Shan Missions

၁၄

ဢႃႇပြမ်ႇၵႄႇသႄႇလေႃးတ

၁ မိူဝ်ႈၼၼ်ႉၶုၼ်လူင် ဢမ်ႇရေႇၽေႇလ မိူင်း သိၼႃႇၶုၼ်လူင် ဢႃႇရူတ်ႉ မိူင်း ဢေႇလႃႇသႃႇ၊ ၶုၼ်လူင်ၶေႇတေႃႇရႃႉလေႃႇမႃႇ မိူင်း ဢေႇလမ်ႇ၊ ၶုၼ်လူင် တိတလ မိူင်း ၵေႃႇဢႅမ်ႇ ၸိူဝ်းၼၼ်ႉ

၂ တိုၵ်းၵၼ်တင်းၶုၼ်လူင် ပေႇရ မိူင်း သေႃးတုင်ႇ၊ ၶုၼ်လူင် ၽိရသမိူင်း ၵေႃးမေႃးရ ၶုၼ်လူင် သိၼပ်ႉ မိူင်း ဢႃႇတမႃႇ၊ၶုၼ်လူင် သေႇမပႃႇ မိူင်း ၸေႇၽုဝ်ႇဢိမ်ႇ၊ ၶုၼ်လူင်ပေႇလႃႇ ၸိူဝ်းၼၼ်ႉဢေႃႈ။မိူင်း ပေႇလႃႇ ၸမ်း၊ ပဵၼ်မိူင်း ၸေႃႇရ ဢေႃႈ။

၃ ၶဝ်တင်းသဵင်ႈတင်းလူင်ၸိူဝ်းၼၼ်ႉၽွမ်ႉၵၼ်လႄႈၸူႉၵၼ်တုမ်ၵၼ်ၵႃႈၼႂ်းပၢင်ႇပဵင်း ၸိတ်ႉတိမ်ႇ ဢၼ်ပဵၼ်ၼမ်ႉၼွင် သေႃးတုင်ႇ ၼၼ်ႉဢေႃႈ။

၄ ၶဝ်ၶၢမ်ႇႁဵတ်းၶႃႈတီႈၶုၼ်လူင် ၶေႇတေႃႇရလေႃႇမႃႇ သိပ်းသွင်ပီႊတဵမ်တဵမ်သေယဝ်ႉ ၼႂ်းပီႊဢၼ်ထူၼ်ႈထိုင်သိပ်းသၢမ်ပီႊ ၼၼ်ႉၶဝ်ပုင်ႇၵၢၼ်ႇဢေႃႈ။

၅ ၼႂ်းပီႊဢၼ်ထူၼ်ႈထိုင်သိပ်းသီႇပီႊၼၼ်ႉၶုၼ်လူင် ၶေႇတေႃႇရလေႃႇမႃႇ ဢိၵ်ႇတင်းၶုၼ်လူင်ဢၼ်ယူႇၽၢႆႇမၼ်းၸိူဝ်းၼၼ်ႉ ဢွၼ်ၵၼ်မႃးတိုၵ်းတေႃးယႃႉပႅတ်ႈၵူၼ်း ရေႇၽိမ်ႇ ဢၼ်မီးယူႇၵႃႈၼႂ်းဝဵင်း ဢႃႇသႃႉတရူတ်ႉၵႃႇၼိမ်ႇ လႂ်၊ၵူၼ်းၸူႇၸိမ်ႇ ဢၼ်မီးယူႇၵႃႈၼႂ်းဝဵင်း ႁႃႇမ လႂ်၊ ၵူၼ်းဢေႇမိမ်ႇ ဢၼ်မီးယူႇၵႃႈၼႂ်းပၢင်ႇပဵင်း ၵိရယသိမ်ႇ လႂ်၊

၆ ၵူၼ်း ႁေႃႇရိ ဢၼ်မီးယူႇၵႃႈၼိူဝ်လွႆ ၸိရ လႂ်ၸိူဝ်းၼၼ်ႉလႄႈ လိုပ်ႈၸွမ်းလမ်းၸွမ်းတေႃႇထိုင်ႁွတ်ႈဝဵင်း ဢေႇလႃႇရပႃႇရၼ်ႇ ဢၼ်မီးၵႃႈတီႈႁိမ်းထိူၼ်ႇ ၼၼ်ႉဢေႃႈ။

၇ ၵမ်းၼၼ်ႉၶဝ်သမ်ႉၶိုၼ်းမႃးလႄႈႁွတ်ႈထိုင်ၵႃႈတီႈဝဵင်း ဢိၼ်ႇမိသပတ်ႉဢၼ်ပဵၼ်ဝဵင်း ၵႃႇတေႇသလႄႈတိုၵ်းတေႃးယႃႉပႅတ်ႈမိူင်း ဢႃႇမလိၵ်ႉ ၵႃႈမီးတင်းသဵင်ႈတင်းလူင်ဢိၵ်ႇတင်းၵူၼ်း ဢႃႇမေႃးရိ ဢၼ်ယူႇၵႃႈၼႂ်းဝဵင်း ႁႃႇၸၸုၼ်ႇတႃႇမ ၸိူဝ်းၼၼ်ႉဢေႃႈ။

၈ မိူဝ်ႈၼၼ်ႉၶုၼ်လူင်မိူင်း သေႃးတုင်ႇ၊ၶုၼ်လူင်မိူင်း ၵေႃးမေႃးရ၊ၶုၼ်လူင်မိူင်း ဢႃႇတမႃႇ၊ ၶုၼ်လူင်မိူင်းၸေႇၽူဝ်ႇဢိမ်ႇ၊ ၶုၼ်လူင်မိူင်း ပေႇလႃႇ ဢၼ်ဝႃႈမိူင်းၸေႃႇရၸိူဝ်းၼၼ်ႉဢွၼ်ၵၼ်ဢွၵ်ႇမႃးလႄႈ ၶဵင်ႇတိုၵ်း ၵၼ်ၵႃႈၼႂ်းပၢင်ႇပဵင်းၸိတ်ႉတိမ်ႇၼၼ်ႉဢေႃႈ။

၉ ၼင်ႇၼၼ်လႄႈၶုၼ်လူင် ၶေႇတေႃႇရလေႃႇမႃႇ မိူင်းဢေႇလၢမ်ႇၶုၼ်လူင် တိတလ မိူင်း ၵေႃႇဢိမ်ႇ၊ၶုၼ်လူင်ဢမ်ႇၽေႇလ မိူင်း သိၼႃႇ၊ၶုၼ်လူင် ဢႃႇရူတ်ႉ မိူင်းဢေႇလႃႇသႃႇ ဢၼ်ဝႃႈၶုၼ်လူင်သီႇပႃးၼၼ်ႉ ၶဵင်ႇ တိုၵ်းၵၼ်တင်းၶုၼ်လူင်ႁႃႈပႃးၼၼ်ႉဢေႃႈ။

၁၀ ၵႃႈတီႈပၢင်ႇပဵင်း ၸိတ်ႉတိမ်ႇ ၼၼ်ႉ မီးလုၵ်းမီးၶုမ်ၼမ်ၼႃႇဢၼ်တဵမ်ဝႆႉတင်းၵႆးတဝ်း ဢၼ်ပဵၼ်ၵႃႉပဵၼ်ယၢင်ႊမဵဝ်းၼိုင်ႈဢေႃႈ။ၶုၼ်လူင်မိူင်း သေႃးတုင်ႇ တင်းၶုၼ်လူင်မိူင်း ၵေႃးမေႃးရ ပႆလႄႈတူၵ်းသႂ်ႇၵႃႈၼႂ်းလုၵ်းၼႂ်းၶုမ်ၸိူဝ်းၼၼ်ႉဢေႃႈ။ ၶဝ်ၸိူဝ်းဢၼ်ၵိုတ်းဢၼ်ၵျၢၼ်ႇ ၸိူဝ်းၼၼ်ႉပၢႆၶိုၼ်ႈၵႃႈၼိူဝ်လွႆဢေႃႈ။

၁၁ ၶုၼ်ဢၼ်ပႄႉၼႅင်ႇၸိူဝ်းၼၼ်ႉ ဢွၼ်ၵၼ်ဢဝ်တၢင်းၵိၼ်တၢင်းၶူပ်းဢုၵ်ႉၸႃႇၶူဝ်းလဵင်းဢၼ်မီးၵႃႈၼႂ်းဝဵင်း သေႃးတုင်ႇတင်းဝဵင်းၵေႃး မေႃးရ ၵႃႈမီးတင်းသဵင်ႈတင်းလူင်ၵွႃႇဢေႃႈ။

၁၂လေႃးတ ဢၼ်ပဵၼ်လၢၼ်ၸၢႆး ဢႃႇပြမ်ႇ ဢၼ်ယူႇၵႃႈၼႂ်းဝဵင်း သေႃးတုင်ႇ ၼၼ်ႉၵေႃႈၶဝ်သိမ်းဢဝ်ၵွႃႇပႃးတင်းဢုၵ်ႉၸႃႇၶူဝ်းလဵင်းမၼ်းဢေႃႈ။

၁၃ ၵူၼ်းၵေႃႉၼိုင်ႈဢၼ်ပၢႆလွတ်ႈၽေးၼၼ်ႉမႃးၸူးၵႃႈတီႈ ဢႃႇပြမ်ႇၵူၼ်း ႁေႇပႄး ဢၼ်ယူႇၵႃႈၼႂ်းပႃႇတူၼ်ႈမႆႉၼိမ်မမ်ႇရေႇ၊ ဢၼ်ပဵၼ်ၵူၼ်း ဢႃႇမေႃႇရိ လႄႈပဵၼ်ပီႈဢၢႆႈဢေႇသၵေႃႇလ တင်း ဢႃႇၼေႇရ၊ ဢၼ်ႁဵတ်းမိၵ်ႉသႁႃႇယႃႉတၢင်းဢၼ်ထုၵ်ႇၵၼ်တင်း ဢႃႇပြမ်ႇ ၼၼ်ႉသေလႄႈ မွၵ်ႇလၢတ်ႈသတၢင်းသဵင်ၶၢဝ်ႇၼၼ်ႉဢေႃႈ။

၁၄ မိူဝ်ႈဢၼ် ဢႃႇပြမ်ႇ လႆႈငိၼ်းလွင်ႈဢၼ်ရၢၼ်ႇသူႇတီႉဢဝ်ပီႈၼွင်ႉမၼ်းၵွႃႇၼၼ်ႉ မၼ်းႁွင်ႉဢဝ်ၵူၼ်းသၢမ်ပၢၵ်ႇပၢႆသိပ်းပႅတ်ႇၵေႃႉ ဢၼ်ၵိူတ်ႇလဵင်ႉမႃးၵႃႈၼႂ်းႁိူၼ်းမၼ်းၼၼ်ႉလႄႈ လႆႈသင်ႇလႆႈသွၼ်ဝႆႉယဝ်ႉၸိူဝ်းၼၼ်ႉ၊ႁႂ်ႈလိုပ်ႈၸွမ်းလမ်းၸွမ်းၵွႃႇတေႃႇထိုင်ႁွတ်ႈဝဵင်း တၼ်ႇ ဢေႃႈ။

၁၅ ၶိင်ႇၵၢင်ၶိုၼ်းမၼ်းၽႄၵူၼ်းၶႂၢႆးၵူၼ်းၸိူဝ်းၼၼ်ႉလႄႈတိုၵ်းတေႃးယႃႉပႅတ်ႈၶဝ်သေယဝ်ႉ သမ်ႉလိုပ်ႈၸွမ်းလမ်းၸွမ်းၶဝ်ၵွႃႇတေႃႇထိုင်ႁွတ်ႈဝဵင်း ႁေႃႇၽဢၼ်မီးၵႃႈတီႈၽၢႆႇတၢင်းသၢႆႉဝဵင်း ထမ်ႇမသိတ်ႉ ၼၼ်ႉ ဢေႃႈ။

၁၆ မၼ်းသမ်ႉၶိုၼ်းဢဝ်ဢုၵ်ႉၸႃႇၶူဝ်းလဵင်းဢၼ်ၶဝ်သိမ်းဢဝ်ၵွႃႇၵႃႈမီးတင်းသဵင်ႈတင်းလူင် ဢိၵ်ႇတင်းၼွင်ႉၸၢႆးမၼ်း လေႃးတ တင်းဢုၵ်ႉၸႃႇၶူဝ်းလဵင်းမၼ်းတင်းၵူၼ်းယိင်းၵူၼ်းၸၢႆးၼမ်ၼႃႇၸိူဝ်းၼၼ်ႉ ၶိုၼ်းမႃးဢေႃႈ။

၁၇ မိူဝ်ႈဢၼ် ဢႃႇပြမ်ႇ လုၵ်ႉသေၵႃႈတီႈဢၼ်တိုၵ်းတေႃးယႃႉပႅတ်ႈၶုၼ်လူင် ၶေႇတေႃႇရလေႃႇမႃႇ ဢိၵ်ႇတင်းၶုၼ်လူင်တင်းလၢႆ ဢၼ်ယူႇၽၢႆႇမၼ်းၸိူဝ်းၼၼ်ႉသေလႄႈၶိုၼ်းမႃးၼၼ်ႉၸိုင် ၶုၼ်လူင်မိူင်း သေႃးတုင်ႇဢွၵ်ႇၵွႃႇၸူးၵႃႈတီႈပၢင်ႇႁူၺ်ႈ သႃႇဝေႇ ဢၼ်ပဵၼ်ပၢင်ႇႁူၺ်ႈၶုၼ်လူင်ၼၼ်ႉလႄႈ ႁႂ်ႈလႆႈႁပ်ႉ ႁူဝ်တၢင်း မၼ်းဢေႃႈ။

၁၈ ၶုၼ်လူင် မေႇလၶိၸေႇတိၵ်ႉ မိူင်း သႃႇလိမ်ႇ ဢၼ်ပဵၼ်ပရေႃးႁိၵ်ႉၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈၼၼ်ႉၵေႃႈပႃးဢဝ်ၶဝ်ႈမုၼ်းတင်းၼမ်ႉၸပိတ်ႉမႃးသေယဝ်ႉ၊ ပၼ်တၢင်းလီတီႈ ဢႃႇပြမ်ႇ လႄႈဝႃႈ၊-

၁၉ ႁႂ်ႈၽြႃးပဵၼ်ၸဝ်ႈဢၼ်သုင်မျၢတ်ႈၼႃႇသေပိူၼ်ႈ၊ ၸဝ်ႈၵၢင်ႁၢဝ်တင်းလိၼ်မိူင်းၼၼ်ႉပၼ်တၢင်းလီတီႈ ဢႃႇပြမ်ႇ သေၵမ်းလူၺ်ႈ။

၂၀ႁႂ်ႈၽြႃးပဵၼ်ၸဝ်ႈ ဢၼ်သုင်မျၢတ်ႈၼႃႇသေပိူၼ်ႈဢၼ် ဢဝ်ရၢၼ်ႇသူႇမႂ်း ဢၢပ်ႈပၼ်ၵႃႈၼႂ်းမိုဝ်းမႂ်းၼၼ်ႉမီးမင်ႇၵလႃႇသေၵမ်းလူၺ်ႈတီႈၶႃႈ ဝႃႈၼင်ႇၼႆဢေႃႈ။ဢႃႇပြမ်ႇ ၵေႃႈဢဝ်ၼႂ်းဢုၵ်ႉၸႃႇၶူဝ်းလဵင်းၵႃႈမီးတင်းသဵင်ႈတင်းလူင် သိပ်းပုၼ်ႊပုၼ်ႊၼိုင်ႈပၼ်တီႈၶုၼ် ၼၼ်ႉဢေႃႈ။

၂၁ ၶုၼ်လူင်မိူင်း သေႃးတုင်ႇ ၵေႃႈလၢတ်ႈတီႈ ဢႃႇပြမ်ႇ ဝႃႈ၊-ၶိုၼ်းပၼ်ၵူၼ်းၵဝ်ၸိူဝ်းၼၼ်ႉတီႈၵဝ်သေၵမ်း။ဢုၵ်ႉၸႃႇၶူဝ်းလဵင်းၸမ်း၊တူဝ်ၸဝ်ႈၵဝ်ႇဢဝ်သေၵမ်း၊မိူဝ်ႈဢၼ်ဝႃႈၼင်ႇၼႆၸိုင်၊ ဢႃႇပြမ်ႇ ၵေႃႈလၢတ်ႈတီႈၶုၼ်လူင်မိူင်း သေႃးတုင်ႇ ၼၼ်ႉလႄႈဝႃႈ၊-

၂၂ ၼင်ႇႁိုဝ်တၵ်းဢမ်ႇလႆႈမီးတီႈဢၼ်လၢတ်ႈဝႃႈ၊-ၶုၼ်လူင်ႁႂ်ႈ ဢႃႇပြမ်ႇ မၢၵ်ႈမီးယဝ်ႉဝႃႈၼင်ႇၼႆၸိုင်၊လိူဝ်သေ လွင်ႈတၢင်းဢၼ်ၵူၼ်းၼုမ်ႇၵူၼ်းၵမ်တင်းလၢႆၵိၼ်ယဝ်ႉ ဢိၵ်ႇတင်းဢၼ်ပဵၼ်ပုၼ်ႈပဵၼ်တႃႇၶဝ် ၸိူဝ်းဢၼ်ၸွမ်းလူၺ်ႈၵဝ်ၼၼ်ႉၵူၺ်း

၂၃ ဢုၵ်ႉၸႃႇၶူဝ်းလဵင်းၶုၼ်လူင်မႆသဵၼ်ႈၼိုင်ႈ၊ သၢႆၶႅပ်းတိၼ်သဵၼ်ႈၼိုင်ႈၵေႃႈ ၵဝ်ၶႃႈဢမ်ႇဢဝ်သေၸိူဝ်ႉသေပိူင်၊ ဝႃႈၼႆ၊ ၵဝ်ၶႃႈယုၵ်ႉမိုဝ်းၵႃႈတီႈၽၢႆႇၼႃႈထႃႇဝရႃႉၽြႃး ၽြႃးပဵၼ်ၸဝ်ႈ ဢၼ်သုင်မျၢတ်ႈၼႃႇသေပိူၼ်ႈၸဝ်ႈၵၢင်ႁၢဝ် တင်းလိၼ်မိူင်းၼၼ်ႉလႄႈႁဵတ်းတိၵ်ႉထၢၼ်ႇယဝ်ႉ။

၂၄ ႁႂ်ႈဢႃႇၼေႇရ၊ ဢေႇသၵေႃႇလ၊ မမ်ႇရေႇ၊ ၶဝ်လႆႈဢဝ်ပုၼ်ႈတႃႇၶဝ်သေၵမ်း၊ဝႃႈၼင်ႇၼႆဢေႃႈ။