Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၁၁

ပေႇတရုသၢင်းလၢင်းလၢတ်ႈၼႄတၢင်းႁဵတ်းၸဝ်ႈၵဝ်ႇ

၁ တမၢၼ်ႇၸဝ်ႈဢိၵ်ႇတင်းပီႈၼွင်ႉဢၼ်မီးယူႇၵႃႈၼႂ်းမိူင်းယုတၸိူဝ်းၼၼ်ႉလႆႈငိၼ်းလွင်ႈဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းတင်းလႆလႆႈၶၢမ်ႇဢဝ်ၼုၵ်ႉၵပၢတ်ႈတြႃးၸဝ်ႈၼၼ်ႉဢေႃႈ။

၂ မိူဝ်ႈဢၼ်ပေႇတရုၶိုၼ်းၵႂႃႇႁွတ်ႈထိုင်ၵႃႈတီႈဝဵင်းယေႇရုသလႅမ်ႇၼၼ်ႉၸိုင်ၶဝ်ၸိူဝ်းဢၼ်ၶၢမ်ႇတၢင်းဢၼ်ထိူဝ်ႁိမ်းၸိူဝ်းၼၼ်ႉႁဵတ်းဢမ်ႇထုၵ်ႇၶတ်းၵၼ်တင်းမၼ်းလႄႈဝႃႈ၊-

၃ မႂ်းၼႆႉၵႂႃႇၵႃႈတီႈၵူၼ်းဢၼ်ဢမ်ႇၶၢမ်ႇတၢင်းဢၼ်ထိူဝ်ႁိမ်းၸိူဝ်းၼၼ်ႉသေယဝ်ႉၵိၼ်လူၺ်ႈၵၼ်တင်းၶဝ်လူင်ပေႇ၊ဝႃႈၼင်ႇၼႆဢေႃႈ။

၄ ပေႇတရုၵေႃႈၽုၺ်ႇလၢတ်ႈၼႄပၼ်လွင်ႈတီႈႁႅင်းၼၼ်ႉတီႈၶဝ်ၸႃႉၸဵမ်ငဝ်ႈတေႃႇပၢႆလႄႈဝႃႈ၊-ၼႂ်းမိူဝ်ႈဢၼ်ၵဝ်သူးတွင်းယူႇၵႃႈတီႈဝဵင်းယွပ်ႇပၼၼ်ႉ

၅ ပဵၼ်ၸိူဝ်ႉၼင်ႇၼွၼ်းၽၼ်ႁၼ်ၵႃႈၼႂ်းတူဝ်ၵဝ်လႄႈၵဝ်လႆႈႁၼ်ၶိူင်ႈပိူင်ဢၼ်ပဵၼ်ၸိူဝ်ႉၼင်ႇတၢၼ်ႈသိူဝ်းလူင်ဢၼ်ဢဝ်တင်းသီႇၸဵင်ႇၶျႃးယွၼ်ႇတူၵ်းၵႃႈၼိူဝ်ၵၢင်ႁၢဝ်မႃးႁွတ်ႈထိုင်ၵႃႈတီႈၵဝ်ၼႂ်းပျႃႇတိၵ်ႈရူႇပႃႇရူင်ႇၼၼ်ႉဢေႃႈ။

၆ မိူဝ်ႈဢၼ်ၵဝ်တူၺ်းၶိူင်ႈပိူင်ၼၼ်ႉၸေးၸေးၸွတ်ႇၸွတ်ႇလႄႈၶႆႈၸႂ်ဝူၼ်ႉၸႂ်ယူႇၼၼ်ႉၵဝ်လႆႈႁၼ်ၸႃႉၸဵမ်တရိၵ်ႉသၢၼ်ႇၵႃႈၼိူဝ်လိၼ်ဢၼ်မီးတိၼ်သီႇၶွၼ်၊တူဝ်ရိူင်း၊တရိၵ်ႉသၢၼ်ႇဢၼ်ၸၢင်ႊၵႂႃႇၸၢင်ႊၵၢၼ်း၊ၼူၵ်ႉၵႃႈဢၼ်မိၼ်ၵႃႈၼိူဝ်ၵၢင်ႁၢဝ်တင်းလၢႆၸိူဝ်းၼၼ်ႉဢေႃႈ။

၇ မိူဝ်ႈၼၼ်ႉၵဝ်လႆႈငိၼ်းသဵင်ၵႂၢမ်းဢၼ်ဝႃႈ၊-ပေႇတရုဢိူၺ်း၊ဢဝ်တၢႆလႄႈၵိၼ်တႃႉ၊ဝႃႈၼင်ႇၼႆဢေႃႈ။

၈ ၵဝ်ၵေႃႈလၢတ်ႈလႄႈဝႃႈ၊ဢမ်ႇပဵၼ်လႆႈၶႃႈၸဝ်ႈ။ၶိူင်ႈပိူင်ဢၼ်ၵူဝ်ႈၵိူၵ်ႇၶိူင်ႈပိူင်ဢၼ်ဢမ်ႇမူတ်းသႂ်ၼၼ်ႉဢမ်ႇတွၼ်ႉၶဝ်ႈၵႃႈၼႂ်းသူပ်းၵဝ်ၶႃႈသေပွၵ်ႈၶႃႈ၊ဝႃႈၼင်ႇၼႆဢေႃႈ။

၉ လိုၼ်းသေၼၼ်ႉသဵင်ၵႂၢမ်းပဵၼ်မႃးၵႃႈၼိူဝ်ၵၢင်ႁၢဝ်ပွၵ်ႈတုတိယလႄႈဝႃႈ၊-ဢၼ်ၽြႃးပဵၼ်ၸဝ်ႈႁႂ်ႈမူတ်းသႂ်ၼၼ်ႉမႂ်းယႃႇပေဝႃႈၵူဝ်ႈၵိူၵ်ႇ၊ဝႃႈၼင်ႇၼႆဢေႃႈ။

၁၀ ပဵၼ်ၸိူဝ်ႉၼင်ႇၼၼ်ထူၼ်ႈထိုင်သၢမ်ပွၵ်ႈယဝ်ႉၸင်ႇသမ်ႉၶိုၼ်းတိုတ်ႉၸၼ်ဢဝ်ၶိူင်ႈပိူင်ၵႃႈမီးၸိူဝ်းၼၼ်ႉၶိုၼ်ႈၵႂႃႇၵႃႈၼိူဝ်ၵၢင်ႁၢဝ်ပုၼ်ႉသေဢေႃႈ။

၁၁ ၵမ်းဢွၼ်ႇၼိုင်ႈၵူၺ်းၵူၼ်းသၢမ်ၵေႃႉဢၼ်ၶၢမ်ႇတၢင်းဢၼ်ပွႆႇၸႂ်ႉသေၵႃႈတီႈဝဵင်းၵေႇသရိၼၼ်ႉမႃးၸုၵ်းယူႇၵႃႈတီႈႁိမ်းႁိူၼ်းဢၼ်ၵဝ်ယူႇၼၼ်ႉဢေႃႈ။

၁၂ လွင်ႈၼင်ႇႁိုဝ်ၵဝ်တၵ်းဢမ်ႇလႆႈၶႆႈၸႂ်ဝူၼ်ႉၸႂ်ၵႃႈသင်လႄႈတၵ်းၵႂႃႇၸွမ်းၶဝ်ၵႂႃႇၼၼ်ႉၸိုင်ဝိၺိၺ်ႇမူတ်းၸၢင်ႇၸဝ်ႈမီးဢမိင်ႉတီႈၵဝ်ဢေႃႈ။ပီႈၼွင်ႉႁူၵ်းၵေႃႉၸိူဝ်းၼၼ်ႉၵေႃႈၵႂႃႇလူၺ်ႈၵၼ်တင်းၵဝ်လႄႈႁဝ်းၶဝ်ႈၵႃႈၼႂ်းႁိူၼ်းၵေႃႉၼၼ်ႉဢေႃႈ။

၁၃ ၵေႃႉၼၼ်ႉၵေႃႈမွၵ်ႇလၢတ်ႈလွင်ႈဢၼ်မၼ်းလႆႈႁၼ်တမၢၼ်ႇၵၢင်ႁၢဝ်ၸုၵ်းယူႇၵႃႈၼႂ်းႁိူၼ်းမၼ်းလႄႈလၢတ်ႈဝႃႈ၊-မႂ်းပွႆႇၸႂ်ႉၵူၼ်းၵႂႃႇၵႃႈတီႈဝဵင်းယွပ်ႇပပုၼ်ႉလႄႈႁွင်ႉပၢင်းသိမုၼ်ႇ၊ဢၼ်လႆႈၸိုဝ်မႂ်ႇပေႇတရုၼၼ်ႉမႃးတႃႉ။

၁၄ မၼ်းတၵ်းႁေႃးလၢတ်ႈၵႂၢမ်းဢၼ်တၵ်းၵႄႇၶျွတ်ႈဢဝ်မႂ်းဢိၵ်ႇတင်းၵူၼ်းဢၼ်မီးၼႂ်းႁိူၼ်းမႂ်းၼႆႉဢေႃႈ၊ဝႃႈၼင်ႇၼႆၶႆႊၼႄႁဝ်းဢေႃႈ။

၁၅ ၼႂ်းမိူဝ်ႈဢၼ်ၵဝ်ၸႃႉႁေႃးလၢတ်ႈၸိူဝ်ႉၼင်ႇၼၼ်ယူႇၼၼ်ႉဝိၺိၺ်ႇမူတ်းၸၢင်ႇၸဝ်ႈလူင်းမႃးၵႃႈၼိူဝ်ၶဝ်မိူၼ်ၸိူဝ်ႉၼင်ႇဢၼ်လူင်းမႃးၵႃႈၼိူဝ်ႁဝ်းမိူဝ်ႈဢွၼ်တၢင်းၼၼ်ႉဢေႃႈ။

၁၆ မိူဝ်ႈၼၼ်ႉၵဝ်ၶုၵ်းၸႂ်လႆႈၵႂၢမ်းဢၼ်ၸဝ်ႈၽြႃးလၢတ်ႈဝႆႉဝႃႈ၊-ယုဝ်းႁၢၼ်ႇပၼ်ပပ်ႉတိၸၢမ်ႇၼႂ်းၼမ်ႉဢေႃႈ။သူတၵ်းလႆႈၶၢမ်ႇပပ်ႉတိၸၢမ်ႇၼႂ်းဝိၺိၺ်ႇမူတ်းၸၢင်ႇၸဝ်ႈဢေႃႈ၊ဝႃႈၼင်ႇၼႆၼၼ်ႉဢေႃႈ။

၁၇ ပိူဝ်ႈၼႆလႄႈပေႃးၽြႃးပဵၼ်ၸဝ်ႈပၼ်သူႉၵျေးၸူးတီႈၶဝ်မိူၼ်ၸိူဝ်ႉၼင်ႇဢၼ်မၼ်းၸဝ်ႈပၼ်တီႈႁဝ်းဢၼ်ယုမ်ႇမၢတ်ႈၸဝ်ႈယေႇသုၶရိၸ်ႉၼၼ်ႉၸိုင်ၵဝ်ၼႆႉပဵၼ်ၵူၼ်းၸိူဝ်ႉၼင်ႇႁိုဝ်လႄႈတၵ်းႁၢမ်ႈတၢပ်ႈႁႄႉၶႅၼ်ၽြႃးပဵၼ်ၸဝ်ႈလႆႈ၊ဝႃႈၼင်ႇၼႆဢေႃႈ။

၁၈ မိူဝ်ႈဢၼ်ၶဝ်ငိၼ်းလွင်ႈတၢင်းၸိူဝ်းၼၼ်ႉၸိုင်ၶဝ်ယင်းဢမ်ႇတွပ်ႇဢမ်ႇထဵင်လႄႈယွင်ႈယေႃးမူၼ်ၵုင်ႇၽြႃးပဵၼ်ၸဝ်ႈလႄႈဝႃႈ၊-တီႈၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၵေႃႈၽြႃးပဵၼ်ၸဝ်ႈပၼ်တြႃးတၢင်းဢၼ်ၶုၵ်းၸႂ်လႆႈမႆႈၸႂ်ပုၼ်ႈလွင်ႈၼင်ႇႁိုဝ်တၵ်းႁႂ်ႈဢသၢၵ်ႈလိပ်းၼၼ်ႉယဝ်ႉ၊ဝႃႈၼင်ႇၼႆဢေႃႈ။

ၸိူဝ်းၸဝ်ႈဝဵင်းဢၼ်ႇတိဢုၵ်ႉ

၁၉ မိူဝ်ႈၼၼ်ႉၵွပ်ႈပိူဝ်ႈတၢင်းဢၼ်ၼိၵ်ႉၸၢၵ်ႈငႅၼ်းသေးဢၼ်ပဵၼ်မႃးလူၺ်ႈလွင်ႈသထေႇၽၢၼ်ႇၼၼ်ႉၶဝ်ၸိူဝ်းဢၼ်လႆႈၽၢတ်ႇၽႄၵၼ်ၵႂႃႇၵူႈတီႈၵူႈလႅၼ်ၼၼ်ႉၵႂႃႇထိုင်ႁွတ်ႈမိူင်းၽိၼိတ်ႉ၊မိူင်းၵုပရုတင်းဝဵင်းဢၼ်ႇတိဢုၵ်ႉလႄႈႁေႃးလၢတ်ႈၼုၵ်ႉၵပၢတ်ႈတြႃးၸဝ်ႈတီႈၵူၼ်းယုတတင်းလၢႆၵူၺ်းဢေႃႈ။

၂၀ ၼႂ်းၶဝ်ၼၼ်ႉၵမ်ႈၽွင်ႈဢၼ်ပဵၼ််ၵူၼ်းမိူင်းၵုပရုတင်းၵူၼ်းမိူင်းၵုရေႇၼေႇၸိူဝ်းၼၼ်ႉႁွတ်ႈထိုင်ၵႂႃႇၵႃႈတီႈဝဵင်းဢၼ်ႇတိဢုၵ်ႉသေယဝ်ႉႁေႃးလၢတ်ႈတြႃးသတၢင်းသိူဝ်းပျေႃႇလွင်ႈၸဝ်ႈယေႇသုတီႈၵူၼ်းႁေႇလေႇၼိတ်ႉတင်းလၢႆဢေႃႈ။

၂၁ ပိူဝ်ႈဢၼ်မိုဝ်းၽြႃးပဵၼ်ၸဝ်ႈမီးယူႇလူၺ်ႈၵၼ်တင်းၶဝ်လႄႈၵူၼ်းၼမ်ၼႃႇယုမ်ႇမၢတ်ႈသေယဝ်ႉၶၢႆႉမႃးၵႃႈတီႈၽၢႆႇၸဝ်ႈၽြႃးဢေႃႈ။

၂၂ သတၢင်းသဵင်ၶၢဝ်ႇလွင်ႈၶဝ်ၼၼ်ႉၽႅဝ်ထိုင်ၵႃႈတီႈၸိူဝ်းၸဝ်ႈဢၼ်မီးယူႇၵႃႈၼႂ်းဝဵင်းယေႇရုသလႅမ်ႇလႄႈၸိူဝ်းၸဝ်ႈၼၼ်ႉပွႆႇၸႂ်ႉပႃႇၼပၵႂႃႇႁႂ်ႈထိုင်ႁွတ်ႈဝဵင်းဢၼ်ႇတိဢုၵ်ႉပုၼ်ႉဢေႃႈ။

၂၃ မၼ်းၵေႃႈမိူဝ်ႈဢၼ်ႁွတ်ႈထိုင်လႄႈလႆႈႁၼ်ၵျေးၸူးၽြႃးပဵၼ်ၸဝ်ႈၼၼ်ႉၸိုင်သိူဝ်းၸူမ်းၼႃႇလႄႈတိုၵ်းယူင်းပၼ်ႁႅင်းၶဝ်တင်းသဵင်ႈတင်းလူင်ႁႂ်ႈမီးႁူဝ်ၸႂ်ဢၼ်မၼ်ႈၶိူင်ႇဢိင်ပိုင်ႈၸဝ်ႈၽြႃးဢေႃႈ။

၂၄ ပိူဝ်ႈဢၼ်မၼ်းပဵၼ်ၵူၼ်းလီပဵၼ်ၵေႃႉဢၼ်တဵမ်ဝႆႉတင်းဝိၺိၺ်ႇမူတ်းၸၢင်ႇၸဝ်ႈတင်းတၢင်းယုမ်ႇမၢတ်ႈလႄႈၵူၼ်းၼမ်ၼႃႇၶဝ်ႈမႃးၽၢႆႇၸဝ်ႈၽြႃးဢေႃႈ။

၂၅ ဝၢႆးသေၼၼ်ႉပႃႇၼပဢွၵ်ႇၵႂႃႇၸူးၵႃႈတီႈဝဵင်းတႃႇသုႁႂ်ႈလႆႈႁႃသေႃးလုဢေႃႈ။မိူဝ်ႈဢၼ်ထူပ်းႁၼ်မၼ်းယဝ်ႉမၼ်းႁွင်ႉဢဝ်သေႃးလုၵႂႃႇဝဵင်းဢၼ်ႇတိဢုၵ်ႉဢေႃႈ။

၂၆ ၶဝ်ယူႇတီႈၼၼ်ႉပီႊၼိုင်ႈတဵမ်တဵမ်လႄႈၶဝ်သင်ႇသွၼ်ပၼ်ၵူၼ်းၸိူဝ်းၸဝ်ႈၼမ်ၼႃႇဢေႃႈ။တပႄးၸဝ်ႈတင်းလၢႆဢၼ်ၵႃႈၼႂ်းဝဵင်းဢၼ်ႇတိဢုၵ်ႉၼၼ်ႉလႆႈၶၢမ်ႇတၢင်းဢၼ်ႁွင်ႉႁိၵ်ႈၸိုဝ်ဝႃႈၶရိၸ်ႉယၢၼ်ႇဝႃႈၼႆဢွၼ်ႈတၢင်းသုတ်းပိူၼ်ႈဢေႃႈ။

၂၇ ၶိင်ႇမိူဝ်ႈၼၼ်ႉပရေႃးၽႅတ်ႈၵမ်ႈၽွင်ႈလုၵ်ႉသေၵႃႈတီႈဝဵင်းယေႇရုသလႅမ်ႇလူင်းမႃးၵႃႈတီႈဝဵင်းဢၼ်ႇတိဢုၵ်ႉဢေႃႈ။ဢၼ်ပႃးၼႂ်းၶဝ်ၼၼ်ႉၵေႃႉၼိုင်ႈဢၼ်လႆႈၸိုဝ်ဢႃႇၵပု၊ၼၼ်ႉလုၵ်ႉၸုၵ်းသေယဝ်ႉၵွပ်ႈပိူဝ်ႈဝိၺိၺ်ႇမူတ်းၸၢင်ႇၸဝ်ႈလႄႈမၼ်းၽုၺ်ႇဢွၵ်ႇလၢတ်ႈၼႄလႄႈဝႃႈ၊-

၂၈ ၵႃႈၼိူဝ်လိၼ်မိူင်းၼႆႉတင်းသဵင်ႈတင်းလူင်တၵ်းပဵၼ်တၢင်းဢၼ်ဢိုပ်းတၢင်းၵိၼ်ဢၼ်ယႂ်ႇၼႃႇဢေႃႈ၊ဝႃႈၼင်ႇၼႆဢေႃႈ။(ပဵၼ်ၼႂ်းၸူဝ်ႈပၢၼ်ၶုၼ်ႁေႃၶမ်းၵေႇသႃႇၵလေႃႇတိဢေႃႈ)။

၂၉ မိူဝ်ႈၼၼ်ႉတပႄးၸဝ်ႈၸိူဝ်းၼၼ်ႉၸီႇယၢင်ႇၶိုင်ပွင်တၢင်းဢၼ်ၵမ်ႉဢၼ်ထွၵ်ႈပုၼ်ႈပီႈၼွင်ႉၸိူဝ်းဢၼ်မီးၵႃႈၼႂ်းမိူင်းယုတၸွမ်းၵႃႈၼင်ႇဢၼ်ၶဝ်တတ်ႈၼိုင်ႇလႆႈၼၼ်ႉႁင်းၽႂ်ႁင်းမၼ်းဢေႃႈ။

၃၀ ၶဝ်ဢဝ်တၢင်းဢၼ်ၵမ်ႉထွၵ်ႈၸွႆႈထႅမ်ၼၼ်ႉဢၢပ်ႈပၼ်ၼႂ်းမိုဝ်းပႃႇၼပတင်းသေႃးလုႁႂ်ႈလႆႈၵႂႃႇပၼ်ၵႃႈတီႈၵူၼ်းဢုပ်ႉၸိူဝ်းၸဝ်ႈၸိူဝ်းၼၼ်ႉဢေႃႈ။