Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၆

လိူၵ်ႈၵဵပ်းဢဝ်ၸဵတ်းၵေႃႉ

၁ မိူဝ်ႈဢၼ်တပႄးၸဝ်ႈလႂ်ယင်းတိုၵ်ႉၼမ်မႃးၵိုၼ်းမႃးယူႇၼၼ်ႉၵူၼ်းမဵဝ်းႁေႇလေႇၼိတ်ႉတင်းလၢႆပွင်ႉမိုၼ်လႄႈဝႃႈ၊-မိူဝ်ႈဢၼ်ႁဵတ်းလဵင်ႉႁဵတ်းလူၵူႈမိူဝ်ႉၵူႈဝၼ်းၼၼ်ႉဢမ်ႇပေႃးႁဵတ်းလဵင်ႉႁဵတ်းလူမေႈမုၵ်ႉမေႈမၢႆႈမဵဝ်းႁဝ်းၼႆႉ၊ဝႃႈၼင်ႇၼႆလႄႈ၊တၢင်ႇဢပျႅတ်ႈတီႈၵူၼ်းႁေႇပြႄးတင်းလၢႆဢေႃႈ။

၂ မိူဝ်ႈၼၼ်ႉတမၢၼ်ႇၸဝ်ႈသိပ်းသွင်ပႃးၸိူဝ်းၼၼ်ႉႁွင်ႉဢဝ်တပႄးၸဝ်ႈတင်းလၢႆမႃးသေယဝ်ႉလၢတ်ႈဝႃႈ၊-ႁဝ်းဢမ်ႇထုၵ်ႇလီပႅတ်ႈဝႆႉၼုၵ်ႉၵပၢတ်ႈတြႃးၽြႃးပဵၼ်ၸဝ်ႈသေလႄႈႁဵတ်းတၢင်းဢၼ်လဵင်ႉလူၵႃႈတီႈၽိူၼ်တီႈၵိၼ်ၼၼ်ႉၵူၺ်း။

၃ ပိူဝ်ႈၼႆလႄႈပီႈၼွင်ႉၶဝ်ဢိူၺ်း၊ႁႃဢဝ်ၵူၼ်းၸဵတ်းၵေႃႉၵႃႈၼႂ်းသူဢၼ်မီးသရေႇဢၼ်မီးပိင်ႇၺႃႇဢၼ်တဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈၼၼ်ႉတႃႉ။ႁဝ်းတၵ်းၶၢၼ်းၶဝ်ဝႆႉႁႂ်ႈၶဝ်လႆႈပွင်လႆႈႁဵတ်းလွင်ႈတၢင်းၼႆႉဢေႃႈ။

၄ ႁဝ်းၸမ်းတၵ်းႁဵတ်းတၢင်းဢၼ်သူးတွင်းပထၼႃႇဢိၵ်ႇတင်းတၢင်းဢၼ်ႁေႃးလၢတ်ႈၼုၵ်ႉၵပၢတ်ႈတြႃးၸဝ်ႈယူႇတႃႇသေႇဢမ်ႇထၢတ်ႇဢေႃႈ၊ဝႃႈၼင်ႇၼႆဢေႃႈ။

၅ ၵူၼ်းတင်းသဵင်ႈတင်းလူင်ၵေႃႈထုၵ်ႇၸႂ်ၵျိူၵ်ႈၸႂ်ၵႂၢမ်းၼၼ်ႉလႄႈလိူၵ်ႈၵဵပ်းဢဝ်ၸႃႉၸဵမ်သထေႇၽၢၼ်ႇ၊ဢၼ်တဵမ်ဝႆႉတင်းတၢင်းယုမ်ႇမၢတ်ႈတင်းဝိၺိၺ်ႇမူတ်းၸၢင်ႇၸဝ်ႈ၊ဢိၵ်ႇတင်းၽိလိပ်ႉပု၊ပေႃႇၶေႃႇ၊ၼိၵၼေႃႇ၊တိမုၼ်ႇ၊ပႃႇမေႇၼ၊ၼိၵေႃႇလ၊ၵူၼ်းဝဵင်းဢၼ်ႇတိဢုၵ်ႉဢၼ်ၶဝ်ႈၽႃႇသႃႇယုတၸိူဝ်းၼၼ်ႉသေလႄႈႁႂ်ႈၶဝ်ၸုၵ်းၵႃႈတီႈၽၢႆႇၼႃႈတမၢၼ်ႇၸဝ်ႈၸိူဝ်းၼၼ်ႉဢေႃႈ။

၆ တမၢၼ်ႇၸဝ်ႈၸိူဝ်းၼၼ်ႉၵေႃႈသူးတွင်းသေယဝ်ႉဢဝ်မိုဝ်းတၢင်ႇၵႃႈၼိူဝ်ႁူဝ်ၶဝ်ဢေႃႈ။

၇ သႃႇသၼႃႇၽြႃးပဵၼ်ၸဝ်ႈယႂ်ႇၵႂၢင်ႈမႃး၊တပႄးၸဝ်ႈၵေႃႈၼမ်ၵိုၼ်းမႃးၵႃႈၼႂ်းဝဵင်းယေႇရုသလႅမ်ႇၼၼ်ႉလႄႈယိတ်ႉပရေႃးႁိၵ်ႈၼမ်ၼႃႇၵေႃႈပဵၼ်ၵေႃႉဢၼ်ထွမ်ႇဢဝ်တြႃးတၢင်းယုမ်ႇမၢတ်ႈဢေႃႈ။

သထေႇၽၢၼ်ႇလႆႈၶၢမ်ႇတၢင်းဢၼ်တီႉဢဝ်

၈ သထေႇၽၢၼ်ႇၼၼ်ႉတဵမ်ဝႆႉတင်းၵျေးၸူးၸဝ်ႈဢိၵ်ႇတင်းတၼ်းၶူဝ်းၸဝ်ႈလႄႈႁဵတ်းၼီႉမိၵ်ႈလၢၵ်ႈၶၼႃႇဢၼ်ယႂ်ႇလွင်ႈတၢင်းဢၼ်လီဢၢမ်းလႂ်ၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။

၉ မိူဝ်ႈၼၼ်ႉၸႃႉၸဵမ်ၵူၼ်းဢၼ်မီးၼႂ်းမုၵ်ႉၼႂ်းၸိူဝ်းဢၼ်လႆႈႁွင်ႉႁိၵ်ႈၸိုဝ်လိပေႇရတိၼ်ႇဢိၵ်ႇတင်းၵူၼ်းမိူင်းၵုရေႇၼေႇတင်းၵူၼ်းဝဵင်းဢလေႇၸၢၼ်ႇတရေႇ

၁၀ တင်းၵူၼ်းမိူင်းၵိလိၵိ၊တင်းၵူၼ်းမိူင်းဢႃႇသိၵမ်ႈၽွင်ႈၸိူဝ်းၼၼ်ႉလုၵ်ႉလႄႈထဵင်ၵၼ်တင်းသထေႇၽၢၼ်ႇသေၵေႃႈၶဝ်ဢမ်ႇၶၢမ်ႇဢမ်ႇႁႄႉလႆႈပိင်ႇၺႃႇတင်းဝိၺိၺ်ႇမူတ်းၸၢင်ႇၸဝ်ႈဢၼ်မၼ်းဢိင်ပိုင်ႈလႄႈႁေႃးလၢတ်ႈၼၼ်ႉ။

၁၁ မိူဝ်ႈၼၼ်ႉၶဝ်တဵတ်ႇတဵတ်ႇႁွင်ႉဢဝ်ၵူၼ်းၵေႃႉၼိုင်ႈမႃးဢၼ်တၵ်းၶၢမ်ႇသၢၵ်ႈသေႇဝႃႈ၊-ႁဝ်းၶႃႈလႆႈငိၼ်းၵေႃႉၼႆႉလၢတ်ႈပူၼ်ႉလၢတ်ႈလိူဝ်မုဝ်းသေႇတင်းၽြႃးပဵၼ်ၸဝ်ႈၶႃႈဢေႃႈ၊ဢၼ်ဝႃႈၼၼ်ႉဢေႃႈ။

၁၂ လိူဝ်သေၼၼ်ႉၶဝ်တိုၵ်းယူင်းၸူဝ်းဢဝ်ၵူၼ်းတင်းလၢႆဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းၵူၼ်းထုတ်ႇၵျၢမ်းတင်းလၢႆမႃးတီႉဢဝ်သထေႇၽၢၼ်ႇလႄႈဢဝ်မၼ်းၵႂႃႇသူင်ႇၵႃႈတီႈလုမ်းလူင်ယဝ်ႉၸင်ႇ၊ႁွင်ႉဢဝ်ၵူၼ်းဢၼ်တၵ်းလႆႈၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉမႃးလႄႈလၢတ်ႈဝႃႈ၊-

၁၃ ၵေႃႉၼႆႉလၢတ်ႈပူၼ်ႉလၢတ်ႈလိူဝ်ထႃႇၼႃႉတီႈမူတ်းၸၢင်ႇၸဝ်ႈၽြႃးဢိၵ်ႇတင်းပိင်းၺၢပ်ႈတြႃးၸဝ်ႈယူႇတႃႇသေႇၶႃႈဢေႃႈ။

၁၄ လွင်ႈမၼ်းၸမ်း၊ႁဝ်းလႆႈငိၼ်းမၼ်းလၢတ်ႈဝႃႈ၊-ၸဝ်ႈယေႇသုၵူၼ်းဝဵင်းၼႃႇၸရႅတ်ႉၼၼ်ႉတၵ်းယႃႉပႅတ်ႈတီႈယူႇတၼ်းသဝ်းၸဝ်ႈၽြႃးလႄႈႁႂ်ႈထုင်းၸၢမ်ႇဢူႉပတေႇဢၼ်မုဝ်းသေႇဢၢပ်ႈပၼ်တီႈႁဝ်းၼၼ်ႉလႆႈၶၢႆႉပုတ်ႈၶႃႈဢေႃႈ၊ဝႃႈၼႆဢေႃႈ။

၁၅ ၶဝ်ၸိူဝ်းဢၼ်ၼင်ႈယူႇၵႃႈၼိူဝ်လုမ်းတင်းသဵင်ႈတင်းလူင်ၸိူဝ်းၼၼ်ႉၵေႃႈယႅၵ်ႉတူၺ်းၼႃႈမၼ်းၸေးၸေးၸွတ်ႇၸွတ်ႇလႄႈလႆႈႁၼ်ၼႃႈမၼ်းၼၼ်ႉပဵၼ်ၸိူဝ်ႉၼင်ႇၼႃႈတမၢၼ်ႇၵၢင်ႁၢဝ်ဝႆႉဢေႃႈ။