Shan Missions

ၵျၢမ်းငဝ်ႈၵမ်ႇၽႃႇ

၁   ၂   ၃   ၄   ၅   ၆   ၇   ၈   ၉   ၁၀   ၁၁   ၁၂   ၁၃   ၁၄   ၁၅   ၁၆   ၁၇   ၁၈   ၁၉   ၂၀   ၂၁   ၂၂   ၂၃   ၂၄   ၂၅   ၂၆   ၂၇   ၂၈   ၂၉

၃၀   ၃၁   ၃၂   ၃၃   ၃၄   ၃၅   ၃၆   ၃၇   ၃၈   ၃၉   ၄၀   ၄၁   ၄၂   ၄၃   ၄၄   ၄၅   ၄၆   ၄၇   ၄၈   ၄၉   ၅၀   

၄၅

ယုဝ်းသႅပ်ႉလၢတ်ႈၼႄလွင်ႈတူဝ်ၸဝ်ႈၵဝ်ႇ

၁ မိူဝ်ႈၼၼ်ႉ ယုဝ်းသႅပ်ႉ ဢမ်ႇၶျုၵ်ႈဢိင်ႇတရေႇၵႃႈတီႈၽၢႆႇၼႃႈၵူၼ်း ဢၼ်မီးတီႈမၼ်းၸိူဝ်းၼၼ်ႉလႆႈလႄႈမၼ်းႁွင်ႉသႅၼ်ႇလႄႈဝႃႈ၊-ႁႂ်ႈၵူၼ်းတင်းသဵင်ႈတင်းလူင်ဢွၼ်ၵၼ်ဢွၵ်ႇသေၵႃႈတီႈၵဝ်ၼႆႉၵွႃႇသေၵမ်းတႃႉ၊ ဝႃႈၼင်ႇၼႆဢေႃႈ။မိူဝ်ႈဢၼ်မၼ်းမွၵ်ႇၼႄၸႃႇတိမၼ်းတီႈပီႈဢၢႆႈမၼ်းၸိူဝ်းၼၼ်ႉၸိုင်၊ၵူၼ်းတၢင်ႇတီႈသီႇ လႅၼ်ဢမ်ႇမီးၵႃႈတီႈၼၼ်ႉသေၵေႃႉသေၵူၼ်း။

၂ မၼ်းၵေႃႈႁဵတ်းတင်းသဵင်ဢၼ်ယႂ်ႇၼႃႇႁွင်ႉႁႆႈဢေႃႈ။ၵူၼ်းဢေႇၵႅပ်ႉတုတင်းလၢႆ ဢိၵ်ႇတင်းၵူၼ်းႁိူၼ်းၵူၼ်းယေးၶုၼ်ႁေႃၶမ်းၽႃႇရေႃးၸိူဝ်းၼၼ်ႉလႆႈငိၼ်းဢေႃႈ။

၃ ယုဝ်းသႅပ်ႉ လၢတ်ႈတီႈပီႈဢၢႆႈမၼ်းၸိူဝ်းၼၼ်ႉလႄႈဝႃႈ၊-ၵဝ်ၶႃႈၼႆႉပဵၼ်ယုဝ်းသႅပ်ႉၶႃႈဢေႃႈ။ပေႃႈၵဝ်ၶႃႈၼၼ်ႉဢသၢၵ်ႈလိပ်းယူႇႁိုဝ်၊ဝႃႈၼင်ႇၼႆဢေႃႈ။ပီႈဢၢႆႈမၼ်းၸိူဝ်းၼၼ်ႉၵႂင်ၸႂ်ယုင်ႈၸႂ် တေႃႇထိုင်ႁွတ်ႈထၢၼ်ႈပေႃးဢမ်ႇၶိုၼ်းလၢတ်ႈၵႂၢမ်းတေႃႇမၼ်းလႆႈဢေႃႈ။

၄ ယုဝ်းသႅပ်ႉ ၵေႃႈလၢတ်ႈတီႈပီႈဢၢႆႈမၼ်းၸိူဝ်းၼၼ်ႉလႄႈဝႃႈ၊-သုတ်ႉမႃးၸမ်ၸမ်ၵႃႈတီႈၵဝ်ၶႃႈတႃႉ၊မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၵေႃႈဢွၼ်ၵၼ်သုတ်ႉၸူးၸမ်ၸမ်ဢေႃႈ။မၼ်းၵေႃႈလၢတ်ႈလႄႈဝႃႈ၊-ၵဝ်ၶႃႈပဵၼ်ယုဝ်းသႅပ်ႉ၊ ၼွင်ႉၸၢႆးသူဢၼ်လႆႈၶၢႆၵွႃႇ ၵႃႈတီႈ မိူင်းဢေႇၵဵပ်ႉတု ၼၼ်ႉဢေႃႈ။

၅ တေႃႈလဵဝ်ၼႆႉယႃႇပေမီးၸႂ်ဢၼ်လဵၵ်ႉဢၼ်ဢူၼ်ႈလႄႈ ၸႂ်မႆႈၶႂ်ႈၸႃႉတီႈတူဝ်ၸဝ်ႈၵဝ်ႇ ၵွပ်ႈပိူဝ်ႈဢၼ်သူလႆႈၶၢႆမႅၼ်ႈၵဝ်ၶႃႈမႃးၵႃႈတီႈၼႆႉၼၼ်ႉသေၵမ်း။လွင်ႈမၼ်းၸမ်း၊ၽြႃးပဵၼ်ၸဝ်ႈလႆႈပွႆႇၸႂ်ႉၵဝ်ၶႃႈမႃးၵႃႈတီႈၼႆႉဢွၼ်တၢင်းသူ ႁႂ်ႈလႆႈၸွႆႈ ထႅမ်ဢသၢၵ်ႈၵူၼ်းဢေႃႈ။

၆ တၢင်းဢၼ်ပဵၼ်ၶဝ်ႈၵႃႊမၢၵ်ႇပႅင်းၵႃႈၼိူဝ်လိၼ်မိူင်းၼႆႉ လႆႈသွင်ပီႊယဝ်ႉ။ ပီႊဢၼ်ဢမ်ႇလႆႈႁဵတ်းၼႃး ဢမ်ႇလႆႈပၢတ်ႈၶဝ်ႈၼၼ်ႉ ယင်းမီးယူႇႁႃႈပီႊလူးၵွၼ်ႇဢေႃႈ။

၇ ၽြႃးပဵၼ်ၸဝ်ႈလႆႈပွႆႇၸႂ်ႉၵဝ်ၶႃႈမႃးဢွၼ်တၢင်းသူ ႁႂ်ႈသူလႆႈၵိုတ်းၵျၢၼ်ႇၵႃႈၼိူဝ်လိၼ်မိူင်းၼႆႉဢိၵ်ႇတင်း ႁႂ်ႈလႆႈဢဝ်တင်းတၢင်းဢၼ်ၵႄႇၶျွတ်ဢၼ်ယႂ်ႇၼႃႇႁႂ်ႈဢသၢၵ်ႈသူၵတ်း ယဵၼ်ၶျၢမ်းသႃႇဢေႃႈ။

၈ ပိူဝ်ႈၼႆလႄႈသူပွႆႇၸႂ်ႉၵဝ်ၶႃႈမႃးၵႃႈတီႈၼႆႉဢမ်ႇၸႂ်ႈ။ ၽြႃးပဵၼ်ၸဝ်ႈပွႆႇၸႂ်ႉၵဝ်ၶႃႈမႃးဢေႃႈ။မၼ်းၸဝ်ႈၶၢၼ်းၵဝ်ၶႃႈဝႆႉၼႂ်းဢရႃႇပေႃႈတီႈၶုၼ်ႁေႃၶမ်းၽႃႇရေႃး ၼႂ်းဢရႃႇၵေႃႉဢၼ်ဢုပ်ႉပိူင်ႇၵႃႈၼိူဝ်ႁေႃၶမ်း၊ၼႂ်းဢရႃႇၸဝ်ႈဢၼ် ဢုပ်ႉပိူင်ႇမိူင်း ဢေႇၵႅပ်ႉတု ၵႃႈမီးတင်းသဵင်ႈတင်းလူင်ၼႆႉယဝ်ႉ။

၉ ဢွၼ်ၵၼ်ႁဵတ်းၶၼ်ၶၼ်ၽႂ်းၽႂ်းလႄႈ ၶိုၼ်းမိူဝ်းၵွႃႇၵႃႈတီႈပေႃႈႁဝ်းၼၼ်ႉလႄႈလၢတ်ႈတီႈမၼ်းလႄႈဝႃႈ၊- လုၵ်ႈၸၢႆးပေႃႈႁဝ်းယုဝ်းသႅပ်ႉ ၼၼ်ႉလၢတ်ႈဝႃႈ၊-ၽြႃးပဵၼ်ၸဝ်ႈႁႂ်ႈၵဝ်ၶႃႈပဵၼ်ၸဝ်ႈမိူင်းဢေႇၵႅပ်ႉတုၵႃႈမီး တင်းသဵင်ႈတင်းလူင်ၶႃႈယဝ်ႉ။လူင်းမႃးၵႃႈတီႈၵဝ်ၶႃႈၼႆႉသေၵမ်း။

၁၀ ယႃႇပေႁဵတ်းၵွႆႈႁဵတ်းထိူင်းယူႇ။ပေႃႈႁဝ်းတၵ်းလႆႈယူႇၵႃႈတီႈမိူင်းၵေႃႇသိၼ်ႇဢေႃႈ။ ၸႃႉၸဵမ်ပေႃႈႁဝ်းလႄႈ လုၵ်ႈလၢၼ်ပေႃႈႁဝ်းၽုင်သူဝ်းၽုင်ဝူဝ်းပေႃႈႁဝ်းတင်းလၢႆဢိၵ်ႇတင်း ၵႃႈဢၼ်မီးတီႈပေႃႈႁဝ်းတင်းသဵင်ႈတင်းလူင်ၼၼ်ႉ တၵ်းလႆႈမီးၵႃႈတီႈဢၼ်ၸမ် ၵဝ်ၶႃႈဢေႃႈ။

၁၁ ၵဝ်ၶႃႈတၵ်းလႆႈလဵင်ႉလူပေႃႈႁဝ်းၵႃႈတီႈၼၼ်ႉဢေႃႈ။ လွင်ႈမၼ်းၸမ်းတၢင်းဢၼ်ၶဝ်ႈတၵ်းၵႃႈမၢၵ်ႇတၵ်းပႅင်းၼၼ်ႉယင်းၵိုတ်းၵျၢၼ်ႇယူႇ ႁႃႈပီႊၵွၼ်ႇဢေႃႈ။ၵူဝ်ၸႃႉၸဵမ်ပေႃႈႁဝ်းလႄႈၵူၼ်းႁိူၼ်းၵူၼ်းယေးဢိၵ်ႇတင်း ၵႃႈဢၼ်မီးတီႈပေႃႈႁဝ်းတင်းသဵင်ႈတင်းလူင်တၵ်းႁွတ်ႈထိုင်တၢင်းဢၼ်ယၢၵ်ႈဢၼ် ၽၢၼ်ဢေႃႈ၊ဝႃႈၼင်ႇၼႆတႃႉ။

၁၂ တူၺ်းလူႊ၊မၢၵ်ႇတႃသူဢိၵ်ႇတင်းမၢၵ်ႇတႃၼွင်ႉၸၢႆးၵဝ်ၶႃႈ ပိၼ်ႇယႃႇမိၼ်ႇလႆႈႁၼ်လွင်ႈဢၼ်ၵဝ်ၶႃႈ ဢဝ်သူပ်းၵဝ်ၶႃႈလၢတ်ႈ တေႃႇသူၼၼ်ႉယူႇဢေႃႈ။

၁၃ သူတၵ်းမွၵ်ႇလၢတ်ႈလွင်ႈၸႃႉၸဵမ်မုၼ်ၸေးၸိမ်ႇ ဢၼ်ၵဝ်ၶႃႈလႆႈၵႃႈတီႈမိူင်းဢေႇၵႅပ်ႉတု ၵႃႈဢၼ်သူလႆႈႁၼ်တင်းသဵင်ႈတင်းလူင် ၼၼ်ႉၵႃႈတီႈပေႃႈႁဝ်းဢေႃႈ။

၁၄ သူတၵ်းလႆႈႁဵတ်းၶၼ်ၶၼ်ၽႂ်းၽႂ်းလႄႈ ပႃးဢဝ်ပေႃႈႁဝ်းလူင်းမႃးၵႃႈတီႈမိူင်းၼႆႉဢေႃႈ၊ဝႃႈၼင်ႇၼႆသေယဝ်ႉ၊ မၼ်းၵွတ်ႇၶေႃးၼွင်ႉၸၢႆးမၼ်းပိၼ်ႇယႃႇမိၼ်လႄႈႁွင်ႉႁႆႈဢေႃႈ။ ပိၼ်ႇယႃႇမိၼ်ႇ ၵေႃႈၵွတ်ႇၶေႃးမၼ်းလႄႈႁွင်ႉႁႆႈဢေႃႈ။

၁၅ လိုၼ်းသေၼူမ်ႈပီႈဢၢႆႈမၼ်း တင်းသဵင်ႈတင်းလူင်လႄႈ ႁွင်ႉႁႆႈတေႃႇၵၼ်တင်းၶဝ်ယဝ်ႉၼၼ်ႉပီႈဢၢႆႈမၼ်းၸိူဝ်းၼၼ်ႉ ဢွၼ်ၵၼ်လၢတ်ႈၵႂၢမ်းတေႃႇၵၼ်တင်းမၼ်းဢေႃႈ။

၁၆ ၵႃႈတီႈႁေႃၶမ်း ငိၼ်းသတၢင်းသဵင်ၶၢဝ်ႇလွင်ႈဢၼ်ပီႈဢၢႆႈယုဝ်းသႅပ်ႉ ၸိူဝ်းၼၼ်ႉႁွတ်ႈမႃးယဝ်ႉၼၼ်ႉလႄႈၸႃႉၸဵမ်ၶုၼ်ႁေႃၶမ်းၽႃႇရေႃး လႄႈၶႃႈမၼ်းၵူၼ်းမၼ်းတင်းလၢႆထုၵ်ႇၸႂ်ၵျိူၵ်ႈၸႂ်ၼႃႇဢေႃႈ။

၁၇ ၶုၼ်ႁေႃၶမ်းၽႃႇရေႃး ၵေႃႈမီးဢမိင်ႉလၢတ်ႈတီႈယုဝ်းသႅပ်ႉ လႄႈဝႃႈ၊-မႂ်းတၵ်းလႆႈလၢတ်ႈတီႈပီႈဢၢႆႈမႂ်းၸိူဝ်းၼၼ်ႉၸိူဝ်ႉၼင်ႇႁိုဝ်ဝႃႈၼႆၸမ်း၊- သူႁဵတ်းၸိူဝ်ႉၼင်ႇၼႆတႃႉ။ ဢွၼ်ၵၼ်ဢဝ်ၶူဝ်းဢဝ်လဵင်းတၢင်ႇၵႃႈၼိူဝ်တရိၵ်ႈသၢၼ်ႇသူတင်းလၢႆသေလႄႈ ၶိုၼ်းမိူဝ်းၵွႃႇ ၵႃႈတီႈမိူင်းၶႃႇၼၼ်ႇ ပုၼ်ႉလူးၵွၼ်ႇတႃႉ။

၁၈ ဢဝ်ပေႃႈသူဢိၵ်ႇတင်း ၵူၼ်းႁိူၼ်းၵူၼ်းယေးသူတင်းလၢႆလႄႈမႃးၵႃႈတီႈၵဝ်တႃႉ။ၵဝ်တၵ်းဢဝ်ၸေးၸိမ်ႇမိူင်းဢေႇၵႅပ်ႉတုပၼ်လႄႈ သူၵေႃႈတၵ်းလႆႈၵိၼ်ၶွၼ်ႇၼမ်ႉမၼ်းလိၼ် ဢေႃႈ။

၁၉ ပိူဝ်ႈဢၼ်ဢမိင်ႉၸဝ်ႈမီးလႄႈ ဢွၼ်ၵၼ်ႁဵတ်းၸိူဝ်ႉၼင်ႇၼႆတႃႉ။ ပုၼ်ႈမေႈယိင်းသူဢိၵ်ႇတင်းလုၵ်ႈဢွၼ်ႇသူတင်းလၢႆၸိုင်၊ဢဝ်လေႃႉရထႃးၵႃႈၼႂ်းမိူင်းဢေႇၵႅပ်ႉတုၼႆႉၵွႃႇသေယဝ်ႉ ပႃးဢဝ်ပေႃႈသူလႄႈမႃး တႃႉ။

၂၀ ယႃႇပေသေလၢႆဢုၵ်ႉၸႃႇၶူဝ်းလဵင်းသူ။ၸႃႉၸဵမ်မိူင်းဢေႇၵႅပ်ႉတု ၵႃႈမီးတင်းသဵင်ႈတင်းလူင်ပဵၼ်ဢုၵ်ႉၸႃႇသူယဝ်ႉ၊ ဝႃႈၼင်ႇၼႆသေယဝ်ႉ၊လုၵ်ႈၸၢႆးဢိသရေႇလ ၸိူဝ်းၼၼ်ႉၵေႃႈ ဢွၼ်ၵၼ်ႁဵတ်းၸိူဝ်ႉၼင်ႇၼၼ်လႄႈ

၂၁ ယုဝ်းသႅပ်ႉ ၵေႃႈဢဝ်လေႃႉရထႃးလႂ်ဢိၵ်ႇတင်းၸရိၵ်ႈတၢင်းၵိၼ်ပုၼ်ႈ ဢၼ်ၶဝ်တၵ်းၵိၼ်ၵႃႈတႃႈၵႃႈတၢင်းလႂ်ၼၼ်ႉပၼ်တီႈၶဝ်ၵႃႈၼင်ႇဢၼ် ၶုၼ်ႁေႃၶမ်း ၽႃႇရေႃးမီးဢမိင်ႉၼၼ်ႉဢေႃႈ။

၂၂ တီႈၶဝ်တင်းသဵင်ႈတင်းလူင်ၼၼ်ႉၵေႃႈ မၼ်းဢဝ်ၶူဝ်းၼုင်ႈပုၼ်ႈဢၼ်တၵ်းပုတ်ႈတၵ်းလၢႆၼၼ်ႉပၼ်ဢေႃႈ။တီႈ ပိၼ်ႇယႃႇမိၼ်ႇၵေႃႈမၼ်းထၢပ်ႈထႅင်ႈလႄႈ ပၼ်ငိုၼ်းသၢမ်ပၢၵ်ႇၵျၢပ်ႈတင်းၶူဝ်းၼုင်ႈဢၼ်တၵ်းပုတ်ႈတၵ်းလၢႆႈ ႁႃႈၸုမ်ႇ ဢေႃႈ။

၂၃ တီႈပေႃႈမၼ်းၵေႃႈမၼ်းဢဝ်မႃႉလီႈဢၼ်တၢင်ႇၶိူင်ႈပိူင်ဢၼ်လီဢၼ်ငၢမ်းမိူင်းဢေႇၵႅပ်ႉတုၼၼ်ႉ သိပ်းၼိုင်ႈ၊မႃႉလီႈမေႈဢၼ်တၢင်ႇၶဝ်ႈၵျုင်ႇၶဝ်ႈမုၼ်း တၢင်းၵိၼ်တၢင်းၶူပ်း ပုၼ်ႈဢၼ်ပေႃႈမၼ်းတၵ်းၵိၼ်ၵႃႈတႃႈၵႃႈတၢင်းၼၼ်ႉသိပ်းၼိုင်ႈလႄႈပၼ်ၵွႃႇဢေႃႈ။

၂၄ မၼ်းသင်ႇလၢတ်ႈတီႈၶဝ်လႄႈဝႃႈ၊-သူယႃႇပေၽိတ်းၵၼ်ၵႃႈတႃႈၵႃႈတၢင်း၊ ဝႃႈၼင်ႇၼႆသေယဝ်ႉပွႆႇပီႈဢၢႆႈမၼ်းၸိူဝ်းၼၼ်ႉၶိုၼ်းမိူဝ်းၵွႃႇဢေႃႈ။

၂၅ ၼင်ႇၼၼ်လႄႈ ၶဝ်ဢွၵ်ႇသေၵႃႈၼႂ်းမိူင်းဢေႇၵႅပ်ႉတုၵွႃႇလႄႈႁွတ်ႈထိုင်ၵႃႈတီႈပေႃႈၶဝ်ယႃႇၵုပ်ႉ ၵႃႈၼႂ်းမိူင်းၶႃႇၼၼ်ႇ ၼၼ်ႉသေယဝ်ႉ၊ဢွၼ်ၵၼ် မွၵ်ႇလၢတ်ႈတီႈမၼ်းလႄႈဝႃႈ၊-ယုဝ်းသႅပ်ႉ ဢသၢၵ်ႈလိပ်းယူႇဢေႃႈ။

၂၆ မၼ်းပဵၼ်ၵေႃႉဢၼ်ဢုပ်ႉၵႃႈၼိူဝ်မိူင်းဢေႇၵႅပ်ႉတု တင်းသဵင်ႈတင်းလူင်ၼၼ်ႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင် ယႃႇၵုပ်ႉၼၼ်ႉႁူဝ်ၸႂ်ၵတ်းၵွႃႇမူၺ်ၵွႃႇလႄႈ မၼ်းဢမ်ႇယုမ်ႇၵႂၢမ်းၶဝ်ၼၼ်ႉလႆႈ။ၶဝ်ၵေႃႈဢွၼ်ၵၼ်ၶိုၼ်းမွၵ်ႇလၢတ်ႈၵႂၢမ်းဢၼ်ယုဝ်းသႅပ်ႉ သင်လၢတ်ႈမႃးတင်းသဵင်ႈတင်းလူင်ၸိူဝ်းၼၼ်ႉဢေႃႈ။

၂၇ ပေႃႈၶဝ်ယႃႇၵုပ်ႉၼၼ်ႉမိူဝ်ႈဢၼ်ႁၼ်လေႃႉရထႃးဢၼ်ယုဝ်းသႅပ်ႉ ပၼ်မႃးပုၼ်ႈဢၼ်မၼ်းတၵ်းၶီႇၸိူဝ်းၼၼ်ႉၸိုင် ႁူဝ်ၸႂ်မၼ်းသမ်ႉ ၶိုၼ်းဢုၼ်ႇၶိုၼ်းလီမႃးဢေႃႈ။

၂၈ ဢိသရေႇလ ၵေႃႈလၢတ်ႈလႄႈဝႃႈ၊-ပေႃးလူးၵွၼ်ႇတႃႉ။ယုဝ်းသႅပ်ႉ လုၵ်ႈၸၢႆးၵဝ်ၼၼ်ႉ ဢသၢၵ်ႈယင်းလိပ်းယူႇဢေႃႈ။ ၸူဝ်ႈဢၼ်ၵဝ်ဢမ်ႇပႆႇတၢႆၼႆႉၸိုင်၊ၵဝ်တၵ်းၵွႃႇလႄႈ တူၺ်းမၼ်းလူးၵွၼ်ႇဢေႃႈ၊ဝႃႈၼင်ႇၼႆဢေႃႈ။