼ်လူင်သေလႄႈႁႂ်ႈသူၵၢင်းလွတ်ႈတင်းဢမူႉၼႆႉယူႇဢေႃႈ၊ဝႃႈၼင်ႇၼႆဢေႃႈ။ 

၁၅ ၵူၼ်းသိုၵ်းၸိူဝ်းၼၼ်ႉၵေႃႈဢဝ်ငိုၼ်းသေယဝ်ႉႁဵတ်းၸွမ်းၵႃႈၼင်ႇဢၼ်ၶဝ်သွၼ်ပၼ်ဝႆႉၼၼ်ႉဢေႃႈ။ ၵႂၢမ်းၶဝ်ၼၼ်ႉၵေႃႈၸွတ်ႇတူဝ်ၵႂႃႇၵႃႈၼႂ်းၵူၼ်းယုတတင်းလၢႆၵူႈတီႈၵူႈလႅၼ်တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။ 

ပွႆႇၸႂ်ႉတပႄးၸဝ်ႈၵွႃႇ

၁၆ တပႄးၸဝ်ႈသိပ်းဢဵတ်းပႃးၸိူဝ်းၼၼ်ႉၵႂႃႇၵႃႈတီႈမိူင်းၵႃႇလိလႄးပုၼ်ႉလႄႈၶိုၼ်ႈၵႂႃႇၵႃႈၼိူဝ်လွႆဢၼ်ၸဝ်ႈယေႇသုသင်ႇလၢတ်ႈဝႆႉၼၼ်ႉဢေႃႈ။ 

၁၇ မိူဝ်ႈဢၼ်ၶဝ်ထူပ်းႁၼ်မၼ်းၸဝ်ႈၼၼ်ႉၶဝ်ၶုပ်ႉမူပ်ႇၵူဝ်းၵႂၢႆႇမၼ်းၸဝ်ႈဢေႃႈ။ ၵူၺ်းၵႃႈၵမ်ႈၽွင်ႈဢမ်ႇပေႃးယုမ်ႇ။ 

၁၈ ၸဝ်ႈယေႇသုမႃးၸူးတီႈၶဝ်သေယဝ်ႉလၢတ်ႈလႄႈဝႃႈ၊-ၵဝ်လႆႈၶၢမ်ႇဢၶႂၢင်ႉတၼ်းၶူဝ်းဢၼ်လႆႈဢုပ်ႉပိူင်ႇၵႃႈမီးတင်းသဵင်ႈတင်းလူင်ၵႃႈၼိူဝ်ၵၢင်ႁၢဝ်ဢိၵ်ႇတင်းၵႃႈၼိူဝ်လိၼ်မိူင်းၼႆႉယဝ်ႉ။ 

၁၉ ပိူဝ်ႈၼႆၸင်ႇသူၵႂႃႇလႄႈႁႂ်ႈၵူၼ်းမဵဝ်းၵႃႈမီးတင်းသဵင်ႈတင်းလူင်ပဵၼ်တပႄးၵဝ်သေယဝ်ႉပၼ်ပပ်ႉတိၸၢမ်ႇၼႂ်းၼႃႇမႃႉၸိုဝ်သဵင်ပေႃႈၸဝ်ႈလုၵ်ႈၸဝ်ႈတင်းဝိၺိၺ်ႇမူတ်းၸၢင်ႇၸဝ်ႈၼၼ်ႉတႃႉ။ 

၂၀ သင်ႇသွၼ်သုင်းမပၼ်ႁႂ်ႈၶဝ်လႆႈၵမ်လႆႈၵျၢင်ႉပိင်းၺၢပ်ႈၵႃႈဢၼ်ၵဝ်ပၼ်တီႈသူၼၼ်ႉတႃႉ။ ၵဝ်ၵေႃႈမီးယူႇလူၺ်ႈၵၼ်တင်းသူတႃႇသေႇဢမ်ႇထၢတ်ႇတေႃႇထိုင်ႁွတ်ႈၵမ်ႇၽႃႇသုတ်းသဵင်ႈဢေႃႈ၊ဝႃႈၼင်ႇၼႆဢေႃႈ။ 

ၵျၢမ်းၶရိၸ်ဝၢင်ၸဝ်ႈမၢတ်ႈထႄႇယဝ်ႉယဝ်ႉဢေႃႈ