Shan Missions

မၢတ်ႈထႄႇ

Chapter   ၁     ၂     ၃     ၄     ၅     ၆     ၇     ၈     ၉     ၁၀     ၁၁     ၁၂     ၁၃     ၁၄     ၁၅     ၁၆     ၁၇     ၁၈     ၁၉     ၂၀     ၂၁     ၂၂     ၂၃     ၂၄     ၂၅     ၂၆     ၂၇     ၂၈ 

၂၆

ၵျၢမ်ႇႁႃတီႉဢဝ်ၸဝ်ႈယေႇသု

၁ ၸဝ်ႈယေႇသုႁေႃးလၢတ်ႈတေႇသၼႃႇတင်းသဵင်ႈတင်းမူတ်းသေယဝ်ႉလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊-

၂ သူႁူႉလွင်ႈဢၼ်ဝႃႈပေႃးပူၼ်ႉသေသွင်ဝၼ်းယဝ်ႉၸိုင်တၵ်းႁွတ်ႈထိုင်ဝၼ်းပွႆးပႃသၶႃႇၼၼ်ႉယူႇဢေႃႈ။ မိူဝ်ႈၼၼ်ႉလုၵ်ႈၵူၼ်းတၵ်းၶၢမ်ႇတၢင်းဢၼ်ဢၢပ်ႈႁႂ်ႈလႆႈၶၢမ်ႇတၢင်းဢၼ်ဢဝ်တွၵ်ႇဝႆႉၵႃႈၼိူဝ်သဝ်လၵ်းဝႃးမိုဝ်းဢေႃႈ၊ဝႃႈၼင်ႇၼႆဢေႃႈ။ 

၃ မိူဝ်ႈၼၼ်ႉယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆၸူႉၵၼ်တုမ်ၵၼ်ၵႃႈၼႂ်းတလၢင်းၵႄႈႁိူၼ်းၶုၼ်ယိတ်ႉပရေႃးႁိၵ်ႈဢၼ်လႆႈႁွင်ႉႁဵၵ်ႈၸိုဝ်ၵႃႇယႃႇၽၼၼ်ႉသေယဝ်ႉ

၄ တိူင်ႇပၢင်ႇၵၼ်ႁႂ်ႈလႆႈႁဵတ်းပရိယႄႇတီႉဢဝ်ၸဝ်ႈယေႇသုလႄႈဢဝ်တၢႆဢေႃႈ။ 

၅ ၼႂ်းဝႃႈၼၼ်သေၵေႃႈၶဝ်လၢတ်ႈၵၼ်လႄႈဝႃႈၵူဝ်ၵူၼ်းတင်းလၢႆတၵ်းတူင်ႉတၵ်းတိုၼ်ႇၼႂ်းပွႆးလႄႈယႃႇပေၽူမ်ႈႁဵတ်းလူးၵွၼ်ႇ၊ဝႃႈၼင်ႇၼႆဢေႃႈ။ 

ၸဝ်ႈယေႇသုလႆႈၶၢမ်ႇဢဝ်ၽိၵ်ႉသိၵ်ႈ

၆ ၼႂ်းမိူဝ်ႈဢၼ်ၸဝ်ႈယေႇသုမီးယူႇၼႂ်းဝၢၼ်ႈပေႇထၼိတီႈႁိူၼ်းၵူၼ်းတုတ်ႈဢၼ်လႆႈၸိုဝ်သိမုၼ်ႇၼၼ်ႉမႄႈယိင်းၵေႃႉၼိုင်ႈဢဝ်တဝ်ႈၼမ်ႉႁွမ်မၢၵ်ႇႁိၼ်ၽိူၵ်ႇတဝ်ႈၼိုင်ႈဢၼ်ထိူၵ်ႈၵႃႊယႂ်ႇၼႃႇၼၼ်ႉမႃးတီႈမၼ်းၸဝ်ႈလႄႈ

၇ ဢဝ်ၼမ်ႉႁွမ်ထွၵ်ႇသႂ်ႇၵႃႈၼိူဝ်ႁူဝ်မၼ်းၸဝ်ႈၼႂ်းမိူဝ်ႈဢၼ်မၼ်းၸဝ်ႈၼင်ႈယူႇၵႃႈႁိမ်းၽိူၼ်တီႈၵိၼ်ၼၼ်ႉဢေႃႈ။ 

၈ တပႄးၸဝ်ႈတင်းလၢႆႁၼ်သေယဝ်ႉ၊ၸႂ်မႆႈၶႂ်ႈၸႃႉၼႃႇလူင်လၢင်လႄႈလၢတ်ႈဝႃႈ၊-

၉ ႁဵတ်းသင်လႄႈႁႂ်ႈသုမ်းပႅတ်ႈလၢႆလၢႆ။ ၼမ်ႉႁွမ်ၼႆႉထုၵ်ႇလီၶၢႆဢဝ်ၵႃႊမၼ်းၶၼ်မၼ်းယႂ်ႇၼမ်သေလႄႈပၼ်တီႈၶဝ်ၸိူဝ်းဢၼ်ယၢၵ်ႈၽၢၼ်တင်းလၢႆၸိူဝ်းၼၼ်ႉဢိူဝ်ႈ၊ဝႃႈၼင်ႇၼႆဢေႃႈ။ 

၁၀ ၸဝ်ႈယေႇသုႁူႉႁၼ်သေယဝ်ႉလၢတ်ႈလႄႈဝႃႈ၊-

၁၁ ႁဵတ်းသင်လႄႈသူယႃႉယူၵ်ႉမႄႈယိင်းၼႆႉၸိူဝ်ႉၼႆ။ မၼ်းႁဵတ်းလွင်ႈတၢင်းဢၼ်လီဢၼ်ငၢမ်းတီႈၵဝ်ယဝ်ႉ။ ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉမီးယူႇတီႈသူတႃႇသေႇယူႇဢေႃႈ။ 

၁၂ ၵဝ်ၸမ်းမီးယူႇတီႈသူတႃႇသေႇဢမ်ႇၸႂ်ႈ။ လွင်ႈဢၼ်မၼ်းထွၵ်ႇၼမ်ႉႁွမ်သႂ်ႇၵႃႈၼိူဝ်တူဝ်ၵဝ်ၼႆႉၸမ်းမၼ်းႁဵတ်းႁႂ်ႈလႆႈမႄးႁႅၼ်းဝႆႉပုၼ်ႈဢၼ်တၵ်းသၢင်းၵျူဝ်ႇၵဝ်ၼၼ်ႉဢေႃႈ။ 

၁၃ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၼႂ်းတၢင်းဢၼ်ႁေႃးလၢတ်ႈတြႃးသတၢင်းသိူဝ်းပျေႃႇၵႃႈၼိူဝ်လိၼ်မိူင်းၵူႈတီႈၵူႈလႅၼ်ၼၼ်ႉတၵ်းလႆႈမွၵ်ႇလၢတ်ႈလွင်ႈဢၼ်မၼ်းႁဵတ်းၼႆႉပုၼ်ႈတၵ်းၶုၵ်းၸႂ်လႆႈၶႆႈၸႂ်ထူပ်းမၼ်းဢေႃႈ၊ဝႃႈၼင်ႇၼႆဢေႃႈ။ 

ယုတဢိသၵႃႇရေႇဢုတ်ႉလႆႈၸႂ်ဢဝ်ၸဝ်ႈယေႇသုဢၢပ်ႈ

၁၄ မိူဝ်ႈၼၼ်ႉတပႄးၸဝ်ႈပႃးၼိုင်ႈဢၼ်ၶဝ်ႈပႃးၼႂ်းသိပ်းသွင်ပႃးဢၼ်လႆႈႁွင်ႉႁိၵ်ႈၸိုဝ်ယုတဢိသၵႃႇရေႇဢုတ်ႉၼၼ်ႉၵႂႃႇၵႃႈတီႈယိတ်ႉပရေႃးႁိၵ်ႈလူင်တင်းလၢႆသေလႄႈလဝ်လၢတ်ႈလႄႈဝႃႈ၊-

၁၅ ပေႃးၵဝ်ၶႃႈဢဝ်မၼ်းၸဝ်ႈဢၢပ်ႈပၼ်ၼႂ်းမိုဝ်းသူၸိုင်သူတၵ်းပၼ်ၵဝ်ၶႃႈၵႃႊႁိုဝ်ၶႃႈ၊ဝႃႈၼင်ႇၼႆလႄႈၶဝ်ၵေႃႈႁိဝ်ႈငိုၼ်းသၢမ်သိပ်းၶႅပ်းပၼ်ဢေႃႈ။ 

၁၆ ၸႃႉၸဵမ်ဢဝ်မိူဝ်ႈၼၼ်ႉၵႂႃႇမၼ်းႁႃၶိင်ႇၵႃႇလႃႉဢၼ်ထုၵ်ႇတႃႇတေလႆႈဢဝ်မၼ်းၸဝ်ႈဢၢပ်ႈဢေႃႈ။ 

ပွႆးပႃသၶႃႇ

၁၇ ဝၼ်းပထမဝၼ်းပွႆးၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈၼၼ်ႉတပႄးၸဝ်ႈတင်းလၢႆသုတ်ႉၸပ်းသုတ်ႉၸူးတီႈမၼ်းၸဝ်ႈသေလႄႈလဝ်ထၢမ်လႄႈဝႃႈ၊-ၸဝ်ႈႁဝ်ႈမီးဢလူဝ်ႇၶႂ်ႈႁႂ်ႈႁဝ်းၶႃႈမႄးႁႅၼ်းပုၼ်ႈဢၼ်ၸဝ်ႈႁဝ်းတၵ်းလႆႈၵိၼ်ပွႆးပႃသၶႃႇၼၼ်ႉၵႃႈတီႈလႂ်ၶႃႈ၊မိူဝ်ႈဢၼ်ဝႃႈၼင်ႇၼႆၸိုင်၊မၼ်းၸဝ်ႈၵေႃႈလၢတ်ႈလႄႈဝႃႈ၊-

၁၈ ၵႂႃႇၵႃႈၼႂ်းဝဵင်းၸူးၵႃႈတီႈႁိူၼ်းၵေႃႉၼိုင်ႈလႄႈလၢတ်ႈတီႈၵေႃႉၼၼ်ႉလႄႈဝႃႈသြႃႇၸဝ်ႈသင်ႇလၢတ်ႈဝႃႈ၊-ၶိင်ႇၵဝ်ၸမ်မႃးယဝ်ႉ။ ၵဝ်ဢိၵ်ႇတင်းတပႄးၵဝ်တင်းလၢႆတၵ်းၶၢမ်ႇပွႆးပႃသၶႃႇၵႃႈတီႈၼႂ်းႁိူၼ်းမႂ်းၼႆႉဢေႃႈဝႃႈၼင်ႇၼႆတႃႉ၊ဝႃႈၼင်ႇၼႆဢေႃႈ။ 

၁၉ တပႄးၸဝ်ႈၸိူဝ်းၼၼ်ႉၵေႃႈႁဵတ်းၸွမ်းၵႃႈၼင်ႇဢၼ်မၼ်းၸဝ်ႈၸီႇယၢင်ႇသင်ႇလၢတ်ႈၼၼ်ႉလႄႈမႄးႁႅၼ်းပွႆးပႃသၶႃႇဢေႃႈ။ 

၂၀ မိူဝ်ႈဢၼ်ႁွတ်ႈထိုင်ၶိင်ႇႁူဝ်ၶမ်ႈမၼ်းၸဝ်ႈဢိၵ်ႇတင်းတပႄးၸဝ်ႈသိပ်းသွင်ပႃးယင်းတိုၵ်ႉၵိၼ်ယူႇၼၼ်ႉၸိုင်မၼ်းၸဝ်ႈလၢတ်ႈလႄႈဝႃႈ၊-

၂၁ ၵဝ်ဝႃႈတီႈၸိုဝ်ႈတီႈၸႂ်ႈၸမ်းၼႂ်းသူၼႆႉၵေႃႉၼိုင်ႈတၵ်းဢဝ်ၵဝ်ဢၢပ်ႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၼၼ်ႉၸႂ်လဵၵ်ႉၸႂ်ဢူၼ်ႈၼႃႇလူင်လၢင်လႄႈလဝ်ထၢမ်ႁင်းၽႂ်ႁင်းမၼ်းလႄႈဝႃႈ၊-

၂၂ ၸဝ်ႈႁဝ်း၊ပဵၼ်ၵဝ်ၶႃႈၶႃႈႁိုဝ်၊ဝႃႈၼင်ႇၼႆဢေႃႈ။ မၼ်းၸဝ်ႈၵေႃႈၶိုၼ်းလၢတ်ႈလႄႈဝႃႈ၊-

၂၃ ၵေႃႉဢၼ်ဢဝ်မိုဝ်းၸူၵ်းၵႃႈၼႂ်းဝၢၼ်ႇႁူမ်ႈၵၼ်တင်းၵဝ်ၼၼ်ႉတၵ်းဢဝ်ၵဝ်ဢၢပ်ႈဢေႃႈ။ 

၂၄ လုၵ်ႈၵူၼ်းတၵ်းလႆႈၵႂႃႇၵႃႈၼင်ႇဢၼ်မႃးၼႂ်းၵျၢမ်းလိၵ်ႈၼၼ်ႉဢေႃႈ။ ၼႂ်းဝႃႈၼၼ်သေၵေႃႈၵေႃႉဢၼ်ဢဝ်လုၵ်ႈၵူၼ်းဢၢပ်ႈၼၼ်ႉမီးဢႃႉမင်ႇၵလႃႇဢေႃႈ။ 

၂၅ ပေႃးၵေႃႉၼၼ်ႉဢမ်ႇလႆႈၶၢမ်ႇတၢင်းဢၼ်ၵိူတ်ႇလဵင်ႉမႃးၸိုင်ယဵင်ႈၶႅၼ်းတၵ်းလီဢေႃႈ၊ဝႃႈၼင်ႇၼႆဢေႃႈ။ ယုတဢိသၵႃႇရေႇဢုတ်ႉဢၼ်တၵ်းဢဝ်မၼ်းၸဝ်ႈဢၢပ်ႈၼၼ်ႉၵေႃႈလဝ်ထၢမ်လႄႈဝႃႈ၊-ၸဝ်ႈႁဝ်း၊ပဵၼ်ၵဝ်ၶႃႈၶႃႈႁိုဝ်၊မိူဝ်ႈဢၼ်ဝႃႈၼင်ႇၼႆၼၼ်ႉမၼ်းၸဝ်ႈၵေႃႈလၢတ်ႈလႄႈဝႃႈ၊-မႅၼ်ႈၼင်ႇဢၼ်မႂ်းလၢတ်ႈၼႆႉယဝ်ႉ၊ဝႃႈၼင်ႇၼႆဢေႃႈ။ 

၂၆ ၼႂ်းမိူဝ်ႈဢၼ်ၶဝ်ယင်းတိုၵ်ႉၵိၼ်ယူႇၼၼ်ႉၸိုင်ၸဝ်ႈယေႇသုဢဝ်ၶဝ်ႈမုၼ်းလႄႈယွင်ႈယေႃးၵျေးၸူးၸဝ်ႈယဝ်ႉၸင်ႇမိတ်းၶဝ်ႈမုၼ်းပၼ်တီႈတပႄးၸဝ်ႈတင်းလၢႆလႄႈဝႃႈ၊-ၶဝ်ႈမုၼ်းၼႆႉၸမ်းပဵၼ်တူဝ်ၵဝ်ဢေႃႈ။ 

၂၇ ဢွၼ်ၵၼ်ဢဝ်လႄႈၵိၼ်တႃႉ၊ဝႃႈၼင်ႇၼႆဢေႃႈ။ ၵွၵ်းၵေႃႈမၼ်းၸဝ်ႈဢဝ်လႄႈယွင်ႈယေႃးၵျေးၸူးၸဝ်ႈယဝ်ႉၸင်ႇပၼ်တီႈၶဝ်လႄႈဝႃႈ၊-သူၵႃႈမီးတင်းသဵင်ႈတင်းလူင်ဢွၼ်ၵၼ်ၵိၼ်တႃႉ။ 

၂၈ ၵွၵ်းၼႆႉၸမ်းပဵၼ်လိူတ်ႈၵဝ်ဢၼ်ၸၢပ်ႈသႅင်ႇၵၼ်တင်းပတိၺိၺ်ႇတြႃးဢၼ်မႂ်ႇဢၼ်သွၼ်းလေႃႇပုၼ်ႈလွင်ႈၼင်ႇႁိုဝ်တၵ်းလႆႈပွႆႇလွတ်ႈဢပျႅတ်ႈၵူၼ်းၼမ်ၼႃႇဢေႃႈ။ 

၂၉ ၵဝ်ဝႃႈတီႈသူၸမ်းၵဝ်တၵ်းဢမ်ႇၵိၼ်ၼမ်ႉၸပိတ်ႉၼႆႉၸႃႉၸဵမ်တေႃႈလဵဝ်ၼႆႉတေႃႇထိုင်ႁွတ်ႈဝၼ်းဢၼ်ၵဝ်တၵ်းၵိၼ်မဵဝ်းဢၼ်မႂ်ႇလူၺ်ႈၵၼ်တင်းသူၼႂ်းမိူင်းပေႃႈၵဝ်ပုၼ်ႉ၊ဝႃႈၼင်ႇၼႆဢေႃႈ။ 

၃၀ လိုၼ်းၼၼ်ႉၶဝ်ႁဵတ်းၵႂၢမ်းယဝ်ႉၸင်ႇဢွၵ်ႇၵႂႃႇၸူးၵႃႈတီႈလွႆသၼ်ႇလုၼ်ႇပုၼ်ႉသေဢေႃႈ။ 

လွင်ႈဢၼ်ပေႇတရုတၵ်းထဵင်ပႅတ်ႈၸဝ်ႈယေႇသု

၃၁ မိူဝ်ႈၼၼ်ႉၸဝ်ႈယေႇသုလၢတ်ႈလႄႈဝႃႈ၊-ၼႂ်းၶိုၼ်းၼႆႉသူၵႃႈမီးတင်းသဵင်ႈတင်းလူင်ၸႂ်တၵ်းလူႉၵွပ်ႈပိူဝ်ႈၵဝ်ဢေႃႈ။ လွင်ႈဢၼ်တႅမ်ႈဝႆႉၼႂ်းၵျၢမ်းလိၵ်ႈလႄႈဝႃႈၸမ်း၊-ၵဝ်တၵ်းပေႃႉယႅၼ်ႉၵေႃႉဢၼ်လဵင်ႉဢၼ်ထိင်းသူဝ်းၼၼ်ႉတၢႆလႄႈသူဝ်းတင်းလၢႆၵေႃႈတၵ်းလႆႈၽၢတ်ႇၽႄၵၼ်ဢေႃႈ၊ဝႃႈၼႆမီးမႃးၼင်ႇၼႆဢေႃႈ။ 

၃၂ ၼႂ်းဝႃႈၼၼ်သေၵေႃႈဝၢႆးသေၵဝ်လုၵ်ႉၶိုၼ်းယဝ်ႉၵဝ်တၵ်းၵႂႃႇၵႃႈတီႈမိူင်းၵႃႇလိလႄးပုၼ်ႉဢွၼ်တၢင်းသူဢေႃႈ၊ဝႃႈၼင်ႇၼႆဢေႃႈ။ 

၃၃ ပေႇတရုၵေႃႈၶိုၼ်းလဝ်လၢတ်ႈလႄႈဝႃႈ၊-ၵွပ်ႈပိူဝ်ႈၸဝ်ႈႁဝ်းလႄႈပဵၵ်ႉသမ်ႉၶဝ်ၸိူဝ်းၼႆႉတင်းသဵင်ႈတင်းလူင်ၸႂ်တၵ်းလူႉသေၵေႃႈၵဝ်ၶႃႈၸႂ်တၵ်းဢမ်ႇလူႉသေဢိတ်းၶႃႈ၊ဝႃႈၼင်ႇၼႆဢေႃႈ။ 

၃၄ ၸဝ်ႈယေႇသုၵေႃႈလၢတ်ႈလႄႈဝႃႈ၊-ၵဝ်ဝႃႈတီႈၸိုဝ်ႈတီႈၸႂ်ႈၸမ်းၼႂ်းၶိုၼ်းၼႆႉၸူဝ်ႈဢၼ်ၵႆႇဢမ်ႇပႆႇၶၼ်ၼၼ်ႉမႂ်းတၵ်းထဵင်ပႅတ်ႈၵဝ်ထူၼ်ႈထိုင်သၢမ်ပွၵ်ႈဢေႃႈ၊မိူဝ်ႈဢၼ်ဝႃႈၼင်ႇၼႆၸိုင်ပေႇတရုၵေႃႈလဝ်လၢတ်ႈလႄႈဝႃႈ၊-

၃၅ ပဵၵ်ႉသမ်ႉၵဝ်ၶႃႈလႆႈတၢႆလူၺ်ႈၵၼ်တင်းၸဝ်ႈႁဝ်းသေၵေႃႈၵဝ်ၶႃႈတၵ်းဢမ်ႇထဵင်ပႅတ်ႈၸဝ်ႈႁဝ်းၶႃႈ၊ဝႃႈၼင်ႇၼႆဢေႃႈ။ တပႄးၸဝ်ႈတင်းသဵင်ႈတင်းလူင်ၵေႃႈလဝ်လၢတ်ႈမိူၼ်မိူၼ်ၵၼ်ဢေႃႈ။ 

၃၆ ၸဝ်ႈယေႇသုဢိၵ်ႇတင်းၶဝ်ၸိူဝ်းၼၼ်ႉမိူဝ်ႈဢၼ်ႁွတ်ႈထိုင်ၵႃႈတီႈဢၼ်လႆႈႁွင်ႉႁိၵ်ႈၸိုဝ်ၵေႇသသေႇမၼိၼၼ်ႉမၼ်းၸဝ်ႈလၢတ်ႈတီႈတပႄးၸဝ်ႈတင်းလၢႆလႄႈဝႃႈ၊-ၼႂ်းမိူဝ်ႈဢၼ်ၵဝ်ၵႂႃႇၵႃႈတီႈပုၼ်ႉလႄႈသူးတွင်းယူႇၼၼ်ႉၸိုင်ပႂ်ႉယူႇၵႃႈတီႈၼႆႉတႃႉ၊ဝႃႈၼင်ႇၼႆသေယဝ်ႉ၊

၃၇ မၼ်းၸဝ်ႈႁွင်ႉဢဝ်ပေႇတရုတင်းလုၵ်ႈၸၢႆးၸေႇပေႇတေးသွင်ၵေႃႉၵႂႃႇဢေႃႈ။ မၼ်းၸဝ်ႈႁွတ်ႈထိုင်တၢင်းဢၼ်ၸႂ်ၼၵ်းၸႂ်ၼႃယၢပ်ႇၸႂ်ၵိၼ်းၸႂ်ၼႃႇလူင်လၢင်ဢေႃႈ။ 

၃၈ မိူဝ်ႈၼၼ်ႉမၼ်းၸဝ်ႈလၢတ်ႈတီႈၶဝ်လႄႈဝႃႈ၊-ၵဝ်ၼႆႉႁူဝ်ၸႂ်လဵၵ်ႉၼႃႇထၼ်ႈပေႃးၸမ်တၵ်းတၢႆဢေႃႈ။ ယူႇၵႃႈတီႈၼႆႉလႄႈပႂ်ႉထႃႈလူၺ်ႈၵၼ်တင်းၵဝ်တႃႉ၊ဝႃႈၼင်ႇၼႆဢေႃႈ။ 

၃၉ မၼ်းၸဝ်ႈပူၼ်ႉသေၵႃႈတီႈၼၼ်ႉၵႂႃႇဢိတ်းဢွၼ်ႇၼိုင်ႈသေယဝ်ႉၶုပ်ႉမူပ်ႇလႄႈသူးတွင်းဝႃႈ၊-ဢူဝ်း၊ပေႃႈၵဝ်ၶႃႈ၊ပေႃးၵွၵ်းၼႆႉပိူင်ႈသေၵဝ်ၶႃႈၵႂႃႇလႆႈၸိုင်ႁႂ်ႈပိူင်ႈသေၵမ်းတီႈၶႃႈ။ ၼႂ်းဝႃႈၼၼ်သေၵေႃႈယႃႇႁႂ်ႈလႆႈပဵၼ်ၸွမ်းဢလူဝ်ႇၵဝ်ၶႃႈသေၵမ်းတီႈၶႃႈ။ ႁႂ်ႈပဵၼ်ၸွမ်းၵႃႈၼင်ႇဢၼ်ဢလူဝ်ႇၸဝ်ႈႁဝ်းမီးၼၼ်ႉသေၵမ်းတီႈၶႃႈ၊ဝႃႈၼင်ႇၼႆဢေႃႈ။ 

၄၀ မၼ်းၸဝ်ႈၶိုၼ်းမႃးၵႃႈတီႈတပႄးၸဝ်ႈၸိူဝ်းၼၼ်ႉလႄႈလႆႈထူပ်းႁၼ်ၶဝ်ၼွၼ်းလပ်းယူႇဢေႃႈ။ မၼ်းၸဝ်ႈလၢတ်ႈတီႈပေႇတရုလႄႈဝႃႈ၊-ၼင်ႇႁိုဝ်တၵ်းလႆႈပႂ်ႉယူႇလူၺ်ႈၵၼ်တင်းၵဝ်ၼႃႇရီႇၼိုင်ႈၵူၺ်းၸိုင်သူဢမ်ႇတၢတ်ႈၼိုင်ႇလႆႈႁိုဝ်။ 

၄၁ လွင်ႈၼင်ႇႁိုဝ်တၵ်းဢမ်ႇလႆႈၶၢမ်ႇတၢင်းဢၼ်ၸၢမ်းတူၺ်းယႃႉယူၵ်ႉၼၼ်ႉသူးတွင်းလႄႈပႂ်ႉထႃႈယူႇတႃႉ။ ပဵၵ်ႉသမ်ႉၸႂ်ဝိၺိၺ်ႇမီးၸေႇတၼႃႇသေၵေႃႈတူဝ်ၸမ်းဢမ်ႇမီးႁႅင်း၊ဝႃႈၼႆယဝ်ႉၸင်ႇသမ်ႉၵႂႃႇထႅင်ႈၵမ်းၼိုင်ႈလႄႈသူးတွင်းလႄႈဝႃႈ၊-

၄၂ ဢူဝ်းပေႃႈၵဝ်ၶႃႈ၊ပေႃးၵဝ်ၶႃႈဢမ်ႇၵိၼ်ႈပေႃးၵွၵ်းၼႆႉဢမ်ႇပိူင်ႈသေၵဝ်ၶႃႈလႆႈဝႃႈၼႆၸိုင်ႁႂ်ႈပဵၼ်ၸွမ်းၵႃႈၼင်ႇဢၼ်ဢလူဝ်ႇၸဝ်ႈႁဝ်းမီးၼၼ်ႉသေၵမ်းတီႈၶႃႈ၊ဝႃႈၼင်ႇၼႆဢေႃႈ။ 

၄၃ လိုၼ်းၼၼ်ႉမၼ်းၸဝ်ႈသမ်ႉၶိုၼ်းမႃးၵႃႈတီႈဢၼ်ၶဝ်မီးၼၼ်ႉသေယဝ်ႉထူပ်းႁၼ်ၶဝ်ၼွၼ်းလပ်းယူႇၵွပ်ႈပိူဝ်ႈဢၼ်မၢၵ်ႇတႃၶဝ်ၼၵ်းၼႃႇလူင်လၢင်ၼၼ်ႉလႄႈ

၄၄ မၼ်းၸဝ်ႈပႅတ်ႈၶဝ်ဝႆႉသေယဝ်ႉသမ်ႉၵႂႃႇထႅင်ႈပွၵ်ႈတတိယယဝ်ႉၸင်ႇသူးတွင်းၸိူဝ်ႉၼင်ႇၵမ်းဢွၼ်တၢင်းၼၼ်ႉဢေႃႈ။ 

၄၅ လိုၼ်းၼၼ်ႉမၼ်းၸဝ်ႈသမ်ႉၶိုၼ်းမႃးတီႈဢၼ်တပႄးၸဝ်ႈတင်းလၢႆမီးၼၼ်ႉလႄႈဝႃႈ၊-မိူဝ်ႈလဵဝ်ၼႆႉသူယင်းၼွၼ်းလပ်းယူႇၼိမ်ၼိမ်ႁိုဝ်း။ တူၺ်းလူႊ။ ၶိင်ႇၼႃႇရီႇၸမ်မႃးယဝ်ႉ။ လုၵ်ႈၵူၼ်းတၵ်းၶၢမ်ႇတၢင်းဢၼ်ဢၢပ်ႈၼႂ်းမိုဝ်းၵူၼ်းႁၢႆႉတင်းလၢႆယဝ်ႉ။ 

၄၆ ဢွၼ်ၵၼ်လုၵ်ႉတႃႉ။ ၵႂႃႇတႃႉႁဝ်း။ ၵေႃႉဢၼ်တၵ်းဢဝ်ၵဝ်ဢၢပ်ႈၼၼ်ႉႁွတ်ႈမႃးယဝ်ႉ၊ဝႃႈၼင်ႇၼႆဢေႃႈ။ 

ၸဝ်ႈယေႇသုၶၢမ်ႇတၢင်းဢၼ်တီႉဢဝ်

၄၇ ၼႂ်းမိူဝ်ႈဢၼ်မၼ်းၸဝ်ႈလၢတ်ႈၸိူဝ်ႉၼင်ႇၼၼ်ယူႇၼၼ်ႉၸိုင်ယုတဢိသၵႃႇရေႇဢုတ်ႉၵေႃႉဢၼ်ၶဝ်ႈပႃးၼႂ်းတပႄးၸဝ်ႈသိပ်းသွင်ပႃးၼၼ်ႉႁွင်ႉဢဝ်ၵူၼ်းၸူႉၵူၼ်းတုမ်ဢၼ်ယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆပွႆႇၸႂ်ႉမႃးၸိူဝ်းၼၼ်ႉပႃးတင်းၶွၼ်ႉတင်းလၢပ်ႇလႄႈမႃးဢေႃႈ။ 

၄၈ ၵေႃႉဢၼ်ဢဝ်မၼ်းၸဝ်ႈဢၢပ်ႈၼၼ်ႉႁဵတ်းတီႈမၢတ်ႈတီႈတွင်းဝႆႉတီႈၶဝ်လႄႈဝႃႈ၊-ၵေႃႉဢၼ်ၵဝ်ၸုပ်ႇၼူမ်ၼၼ်ႉပဵၼ်မၼ်းယဝ်ႉ။ တီႉဢဝ်မၼ်းတႃႉ၊ဝႃႈၼႆသေယဝ်ႉမၼ်းသုတ်ႉၸပ်းသုတ်ႉၸူးတီႈၸဝ်ႈယေႇသုၵမ်းလဵဝ်လႄႈဝႃႈ၊-

၄၉ ၸဝ်ႈႁဝ်း၊ႁႂ်ႈမီးမင်ႇမီႈၵလႃႇသေၵမ်းၶႃႈ၊ဝႃႈၼႆယဝ်ႉၸင်ႇၸုပ်ႇၼူမ်မၼ်းၸဝ်ႈဢေႃႈ။ 

၅၀ ၸဝ်ႈယေႇသုၵေႃႈထၢမ်လႄႈဝႃႈ၊-ပီႈၼွင်ႉဢိူၺ်း၊ၵွပ်ႈပိူဝ်ႈလွင်ႈတၢင်းၸိူဝ်ႉၼင်ႇႁိုဝ်လႄႈမႃး၊မိူဝ်ႈဢၼ်ဝႃႈၼင်ႇၼႆၸိုင်ၶဝ်ၸိူဝ်းၼၼ်ႉၵေႃႈမႃးလႄႈယိပ်းၵမ်တီႉဢဝ်မၼ်းၸဝ်ႈဢေႃႈ။ 

၅၁ မိူဝ်ႈၼၼ်ႉၵူၼ်းဢၼ်ပႃးလူၺ်ႈၵၼ်တင်းၸဝ်ႈယေႇသုၼၼ်ႉၵေႃႉၼိုင်ႈထွတ်ႇဢဝ်လၢပ်ႇမၼ်းဢွၵ်ႇယဝ်ႉၸင်ႇၼ်းၶႃႈယိတ်ႉပရေႃးႁိၵ်ႈၵေႃႉၼိုင်ႈလႄႈဝၢၼ်ႇႁူမၼ်းၶၢတ်ႇတူၵ်းၵႂႃႇဢေႃႈ။ 

၅၂ ၸဝ်ႈယေႇသုၵေႃႈလၢတ်ႈလႄႈဝႃႈ၊-ဢဝ်လၢပ်ႇမႂ်းၶိုၼ်းသႂ်ႇဝႆႉၼႂ်းၽၵ်းမၼ်းတႃႉ။ ၶဝ်ၸိူဝ်းဢၼ်ယိပ်းၵမ်လၢပ်ႇတင်းသဵင်ႈတင်းလူင်ၼၼ်ႉတၵ်းႁွတ်ႈထိုင်တၢင်းလူႉတၢင်းလဵဝ်ၵႂပ်ႈလၢပ်ႇဢေႃႈ။ 

၅၃ မႂ်းထၢင်ႇၵဝ်ဢမ်ႇတတ်ႈၼိုင်ႇလႆႈႁႂ်ႈလႆႈယွၼ်းဢဝ်တီႈပေႃႈၵဝ်လႄႈမၼ်းၸဝ်ႈတၵ်းပွႆႇၸႂ်ႉတမၢၼ်ႇၵၢင်ႁၢဝ်သိပ်းသွင်တပ်ႉဢမ်ႇၵႃးႁွတ်ႈမႃးမိူဝ်ႈလဵဝ်ၼႆႉၼၼ်ႉႁိုဝ်။ 

၅၄ ပေႃးပဵၼ်ၸိူဝ်ႉၼင်ႇၼၼ်ၸိုင်ၼႂ်းၵျၢမ်းလိၵ်ႈမီးမႃးလႄႈဝႃႈ၊-လွင်ႈတၢင်းၸိူဝ်းၼႆႉတၵ်းလႆႈပဵၼ်ဢေႃႈ၊ဝႃႈၼင်ႇၼႆၼၼ်ႉတၵ်းတဵမ်ထူၼ်ႈလႆႈၸိူဝ်ႉၼင်ႇႁိုဝ်၊ဝႃႈၼင်ႇၼႆဢေႃႈ။ 

၅၅ ၼႂ်းၶိင်ႇၼႃႇရီႇၼၼ်ႉၸဝ်ႈယေႇသုလၢတ်ႈတီႈၵူၼ်းၸူႉၵူၼ်းတုမ်ၸိူဝ်းၼၼ်ႉလႄႈဝႃႈ၊-သူပႃးဢဝ်လၢပ်ႇဢဝ်ၶွၼ်ႉမႃးႁႂ်ႈလႆႈတီႉဢဝ်ၵဝ်မိူၼ်ၼင်ႇတီႉဢဝ်ၸူၼ်ၼၼ်ႉလူင်ပေႇ။ မိူဝ်ႈဢၼ်ၵဝ်ယင်းမီးယူႇလူၺ်ႈၵၼ်တင်းသူသင်ႇသွၼ်ပၼ်ယူႇၵႃႈၼႂ်းပိၵ်ႉမၢၼ်ႇၸဝ်ႈယူႇၵူႈဝၼ်းၼၼ်ႉသူဢမ်ႇတီႉဢဝ်ၵဝ်၊ဝႃႈၼင်ႇၼႆဢေႃႈ။ 

၅၆ လွင်ႈတၢင်းၸိူဝ်းၼႆႉၸမ်းၼင်ႇႁိုဝ်ၵျၢမ်းလိၵ်ႈဢၼႃႇၵၢတ်ႈတိတၵ်းတဵမ်ထူၼ်ႈၸိုင်ၸင်ႇပဵၼ်ဢေႃႈ။ မိူဝ်ႈၼၼ်ႉတပႄးၸဝ်ႈတင်းသဵင်ႈတင်းလူင်ပႅတ်ႈဝႆႉမၼ်းၸဝ်ႈသေလႄႈဢွၼ်ၵၼ်လႅၼ်ႈပၢႆႊဢေႃႈ။ 

ၸဝ်ႈယေႇသုၸုၵ်းၽၢႆႇၼႃႈၵူၼ်းၵႄႇၵူၼ်းႁုဝ်

၅၇ ၶဝ်ၸိူဝ်းဢၼ်တီႉၵမ်ဢဝ်မၼ်းၸဝ်ႈတင်းလၢႆၼၼ်ႉဢဝ်မၼ်းၸဝ်ႈၵႂႃႇသူင်ႇၵႃႈတီႈၶုၼ်ယိတ်ႉပရေႃးႁိၵ်ႈၵႃႇယႃႇၽတီႈဢၼ်ၵူၼ်းထုတ်ႇၵျၢမ်းဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆၸူႉၵၼ်တုမ်ၵၼ်ၼၼ်ႉဢေႃႈ။ 

၅၈ ပေႇတရုၵေႃႈယူႇၵႆၵႆသေလႄႈၸွမ်းမၼ်းၸဝ်ႈၵႂႃႇထိုင်ႁွတ်ႈတီႈတလၢင်းဢၼ်မီးၵႄႈႁိူၼ်းၶုၼ်ၼၼ်ႉလေႈၶဝ်ႈၵႂႃႇၼႂ်းၼၼ်ႉယဝ်ႉၸင်ႇၼင်ႈယူႇလူၺ်ႈၵၼ်တင်းၵူၼ်းဢွၼ်ႇၶုၼ်တင်းလၢႆႁႂ်ႈလႆႈႁူႉႁၼ်တီႈသုတ်းတီႈၵွႆဢမူႉၼၼ်ႉဢေႃႈ။ 

၅၉ ယိတ်ႉပရေႃးႁိၵ်ႈလူင်ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်တင်းၶုၼ်တီႈလုမ်းၸိူဝ်းၼၼ်ႉႁႃသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈႁႂ်ႈလႆႈဢဝ်ၸဝ်ႈယေႇသုတၢႆသေၵေႃႈယႃႇဢမ်ႇထူပ်းဢမ်ႇႁၼ်။ 

၆၀ ပဵၵ်ႉသမ်ႉၶဝ်ၸိူဝ်းဢၼ်ၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈၼၼ်ႉမႃးၼမ်ၼႃႇသေၵေႃႈဢမ်ႇထူပ်းဢမ်ႇလႆႈသၢၵ်ႈသေႇ။ 

၆၁ လိုၼ်းၼၼ်ႉၵူၼ်းဢၼ်ၶၢမ်ႇသၢၵ်ႈသေႇဢၼ်ဢမ်ႇၸိုဝ်ႈဢမ်ႇၸႂ်ႈသွင်ၵေႃႉမႃးသေလႄႈလၢတ်ႈဝႃႈ၊-ၵေႃႉၼႆႉမၼ်းလၢတ်ႈဝႃႈမၼ်းတၵ်းယႃႉပႅတ်ႈလႆႈပိၵ်ႉမၢၼ်ႇၽြႃးပဵၼ်ၸဝ်ႈသေလႄႈၼႂ်းသၢမ်ဝၼ်းသၢမ်ၶိုၼ်းၵူၺ်း၊မၼ်းတၵ်းၶိုၼ်းႁဵတ်းပဵၼ်လႆႈ၊ဝႃႈၼႆၶႃႈယဝ်ႉ၊ဝႃႈၼင်ႇၼႆဢေႃႈ။ 

၆၂ ၶုၼ်ယိတ်ႉပရေႃးႁိၵ်ႈၵေႃႈလုၵ်ႉၸုၵ်းသေလႄႈထၢမ်မၼ်းၸဝ်ႈလႄႈဝႃႈ၊-မႂ်းဢမ်ႇၶိုၼ်းလၢတ်ႈၵႃႈသင်သေဢိတ်းႁႃး။ ၶဝ်ၸိူဝ်းၼႆႉယူႇၽၢႆႇၼိုင်ႈၵၼ်တင်းမႂ်းသေလႄႈၶၢမ်ႇသၢၵ်ႈသေႇၸိူဝ်ႉၼႆယူႇယဝ်ႉဢမ်ႇၸႂ်ႈႁိုဝ်၊ဝႃႈၼင်ႇၼႆသေၵေႃႈၸဝ်ႈယေႇသုယူႇတဵတ်ႇတဵတ်ႇယူႇဢေႃႈ။ 

၆၃ ၶုၼ်ယိတ်ႉပရေႃးႁိၵ်ႈသမ်ႉထၢမ်ထႅင်ႈလႄႈဝႃႈ၊-ၼင်ႇႁိုဝ်မႂ်းတၵ်းလႆႈလၢတ်ႈတီႈႁဝ်းလွင်ႈဢၼ်ဝႃႈမႂ်းပဵၼ်ၸဝ်ႈၶရိၸ်ႉလုၵ်ႈၽြႃးပဵၼ်ၸဝ်ႈတႄႉႁိုဝ်ၼၼ်ႉၵဝ်တိူင်ႇၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉဢေႃႈ၊ဝႃႈၼင်ႇၼႆဢေႃႈ။ 

၆၄ ၸဝ်ႈယေႇသုၵေႃႈၶိုၼ်းလၢတ်ႈလႄႈဝႃႈ၊-မဵၼ်ႈၵႃႈၼင်ႇဢၼ်မႂ်းဝႃႈၼႆႉယဝ်ႉ။ ၵူၺ်းၵႃႈၵဝ်ဝႃႈတီႈသူၸမ်းမိူဝ်းၼႃႈထႃႈလိုၼ်းသူတၵ်းလႆႈႁၼ်လုၵ်ႈၵူၼ်းၼင်ႈယူႇၵႃႈတီႈၽၢႆႇၶႂႃတၼ်းၶူဝ်းၸဝ်ႈသေလႄႈမႃးၵႃႈၼိူဝ်မွၵ်ႇၵုမ်ႈယူႇဢေႃႈ၊ဝႃႈၼင်ႇၼႆဢေႃႈ။ 

၆၅ မိူဝ်ႈၼၼ်ႉၶုၼ်ယိတ်ႉပရေႃးႁိၵ်ႈၸၵ်ႉသိၵ်ႇၶူဝ်းၼုင်ႈတူဝ်ၸဝ်ႈၵဝ်ႇသေယဝ်ႉလၢတ်ႈဝႃႈ၊-ၵေႃႉၼႆႉလၢတ်ႈပူၼ်ႉလၢတ်ႈလိူဝ်ၽြႃးပဵၼ်ၸဝ်ႈယဝ်ႉ။ 

၆၆ သူထၢင်ႇၸိူဝ်ႉၼင်ႇႁိုဝ်မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၸိူဝ်းၼၼ်ႉၵေႃႈၶိုၼ်းလၢတ်ႈလႄႈဝႃႈ၊-ၵေႃႉၼႆႉထိူၵ်ႈၶၢမ်ႇတၢင်းတၢႆယဝ်ႉ၊ဝႃႈၼင်ႇၼႆလႄႈၽွမ်ႉၵၼ်ၸီႇယၢင်ႇဢေႃႈ။ 

၆၇ ၶဝ်ထုမ်ႇၼမ်ႉလၢႆးသႂ်ႇၼႃႈမၼ်းၸဝ်ႈဢေႃႈ။ ဢဝ်တႃမိုဝ်းထုပ်ႉသႂ်ႇမၼ်းၸဝ်ႈဢေႃႈ။ 

၆၈ ၵမ်ႈၽွင်ႈၵေႃႈဢဝ်ၶွၼ်ႉပေႃႉယႅၼ်ႉလႄႈဝႃႈ၊-ၸဝ်ႈၶရိၸ်ႉတီႈၶႃႈဢိူၺ်း၊ၶႅၼ်းတေႃႈႁဵတ်ႈပရေႃးၽႅတ်ႈသေလႄႈႁေႃးလၢတ်ႈသေၵမ်း။ ၽူႈလႂ်ပေႃႉယႅၼ်ႉၸဝ်ႈႁဝ်း၊ဝႃႈၼင်ႇၼႆဢေႃႈ။ 

ပေႇတရုထဵင်ပႅတ်ႈၸဝ်ႈယေႇသု

၆၉ ၼႂ်းမိူဝ်ႈဢၼ်ပေႇတရုၼင်ႈယူႇၵႃႈၼွၵ်ႈတလၢင်းဢၼ်မီးၵႄႈႁိူၼ်းၼၼ်ႉၸိုင်မႄႈယိင်းဢၼ်ပဵၼ်ၵူၼ်းၸႂ်ႉၵူၼ်းသွႆၵေႃႉၼိုင်ႈမႃးတီႈမၼ်းလႄႈဝႃႈ၊-

၇၀ မႂ်းပဵၼ်ၵေႃႉဢၼ်ယူႇလူၺ်ႈၵၼ်တင်းၸဝ်ႈယေႇသုၵူၼ်းမိူင်းၵႃႇလိလႄးၼၼ်ႉဢိူဝ်း၊မိူဝ်ႈဢၼ်ဝႃႈၼင်ႇၼႆၸိုင်မၼ်းၵေႃႈထဵင်ပႅတ်ႈၵႃႈတီႈၽၢႆႇၼႃႈၵူၼ်းတင်းသဵင်ႈတင်းလူင်လႄႈဝႃႈ၊-ၵဝ်ဢမ်ႇႁူႉလွင်ႈဢၼ်မႂ်းလၢတ်ႈၼႆႉ၊ဝႃႈၼင်ႇၼႆဢေႃႈ။ 

၇၁ မိူဝ်ႈဢၼ်မၼ်းဢွၵ်ႇၵႂႃႇၸူးၵႃႈတီႈၽၵ်းတူတလၢင်းႁိူၼ်းၼၼ်ႉမႄႈယိင်းတၢင်ႇၵေႃႉသမ်ႉႁၼ်မၼ်းလႄႈလၢတ်ႈတီႈၶဝ်ၸိူဝ်းဢၼ်မီးတီႈၼၼ်ႉလႄႈဝႃႈ၊-

၇၂ ၵေႃႉၼႆႉယူႇလူၺ်ႈၵၼ်တင်းၸဝ်ႈယေႇသုၵူၼ်းဝဵင်းၼႃႇၸရႅတ်ႉၼၼ်ႉဢိူဝ်ႈ၊မိူဝ်ႈဢၼ်ဝႃႈၼင်ႇၼၼ်ၸိုင်၊မၼ်းၵေႃႈသမ်ႉၶိုၼ်းထဵင်ပႅတ်ႈၵိၼ်ႇလၢတ်ႈလႄႈဝႃႈ၊-ၵဝ်ဢမ်ႇႁူႉၸၵ်းၵေႃႉၼၼ်ႉ၊ဝႃႈၼင်ႇၼႆဢေႃႈ။ 

၇၃ လိုၼ်းၼၼ်ႉဢမ်ႇပေႃးႁိုင်ၶဝ်ၸိူဝ်းဢၼ်ၸုၵ်းယူႇၵႃႈတီႈႁိမ်းၼၼ်ႉမႃးတီႈပေႇတရုလႄႈဝႃႈ၊-ၸႂ်ႈတႄႉဢိူဝ်ႈ၊မႂ်းပဵၼ်ၵေႃႉဢၼ်ၶဝ်ႈပႃးၼႂ်းၶဝ်ၸိူဝ်းၼၼ်ႉဢိူဝ်ႈ။ 

၇၄ လွင်ႈမၼ်းၸမ်းၵႂၢမ်းမႂ်းႁဵတ်းႁႂ်ႈပိူၼ်ႈႁူႉလွင်ႈမႂ်းယူႇယဝ်ႉ၊မိူဝ်ႈဢၼ်ဝႃႈၼင်ႇၼႆၸိုင်မၼ်းၵေႃႈတိူင်ႇလႄႈၵိၼ်ႇလၢတ်ႈဝႃႈ၊-ၵဝ်ဢမ်ႇႁူႉၸၵ်းၵေႃႉၼၼ်ႉဝႃႈၼင်ႇၼႆဢေႃႈ။ 

၇၅ မိူဝ်ႈၶိင်ႇၼၼ်ႉၵႆႇၶၼ်ၵမ်းလဵဝ်ဢေႃႈ။ ပေတရုၵေႃႈၶုၵ်းၸႂ်လႆႈၶႆႈၸႂ်ထူပ်းၵႂၢမ်းဢၼ်ၸဝ်ႈယေႇသုလၢတ်ႈဝႆႉတီႈမၼ်းဝႃႈ၊-ၸူဝ်ႈဢၼ်ၵႆႇဢမ်ႇပႆႇၶၼ်ၼၼ်ႉမႂ်းတၵ်းထဵင်ပႅတ်ႈၵဝ်ထူၼ်ႈထိုင်သၢမ်ပွၵ်ႈဢေႃႈ၊ဢၼ်ဝႃႈၼၼ်ႉလႄႈမၼ်းဢွၵ်ႇၵႂႃႇၵႃႈၼွၵ်ႈသေယဝ်ႉ၊ႁႆႈႁွင်ႉထိုင်ၸႂ်ၼႃႇလူင်လၢင်ဢေႃႈ။