Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၁၉ 

တီႈဝဵင်းဢေးၽႅတ်ႈ

၁ ၼႂ်းမိူဝ်ႈဢၼ်ဢႃႇပေႃးလုယင်းမီးယူႇၵႃႈၼႂ်းဝဵင်းၵေႃ:ရဵၼ်ႇထုယူႇၼၼ်ႉၸိုင်ပေႃးလုလႄႇလဵပ်ႈၵႂႃႇၵႃႈၼႂ်းမိူင်းတၢင်းၼိူဝ်ယဝ်ႉၸင်ႇႁွတ်ႈထိုင်ဝဵင်းဢေးၽႅတ်ႈလႄႈထူပ်းႁၼ်တပႄးၸဝ်ႈၵမ်ႈၽွင်ႈသေယဝ်ႉထၢမ်ဝႃႈ၊-

၂ ဝၢႆးသေသူယုမ်ႇမၢတ်ႈယဝ်ႉသူလႆႈႁပ်ႉၶၢမ်ႇဢဝ်ဝိၺိၺ်ႇမူတ်းၸၢင်ႇၸဝ်ႈယဝ်ႉႁိုဝ်၊မိူဝ်ႈဢၼ်ဝႃႈၼင်ႇၼႆၸိုင်၊ၶဝ်ၵေႃႈၶိုၼ်းလၢတ်ႈလႄႈဝႃႈ၊-ႁဝ်းၶႃႈဢမ်ႇတွၼ်ႉလႆႈငိၼ်းလွင်ႈဢၼ်ဝႃႈမီးဝိၺိၺ်ႇမူတ်းၸၢင်ႇၸဝ်ႈဢၼ်ဝႃႈၼၼ်ႉၶႃႈ၊ဝႃႈၼင်ႇၼႆဢေႃႈ။

၃ မၼ်းၵေႃႈသမ်ႉထၢမ်လႄႈဝႃႈ၊-ပေႃးပဵၼ်ၸိူဝ်ႉၼင်ႇၼႆၸိုင်သူလႆႈၶၢမ်ႇဢဝ်ပပ်ႉတိၸၢမ်ႇဢၼ်လႂ်၊ဝႃႈၼင်ႇၼႆလႄႈၶဝ်ၵေႃႈလၢတ်ႈလႄႈဝႃႈ၊-လႆႈၶၢမ်ႇဢဝ်ပပ်ႉတိၸၢမ်ႇယုဝ်းႁၢၼ်ႇၶႃႈဢေႃႈ၊ဝႃႈၼင်ႇၼႆဢေႃႈ။

၄ ပေႃးလုၵေႃႈလၢတ်ႈလႄႈဝႃႈ၊-ယုဝ်းႁၢၼ်ႇပၼ်ပပ်ႉတိၸၢမ်ႇပုၼ်ႈလွင်ႈၼင်ႇႁိုဝ်တၵ်းၶုၵ်းၸႂ်လႆႈမႆႈၸႂ်ၼၼ်ႉဢေႃႈ။မၼ်းလၢတ်ႈတီႈၵူၼ်းတင်းလၢႆဝႃႈတၵ်းလႆႈယုမ်ႇမၢတ်ႈၵေႃႉဢၼ်တၵ်းပေႃႇမႃးလိုၼ်းမၼ်းၼၼ်ႉဢေႃႈ။ၼႂ်းလွင်ႈတၢင်းဢၼ်မၼ်းဝႃႈၸိူဝ်ႉၼင်ႇၼၼ်ၼၼ်ႉ၊မၼ်းၶႂ်ႈဝႃႈၸဝ်ႈယေႇသုဢေႃႈ၊ဝႃႈၼင်ႇၼႆဢေႃႈ။

၅ မိူဝ်ႈဢၼ်ၶဝ်ငိၼ်းၵႂၢမ်းၼၼ်ႉၸိုင်ၶဝ်ၶၢမ်ႇဢဝ်ပပ်ႉတိၸၢမ်ႇၼႂ်းၼႃႇမႃႉၸိုဝ်သဵင်ၸဝ်ႈယေႇသုဢေႃႈ။

၆ ပေႃးလုဢဝ်မိုဝ်းတၢင်ႇၵႃႈၼိူဝ်ၶဝ်လႄႈဝိၺိၺ်ႇမူတ်းၸၢင်ႇၸဝ်ႈၵေႃႈၵျွႃးလူင်းမႃးၵႃႈၼိူဝ်ၶဝ်ၼၼ်ႉသေယဝ်ႉၶဝ်ဢွၼ်ၵၼ်လၢတ်ႈၵႂၢမ်းၽႃႇသႃႇၵူႈၸိူဝ်ႉၵူႈပိူင်လႄႈလၢတ်ႈၵႂၢမ်းပရေႃးၽႅတ်ႈဢေႃႈ။

၇ ၶဝ်တင်းသဵင်ႈတင်းလူင်ၼၼ်ႉမီးၵူၼ်းသိပ်းသွင်ၵေႃႉၸမ်ၸမ်ဢေႃႈ။

၈ လိုၼ်းၼၼ်ႉပေႃးလုၶဝ်ႈၵႃႈၼႂ်းၸရွပ်ႈႁေႃးတြႃးလႄႈႁေႃးလၢတ်ႈႁတ်းႁတ်းႁၢၼ်ႁၢၼ်သၢမ်လိူၼ်တဵမ်တဵမ်လႄႈတိူင်ႇပၢင်ႇလၢတ်ႈၸႃလူၺ်ႈလွင်ႈတၢင်းဢၼ်ၸၢပ်ႈသႅင်ႇၵၼ်တင်းမိူင်းၽြႃးပဵၼ်ၸဝ်ႈၸိူဝ်းၼၼ်ႉဢေႃႈ။

၉ ၵူၺ်းၵႃႈၵူၼ်းၵမ်ႈၽွင်ႈမီးၸႂ်ဢၼ်ၵႅၼ်ႇၶႅင်လႄႈယင်းဢမ်ႇယုမ်ႇမၢတ်ႈၵူၺ်းဢမ်ႇၵႃးယင်းသေႉသွမ်းသဵၼ်ႈတၢင်းတြႃးၼၼ်ႉၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။ပေႃးလုဢွၵ်ႇသေၵႃႈၼႂ်းၶဝ်ၼၼ်ႉၵႂႃႇလႄႈၽႄဢဝ်တပႄးၸဝ်ႈတင်းလၢႆဝႆႉၶေႃၶေႃသေယဝ်ႉတိူင်ႇပၢင်ႇႁေႃးလၢတ်ႈၵႃႈၼႂ်းၸရွပ်ႈသွၼ်လိၵ်ႈတုရၼ်ႇၼုၼၼ်ႉၵူႈဝၼ်းဢေႃႈ။

၁၀ မၼ်းႁဵတ်းၸိူဝ်ႉၼင်ႇၼၼ်သွင်ပီႊတဵမ်တဵမ်လႄႈၵူၼ်းဢၼ်မီးၵႃႈၼႂ်းမိူင်းဢႃႇသိတင်းသဵင်ႈတင်းလူင်ဢၼ်ပဵၼ်ၵူၼ်းယုတၵူၼ်းႁေႇလသတင်းလၢႆလႆႈငိၼ်းၼုၵ်ႉၵပၢတ်ႈတြႃးၸဝ်ႈၽြႃးဢေႃႈ။

၁၁ ၽြႃးပဵၼ်ၸဝ်ႈဢဝ်မိုဝ်းပေႃးလုလႄႈၼႄပျႃးတၼ်းၶူဝ်းဢၼ်လၢၵ်ႇလၢႆးၼႃႇလူင်လၢင်ၼၼ်ႉၼမ်ၼႃႇဢေႃႈ။

၁၂ ပိူဝ်ႈဢၼ်ပဵၼ်ၸိူဝ်ႉၼင်ႇၼၼ်လႄႈၵူၼ်းၶႆႈၵူၼ်းပဵၼ်ဢၼ်လႆႈတိူဝ်ႉယိပ်းၽႃႈၸဵတ်ႉဢိၵ်ႇတင်းသၢႆဢႅဝ်ဢၼ်ဢဝ်ၵႃႈတီႈၸပ်းတူဝ်ပေႃးလုမႃးၼၼ်ႉတၢင်းၶႆႈတၢင်းပဵၼ်ယင်းႁၢႆၶႅၼ်းဢေႃႈ။ၽီႁၢႆႉတင်းလၢႆၵေႃႈဢွၵ်ႇပၢႆႊဢေႃႈ။

၁၃ မိူဝ်ႈၼၼ်ႉၵူၼ်းယုတၵမ်ႈၽွင်ႈဢၼ်လႄႇၵႂႃႇၵူႈတီႈၵူႈလႅၼ်သေလႄႈၸၢင်ႊႁိုပ်ႉၽီႁၢႆႉၼၼ်ႉၶဝ်ႁွင်ႉၸၢမ်းတူၺ်းၼႃႇမႃႉၸိုဝ်သဵင်ၸဝ်ႈယေႇသုၵႃႈၼိူဝ်ၵူၼ်းၽီႁၢႆႉၶဝ်ႈၼၼ်ႉလႄႈဝႃႈ၊-ႁဝ်းတိူင်ႇၸဝ်ႈယေႇသုဢၼ်ပေႃးလုႁေႃးလၢတ်ႈၼၼ်ႉလႄႈႁိုပ်ႉသူဢေႃႈ၊ဝႃႈၼင်ႇၼႆဢေႃႈ။

၁၄ ၵူၼ်းယုတဢၼ်ပဵၼ်လုၵ်ႈၸၢႆးယိတ်ႉပရေႃးႁိၵ်ႈလူင်သၵေႇဝၸဵတ်းၵေႃႉၼၼ်ႉၶဝ်ႁဵတ်းၸိူဝ်ႉၼင်ႇၼၼ်ဢေႃႈ။ၽီႁၢႆႉၵေႃႈတွပ်ႇဝႃႈ၊-

၁၅ ၵဝ်ႁူႉၸဝ်ႈယေႇသုဢိူဝ်ႈ။ပေႃးလုၵေႃႈၵဝ်ႁူႉလီလီငၢမ်းငၢမ်းဢိူဝ်ႈ။သူသမ်ႉပဵၼ်ၽူႈလႂ်၊ဝႃႈၼင်ႇၼႆသေယဝ်ႉ၊ၵူၼ်းဢၼ်ၽီႁၢႆႉၶဝ်ႈၼၼ်ႉဝႅၼ်ၶိုၼ်ႈၵႃႈၼိူဝ်ၶဝ်သေလႄႈ

၁၆ တဵၵ်းၶီႇတဵၵ်းတဵင်ၶဝ်ယဝ်ႉၸင်ႇႁဵတ်းပႄႉႁဵတ်းၼႅင်ႇတီႈၶဝ်လႄႈၶဝ်လႆႈဢွၵ်ႇပၢႆႊသေၵႃႈၼႂ်းႁိူၼ်းၼၼ်ႉၵႂႃႇတေႃႇႁွတ်ႈထၼ်ႈပေႃးၶဝ်ဢမ်ႇတၼ်းဢဝ်ၶူဝ်းၼုင်ႈတၢင်းမႆႊသင်လႄႈလႆႈတၢင်းၸဵပ်းတၢင်းသႅပ်ႇၶုၼ်ႇလႅၼ်ႈပၢႆၵႂႃႇတူဝ်ပူၺ်ဢေႃႈ။

၁၇ ၵူၼ်းယုတဢိၵ်ႇတင်းၵူၼ်းႁေႇလသဢၼ်မီးယူႇၵႃႈၼႂ်းဝဵင်းဢေးၽႅတ်ႈၸိူဝ်းၼၼ်ႉႁူႉငိၼ်းလွင်ႈတၢင်းၼၼ်ႉသေယဝ်ႉဢွၼ်ၵၼ်မီးတၢင်းဢၼ်ၵူဝ်ႁႄၼႃႇလူင်လၢင်လႄႈယွင်ႈယေႃးၼႃႇမၸိုဝ်သဵင်ၸဝ်ႈယေႇသုဢေႃႈ။

၁၈ ၵူၼ်းဢၼ်ယုမ်ႇမၢတ်ႈၼမ်ၼႃႇၵေႃႈမႃးၽုၺ်ႇဢွၵ်ႇၼႄပျႃးတၢင်းႁဵတ်းတၢင်းသၢင်ႈတူဝ်ၸဝ်ႈၵဝ်ႇသေလႄႈတွင်းပၢၼ်ႇဢေႃႈ။

၁၉ ၵူၼ်းဢၼ်ယိပ်းၵမ်ဢတၢတ်ႈၽီမေႃႇၼမ်ၼႃႇၵေႃႈဢဝ်ၽိုၼ်လိၵ်ႈၶဝ်မႃးလႄႈတုတ်ႇၽႆးပႅတ်ႈၵႃႈတီႈၽၢႆႇၼႃႈၵူၼ်းတင်းလၢႆဢေႃႈ။

၂၀ ၼပ်ႉဢၢၼ်ႇတူၺ်းၵႃႊၶၼ်ဢၼ်ၶဝ်ဢဝ်တုတ်ႇၽႆးပႅတ်ႈၼၼ်ႉတၢၼ်ႇငိုၼ်းႁႃႈမိုၼ်ႇဢေႃႈ။ၼင်ႇၼၼ်လႄႈၼုၵ်ႉၵပၢတ်ႈၽြႃးပဵၼ်ၸဝ်ႈယႂ်ႇၵႂၢင်ႈမႃးလႄႈတၼ်းၶူဝ်းၽြႃးပဵၼ်ၸဝ်ႈၵေႃႈႁႅင်းယႂ်ႇမႃးဢေႃႈ။

၂၁ မိူဝ်ႈဢၼ်ပဵၼ်မႃးၸိူဝ်ႉၼင်ႇၼၼ်ၼၼ်ႉၸိုင်ပေႃးလုမီးတၢင်းၵျၢမ်ႇတၢင်းပွင်ၼႂ်းၸႂ်လႄႈဝႃႈ၊-တၵ်းၸွမ်းတၢင်းလတ်းၶဝ်ႈၵႂႃႇၵႃႈၼႂ်းမိူင်းမႃႇၵေႇတေႃးၼိတင်းမိူင်းဢႃႇၶႃႇယသေယဝ်ႉၵႂႃႇၸူးၵႃႈတီႈဝဵင်းယရေုသလႅမ်ႇလႄႈပေႃးပူၼ်ႉသေၵႃႈတီႈဝဵင်းၼၼ်ႉယဝ်ႉၸိုင်တၵ်းလႆႈႁၼ်ဝဵင်းရူဝ်းမဢေႃႈ၊ဝႃႈၼင်ႇၼႆလႄႈ

၂၂ မၼ်းပွႆႇၸႂ်ႉတိမေႃးသေႇတင်းဢေႇရၢတ်ႉတုဢၼ်ပဵၼ်ၵူၼ်းဢၼ်ၸွႆႈထႅမ်မၼ်းသွင်ၵေႃႉၼၼ်ႉၵႂႃႇၵႃႈတီႈမိူင်းမႃႇၵေႇတေႃးၼိသေယဝ်ႉတူဝ်မၼ်းၸမ်းၵိုတ်းသဝ်းယူႇၵႃႈၼႂ်းမိူင်းဢႃႇသိၵမ်းဢွၼ်ႇၼိုင်ႈဢေႃႈ။

တၢင်းဢၼ်ယုင်ႈယၢင်ႈဢူၼ်ဢဵၼ်တီႈဝဵင်းဢေးၽႅတ်ႈ

၂၃ မိူဝ်ႈၶိင်ႇၼၼ်ႉတၢင်းဢၼ်ယုင်ႈယၢင်ႈဢူၼ်ဢဵၼ်မေႃးမႄးပေႃႇပဵၼ်မႃးလွင်ႈသဵၼ်ႈတၢင်းတြႃးဢေႃႈ။

၂၄ လွင်ႈတၢင်းမၼ်းၸမ်းမီးၸၢင်ႊငိုၼ်းၵေႃႉၼိုင်ႈဢၼ်လႆႈၸိုဝ်တေႇမေႇတရိၼၼ်ႉၸၢင်ႊႁဵတ်းပိၵ်ႉမၢၼ်ႇငိုၼ်းပုၼ်ႈၼၢင်းၽီဢႃႇတေႇမိလႄႈႁဵတ်းႁႂ်ႈၸၢင်ႊငိုၼ်းတင်းလၢႆပဵၼ်တိုၼ်းပဵၼ်ႁွၼ်းၼမ်ၼႃႇဢေႃႈ။

၂၅ မၼ်းႁွင်ႉဢဝ်ၸၢင်ႊငိုၼ်းၸိူဝ်းၼၼ်ႉၸူႉၵၼ်တုမ်ၵၼ်သေယဝ်ႉလၢတ်ႈဝႃႈ၊-ၵူၼ်းတင်းလၢႆၶဝ်ဢိူၺ်း၊သူႁူႉလွင်ႈဢၼ်ႁဝ်းလႆႈမၢၵ်ႈမီးလီပဵၼ်ၵွပ်ႈပိူဝ်ႈတၢင်းႁဵတ်းႁဝ်းၼႆႉဢေႃႈ။

၂၆ ပေႃးလုတိုၵ်းယူင်းၸူဝ်းဢဝ်ၵူၼ်းၼမ်ၼႃႇၵႃႈတီႈဝဵင်းဢေးၽႅတ်ႈမိူင်းဢႃႇသိ၊ပေႃးၶႂ်ႈသဵင်ႈၵႂႃႇတင်းမိူင်း၊ႁႂ်ႈၶဝ်ၽိတ်းတၢင်းၵႂႃႇလႄႈဝႃႈ၊-ၵႃႈဢၼ်မိုဝ်းၵူၼ်းႁဵတ်းၼၼ်ႉဢမ်ႇၸႂ်ႈၽြႃး၊ဝႃႈၼင်ႇၼႆၼၼ်ႉသူႁူႉယူႇႁၼ်ယူႇဢမ်ႇၸႂ်ႈႁိုဝ်။

၂၇ တၢင်းၵႃႉတၢင်းၶၢႆႁဝ်းတၵ်းလူႉသုမ်းၵူၺ်းဢမ်ႇၵႃးပိၵ်ႉမၢၼ်ႇၼၢင်းၽီဢႃႇတေႇမိ၊ဢၼ်ယႂ်ႇမျၢတ်ႈၼႃႇၼႆႉလႄႈၵေႃႈမူၼ်ၵုင်ႇသရေႇမၼ်းဢၼ်ၵူၼ်းမိူင်းဢႃႇသိတင်းမိူင်းလေႃးၵီႇတင်းသဵင်ႈတင်းလူင်ၵူဝ်းၵႂၢႆႇၼၼ်ႉတၵ်းႁွတ်ႈထိုင်တၢင်းလူႉတၢင်းလႅဝ်ၵႂႃႇယဝ်ႉ၊ဝႃႈၼင်ႇၼႆဢေႃႈ။

၂၈ ၶဝ်ငိၼ်းၵႂၢမ်းၼၼ်ႉသေယဝ်ႉတဵမ်ဝႆႉတင်းတေႃးသႃႉၸႂ်မႆႈၶႂ်ႈၸႃႉၼႃႇလႄႈႁွင်ႉသႅၼ်ႇဝႃႈ၊-ၼၢင်းၽီဢႃႇတေႇမိၵူၼ်းဢေးၽႅတ်ႈၼႆႉယႂ်ႇမျၢတ်ႈၼႃႇတီႈၶႃႈဢေႃႈ၊ဝႃႈၼင်ႇၼႆဢေႃႈ။

၂၉ တၢင်းဢၼ်ယုင်ႈယၢင်ႈဢူၼ်ဢဵၼ်မေႃးမႄးၼၼ်ႉတဵမ်ၵႂႃႇတင်းဝၢၼ်ႈတင်းဝဵင်းလႄႈၶဝ်လႅၼ်ႊၶဝ်ႈၵႂႃႇၵႃႈၼႂ်းၸရွပ်ႈဢၼ်ၶၢမ်ႇပွႆးၼၼ်ႉသေယဝ်ႉတိုတ်ႉၸၼ်ဢဝ်ၵႃႇယုတင်းဢႃႇရိတ်ႉတႃႇၶု၊ဢၼ်ပဵၼ်ၵူၼ်းမိူင်းမႃႇၵေႇတေႃးၼိ၊ဢၼ်ၸွမ်းလူၺ်ႈၵၼ်တင်းပေႃးလုၼၼ်ႉဢွၵ်ႇၵႂႃႇဢေႃႈ။

၃၀ ပေႃးလုၶႂ်ႈၶဝ်ႈၸူးၵႃႈတီႈၵူၼ်းဢၼ်ၸူႉၵၼ်တုမ်ၵၼ်ၼၼ်ႉသေၵေႃႈယႃႇတပႄးၸဝ်ႈတင်းလၢႆႁၢမ်ႈတပ်ႉႁႄႉၶႅၼ်မၼ်းဝႆႉဢေႃႈ။

၃၁ ၶုၼ်ဢၼ်ဢုပ်ႉပိူင်ႇမိူင်းဢႃႇသိ၊ဢၼ်ပဵၼ်ၵေႃႉသေႈပေႃးလုၵမ်ႈၽွင်ႈၼၼ်ႉၵေႃႈပွႆႇၸႂ်ႉၵူၼ်းၵႂႃႇလၢတ်ႈထိုင်ပေႇတရုဝႃႈ၊-ယႃႇပေဢဝ်တူဝ်ၸဝ်ႈၵဝ်ႇဢၢပ်ႈၵႃႈၼႂ်းၸရွပ်ႈၶၢမ်ႇပွႆးၼႆႉသေၵမ်းဝႃႈၼင်ႇၼႆဢေႃႈ။

၃၂ ၵူၼ်းၸူႉၵူၼ်းတုမ်ၼမ်ၼႃႇယုင်ႈယၢင်ႈဢူၼ်ဢဵၼ်မေႃးမႄးယူႇလႄႈၵူၼ်းႁမ်ႉၼမ်ယင်းဢမ်ႇႁူႉလွင်ႈတၢင်းဢၼ်ၶဝ်လႆႈၸူႉၵၼ်တုမ်ၵၼ်ၵႃႈတီႈၼၼ်ႉလႄႈၶဝ်ႁွင်ႉသႅၼ်ႇယေႈၵေႃႉယေႈမဵဝ်းႁင်းၽႂ်ႁင်းမၼ်းဢေႃႈ။

၃၃ ၵူၼ်းယုတတင်းလၢႆဢဝ်ဢႃႇလေႇၸၢၼ်ႇတရုဢွၵ်ႇသေၵႃႈၼႂ်းၵူၼ်းၸိူဝ်းၼၼ်ႉသေယဝ်ႉဢီးမၼ်းမႃးဝႆႉၵႃႈတီႈၽၢႆႇၼႃႈၶဝ်ဢေႃႈ။မၼ်းၵေႃႈၼႄပျႃႉမိုဝ်းလွင်ႈဢၼ်မၼ်းၶႂ်ႈလၢတ်ႈၵႂၢမ်းဢၼ်ႁႄႉၶႅၼ်တူဝ်ၸဝ်ႈၵဝ်ႇၵႃႈတီႈၵူၼ်းတင်းသဵင်ႈတင်းလူင်ၸိူဝ်းၼၼ်ႉဢေႃႈ။

၃၄ မိူဝ်ႈဢၼ်ၶဝ်ႁူႉလွင်ႈဢၼ်ဝႃႈမၼ်းပဵၼ်ၵူၼ်းယုတၼၼ်ႉၸိုင်၊ၶဝ်တင်းသဵင်ႈတင်းလူင်ႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇသွင်ၼႃႇရီႇၸမ်ၸမ်လႄႈဝႃႈ၊-ဢႃႇတေႇမိၵူၼ်းဢေးၽႅတ်ႈတင်းလၢႆၼႆႉယႂ်ႇမျၢတ်ႈၼႃႇတီႈၶႃႈဢေႃႈ၊ဝႃႈၼင်ႇၼႆဢေႃႈ။

၃၅ ၸရေးဝဵင်းၼၼ်ႉႁႂ်ႈၵူၼ်းတင်းသဵင်ႈတင်းလူင်ယူႇတဵတ်ႇတဵတ်ႇယဵၼ်ယဵၼ်သေယဝ်ႉၸင်ႇလၢတ်ႈလႄႈဝႃႈ၊-ၵူၼ်းဝဵင်းဢေးၽႅတ်ႈၶဝ်ဢိူၺ်း၊လွင်ႈဢၼ်ဝႃႈဝဵင်းဢေးၽႅတ်ႈၼႆႉပဵၼ်ဝဵင်းဢၼ်ပႂ်ႉလူလုမ်းလႃးဢႃႇတေႇမိဢိၵ်ႇတင်းရူၵ်ႉထူႉမၼ်းဢၼ်လုၵ်ႉသေၵၢင်ႁၢဝ်တူၵ်းမႃးဢၼ်ဝႃႈၼၼ်ႉၵေႃႉဢၼ်ဢမ်ႇႁူႉၸွင်ႇမီးသေၵေႃႉသေၵူၼ်းႁိုဝ်။

၃၆ ၵွပ်ႈပိူဝ်ႈဢမ်ႇမီးတီႈဢၼ်တၵ်းလႆႈတွပ်ႇထဵင်လူၺ်ႈလွင်ႈတၢင်းၸိူဝ်းၼႆႉလႄႈသူထုၵ်ႇလီယူႇတဵတ်ႇတဵတ်ႇယဵၼ်ယဵၼ်ဢေႃႈ။တေလႆႈဝႆႉသတိလီလီလႄႈႁဵတ်းဢေႃႈ။

၃၇ သူဢဝ်ၵူၼ်းၸိူဝ်းၼႆႉမႃးၵႃႈတီႈၼႆႉၶဝ်ဢမ်ႇႁိမ်ဢဝ်ပိၵ်ႉမၢၼ်ႇၸဝ်ႈ၊ၶဝ်ဢမ်ႇသေႉဢမ်ႇသွမ်းၽြႃးသူ။

၃၈ ပေႃးတေႇမေႇတရိတင်းၸၢင်ႊငိုၼ်းၸိူဝ်းၼၼ်ႉမီးဢမူႉတီႈသေၵေႃႉသေၵူၼ်းၸိုင်မီးလုမ်းလူင်ယူႇဢေႃႈ။

၃၉ ႁႂ်ႈၸဝ်ႈဢမူႉၼင်ႇၵၼ်ထူပ်းတြႃးတီႈၵၼ်တႃႉ။ပေႃးသူယင်းမီးဢမူႉတေႃႇၵၼ်ထႅင်ႈၸိုင်တၵ်းလႆႈၸႅတ်ႈသေးၸီႇယၢင်ႇၸွမ်းၼင်ႇတြႃးဢေႃႈ။

၄၀ ၵွပ်ႈပိူဝ်ႈတၢင်းဢၼ်ယုင်ႈယၢင်ႈဢူၼ်ဢဵၼ်မေႃးမႄးမိူဝ်ႈၼႆႉလႄႈႁဝ်းယင်းၵူဝ်လွင်ႈဢမူႉၼႆႉတၵ်းႁွတ်ႈထိုင်မႃးၵႃႈၼိူဝ်ႁဝ်းဢေႃႈ။

၄၁ လွင်ႈမၼ်းၸမ်းတီႈဢၼ်ႁဝ်းတၵ်းလၢတ်ႈႁႄႉၶႅၼ်တၢင်းဢၼ်ၸူႉဢၼ်တုမ်ဢၼ်ဢမ်ႇမႅၼ်ႈတြႃးၼႆႉဢမ်ႇမီးသေၸိူဝ်ႉသေပိူင်၊ဝႃႈၼင်ႇၼႆသေယဝ်ႉ၊ႁႂ်ႈၵူၼ်းၸူႉၵူၼ်းတုမ်ၸိူဝ်းၼၼ်ႉယၢႆၶိုၼ်းမိူဝ်းၵႂႃႇသေဢေႃႈ။