Shan Missions

ဝုတ်ႉထုတမၢၼ်ႇၸဝ်ႈ

Chapter      ၁          ၂          ၃          ၄         ၅          ၆          ၇          ၈          ၉          ၁၀          ၁၁         ၁၂          ၁၃          ၁၄          ၁၅          ၁၆          ၁၇         

၁၈          ၁၉          ၂၀          ၂၁          ၂၂         ၂၃          ၂၄          ၂၅         ၂၆          ၂၇          ၂၈         

၃

ပေႇတရုႁႂ်ႈၵူၼ်းတိၼ်တၢႆႁၢႆၶႅၼ်း

၁ ၼႂ်းၶိင်ႇၼႃႇရီႇဢၼ်ႁဵတ်းသူးတွင်းပထၼႃႇဢၼ်ပဵၼ်ၶိင်ႇၵဝ်ႈၼႃႇရီႇၼၼ်ႉ၊ပေႇတရုတင်းယုဝ်းႁၢၼ်ႇၵႂႃႇၶိုၼ်ႈပိၵ်ႉမၢၼ်ႇၸဝ်ႈဢေႃႈ။

၂ ပိူၼ်ႈႁၢမ်ဢဝ်ၵူၼ်းၵေႃႉၼိုင်ႈဢၼ်တိၼ်တၢႆၸဵမ်မိူဝ်ႈၼႂ်းတွင်ႉမေႈမၼ်းၼၼ်ႉမႃးလႄႈဢဝ်မၼ်းဝႆႉၵႃႈတီႈႁိမ်းၽၵ်းတူဢၼ်လႆႈၸိုဝ်ၽၵ်းတူႁၢင်ႊလီ၊ၼၼ်ႉၵူႈဝၼ်း၊ႁႂ်ႈမၼ်းလႆႈယွၼ်းၶၢမ်ႇဢဝ်တၢင်းဢၼ်ၵူၼ်းမႃးၶိုၼ်ႈပိၵ်ႉမၢၼ်ႇၸဝ်ႈၽေးၸွၼ်းယိုၼ်ႈမႅင်ႇၼၼ်ႉဢေႃႈ။

၃ မိူဝ်ႈဢၼ်မၼ်းႁၼ်ပေႇတရုတင်းယုဝ်းႁၢၼ်ႇတၵ်းၶဝ်ႈၼႂ်းပိၵ်ႉမၢၼ်ႇၸဝ်ႈၼၼ်ႉၸိုင်မၼ်းယွၼ်းလႄႈဝႃႈ၊-ၽေးၸွၼ်းယိုၼ်ႈမႅင်ႇဢိတ်းၼိုင်ႈသေၵမ်းၶႃႈ၊ဝႃႈၼင်ႇၼႆဢေႃႈ။

၄ မိူဝ်ႈၼၼ်ႉပေႇတရုတင်းယုဝ်းႁၢၼ်ႇယႅၵ်ႉတူၺ်းမၼ်းၸေးၸေးသေလႄႈလၢတ်ႈဝႃႈ၊-

၅ ႁႅၼ်တူၺ်းႁဝ်းတႃႉ၊ဝႃႈၼင်ႇၼႆလႄႈမၼ်းၵေႃႈထၢင်ႇဝႃႈတၵ်းလႆႈသေၸိူဝ်ႉသေပိူင်ယဝ်ႉဝႃႈၼႆလႄႈႁႅၼ်တူၺ်းတမၢၼ်ႇၸဝ်ႈသွင်ပႃးၼၼ်ႉဢေႃႈ။

၆ ပေႇတရုၵေႃႈလၢတ်ႈလႄႈဝႃႈ၊-ၵဝ်ဢမ်ႇမီးငိုၼ်းမီးၶမ်း။ၵူၺ်းၵႃႈဢၼ်ၵဝ်မီးၼၼ်ႉၵဝ်တၵ်းပၼ်တီႈမႂ်းဢေႃႈ။

၇ ဢိင်ပိုင်ႈၼႃႇမႃႉၸိုဝ်သဵင်ၸဝ်ႈယေႇသုၶရိၸ်ႉ၊ၵူၼ်းဝဵင်းၼႃႇၸရႅတ်ႉၼၼ်ႉသေလႄႈလုၵ်ႉပႆတၢင်းၵႂႃႇတႃႉ၊ဝႃႈၼင်ႇၼႆသေယဝ်ႉ၊ယိပ်းၵမ်ဢဝ်မိုဝ်းၶွၼ်ၶႂႃမၼ်းယုၵ်ႉၶိုၼ်ႈလႄႈတိၼ်တင်းတႃတိၼ်မၼ်းသွင်ၶွၼ်ၼၼ်ႉၵေႃႈမီးႁႅင်းမႃးၵမ်းလဵဝ်ဢေႃႈ။

၈ မၼ်းၸင်ႇၽုတ်းလုၵ်ႉသေယဝ်ႉပႆတၢင်းၵႂႃႇယူႇ၊ၵျွၵ်းဝႅၼ်ယူႇ၊ယွင်ႈယေႃးၽြႃးပဵၼ်ၸဝ်ႈယူႇသေလႄႈၶဝ်ႈၵႃႈၼႂ်းပိၵ်ႉမၢၼ်ႇၸဝ်ႈလူၺ်ႈၵၼ်တင်းၶဝ်ဢေႃႈ။

၉ မိူဝ်ႈဢၼ်ၵူၼ်းတင်းသဵင်ႈတင်းလူင်ႁၼ်မၼ်းပႆတၢင်းလႄႈယွင်ႈယေႃးၽြႃးပဵၼ်ၸဝ်ႈယူႇၼၼ်ႉၸိုင်ပိူဝ်ႈဢၼ်ၶဝ်ႁူႉလွင်ႈဢၼ်မၼ်းပဵၼ်ၵေႃႉဢၼ်ယၢမ်ႈၼင်ႈယူႇၵႃႈတီႈႁိမ်းၽၵ်းတူႁၢင်ႊလီပိၵ်ႉမၢၼ်ႇၸဝ်ႈလႄႈ

၁၀ ၶၢမ်ႇဢဝ်တၢင်းဢၼ်ပိူၼ်ႈၽေးၸွၼ်းယိုၼ်ႈမႅင်ႇၼၼ်ႉၸိုင်ၶဝ်ဢွၼ်ၵၼ်ဢၢမ်းၼႃႇလူင်လၢင်ၵႂင်ၸႂ်ယုင်ႈၸႂ်လူၺ်ႈလွင်ႈတၢင်ႈဢၼ်ပဵၼ်မႃးၵႃႈတီႈမၼ်းၼၼ်ႉဢေႃႈ။

ပေႇတရုႁေႃးလၢတ်ႈပၼ်ၶဝ်ၸိူဝ်းဢၼ်ၸူႉတုမ်ၵၼ်

၁၁ ၼႂ်းမိူဝ်ႈဢၼ်မၼ်းၸပ်းၸွမ်းယူႇႁိမ်းပေႇတရုတင်းယုဝ်းႁၢၼ်ႇယူႇၼၼ်ႉၵူၼ်းတင်းသဵင်ႈတင်းလူင်ၼမ်ၼႃႇၶုၼ်ႇလႅၼ်ႈၵႂႃႇၸူးၵႃႈတီႈၸၢၼ်းဢၼ်လႆႈႁွင်ႉႁိၵ်ႈၸိုဝ်ၸၢၼ်းသေႃးလမုၼ်ႇၼၼ်ႉဢေႃႈ။

၁၂ ပေႇတရုႁၼ်သေယဝ်ႉလၢတ်ႈတီႈၵူၼ်းၸိူဝ်းၼၼ်ႉလႄႈဝႃႈ၊-ၵူၼ်းဢိသရေႇလၶဝ်ဢိူၺ်းႁဵတ်းသင်လႄႈသူဢၢမ်းလွင်ႈၵူၼ်းၵေႃႉၼႆႉ။ႁဵတ်းသင်လႄႈသူယႅၵ်ႉတူၺ်းႁဝ်းၸေးၸေးၸွတ်ႇၸွတ်ႇယူႇမိူၼ်ၸိူဝ်ႉၼင်ႇႁၢင်ႊႁဝ်းဢဝ်တၼ်းၶူဝ်းႁဝ်းဢိၵ်ႇတင်းသီႇလတူဝ်ၸဝ်ႈၵဝ်ႇသေလႄႈႁဵတ်းႁႂ်ႈၵေႃႉၼႆႉပႆတၢင်းၵႂႃႇလႆႈၼၼ်ႉ။

၁၃ ၽြႃးပဵၼ်ၸဝ်ႈဢႃႇပြႁၢမ်ႇ၊ဢိၸၵ်ႉ၊ယႃႇၵုပ်ႉ၊ၽြႃးပဵၼ်ၸဝ်ႈပူႇႁဝ်းပေႃႈႁဝ်းၼၼ်ႉႁဵတ်းႁႂ်ႈမူၼ်ၽုင်းလုၵ်ႈၸဝ်ႈၸဝ်ႈဢၼ်သူဢဝ်ဢၢပ်ႈပၼ်ၼႂ်းမိုဝ်းၶုၼ်ပိလၢတ်ႉ၊ပဵၵ်ႉသမ်ႉၶုၼ်ၼၼ်ႉၶႂ်ႈပွႆႇမၼ်းၸဝ်ႈလွတ်ႈသေၵေႃႈသူသမ်ႉပႄႇပႅတ်ႈၼၼ်ႉ၊လႆႈထၢင်ႇသႃးမႃးယဝ်ႉ။

၁၄ သူပႄႇပႅတ်ႈၸဝ်ႈမူတ်းၸၢင်ႇသိုဝ်ႈတေႃႇၼၼ်ႉသေလႄႈယွၼ်းဢဝ်ႁႂ်ႈၵူၼ်းၵေႃႉၼိုင်ႈဢၼ်ဢဝ်ဢသၢၵ်ႈပိူၼ်ႈတၢႆၼၼ်ႉလွတ်ႈလႄႈသမ်ႉဢဝ်ၸဝ်ႈဢသၢၵ်ႈၼၼ်ႉတၢႆယဝ်ႉလူင်ပေႇ။

၁၅ လွင်ႈဢၼ်ၽြႃးပဵၼ်ၸဝ်ႈႁႂ်ႈၸဝ်ႈၼၼ်ႉလုၵ်ႉၵႃႈတၢင်းတၢႆၶိုၼ်းလိပ်းၼၼ်ႉႁဝ်းပဵၼ်ၵေႃႉဢၼ်ၶၢမ်ႇသၢၵ်ႈသေႇဢေႃႈ။

၁၆ ၵွပ်ႈပိူဝ်ႈတၢင်းဢၼ်ယုမ်ႇမၢတ်ႈၼႃႇမႃႉၸိုဝ်သဵင်မၼ်းၸဝ်ႈၼၼ်ႉလႄႈၼႃႇမႃႉၸိုဝ်သဵင်မၼ်းၸဝ်ႈၼၼ်ႉပၼ်ႁႅင်းတီႈၵေႃႉဢၼ်သူႁူႉသူႁၼ်ၼႆႉယဝ်ႉ။တၢင်းဢၼ်ယုမ်ႇမၢတ်ႈဢၼ်လႆႈၵွပ်ႈပိူဝ်ႈမၼ်းၸဝ်ႈၼၼ်ႉပၼ်ႁႂ်ႈၵေႃႉၼႆႉၸေးၸုမ်ႇသိုဝ်ႈၼႃႈတႂ်ႈတႃသူတင်းသဵင်ႈတင်းလူင်ယဝ်ႉ။

၁၇ တေႃႈလဵဝ်ၼႆႉၵေႃႈပီႈၼွင်ႉၶဝ်ဢိူၺ်း၊ၵဝ်ႁူႉလွင်ႈဢၼ်ၸႃႉၸဵမ်သူဢိၵ်ႇတင်းၶဝ်ၸိူဝ်းဢၼ်ဢုပ်ႉပိူင်ႇသူၼၼ်ႉဢမ်ႇႁူႉလႄႈၸင်ႇလႆႈႁဵတ်းၼၼ်ႉဢေႃႈ။

၁၈ လွင်ႈတၢင်းဢၼ်ၽြႃးပဵၼ်ၸဝ်ႈဢဝ်တင်းသူပ်းပရေႃးၽႅတ်ႈတင်းသဵင်ႈတင်းလူင်ၽုၺ်ႇဢွၵ်ႇၼႄပျႃးႁေႃးလၢတ်ႈဝႆႉဢွၼ်တၢင်းလွင်ႈတၢင်းဢၼ်ၸဝ်ႈၶရိၸ်ႉတၵ်းလႆႈၶၢမ်ႇတၢင်းတၢႆၼၼ်ႉႁႂ်ႈတဵမ်ဝႆႉယဝ်ႉတူဝ်ၸိူဝ်ႉၼင်ႇၼႆဢေႃႈ။

၁၉ ပိူဝ်ႈၼႆလႄႈၼင်ႇႁိုဝ်ၶိင်ႇၵႃႇလႃႉဢၼ်ၵတ်းယဵၼ်ၶျၢမ်းသႃႇၼၼ်ႉတၵ်းလုၵ်ႉသေၵႃႈတီႈထႃႇဝရႃႉၽြႃးႁွတ်ႈထိုင်မႃးၸိုင်

၂၀ မၼ်းၸဝ်ႈတၵ်းပွႆႇၸႂ်ႉၸဝ်ႈၶရိၸ်ႉဢၼ်မၼ်းၸဝ်ႈၶၢၼ်းဝႆႉပုၼ်ႈသူၼၼ်ႉမႃးဢေႃႈ။ပုၼ်ႈလွင်ႈၼင်ႇႁိုဝ်ဢပျႅတ်ႈသူတင်းသဵင်ႈတင်းလူင်တၵ်းပျေႇၼၼ်ႉၶုၵ်းၸႂ်လႆႈမႆႈၸႂ်လႄႈၶၢႆႉပုတ်ႈႁူဝ်ၸႂ်သူတႃႉ။

၂၁ ၸဝ်ႈၶရိၸ်ႉၼၼ်ႉၸူဝ်ႈဢၼ်ၵၢပ်ႈၶိင်ႇၵႃႇလႃႉဢၼ်တၵ်းဢဝ်လွင်ႈတၢင်းတင်းသဵင်ႈတင်းလူင်မႄးႁဵတ်းဢၼ်မႂ်ႇဢၼ်ၽြႃးပဵၼ်ၸဝ်ႈဢဝ်တင်းသူပ်းပရေႃးၽႅတ်ႈမူတ်းၸၢင်ႇဢၼ်ပဵၼ်မႃးၸႃႉၸဵမ်ၵမ်ႇၽႃႇၸႃႉတႄႇၸိူဝ်းၼၼ်ႉဝႆႉပျႃႇတိၵ်ႈၼၼ်ႉဢမ်ႇပႆႇႁွတ်ႈပႆႇထိုင်ၼၼ်ႉၸိုင်မိူင်းၵၢင်ႁၢဝ်ၸဝ်ႈတၵ်းလႆႈၶၢမ်ႇဢဝ်တၢင်းဢၼ်သိမ်းဝႆႉဢေႃႈ။

၂၂ မုဝ်းသေႇလၢတ်ႈဝႆႉလႄႈဝႃႈ၊-ၽြႃးပဵၼ်ၸဝ်ႈသူထႃႇဝရႃႉၽြႃးတၵ်းႁႂ်ႈပရေႃးၽႅတ်ႈဢၼ်မိူၼ်ၸိူဝ်ႉၼင်ႇၵဝ်ၼၼ်ႉၵေႃႉၼိုင်ႈပေႃႇဢွၵ်ႇမႃးၵႃႈၼႂ်းပီႈၼွင်ႉၸိူဝ်ႉၶိူဝ်းသူပုၼ်ႈသူဢေႃႈ။လွင်ႈတၢင်းဢၼ်မၼ်းႁေႃးလၢတ်ႈၵႃႈမီးတင်းသဵင်ႈတင်းလူင်ၼၼ်ႉသူတၵ်းလႆႈထွမ်ႇဢဝ်ဢေႃႈ။

၂၃ ၽူႈလႂ်သေဢမ်ႇဝႃႈၵေႃႉဢၼ်ဢမ်ႇထွမ်ႇဢမ်ႇဢဝ်ၵႂၢမ်းပရေႃးၽႅတ်ႈၼၼ်ႉၵေႃႉၼၼ်ႉတၵ်းလႆႈၶၢမ်ႇတၢင်းဢၼ်ပႄႇပႅတ်ႈသေၵႃႈၼႂ်းပီႈၼွင်ႉၸိူဝ်ႉၶိူဝ်းတူဝ်ၸဝ်ႈၵဝ်ႇဢေႃႈ၊ဝႃႈၼင်ႇၼႆဢေႃႈ။

၂၄ ၸႃႉၸဵမ်ပရေႃးၽႅတ်ႈသမူၺ်ႇလလႄႈပရေႃးၽႅတ်ႈဢၼ်ႁေႃးလၢတ်ႈၵမ်းလိုၼ်းၵႃႈမီးတင်းသဵင်ႈတင်းလူင်ၼၼ်ႉမွၵ်ႇလၢတ်ႈၼႄပျႃးၶိင်ႇၵႃႇလႃႉဝၼ်းၼႆႉဝႆႉယဝ်ႉ။

၂၅ သူပဵၼ်ၸိူဝ်ႉၶိူဝ်းပရေႃးၽႅတ်ႈဢေႃႈ။သူၸၢပ်ႈသႅင်ႇၵၼ်တင်းပတိၺိၼ်ႇတြႃးဢၼ်ၽြႃးပဵၼ်ၸဝ်ႈပၼ်တီႈပူႇပေႃႈႁဝ်းၼၼ်ႉလႄႈဝႆႉပျႃႇတိၵ်ႈၵႃႈတီႈဢႃႇပြႁၢမ်ႇလႄႈဝႃႈ၊-ၵႃႈၼႂ်းၸိူဝ်ႉၶိူဝ်းမႂ်းၼႆႉမဵဝ်းၵူၼ်းတင်းသဵင်ႈတင်းလူင်တၵ်းလႆႈၶၢမ်ႇဢဝ်တၢင်းလီမင်ႇၵလႃႇဢေႃႈ၊ဝႃႈၼင်ႇၼႆၼၼ်ႉဢေႃႈ။

၂၆ ၽြႃးပဵၼ်ၸဝ်ႈႁႂ်ႈၸဝ်ႈယေႇသု၊လုၵ်ႈမၼ်းၸဝ်ႈ၊ပေႃႇမႃးသေယဝ်ႉ၊ပွႆႇၸႂ်ႉမၼ်းၸဝ်ႈမႃးၵႃႈတီႈသူဢွၼ်တၢင်းႁႂ်ႈမၼ်းၸဝ်ႈလႆႈပၼ်တၢင်းလီမင်ႇၵလႃႇတီႈသူၼႂ်းလွင်ႈတၢင်းဢၼ်တၵ်းႁႂ်ႈသူၵူႈၵေႃႉၵူႈၵူၼ်းဝေႈပႅတ်ႈဢပျႅတ်ႈၼၼ်ႉဢေႃႈ၊ဝႃႈၼင်ႇၼႆဢေႃႈ။