Shan Missions

ၵျၢမ်းၶၢဝ်ႇငၢဝ်ႊသတၢင်းသိူဝ်းပျေႃႇယုဝ်းႁၢၼ်ႇ

Chapter   ၁    ၂    ၃    ၄    ၅    ၆    ၇    ၈    ၉    ၁၀    ၁၁    ၁၂    ၁၃    ၁၄    ၁၅    ၁၆    ၁၇    ၁၈    ၁၉    ၂၀    ၂၁   

၁၅

ၶိူဝ်းမၢၵ်ႇၸပိတ်ႉတင်းၵိင်ႇမၼ်းၶႃႊမၼ်း

၁ ၵဝ်ပဵၼ်ၶိူဝ်းမၢၵ်ႇၸပိတ်ႉဢၼ်ၸိုဝ်ႈဢၼ်ၸႂ်ႈဢေႃႈ။ၸဝ်ႈပေႃႈၵဝ်ၼၼ်ႉပဵၼ်ၵေႃႉဢၼ်ပႂ်ႉသူၼ်ဢူးယဵၼ်ႇဢေႃႈ။

၂ ဢၼ်ပဵၼ်ၵိင်ႇပဵၼ်ၶႃႊတီႈၵဝ်ဢၼ်ဢမ်ႇမၢၵ်ႇမၢၵ်ႇမၼ်းၵႃႈမီးတင်းသဵင်ႈတင်းလူင်ၼၼ်ႉမၼ်းၸဝ်ႈတၵ်းၼ်းပႅတ်ႈဢေႃႈ။ဢၼ်ပဵၼ်ၵိင်ႇပဵၼ်ၶႃႊဢၼ်မၢၵ်ႇမၢၵ်ႇမၼ်းၵႃႈမီးတင်းသဵင်ႈတင်းလူင်ၼၼ်ႉမၼ်းၸဝ်ႈမႄးၽဵဝ်ႈႁႂ်ႈမူတ်းသႂ်ႁႂ်ႈယဵင်ႈၶႅၼ်းလႆႈမၢၵ်ႇမၢၵ်ႇထႅင်ႈဢေႃႈ။

၃ တေႃႈလဵဝ်ၼႆႉၵေႃႈသူပဵၼ်ဢၼ်မူတ်းသႂ်ၵွပ်ႈပိူဝ်ႈၵႂၢမ်းဢၼ်ၵဝ်ႁေႃးလၢတ်ႈၼႆႉယူႇဢေႃႈ။

၄ တႄႇယူႇၵႃႈၼႂ်းၵဝ်တႃႉ။ၵဝ်ၵေႃႈတၵ်းတႄႇယူႇၵႃႈၼႂ်းသူဢေႃႈ။ၸိူဝ်ႉၼင်ႇဢၼ်ပေႃးၵိင်ႇမၢၵ်ႇၸပိတ်ႉဢမ်ႇၸပ်းယူႇၵႃႈၼႂ်းတူၼ်ႈမၼ်းၸိုင်မၼ်းဢမ်ႇမၢၵ်ႇမၢၵ်ႇမၼ်းလႆႈၼၼ်ႉပေႃးသူဢမ်ႇတႄႇယူႇၵႃႈၼႂ်းၵဝ်ၸိုင်သူတၵ်းဢမ်ႇမၢၵ်ႇလႆႈ။

၅ ၵဝ်ပဵၼ်ၶိူဝ်းမၢၵ်ႇၸပိတ်ႉဢေႃႈ။သူပဵၼ်ၵိင်ႇမၼ်းၶႃႊမၼ်းဢေႃႈ။ၽူႈလႂ်သေဢမ်ႇဝႃႈၵေႃႉဢၼ်တႄႇယူႇၵႃႈၼႂ်းၵဝ်လႄႈၵဝ်ၵေႃႈတႄႇယူႇၵႃႈၼႂ်းမၼ်းၼၼ်ႉၵေႃႉၼၼ်ႉၸၢင်ႊမၢၵ်ႇမၢၵ်ႇမၼ်းၼမ်ၼႃႇဢေႃႈ။ပေႃးသူၽၢတ်ႇယၢၼ်ၵၼ်တင်းၵဝ်ၸိုင်သူဢမ်ႇတတ်ႈၼိုင်ႇလႆႈသေၸိူဝ်ႉသေပိူင်။

၆ ၵေႃႉဢၼ်ဢမ်ႇတႄႇယူႇၵႃႈၼႂ်းၵဝ်ၼၼ်ႉလႆႈၶၢမ်ႇတၢင်းဢၼ်ထိမ်ႈဢွၵ်ႇပႅတ်ႈၸိူဝ်ႉၼင်ႇၵိင်ႇၶႃႊၼၼ်ႉလႄႈႁႅင်ႈႁဵဝ်ႇၵႂႃႇဢေႃႈ။ၵိင်ႇၶႃႊၸိူဝ်ႉၼင်ႇၼၼ်ၼၼ်ႉၵူၼ်းၵဵပ်းသိမ်းဢဝ်သႂ်ႇၵႃႈၼႂ်းၽႆးလႄႈလႆႈၶၢမ်ႇတၢင်းဢၼ်ၽႆးမႆႈပႅတ်ႈဢေႃႈ။

၇ ပေႃးသူတႄႇယူႇၵႃႈၼႂ်းၵဝ်လႄႈၵႂၢမ်းၵဝ်ၼႆႉၵေႃႈတႄႇယူႇၵႃႈၼႂ်းသူၸိုင်ယွၼ်းၵႃႈဢၼ်သူၶႂ်ႈယွၼ်းတင်းသဵင်ႈတင်းလူင်ၼၼ်ႉတႃႉ။တၵ်းလႆႈဢေႃႈ။

၈ မူၼ်ၽုင်းၸဝ်ႈပေႃႈၵဝ်ထၢင်ႇသႃးမႃးၵွပ်ႈပိူဝ်ႈဢၼ်သူမၢၵ်ႇမၢၵ်ႇၼမ်ၼႃႇၼၼ်ႉလႄႈသူၵေႃႈတၵ်းပဵၼ်တပႄးၵဝ်ဢေႃႈ။

၉ ၸိူဝ်ႉၼင်ႇဢၼ်ပေႃႈၸဝ်ႈႁၵ်ႉၵဝ်ၼၼ်ႉၵဝ်ႁၵ်ႉသူဢေႃႈတႄႇယူႇၵႃႈၼႂ်းတၢင်းႁၵ်ႉမႅတ်ႈတႃႇၵဝ်တႃႉ။

၁၀ ၸိူဝ်ႉၼင်ႇဢၼ်ၵဝ်ပႂ်ႉၸွမ်းပိင်းၺၢပ်ႈၸဝ်ႈပေႃႈၵဝ်တင်းလၢႆလႄႈတႄႇယူႇၵႃႈၼႂ်းတၢင်းႁၵ်ႉမႅတ်ႈတႃႇမၼ်းၸဝ်ႈယူႇၼၼ်ႉပေႃးသူပႂ်ႉၸွမ်းပိင်းၺၢပ်ႈၵဝ်တင်းလၢႆၸိုင်သူတၵ်းတႄႇယူႇၵႃႈၼႂ်းတၢင်းႁၵ်ႉမႅတ်ႈတႃႇၵဝ်ဢေႃႈ။

၁၁ ၼင်ႇႁိုဝ်လွင်ႈတၢင်းဢၼ်သိူဝ်းပျေႃႇၵဝ်ၼႆႉတၵ်းမီးယူႇၵႃႈၼႂ်းသူလႄႈသင်၊ၼင်ႇႁိုဝ်လွင်ႈတၢင်းဢၼ်သိူဝ်းပျေႃႇသူၼၼ်ႉတၵ်းၸေးၸုမ်ႇလႄႈသင်ၵဝ်ႁေႃးလၢတ်ႈၵႂၢမ်းၼႆႉတီႈသူဢေႃႈ။

၁၂ ဢၼ်ၵဝ်ပိင်းၺၢပ်ႈၸမ်းၸိူဝ်ႉၼင်ႇဢၼ်ၵဝ်ႁၵ်ႉသူၼၼ်ႉသူၵေႃႉၼိုင်ႈလႄႈၵေႃႉၼိုင်ႈႁၵ်ႉၵၼ်တႃႉ။

၁၃ မႅတ်ႈတႃႇဢၼ်ယဵင်ႈၶႅၼ်းယႂ်ႇၼႃႇသေမႅတ်ႈတႃႇတၢင်းဢၼ်ၸုၼ်ႉဢသၢၵ်ႈတူဝ်ၸဝ်ႈၵဝ်ႇပုၼ်ႈၵေႃႉသေႈတူဝ်ၸဝ်ႈၵဝ်ႇတၢင်းလၢႆၼၼ်ႉဢမ်ႇမီးၵႃႈသင်ယဝ်ႉ။

၁၄ ပေႃးသူၵမ်ၵျၢင်ႉၵႃႈၼင်ႇဢၼ်ၵဝ်ပိင်းၺၢပ်ႈဝႆႉၸိူဝ်းၼၼ်ႉၸိုင်သူပဵၼ်ၵေႃႉသေႈၵဝ်ဢေႃႈ။ၸႃႉၸဵမ်တေႃႈလဵဝ်ၼႆႉၵဝ်ဢမ်ႇႁွင်ႉသူဝႃႈၶႃႈ။ၶႃႈဢၼ်ဝႃႈၼၼ်ႉဢမ်ႇႁူႉလွင်ႈဢၼ်ၸဝ်ႈမၼ်းႁဵတ်းၸိူဝ်းၼၼ်ႉ။

၁၅ ၵဝ်ႁွင်ႉသူဝႃႈၵေႃႉသေႈဢေႃႈ။လွင်ႈမၼ်းၸမ်းၵဝ်ၼႄပျႃးၵႃႈဢၼ်ၵဝ်လႆႈငိၼ်းတီႈၸဝ်ႈပေႃႈၵဝ်တင်းသဵင်ႈတင်းလူင်ၼၼ်ႉတီႈသူဢေႃႈ။

၁၆ သူလိူၵ်ႈၵဵပ်းဢဝ်ၵဝ်ဢမ်ႇၸႂ်ႈ။ၵဝ်လိူၵ်ႈၵဵပ်းဢဝ်သူဢေႃႈ။ၵဝ်ၶၢၼ်းသူဝႆႉႁႂ်ႈသူလႆႈၵႂႃႇလႄႈမၢၵ်ႇမၢၵ်ႇဢၼ်မၼ်ႈၶိူင်ႇလႄႈႁႂ်ႈပေႃႈၸဝ်ႈပၼ်ၵႃႈဢၼ်သူယွၼ်းတင်းသဵင်ႈတင်းလူင်ၼႂ်းၼႃႇမႃႉၸိုဝ်သဵင်ၵဝ်ၼၼ်ႉဢေႃႈ။

၁၇ လွင်ႈၼင်ႇႁိုဝ်သူၵေႃႉၼိုင်ႈလႄႈၵေႃႉၼိုင်ႈတၵ်းႁၵ်ႉၵၼ်ၸိုင်ၵဝ်ပၼ်ပိင်းၺၢပ်ႈၸိူဝ်းၼႆႉတီႈသူဢေႃႈ။

လေႃးၵႃႉၼႆႉတၵ်းၸင်းတပႄးၸဝ်ႈ

၁၈ ပေႃးလေႃးၵႃႉၼႆႉၸင်းသူၸိုင်သူႁူႉလွင်ႈဢၼ်ဝႃႈမၼ်းၸင်းၵဝ်ၸူဝ်ႈဢၼ်ဢမ်ႇပႆႇၸင်းသူၼၼ်ႉတႃႉ။

၁၉ ပေႃးသူၶၢမ်ႇတၢင်းဢၼ်လေႃးၵႃႉၼႆႉဢုပ်ႉပိူင်ႇသူၸိုင်လေႃးၵႃႉၼႆႉတၵ်းႁၵ်ႉသူဢေႃႈ။ပိူဝ်ႈဢၼ်သူဢမ်ႇၶၢမ်ႇတၢင်းဢၼ်လေႃးၵႃႉၼႆႉဢုပ်ႉပိူင်ႇသူၼၼ်ႉလႄႈလေႃးၵႃႉၼႆႉၸင်းသူဢေႃႈ။

၂၀ ၶုၵ်းၸႂ်လႆႈၶႆႈၸႂ်ထူပ်းၵႂၢမ်းဢၼ်ၵဝ်လၢတ်ႈဝႆႉလႄႈဝႃႈ၊-ၶႃႈယဵင်ႈၶႅၼ်းယႂ်ႇမျၢတ်ႈၼႃႇသေၸဝ်ႈမၼ်းဢမ်ႇၸႂ်ႈ၊ဝႃႈၼင်ႇၼႆၼၼ်ႉတႃႉ။ပေႃးၶဝ်ၼိၵ်ႈၸၢၵ်ႈငႅၼ်းသေးၵဝ်ၸိုင်ၶဝ်တၵ်းၼိၵ်ႈၸၢၵ်ႈငႅၼ်းသေးသူဢေႃႈ။ပေႃးၶဝ်ထွမ်ႇဢဝ်ၵႂၢမ်းၵဝ်ၸိုင်ၶဝ်တၵ်းထွမ်ႇဢဝ်ၵႂၢမ်းသူဢေႃႈ။

၂၁ ၵွပ်ႈပိူဝ်ႈဢၼ်ၶဝ်ဢမ်ႇႁူႉၵေႃႉဢၼ်ပွႆႇၸႂ်ႉၵဝ်မႃးၼၼ်ႉလႄႈၶဝ်တၵ်းႁဵတ်းလွင်ႈတၢင်းၵႃႈမီးတင်းသဵင်ႈတင်းလူင်ၸိူဝ်းၼၼ်ႉတီႈသူၵွပ်ႈပိူဝ်ႈၼႃႇမႃႉၸိုဝ်သဵင်ၵဝ်ဢေႃႈ။

၂၂ ပေႃးၵဝ်ဢမ်ႇမႃးလႄႈဢမ်ႇႁေႃးလၢတ်ႈတီႈၶဝ်ၸိုင်ၶဝ်ၼၼ်ႉတၵ်းဢမ်ႇမီးဢပျႅတ်ႈ။ၵူၺ်းၵႃႈတေႃႈလဵဝ်ၼႆႉၶဝ်ဢမ်ႇႁူမ်ႇဢပျႅတ်ႈၶဝ်ဝႆႉလႆႈယဝ်ႉ။

၂၃ ၵေႃႉဢၼ်ၸင်းၵဝ်ၼၼ်ႉၸင်းၸဝ်ႈပေႃႈၵဝ်ဢေႃႈ။

၂၄ သင်ၵဝ်ဢမ်ႇႁဵတ်းလွင်ႈတၢင်းဢၼ်ပိူၼ်ႈတၢင်ႇၵေႃႉဢမ်ႇပႆႇတွၼ်ႉႁဵတ်းသေပွၵ်ႈၵႃႈၼႂ်းၶဝ်ၼၼ်ႉၸိုင်ၶဝ်တၵ်းဢမ်ႇမီးဢပျႅတ်ႈ။တေႃႈလဵဝ်ၼႆႉၸမ်းၶဝ်လႆႈႁၼ်လႄႈၸင်းၵဝ်ဢိၵ်ႇတင်းၸဝ်ႈပေႃႈၵဝ်ဢေႃႈ။

၂၅ လွင်ႈတၢင်းၼႆႉၸိုင်လွင်ႈၼင်ႇႁိုဝ်ၵႂၢမ်းဢၼ်တႅမ်ႈဝႆႉၼႂ်းၵျၢမ်းလိၵ်ႈပိင်းၺၢပ်ႈတိလႄႈဝႃႈ၊-လွင်ႈမၼ်းယင်းဢမ်ႇမီးလႄႈၶဝ်ၸင်းၵဝ်ဢေႃႈ၊ဝႃႈၼင်ႇၼႆၼၼ်ႉတၵ်းတဵမ်ထူၼ်ႈၸိုင်ၸင်ႇပဵၼ်ဢေႃႈ။

၂၆ မိူဝ်ႈဢၼ်သြႃႇဢုပိတ်ႉသေႇဢၼ်ဝႃႈဝိၺိၺ်ႇမူတ်းၸၢင်ႇၸဝ်ႈဢၼ်တဵမ်ဝႆႉတင်းသမ်ႇမႃႇတြႃးဢၼ်ၵဝ်တၵ်းပွႆႇၸႂ်ႉသေၵႃႈတီႈပေႃႈၸဝ်ႈမႃးၼၼ်ႉတၵ်းၶၢမ်ႇသၢၵ်ႈသေႇလွင်ႈၵဝ်ၵႃႈတီႈသူဢေႃႈ။

၂၇ ပိူဝ်ႈဢၼ်သူမီးယူႇလူၺ်ႈၵၼ်တင်းၵဝ်ၸဵမ်မိူဝ်ႈၵေႃႇၸႃႉၼၼ်ႉလႄႈသူၵေႃႈတၵ်းလႆႈၶၢမ်ႇသၢၵ်ႈသေႇဢေႃႈ။